1 Chronicles (1 Divrey Yamim) Chapter 17

‎1 ‏וַיְהִ֕י³ כַּאֲשֶׁ֛ר יָשַׁ֥ב דָּוִ֖יד בְּבֵית֑וֹ וַיֹּ֨אמֶר דָּוִ֜יד אֶל־נָתָ֣ן הַנָּבִ֗יא הִנֵּ֨ה אָנֹכִ֤י יוֹשֵׁב֙ בְּבֵ֣ית הָֽאֲרָזִ֔ים וַאֲר֥וֹן בְּרִית־יְהוָ֖ה תַּ֥חַת יְרִיעֽוֹת׃

‎2 ‏וַיֹּ֤אמֶר נָתָן֙ אֶל־דָּוִ֔יד כֹּ֛ל אֲשֶׁ֥ר בִּֽלְבָבְךָ֖ עֲשֵׂ֑ה כִּ֥י הָאֱלֹהִ֖ים עִמָּֽךְ׃ ס

‎3 ‏וַֽיְהִ֖י בַּלַּ֣יְלָה הַה֑וּא וַיְהִי֙ דְּבַר־אֱלֹהִ֔ים אֶל־נָתָ֖ן לֵאמֹֽר׃

‎4 ‏לֵ֤ךְ וְאָמַרְתָּ֙ אֶל־דָּוִ֣יד עַבְדִּ֔י כֹּ֖ה אָמַ֣ר יְהוָ֑ה לֹ֥א אַתָּ֛ה תִּבְנֶה־לִּ֥י הַבַּ֖יִת לָשָֽׁבֶת׃

‎5 ‏כִּ֣י לֹ֤א יָשַׁ֙בְתִּי֙ בְּבַ֔יִת מִן־הַיּ֗וֹם אֲשֶׁ֤ר הֶעֱלֵ֙יתִי֙ אֶת־יִשְׂרָאֵ֔ל עַ֖ד הַיּ֣וֹם הַזֶּ֑ה וָֽאֶהְיֶ֛ה מֵאֹ֥הֶל אֶל־אֹ֖הֶל וּמִמִּשְׁכָּֽן׃

‎6 ‏בְּכֹ֥ל אֲשֶֽׁר־הִתְהַלַּכְתִּי֮ בְּכָל־יִשְׂרָאֵל֒ הֲדָבָ֣ר דִּבַּ֗רְתִּי אֶת־אַחַד֙ שֹׁפְטֵ֣י יִשְׂרָאֵ֔ל אֲשֶׁ֥ר צִוִּ֛יתִי לִרְע֥וֹת אֶת־עַמִּ֖י לֵאמֹ֑ר לָ֛מָּה לֹא־בְנִיתֶ֥ם לִ֖י בֵּ֥ית אֲרָזִֽים׃

‎7 ‏וְ֠עַתָּה כֹּֽה־תֹאמַ֞ר לְעַבְדִּ֣י לְדָוִ֗יד סכֹּ֤ה אָמַר֙ יְהוָ֣ה צְבָא֔וֹת אֲנִ֤י לְקַחְתִּ֙יךָ֙ מִן־הַנָּוֶ֔ה מִֽן־אַחֲרֵ֖י הַצֹּ֑אן לִהְי֣וֹת נָגִ֔יד עַ֖ל עַמִּ֥י יִשְׂרָאֵֽל׃

‎8 ‏וָֽאֶהְיֶ֣ה עִמְּךָ֗ בְּכֹל֙ אֲשֶׁ֣ר הָלַ֔כְתָּ וָאַכְרִ֥ית אֶת־כָּל־אוֹיְבֶ֖יךָ מִפָּנֶ֑יךָ וְעָשִׂ֤יתִֽי לְךָ֙ שֵׁ֔ם כְּשֵׁ֥ם הַגְּדוֹלִ֖ים אֲשֶׁ֥ר בָּאָֽרֶץ׃

‎9 ‏וְשַׂמְתִּ֣י מָ֠קוֹם לְעַמִּ֨י יִשְׂרָאֵ֤ל וּנְטַעְתִּ֙יהוּ֙ וְשָׁכַ֣ן תַּחְתָּ֔יו וְלֹ֥א יִרְגַּ֖ז ע֑וֹד וְלֹא־יוֹסִ֤יפוּ בְנֵי־עַוְלָה֙ לְבַלֹּת֔וֹ כַּאֲשֶׁ֖ר בָּרִאשׁוֹנָֽה׃

‎10 ‏וּלְמִיָּמִ֗ים אֲשֶׁ֨ר צִוִּ֤יתִי שֹֽׁפְטִים֙ עַל־עַמִּ֣י יִשְׂרָאֵ֔ל וְהִכְנַ֖עְתִּי אֶת־כָּל־אוֹיְבֶ֑יךָ וָאַגִּ֣ד לָ֔ךְ וּבַ֖יִת יִֽבְנֶה־לְּךָ֥ יְהוָֽה׃

‎11 ‏וְהָיָ֗ה כִּֽי־מָלְא֤וּ יָמֶ֙יךָ֙ לָלֶ֣כֶת עִם־אֲבֹתֶ֔יךָ וַהֲקִֽימוֹתִ֤י אֶֽת־זַרְעֲךָ֙ אַחֲרֶ֔יךָ אֲשֶׁ֥ר יִהְיֶ֖ה מִבָּנֶ֑יךָ וַהֲכִינוֹתִ֖י אֶת־מַלְכוּתֽוֹ׃

‎12 ‏ה֥וּא יִבְנֶה־לִּ֖י בָּ֑יִת וְכֹנַנְתִּ֥י אֶת־כִּסְא֖וֹ עַד־עוֹלָֽם׃

‎13 ‏אֲנִי֙ אֶֽהְיֶה־לּ֣וֹ לְאָ֔ב וְה֖וּא יִֽהְיֶה־לִּ֣י לְבֵ֑ן וְחַסְדִּי֙ לֹא־אָסִ֣יר מֵֽעִמּ֔וֹ כַּאֲשֶׁ֣ר הֲסִיר֔וֹתִי מֵאֲשֶׁ֥ר הָיָ֖ה לְפָנֶֽיךָ׃

‎14 ‏וְהַֽעֲמַדְתִּ֛יהוּ בְּבֵיתִ֥י וּבְמַלְכוּתִ֖י עַד־הָעוֹלָ֑ם וְכִסְא֕וֹ יִהְיֶ֥ה נָכ֖וֹן עַד־עוֹלָֽם׃

‎15 ‏כְּכֹל֙ הַדְּבָרִ֣ים הָאֵ֔לֶּה וּכְכֹ֖ל הֶחָז֣וֹן הַזֶּ֑ה כֵּ֛ן דִּבֶּ֥ר נָתָ֖ן אֶל־דָּוִֽיד׃ פ

‎16 ‏וַיָּבֹא֙ הַמֶּ֣לֶךְ דָּוִ֔יד וַיֵּ֖שֶׁב לִפְנֵ֣י יְהוָ֑ה וַיֹּ֗אמֶר מִֽי־אֲנִ֞י יְהוָ֤ה אֱלֹהִים֙ וּמִ֣י בֵיתִ֔י כִּ֥י הֲבִיאֹתַ֖נִי עַד־הֲלֹֽם׃

‎17 ‏וַתִּקְטַ֨ן זֹ֤את בְּעֵינֶ֙יךָ֙ אֱלֹהִ֔ים וַתְּדַבֵּ֥ר עַל־בֵּֽית־עַבְדְּךָ֖ לְמֵרָח֑וֹק וּרְאִיתַ֗נִי כְּת֧וֹר הָאָדָ֛ם הַֽמַּעֲלָ֖ה יְהוָ֥ה אֱלֹהִֽים׃

‎18 ‏מַה־יּוֹסִ֨יף ע֥וֹד דָּוִ֛יד אֵלֶ֖יךָ לְכָב֣וֹד אֶת־עַבְדֶּ֑ךָ וְאַתָּ֖ה אֶֽת־עַבְדְּךָ֥ יָדָֽעְתָּ׃

‎19 ‏יְהוָ֕ה בַּעֲב֤וּר עַבְדְּךָ֙ וּֽכְלִבְּךָ֔ עָשִׂ֕יתָ אֵ֥ת כָּל־הַגְּדוּלָּ֖ה הַזֹּ֑את לְהֹדִ֖יעַ אֶת־כָּל־הַגְּדֻלּֽוֹת׃

‎20 ‏יְהוָה֙ אֵ֣ין כָּמ֔וֹךָ וְאֵ֥ין אֱלֹהִ֖ים זוּלָתֶ֑ךָ בְּכֹ֥ל אֲשֶׁר־שָׁמַ֖עְנוּ בְּאָזְנֵֽינוּ׃

‎21 ‏וּמִי֙ כְּעַמְּךָ֣ יִשְׂרָאֵ֔ל גּ֥וֹי אֶחָ֖ד בָּאָ֑רֶץ אֲשֶׁר֩ הָלַ֨ךְ הָאֱלֹהִ֜ים לִפְדּ֧וֹת ל֣וֹ עָ֗ם לָשׂ֤וּם לְךָ֙ שֵׁ֚ם גְּדֻלּ֣וֹת וְנֹרָא֔וֹת לְגָרֵ֗שׁ מִפְּנֵ֧י עַמְּךָ֛ אֲשֶׁר־פָּדִ֥יתָ מִמִּצְרַ֖יִם גּוֹיִֽם׃

‎22 ‏וַ֠תִּתֵּן אֶת־עַמְּךָ֙ יִשְׂרָאֵ֧ל׀ לְךָ֛ לְעָ֖ם עַד־עוֹלָ֑ם וְאַתָּ֣ה יְהוָ֔ה הָיִ֥יתָ לָהֶ֖ם לֵאלֹהִֽים׃

‎23 ‏וְעַתָּ֣ה יְהוָ֔ה הַדָּבָ֗ר אֲשֶׁ֨ר דִּבַּ֤רְתָּ עַֽל־עַבְדְּךָ֙ וְעַל־בֵּית֔וֹ יֵאָמֵ֖ן עַד־עוֹלָ֑ם וַעֲשֵׂ֖ה כַּאֲשֶׁ֥ר דִּבַּֽרְתָּ׃

‎24 ‏וְ֠יֵֽאָמֵן וְיִגְדַּ֨ל שִׁמְךָ֤ עַד־עוֹלָם֙ לֵאמֹ֔ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל אֱלֹהִ֖ים לְיִשְׂרָאֵ֑ל וּבֵית־דָּוִ֥יד עַבְדְּךָ֖ נָכ֥וֹן לְפָנֶֽיךָ׃

‎25 ‏כִּ֣י׀ אַתָּ֣ה אֱלֹהַ֗י גָּלִ֙יתָ֙ אֶת־אֹ֣זֶן עַבְדְּךָ֔ לִבְנ֥וֹת ל֖וֹ בָּ֑יִת עַל־כֵּן֙ מָצָ֣א עַבְדְּךָ֔ לְהִתְפַּלֵּ֖ל לְפָנֶֽיךָ׃

‎26 ‏וְעַתָּ֣ה יְהוָ֔ה אַתָּה־ה֖וּא הָאֱלֹהִ֑ים וַתְּדַבֵּר֙ עַֽל־עַבְדְּךָ֔ הַטּוֹבָ֖ה הַזֹּֽאת׃

‎27 ‏וְעַתָּ֗ה הוֹאַ֙לְתָּ֙ לְבָרֵךְ֙ אֶת־בֵּ֣ית עַבְדְּךָ֔ לִהְי֥וֹת לְעוֹלָ֖ם לְפָנֶ֑יךָ כִּֽי־אַתָּ֤ה יְהוָה֙ בֵּרַ֔כְתָּ וּמְבֹרָ֖ךְ לְעוֹלָֽם׃ פ

1 wayəhî³ ka’ăšer yāšaḇ dāwîḏ bəḇêṯwō wayyō’mer dāwîḏ ’el-nāṯān hannāḇî’ hinnēh ’ānōḵî ywōšēḇ bəḇêṯ hā’ărāzîm wa’ărwōn bərîṯ-yəhwâ t^aḥaṯ yərî‘wōṯ:

2 wayyō’mer nāṯān ’el-dāwîḏ kōl ’ăšer biləḇāḇəḵā ‘ăśēh kî hā’ĕlōhîm ‘immāḵə: s

3 wayəhî ballayəlâ hahû’ wayəhî dəḇar-’ĕlōhîm ’el-nāṯān lē’mōr:

4 lēḵə wə’āmarətā ’el-dāwîḏ ‘aḇədî kōh ’āmar yəhwâ lō’ ’atâ tiḇəneh-llî habayiṯ lāšāḇeṯ:

5 kî lō’ yāšaḇətî bəḇayiṯ min-hayywōm ’ăšer he‘ĕlêṯî ’eṯ-yiśərā’ēl ‘aḏ hayywōm hazzeh wā’ehəyeh mē’ōhel ’el-’ōhel ûmimmišəkān:

6 bəḵōl ’ăšer-hiṯəhallaḵətî bəḵāl-yiśərā’ēl hăḏāḇār dibarətî ’eṯ-’^aḥaḏ šōfəṭê yiśərā’ēl ’ăšer ṣiûîṯî lirə‘wōṯ ’eṯ-‘ammî lē’mōr lāmmâ lō’-ḇənîṯem lî bêṯ ’ărāzîm:

7 wə‘atâ kōh-ṯō’mar lə‘aḇədî ləḏāwîḏ skōh ’āmar yəhwâ ṣəḇā’wōṯ ’ănî ləq^aḥətîḵā min-hannāweh min-’^aḥărê haṣṣō’n lihəywōṯ nāḡîḏ ‘al ‘ammî yiśərā’ēl:

8 wā’ehəyeh ‘imməḵā bəḵōl ’ăšer hālaḵətā wā’aḵərîṯ ’eṯ-kāl-’wōyəḇeyḵā mipāneyḵā wə‘āśîṯî ləḵā šēm kəšēm hagəḏwōlîm ’ăšer bā’āreṣ:

9 wəśamətî māqwōm lə‘ammî yiśərā’ēl ûnəṭ^a‘ətîhû wəšāḵan t^aḥətāyw wəlō’ yirəgaz ‘wōḏ wəlō’-ywōsîfû ḇənê-‘awəlâ ləḇallōṯwō ka’ăšer bāri’šwōnâ:

10 ûləmîyāmîm ’ăšer ṣiûîṯî šōfəṭîm ‘al-‘ammî yiśərā’ēl wəhiḵən^a‘ətî ’eṯ-kāl-’wōyəḇeyḵā wā’agiḏ lāḵə ûḇayiṯ yiḇəneh-lləḵā yəhwâ:

11 wəhāyâ kî-mālə’û yāmeyḵā lāleḵeṯ ‘im-’ăḇōṯeyḵā wahăqîmwōṯî ’eṯ-zarə‘ăḵā ’^aḥăreyḵā ’ăšer yihəyeh mibāneyḵā wahăḵînwōṯî ’eṯ-maləḵûṯwō:

12 hû’ yiḇəneh-llî bāyiṯ wəḵōnanətî ’eṯ-kisə’wō ‘aḏ-‘wōlām:

13 ’ănî ’ehəyeh-llwō lə’āḇ wəhû’ yihəyeh-llî ləḇēn wəḥasədî lō’-’āsîr mē‘immwō ka’ăšer hăsîrwōṯî mē’ăšer hāyâ ləfāneyḵā:

14 wəh^a‘ămaḏətîhû bəḇêṯî ûḇəmaləḵûṯî ‘aḏ-hā‘wōlām wəḵisə’wō yihəyeh nāḵwōn ‘aḏ-‘wōlām:

15 kəḵōl hadəḇārîm hā’ēlleh ûḵəḵōl heḥāzwōn hazzeh kēn diber nāṯān ’el-dāwîḏ: f

16 wayyāḇō’ hammeleḵə dāwîḏ wayyēšeḇ lifənê yəhwâ wayyō’mer mî-’ănî yəhwâ ’ĕlōhîm ûmî ḇêṯî kî hăḇî’ōṯanî ‘aḏ-hălōm:

17 watiqəṭan zō’ṯ bə‘êneyḵā ’ĕlōhîm watəḏabēr ‘al-bêṯ-‘aḇədəḵā ləmērāḥwōq ûrə’îṯanî kəṯwōr hā’āḏām hamm^a‘ălâ yəhwâ ’ĕlōhîm:

18 mah-yywōsîf ‘wōḏ dāwîḏ ’ēleyḵā ləḵāḇwōḏ ’eṯ-‘aḇədeḵā wə’atâ ’eṯ-‘aḇədəḵā yāḏā‘ətā:

19 yəhwâ b^a‘ăḇûr ‘aḇədəḵā ûḵəlibəḵā ‘āśîṯā ’ēṯ kāl-hagəḏûllâ hazzō’ṯ ləhōḏî‘a ’eṯ-kāl-hagəḏullwōṯ:

20 yəhwâ ’ên kāmwōḵā wə’ên ’ĕlōhîm zûlāṯeḵā bəḵōl ’ăšer-šām^a‘ənû bə’āzənênû:

21 ûmî kə‘amməḵā yiśərā’ēl gwōy ’eḥāḏ bā’āreṣ ’ăšer hālaḵə hā’ĕlōhîm lifədwōṯ lwō ‘ām lāśûm ləḵā šēm gəḏullwōṯ wənōrā’wōṯ ləḡārēš mipənê ‘amməḵā ’ăšer-pāḏîṯā mimmiṣərayim gwōyim:

22 watitēn ’eṯ-‘amməḵā yiśərā’ēl| ləḵā lə‘ām ‘aḏ-‘wōlām wə’atâ yəhwâ hāyîṯā lâem lē’lōhîm:

23 wə‘atâ yəhwâ hadāḇār ’ăšer dibarətā ‘al-‘aḇədəḵā wə‘al-bêṯwō yē’āmēn ‘aḏ-‘wōlām w^a‘ăśēh ka’ăšer dibarətā:

24 wəyē’āmēn wəyiḡədal šiməḵā ‘aḏ-‘wōlām lē’mōr yəhwâ ṣəḇā’wōṯ ’ĕlōhê yiśərā’ēl ’ĕlōhîm ləyiśərā’ēl ûḇêṯ-dāwîḏ ‘aḇədəḵā nāḵwōn ləfāneyḵā:

25 kî| ’atâ ’ĕlōhay gālîṯā ’eṯ-’ōzen ‘aḇədəḵā liḇənwōṯ lwō bāyiṯ ‘al-kēn māṣā’ ‘aḇədəḵā ləhiṯəpallēl ləfāneyḵā:

26 wə‘atâ yəhwâ ’atâ-hû’ hā’ĕlōhîm watəḏabēr ‘al-‘aḇədəḵā haṭṭwōḇâ hazzō’ṯ:

27 wə‘atâ hwō’alətā ləḇārēḵə ’eṯ-bêṯ ‘aḇədəḵā lihəywōṯ lə‘wōlām ləfāneyḵā kî-’atâ yəhwâ bēraḵətā ûməḇōrāḵə lə‘wōlām: f