2 Chronicles (2 Divrey Yamim) Chapter 18

‎1 ‏וַיְהִ֧י לִֽיהוֹשָׁפָ֛ט עֹ֥שֶׁר וְכָב֖וֹד לָרֹ֑ב וַיִּתְחַתֵּ֖ן לְאַחְאָֽב׃

‎2 ‏וַיֵּרֶד֩ לְקֵ֨ץ שָׁנִ֤ים אֶל־אַחְאָב֙ לְשֹׁ֣מְר֔וֹן וַיִּֽזְבַּֽח־ל֨וֹ אַחְאָ֜ב צֹ֤אן וּבָקָר֙ לָרֹ֔ב וְלָעָ֖ם אֲשֶׁ֣ר עִמּ֑וֹ וַיְסִיתֵ֕הוּ לַעֲל֖וֹת אֶל־רָמ֥וֹת גִּלְעָֽד׃

‎3 ‏וַיֹּ֜אמֶר אַחְאָ֣ב מֶֽלֶךְ־יִשְׂרָאֵ֗ל אֶל־יְהֽוֹשָׁפָט֙ מֶ֣לֶךְ יְהוּדָ֔ה הֲתֵלֵ֥ךְ עִמִּ֖י רָמֹ֣ת גִּלְעָ֑ד וַיֹּ֣אמֶר ל֗וֹ כָּמ֤וֹנִי כָמ֙וֹךָ֙ וּכְעַמְּךָ֣ עַמִּ֔י וְעִמְּךָ֖ בַּמִּלְחָמָֽה׃

‎4 ‏וַיֹּ֥אמֶר יְהוֹשָׁפָ֖ט אֶל־מֶ֣לֶךְ יִשְׂרָאֵ֑ל דְּרָשׁ־נָ֥א כַיּ֖וֹם אֶת־דְּבַ֥ר יְהוָֽה׃

‎5 ‏וַיִּקְבֹּ֨ץ מֶֽלֶךְ־יִשְׂרָאֵ֥ל אֶֽת־הַנְּבִאִים֮ אַרְבַּ֣ע מֵא֣וֹת אִישׁ֒ וַיֹּ֣אמֶר אֲלֵהֶ֗ם הֲנֵלֵ֞ךְ אֶל־רָמֹ֥ת גִּלְעָ֛ד לַמִּלְחָמָ֖ה אִם־אֶחְדָּ֑ל וַיֹּאמְר֣וּ עֲלֵ֔ה וְיִתֵּ֥ן הָאֱלֹהִ֖ים בְּיַ֥ד הַמֶּֽלֶךְ׃

‎6 ‏וַיֹּ֙אמֶר֙ יְה֣וֹשָׁפָ֔ט הַאֵ֨ין פֹּ֥ה נָבִ֛יא לַיהוָ֖ה ע֑וֹד וְנִדְרְשָׁ֖ה מֵאֹתֽוֹ׃

‎7 ‏וַיֹּ֣אמֶר מֶֽלֶךְ־יִשְׂרָאֵ֣ל׀ אֶֽל־יְהוֹשָׁפָ֡ט ע֣וֹד אִישׁ־אֶחָ֡ד לִדְרוֹשׁ֩ אֶת־יְהוָ֨ה מֵֽאֹת֜וֹ וַאֲנִ֣י שְׂנֵאתִ֗יהוּ כִּֽי־אֵ֠ינֶנּוּ מִתְנַבֵּ֨א עָלַ֤י לְטוֹבָה֙ כִּ֣י כָל־יָמָ֣יו לְרָעָ֔ה ה֖וּא מִיכָ֣יְהוּ בֶן־יִמְלָ֑א וַיֹּ֙אמֶר֙ יְה֣וֹשָׁפָ֔ט אַל־יֹאמַ֥ר הַמֶּ֖לֶךְ כֵּֽן׃

‎8 ‏וַיִּקְרָא֙ מֶ֣לֶךְ יִשְׂרָאֵ֔ל אֶל־סָרִ֖יס אֶחָ֑ד וַיֹּ֕אמֶר מַהֵ֖ר מיכהו מִיכָ֥יְהוּ בֶן־יִמְלָֽא׃

‎9 ‏וּמֶ֣לֶךְ יִשְׂרָאֵ֡ל וִֽיהוֹשָׁפָ֣ט מֶֽלֶךְ־יְהוּדָ֡ה יוֹשְׁבִים֩ אִ֨ישׁ עַל־כִּסְא֜וֹ מְלֻבָּשִׁ֤ים בְּגָדִים֙ וְיֹשְׁבִ֣ים בְּגֹ֔רֶן פֶּ֖תַח שַׁ֣עַר שֹׁמְר֑וֹן וְכָל־הַ֨נְּבִיאִ֔ים מִֽתְנַבְּאִ֖ים לִפְנֵיהֶֽם׃

‎10 ‏וַיַּ֥עַשׂ ל֛וֹ צִדְקִיָּ֥הוּ בֶֽן־כְּנַעֲנָ֖ה קַרְנֵ֣י בַרְזֶ֣ל וַיֹּ֙אמֶר֙ כֹּֽה־אָמַ֣ר יְהוָ֔ה בְּאֵ֛לֶּה תְּנַגַּ֥ח אֶת־אֲרָ֖ם עַד־כַּלּוֹתָֽם׃

‎11 ‏וְכָל־הַ֨נְּבִאִ֔ים נִבְּאִ֥ים כֵּ֖ן לֵאמֹ֑ר עֲלֵ֞ה רָמֹ֤ת גִּלְעָד֙ וְהַצְלַ֔ח וְנָתַ֥ן יְהוָ֖ה בְּיַ֥ד הַמֶּֽלֶךְ׃

‎12 ‏וְהַמַּלְאָ֞ךְ אֲשֶׁר־הָלַ֣ךְ׀ לִקְרֹ֣א לְמִיכָ֗יְהוּ דִּבֶּ֤ר אֵלָיו֙ לֵאמֹ֔ר הִנֵּ֞ה דִּבְרֵ֧י הַנְּבִאִ֛ים פֶּֽה־אֶחָ֥ד ט֖וֹב אֶל־הַמֶּ֑לֶךְ וִֽיהִי־נָ֧א דְבָרְךָ֛ כְּאַחַ֥ד מֵהֶ֖ם וְדִבַּ֥רְתָּ טּֽוֹב׃

‎13 ‏וַיֹּ֖אמֶר מִיכָ֑יְהוּ חַי־יְהוָ֕ה כִּ֛י אֶת־אֲשֶׁר־יֹאמַ֥ר אֱלֹהַ֖י אֹת֥וֹ אֲדַבֵּֽר׃

‎14 ‏וַיָּבֹא֮ אֶל־הַמֶּלֶךְ֒ וַיֹּ֨אמֶר הַמֶּ֜לֶךְ אֵלָ֗יו מִיכָה֙ הֲנֵלֵ֞ךְ אֶל־רָמֹ֥ת גִּלְעָ֛ד לַמִּלְחָמָ֖ה אִם־אֶחְדָּ֑ל וַיֹּ֙אמֶר֙ עֲל֣וּ וְהַצְלִ֔יחוּ וְיִנָּתְנ֖וּ בְּיֶדְכֶֽם׃

‎15 ‏וַיֹּ֤אמֶר אֵלָיו֙ הַמֶּ֔לֶךְ עַד־כַּמֶּ֥ה פְעָמִ֖ים אֲנִ֣י מַשְׁבִּיעֶ֑ךָ אֲ֠שֶׁר לֹֽא־תְדַבֵּ֥ר אֵלַ֛י רַק־אֱמֶ֖ת בְּשֵׁ֥ם יְהוָֽה׃

‎16 ‏וַיֹּ֗אמֶר רָאִ֤יתִי אֶת־כָּל־יִשְׂרָאֵל֙ נְפוֹצִ֣ים עַל־הֶֽהָרִ֔ים כַּצֹּ֕אן אֲשֶׁ֥ר אֵין־לָהֶ֖ן רֹעֶ֑ה וַיֹּ֤אמֶר יְהוָה֙ לֹֽא־אֲדֹנִ֣ים לָאֵ֔לֶּה יָשׁ֥וּבוּ אִישׁ־לְבֵית֖וֹ בְּשָׁלֽוֹם׃

‎17 ‏וַיֹּ֥אמֶר מֶֽלֶךְ־יִשְׂרָאֵ֖ל אֶל־יְהוֹשָׁפָ֑ט הֲלֹא֙ אָמַ֣רְתִּי אֵלֶ֔יךָ לֹא־יִתְנַבֵּ֥א עָלַ֛י ט֖וֹב כִּ֥י אִם־לְרָֽע׃ ס

‎18 ‏וַיֹּ֕אמֶר לָכֵ֖ן שִׁמְע֣וּ דְבַר־יְהוָ֑ה רָאִ֤יתִי אֶת־יְהוָה֙ יוֹשֵׁ֣ב עַל־כִּסְא֔וֹ וְכָל־צְבָ֤א הַשָּׁמַ֙יִם֙ עֹֽמְדִ֔ים עַל־יְמִינ֖וֹ וּשְׂמֹאלֽוֹ׃

‎19 ‏וַיֹּ֣אמֶר יְהוָ֗ה מִ֤י יְפַתֶּה֙ אֶת־אַחְאָ֣ב מֶֽלֶךְ־יִשְׂרָאֵ֔ל וְיַ֕עַל וְיִפֹּ֖ל בְּרָמ֣וֹת גִּלְעָ֑ד וַיֹּ֕אמֶר זֶ֚ה אֹמֵ֣ר כָּ֔כָה וְזֶ֖ה אֹמֵ֥ר כָּֽכָה׃

‎20 ‏וַיֵּצֵ֣א הָר֗וּחַ וַֽיַּעֲמֹד֙ לִפְנֵ֣י יְהוָ֔ה וַיֹּ֖אמֶר אֲנִ֣י אֲפַתֶּ֑נּוּ וַיֹּ֧אמֶר יְהוָ֛ה אֵלָ֖יו בַּמָּֽה׃

‎21 ‏וַיֹּ֗אמֶר אֵצֵא֙ וְהָיִ֙יתִי֙ לְר֣וּחַ שֶׁ֔קֶר בְּפִ֖י כָּל־נְבִיאָ֑יו וַיֹּ֗אמֶר תְּפַתֶּה֙ וְגַם־תּוּכָ֔ל צֵ֖א וַעֲשֵׂה־כֵֽן׃

‎22 ‏וְעַתָּ֗ה הִנֵּ֨ה נָתַ֤ן יְהוָה֙ ר֣וּחַ שֶׁ֔קֶר בְּפִ֖י נְבִיאֶ֣יךָ אֵ֑לֶּה וַֽיהוָ֔ה דִּבֶּ֥ר עָלֶ֖יךָ רָעָֽה׃ ס

‎23 ‏וַיִּגַּשׁ֙ צִדְקִיָּ֣הוּ בֶֽן־כְּנַעֲנָ֔ה וַיַּ֥ךְ אֶת־מִיכָ֖יְהוּ עַל־הַלֶּ֑חִי וַיֹּ֗אמֶר אֵ֣י זֶ֤ה הַדֶּ֙רֶךְ֙ עָבַ֧ר רֽוּחַ־יְהוָ֛ה מֵאִתִּ֖י לְדַבֵּ֥ר אֹתָֽךְ׃

‎24 ‏וַיֹּ֣אמֶר מִיכָ֔יְהוּ הִנְּךָ֥ רֹאֶ֖ה בַּיּ֣וֹם הַה֑וּא אֲשֶׁ֥ר תָּב֛וֹא חֶ֥דֶר בְּחֶ֖דֶר לְהֵחָבֵֽא׃

‎25 ‏וַיֹּ֙אמֶר֙ מֶ֣לֶךְ יִשְׂרָאֵ֔ל קְחוּ֙ אֶת־מִיכָ֔יְהוּ וַהֲשִׁיבֻ֖הוּ אֶל־אָמ֣וֹן שַׂר־הָעִ֑יר וְאֶל־יוֹאָ֖שׁ בֶּן־הַמֶּֽלֶךְ׃

‎26 ‏וַאֲמַרְתֶּ֗ם כֹּ֚ה אָמַ֣ר הַמֶּ֔לֶךְ שִׂ֥ימוּ זֶ֖ה בֵּ֣ית הַכֶּ֑לֶא וְהַאֲכִלֻ֜הוּ לֶ֤חֶם לַ֙חַץ֙ וּמַ֣יִם לַ֔חַץ עַ֖ד שׁוּבִ֥י בְשָׁלֽוֹם׃

‎27 ‏וַיֹּ֣אמֶר מִיכָ֔יְהוּ אִם־שׁ֤וֹב תָּשׁוּב֙ בְּשָׁל֔וֹם לֹא־דִבֶּ֥ר יְהוָ֖ה בִּ֑י וַיֹּ֕אמֶר שִׁמְע֖וּ עַמִּ֥ים כֻּלָּֽם׃ פ

‎28 ‏וַיַּ֧עַל מֶֽלֶךְ־יִשְׂרָאֵ֛ל וִֽיהוֹשָׁפָ֥ט מֶֽלֶךְ־יְהוּדָ֖ה אֶל־רָמֹ֥ת גִּלְעָֽד׃

‎29 ‏וַיֹּאמֶר֩ מֶ֨לֶךְ יִשְׂרָאֵ֜ל אֶל־יְהוֹשָׁפָ֗ט הִתְחַפֵּשׂ֙ וָב֣וֹא בַמִּלְחָמָ֔ה וְאַתָּ֖ה לְבַ֣שׁ בְּגָדֶ֑יךָ וַיִּתְחַפֵּשׂ֙ מֶ֣לֶךְ יִשְׂרָאֵ֔ל וַיָּבֹ֖אוּ בַּמִּלְחָמָֽה׃

‎30 ‏וּמֶ֣לֶךְ אֲרָ֡ם צִוָּה֩ אֶת־שָׂרֵ֨י הָרֶ֤כֶב אֲשֶׁר־לוֹ֙ לֵאמֹ֔ר לֹ֚א תִּלָּ֣חֲמ֔וּ אֶת־הַקָּטֹ֖ן אֶת־הַגָּד֑וֹל כִּ֛י אִֽם־אֶת־מֶ֥לֶךְ יִשְׂרָאֵ֖ל לְבַדּֽוֹ׃

‎31 ‏וַיְהִ֡י כִּרְאוֹת֩ שָׂרֵ֨י הָרֶ֜כֶב אֶת־יְהוֹשָׁפָ֗ט וְהֵ֤מָּה אָֽמְרוּ֙ מֶ֣לֶךְ יִשְׂרָאֵ֣ל ה֔וּא וַיָּסֹ֥בּוּ עָלָ֖יו לְהִלָּחֵ֑ם וַיִּזְעַ֤ק יְהֽוֹשָׁפָט֙ וַֽיהוָ֣ה עֲזָר֔וֹ וַיְסִיתֵ֥ם אֱלֹהִ֖ים מִמֶּֽנּוּ׃

‎32 ‏וַיְהִ֗י כִּרְאוֹת֙ שָׂרֵ֣י הָרֶ֔כֶב כִּ֥י לֹא־הָיָ֖ה מֶ֣לֶךְ יִשְׂרָאֵ֑ל וַיָּשֻׁ֖בוּ מֵאַחֲרָֽיו׃

‎33 ‏וְאִ֗ישׁ מָשַׁ֤ךְ בַּקֶּ֙שֶׁת֙ לְתֻמּ֔וֹ וַיַּךְ֙ אֶת־מֶ֣לֶךְ יִשְׂרָאֵ֔ל בֵּ֥ין הַדְּבָקִ֖ים וּבֵ֣ין הַשִּׁרְיָ֑ן וַיֹּ֣אמֶר לָֽרַכָּ֗ב הֲפֹ֧ךְ ידיך יָדְךָ֛ וְהוֹצֵאתַ֥נִי מִן־הַֽמַּחֲנֶ֖ה כִּ֥י הָחֳלֵֽיתִי׃

‎34 ‏וַתַּ֤עַל הַמִּלְחָמָה֙ בַּיּ֣וֹם הַה֔וּא וּמֶ֣לֶךְ יִשְׂרָאֵ֗ל הָיָ֨ה מַעֲמִ֧יד בַּמֶּרְכָּבָ֛ה נֹ֥כַח אֲרָ֖ם עַד־הָעָ֑רֶב וַיָּ֕מָת לְעֵ֖ת בּ֥וֹא הַשָּֽׁמֶשׁ׃

1 wayəhî lîhwōšāfāṭ ‘ōšer wəḵāḇwōḏ lārōḇ wayyiṯəḥatēn lə’^aḥə’āḇ:

2 wayyēreḏ ləqēṣ šānîm ’el-’^aḥə’āḇ ləšōmərwōn wayyizəb^aḥ-lwō ’^aḥə’āḇ ṣō’n ûḇāqār lārōḇ wəlā‘ām ’ăšer ‘immwō wayəsîṯēhû l^a‘ălwōṯ ’el-rāmwōṯ gilə‘āḏ:

3 wayyō’mer ’^aḥə’āḇ meleḵə-yiśərā’ēl ’el-yəhwōšāfāṭ meleḵə yəhûḏâ hăṯēlēḵə ‘immî rāmōṯ gilə‘āḏ wayyō’mer lwō kāmwōnî ḵāmwōḵā ûḵə‘amməḵā ‘ammî wə‘imməḵā bammiləḥāmâ:

4 wayyō’mer yəhwōšāfāṭ ’el-meleḵə yiśərā’ēl dərāš-nā’ ḵayywōm ’eṯ-dəḇar yəhwâ:

5 wayyiqəbōṣ meleḵə-yiśərā’ēl ’eṯ-hannəḇi’îm ’arəb^a‘ mē’wōṯ ’îš wayyō’mer ’ălēhem hănēlēḵə ’el-rāmōṯ gilə‘āḏ lammiləḥāmâ ’im-’eḥədāl wayyō’mərû ‘ălēh wəyitēn hā’ĕlōhîm bəyaḏ hammeleḵə:

6 wayyō’mer yəhwōšāfāṭ ha’ên pōh nāḇî’ layhwâ ‘wōḏ wəniḏərəšâ mē’ōṯwō:

7 wayyō’mer meleḵə-yiśərā’ēl| ’el-yəhwōšāfāṭ ‘wōḏ ’îš-’eḥāḏ liḏərwōš ’eṯ-yəhwâ mē’ōṯwō wa’ănî śənē’ṯîhû kî-’ênennû miṯənabē’ ‘ālay ləṭwōḇâ kî ḵāl-yāmāyw lərā‘â hû’ mîḵāyəhû ḇen-yiməlā’ wayyō’mer yəhwōšāfāṭ ’al-yō’mar hammeleḵə kēn:

8 wayyiqərā’ meleḵə yiśərā’ēl ’el-sārîs ’eḥāḏ wayyō’mer mahēr mîḵâû mîḵāyəhû ḇen-yiməlā’:

9 ûmeleḵə yiśərā’ēl wîhwōšāfāṭ meleḵə-yəhûḏâ ywōšəḇîm ’îš ‘al-kisə’wō məlubāšîm bəḡāḏîm wəyōšəḇîm bəḡōren peṯ^aḥ š^a‘ar šōmərwōn wəḵāl-hannəḇî’îm miṯənabə’îm lifənêhem:

10 wayy^a‘aś lwō ṣiḏəqîyâû ḇen-kən^a‘ănâ qarənê ḇarəzel wayyō’mer kōh-’āmar yəhwâ bə’ēlleh tənag^aḥ ’eṯ-’ărām ‘aḏ-kallwōṯām:

11 wəḵāl-hannəḇi’îm nibə’îm kēn lē’mōr ‘ălēh rāmōṯ gilə‘āḏ wəhaṣəl^aḥ wənāṯan yəhwâ bəyaḏ hammeleḵə:

12 wəhammalə’āḵə ’ăšer-hālaḵə| liqərō’ ləmîḵāyəhû diber ’ēlāyw lē’mōr hinnēh diḇərê hannəḇi’îm peh-’eḥāḏ ṭwōḇ ’el-hammeleḵə wîhî-nā’ ḏəḇārəḵā kə’^aḥaḏ mēhem wəḏibarətā ṭṭwōḇ:

13 wayyō’mer mîḵāyəhû ḥay-yəhwâ kî ’eṯ-’ăšer-yō’mar ’ĕlōhay ’ōṯwō ’ăḏabēr:

14 wayyāḇō’ ’el-hammeleḵə wayyō’mer hammeleḵə ’ēlāyw mîḵâ hănēlēḵə ’el-rāmōṯ gilə‘āḏ lammiləḥāmâ ’im-’eḥədāl wayyō’mer ‘ălû wəhaṣəlîḥû wəyinnāṯənû bəyeḏəḵem:

15 wayyō’mer ’ēlāyw hammeleḵə ‘aḏ-kammeh fə‘āmîm ’ănî mašəbî‘eḵā ’ăšer lō’-ṯəḏabēr ’ēlay raq-’ĕmeṯ bəšēm yəhwâ:

16 wayyō’mer rā’îṯî ’eṯ-kāl-yiśərā’ēl nəfwōṣîm ‘al-hehārîm kaṣṣō’n ’ăšer ’ên-lâen rō‘eh wayyō’mer yəhwâ lō’-’ăḏōnîm lā’ēlleh yāšûḇû ’îš-ləḇêṯwō bəšālwōm:

17 wayyō’mer meleḵə-yiśərā’ēl ’el-yəhwōšāfāṭ hălō’ ’āmarətî ’ēleyḵā lō’-yiṯənabē’ ‘ālay ṭwōḇ kî ’im-lərā‘: s

18 wayyō’mer lāḵēn šimə‘û ḏəḇar-yəhwâ rā’îṯî ’eṯ-yəhwâ ywōšēḇ ‘al-kisə’wō wəḵāl-ṣəḇā’ haššāmayim ‘ōməḏîm ‘al-yəmînwō ûśəmō’lwō:

19 wayyō’mer yəhwâ mî yəfateh ’eṯ-’^aḥə’āḇ meleḵə-yiśərā’ēl wəy^a‘al wəyipōl bərāmwōṯ gilə‘āḏ wayyō’mer zeh ’ōmēr kāḵâ wəzeh ’ōmēr kāḵâ:

20 wayyēṣē’ hārûḥa wayy^a‘ămōḏ lifənê yəhwâ wayyō’mer ’ănî ’ăfatennû wayyō’mer yəhwâ ’ēlāyw bammâ:

21 wayyō’mer ’ēṣē’ wəhāyîṯî lərûḥa šeqer bəfî kāl-nəḇî’āyw wayyō’mer təfateh wəḡam-tûḵāl ṣē’ w^a‘ăśēh-ḵēn:

22 wə‘atâ hinnēh nāṯan yəhwâ rûḥa šeqer bəfî nəḇî’eyḵā ’ēlleh wayhwâ diber ‘āleyḵā rā‘â: s

23 wayyigaš ṣiḏəqîyâû ḇen-kən^a‘ănâ wayyaḵə ’eṯ-mîḵāyəhû ‘al-halleḥî wayyō’mer ’ê zeh hadereḵə ‘āḇar rûḥa-yəhwâ mē’itî ləḏabēr ’ōṯāḵə:

24 wayyō’mer mîḵāyəhû hinnəḵā rō’eh bayywōm hahû’ ’ăšer tāḇwō’ ḥeḏer bəḥeḏer ləhēḥāḇē’:

25 wayyō’mer meleḵə yiśərā’ēl qəḥû ’eṯ-mîḵāyəhû wahăšîḇuhû ’el-’āmwōn śar-hā‘îr wə’el-ywō’āš ben-hammeleḵə:

26 wa’ămarətem kōh ’āmar hammeleḵə śîmû zeh bêṯ hakele’ wəha’ăḵiluhû leḥem l^aḥaṣ ûmayim l^aḥaṣ ‘aḏ šûḇî ḇəšālwōm:

27 wayyō’mer mîḵāyəhû ’im-šwōḇ tāšûḇ bəšālwōm lō’-ḏiber yəhwâ bî wayyō’mer šimə‘û ‘ammîm kullām: f

28 wayy^a‘al meleḵə-yiśərā’ēl wîhwōšāfāṭ meleḵə-yəhûḏâ ’el-rāmōṯ gilə‘āḏ:

29 wayyō’mer meleḵə yiśərā’ēl ’el-yəhwōšāfāṭ hiṯəḥapēś wāḇwō’ ḇammiləḥāmâ wə’atâ ləḇaš bəḡāḏeyḵā wayyiṯəḥapēś meleḵə yiśərā’ēl wayyāḇō’û bammiləḥāmâ:

30 ûmeleḵə ’ărām ṣiûâ ’eṯ-śārê hāreḵeḇ ’ăšer-lwō lē’mōr lō’ tillāḥămû ’eṯ-haqqāṭōn ’eṯ-hagāḏwōl kî ’im-’eṯ-meleḵə yiśərā’ēl ləḇadwō:

31 wayəhî kirə’wōṯ śārê hāreḵeḇ ’eṯ-yəhwōšāfāṭ wəhēmmâ ’āmərû meleḵə yiśərā’ēl hû’ wayyāsōbû ‘ālāyw ləhillāḥēm wayyizə‘aq yəhwōšāfāṭ wayhwâ ‘ăzārwō wayəsîṯēm ’ĕlōhîm mimmennû:

32 wayəhî kirə’wōṯ śārê hāreḵeḇ kî lō’-hāyâ meleḵə yiśərā’ēl wayyāšuḇû mē’^aḥărāyw:

33 wə’îš māšaḵə baqqešeṯ ləṯummwō wayyaḵə ’eṯ-meleḵə yiśərā’ēl bên hadəḇāqîm ûḇên hašširəyān wayyō’mer lārakāḇ hăfōḵə yāḏeyḵā yāḏəḵā wəhwōṣē’ṯanî min-hamm^aḥăneh kî hāḥŏlêṯî:

34 wat^a‘al hammiləḥāmâ bayywōm hahû’ ûmeleḵə yiśərā’ēl hāyâ m^a‘ămîḏ bammerəkāḇâ nōḵ^aḥ ’ărām ‘aḏ-hā‘āreḇ wayyāmāṯ lə‘ēṯ bwō’ haššāmeš: