2 Chronicles (2 Divrey Yamim) Chapter 32

‎1 ‏אַחֲרֵ֨י הַדְּבָרִ֤ים וְהָאֱמֶת֙ הָאֵ֔לֶּה בָּ֖א סַנְחֵרִ֣יב מֶֽלֶךְ־אַשּׁ֑וּר וַיָּבֹ֣א בִֽיהוּדָ֗ה וַיִּ֙חַן֙ עַל־הֶעָרִ֣ים הַבְּצֻר֔וֹת וַיֹּ֖אמֶר לְבִקְעָ֥ם אֵלָֽיו׃

‎2 ‏וַיַּרְא֙ יְחִזְקִיָּ֔הוּ כִּי־בָ֖א סַנְחֵרִ֑יב וּפָנָ֕יו לַמִּלְחָמָ֖ה עַל־יְרוּשָׁלִָֽם׃

‎3 ‏וַיִּוָּעַ֗ץ עִם־שָׂרָיו֙ וְגִבֹּרָ֔יו לִסְתּוֹם֙ אֶת־מֵימֵ֣י הָעֲיָנ֔וֹת אֲשֶׁ֖ר מִח֣וּץ לָעִ֑יר וַֽיַּעְזְרֽוּהוּ׃

‎4 ‏וַיִּקָּבְצ֣וּ עַם־רָ֔ב וַֽיִּסְתְּמוּ֙ אֶת־כָּל־הַמַּעְיָנ֔וֹת וְאֶת־הַנַּ֛חַל הַשּׁוֹטֵ֥ף בְּתוֹךְ־הָאָ֖רֶץ לֵאמֹ֑ר לָ֤מָּה יָב֙וֹאוּ֙ מַלְכֵ֣י אַשּׁ֔וּר וּמָצְא֖וּ מַ֥יִם רַבִּֽים׃

‎5 ‏וַיִּתְחַזַּ֡ק וַיִּבֶן֩ אֶת־כָּל־הַחוֹמָ֨ה הַפְּרוּצָ֜ה וַיַּ֣עַל עַל־הַמִּגְדָּל֗וֹת וְלַח֙וּצָה֙ הַחוֹמָ֣ה אַחֶ֔רֶת וַיְחַזֵּ֥ק אֶת־הַמִּלּ֖וֹא עִ֣יר דָּוִ֑יד וַיַּ֥עַשׂ שֶׁ֛לַח לָרֹ֖ב וּמָגִנִּֽים׃

‎6 ‏וַיִּתֵּ֛ן שָׂרֵ֥י מִלְחָמ֖וֹת עַל־הָעָ֑ם וַיִּקְבְּצֵ֣ם אֵלָ֗יו אֶל־רְחוֹב֙ שַׁ֣עַר הָעִ֔יר וַיְדַבֵּ֥ר עַל־לְבָבָ֖ם לֵאמֹֽר׃

‎7 ‏חִזְק֣וּ וְאִמְצ֔וּ אַל־תִּֽירְא֣וּ וְאַל־תֵּחַ֗תּוּ מִפְּנֵי֙ מֶ֣לֶךְ אַשּׁ֔וּר וּמִלִּפְנֵ֖י כָּל־הֶהָמ֣וֹן אֲשֶׁר־עִמּ֑וֹ כִּֽי־עִמָּ֥נוּ רַ֖ב מֵעִמּֽוֹ׃

‎8 ‏עִמּוֹ֙ זְר֣וֹעַ בָּשָׂ֔ר וְעִמָּ֜נוּ יְהוָ֤ה אֱלֹהֵ֙ינוּ֙ לְעָזְרֵ֔נוּ וּלְהִלָּחֵ֖ם מִלְחֲמֹתֵ֑נוּ וַיִּסָּמְכ֣וּ הָעָ֔ם עַל־דִּבְרֵ֖י יְחִזְקִיָּ֥הוּ מֶֽלֶךְ־יְהוּדָֽה׃ פ

‎9 ‏אַ֣חַר זֶ֗ה שָׁ֠לַח סַנְחֵרִ֨יב מֶֽלֶךְ־אַשּׁ֤וּר עֲבָדָיו֙ יְר֣וּשָׁלַ֔יְמָה וְהוּא֙ עַל־לָכִ֔ישׁ וְכָל־מֶמְשַׁלְתּ֖וֹ עִמּ֑וֹ עַל־יְחִזְקִיָּ֙הוּ֙ מֶ֣לֶךְ יְהוּדָ֔ה וְעַל־כָּל־יְהוּדָ֛ה אֲשֶׁ֥ר בִּירוּשָׁלִַ֖ם לֵאמֹֽר׃

‎10 ‏כֹּ֣ה אָמַ֔ר סַנְחֵרִ֖יב מֶ֣לֶךְ אַשּׁ֑וּר עַל־מָה֙ אַתֶּ֣ם בֹּטְחִ֔ים וְיֹשְׁבִ֥ים בְּמָצ֖וֹר בִּירוּשָׁלִָֽם׃

‎11 ‏הֲלֹ֤א יְחִזְקִיָּ֙הוּ֙ מַסִּ֣ית אֶתְכֶ֔ם לָתֵ֣ת אֶתְכֶ֔ם לָמ֛וּת בְּרָעָ֥ב וּבְצָמָ֖א לֵאמֹ֑ר יְהוָ֣ה אֱלֹהֵ֔ינוּ יַצִּילֵ֕נוּ מִכַּ֖ף מֶ֥לֶךְ אַשּֽׁוּר׃

‎12 ‏הֲלֹא־הוּא֙ יְחִזְקִיָּ֔הוּ הֵסִ֥יר אֶת־בָּמֹתָ֖יו וְאֶת־מִזְבְּחֹתָ֑יו וַיֹּ֨אמֶר לִֽיהוּדָ֤ה וְלִֽירוּשָׁלִַ֙ם֙ לֵאמֹ֔ר לִפְנֵ֨י מִזְבֵּ֧חַ אֶחָ֛ד תִּֽשְׁתַּחֲו֖וּ וְעָלָ֥יו תַּקְטִֽירוּ׃

‎13 ‏הֲלֹ֣א תֵדְע֗וּ מֶ֤ה עָשִׂ֙יתִי֙ אֲנִ֣י וַאֲבוֹתַ֔י לְכֹ֖ל עַמֵּ֣י הָאֲרָצ֑וֹת הֲיָכ֣וֹל יָֽכְל֗וּ אֱלֹהֵי֙ גּוֹיֵ֣ הָאֲרָצ֔וֹת לְהַצִּ֥יל אֶת־אַרְצָ֖ם מִיָּדִֽי׃

‎14 ‏מִ֠י בְּֽכָל־אֱלֹהֵ֞י הַגּוֹיִ֤ם הָאֵ֙לֶּה֙ אֲשֶׁ֣ר הֶחֱרִ֣ימוּ אֲבוֹתַ֔י אֲשֶׁ֣ר יָכ֔וֹל לְהַצִּ֥יל אֶת־עַמּ֖וֹ מִיָּדִ֑י כִּ֤י יוּכַל֙ אֱלֹ֣הֵיכֶ֔ם לְהַצִּ֥יל אֶתְכֶ֖ם מִיָּדִֽי׃

‎15 ‏וְעַתָּ֡ה אַל־יַשִּׁיא֩ אֶתְכֶ֨ם חִזְקִיָּ֜הוּ וְאַל־יַסִּ֨ית אֶתְכֶ֣ם כָּזֹאת֮ וְאַל־תַּאֲמִ֣ינוּ לוֹ֒ כִּי־לֹ֣א יוּכַ֗ל כָּל־אֱל֙וֹהַ֙ כָּל־גּ֣וֹי וּמַמְלָכָ֔ה לְהַצִּ֥יל עַמּ֛וֹ מִיָּדִ֖י וּמִיַּ֣ד אֲבוֹתָ֑י אַ֚ף כִּ֣י אֱ‍ֽלֹהֵיכֶ֔ם לֹא־יַצִּ֥ילוּ אֶתְכֶ֖ם מִיָּדִֽי׃

‎16 ‏וְעוֹד֙ דִּבְּר֣וּ עֲבָדָ֔יו עַל־יְהוָ֖ה הָאֱלֹהִ֑ים וְעַ֖ל יְחִזְקִיָּ֥הוּ עַבְדּֽוֹ׃

‎17 ‏וּסְפָרִ֣ים כָּתַ֔ב לְחָרֵ֕ף לַיהוָ֖ה אֱלֹהֵ֣י יִשְׂרָאֵ֑ל וְלֵֽאמֹ֨ר עָלָ֜יו לֵאמֹ֗ר כֵּֽאלֹהֵ֞י גּוֹיֵ֤ הָאֲרָצוֹת֙ אֲשֶׁ֨ר לֹא־הִצִּ֤ילוּ עַמָּם֙ מִיָּדִ֔י כֵּ֣ן לֹֽא־יַצִּ֞יל אֱלֹהֵ֧י יְחִזְקִיָּ֛הוּ עַמּ֖וֹ מִיָּדִֽי׃

‎18 ‏וַיִּקְרְא֨וּ בְקוֹל־גָּד֜וֹל יְהוּדִ֗ית עַל־עַ֤ם יְרוּשָׁלִַ֙ם֙ אֲשֶׁ֣ר עַל־הַֽחוֹמָ֔ה לְיָֽרְאָ֖ם וּֽלְבַהֲלָ֑ם לְמַ֖עַן יִלְכְּד֥וּ אֶת־הָעִֽיר׃

‎19 ‏וַֽיְדַבְּר֔וּ אֶל־אֱלֹהֵ֖י יְרוּשָׁלִָ֑ם כְּעַ֗ל אֱלֹהֵי֙ עַמֵּ֣י הָאָ֔רֶץ מַעֲשֵׂ֖ה יְדֵ֥י הָאָדָֽם׃ ס

‎20 ‏וַיִּתְפַּלֵּ֞ל יְחִזְקִיָּ֣הוּ הַמֶּ֗לֶךְ וִֽישַֽׁעְיָ֧הוּ בֶן־אָמ֛וֹץ הַנָּבִ֖יא עַל־זֹ֑את וַֽיִּזְעֲק֖וּ הַשָּׁמָֽיִם׃ פ

‎21 ‏וַיִּשְׁלַ֤ח יְהוָה֙ מַלְאָ֔ךְ וַיַּכְחֵ֞ד כָּל־גִּבּ֥וֹר חַ֙יִל֙ וְנָגִ֣יד וְשָׂ֔ר בְּמַחֲנֵ֖ה מֶ֣לֶךְ אַשּׁ֑וּר וַיָּשָׁב֩ בְּבֹ֨שֶׁת פָּנִ֜ים לְאַרְצ֗וֹ וַיָּבֹא֙ בֵּ֣ית אֱלֹהָ֔יו ומיציאו וּמִֽיצִיאֵ֣י מֵעָ֔יו שָׁ֖ם הִפִּילֻ֥הוּ בֶחָֽרֶב׃

‎22 ‏וַיּוֹשַׁע֩ יְהוָ֨ה אֶת־יְחִזְקִיָּ֜הוּ וְאֵ֣ת׀ יֹשְׁבֵ֣י יְרוּשָׁלִַ֗ם מִיַּ֛ד סַנְחֵרִ֥יב מֶֽלֶךְ־אַשּׁ֖וּר וּמִיַּד־כֹּ֑ל וַֽיְנַהֲלֵ֖ם מִסָּבִֽיב׃

‎23 ‏וְ֠רַבִּים מְבִיאִ֨ים מִנְחָ֤ה לַיהוָה֙ לִיר֣וּשָׁלִַ֔ם וּמִ֨גְדָּנ֔וֹת לִֽיחִזְקִיָּ֖הוּ מֶ֣לֶךְ יְהוּדָ֑ה וַיִּנַּשֵּׂ֛א לְעֵינֵ֥י כָל־הַגּוֹיִ֖ם מֵאַֽחֲרֵי־כֵֽן׃ ס

‎24 ‏בַּיָּמִ֣ים הָהֵ֔ם חָלָ֥ה יְחִזְקִיָּ֖הוּ עַד־לָמ֑וּת וַיִּתְפַּלֵּל֙ אֶל־יְהוָ֔ה וַיֹּ֣אמֶר ל֔וֹ וּמוֹפֵ֖ת נָ֥תַן לֽוֹ׃

‎25 ‏וְלֹא־כִגְמֻ֤ל עָלָיו֙ הֵשִׁ֣יב יְחִזְקִיָּ֔הוּ כִּ֥י גָבַ֖הּ לִבּ֑וֹ וַיְהִ֤י עָלָיו֙ קֶ֔צֶף וְעַל־יְהוּדָ֖ה וִירוּשָׁלִָֽם׃

‎26 ‏וַיִּכָּנַ֤ע יְחִזְקִיָּ֙הוּ֙ בְּגֹ֣בַהּ לִבּ֔וֹ ה֖וּא וְיֹשְׁבֵ֣י יְרוּשָׁלִָ֑ם וְלֹא־בָ֤א עֲלֵיהֶם֙ קֶ֣צֶף יְהוָ֔ה בִּימֵ֖י יְחִזְקִיָּֽהוּ׃

‎27 ‏וַיְהִ֧י לִֽיחִזְקִיָּ֛הוּ עֹ֥שֶׁר וְכָב֖וֹד הַרְבֵּ֣ה מְאֹ֑ד וְאֹֽצָר֣וֹת עָֽשָׂה־ל֠וֹ לְכֶ֨סֶף וּלְזָהָ֜ב וּלְאֶ֣בֶן יְקָרָ֗ה וְלִבְשָׂמִים֙ וּלְמָ֣גִנִּ֔ים וּלְכֹ֖ל כְּלֵ֥י חֶמְדָּֽה׃

‎28 ‏וּמִ֨סְכְּנ֔וֹת לִתְבוּאַ֥ת דָּגָ֖ן וְתִיר֣וֹשׁ וְיִצְהָ֑ר וְאֻֽרָוֹת֙ לְכָל־בְּהֵמָ֣ה וּבְהֵמָ֔ה וַעֲדָרִ֖ים לָאֲוֵרֽוֹת׃

‎29 ‏וְעָרִים֙ עָ֣שָׂה ל֔וֹ וּמִקְנֵה־צֹ֥אן וּבָקָ֖ר לָרֹ֑ב כִּ֤י נָֽתַן־לוֹ֙ אֱלֹהִ֔ים רְכ֖וּשׁ רַ֥ב מְאֹֽד׃

‎30 ‏וְה֣וּא יְחִזְקִיָּ֗הוּ סָתַם֙ אֶת־מוֹצָ֞א מֵימֵ֤י גִיחוֹן֙ הָֽעֶלְי֔וֹן וַֽיַּישְּׁרֵ֥ם לְמַֽטָּה־מַּעְרָ֖בָה לְעִ֣יר דָּוִ֑יד וַיַּצְלַ֥ח יְחִזְקִיָּ֖הוּ בְּכָֽל־מַעֲשֵֽׂהוּ׃

‎31 ‏וְכֵ֞ן בִּמְלִיצֵ֣י׀ שָׂרֵ֣י בָּבֶ֗ל הַֽמְשַׁלְּחִ֤ים עָלָיו֙ לִדְרֹ֗שׁ הַמּוֹפֵת֙ אֲשֶׁ֣ר הָיָ֣ה בָאָ֔רֶץ עֲזָב֖וֹ הָֽאֱלֹהִ֑ים לְנַ֨סּוֹת֔וֹ לָדַ֖עַת כָּל־בִּלְבָבֽוֹ׃

‎32 ‏וְיֶ֛תֶר דִּבְרֵ֥י יְחִזְקִיָּ֖הוּ וַחֲסָדָ֑יו הִנָּ֣ם כְּתוּבִ֗ים בַּחֲז֞וֹן יְשַֽׁעְיָ֤הוּ בֶן־אָמוֹץ֙ הַנָּבִ֔יא עַל־סֵ֥פֶר מַלְכֵי־יְהוּדָ֖ה וְיִשְׂרָאֵֽל׃

‎33 ‏וַיִּשְׁכַּ֨ב יְחִזְקִיָּ֜הוּ עִם־אֲבֹתָ֗יו וַֽיִּקְבְּרֻהוּ֮ בְּֽמַעֲלֵה֮ קִבְרֵ֣י בְנֵי־דָוִיד֒ וְכָבוֹד֙ עָֽשׂוּ־ל֣וֹ בְמוֹת֔וֹ כָּל־יְהוּדָ֖ה וְיֹשְׁבֵ֣י יְרוּשָׁלִָ֑ם וַיִּמְלֹ֛ךְ מְנַשֶּׁ֥ה בְנ֖וֹ תַּחְתָּֽיו׃ פ

1 ’^aḥărê hadəḇārîm wəhā’ĕmeṯ hā’ēlleh bā’ sanəḥērîḇ meleḵə-’aššûr wayyāḇō’ ḇîhûḏâ wayyiḥan ‘al-he‘ārîm habəṣurwōṯ wayyō’mer ləḇiqə‘ām ’ēlāyw:

2 wayyarə’ yəḥizəqîyâû kî-ḇā’ sanəḥērîḇ ûfānāyw lammiləḥāmâ ‘al-yərûšālāim:

3 wayyiûā‘aṣ ‘im-śārāyw wəḡibōrāyw lisətwōm ’eṯ-mêmê hā‘ăyānwōṯ ’ăšer miḥûṣ lā‘îr wayy^a‘əzərûhû:

4 wayyiqqāḇəṣû ‘am-rāḇ wayyisətəmû ’eṯ-kāl-hamm^a‘əyānwōṯ wə’eṯ-hann^aḥal haššwōṭēf bəṯwōḵə-hā’āreṣ lē’mōr lāmmâ yāḇwō’û maləḵê ’aššûr ûmāṣə’û mayim rabîm:

5 wayyiṯəḥazzaq wayyiḇen ’eṯ-kāl-h^aḥwōmâ hapərûṣâ wayy^a‘al ‘al-hammiḡədālwōṯ wəl^aḥûṣâ h^aḥwōmâ ’^aḥereṯ wayəḥazzēq ’eṯ-hammillwō’ ‘îr dāwîḏ wayy^a‘aś šel^aḥ lārōḇ ûmāḡinnîm:

6 wayyitēn śārê miləḥāmwōṯ ‘al-hā‘ām wayyiqəbəṣēm ’ēlāyw ’el-rəḥwōḇ š^a‘ar hā‘îr wayəḏabēr ‘al-ləḇāḇām lē’mōr:

7 ḥizəqû wə’iməṣû ’al-tîrə’û wə’al-tēḥatû mipənê meleḵə ’aššûr ûmillifənê kāl-hehāmwōn ’ăšer-‘immwō kî-‘immānû raḇ mē‘immwō:

8 ‘immwō zərwō‘a bāśār wə‘immānû yəhwâ ’ĕlōhênû lə‘āzərēnû ûləhillāḥēm miləḥămōṯēnû wayyissāməḵû hā‘ām ‘al-diḇərê yəḥizəqîyâû meleḵə-yəhûḏâ: f

9 ’^aḥar zeh šāl^aḥ sanəḥērîḇ meleḵə-’aššûr ‘ăḇāḏāyw yərûšālayəmâ wəhû’ ‘al-lāḵîš wəḵāl-meməšalətwō ‘immwō ‘al-yəḥizəqîyâû meleḵə yəhûḏâ wə‘al-kāl-yəhûḏâ ’ăšer bîrûšālaim lē’mōr:

10 kōh ’āmar sanəḥērîḇ meleḵə ’aššûr ‘al-mâ ’atem bōṭəḥîm wəyōšəḇîm bəmāṣwōr bîrûšālāim:

11 hălō’ yəḥizəqîyâû massîṯ ’eṯəḵem lāṯēṯ ’eṯəḵem lāmûṯ bərā‘āḇ ûḇəṣāmā’ lē’mōr yəhwâ ’ĕlōhênû yaṣṣîlēnû mikaf meleḵə ’aššûr:

12 hălō’-hû’ yəḥizəqîyâû hēsîr ’eṯ-bāmōṯāyw wə’eṯ-mizəbəḥōṯāyw wayyō’mer lîhûḏâ wəlîrûšālaim lē’mōr lifənê mizəbēḥa ’eḥāḏ tišət^aḥăwû wə‘ālāyw taqəṭîrû:

13 hălō’ ṯēḏə‘û meh ‘āśîṯî ’ănî wa’ăḇwōṯay ləḵōl ‘ammê hā’ărāṣwōṯ hăyāḵwōl yāḵəlû ’ĕlōhê gwōyē hā’ărāṣwōṯ ləhaṣṣîl ’eṯ-’arəṣām mîyāḏî:

14 mî bəḵāl-’ĕlōhê hagwōyim hā’ēlleh ’ăšer heḥĕrîmû ’ăḇwōṯay ’ăšer yāḵwōl ləhaṣṣîl ’eṯ-‘ammwō mîyāḏî kî yûḵal ’ĕlōhêḵem ləhaṣṣîl ’eṯəḵem mîyāḏî:

15 wə‘atâ ’al-yaššî’ ’eṯəḵem ḥizəqîyâû wə’al-yassîṯ ’eṯəḵem kāzō’ṯ wə’al-ta’ămînû lwō kî-lō’ yûḵal kāl-’ĕlwōha kāl-gwōy ûmaməlāḵâ ləhaṣṣîl ‘ammwō mîyāḏî ûmîyaḏ ’ăḇwōṯāy ’af kî ’ĕ‍lōhêḵem lō’-yaṣṣîlû ’eṯəḵem mîyāḏî:

16 wə‘wōḏ dibərû ‘ăḇāḏāyw ‘al-yəhwâ hā’ĕlōhîm wə‘al yəḥizəqîyâû ‘aḇədwō:

17 ûsəfārîm kāṯaḇ ləḥārēf layhwâ ’ĕlōhê yiśərā’ēl wəlē’mōr ‘ālāyw lē’mōr kē’lōhê gwōyē hā’ărāṣwōṯ ’ăšer lō’-hiṣṣîlû ‘ammām mîyāḏî kēn lō’-yaṣṣîl ’ĕlōhê yəḥizəqîyâû ‘ammwō mîyāḏî:

18 wayyiqərə’û ḇəqwōl-gāḏwōl yəhûḏîṯ ‘al-‘am yərûšālaim ’ăšer ‘al-h^aḥwōmâ ləyārə’ām ûləḇahălām ləm^a‘an yiləkəḏû ’eṯ-hā‘îr:

19 wayəḏabərû ’el-’ĕlōhê yərûšālāim kə‘al ’ĕlōhê ‘ammê hā’āreṣ m^a‘ăśēh yəḏê hā’āḏām: s

20 wayyiṯəpallēl yəḥizəqîyâû hammeleḵə wîš^a‘əyâû ḇen-’āmwōṣ hannāḇî’ ‘al-zō’ṯ wayyizə‘ăqû haššāmāyim: f

21 wayyišəl^aḥ yəhwâ malə’āḵə wayyaḵəḥēḏ kāl-gibwōr ḥayil wənāḡîḏ wəśār bəm^aḥănēh meleḵə ’aššûr wayyāšāḇ bəḇōšeṯ pānîm lə’arəṣwō wayyāḇō’ bêṯ ’ĕlōhāyw ûmîṣî’wō ûmîṣî’ê mē‘āyw šām hipîluhû ḇeḥāreḇ:

22 wayywōš^a‘ yəhwâ ’eṯ-yəḥizəqîyâû wə’ēṯ| yōšəḇê yərûšālaim mîyaḏ sanəḥērîḇ meleḵə-’aššûr ûmîyaḏ-kōl wayənahălēm missāḇîḇ:

23 wərabîm məḇî’îm minəḥâ layhwâ lîrûšālaim ûmiḡədānwōṯ lîḥizəqîyâû meleḵə yəhûḏâ wayyinnaśśē’ lə‘ênê ḵāl-hagwōyim mē’^aḥărê-ḵēn: s

24 bayyāmîm hâēm ḥālâ yəḥizəqîyâû ‘aḏ-lāmûṯ wayyiṯəpallēl ’el-yəhwâ wayyō’mer lwō ûmwōfēṯ nāṯan lwō:

25 wəlō’-ḵiḡəmul ‘ālāyw hēšîḇ yəḥizəqîyâû kî ḡāḇ^ah libwō wayəhî ‘ālāyw qeṣef wə‘al-yəhûḏâ wîrûšālāim:

26 wayyikān^a‘ yəḥizəqîyâû bəḡōḇ^ah libwō hû’ wəyōšəḇê yərûšālāim wəlō’-ḇā’ ‘ălêhem qeṣef yəhwâ bîmê yəḥizəqîyâû:

27 wayəhî lîḥizəqîyâû ‘ōšer wəḵāḇwōḏ harəbēh mə’ōḏ wə’ōṣārwōṯ ‘āśâ-lwō ləḵesef ûləzâāḇ ûlə’eḇen yəqārâ wəliḇəśāmîm ûləmāḡinnîm ûləḵōl kəlê ḥemədâ:

28 ûmisəkənwōṯ liṯəḇû’aṯ dāḡān wəṯîrwōš wəyiṣəhār wə’urāwōṯ ləḵāl-bəhēmâ ûḇəhēmâ w^a‘ăḏārîm lā’ăwērwōṯ:

29 wə‘ārîm ‘āśâ lwō ûmiqənēh-ṣō’n ûḇāqār lārōḇ kî nāṯan-lwō ’ĕlōhîm rəḵûš raḇ mə’ōḏ:

30 wəhû’ yəḥizəqîyâû sāṯam ’eṯ-mwōṣā’ mêmê ḡîḥwōn hā‘eləywōn wayyayššərēm ləmaṭṭâ-mm^a‘ərāḇâ lə‘îr dāwîḏ wayyaṣəl^aḥ yəḥizəqîyâû bəḵāl-m^a‘ăśēhû:

31 wəḵēn biməlîṣê| śārê bāḇel haməšalləḥîm ‘ālāyw liḏərōš hammwōfēṯ ’ăšer hāyâ ḇā’āreṣ ‘ăzāḇwō hā’ĕlōhîm lənasswōṯwō lāḏ^a‘aṯ kāl-biləḇāḇwō:

32 wəyeṯer diḇərê yəḥizəqîyâû w^aḥăsāḏāyw hinnām kəṯûḇîm b^aḥăzwōn yəš^a‘əyâû ḇen-’āmwōṣ hannāḇî’ ‘al-sēfer maləḵê-yəhûḏâ wəyiśərā’ēl:

33 wayyišəkaḇ yəḥizəqîyâû ‘im-’ăḇōṯāyw wayyiqəbəruhû bəm^a‘ălēh qiḇərê ḇənê-ḏāwîḏ wəḵāḇwōḏ ‘āśû-lwō ḇəmwōṯwō kāl-yəhûḏâ wəyōšəḇê yərûšālāim wayyiməlōḵə mənaššeh ḇənwō t^aḥətāyw: f