Deuteronomy (Devarim) Chapter 1

‎1 ‏אֵ֣לֶּה הַדְּבָרִ֗ים אֲשֶׁ֨ר דִּבֶּ֤ר מֹשֶׁה֙ אֶל־כָּל־יִשְׂרָאֵ֔ל בְּעֵ֖בֶר הַיַּרְדֵּ֑ן בַּמִּדְבָּ֡ר בָּֽעֲרָבָה֩ מ֨וֹל ס֜וּף בֵּֽין־פָּארָ֧ן וּבֵֽין־תֹּ֛פֶל וְלָבָ֥ן וַחֲצֵרֹ֖ת וְדִ֥י זָהָֽב׃

‎2 ‏אַחַ֨ד עָשָׂ֥ר יוֹם֙ מֵֽחֹרֵ֔ב דֶּ֖רֶךְ הַר־שֵׂעִ֑יר עַ֖ד קָדֵ֥שׁ בַּרְנֵֽעַ׃

‎3 ‏וַיְהִי֙ בְּאַרְבָּעִ֣ים שָׁנָ֔ה בְּעַשְׁתֵּֽי־עָשָׂ֥ר חֹ֖דֶשׁ בְּאֶחָ֣ד לַחֹ֑דֶשׁ דִּבֶּ֤ר מֹשֶׁה֙ אֶל־בְּנֵ֣י יִשְׂרָאֵ֔ל כְּ֠כֹל אֲשֶׁ֨ר צִוָּ֧ה יְהוָ֛ה אֹת֖וֹ אֲלֵהֶֽם׃

‎4 ‏אַחֲרֵ֣י הַכֹּת֗וֹ אֵ֚ת סִיחֹן֙ מֶ֣לֶךְ הָֽאֱמֹרִ֔י אֲשֶׁ֥ר יוֹשֵׁ֖ב בְּחֶשְׁבּ֑וֹן וְאֵ֗ת ע֚וֹג מֶ֣לֶךְ הַבָּשָׁ֔ן אֲשֶׁר־יוֹשֵׁ֥ב בְּעַשְׁתָּרֹ֖ת בְּאֶדְרֶֽעִי׃

‎5 ‏בְּעֵ֥בֶר הַיַּרְדֵּ֖ן בְּאֶ֣רֶץ מוֹאָ֑ב הוֹאִ֣יל מֹשֶׁ֔ה בֵּאֵ֛ר אֶת־הַתּוֹרָ֥ה הַזֹּ֖את לֵאמֹֽר׃

‎6 ‏יְהוָ֧ה אֱלֹהֵ֛ינוּ דִּבֶּ֥ר אֵלֵ֖ינוּ בְּחֹרֵ֣ב לֵאמֹ֑ר רַב־לָכֶ֥ם שֶׁ֖בֶת בָּהָ֥ר הַזֶּֽה׃

‎7 ‏פְּנ֣וּ׀ וּסְע֣וּ לָכֶ֗ם וּבֹ֨אוּ הַ֥ר הָֽאֱמֹרִי֮ וְאֶל־כָּל־שְׁכֵנָיו֒ בָּעֲרָבָ֥ה בָהָ֛ר וּבַשְּׁפֵלָ֥ה וּבַנֶּ֖גֶב וּבְח֣וֹף הַיָּ֑ם אֶ֤רֶץ הַֽכְּנַעֲנִי֙ וְהַלְּבָנ֔וֹן עַד־הַנָּהָ֥ר הַגָּדֹ֖ל נְהַר־פְּרָֽת׃

‎8 ‏רְאֵ֛ה נָתַ֥תִּי לִפְנֵיכֶ֖ם אֶת־הָאָ֑רֶץ בֹּ֚אוּ וּרְשׁ֣וּ אֶת־הָאָ֔רֶץ אֲשֶׁ֣ר נִשְׁבַּ֣ע יְ֠הוָה לַאֲבֹ֨תֵיכֶ֜ם לְאַבְרָהָ֨ם לְיִצְחָ֤ק וּֽלְיַעֲקֹב֙ לָתֵ֣ת לָהֶ֔ם וּלְזַרְעָ֖ם אַחֲרֵיהֶֽם׃

‎9 ‏וָאֹמַ֣ר אֲלֵכֶ֔ם בָּעֵ֥ת הַהִ֖וא לֵאמֹ֑ר לֹא־אוּכַ֥ל לְבַדִּ֖י שְׂאֵ֥ת אֶתְכֶֽם׃

‎10 ‏יְהוָ֥ה אֱלֹהֵיכֶ֖ם הִרְבָּ֣ה אֶתְכֶ֑ם וְהִנְּכֶ֣ם הַיּ֔וֹם כְּכוֹכְבֵ֥י הַשָּׁמַ֖יִם לָרֹֽב׃

‎11 ‏יְהוָ֞ה אֱלֹהֵ֣י אֲבֽוֹתֵכֶ֗ם יֹסֵ֧ף עֲלֵיכֶ֛ם כָּכֶ֖ם אֶ֣לֶף פְּעָמִ֑ים וִיבָרֵ֣ךְ אֶתְכֶ֔ם כַּאֲשֶׁ֖ר דִּבֶּ֥ר לָכֶֽם׃

‎12 ‏אֵיכָ֥ה אֶשָּׂ֖א לְבַדִּ֑י טָרְחֲכֶ֥ם וּמַֽשַּׂאֲכֶ֖ם וְרִֽיבְכֶֽם׃

‎13 ‏הָב֣וּ לָ֠כֶם אֲנָשִׁ֨ים חֲכָמִ֧ים וּנְבֹנִ֛ים וִידֻעִ֖ים לְשִׁבְטֵיכֶ֑ם וַאֲשִׂימֵ֖ם בְּרָאשֵׁיכֶֽם׃

‎14 ‏וַֽתַּעֲנ֖וּ אֹתִ֑י וַתֹּ֣אמְר֔וּ טֽוֹב־הַדָּבָ֥ר אֲשֶׁר־דִּבַּ֖רְתָּ לַעֲשֽׂוֹת׃

‎15 ‏וָאֶקַּ֞ח אֶת־רָאשֵׁ֣י שִׁבְטֵיכֶ֗ם אֲנָשִׁ֤ים חֲכָמִים֙ וִֽידֻעִ֔ים וָאֶתֵּ֥ן אֹתָ֛ם רָאשִׁ֖ים עֲלֵיכֶ֑ם שָׂרֵ֨י אֲלָפִ֜ים וְשָׂרֵ֣י מֵא֗וֹת וְשָׂרֵ֤י חֲמִשִּׁים֙ וְשָׂרֵ֣י עֲשָׂרֹ֔ת וְשֹׁטְרִ֖ים לְשִׁבְטֵיכֶֽם׃

‎16 ‏וָאֲצַוֶּה֙ אֶת־שֹׁ֣פְטֵיכֶ֔ם בָּעֵ֥ת הַהִ֖וא לֵאמֹ֑ר שָׁמֹ֤עַ בֵּין־אֲחֵיכֶם֙ וּשְׁפַטְתֶּ֣ם צֶ֔דֶק בֵּֽין־אִ֥ישׁ וּבֵין־אָחִ֖יו וּבֵ֥ין גֵּרֽוֹ׃

‎17 ‏לֹֽא־תַכִּ֨ירוּ פָנִ֜ים בַּמִּשְׁפָּ֗ט כַּקָּטֹ֤ן כַּגָּדֹל֙ תִּשְׁמָע֔וּן לֹ֤א תָג֙וּרוּ֙ מִפְּנֵי־אִ֔ישׁ כִּ֥י הַמִּשְׁפָּ֖ט לֵאלֹהִ֣ים ה֑וּא וְהַדָּבָר֙ אֲשֶׁ֣ר יִקְשֶׁ֣ה מִכֶּ֔ם תַּקְרִב֥וּן אֵלַ֖י וּשְׁמַעְתִּֽיו׃

‎18 ‏וָאֲצַוֶּ֥ה אֶתְכֶ֖ם בָּעֵ֣ת הַהִ֑וא אֵ֥ת כָּל־הַדְּבָרִ֖ים אֲשֶׁ֥ר תַּעֲשֽׂוּן׃

‎19 ‏וַנִּסַּ֣ע מֵחֹרֵ֗ב וַנֵּ֡לֶךְ אֵ֣ת כָּל־הַמִּדְבָּ֣ר הַגָּדוֹל֩ וְהַנּוֹרָ֨א הַה֜וּא אֲשֶׁ֣ר רְאִיתֶ֗ם דֶּ֚רֶךְ הַ֣ר הָֽאֱמֹרִ֔י כַּאֲשֶׁ֥ר צִוָּ֛ה יְהוָ֥ה אֱלֹהֵ֖ינוּ אֹתָ֑נוּ וַנָּבֹ֕א עַ֖ד קָדֵ֥שׁ בַּרְנֵֽעַ׃

‎20 ‏וָאֹמַ֖ר אֲלֵכֶ֑ם בָּאתֶם֙ עַד־הַ֣ר הָאֱמֹרִ֔י אֲשֶׁר־יְהוָ֥ה אֱלֹהֵ֖ינוּ נֹתֵ֥ן לָֽנוּ׃

‎21 ‏רְ֠אֵה נָתַ֨ן יְהוָ֧ה אֱלֹהֶ֛יךָ לְפָנֶ֖יךָ אֶת־הָאָ֑רֶץ עֲלֵ֣ה רֵ֗שׁ כַּאֲשֶׁר֩ דִּבֶּ֨ר יְהוָ֜ה אֱלֹהֵ֤י אֲבֹתֶ֙יךָ֙ לָ֔ךְ אַל־תִּירָ֖א וְאַל־תֵּחָֽת׃

‎22 ‏וַתִּקְרְב֣וּן אֵלַי֮ כֻּלְּכֶם֒ וַתֹּאמְר֗וּ נִשְׁלְחָ֤ה אֲנָשִׁים֙ לְפָנֵ֔ינוּ וְיַחְפְּרוּ־לָ֖נוּ אֶת־הָאָ֑רֶץ וְיָשִׁ֤בוּ אֹתָ֙נוּ֙ דָּבָ֔ר אֶת־הַדֶּ֙רֶךְ֙ אֲשֶׁ֣ר נַעֲלֶה־בָּ֔הּ וְאֵת֙ הֶֽעָרִ֔ים אֲשֶׁ֥ר נָבֹ֖א אֲלֵיהֶֽן׃

‎23 ‏וַיִּיטַ֥ב בְּעֵינַ֖י הַדָּבָ֑ר וָאֶקַּ֤ח מִכֶּם֙ שְׁנֵ֣ים עָשָׂ֣ר אֲנָשִׁ֔ים אִ֥ישׁ אֶחָ֖ד לַשָּֽׁבֶט׃

‎24 ‏וַיִּפְנוּ֙ וַיַּעֲל֣וּ הָהָ֔רָה וַיָּבֹ֖אוּ עַד־נַ֣חַל אֶשְׁכֹּ֑ל וַֽיְרַגְּל֖וּ אֹתָֽהּ׃

‎25 ‏וַיִּקְח֤וּ בְיָדָם֙ מִפְּרִ֣י הָאָ֔רֶץ וַיּוֹרִ֖דוּ אֵלֵ֑ינוּ וַיָּשִׁ֨בוּ אֹתָ֤נוּ דָבָר֙ וַיֹּ֣אמְר֔וּ טוֹבָ֣ה הָאָ֔רֶץ אֲשֶׁר־יְהוָ֥ה אֱלֹהֵ֖ינוּ נֹתֵ֥ן לָֽנוּ׃

‎26 ‏וְלֹ֥א אֲבִיתֶ֖ם לַעֲלֹ֑ת וַתַּמְר֕וּ אֶת־פִּ֥י יְהוָ֖ה אֱלֹהֵיכֶֽם׃

‎27 ‏וַתֵּרָגְנ֤וּ בְאָהֳלֵיכֶם֙ וַתֹּ֣אמְר֔וּ בְּשִׂנְאַ֤ת יְהוָה֙ אֹתָ֔נוּ הוֹצִיאָ֖נוּ מֵאֶ֣רֶץ מִצְרָ֑יִם לָתֵ֥ת אֹתָ֛נוּ בְּיַ֥ד הָאֱמֹרִ֖י לְהַשְׁמִידֵֽנוּ׃

‎28 ‏אָנָ֣ה׀ אֲנַ֣חְנוּ עֹלִ֗ים אַחֵינוּ֩ הֵמַ֨סּוּ אֶת־לְבָבֵ֜נוּ לֵאמֹ֗ר עַ֣ם גָּד֤וֹל וָרָם֙ מִמֶּ֔נּוּ עָרִ֛ים גְּדֹלֹ֥ת וּבְצוּרֹ֖ת בַּשָּׁמָ֑יִם וְגַם־בְּנֵ֥י עֲנָקִ֖ים רָאִ֥ינוּ שָֽׁם׃

‎29 ‏וָאֹמַ֖ר אֲלֵכֶ֑ם לֹא־תַֽעַרְצ֥וּן וְֽלֹא־תִֽירְא֖וּן מֵהֶֽם׃

‎30 ‏יְהוָ֤ה אֱלֹֽהֵיכֶם֙ הַהֹלֵ֣ךְ לִפְנֵיכֶ֔ם ה֖וּא יִלָּחֵ֣ם לָכֶ֑ם כְּ֠כֹל אֲשֶׁ֨ר עָשָׂ֧ה אִתְּכֶ֛ם בְּמִצְרַ֖יִם לְעֵינֵיכֶֽם׃

‎31 ‏וּבַמִּדְבָּר֙ אֲשֶׁ֣ר רָאִ֔יתָ אֲשֶׁ֤ר נְשָׂאֲךָ֙ יְהוָ֣ה אֱלֹהֶ֔יךָ כַּאֲשֶׁ֥ר יִשָּׂא־אִ֖ישׁ אֶת־בְּנ֑וֹ בְּכָל־הַדֶּ֙רֶךְ֙ אֲשֶׁ֣ר הֲלַכְתֶּ֔ם עַד־בֹּאֲכֶ֖ם עַד־הַמָּק֥וֹם הַזֶּֽה׃

‎32 ‏וּבַדָּבָ֖ר הַזֶּ֑ה אֵֽינְכֶם֙ מַאֲמִינִ֔ם בַּיהוָ֖ה אֱלֹהֵיכֶֽם׃

‎33 ‏הַהֹלֵ֨ךְ לִפְנֵיכֶ֜ם בַּדֶּ֗רֶךְ לָת֥וּר לָכֶ֛ם מָק֖וֹם לַֽחֲנֹֽתְכֶ֑ם בָּאֵ֣שׁ׀ לַ֗יְלָה לַרְאֹֽתְכֶם֙ בַּדֶּ֙רֶךְ֙ אֲשֶׁ֣ר תֵּֽלְכוּ־בָ֔הּ וּבֶעָנָ֖ן יוֹמָֽם׃

‎34 ‏וַיִּשְׁמַ֥ע יְהוָ֖ה אֶת־ק֣וֹל דִּבְרֵיכֶ֑ם וַיִּקְצֹ֖ף וַיִּשָּׁבַ֥ע לֵאמֹֽר׃

‎35 ‏אִם־יִרְאֶ֥ה אִישׁ֙ בָּאֲנָשִׁ֣ים הָאֵ֔לֶּה הַדּ֥וֹר הָרָ֖ע הַזֶּ֑ה אֵ֚ת הָאָ֣רֶץ הַטּוֹבָ֔ה אֲשֶׁ֣ר נִשְׁבַּ֔עְתִּי לָתֵ֖ת לַאֲבֹתֵיכֶֽם׃

‎36 ‏זֽוּלָתִ֞י כָּלֵ֤ב בֶּן־יְפֻנֶּה֙ ה֣וּא יִרְאֶ֔נָּה וְלֽוֹ־אֶתֵּ֧ן אֶת־הָאָ֛רֶץ אֲשֶׁ֥ר דָּֽרַךְ־בָּ֖הּ וּלְבָנָ֑יו יַ֕עַן אֲשֶׁ֥ר מִלֵּ֖א אַחֲרֵ֥י יְהוָֽה׃

‎37 ‏גַּם־בִּי֙ הִתְאַנַּ֣ף יְהוָ֔ה בִּגְלַלְכֶ֖ם לֵאמֹ֑ר גַּם־אַתָּ֖ה לֹא־תָבֹ֥א שָֽׁם׃

‎38 ‏יְהוֹשֻׁ֤עַ בִּן־נוּן֙ הָעֹמֵ֣ד לְפָנֶ֔יךָ ה֖וּא יָ֣בֹא שָׁ֑מָּה אֹת֣וֹ חַזֵּ֔ק כִּי־ה֖וּא יַנְחִלֶ֥נָּה אֶת־יִשְׂרָאֵֽל׃

‎39 ‏וְטַפְּכֶם֩ אֲשֶׁ֨ר אֲמַרְתֶּ֜ם לָבַ֣ז יִהְיֶ֗ה וּ֠בְנֵיכֶם אֲשֶׁ֨ר לֹא־יָדְע֤וּ הַיּוֹם֙ ט֣וֹב וָרָ֔ע הֵ֖מָּה יָבֹ֣אוּ שָׁ֑מָּה וְלָהֶ֣ם אֶתְּנֶ֔נָּה וְהֵ֖ם יִירָשֽׁוּהָ׃

‎40 ‏וְאַתֶּ֖ם פְּנ֣וּ לָכֶ֑ם וּסְע֥וּ הַמִּדְבָּ֖רָה דֶּ֥רֶךְ יַם־סֽוּף׃

‎41 ‏וַֽתַּעֲנ֣וּ׀ וַתֹּאמְר֣וּ אֵלַ֗י חָטָאנוּ֮ לַֽיהוָה֒ אֲנַ֤חְנוּ נַעֲלֶה֙ וְנִלְחַ֔מְנוּ כְּכֹ֥ל אֲשֶׁר־צִוָּ֖נוּ יְהוָ֣ה אֱלֹהֵ֑ינוּ וַֽתַּחְגְּר֗וּ אִ֚ישׁ אֶת־כְּלֵ֣י מִלְחַמְתּ֔וֹ וַתָּהִ֖ינוּ לַעֲלֹ֥ת הָהָֽרָה׃

‎42 ‏וַיֹּ֨אמֶר יְהוָ֜ה אֵלַ֗י אֱמֹ֤ר לָהֶם֙ לֹ֤א תַֽעֲלוּ֙ וְלֹא־תִלָּ֣חֲמ֔וּ כִּ֥י אֵינֶ֖נִּי בְּקִרְבְּכֶ֑ם וְלֹא֙ תִּנָּֽגְפ֔וּ לִפְנֵ֖י אֹיְבֵיכֶֽם׃

‎43 ‏וָאֲדַבֵּ֥ר אֲלֵיכֶ֖ם וְלֹ֣א שְׁמַעְתֶּ֑ם וַתַּמְרוּ֙ אֶת־פִּ֣י יְהוָ֔ה וַתָּזִ֖דוּ וַתַּעֲל֥וּ הָהָֽרָה׃

‎44 ‏וַיֵּצֵ֨א הָאֱמֹרִ֜י הַיֹּשֵׁ֨ב בָּהָ֤ר הַהוּא֙ לִקְרַאתְכֶ֔ם וַיִּרְדְּפ֣וּ אֶתְכֶ֔ם כַּאֲשֶׁ֥ר תַּעֲשֶׂ֖ינָה הַדְּבֹרִ֑ים וַֽיַּכְּת֥וּ אֶתְכֶ֛ם בְּשֵׂעִ֖יר עַד־חָרְמָֽה׃

‎45 ‏וַתָּשֻׁ֥בוּ וַתִּבְכּ֖וּ לִפְנֵ֣י יְהוָ֑ה וְלֹֽא־שָׁמַ֤ע יְהוָה֙ בְּקֹ֣לְכֶ֔ם וְלֹ֥א הֶאֱזִ֖ין אֲלֵיכֶֽם׃

‎46 ‏וַתֵּשְׁב֥וּ בְקָדֵ֖שׁ יָמִ֣ים רַבִּ֑ים כַּיָּמִ֖ים אֲשֶׁ֥ר יְשַׁבְתֶּֽם׃

1 ’ēlleh hadəḇārîm ’ăšer diber mōšeh ’el-kāl-yiśərā’ēl bə‘ēḇer hayyarədēn bammiḏəbār bā‘ărāḇâ mwōl sûf bên-pā’rān ûḇên-tōfel wəlāḇān w^aḥăṣērōṯ wəḏî zâāḇ:

2 ’^aḥaḏ ‘āśār ywōm mēḥōrēḇ dereḵə har-śē‘îr ‘aḏ qāḏēš barənē‘a:

3 wayəhî bə’arəbā‘îm šānâ bə‘ašətê-‘āśār ḥōḏeš bə’eḥāḏ l^aḥōḏeš diber mōšeh ’el-bənê yiśərā’ēl kəḵōl ’ăšer ṣiûâ yəhwâ ’ōṯwō ’ălēhem:

4 ’^aḥărê hakōṯwō ’ēṯ sîḥōn meleḵə hā’ĕmōrî ’ăšer ywōšēḇ bəḥešəbwōn wə’ēṯ ‘wōḡ meleḵə habāšān ’ăšer-ywōšēḇ bə‘ašətārōṯ bə’eḏəre‘î:

5 bə‘ēḇer hayyarədēn bə’ereṣ mwō’āḇ hwō’îl mōšeh bē’ēr ’eṯ-hatwōrâ hazzō’ṯ lē’mōr:

6 yəhwâ ’ĕlōhênû diber ’ēlênû bəḥōrēḇ lē’mōr raḇ-lāḵem šeḇeṯ bâār hazzeh:

7 pənû| ûsə‘û lāḵem ûḇō’û har hā’ĕmōrî wə’el-kāl-šəḵēnāyw bā‘ărāḇâ ḇâār ûḇaššəfēlâ ûḇanneḡeḇ ûḇəḥwōf hayyām ’ereṣ hakən^a‘ănî wəhalləḇānwōn ‘aḏ-hannâār hagāḏōl nəhar-pərāṯ:

8 rə’ēh nāṯatî lifənêḵem ’eṯ-hā’āreṣ bō’û ûrəšû ’eṯ-hā’āreṣ ’ăšer nišəb^a‘ yəhwâ la’ăḇōṯêḵem lə’aḇərâām ləyiṣəḥāq ûləy^a‘ăqōḇ lāṯēṯ lâem ûləzarə‘ām ’^aḥărêhem:

9 wā’ōmar ’ălēḵem bā‘ēṯ hahiw’ lē’mōr lō’-’ûḵal ləḇadî śə’ēṯ ’eṯəḵem:

10 yəhwâ ’ĕlōhêḵem hirəbâ ’eṯəḵem wəhinnəḵem hayywōm kəḵwōḵəḇê haššāmayim lārōḇ:

11 yəhwâ ’ĕlōhê ’ăḇwōṯēḵem yōsēf ‘ălêḵem kāḵem ’elef pə‘āmîm wîḇārēḵə ’eṯəḵem ka’ăšer diber lāḵem:

12 ’êḵâ ’eśśā’ ləḇadî ṭārəḥăḵem ûmaśśa’ăḵem wərîḇəḵem:

13 hāḇû lāḵem ’ănāšîm ḥăḵāmîm ûnəḇōnîm wîḏu‘îm ləšiḇəṭêḵem wa’ăśîmēm bərā’šêḵem:

14 wat^a‘ănû ’ōṯî watō’mərû ṭwōḇ-hadāḇār ’ăšer-dibarətā l^a‘ăśwōṯ:

15 wā’eqq^aḥ ’eṯ-rā’šê šiḇəṭêḵem ’ănāšîm ḥăḵāmîm wîḏu‘îm wā’etēn ’ōṯām rā’šîm ‘ălêḵem śārê ’ălāfîm wəśārê mē’wōṯ wəśārê ḥămiššîm wəśārê ‘ăśārōṯ wəšōṭərîm ləšiḇəṭêḵem:

16 wā’ăṣaûeh ’eṯ-šōfəṭêḵem bā‘ēṯ hahiw’ lē’mōr šāmō‘a bên-’ăḥêḵem ûšəfaṭətem ṣeḏeq bên-’îš ûḇên-’āḥîw ûḇên gērwō:

17 lō’-ṯakîrû fānîm bammišəpāṭ kaqqāṭōn kagāḏōl tišəmā‘ûn lō’ ṯāḡûrû mipənê-’îš kî hammišəpāṭ lē’lōhîm hû’ wəhadāḇār ’ăšer yiqəšeh mikem taqəriḇûn ’ēlay ûšəm^a‘ətîw:

18 wā’ăṣaûeh ’eṯəḵem bā‘ēṯ hahiw’ ’ēṯ kāl-hadəḇārîm ’ăšer t^a‘ăśûn:

19 wanniss^a‘ mēḥōrēḇ wannēleḵə ’ēṯ kāl-hammiḏəbār hagāḏwōl wəhannwōrā’ hahû’ ’ăšer rə’îṯem dereḵə har hā’ĕmōrî ka’ăšer ṣiûâ yəhwâ ’ĕlōhênû ’ōṯānû wannāḇō’ ‘aḏ qāḏēš barənē‘a:

20 wā’ōmar ’ălēḵem bā’ṯem ‘aḏ-har hā’ĕmōrî ’ăšer-yəhwâ ’ĕlōhênû nōṯēn lānû:

21 rə’ēh nāṯan yəhwâ ’ĕlōheyḵā ləfāneyḵā ’eṯ-hā’āreṣ ‘ălēh rēš ka’ăšer diber yəhwâ ’ĕlōhê ’ăḇōṯeyḵā lāḵə ’al-tîrā’ wə’al-tēḥāṯ:

22 watiqərəḇûn ’ēlay kulləḵem watō’mərû nišələḥâ ’ănāšîm ləfānênû wəy^aḥəpərû-lānû ’eṯ-hā’āreṣ wəyāšiḇû ’ōṯānû dāḇār ’eṯ-hadereḵə ’ăšer n^a‘ăleh-bāh wə’ēṯ he‘ārîm ’ăšer nāḇō’ ’ălêhen:

23 wayyîṭaḇ bə‘ênay hadāḇār wā’eqq^aḥ mikem šənêm ‘āśār ’ănāšîm ’îš ’eḥāḏ laššāḇeṭ:

24 wayyifənû wayy^a‘ălû hâārâ wayyāḇō’û ‘aḏ-n^aḥal ’ešəkōl wayəragəlû ’ōṯāh:

25 wayyiqəḥû ḇəyāḏām mipərî hā’āreṣ wayywōriḏû ’ēlênû wayyāšiḇû ’ōṯānû ḏāḇār wayyō’mərû ṭwōḇâ hā’āreṣ ’ăšer-yəhwâ ’ĕlōhênû nōṯēn lānû:

26 wəlō’ ’ăḇîṯem l^a‘ălōṯ watamərû ’eṯ-pî yəhwâ ’ĕlōhêḵem:

27 watērāḡənû ḇə’âŏlêḵem watō’mərû bəśinə’aṯ yəhwâ ’ōṯānû hwōṣî’ānû mē’ereṣ miṣərāyim lāṯēṯ ’ōṯānû bəyaḏ hā’ĕmōrî ləhašəmîḏēnû:

28 ’ānâ| ’ăn^aḥənû ‘ōlîm ’^aḥênû hēmassû ’eṯ-ləḇāḇēnû lē’mōr ‘am gāḏwōl wārām mimmennû ‘ārîm gəḏōlōṯ ûḇəṣûrōṯ baššāmāyim wəḡam-bənê ‘ănāqîm rā’înû šām:

29 wā’ōmar ’ălēḵem lō’-ṯ^a‘arəṣûn wəlō’-ṯîrə’ûn mēhem:

30 yəhwâ ’ĕlōhêḵem hahōlēḵə lifənêḵem hû’ yillāḥēm lāḵem kəḵōl ’ăšer ‘āśâ ’itəḵem bəmiṣərayim lə‘ênêḵem:

31 ûḇammiḏəbār ’ăšer rā’îṯā ’ăšer nəśā’ăḵā yəhwâ ’ĕlōheyḵā ka’ăšer yiśśā’-’îš ’eṯ-bənwō bəḵāl-hadereḵə ’ăšer hălaḵətem ‘aḏ-bō’ăḵem ‘aḏ-hammāqwōm hazzeh:

32 ûḇadāḇār hazzeh ’ênəḵem ma’ămînim bayhwâ ’ĕlōhêḵem:

33 hahōlēḵə lifənêḵem badereḵə lāṯûr lāḵem māqwōm l^aḥănōṯəḵem bā’ēš| layəlâ larə’ōṯəḵem badereḵə ’ăšer tēləḵû-ḇāh ûḇe‘ānān ywōmām:

34 wayyišəm^a‘ yəhwâ ’eṯ-qwōl diḇərêḵem wayyiqəṣōf wayyiššāḇ^a‘ lē’mōr:

35 ’im-yirə’eh ’îš bā’ănāšîm hā’ēlleh hadwōr hārā‘ hazzeh ’ēṯ hā’āreṣ haṭṭwōḇâ ’ăšer nišəb^a‘ətî lāṯēṯ la’ăḇōṯêḵem:

36 zûlāṯî kālēḇ ben-yəfunneh hû’ yirə’ennâ wəlwō-’etēn ’eṯ-hā’āreṣ ’ăšer dāraḵə-bāh ûləḇānāyw y^a‘an ’ăšer millē’ ’^aḥărê yəhwâ:

37 gam-bî hiṯə’annaf yəhwâ biḡəlaləḵem lē’mōr gam-’atâ lō’-ṯāḇō’ šām:

38 yəhwōšu‘a bin-nûn hā‘ōmēḏ ləfāneyḵā hû’ yāḇō’ šāmmâ ’ōṯwō ḥazzēq kî-hû’ yanəḥilennâ ’eṯ-yiśərā’ēl:

39 wəṭapəḵem ’ăšer ’ămarətem lāḇaz yihəyeh ûḇənêḵem ’ăšer lō’-yāḏə‘û hayywōm ṭwōḇ wārā‘ hēmmâ yāḇō’û šāmmâ wəlâem ’etənennâ wəhēm yîrāšûhā:

40 wə’atem pənû lāḵem ûsə‘û hammiḏəbārâ dereḵə yam-sûf:

41 wat^a‘ănû| watō’mərû ’ēlay ḥāṭā’nû layhwâ ’ăn^aḥənû n^a‘ăleh wəniləḥamənû kəḵōl ’ăšer-ṣiûānû yəhwâ ’ĕlōhênû wat^aḥəgərû ’îš ’eṯ-kəlê miləḥamətwō watâînû l^a‘ălōṯ hâārâ:

42 wayyō’mer yəhwâ ’ēlay ’ĕmōr lâem lō’ ṯ^a‘ălû wəlō’-ṯillāḥămû kî ’ênennî bəqirəbəḵem wəlō’ tinnāḡəfû lifənê ’ōyəḇêḵem:

43 wā’ăḏabēr ’ălêḵem wəlō’ šəm^a‘ətem watamərû ’eṯ-pî yəhwâ watāziḏû wat^a‘ălû hâārâ:

44 wayyēṣē’ hā’ĕmōrî hayyōšēḇ bâār hahû’ liqəra’ṯəḵem wayyirədəfû ’eṯəḵem ka’ăšer t^a‘ăśeynâ hadəḇōrîm wayyakəṯû ’eṯəḵem bəśē‘îr ‘aḏ-ḥārəmâ:

45 watāšuḇû watiḇəkû lifənê yəhwâ wəlō’-šām^a‘ yəhwâ bəqōləḵem wəlō’ he’ĕzîn ’ălêḵem:

46 watēšəḇû ḇəqāḏēš yāmîm rabîm kayyāmîm ’ăšer yəšaḇətem: