Deuteronomy (Devarim) Chapter 19

‎1 ‏כִּֽי־יַכְרִ֞ית יְהוָ֤ה אֱלֹהֶ֙יךָ֙ אֶת־הַגּוֹיִ֔ם אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ אֶת־אַרְצָ֑ם וִֽירִשְׁתָּ֕ם וְיָשַׁבְתָּ֥ בְעָרֵיהֶ֖ם וּבְבָתֵּיהֶֽם׃

‎2 ‏שָׁל֥וֹשׁ עָרִ֖ים תַּבְדִּ֣יל לָ֑ךְ בְּת֣וֹךְ אַרְצְךָ֔ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ לְרִשְׁתָּֽהּ׃

‎3 ‏תָּכִ֣ין לְךָ֮ הַדֶּרֶךְ֒ וְשִׁלַּשְׁתָּ֙ אֶת־גְּב֣וּל אַרְצְךָ֔ אֲשֶׁ֥ר יַנְחִֽילְךָ֖ יְהוָ֣ה אֱלֹהֶ֑יךָ וְהָיָ֕ה לָנ֥וּס שָׁ֖מָּה כָּל־רֹצֵֽחַ׃

‎4 ‏וְזֶה֙ דְּבַ֣ר הָרֹצֵ֔חַ אֲשֶׁר־יָנ֥וּס שָׁ֖מָּה וָחָ֑י אֲשֶׁ֨ר יַכֶּ֤ה אֶת־רֵעֵ֙הוּ֙ בִּבְלִי־דַ֔עַת וְה֛וּא לֹא־שֹׂנֵ֥א ל֖וֹ מִתְּמֹ֥ל שִׁלְשֹֽׁם׃

‎5 ‏וַאֲשֶׁר֩ יָבֹ֨א אֶת־רֵעֵ֥הוּ בַיַּעַר֮ לַחְטֹ֣ב עֵצִים֒ וְנִדְּחָ֨ה יָד֤וֹ בַגַּרְזֶן֙ לִכְרֹ֣ת הָעֵ֔ץ וְנָשַׁ֤ל הַבַּרְזֶל֙ מִן־הָעֵ֔ץ וּמָצָ֥א אֶת־רֵעֵ֖הוּ וָמֵ֑ת ה֗וּא יָנ֛וּס אֶל־אַחַ֥ת הֶעָרִים־הָאֵ֖לֶּה וָחָֽי׃

‎6 ‏פֶּן־יִרְדֹּף֩ גֹּאֵ֨ל הַדָּ֜ם אַחֲרֵ֣י הָרֹצֵ֗חַ כִּי־יֵחַם֮ לְבָבוֹ֒ וְהִשִּׂיג֛וֹ כִּֽי־יִרְבֶּ֥ה הַדֶּ֖רֶךְ וְהִכָּ֣הוּ נָ֑פֶשׁ וְלוֹ֙ אֵ֣ין מִשְׁפַּט־מָ֔וֶת כִּ֠י לֹ֣א שֹׂנֵ֥א ה֛וּא ל֖וֹ מִתְּמ֥וֹל שִׁלְשֽׁוֹם׃

‎7 ‏עַל־כֵּ֛ן אָנֹכִ֥י מְצַוְּךָ֖ לֵאמֹ֑ר שָׁלֹ֥שׁ עָרִ֖ים תַּבְדִּ֥יל לָֽךְ׃ ס

‎8 ‏וְאִם־יַרְחִ֞יב יְהוָ֤ה אֱלֹהֶ֙יךָ֙ אֶת־גְּבֻ֣לְךָ֔ כַּאֲשֶׁ֥ר נִשְׁבַּ֖ע לַאֲבֹתֶ֑יךָ וְנָ֤תַן לְךָ֙ אֶת־כָּל־הָאָ֔רֶץ אֲשֶׁ֥ר דִּבֶּ֖ר לָתֵ֥ת לַאֲבֹתֶֽיךָ׃

‎9 ‏כִּֽי־תִשְׁמֹר֩ אֶת־כָּל־הַמִּצְוָ֨ה הַזֹּ֜את לַעֲשֹׂתָ֗הּ אֲשֶׁ֨ר אָנֹכִ֣י מְצַוְּךָ֮ הַיּוֹם֒ לְאַהֲבָ֞ה אֶת־יְהוָ֧ה אֱלֹהֶ֛יךָ וְלָלֶ֥כֶת בִּדְרָכָ֖יו כָּל־הַיָּמִ֑ים וְיָסַפְתָּ֙ לְךָ֥ עוֹד֙ שָׁלֹ֣שׁ עָרִ֔ים עַ֖ל הַשָּׁלֹ֥שׁ הָאֵֽלֶּה׃

‎10 ‏וְלֹ֤א יִשָּׁפֵךְ֙ דָּ֣ם נָקִ֔י בְּקֶ֣רֶב אַרְצְךָ֔ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָ֑ה וְהָיָ֥ה עָלֶ֖יךָ דָּמִֽים׃ ס

‎11 ‏וְכִֽי־יִהְיֶ֥ה אִישׁ֙ שֹׂנֵ֣א לְרֵעֵ֔הוּ וְאָ֤רַב לוֹ֙ וְקָ֣ם עָלָ֔יו וְהִכָּ֥הוּ נֶ֖פֶשׁ וָמֵ֑ת וְנָ֕ס אֶל־אַחַ֖ת הֶעָרִ֥ים הָאֵֽל׃

‎12 ‏וְשָֽׁלְחוּ֙ זִקְנֵ֣י עִיר֔וֹ וְלָקְח֥וּ אֹת֖וֹ מִשָּׁ֑ם וְנָתְנ֣וּ אֹת֗וֹ בְּיַ֛ד גֹּאֵ֥ל הַדָּ֖ם וָמֵֽת׃

‎13 ‏לֹא־תָח֥וֹס עֵֽינְךָ֖ עָלָ֑יו וּבִֽעַרְתָּ֧ דַֽם־הַנָּקִ֛י מִיִּשְׂרָאֵ֖ל וְט֥וֹב לָֽךְ׃ ס

‎14 ‏לֹ֤א תַסִּיג֙ גְּב֣וּל רֵֽעֲךָ֔ אֲשֶׁ֥ר גָּבְל֖וּ רִאשֹׁנִ֑ים בְּנַחֲלָֽתְךָ֙ אֲשֶׁ֣ר תִּנְחַ֔ל בָּאָ֕רֶץ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ לְרִשְׁתָּֽהּ׃ ס

‎15 ‏לֹֽא־יָקוּם֩ עֵ֨ד אֶחָ֜ד בְּאִ֗ישׁ לְכָל־עָוֹן֙ וּלְכָל־חַטָּ֔את בְּכָל־חֵ֖טְא אֲשֶׁ֣ר יֶֽחֱטָ֑א עַל־פִּ֣י׀ שְׁנֵ֣י עֵדִ֗ים א֛וֹ עַל־פִּ֥י שְׁלֹשָֽׁה־עֵדִ֖ים יָק֥וּם דָּבָֽר׃

‎16 ‏כִּֽי־יָק֥וּם עֵד־חָמָ֖ס בְּאִ֑ישׁ לַעֲנ֥וֹת בּ֖וֹ סָרָֽה׃

‎17 ‏וְעָמְד֧וּ שְׁנֵֽי־הָאֲנָשִׁ֛ים אֲשֶׁר־לָהֶ֥ם הָרִ֖יב לִפְנֵ֣י יְהוָ֑ה לִפְנֵ֤י הַכֹּֽהֲנִים֙ וְהַשֹּׁ֣פְטִ֔ים אֲשֶׁ֥ר יִהְי֖וּ בַּיָּמִ֥ים הָהֵֽם׃

‎18 ‏וְדָרְשׁ֥וּ הַשֹּׁפְטִ֖ים הֵיטֵ֑ב וְהִנֵּ֤ה עֵֽד־שֶׁ֙קֶר֙ הָעֵ֔ד שֶׁ֖קֶר עָנָ֥ה בְאָחִֽיו׃

‎19 ‏וַעֲשִׂ֣יתֶם ל֔וֹ כַּאֲשֶׁ֥ר זָמַ֖ם לַעֲשׂ֣וֹת לְאָחִ֑יו וּבִֽעַרְתָּ֥ הָרָ֖ע מִקִּרְבֶּֽךָ׃

‎20 ‏וְהַנִּשְׁאָרִ֖ים יִשְׁמְע֣וּ וְיִרָ֑אוּ וְלֹֽא־יֹסִ֨פוּ לַעֲשׂ֜וֹת ע֗וֹד כַּדָּבָ֥ר הָרָ֛ע הַזֶּ֖ה בְּקִרְבֶּֽךָ׃

‎21 ‏וְלֹ֥א תָח֖וֹס עֵינֶ֑ךָ נֶ֣פֶשׁ בְּנֶ֗פֶשׁ³ עַ֤יִן בְּעַ֙יִן֙ שֵׁ֣ן בְּשֵׁ֔ן יָ֥ד בְּיָ֖ד רֶ֥גֶל בְּרָֽגֶל׃ ס

1 kî-yaḵərîṯ yəhwâ ’ĕlōheyḵā ’eṯ-hagwōyim ’ăšer yəhwâ ’ĕlōheyḵā nōṯēn ləḵā ’eṯ-’arəṣām wîrišətām wəyāšaḇətā ḇə‘ārêhem ûḇəḇātêhem:

2 šālwōš ‘ārîm taḇədîl lāḵə bəṯwōḵə ’arəṣəḵā ’ăšer yəhwâ ’ĕlōheyḵā nōṯēn ləḵā lərišətāh:

3 tāḵîn ləḵā hadereḵə wəšillašətā ’eṯ-gəḇûl ’arəṣəḵā ’ăšer yanəḥîləḵā yəhwâ ’ĕlōheyḵā wəhāyâ lānûs šāmmâ kāl-rōṣēḥa:

4 wəzeh dəḇar hārōṣēḥa ’ăšer-yānûs šāmmâ wāḥāy ’ăšer yakeh ’eṯ-rē‘ēhû biḇəlî-ḏ^a‘aṯ wəhû’ lō’-śōnē’ lwō mitəmōl šiləšōm:

5 wa’ăšer yāḇō’ ’eṯ-rē‘ēhû ḇayy^a‘ar l^aḥəṭōḇ ‘ēṣîm wənidəḥâ yāḏwō ḇagarəzen liḵərōṯ hā‘ēṣ wənāšal habarəzel min-hā‘ēṣ ûmāṣā’ ’eṯ-rē‘ēhû wāmēṯ hû’ yānûs ’el-’^aḥaṯ he‘ārîm-hā’ēlleh wāḥāy:

6 pen-yirədōf gō’ēl hadām ’^aḥărê hārōṣēḥa kî-yēḥam ləḇāḇwō wəhiśśîḡwō kî-yirəbeh hadereḵə wəhikâû nāfeš wəlwō ’ên mišəpaṭ-māweṯ kî lō’ śōnē’ hû’ lwō mitəmwōl šiləšwōm:

7 ‘al-kēn ’ānōḵî məṣaûəḵā lē’mōr šālōš ‘ārîm taḇədîl lāḵə: s

8 wə’im-yarəḥîḇ yəhwâ ’ĕlōheyḵā ’eṯ-gəḇuləḵā ka’ăšer nišəb^a‘ la’ăḇōṯeyḵā wənāṯan ləḵā ’eṯ-kāl-hā’āreṣ ’ăšer diber lāṯēṯ la’ăḇōṯeyḵā:

9 kî-ṯišəmōr ’eṯ-kāl-hammiṣəwâ hazzō’ṯ l^a‘ăśōṯāh ’ăšer ’ānōḵî məṣaûəḵā hayywōm lə’ahăḇâ ’eṯ-yəhwâ ’ĕlōheyḵā wəlāleḵeṯ biḏərāḵāyw kāl-hayyāmîm wəyāsafətā ləḵā ‘wōḏ šālōš ‘ārîm ‘al haššālōš hā’ēlleh:

10 wəlō’ yiššāfēḵə dām nāqî bəqereḇ ’arəṣəḵā ’ăšer yəhwâ ’ĕlōheyḵā nōṯēn ləḵā n^aḥălâ wəhāyâ ‘āleyḵā dāmîm: s

11 wəḵî-yihəyeh ’îš śōnē’ lərē‘ēhû wə’āraḇ lwō wəqām ‘ālāyw wəhikâû nefeš wāmēṯ wənās ’el-’^aḥaṯ he‘ārîm hā’ēl:

12 wəšāləḥû ziqənê ‘îrwō wəlāqəḥû ’ōṯwō miššām wənāṯənû ’ōṯwō bəyaḏ gō’ēl hadām wāmēṯ:

13 lō’-ṯāḥwōs ‘ênəḵā ‘ālāyw ûḇi‘arətā ḏam-hannāqî mîyiśərā’ēl wəṭwōḇ lāḵə: s

14 lō’ ṯassîḡ gəḇûl rē‘ăḵā ’ăšer gāḇəlû ri’šōnîm bən^aḥălāṯəḵā ’ăšer tinəḥal bā’āreṣ ’ăšer yəhwâ ’ĕlōheyḵā nōṯēn ləḵā lərišətāh: s

15 lō’-yāqûm ‘ēḏ ’eḥāḏ bə’îš ləḵāl-‘āwōn ûləḵāl-ḥaṭṭā’ṯ bəḵāl-ḥēṭə’ ’ăšer yeḥĕṭā’ ‘al-pî| šənê ‘ēḏîm ’wō ‘al-pî šəlōšâ-‘ēḏîm yāqûm dāḇār:

16 kî-yāqûm ‘ēḏ-ḥāmās bə’îš l^a‘ănwōṯ bwō sārâ:

17 wə‘āməḏû šənê-hā’ănāšîm ’ăšer-lâem hārîḇ lifənê yəhwâ lifənê hakōhănîm wəhaššōfəṭîm ’ăšer yihəyû bayyāmîm hâēm:

18 wəḏārəšû haššōfəṭîm hêṭēḇ wəhinnēh ‘ēḏ-šeqer hā‘ēḏ šeqer ‘ānâ ḇə’āḥîw:

19 w^a‘ăśîṯem lwō ka’ăšer zāmam l^a‘ăśwōṯ lə’āḥîw ûḇi‘arətā hārā‘ miqqirəbeḵā:

20 wəhannišə’ārîm yišəmə‘û wəyirā’û wəlō’-yōsifû l^a‘ăśwōṯ ‘wōḏ kadāḇār hārā‘ hazzeh bəqirəbeḵā:

21 wəlō’ ṯāḥwōs ‘êneḵā nefeš bənefeš³ ‘ayin bə‘ayin šēn bəšēn yāḏ bəyāḏ reḡel bərāḡel: s