Deuteronomy (Devarim) Chapter 24

‎1 ‏כִּֽי־יִקַּ֥ח אִ֛ישׁ אִשָּׁ֖ה וּבְעָלָ֑הּ וְהָיָ֞ה אִם־לֹ֧א תִמְצָא־חֵ֣ן בְּעֵינָ֗יו כִּי־מָ֤צָא בָהּ֙ עֶרְוַ֣ת דָּבָ֔ר וְכָ֨תַב לָ֜הּ סֵ֤פֶר כְּרִיתֻת֙ וְנָתַ֣ן בְּיָדָ֔הּ וְשִׁלְּחָ֖הּ מִבֵּיתֽוֹ׃

‎2 ‏וְיָצְאָ֖ה מִבֵּית֑וֹ וְהָלְכָ֖ה וְהָיְתָ֥ה לְאִישׁ־אַחֵֽר׃

‎3 ‏וּשְׂנֵאָהּ֮ הָאִ֣ישׁ הָאַחֲרוֹן֒ וְכָ֨תַב לָ֜הּ סֵ֤פֶר כְּרִיתֻת֙ וְנָתַ֣ן בְּיָדָ֔הּ וְשִׁלְּחָ֖הּ מִבֵּית֑וֹ א֣וֹ כִ֤י יָמוּת֙ הָאִ֣ישׁ הָאַחֲר֔וֹן אֲשֶׁר־לְקָחָ֥הּ ל֖וֹ לְאִשָּֽׁה׃

‎4 ‏לֹא־יוּכַ֣ל בַּעְלָ֣הּ הָרִאשׁ֣וֹן אֲשֶֽׁר־שִׁ֠לְּחָהּ לָשׁ֨וּב לְקַחְתָּ֜הּ לִהְי֧וֹת ל֣וֹ לְאִשָּׁ֗ה אַחֲרֵי֙ אֲשֶׁ֣ר הֻטַּמָּ֔אָה כִּֽי־תוֹעֵבָ֥ה הִ֖וא לִפְנֵ֣י יְהוָ֑ה וְלֹ֤א תַחֲטִיא֙ אֶת־הָאָ֔רֶץ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָֽה׃ ס

‎5 ‏כִּֽי־יִקַּ֥ח אִישׁ֙ אִשָּׁ֣ה חֲדָשָׁ֔ה לֹ֤א יֵצֵא֙ בַּצָּבָ֔א וְלֹא־יַעֲבֹ֥ר עָלָ֖יו לְכָל־דָּבָ֑ר נָקִ֞י יִהְיֶ֤ה לְבֵיתוֹ֙ שָׁנָ֣ה אֶחָ֔ת וְשִׂמַּ֖ח אֶת־אִשְׁתּ֥וֹ אֲשֶׁר־לָקָֽח׃ ס

‎6 ‏לֹא־יַחֲבֹ֥ל רֵחַ֖יִם וָרָ֑כֶב כִּי־נֶ֖פֶשׁ ה֥וּא חֹבֵֽל׃ ס

‎7 ‏כִּי־יִמָּצֵ֣א אִ֗ישׁ גֹּנֵ֨ב נֶ֤פֶשׁ מֵאֶחָיו֙ מִבְּנֵ֣י יִשְׂרָאֵ֔ל וְהִתְעַמֶּר־בּ֖וֹ וּמְכָר֑וֹ וּמֵת֙ הַגַּנָּ֣ב הַה֔וּא וּבִֽעַרְתָּ֥ הָרָ֖ע מִקִּרְבֶּֽךָ׃

‎8 ‏הִשָּׁ֧מֶר בְּנֶֽגַע־הַצָּרַ֛עַת לִשְׁמֹ֥ר מְאֹ֖ד וְלַעֲשׂ֑וֹת כְּכֹל֩ אֲשֶׁר־יוֹר֨וּ אֶתְכֶ֜ם הַכֹּהֲנִ֧ים הַלְוִיִּ֛ם כַּאֲשֶׁ֥ר צִוִּיתִ֖ם תִּשְׁמְר֥וּ לַעֲשֽׂוֹת׃ ס

‎9 ‏זָכ֕וֹר אֵ֧ת אֲשֶׁר־עָשָׂ֛ה יְהוָ֥ה אֱלֹהֶ֖יךָ לְמִרְיָ֑ם בַּדֶּ֖רֶךְ בְּצֵאתְכֶ֥ם מִמִּצְרָֽיִם׃ ס

‎10 ‏כִּֽי־תַשֶּׁ֥ה בְרֵֽעֲךָ¹ מַשַּׁ֣את מְא֑וּמָה לֹא־תָבֹ֥א אֶל־בֵּית֖וֹ לַעֲבֹ֥ט עֲבֹטֽוֹ׃

‎11 ‏בַּח֖וּץ תַּעֲמֹ֑ד וְהָאִ֗ישׁ אֲשֶׁ֤ר אַתָּה֙ נֹשֶׁ֣ה ב֔וֹ יוֹצִ֥יא אֵלֶ֛יךָ אֶֽת־הַעֲב֖וֹט הַחֽוּצָה׃

‎12 ‏וְאִם־אִ֥ישׁ עָנִ֖י ה֑וּא לֹ֥א תִשְׁכַּ֖ב בַּעֲבֹטֽוֹ׃

‎13 ‏הָשֵׁב֩ תָּשִׁ֨יב ל֤וֹ אֶֽת־הַעֲבוֹט֙ כְּבֹ֣א הַשֶּׁ֔מֶשׁ וְשָׁכַ֥ב בְּשַׂלְמָת֖וֹ וּבֵֽרֲכֶ֑ךָּ וּלְךָ֙ תִּהְיֶ֣ה צְדָקָ֔ה לִפְנֵ֖י יְהוָ֥ה אֱלֹהֶֽיךָ׃ ס

‎14 ‏לֹא־תַעֲשֹׁ֥ק שָׂכִ֖יר עָנִ֣י וְאֶבְי֑וֹן מֵאַחֶ֕יךָ א֧וֹ מִגֵּרְךָ֛ אֲשֶׁ֥ר בְּאַרְצְךָ֖ בִּשְׁעָרֶֽיךָ׃

‎15 ‏בְּיוֹמוֹ֩ תִתֵּ֨ן שְׂכָר֜וֹ וְֽלֹא־תָב֧וֹא עָלָ֣יו הַשֶּׁ֗מֶשׁ כִּ֤י עָנִי֙ ה֔וּא וְאֵלָ֕יו ה֥וּא נֹשֵׂ֖א אֶת־נַפְשׁ֑וֹ וְלֹֽא־יִקְרָ֤א עָלֶ֙יךָ֙ אֶל־יְהוָ֔ה וְהָיָ֥ה בְךָ֖ חֵֽטְא׃ ס

‎16 ‏לֹֽא־יוּמְת֤וּ אָבוֹת֙ עַל־בָּנִ֔ים וּבָנִ֖ים לֹא־יוּמְת֣וּ עַל־אָב֑וֹת אִ֥ישׁ בְּחֶטְא֖וֹ יוּמָֽתוּ׃ ס

‎17 ‏לֹ֣א תַטֶּ֔ה מִשְׁפַּ֖ט גֵּ֣ר יָת֑וֹם וְלֹ֣א תַחֲבֹ֔ל בֶּ֖גֶד אַלְמָנָֽה׃

‎18 ‏וְזָכַרְתָּ֗ כִּ֣י עֶ֤בֶד הָיִ֙יתָ֙ בְּמִצְרַ֔יִם וַֽיִּפְדְּךָ֛ יְהוָ֥ה אֱלֹהֶ֖יךָ מִשָּׁ֑ם עַל־כֵּ֞ן אָנֹכִ֤י מְצַוְּךָ֙ לַעֲשׂ֔וֹת אֶת־הַדָּבָ֖ר הַזֶּֽה׃ ס

‎19 ‏כִּ֣י תִקְצֹר֩ קְצִֽירְךָ֨ בְשָׂדֶ֜ךָ וְשָֽׁכַחְתָּ֧ עֹ֣מֶר בַּשָּׂדֶ֗ה לֹ֤א תָשׁוּב֙ לְקַחְתּ֔וֹ לַגֵּ֛ר לַיָּת֥וֹם וְלָאַלְמָנָ֖ה יִהְיֶ֑ה לְמַ֤עַן יְבָרֶכְךָ֙ יְהוָ֣ה אֱלֹהֶ֔יךָ בְּכֹ֖ל מַעֲשֵׂ֥ה יָדֶֽיךָ׃

‎20 ‏כִּ֤י תַחְבֹּט֙ זֵֽיתְךָ֔ לֹ֥א תְפָאֵ֖ר אַחֲרֶ֑יךָ לַגֵּ֛ר לַיָּת֥וֹם וְלָאַלְמָנָ֖ה יִהְיֶֽה׃ ס

‎21 ‏כִּ֤י תִבְצֹר֙ כַּרְמְךָ֔ לֹ֥א תְעוֹלֵ֖ל אַחֲרֶ֑יךָ לַגֵּ֛ר לַיָּת֥וֹם וְלָאַלְמָנָ֖ה יִהְיֶֽה׃

‎22 ‏וְזָ֣כַרְתָּ֔ כִּי־עֶ֥בֶד הָיִ֖יתָ בְּאֶ֣רֶץ מִצְרָ֑יִם עַל־כֵּ֞ן אָנֹכִ֤י מְצַוְּךָ֙ לַעֲשׂ֔וֹת אֶת־הַדָּבָ֖ר הַזֶּֽה׃ ס

1 kî-yiqq^aḥ ’îš ’iššâ ûḇə‘ālāh wəhāyâ ’im-lō’ ṯiməṣā’-ḥēn bə‘ênāyw kî-māṣā’ ḇāh ‘erəwaṯ dāḇār wəḵāṯaḇ lāh sēfer kərîṯuṯ wənāṯan bəyāḏāh wəšilləḥāh mibêṯwō:

2 wəyāṣə’â mibêṯwō wəhāləḵâ wəhāyəṯâ lə’îš-’^aḥēr:

3 ûśənē’āh hā’îš hā’^aḥărwōn wəḵāṯaḇ lāh sēfer kərîṯuṯ wənāṯan bəyāḏāh wəšilləḥāh mibêṯwō ’wō ḵî yāmûṯ hā’îš hā’^aḥărwōn ’ăšer-ləqāḥāh lwō lə’iššâ:

4 lō’-yûḵal b^a‘əlāh hāri’šwōn ’ăšer-šilləḥāh lāšûḇ ləq^aḥətāh lihəywōṯ lwō lə’iššâ ’^aḥărê ’ăšer huṭṭammā’â kî-ṯwō‘ēḇâ hiw’ lifənê yəhwâ wəlō’ ṯ^aḥăṭî’ ’eṯ-hā’āreṣ ’ăšer yəhwâ ’ĕlōheyḵā nōṯēn ləḵā n^aḥălâ: s

5 kî-yiqq^aḥ ’îš ’iššâ ḥăḏāšâ lō’ yēṣē’ baṣṣāḇā’ wəlō’-y^a‘ăḇōr ‘ālāyw ləḵāl-dāḇār nāqî yihəyeh ləḇêṯwō šānâ ’eḥāṯ wəśimm^aḥ ’eṯ-’išətwō ’ăšer-lāqāḥ: s

6 lō’-y^aḥăḇōl rēḥayim wārāḵeḇ kî-nefeš hû’ ḥōḇēl: s

7 kî-yimmāṣē’ ’îš gōnēḇ nefeš mē’eḥāyw mibənê yiśərā’ēl wəhiṯə‘ammer-bwō ûməḵārwō ûmēṯ hagannāḇ hahû’ ûḇi‘arətā hārā‘ miqqirəbeḵā:

8 hiššāmer bəneḡ^a‘-haṣṣār^a‘aṯ lišəmōr mə’ōḏ wəl^a‘ăśwōṯ kəḵōl ’ăšer-ywōrû ’eṯəḵem hakōhănîm haləwîyim ka’ăšer ṣiûîṯim tišəmərû l^a‘ăśwōṯ: s

9 zāḵwōr ’ēṯ ’ăšer-‘āśâ yəhwâ ’ĕlōheyḵā ləmirəyām badereḵə bəṣē’ṯəḵem mimmiṣərāyim: s

10 kî-ṯaššeh ḇərē‘ăḵā¹ mašša’ṯ mə’ûmâ lō’-ṯāḇō’ ’el-bêṯwō l^a‘ăḇōṭ ‘ăḇōṭwō:

11 b^aḥûṣ t^a‘ămōḏ wəhā’îš ’ăšer ’atâ nōšeh ḇwō ywōṣî’ ’ēleyḵā ’eṯ-h^a‘ăḇwōṭ h^aḥûṣâ:

12 wə’im-’îš ‘ānî hû’ lō’ ṯišəkaḇ b^a‘ăḇōṭwō:

13 hāšēḇ tāšîḇ lwō ’eṯ-h^a‘ăḇwōṭ kəḇō’ haššemeš wəšāḵaḇ bəśaləmāṯwō ûḇērăḵeḵḵā ûləḵā tihəyeh ṣəḏāqâ lifənê yəhwâ ’ĕlōheyḵā: s

14 lō’-ṯ^a‘ăšōq śāḵîr ‘ānî wə’eḇəywōn mē’^aḥeyḵā ’wō migērəḵā ’ăšer bə’arəṣəḵā bišə‘āreyḵā:

15 bəywōmwō ṯitēn śəḵārwō wəlō’-ṯāḇwō’ ‘ālāyw haššemeš kî ‘ānî hû’ wə’ēlāyw hû’ nōśē’ ’eṯ-nafəšwō wəlō’-yiqərā’ ‘āleyḵā ’el-yəhwâ wəhāyâ ḇəḵā ḥēṭə’: s

16 lō’-yûməṯû ’āḇwōṯ ‘al-bānîm ûḇānîm lō’-yûməṯû ‘al-’āḇwōṯ ’îš bəḥeṭə’wō yûmāṯû: s

17 lō’ ṯaṭṭeh mišəpaṭ gēr yāṯwōm wəlō’ ṯ^aḥăḇōl beḡeḏ ’aləmānâ:

18 wəzāḵarətā kî ‘eḇeḏ hāyîṯā bəmiṣərayim wayyifədəḵā yəhwâ ’ĕlōheyḵā miššām ‘al-kēn ’ānōḵî məṣaûəḵā l^a‘ăśwōṯ ’eṯ-hadāḇār hazzeh: s

19 kî ṯiqəṣōr qəṣîrəḵā ḇəśāḏeḵā wəšāḵ^aḥətā ‘ōmer baśśāḏeh lō’ ṯāšûḇ ləq^aḥətwō lagēr layyāṯwōm wəlā’aləmānâ yihəyeh ləm^a‘an yəḇāreḵəḵā yəhwâ ’ĕlōheyḵā bəḵōl m^a‘ăśēh yāḏeyḵā:

20 kî ṯ^aḥəbōṭ zêṯəḵā lō’ ṯəfā’ēr ’^aḥăreyḵā lagēr layyāṯwōm wəlā’aləmānâ yihəyeh: s

21 kî ṯiḇəṣōr karəməḵā lō’ ṯə‘wōlēl ’^aḥăreyḵā lagēr layyāṯwōm wəlā’aləmānâ yihəyeh:

22 wəzāḵarətā kî-‘eḇeḏ hāyîṯā bə’ereṣ miṣərāyim ‘al-kēn ’ānōḵî məṣaûəḵā l^a‘ăśwōṯ ’eṯ-hadāḇār hazzeh: s