Deuteronomy (Devarim) Chapter 32

‎1 ‏הַאֲזִ֥ינוּ הַשָּׁמַ֖יִם וַאֲדַבֵּ֑רָה וְתִשְׁמַ֥ע הָאָ֖רֶץ אִמְרֵי־פִֽי׃

‎2 ‏יַעֲרֹ֤ף כַּמָּטָר֙ לִקְחִ֔י תִּזַּ֥ל כַּטַּ֖ל אִמְרָתִ֑י כִּשְׂעִירִ֣ם עֲלֵי־דֶ֔שֶׁא וְכִרְבִיבִ֖ים עֲלֵי־עֵֽשֶׂב׃

‎3 ‏כִּ֛י שֵׁ֥ם יְהוָ֖ה אֶקְרָ֑א הָב֥וּ גֹ֖דֶל לֵאלֹהֵֽינוּ׃

‎4 ‏הַצּוּר֙ תָּמִ֣ים פָּעֳל֔וֹ כִּ֥י כָל־דְּרָכָ֖יו מִשְׁפָּ֑ט אֵ֤ל אֱמוּנָה֙ וְאֵ֣ין עָ֔וֶל צַדִּ֥יק וְיָשָׁ֖ר הֽוּא׃

‎5 ‏שִׁחֵ֥ת ל֛וֹ לֹ֖א בָּנָ֣יו מוּמָ֑ם דּ֥וֹר עִקֵּ֖שׁ וּפְתַלְתֹּֽל׃

‎6 ‏הֲ־לַיְהוָה֙ תִּגְמְלוּ־זֹ֔את עַ֥ם נָבָ֖ל וְלֹ֣א חָכָ֑ם הֲלוֹא־הוּא֙ אָבִ֣יךָ קָּנֶ֔ךָ ה֥וּא עָֽשְׂךָ֖ וַֽיְכֹנְנֶֽךָ׃

‎7 ‏זְכֹר֙ יְמ֣וֹת עוֹלָ֔ם בִּ֖ינוּ שְׁנ֣וֹת דּוֹר־וָד֑וֹר שְׁאַ֤ל אָבִ֙יךָ֙ וְיַגֵּ֔דְךָ זְקֵנֶ֖יךָ וְיֹ֥אמְרוּ לָֽךְ׃

‎8 ‏בְּהַנְחֵ֤ל עֶלְיוֹן֙ גּוֹיִ֔ם בְּהַפְרִיד֖וֹ בְּנֵ֣י אָדָ֑ם יַצֵּב֙ גְּבֻלֹ֣ת עַמִּ֔ים לְמִסְפַּ֖ר בְּנֵ֥י יִשְׂרָאֵֽל׃

‎9 ‏כִּ֛י חֵ֥לֶק יְהוָֹ֖ה עַמּ֑וֹ יַעֲקֹ֖ב חֶ֥בֶל נַחֲלָתֽוֹ׃

‎10 ‏יִמְצָאֵ֙הוּ֙ בְּאֶ֣רֶץ מִדְבָּ֔ר וּבְתֹ֖הוּ יְלֵ֣ל יְשִׁמֹ֑ן יְסֹֽבְבֶ֙נְהוּ֙ יְב֣וֹנְנֵ֔הוּ יִצְּרֶ֖נְהוּ כְּאִישׁ֥וֹן עֵינֽוֹ׃

‎11 ‏כְּנֶ֙שֶׁר֙ יָעִ֣יר קִנּ֔וֹ עַל־גּוֹזָלָ֖יו יְרַחֵ֑ף יִפְרֹ֤שׂ כְּנָפָיו֙ יִקָּחֵ֔הוּ יִשָּׂאֵ֖הוּ עַל־אֶבְרָתֽוֹ׃

‎12 ‏יְהוָ֖ה בָּדָ֣ד יַנְחֶ֑נּוּ וְאֵ֥ין עִמּ֖וֹ אֵ֥ל נֵכָֽר׃

‎13 ‏יַרְכִּבֵ֙הוּ֙ עַל־במותי בָּ֣מֳתֵי⁹ אָ֔רֶץ וַיֹּאכַ֖ל תְּנוּבֹ֣ת שָׂדָ֑י וַיֵּנִקֵ֤הֽוּ דְבַשׁ֙ מִסֶּ֔לַע וְשֶׁ֖מֶן מֵחַלְמִ֥ישׁ צֽוּר׃

‎14 ‏חֶמְאַ֨ת בָּקָ֜ר וַחֲלֵ֣ב צֹ֗אן עִם־חֵ֨לֶב כָּרִ֜ים וְאֵילִ֤ים בְּנֵֽי־בָשָׁן֙ וְעַתּוּדִ֔ים עִם־חֵ֖לֶב כִּלְי֣וֹת חִטָּ֑ה וְדַם־עֵנָ֖ב תִּשְׁתֶּה־חָֽמֶר׃

‎15 ‏וַיִּשְׁמַ֤ן יְשֻׁרוּן֙ וַיִּבְעָ֔ט שָׁמַ֖נְתָּ עָבִ֣יתָ כָּשִׂ֑יתָ וַיִּטֹּשׁ֙ אֱל֣וֹהַ עָשָׂ֔הוּ וַיְנַבֵּ֖ל צ֥וּר יְשֻׁעָתֽוֹ׃

‎16 ‏יַקְנִאֻ֖הוּ בְּזָרִ֑ים בְּתוֹעֵבֹ֖ת יַכְעִיסֻֽהוּ׃

‎17 ‏יִזְבְּח֗וּ לַשֵּׁדִים֙ לֹ֣א אֱלֹ֔הַ אֱלֹהִ֖ים לֹ֣א יְדָע֑וּם חֲדָשִׁים֙ מִקָּרֹ֣ב בָּ֔אוּ לֹ֥א שְׂעָר֖וּם אֲבֹתֵיכֶֽם׃

‎18 ‏צ֥וּר יְלָדְךָ֖ תֶּ֑שִׁי וַתִּשְׁכַּ֖ח אֵ֥ל מְחֹלְלֶֽךָ׃

‎19 ‏וַיַּ֥רְא יְהוָ֖ה וַיִּנְאָ֑ץ מִכַּ֥עַס בָּנָ֖יו וּבְנֹתָֽיו׃

‎20 ‏וַיֹּ֗אמֶר אַסְתִּ֤ירָה פָנַי֙ מֵהֶ֔ם אֶרְאֶ֖ה מָ֣ה אַחֲרִיתָ֑ם כִּ֣י ד֤וֹר תַּהְפֻּכֹת֙ הֵ֔מָּה בָּנִ֖ים לֹא־אֵמֻ֥ן בָּֽם׃

‎21 ‏הֵ֚ם קִנְא֣וּנִי בְלֹא־אֵ֔ל כִּעֲס֖וּנִי בְּהַבְלֵיהֶ֑ם וַאֲנִי֙ אַקְנִיאֵ֣ם בְּלֹא־עָ֔ם בְּג֥וֹי נָבָ֖ל אַכְעִיסֵֽם׃

‎22 ‏כִּי־אֵשׁ֙ קָדְחָ֣ה בְאַפִּ֔י וַתִּיקַ֖ד עַד־שְׁא֣וֹל תַּחְתִּ֑ית וַתֹּ֤אכַל אֶ֙רֶץ֙ וִֽיבֻלָ֔הּ וַתְּלַהֵ֖ט מוֹסְדֵ֥י הָרִֽים׃

‎23 ‏אַסְפֶּ֥ה עָלֵ֖ימוֹ רָע֑וֹת חִצַּ֖י אֲכַלֶּה־בָּֽם׃

‎24 ‏מְזֵ֥י רָעָ֛ב וּלְחֻ֥מֵי רֶ֖שֶׁף וְקֶ֣טֶב מְרִירִ֑י וְשֶׁן־בְּהֵמוֹת֙ אֲשַׁלַּח־בָּ֔ם עִם־חֲמַ֖ת זֹחֲלֵ֥י עָפָֽר׃

‎25 ‏מִחוּץ֙ תְּשַׁכֶּל־חֶ֔רֶב וּמֵחֲדָרִ֖ים אֵימָ֑ה גַּם־בָּחוּר֙ גַּם־בְּתוּלָ֔ה יוֹנֵ֖ק עִם־אִ֥ישׁ שֵׂיבָֽה׃

‎26 ‏אָמַ֖רְתִּי אַפְאֵיהֶ֑ם אַשְׁבִּ֥יתָה מֵאֱנ֖וֹשׁ זִכְרָֽם׃

‎27 ‏לוּלֵ֗י כַּ֤עַס אוֹיֵב֙ אָג֔וּר פֶּֽן־יְנַכְּר֖וּ צָרֵ֑ימוֹ פֶּן־יֹֽאמְרוּ֙ יָדֵ֣ינוּ רָ֔מָה וְלֹ֥א יְהוָ֖ה פָּעַ֥ל כָּל־זֹֽאת׃

‎28 ‏כִּי־ג֛וֹי אֹבַ֥ד עֵצ֖וֹת הֵ֑מָּה וְאֵ֥ין בָּהֶ֖ם תְּבוּנָֽה׃

‎29 ‏ל֥וּ חָכְמ֖וּ יַשְׂכִּ֣ילוּ זֹ֑את יָבִ֖ינוּ לְאַחֲרִיתָֽם׃

‎30 ‏אֵיכָ֞ה יִרְדֹּ֤ף אֶחָד֙ אֶ֔לֶף וּשְׁנַ֖יִם יָנִ֣יסוּ רְבָבָ֑ה אִם־לֹא֙ כִּי־צוּרָ֣ם מְכָרָ֔ם וַֽיהוָ֖ה הִסְגִּירָֽם׃

‎31 ‏כִּ֛י לֹ֥א כְצוּרֵ֖נוּ צוּרָ֑ם וְאֹיְבֵ֖ינוּ פְּלִילִֽים׃

‎32 ‏כִּֽי־מִגֶּ֤פֶן סְדֹם֙ גַּפְנָ֔ם וּמִשַּׁדְמֹ֖ת עֲמֹרָ֑ה עֲנָבֵ֙מוֹ֙ עִנְּבֵי־ר֔וֹשׁ אַשְׁכְּלֹ֥ת מְרֹרֹ֖ת לָֽמוֹ׃

‎33 ‏חֲמַ֥ת תַּנִּינִ֖ם יֵינָ֑ם וְרֹ֥אשׁ פְּתָנִ֖ים אַכְזָֽר׃

‎34 ‏הֲלֹא־ה֖וּא כָּמֻ֣ס עִמָּדִ֑י חָתֻ֖ם בְּאוֹצְרֹתָֽי׃

‎35 ‏לִ֤י נָקָם֙ וְשִׁלֵּ֔ם לְעֵ֖ת תָּמ֣וּט רַגְלָ֑ם כִּ֤י קָרוֹב֙ י֣וֹם אֵידָ֔ם וְחָ֖שׁ עֲתִדֹ֥ת לָֽמוֹ׃

‎36 ‏כִּֽי־יָדִ֤ין יְהוָה֙ עַמּ֔וֹ וְעַל־עֲבָדָ֖יו יִתְנֶחָ֑ם כִּ֤י יִרְאֶה֙ כִּי־אָ֣זְלַת יָ֔ד וְאֶ֖פֶס עָצ֥וּר וְעָזֽוּב׃

‎37 ‏וְאָמַ֖ר אֵ֣י אֱלֹהֵ֑ימוֹ צ֖וּר חָסָ֥יוּ בֽוֹ׃

‎38 ‏אֲשֶׁ֨ר חֵ֤לֶב זְבָחֵ֙ימוֹ֙ יֹאכֵ֔לוּ יִשְׁתּ֖וּ יֵ֣ין נְסִיכָ֑ם יָק֙וּמוּ֙ וְיַעְזְרֻכֶ֔ם יְהִ֥י עֲלֵיכֶ֖ם סִתְרָֽה׃

‎39 ‏רְא֣וּ׀ עַתָּ֗ה כִּ֣י אֲנִ֤י³ אֲנִי֙ ה֔וּא וְאֵ֥ין אֱלֹהִ֖ים עִמָּדִ֑י אֲנִ֧י אָמִ֣ית וַאֲחַיֶּ֗ה מָחַ֙צְתִּי֙ וַאֲנִ֣י אֶרְפָּ֔א וְאֵ֥ין מִיָּדִ֖י מַצִּֽיל׃

‎40 ‏כִּֽי־אֶשָּׂ֥א אֶל־שָׁמַ֖יִם יָדִ֑י וְאָמַ֕רְתִּי חַ֥י אָנֹכִ֖י לְעֹלָֽם׃

‎41 ‏אִם־שַׁנּוֹתִי֙ בְּרַ֣ק חַרְבִּ֔י וְתֹאחֵ֥ז בְּמִשְׁפָּ֖ט יָדִ֑י אָשִׁ֤יב נָקָם֙ לְצָרָ֔י וְלִמְשַׂנְאַ֖י אֲשַׁלֵּֽם׃

‎42 ‏אַשְׁכִּ֤יר חִצַּי֙ מִדָּ֔ם וְחַרְבִּ֖י תֹּאכַ֣ל בָּשָׂ֑ר מִדַּ֤ם חָלָל֙ וְשִׁבְיָ֔ה מֵרֹ֖אשׁ פַּרְע֥וֹת אוֹיֵֽב׃

‎43 ‏הַרְנִ֤ינוּ גוֹיִם֙ עַמּ֔וֹ כִּ֥י דַם־עֲבָדָ֖יו יִקּ֑וֹם וְנָקָם֙ יָשִׁ֣יב לְצָרָ֔יו וְכִפֶּ֥ר אַדְמָת֖וֹ עַמּֽוֹ׃ פ

‎44 ‏וַיָּבֹ֣א מֹשֶׁ֗ה וַיְדַבֵּ֛ר אֶת־כָּל־דִּבְרֵ֥י הַשִּׁירָֽה־הַזֹּ֖את בְּאָזְנֵ֣י הָעָ֑ם ה֖וּא וְהוֹשֵׁ֥עַ בִּן־נֽוּן׃

‎45 ‏וַיְכַ֣ל מֹשֶׁ֗ה לְדַבֵּ֛ר אֶת־כָּל־הַדְּבָרִ֥ים הָאֵ֖לֶּה אֶל־כָּל־יִשְׂרָאֵֽל׃

‎46 ‏וַיֹּ֤אמֶר אֲלֵהֶם֙ שִׂ֣ימוּ לְבַבְכֶ֔ם לְכָל־הַדְּבָרִ֔ים אֲשֶׁ֧ר אָנֹכִ֛י מֵעִ֥יד בָּכֶ֖ם הַיּ֑וֹם אֲשֶׁ֤ר תְּצַוֻּם֙ אֶת־בְּנֵיכֶ֔ם לִשְׁמֹ֣ר לַעֲשׂ֔וֹת אֶת־כָּל־דִּבְרֵ֖י הַתּוֹרָ֥ה הַזֹּֽאת׃

‎47 ‏כִּ֠י לֹֽא־דָבָ֨ר רֵ֥ק הוּא֙ מִכֶּ֔ם כִּי־ה֖וּא חַיֵּיכֶ֑ם וּבַדָּבָ֣ר הַזֶּ֗ה תַּאֲרִ֤יכוּ יָמִים֙ עַל־הָ֣אֲדָמָ֔ה אֲשֶׁ֨ר אַתֶּ֜ם עֹבְרִ֧ים אֶת־הַיַּרְדֵּ֛ן שָׁ֖מָּה לְרִשְׁתָּֽהּ׃ פ

‎48 ‏וַיְדַבֵּ֤ר יְהוָה֙ אֶל־מֹשֶׁ֔ה בְּעֶ֛צֶם הַיּ֥וֹם הַזֶּ֖ה לֵאמֹֽר׃

‎49 ‏עֲלֵ֡ה אֶל־הַר֩ הָעֲבָרִ֨ים הַזֶּ֜ה הַר־נְב֗וֹ אֲשֶׁר֙ בְּאֶ֣רֶץ מוֹאָ֔ב אֲשֶׁ֖ר עַל־פְּנֵ֣י יְרֵח֑וֹ וּרְאֵה֙ אֶת־אֶ֣רֶץ כְּנַ֔עַן אֲשֶׁ֨ר אֲנִ֥י נֹתֵ֛ן לִבְנֵ֥י יִשְׂרָאֵ֖ל לַאֲחֻזָּֽה׃

‎50 ‏וּמֻ֗ת בָּהָר֙ אֲשֶׁ֤ר אַתָּה֙ עֹלֶ֣ה שָׁ֔מָּה וְהֵאָסֵ֖ף אֶל־עַמֶּ֑יךָ כַּֽאֲשֶׁר־מֵ֞ת אַהֲרֹ֤ן אָחִ֙יךָ֙ בְּהֹ֣ר הָהָ֔ר וַיֵּאָ֖סֶף אֶל־עַמָּֽיו׃

‎51 ‏עַל֩ אֲשֶׁ֨ר מְעַלְתֶּ֜ם בִּ֗י בְּתוֹךְ֙ בְּנֵ֣י יִשְׂרָאֵ֔ל בְּמֵֽי־מְרִיבַ֥ת קָדֵ֖שׁ מִדְבַּר־צִ֑ן עַ֣ל אֲשֶׁ֤ר לֹֽא־קִדַּשְׁתֶּם֙ אוֹתִ֔י בְּת֖וֹךְ בְּנֵ֥י יִשְׂרָאֵֽל׃

‎52 ‏כִּ֥י מִנֶּ֖גֶד תִּרְאֶ֣ה אֶת־הָאָ֑רֶץ וְשָׁ֙מָּה֙ לֹ֣א תָב֔וֹא אֶל־הָאָ֕רֶץ אֲשֶׁר־אֲנִ֥י נֹתֵ֖ן לִבְנֵ֥י יִשְׂרָאֵֽל׃ פ

1 ha’ăzînû haššāmayim wa’ăḏabērâ wəṯišəm^a‘ hā’āreṣ ’imərê-fî:

2 y^a‘ărōf kammāṭār liqəḥî tizzal kaṭṭal ’imərāṯî kiśə‘îrim ‘ălê-ḏeše’ wəḵirəḇîḇîm ‘ălê-‘ēśeḇ:

3 kî šēm yəhwâ ’eqərā’ hāḇû ḡōḏel lē’lōhênû:

4 haṣṣûr tāmîm pā‘ŏlwō kî ḵāl-dərāḵāyw mišəpāṭ ’ēl ’ĕmûnâ wə’ên ‘āwel ṣadîq wəyāšār hû’:

5 šiḥēṯ lwō lō’ bānāyw mûmām dwōr ‘iqqēš ûfəṯalətōl:

6 hă-layəhwâ tiḡəməlû-zō’ṯ ‘am nāḇāl wəlō’ ḥāḵām hălwō’-hû’ ’āḇîḵā qqāneḵā hû’ ‘āśəḵā wayəḵōnəneḵā:

7 zəḵōr yəmwōṯ ‘wōlām bînû šənwōṯ dwōr-wāḏwōr šə’al ’āḇîḵā wəyagēḏəḵā zəqēneyḵā wəyō’mərû lāḵə:

8 bəhanəḥēl ‘eləywōn gwōyim bəhafərîḏwō bənê ’āḏām yaṣṣēḇ gəḇulōṯ ‘ammîm ləmisəpar bənê yiśərā’ēl:

9 kî ḥēleq yəhwōâ ‘ammwō y^a‘ăqōḇ ḥeḇel n^aḥălāṯwō:

10 yiməṣā’ēhû bə’ereṣ miḏəbār ûḇəṯōhû yəlēl yəšimōn yəsōḇəḇenəhû yəḇwōnənēhû yiṣṣərenəhû kə’îšwōn ‘ênwō:

11 kənešer yā‘îr qinnwō ‘al-gwōzālāyw yər^aḥēf yifərōś kənāfāyw yiqqāḥēhû yiśśā’ēhû ‘al-’eḇərāṯwō:

12 yəhwâ bāḏāḏ yanəḥennû wə’ên ‘immwō ’ēl nēḵār:

13 yarəkiḇēhû ‘al-bāmwōṯê bāmŏṯê⁹ ’āreṣ wayyō’ḵal tənûḇōṯ śāḏāy wayyēniqēhû ḏəḇaš missel^a‘ wəšemen mēḥaləmîš ṣûr:

14 ḥemə’aṯ bāqār w^aḥălēḇ ṣō’n ‘im-ḥēleḇ kārîm wə’êlîm bənê-ḇāšān wə‘atûḏîm ‘im-ḥēleḇ kiləywōṯ ḥiṭṭâ wəḏam-‘ēnāḇ tišəteh-ḥāmer:

15 wayyišəman yəšurûn wayyiḇə‘āṭ šāmanətā ‘āḇîṯā kāśîṯā wayyiṭṭōš ’ĕlwōha ‘āśâû wayənabēl ṣûr yəšu‘āṯwō:

16 yaqəni’uhû bəzārîm bəṯwō‘ēḇōṯ yaḵə‘îsuhû:

17 yizəbəḥû laššēḏîm lō’ ’ĕlōha ’ĕlōhîm lō’ yəḏā‘ûm ḥăḏāšîm miqqārōḇ bā’û lō’ śə‘ārûm ’ăḇōṯêḵem:

18 ṣûr yəlāḏəḵā tešî watišək^aḥ ’ēl məḥōləleḵā:

19 wayyarə’ yəhwâ wayyinə’āṣ mik^a‘as bānāyw ûḇənōṯāyw:

20 wayyō’mer ’asətîrâ fānay mēhem ’erə’eh mâ ’^aḥărîṯām kî ḏwōr tahəpuḵōṯ hēmmâ bānîm lō’-’ēmun bām:

21 hēm qinə’ûnî ḇəlō’-’ēl ki‘ăsûnî bəhaḇəlêhem wa’ănî ’aqənî’ēm bəlō’-‘ām bəḡwōy nāḇāl ’aḵə‘îsēm:

22 kî-’ēš qāḏəḥâ ḇə’apî watîqaḏ ‘aḏ-šə’wōl t^aḥətîṯ watō’ḵal ’ereṣ wîḇulāh watəlahēṭ mwōsəḏê hārîm:

23 ’asəpeh ‘ālêmwō rā‘wōṯ ḥiṣṣay ’ăḵalleh-bām:

24 məzê rā‘āḇ ûləḥumê rešef wəqeṭeḇ mərîrî wəšen-bəhēmwōṯ ’ăšall^aḥ-bām ‘im-ḥămaṯ zōḥălê ‘āfār:

25 miḥûṣ təšakel-ḥereḇ ûmēḥăḏārîm ’êmâ gam-bāḥûr gam-bəṯûlâ ywōnēq ‘im-’îš śêḇâ:

26 ’āmarətî ’afə’êhem ’ašəbîṯâ mē’ĕnwōš ziḵərām:

27 lûlê k^a‘as ’wōyēḇ ’āḡûr pen-yənakərû ṣārêmwō pen-yō’mərû yāḏênû rāmâ wəlō’ yəhwâ pā‘al kāl-zō’ṯ:

28 kî-ḡwōy ’ōḇaḏ ‘ēṣwōṯ hēmmâ wə’ên bâem təḇûnâ:

29 lû ḥāḵəmû yaśəkîlû zō’ṯ yāḇînû lə’^aḥărîṯām:

30 ’êḵâ yirədōf ’eḥāḏ ’elef ûšənayim yānîsû rəḇāḇâ ’im-lō’ kî-ṣûrām məḵārām wayhwâ hisəgîrām:

31 kî lō’ ḵəṣûrēnû ṣûrām wə’ōyəḇênû pəlîlîm:

32 kî-migefen səḏōm gafənām ûmiššaḏəmōṯ ‘ămōrâ ‘ănāḇēmwō ‘innəḇê-rwōš ’ašəkəlōṯ mərōrōṯ lāmwō:

33 ḥămaṯ tannînim yênām wərō’š pəṯānîm ’aḵəzār:

34 hălō’-hû’ kāmus ‘immāḏî ḥāṯum bə’wōṣərōṯāy:

35 lî nāqām wəšillēm lə‘ēṯ tāmûṭ raḡəlām kî qārwōḇ ywōm ’êḏām wəḥāš ‘ăṯiḏōṯ lāmwō:

36 kî-yāḏîn yəhwâ ‘ammwō wə‘al-‘ăḇāḏāyw yiṯəneḥām kî yirə’eh kî-’āzəlaṯ yāḏ wə’efes ‘āṣûr wə‘āzûḇ:

37 wə’āmar ’ê ’ĕlōhêmwō ṣûr ḥāsāyû ḇwō:

38 ’ăšer ḥēleḇ zəḇāḥêmwō yō’ḵēlû yišətû yên nəsîḵām yāqûmû wəy^a‘əzəruḵem yəhî ‘ălêḵem siṯərâ:

39 rə’û| ‘atâ kî ’ănî³ ’ănî hû’ wə’ên ’ĕlōhîm ‘immāḏî ’ănî ’āmîṯ wa’ăḥayyeh māḥaṣətî wa’ănî ’erəpā’ wə’ên mîyāḏî maṣṣîl:

40 kî-’eśśā’ ’el-šāmayim yāḏî wə’āmarətî ḥay ’ānōḵî lə‘ōlām:

41 ’im-šannwōṯî bəraq ḥarəbî wəṯō’ḥēz bəmišəpāṭ yāḏî ’āšîḇ nāqām ləṣārāy wəliməśanə’ay ’ăšallēm:

42 ’ašəkîr ḥiṣṣay midām wəḥarəbî tō’ḵal bāśār midam ḥālāl wəšiḇəyâ mērō’š parə‘wōṯ ’wōyēḇ:

43 harənînû ḡwōyim ‘ammwō kî ḏam-‘ăḇāḏāyw yiqqwōm wənāqām yāšîḇ ləṣārāyw wəḵiper ’aḏəmāṯwō ‘ammwō: f

44 wayyāḇō’ mōšeh wayəḏabēr ’eṯ-kāl-diḇərê haššîrâ-hazzō’ṯ bə’āzənê hā‘ām hû’ wəhwōšē‘a bin-nûn:

45 wayəḵal mōšeh ləḏabēr ’eṯ-kāl-hadəḇārîm hā’ēlleh ’el-kāl-yiśərā’ēl:

46 wayyō’mer ’ălēhem śîmû ləḇaḇəḵem ləḵāl-hadəḇārîm ’ăšer ’ānōḵî mē‘îḏ bāḵem hayywōm ’ăšer təṣaûum ’eṯ-bənêḵem lišəmōr l^a‘ăśwōṯ ’eṯ-kāl-diḇərê hatwōrâ hazzō’ṯ:

47 kî lō’-ḏāḇār rēq hû’ mikem kî-hû’ ḥayyêḵem ûḇadāḇār hazzeh ta’ărîḵû yāmîm ‘al-hā’ăḏāmâ ’ăšer ’atem ‘ōḇərîm ’eṯ-hayyarədēn šāmmâ lərišətāh: f

48 wayəḏabēr yəhwâ ’el-mōšeh bə‘eṣem hayywōm hazzeh lē’mōr:

49 ‘ălēh ’el-har hā‘ăḇārîm hazzeh har-nəḇwō ’ăšer bə’ereṣ mwō’āḇ ’ăšer ‘al-pənê yərēḥwō ûrə’ēh ’eṯ-’ereṣ kən^a‘an ’ăšer ’ănî nōṯēn liḇənê yiśərā’ēl la’ăḥuzzâ:

50 ûmuṯ bâār ’ăšer ’atâ ‘ōleh šāmmâ wəhē’āsēf ’el-‘ammeyḵā ka’ăšer-mēṯ ’ahărōn ’āḥîḵā bəhōr hâār wayyē’āsef ’el-‘ammāyw:

51 ‘al ’ăšer mə‘alətem bî bəṯwōḵə bənê yiśərā’ēl bəmê-mərîḇaṯ qāḏēš miḏəbar-ṣin ‘al ’ăšer lō’-qidašətem ’wōṯî bəṯwōḵə bənê yiśərā’ēl:

52 kî minneḡeḏ tirə’eh ’eṯ-hā’āreṣ wəšāmmâ lō’ ṯāḇwō’ ’el-hā’āreṣ ’ăšer-’ănî nōṯēn liḇənê yiśərā’ēl: f