Deuteronomy (Devarim) Chapter 34

‎1 ‏וַיַּ֨עַל מֹשֶׁ֜ה מֵֽעַרְבֹ֤ת מוֹאָב֙ אֶל־הַ֣ר נְב֔וֹ רֹ֚אשׁ הַפִּסְגָּ֔ה אֲשֶׁ֖ר עַל־פְּנֵ֣י יְרֵח֑וֹ וַיַּרְאֵ֨הוּ יְהוָ֧ה אֶת־כָּל־הָאָ֛רֶץ אֶת־הַגִּלְעָ֖ד עַד־דָּֽן׃

‎2 ‏וְאֵת֙ כָּל־נַפְתָּלִ֔י וְאֶת־אֶ֥רֶץ אֶפְרַ֖יִם וּמְנַשֶּׁ֑ה וְאֵת֙ כָּל־אֶ֣רֶץ יְהוּדָ֔ה עַ֖ד הַיָּ֥ם הָאַחֲרֽוֹן׃

‎3 ‏וְאֶת־הַנֶּ֗גֶב וְֽאֶת־הַכִּכָּ֞ר בִּקְעַ֧ת יְרֵח֛וֹ עִ֥יר הַתְּמָרִ֖ים עַד־צֹֽעַר׃

‎4 ‏וַיֹּ֨אמֶר יְהוָ֜ה אֵלָ֗יו זֹ֤את הָאָ֙רֶץ֙ אֲשֶׁ֣ר נִ֠שְׁבַּעְתִּי לְאַבְרָהָ֨ם לְיִצְחָ֤ק וּֽלְיַעֲקֹב֙ לֵאמֹ֔ר לְזַרְעֲךָ֖ אֶתְּנֶ֑נָּה הֶרְאִיתִ֣יךָ בְעֵינֶ֔יךָ וְשָׁ֖מָּה לֹ֥א תַעֲבֹֽר׃

‎5 ‏וַיָּ֨מָת שָׁ֜ם מֹשֶׁ֧ה עֶֽבֶד־יְהוָ֛ה בְּאֶ֥רֶץ מוֹאָ֖ב עַל־פִּ֥י יְהוָֽה׃

‎6 ‏וַיִּקְבֹּ֨ר אֹת֤וֹ בַגַּיְ֙ בְּאֶ֣רֶץ מוֹאָ֔ב מ֖וּל בֵּ֣ית פְּע֑וֹר וְלֹֽא־יָדַ֥ע אִישׁ֙ אֶת־קְבֻ֣רָת֔וֹ עַ֖ד הַיּ֥וֹם הַזֶּֽה׃

‎7 ‏וּמֹשֶׁ֗ה בֶּן־מֵאָ֧ה וְעֶשְׂרִ֛ים שָׁנָ֖ה בְּמֹת֑וֹ לֹֽא־כָהֲתָ֥ה עֵינ֖וֹ וְלֹא־נָ֥ס לֵחֹֽה׃

‎8 ‏וַיִּבְכּוּ֩ בְנֵ֨י יִשְׂרָאֵ֧ל אֶת־מֹשֶׁ֛ה בְּעַֽרְבֹ֥ת מוֹאָ֖ב שְׁלֹשִׁ֣ים י֑וֹם וַֽיִּתְּמ֔וּ יְמֵ֥י בְכִ֖י אֵ֥בֶל מֹשֶֽׁה׃

‎9 ‏וִֽיהוֹשֻׁ֣עַ בִּן־נ֗וּן מָלֵא֙ ר֣וּחַ חָכְמָ֔ה כִּֽי־סָמַ֥ךְ מֹשֶׁ֛ה אֶת־יָדָ֖יו עָלָ֑יו וַיִּשְׁמְע֨וּ אֵלָ֤יו בְּנֵֽי־יִשְׂרָאֵל֙ וַֽיַּעֲשׂ֔וּ כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃

‎10 ‏וְלֹֽא־קָ֨ם נָבִ֥יא ע֛וֹד בְּיִשְׂרָאֵ֖ל כְּמֹשֶׁ֑ה אֲשֶׁר֙ יְדָע֣וֹ יְהוָ֔ה פָּנִ֖ים אֶל־פָּנִֽים׃

‎11 ‏לְכָל־הָ֨אֹת֜וֹת וְהַמּוֹפְתִ֗ים אֲשֶׁ֤ר שְׁלָחוֹ֙ יְהוָ֔ה לַעֲשׂ֖וֹת בְּאֶ֣רֶץ מִצְרָ֑יִם לְפַרְעֹ֥ה וּלְכָל־עֲבָדָ֖יו וּלְכָל־אַרְצֽוֹ׃

‎12 ‏וּלְכֹל֙ הַיָּ֣ד הַחֲזָקָ֔ה וּלְכֹ֖ל הַמּוֹרָ֣א הַגָּד֑וֹל אֲשֶׁר֙ עָשָׂ֣ה מֹשֶׁ֔ה לְעֵינֵ֖י כָּל־יִשְׂרָאֵֽל׃

1 wayy^a‘al mōšeh mē‘arəḇōṯ mwō’āḇ ’el-har nəḇwō rō’š hapisəgâ ’ăšer ‘al-pənê yərēḥwō wayyarə’ēhû yəhwâ ’eṯ-kāl-hā’āreṣ ’eṯ-hagilə‘āḏ ‘aḏ-dān:

2 wə’ēṯ kāl-nafətālî wə’eṯ-’ereṣ ’efərayim ûmənaššeh wə’ēṯ kāl-’ereṣ yəhûḏâ ‘aḏ hayyām hā’^aḥărwōn:

3 wə’eṯ-hanneḡeḇ wə’eṯ-hakikār biqə‘aṯ yərēḥwō ‘îr hatəmārîm ‘aḏ-ṣō‘ar:

4 wayyō’mer yəhwâ ’ēlāyw zō’ṯ hā’āreṣ ’ăšer nišəb^a‘ətî lə’aḇərâām ləyiṣəḥāq ûləy^a‘ăqōḇ lē’mōr ləzarə‘ăḵā ’etənennâ herə’îṯîḵā ḇə‘êneyḵā wəšāmmâ lō’ ṯ^a‘ăḇōr:

5 wayyāmāṯ šām mōšeh ‘eḇeḏ-yəhwâ bə’ereṣ mwō’āḇ ‘al-pî yəhwâ:

6 wayyiqəbōr ’ōṯwō ḇagayə bə’ereṣ mwō’āḇ mûl bêṯ pə‘wōr wəlō’-yāḏ^a‘ ’îš ’eṯ-qəḇurāṯwō ‘aḏ hayywōm hazzeh:

7 ûmōšeh ben-mē’â wə‘eśərîm šānâ bəmōṯwō lō’-ḵâăṯâ ‘ênwō wəlō’-nās lēḥōh:

8 wayyiḇəkû ḇənê yiśərā’ēl ’eṯ-mōšeh bə‘arəḇōṯ mwō’āḇ šəlōšîm ywōm wayyitəmû yəmê ḇəḵî ’ēḇel mōšeh:

9 wîhwōšu‘a bin-nûn mālē’ rûḥa ḥāḵəmâ kî-sāmaḵə mōšeh ’eṯ-yāḏāyw ‘ālāyw wayyišəmə‘û ’ēlāyw bənê-yiśərā’ēl wayy^a‘ăśû ka’ăšer ṣiûâ yəhwâ ’eṯ-mōšeh:

10 wəlō’-qām nāḇî’ ‘wōḏ bəyiśərā’ēl kəmōšeh ’ăšer yəḏā‘wō yəhwâ pānîm ’el-pānîm:

11 ləḵāl-hā’ōṯwōṯ wəhammwōfəṯîm ’ăšer šəlāḥwō yəhwâ l^a‘ăśwōṯ bə’ereṣ miṣərāyim ləfarə‘ōh ûləḵāl-‘ăḇāḏāyw ûləḵāl-’arəṣwō:

12 ûləḵōl hayyāḏ h^aḥăzāqâ ûləḵōl hammwōrā’ hagāḏwōl ’ăšer ‘āśâ mōšeh lə‘ênê kāl-yiśərā’ēl: