Ecclesiastes (Qohelet) Chapter 12

‎1 ‏וּזְכֹר֙ אֶת־בּ֣וֹרְאֶ֔יךָ בִּימֵ֖י בְּחוּרֹתֶ֑יךָ עַ֣ד אֲשֶׁ֤ר לֹא־יָבֹ֙אוּ֙ יְמֵ֣י הָֽרָעָ֔ה וְהִגִּ֣יעוּ שָׁנִ֔ים אֲשֶׁ֣ר תֹּאמַ֔ר אֵֽין־לִ֥י בָהֶ֖ם חֵֽפֶץ׃

‎2 ‏עַ֠ד אֲשֶׁ֨ר לֹֽא־תֶחְשַׁ֤ךְ הַשֶּׁ֙מֶשׁ֙ וְהָא֔וֹר וְהַיָּרֵ֖חַ וְהַכּוֹכָבִ֑ים וְשָׁ֥בוּ הֶעָבִ֖ים אַחַ֥ר הַגָּֽשֶׁם׃

‎3 ‏בַּיּ֗וֹם שֶׁיָּזֻ֙עוּ֙ שֹׁמְרֵ֣י הַבַּ֔יִת וְהִֽתְעַוְּת֖וּ אַנְשֵׁ֣י הֶחָ֑יִל וּבָטְל֤וּ הַטֹּֽחֲנוֹת֙ כִּ֣י מִעֵ֔טוּ וְחָשְׁכ֥וּ הָרֹא֖וֹת בָּאֲרֻבּֽוֹת׃

‎4 ‏וְסֻגְּר֤וּ דְלָתַ֙יִם֙ בַּשּׁ֔וּק בִּשְׁפַ֖ל ק֣וֹל הַֽטַּחֲנָ֑ה וְיָקוּם֙ לְק֣וֹל הַצִּפּ֔וֹר וְיִשַּׁ֖חוּ כָּל־בְּנ֥וֹת הַשִּֽׁיר׃

‎5 ‏גַּ֣ם מִגָּבֹ֤הַּ יִרָ֙אוּ֙ וְחַתְחַתִּ֣ים בַּדֶּ֔רֶךְ וְיָנֵ֤אץ הַשָּׁקֵד֙ וְיִסְתַּבֵּ֣ל הֶֽחָגָ֔ב וְתָפֵ֖ר הָֽאֲבִיּוֹנָ֑ה כִּֽי־הֹלֵ֤ךְ הָאָדָם֙ אֶל־בֵּ֣ית עוֹלָמ֔וֹ וְסָבְב֥וּ בַשּׁ֖וּק הַסֹּפְדִֽים׃

‎6 ‏עַ֣ד אֲשֶׁ֤ר לֹֽא־ירחק יֵרָתֵק֙ חֶ֣בֶל הַכֶּ֔סֶף וְתָרֻ֖ץ גֻּלַּ֣ת הַזָּהָ֑ב וְתִשָּׁ֤בֶר כַּד֙ עַל־הַמַּבּ֔וּעַ וְנָרֹ֥ץ הַגַּלְגַּ֖ל אֶל־הַבּֽוֹר׃

‎7 ‏וְיָשֹׁ֧ב הֶעָפָ֛ר עַל־הָאָ֖רֶץ כְּשֶׁהָיָ֑ה וְהָר֣וּחַ תָּשׁ֔וּב אֶל־הָאֱלֹהִ֖ים אֲשֶׁ֥ר נְתָנָֽהּ׃

‎8 ‏הֲבֵ֧ל הֲבָלִ֛ים אָמַ֥ר הַקּוֹהֶ֖לֶת הַכֹּ֥ל הָֽבֶל׃

‎9 ‏וְיֹתֵ֕ר שֶׁהָיָ֥ה קֹהֶ֖לֶת חָכָ֑ם ע֗וֹד לִמַּד־דַּ֙עַת֙ אֶת־הָעָ֔ם וְאִזֵּ֣ן וְחִקֵּ֔ר תִּקֵּ֖ן מְשָׁלִ֥ים הַרְבֵּֽה׃

‎10 ‏בִּקֵּ֣שׁ קֹהֶ֔לֶת לִמְצֹ֖א דִּבְרֵי־חֵ֑פֶץ וְכָת֥וּב יֹ֖שֶׁר דִּבְרֵ֥י אֱמֶֽת׃

‎11 ‏דִּבְרֵ֤י חֲכָמִים֙ כַּדָּ֣רְבֹנ֔וֹת וּֽכְמַשְׂמְר֥וֹת נְטוּעִ֖ים בַּעֲלֵ֣י אֲסֻפּ֑וֹת נִתְּנ֖וּ מֵרֹעֶ֥ה אֶחָֽד׃

‎12 ‏וְיֹתֵ֥ר מֵהֵ֖מָּה בְּנִ֣י הִזָּהֵ֑ר עֲשׂ֨וֹת סְפָרִ֤ים הַרְבֵּה֙ אֵ֣ין קֵ֔ץ וְלַ֥הַג הַרְבֵּ֖ה יְגִעַ֥ת בָּשָֽׂר׃

‎13 ‏ס֥וֹף דָּבָ֖ר הַכֹּ֣ל נִשְׁמָ֑ע אֶת־הָאֱלֹהִ֤ים יְרָא֙ וְאֶת־מִצְוֹתָ֣יו שְׁמ֔וֹר כִּי־זֶ֖ה כָּל־הָאָדָֽם׃

‎14 ‏כִּ֤י אֶת־כָּל־מַֽעֲשֶׂ֔ה הָאֱלֹהִ֛ים יָבִ֥א בְמִשְׁפָּ֖ט עַ֣ל כָּל־נֶעְלָ֑ם אִם־ט֖וֹב וְאִם־רָֽע׃

1 ûzəḵōr ’eṯ-bwōrə’eyḵā bîmê bəḥûrōṯeyḵā ‘aḏ ’ăšer lō’-yāḇō’û yəmê hārā‘â wəhigî‘û šānîm ’ăšer tō’mar ’ên-lî ḇâem ḥēfeṣ:

2 ‘aḏ ’ăšer lō’-ṯeḥəšaḵə haššemeš wəhā’wōr wəhayyārēḥa wəhakwōḵāḇîm wəšāḇû he‘āḇîm ’^aḥar hagāšem:

3 bayywōm šeyyāzu‘û šōmərê habayiṯ wəhiṯə‘aûəṯû ’anəšê heḥāyil ûḇāṭəlû haṭṭōḥănwōṯ kî mi‘ēṭû wəḥāšəḵû hārō’wōṯ bā’ărubwōṯ:

4 wəsugərû ḏəlāṯayim baššûq bišəfal qwōl haṭṭ^aḥănâ wəyāqûm ləqwōl haṣṣipwōr wəyišš^aḥû kāl-bənwōṯ haššîr:

5 gam migāḇōhha yirā’û wəḥaṯəḥatîm badereḵə wəyānē’ṣ haššāqēḏ wəyisətabēl heḥāḡāḇ wəṯāfēr hā’ăḇîywōnâ kî-hōlēḵə hā’āḏām ’el-bêṯ ‘wōlāmwō wəsāḇəḇû ḇaššûq hassōfəḏîm:

6 ‘aḏ ’ăšer lō’-yirəḥaq yērāṯēq ḥeḇel hakesef wəṯāruṣ gullaṯ hazzâāḇ wəṯiššāḇer kaḏ ‘al-hammabû‘a wənārōṣ hagaləgal ’el-habwōr:

7 wəyāšōḇ he‘āfār ‘al-hā’āreṣ kəšehāyâ wəhārûḥa tāšûḇ ’el-hā’ĕlōhîm ’ăšer nəṯānāh:

8 hăḇēl hăḇālîm ’āmar haqqwōheleṯ hakōl hāḇel:

9 wəyōṯēr šehāyâ qōheleṯ ḥāḵām ‘wōḏ limmaḏ-d^a‘aṯ ’eṯ-hā‘ām wə’izzēn wəḥiqqēr tiqqēn məšālîm harəbēh:

10 biqqēš qōheleṯ liməṣō’ diḇərê-ḥēfeṣ wəḵāṯûḇ yōšer diḇərê ’ĕmeṯ:

11 diḇərê ḥăḵāmîm kadārəḇōnwōṯ ûḵəmaśəmərwōṯ nəṭû‘îm b^a‘ălê ’ăsupwōṯ nitənû mērō‘eh ’eḥāḏ:

12 wəyōṯēr mēhēmmâ bənî hizzâēr ‘ăśwōṯ səfārîm harəbēh ’ên qēṣ wəlahaḡ harəbēh yəḡi‘aṯ bāśār:

13 swōf dāḇār hakōl nišəmā‘ ’eṯ-hā’ĕlōhîm yərā’ wə’eṯ-miṣəwōṯāyw šəmwōr kî-zeh kāl-hā’āḏām:

14 kî ’eṯ-kāl-m^a‘ăśeh hā’ĕlōhîm yāḇi’ ḇəmišəpāṭ ‘al kāl-ne‘əlām ’im-ṭwōḇ wə’im-rā‘: