Exodus (Shemot) Chapter 2

‎1 ‏וַיֵּ֥לֶךְ אִ֖ישׁ מִבֵּ֣ית לֵוִ֑י וַיִּקַּ֖ח אֶת־בַּת־לֵוִֽי׃

‎2 ‏וַתַּ֥הַר הָאִשָּׁ֖ה וַתֵּ֣לֶד בֵּ֑ן וַתֵּ֤רֶא אֹתוֹ֙ כִּי־ט֣וֹב ה֔וּא וַֽתִּצְפְּנֵ֖הוּ שְׁלֹשָׁ֥ה יְרָחִֽים׃

‎3 ‏וְלֹא־יָכְלָ֣ה עוֹד֮ הַצְּפִינוֹ֒ וַתִּֽקַּֽח־לוֹ֙ תֵּ֣בַת גֹּ֔מֶא וַתַּחְמְרָ֥ה בַחֵמָ֖ר וּבַזָּ֑פֶת וַתָּ֤שֶׂם בָּהּ֙ אֶת־הַיֶּ֔לֶד וַתָּ֥שֶׂם בַּסּ֖וּף עַל־שְׂפַ֥ת הַיְאֹֽר׃

‎4 ‏וַתֵּתַצַּ֥ב אֲחֹת֖וֹ מֵרָחֹ֑ק לְדֵעָ֕ה מַה־יֵּעָשֶׂ֖ה לֽוֹ׃

‎5 ‏וַתֵּ֤רֶד בַּת־פַּרְעֹה֙ לִרְחֹ֣ץ עַל־הַיְאֹ֔ר וְנַעֲרֹתֶ֥יהָ הֹלְכֹ֖ת עַל־יַ֣ד הַיְאֹ֑ר וַתֵּ֤רֶא אֶת־הַתֵּבָה֙ בְּת֣וֹךְ הַסּ֔וּף וַתִּשְׁלַ֥ח אֶת־אֲמָתָ֖הּ וַתִּקָּחֶֽהָ²

‎6 ‏וַתִּפְתַּח֙ וַתִּרְאֵ֣הוּ אֶת־הַיֶּ֔לֶד וְהִנֵּה־נַ֖עַר בֹּכֶ֑ה וַתַּחְמֹ֣ל עָלָ֔יו וַתֹּ֕אמֶר מִיַּלְדֵ֥י הָֽעִבְרִ֖ים זֶֽה׃

‎7 ‏וַתֹּ֣אמֶר אֲחֹתוֹ֮ אֶל־בַּת־פַּרְעֹה֒ הַאֵלֵ֗ךְ וְקָרָ֤אתִי לָךְ֙ אִשָּׁ֣ה מֵינֶ֔קֶת מִ֖ן הָעִבְרִיֹּ֑ת וְתֵינִ֥ק לָ֖ךְ אֶת־הַיָּֽלֶד׃

‎8 ‏וַתֹּֽאמֶר־לָ֥הּ בַּת־פַּרְעֹ֖ה לֵ֑כִי וַתֵּ֙לֶךְ֙ הָֽעַלְמָ֔ה וַתִּקְרָ֖א אֶת־אֵ֥ם הַיָּֽלֶד׃

‎9 ‏וַתֹּ֧אמֶר לָ֣הּ בַּת־פַּרְעֹ֗ה הֵילִ֜יכִי אֶת־הַיֶּ֤לֶד הַזֶּה֙ וְהֵינִקִ֣הוּ לִ֔י וַאֲנִ֖י אֶתֵּ֣ן אֶת־שְׂכָרֵ֑ךְ וַתִּקַּ֧ח הָאִשָּׁ֛ה הַיֶּ֖לֶד וַתְּנִיקֵֽהוּ׃

‎10 ‏וַיִגְדַּ֣ל¹ הַיֶּ֗לֶד וַתְּבִאֵ֙הוּ֙ לְבַת־פַּרְעֹ֔ה וַֽיְהִי־לָ֖הּ לְבֵ֑ן וַתִּקְרָ֤א שְׁמוֹ֙ מֹשֶׁ֔ה וַתֹּ֕אמֶר כִּ֥י מִן־הַמַּ֖יִם מְשִׁיתִֽהוּ׃

‎11 ‏וַיְהִ֣י׀ בַּיָּמִ֣ים הָהֵ֗ם וַיִּגְדַּ֤ל מֹשֶׁה֙ וַיֵּצֵ֣א אֶל־אֶחָ֔יו וַיַּ֖רְא בְּסִבְלֹתָ֑ם וַיַּרְא֙ אִ֣ישׁ מִצְרִ֔י מַכֶּ֥ה אִישׁ־עִבְרִ֖י מֵאֶחָֽיו׃

‎12 ‏וַיִּ֤פֶן כֹּה֙ וָכֹ֔ה וַיַּ֖רְא כִּ֣י אֵ֣ין אִ֑ישׁ וַיַּךְ֙ אֶת־הַמִּצְרִ֔י וַֽיִּטְמְנֵ֖הוּ בַּחֽוֹל׃

‎13 ‏וַיֵּצֵא֙ בַּיּ֣וֹם הַשֵּׁנִ֔י וְהִנֵּ֛ה שְׁנֵֽי־אֲנָשִׁ֥ים עִבְרִ֖ים נִצִּ֑ים וַיֹּ֙אמֶר֙ לָֽרָשָׁ֔ע לָ֥מָּה תַכֶּ֖ה רֵעֶֽךָ׃

‎14 ‏וַ֠יֹּאמֶר מִ֣י שָֽׂמְךָ֞ לְאִ֨ישׁ שַׂ֤ר וְשֹׁפֵט֙ עָלֵ֔ינוּ הַלְהָרְגֵ֙נִי֙ אַתָּ֣ה אֹמֵ֔ר כַּאֲשֶׁ֥ר הָרַ֖גְתָּ אֶת־הַמִּצְרִ֑י וַיִּירָ֤א מֹשֶׁה֙ וַיֹּאמַ֔ר אָכֵ֖ן נוֹדַ֥ע הַדָּבָֽר׃

‎15 ‏וַיִּשְׁמַ֤ע פַּרְעֹה֙ אֶת־הַדָּבָ֣ר הַזֶּ֔ה וַיְבַקֵּ֖שׁ לַהֲרֹ֣ג אֶת־מֹשֶׁ֑ה וַיִּבְרַ֤ח מֹשֶׁה֙ מִפְּנֵ֣י פַרְעֹ֔ה וַיֵּ֥שֶׁב בְּאֶֽרֶץ־מִדְיָ֖ן וַיֵּ֥שֶׁב עַֽל־הַבְּאֵֽר׃

‎16 ‏וּלְכֹהֵ֥ן מִדְיָ֖ן שֶׁ֣בַע בָּנ֑וֹת וַתָּבֹ֣אנָה וַתִּדְלֶ֗נָה וַתְּמַלֶּ֙אנָה֙ אֶת־הָ֣רְהָטִ֔ים לְהַשְׁק֖וֹת צֹ֥אן אֲבִיהֶֽן׃

‎17 ‏וַיָּבֹ֥אוּ הָרֹעִ֖ים וַיְגָרְשׁ֑וּם וַיָּ֤קָם מֹשֶׁה֙ וַיּ֣וֹשִׁעָ֔ן וַיַּ֖שְׁקְ אֶת־צֹאנָֽם׃

‎18 ‏וַתָּבֹ֕אנָה אֶל־רְעוּאֵ֖ל אֲבִיהֶ֑ן וַיֹּ֕אמֶר מַדּ֛וּעַ מִהַרְתֶּ֥ן בֹּ֖א הַיּֽוֹם׃

‎19 ‏וַתֹּאמַ֕רְןָ אִ֣ישׁ מִצְרִ֔י הִצִּילָ֖נוּ מִיַּ֣ד הָרֹעִ֑ים³ וְגַם־דָּלֹ֤ה דָלָה֙ לָ֔נוּ וַיַּ֖שְׁקְ אֶת־הַצֹּֽאן׃

‎20 ‏וַיֹּ֥אמֶר אֶל־בְּנֹתָ֖יו וְאַיּ֑וֹ לָ֤מָּה זֶּה֙ עֲזַבְתֶּ֣ן אֶת־הָאִ֔ישׁ קִרְאֶ֥ן ל֖וֹ וְיֹ֥אכַל לָֽחֶם׃

‎21 ‏וַיּ֥וֹאֶל מֹשֶׁ֖ה לָשֶׁ֣בֶת אֶת־הָאִ֑ישׁ וַיִּתֵּ֛ן אֶת־צִפֹּרָ֥ה בִתּ֖וֹ לְמֹשֶֽׁה׃

‎22 ‏וַתֵּ֣לֶד בֵּ֔ן וַיִּקְרָ֥א אֶת־שְׁמ֖וֹ גֵּרְשֹׁ֑ם כִּ֣י אָמַ֔ר גֵּ֣ר הָיִ֔יתִי בְּאֶ֖רֶץ נָכְרִיָּֽה׃ פ

‎23 ‏וַיְהִי֩ בַיָּמִ֨ים הָֽרַבִּ֜ים הָהֵ֗ם וַיָּ֙מָת֙ מֶ֣לֶךְ מִצְרַ֔יִם וַיֵּאָנְח֧וּ בְנֵֽי־יִשְׂרָאֵ֛ל מִן־הָעֲבֹדָ֖ה וַיִּזְעָ֑קוּ וַתַּ֧עַל שַׁוְעָתָ֛ם אֶל־הָאֱלֹהִ֖ים מִן־הָעֲבֹדָֽה׃

‎24 ‏וַיִּשְׁמַ֥ע אֱלֹהִ֖ים אֶת־נַאֲקָתָ֑ם וַיִּזְכֹּ֤ר אֱלֹהִים֙ אֶת־בְּרִית֔וֹ אֶת־אַבְרָהָ֖ם אֶת־יִצְחָ֥ק וְאֶֽת־יַעֲקֹֽב׃

‎25 ‏וַיַּ֥רְא אֱלֹהִ֖ים אֶת־בְּנֵ֣י יִשְׂרָאֵ֑ל וַיֵּ֖דַע אֱלֹהִֽים׃ ס

1 wayyēleḵə ’îš mibêṯ lēwî wayyiqq^aḥ ’eṯ-baṯ-lēwî:

2 watahar hā’iššâ watēleḏ bēn watēre’ ’ōṯwō kî-ṭwōḇ hû’ watiṣəpənēhû šəlōšâ yərāḥîm:

3 wəlō’-yāḵəlâ ‘wōḏ haṣṣəfînwō watiqq^aḥ-lwō tēḇaṯ gōme’ wat^aḥəmərâ ḇ^aḥēmār ûḇazzāfeṯ watāśem bāh ’eṯ-hayyeleḏ watāśem bassûf ‘al-śəfaṯ hayə’ōr:

4 watēṯaṣṣaḇ ’ăḥōṯwō mērāḥōq ləḏē‘â mah-yyē‘āśeh lwō:

5 watēreḏ baṯ-parə‘ōh lirəḥōṣ ‘al-hayə’ōr wən^a‘ărōṯeyhā hōləḵōṯ ‘al-yaḏ hayə’ōr watēre’ ’eṯ-hatēḇâ bəṯwōḵə hassûf watišəl^aḥ ’eṯ-’ămāṯāh watiqqāḥehā²

6 watifət^aḥ watirə’ēhû ’eṯ-hayyeleḏ wəhinnēh-n^a‘ar bōḵeh wat^aḥəmōl ‘ālāyw watō’mer mîyaləḏê hā‘iḇərîm zeh:

7 watō’mer ’ăḥōṯwō ’el-baṯ-parə‘ōh ha’ēlēḵə wəqārā’ṯî lāḵə ’iššâ mêneqeṯ min hā‘iḇərîyōṯ wəṯêniq lāḵə ’eṯ-hayyāleḏ:

8 watō’mer-lāh baṯ-parə‘ōh lēḵî watēleḵə hā‘aləmâ watiqərā’ ’eṯ-’ēm hayyāleḏ:

9 watō’mer lāh baṯ-parə‘ōh hêlîḵî ’eṯ-hayyeleḏ hazzeh wəhêniqihû lî wa’ănî ’etēn ’eṯ-śəḵārēḵə watiqq^aḥ hā’iššâ hayyeleḏ watənîqēhû:

10 wayiḡədal¹ hayyeleḏ watəḇi’ēhû ləḇaṯ-parə‘ōh wayəhî-lāh ləḇēn watiqərā’ šəmwō mōšeh watō’mer kî min-hammayim məšîṯihû:

11 wayəhî| bayyāmîm hâēm wayyiḡədal mōšeh wayyēṣē’ ’el-’eḥāyw wayyarə’ bəsiḇəlōṯām wayyarə’ ’îš miṣərî makeh ’îš-‘iḇərî mē’eḥāyw:

12 wayyifen kōh wāḵōh wayyarə’ kî ’ên ’îš wayyaḵə ’eṯ-hammiṣərî wayyiṭəmənēhû b^aḥwōl:

13 wayyēṣē’ bayywōm haššēnî wəhinnēh šənê-’ănāšîm ‘iḇərîm niṣṣîm wayyō’mer lārāšā‘ lāmmâ ṯakeh rē‘eḵā:

14 wayyō’mer mî śāməḵā lə’îš śar wəšōfēṭ ‘ālênû haləhārəḡēnî ’atâ ’ōmēr ka’ăšer hāraḡətā ’eṯ-hammiṣərî wayyîrā’ mōšeh wayyō’mar ’āḵēn nwōḏ^a‘ hadāḇār:

15 wayyišəm^a‘ parə‘ōh ’eṯ-hadāḇār hazzeh wayəḇaqqēš lahărōḡ ’eṯ-mōšeh wayyiḇər^aḥ mōšeh mipənê farə‘ōh wayyēšeḇ bə’ereṣ-miḏəyān wayyēšeḇ ‘al-habə’ēr:

16 ûləḵōhēn miḏəyān šeḇ^a‘ bānwōṯ watāḇō’nâ watiḏəlenâ watəmalle’nâ ’eṯ-hārəhāṭîm ləhašəqwōṯ ṣō’n ’ăḇîhen:

17 wayyāḇō’û hārō‘îm wayəḡārəšûm wayyāqām mōšeh wayywōši‘ān wayyašəqə ’eṯ-ṣō’nām:

18 watāḇō’nâ ’el-rə‘û’ēl ’ăḇîhen wayyō’mer madû‘a miharəten bō’ hayywōm:

19 watō’marənā ’îš miṣərî hiṣṣîlānû mîyaḏ hārō‘îm³ wəḡam-dālōh ḏālâ lānû wayyašəqə ’eṯ-haṣṣō’n:

20 wayyō’mer ’el-bənōṯāyw wə’ayywō lāmmâ zzeh ‘ăzaḇəten ’eṯ-hā’îš qirə’en lwō wəyō’ḵal lāḥem:

21 wayywō’el mōšeh lāšeḇeṯ ’eṯ-hā’îš wayyitēn ’eṯ-ṣipōrâ ḇitwō ləmōšeh:

22 watēleḏ bēn wayyiqərā’ ’eṯ-šəmwō gērəšōm kî ’āmar gēr hāyîṯî bə’ereṣ nāḵərîyâ: f

23 wayəhî ḇayyāmîm hārabîm hâēm wayyāmāṯ meleḵə miṣərayim wayyē’ānəḥû ḇənê-yiśərā’ēl min-hā‘ăḇōḏâ wayyizə‘āqû wat^a‘al šawə‘āṯām ’el-hā’ĕlōhîm min-hā‘ăḇōḏâ:

24 wayyišəm^a‘ ’ĕlōhîm ’eṯ-na’ăqāṯām wayyizəkōr ’ĕlōhîm ’eṯ-bərîṯwō ’eṯ-’aḇərâām ’eṯ-yiṣəḥāq wə’eṯ-y^a‘ăqōḇ:

25 wayyarə’ ’ĕlōhîm ’eṯ-bənê yiśərā’ēl wayyēḏ^a‘ ’ĕlōhîm: s