Exodus (Shemot) Chapter 10

‎1 ‏וַיֹּ֤אמֶר יְהוָה֙ אֶל־מֹשֶׁ֔ה בֹּ֖א אֶל־פַּרְעֹ֑ה כִּֽי־אֲנִ֞י הִכְבַּ֤דְתִּי אֶת־לִבּוֹ֙ וְאֶת־לֵ֣ב עֲבָדָ֔יו לְמַ֗עַן שִׁתִ֛י אֹתֹתַ֥י אֵ֖לֶּה בְּקִרְבּוֹ׃

‎2 ‏וּלְמַ֡עַן תְּסַפֵּר֩ בְּאָזְנֵ֨י בִנְךָ֜ וּבֶן־בִּנְךָ֗ אֵ֣ת אֲשֶׁ֤ר הִתְעַלַּ֙לְתִּי֙ בְּמִצְרַ֔יִם וְאֶת־אֹתֹתַ֖י אֲשֶׁר־שַׂ֣מְתִּי בָ֑ם וִֽידַעְתֶּ֖ם כִּי־אֲנִ֥י יְהוָֽה׃

‎3 ‏וַיָּבֹ֨א מֹשֶׁ֣ה וְאַהֲרֹן֮ אֶל־פַּרְעֹה֒ וַיֹּאמְר֣וּ אֵלָ֗יו כֹּֽה־אָמַ֤ר יְהוָה֙ אֱלֹהֵ֣י הָֽעִבְרִ֔ים עַד־מָתַ֣י מֵאַ֔נְתָּ לֵעָנֹ֖ת מִפָּנָ֑י שַׁלַּ֥ח עַמִּ֖י וְיַֽעַבְדֻֽנִי׃

‎4 ‏כִּ֛י אִם־מָאֵ֥ן אַתָּ֖ה לְשַׁלֵּ֣חַ אֶת־עַמִּ֑י הִנְנִ֨י מֵבִ֥יא מָחָ֛ר אַרְבֶּ֖ה בִּגְבֻלֶֽךָ׃

‎5 ‏וְכִסָּה֙ אֶת־עֵ֣ין הָאָ֔רֶץ וְלֹ֥א יוּכַ֖ל לִרְאֹ֣ת אֶת־הָאָ֑רֶץ וְאָכַ֣ל׀ אֶת־יֶ֣תֶר הַפְּלֵטָ֗ה הַנִּשְׁאֶ֤רֶת לָכֶם֙ מִן־הַבָּרָ֔ד וְאָכַל֙ אֶת־כָּל־הָעֵ֔ץ הַצֹּמֵ֥חַ לָכֶ֖ם מִן־הַשָּׂדֶֽה׃

‎6 ‏וּמָלְא֨וּ בָתֶּ֜יךָ וּבָתֵּ֣י כָל־עֲבָדֶיךָ֮ וּבָתֵּ֣י כָל־מִצְרַיִם֒ אֲשֶׁ֨ר לֹֽא־רָא֤וּ אֲבֹתֶ֙יךָ֙ וַאֲבוֹ֣ת אֲבֹתֶ֔יךָ מִיּ֗וֹם הֱיוֹתָם֙ עַל־הָ֣אֲדָמָ֔ה עַ֖ד הַיּ֣וֹם הַזֶּ֑ה וַיִּ֥פֶן וַיֵּצֵ֖א מֵעִ֥ם פַּרְעֹֽה׃

‎7 ‏וַיֹּאמְרוּ֩ עַבְדֵ֨י פַרְעֹ֜ה אֵלָ֗יו עַד־מָתַי֙ יִהְיֶ֨ה זֶ֥ה לָ֙נוּ֙ לְמוֹקֵ֔שׁ שַׁלַּח֙ אֶת־הָ֣אֲנָשִׁ֔ים וְיַֽעַבְד֖וּ אֶת־יְהוָ֣ה אֱלֹהֵיהֶ֑ם הֲטֶ֣רֶם תֵּדַ֔ע כִּ֥י אָבְדָ֖ה מִצְרָֽיִם׃

‎8 ‏וַיּוּשַׁ֞ב אֶת־מֹשֶׁ֤ה וְאֶֽת־אַהֲרֹן֙ אֶל־פַּרְעֹ֔ה וַיֹּ֣אמֶר אֲלֵהֶ֔ם לְכ֥וּ עִבְד֖וּ אֶת־יְהוָ֣ה אֱלֹהֵיכֶ֑ם מִ֥י וָמִ֖י הַהֹלְכִֽים׃

‎9 ‏וַיֹּ֣אמֶר מֹשֶׁ֔ה בִּנְעָרֵ֥ינוּ וּבִזְקֵנֵ֖ינוּ נֵלֵ֑ךְ בְּבָנֵ֨ינוּ וּבִבְנוֹתֵ֜נוּ בְּצֹאנֵ֤נוּ וּבִבְקָרֵ֙נוּ֙ נֵלֵ֔ךְ כִּ֥י חַג־יְהוָ֖ה לָֽנוּ׃

‎10 ‏וַיֹּ֣אמֶר אֲלֵהֶ֗ם יְהִ֨י כֵ֤ן יְהוָה֙ עִמָּכֶ֔ם כַּאֲשֶׁ֛ר אֲשַׁלַּ֥ח אֶתְכֶ֖ם וְאֶֽת־טַפְּכֶ֑ם רְא֕וּ כִּ֥י רָעָ֖ה נֶ֥גֶד פְּנֵיכֶֽם׃

‎11 ‏לֹ֣א כֵ֗ן לְכֽוּ־נָ֤א הַגְּבָרִים֙ וְעִבְד֣וּ אֶת־יְהוָ֔ה כִּ֥י אֹתָ֖הּ אַתֶּ֣ם מְבַקְשִׁ֑ים וַיְגָ֣רֶשׁ אֹתָ֔ם מֵאֵ֖ת פְּנֵ֥י פַרְעֹֽה׃ פ

‎12 ‏וַיֹּ֨אמֶר יְהוָ֜ה אֶל־מֹשֶׁ֗ה נְטֵ֨ה יָדְךָ֜ עַל־אֶ֤רֶץ מִצְרַ֙יִם֙ בָּֽאַרְבֶּ֔ה וְיַ֖עַל עַל־אֶ֣רֶץ מִצְרָ֑יִם וְיֹאכַל֙ אֶת־כָּל־עֵ֣שֶׂב הָאָ֔רֶץ אֵ֛ת כָּל־אֲשֶׁ֥ר הִשְׁאִ֖יר הַבָּרָֽד׃

‎13 ‏וַיֵּ֨ט מֹשֶׁ֣ה אֶת־מַטֵּהוּ֮ עַל־אֶ֣רֶץ מִצְרַיִם֒ וַֽיהוָ֗ה נִהַ֤ג ר֥וּחַ קָדִים֙ בָּאָ֔רֶץ כָּל־הַיּ֥וֹם הַה֖וּא וְכָל־הַלָּ֑יְלָה הַבֹּ֣קֶר הָיָ֔ה וְר֙וּחַ֙ הַקָּדִ֔ים נָשָׂ֖א אֶת־הָאַרְבֶּֽה׃

‎14 ‏וַיַּ֣עַל הָֽאַרְבֶּ֗ה עַ֚ל כָּל־אֶ֣רֶץ מִצְרַ֔יִם וַיָּ֕נַח בְּכֹ֖ל גְּב֣וּל מִצְרָ֑יִם כָּבֵ֣ד מְאֹ֔ד לְ֠פָנָיו לֹא־הָ֨יָה כֵ֤ן אַרְבֶּה֙ כָּמֹ֔הוּ וְאַחֲרָ֖יו לֹ֥א יִֽהְיֶה־כֵּֽן׃

‎15 ‏וַיְכַ֞ס אֶת־עֵ֣ין כָּל־הָאָרֶץ֮ וַתֶּחְשַׁ֣ךְ הָאָרֶץ֒ וַיֹּ֜אכַל אֶת־כָּל־עֵ֣שֶׂב הָאָ֗רֶץ וְאֵת֙ כָּל־פְּרִ֣י הָעֵ֔ץ אֲשֶׁ֥ר הוֹתִ֖יר הַבָּרָ֑ד וְלֹא־נוֹתַ֨ר כָּל־יֶ֧רֶק בָּעֵ֛ץ וּבְעֵ֥שֶׂב הַשָּׂדֶ֖ה בְּכָל־אֶ֥רֶץ מִצְרָֽיִם׃

‎16 ‏וַיְמַהֵ֣ר פַּרְעֹ֔ה לִקְרֹ֖א לְמֹשֶׁ֣ה וּֽלְאַהֲרֹ֑ן וַיֹּ֗אמֶר חָטָ֛אתִי לַיהוָ֥ה אֱלֹֽהֵיכֶ֖ם וְלָכֶֽם׃

‎17 ‏וְעַתָּ֗ה שָׂ֣א נָ֤א חַטָּאתִי֙ אַ֣ךְ הַפַּ֔עַם וְהַעְתִּ֖ירוּ לַיהוָ֣ה אֱלֹהֵיכֶ֑ם וְיָסֵר֙ מֵֽעָלַ֔י רַ֖ק אֶת־הַמָּ֥וֶת הַזֶּֽה׃

‎18 ‏וַיֵּצֵ֖א מֵעִ֣ם פַּרְעֹ֑ה וַיֶּעְתַּ֖ר אֶל־יְהוָֽה׃

‎19 ‏וַיַּהֲפֹ֨ךְ יְהוָ֤ה רֽוּחַ־יָם֙ חָזָ֣ק מְאֹ֔ד וַיִּשָּׂא֙ אֶת־הָ֣אַרְבֶּ֔ה וַיִּתְקָעֵ֖הוּ יָ֣מָּה סּ֑וּף לֹ֤א נִשְׁאַר֙ אַרְבֶּ֣ה אֶחָ֔ד בְּכֹ֖ל גְּב֥וּל מִצְרָֽיִם׃

‎20 ‏וַיְחַזֵּ֥ק יְהוָ֖ה אֶת־לֵ֣ב פַּרְעֹ֑ה וְלֹ֥א שִׁלַּ֖ח אֶת־בְּנֵ֥י יִשְׂרָאֵֽל׃ פ

‎21 ‏וַיֹּ֨אמֶר יְהוָ֜ה אֶל־מֹשֶׁ֗ה נְטֵ֤ה יָֽדְךָ֙ עַל־הַשָּׁמַ֔יִם וִ֥יהִי חֹ֖שֶׁךְ עַל־אֶ֣רֶץ מִצְרָ֑יִם וְיָמֵ֖שׁ חֹֽשֶׁךְ׃

‎22 ‏וַיֵּ֥ט מֹשֶׁ֛ה אֶת־יָד֖וֹ עַל־הַשָּׁמָ֑יִם וַיְהִ֧י חֹֽשֶׁךְ־אֲפֵלָ֛ה בְּכָל־אֶ֥רֶץ מִצְרַ֖יִם שְׁלֹ֥שֶׁת יָמִֽים׃

‎23 ‏לֹֽא־רָא֞וּ אִ֣ישׁ אֶת־אָחִ֗יו וְלֹא־קָ֛מוּ אִ֥ישׁ מִתַּחְתָּ֖יו שְׁלֹ֣שֶׁת יָמִ֑ים וּֽלְכָל־בְּנֵ֧י יִשְׂרָאֵ֛ל הָ֥יָה א֖וֹר בְּמוֹשְׁבֹתָֽם׃

‎24 ‏וַיִּקְרָ֨א פַרְעֹ֜ה אֶל־מֹשֶׁ֗ה וַיֹּ֙אמֶר֙ לְכוּ֙ עִבְד֣וּ אֶת־יְהוָ֔ה רַ֛ק צֹאנְכֶ֥ם וּבְקַרְכֶ֖ם יֻצָּ֑ג גַּֽם־טַפְּכֶ֖ם יֵלֵ֥ךְ עִמָּכֶֽם׃

‎25 ‏וַיֹּ֣אמֶר מֹשֶׁ֔ה גַּם־אַתָּ֛ה תִּתֵּ֥ן בְּיָדֵ֖נוּ זְבָחִ֣ים וְעֹל֑וֹת וְעָשִׂ֖ינוּ לַיהוָ֥ה אֱלֹהֵֽינוּ׃

‎26 ‏וְגַם־מִקְנֵ֜נוּ יֵלֵ֣ךְ עִמָּ֗נוּ לֹ֤א תִשָּׁאֵר֙ פַּרְסָ֔ה כִּ֚י מִמֶּ֣נּוּ נִקַּ֔ח לַעֲבֹ֖ד אֶת־יְהוָ֣ה אֱלֹהֵ֑ינוּ וַאֲנַ֣חְנוּ לֹֽא־נֵדַ֗ע מַֽה־נַּעֲבֹד֙ אֶת־יְהוָ֔ה עַד־בֹּאֵ֖נוּ שָֽׁמָּה׃

‎27 ‏וַיְחַזֵּ֥ק יְהוָ֖ה אֶת־לֵ֣ב פַּרְעֹ֑ה וְלֹ֥א אָבָ֖ה לְשַׁלְּחָֽם׃

‎28 ‏וַיֹּֽאמֶר־ל֥וֹ פַרְעֹ֖ה לֵ֣ךְ מֵעָלָ֑י הִשָּׁ֣מֶר לְךָ֗ אֶל־תֹּ֙סֶף֙ רְא֣וֹת פָּנַ֔י כִּ֗י בְּי֛וֹם רְאֹתְךָ֥ פָנַ֖י תָּמֽוּת׃

‎29 ‏וַיֹּ֥אמֶר מֹשֶׁ֖ה כֵּ֣ן דִּבַּ֑רְתָּ לֹא־אֹסִ֥ף ע֖וֹד רְא֥וֹת פָּנֶֽיךָ׃ פ

1 wayyō’mer yəhwâ ’el-mōšeh bō’ ’el-parə‘ōh kî-’ănî hiḵəbaḏətî ’eṯ-libwō wə’eṯ-lēḇ ‘ăḇāḏāyw ləm^a‘an šiṯî ’ōṯōṯay ’ēlleh bəqirəbwō:

2 ûləm^a‘an təsapēr bə’āzənê ḇinəḵā ûḇen-binəḵā ’ēṯ ’ăšer hiṯə‘allalətî bəmiṣərayim wə’eṯ-’ōṯōṯay ’ăšer-śamətî ḇām wîḏ^a‘ətem kî-’ănî yəhwâ:

3 wayyāḇō’ mōšeh wə’ahărōn ’el-parə‘ōh wayyō’mərû ’ēlāyw kōh-’āmar yəhwâ ’ĕlōhê hā‘iḇərîm ‘aḏ-māṯay mē’anətā lē‘ānōṯ mipānāy šall^aḥ ‘ammî wəy^a‘aḇəḏunî:

4 kî ’im-mā’ēn ’atâ ləšallēḥa ’eṯ-‘ammî hinənî mēḇî’ māḥār ’arəbeh biḡəḇuleḵā:

5 wəḵissâ ’eṯ-‘ên hā’āreṣ wəlō’ yûḵal lirə’ōṯ ’eṯ-hā’āreṣ wə’āḵal| ’eṯ-yeṯer hapəlēṭâ hannišə’ereṯ lāḵem min-habārāḏ wə’āḵal ’eṯ-kāl-hā‘ēṣ haṣṣōmēḥa lāḵem min-haśśāḏeh:

6 ûmālə’û ḇāteyḵā ûḇātê ḵāl-‘ăḇāḏeyḵā ûḇātê ḵāl-miṣərayim ’ăšer lō’-rā’û ’ăḇōṯeyḵā wa’ăḇwōṯ ’ăḇōṯeyḵā mîywōm hĕywōṯām ‘al-hā’ăḏāmâ ‘aḏ hayywōm hazzeh wayyifen wayyēṣē’ mē‘im parə‘ōh:

7 wayyō’mərû ‘aḇəḏê farə‘ōh ’ēlāyw ‘aḏ-māṯay yihəyeh zeh lānû ləmwōqēš šall^aḥ ’eṯ-hā’ănāšîm wəy^a‘aḇəḏû ’eṯ-yəhwâ ’ĕlōhêhem hăṭerem tēḏ^a‘ kî ’āḇəḏâ miṣərāyim:

8 wayyûšaḇ ’eṯ-mōšeh wə’eṯ-’ahărōn ’el-parə‘ōh wayyō’mer ’ălēhem ləḵû ‘iḇəḏû ’eṯ-yəhwâ ’ĕlōhêḵem mî wāmî hahōləḵîm:

9 wayyō’mer mōšeh binə‘ārênû ûḇizəqēnênû nēlēḵə bəḇānênû ûḇiḇənwōṯēnû bəṣō’nēnû ûḇiḇəqārēnû nēlēḵə kî ḥaḡ-yəhwâ lānû:

10 wayyō’mer ’ălēhem yəhî ḵēn yəhwâ ‘immāḵem ka’ăšer ’ăšall^aḥ ’eṯəḵem wə’eṯ-ṭapəḵem rə’û kî rā‘â neḡeḏ pənêḵem:

11 lō’ ḵēn ləḵû-nā’ hagəḇārîm wə‘iḇəḏû ’eṯ-yəhwâ kî ’ōṯāh ’atem məḇaqəšîm wayəḡāreš ’ōṯām mē’ēṯ pənê farə‘ōh: f

12 wayyō’mer yəhwâ ’el-mōšeh nəṭēh yāḏəḵā ‘al-’ereṣ miṣərayim bā’arəbeh wəy^a‘al ‘al-’ereṣ miṣərāyim wəyō’ḵal ’eṯ-kāl-‘ēśeḇ hā’āreṣ ’ēṯ kāl-’ăšer hišə’îr habārāḏ:

13 wayyēṭ mōšeh ’eṯ-maṭṭēhû ‘al-’ereṣ miṣərayim wayhwâ nihaḡ rûḥa qāḏîm bā’āreṣ kāl-hayywōm hahû’ wəḵāl-hallāyəlâ habōqer hāyâ wərûḥa haqqāḏîm nāśā’ ’eṯ-hā’arəbeh:

14 wayy^a‘al hā’arəbeh ‘al kāl-’ereṣ miṣərayim wayyān^aḥ bəḵōl gəḇûl miṣərāyim kāḇēḏ mə’ōḏ ləfānāyw lō’-hāyâ ḵēn ’arəbeh kāmōhû wə’^aḥărāyw lō’ yihəyeh-kēn:

15 wayəḵas ’eṯ-‘ên kāl-hā’āreṣ wateḥəšaḵə hā’āreṣ wayyō’ḵal ’eṯ-kāl-‘ēśeḇ hā’āreṣ wə’ēṯ kāl-pərî hā‘ēṣ ’ăšer hwōṯîr habārāḏ wəlō’-nwōṯar kāl-yereq bā‘ēṣ ûḇə‘ēśeḇ haśśāḏeh bəḵāl-’ereṣ miṣərāyim:

16 wayəmahēr parə‘ōh liqərō’ ləmōšeh ûlə’ahărōn wayyō’mer ḥāṭā’ṯî layhwâ ’ĕlōhêḵem wəlāḵem:

17 wə‘atâ śā’ nā’ ḥaṭṭā’ṯî ’aḵə hap^a‘am wəh^a‘ətîrû layhwâ ’ĕlōhêḵem wəyāsēr mē‘ālay raq ’eṯ-hammāweṯ hazzeh:

18 wayyēṣē’ mē‘im parə‘ōh wayye‘ətar ’el-yəhwâ:

19 wayyahăfōḵə yəhwâ rûḥa-yām ḥāzāq mə’ōḏ wayyiśśā’ ’eṯ-hā’arəbeh wayyiṯəqā‘ēhû yāmmâ ssûf lō’ nišə’ar ’arəbeh ’eḥāḏ bəḵōl gəḇûl miṣərāyim:

20 wayəḥazzēq yəhwâ ’eṯ-lēḇ parə‘ōh wəlō’ šill^aḥ ’eṯ-bənê yiśərā’ēl: f

21 wayyō’mer yəhwâ ’el-mōšeh nəṭēh yāḏəḵā ‘al-haššāmayim wîhî ḥōšeḵə ‘al-’ereṣ miṣərāyim wəyāmēš ḥōšeḵə:

22 wayyēṭ mōšeh ’eṯ-yāḏwō ‘al-haššāmāyim wayəhî ḥōšeḵə-’ăfēlâ bəḵāl-’ereṣ miṣərayim šəlōšeṯ yāmîm:

23 lō’-rā’û ’îš ’eṯ-’āḥîw wəlō’-qāmû ’îš mit^aḥətāyw šəlōšeṯ yāmîm ûləḵāl-bənê yiśərā’ēl hāyâ ’wōr bəmwōšəḇōṯām:

24 wayyiqərā’ farə‘ōh ’el-mōšeh wayyō’mer ləḵû ‘iḇəḏû ’eṯ-yəhwâ raq ṣō’nəḵem ûḇəqarəḵem yuṣṣāḡ gam-ṭapəḵem yēlēḵə ‘immāḵem:

25 wayyō’mer mōšeh gam-’atâ titēn bəyāḏēnû zəḇāḥîm wə‘ōlwōṯ wə‘āśînû layhwâ ’ĕlōhênû:

26 wəḡam-miqənēnû yēlēḵə ‘immānû lō’ ṯiššā’ēr parəsâ kî mimmennû niqq^aḥ l^a‘ăḇōḏ ’eṯ-yəhwâ ’ĕlōhênû wa’ăn^aḥənû lō’-nēḏ^a‘ mah-nn^a‘ăḇōḏ ’eṯ-yəhwâ ‘aḏ-bō’ēnû šāmmâ:

27 wayəḥazzēq yəhwâ ’eṯ-lēḇ parə‘ōh wəlō’ ’āḇâ ləšalləḥām:

28 wayyō’mer-lwō farə‘ōh lēḵə mē‘ālāy hiššāmer ləḵā ’el-tōsef rə’wōṯ pānay kî bəywōm rə’ōṯəḵā fānay tāmûṯ:

29 wayyō’mer mōšeh kēn dibarətā lō’-’ōsif ‘wōḏ rə’wōṯ pāneyḵā: f