Exodus (Shemot) Chapter 16

‎1 ‏וַיִּסְעוּ֙ מֵֽאֵילִ֔ם וַיָּבֹ֜אוּ כָּל־עֲדַ֤ת בְּנֵֽי־יִשְׂרָאֵל֙ אֶל־מִדְבַּר־סִ֔ין אֲשֶׁ֥ר בֵּין־אֵילִ֖ם וּבֵ֣ין סִינָ֑י בַּחֲמִשָּׁ֨ה עָשָׂ֥ר יוֹם֙ לַחֹ֣דֶשׁ הַשֵּׁנִ֔י לְצֵאתָ֖ם מֵאֶ֥רֶץ מִצְרָֽיִם׃

‎2 ‏וילינו וַיִּלּ֜וֹנוּ כָּל־עֲדַ֧ת בְּנֵי־יִשְׂרָאֵ֛ל עַל־מֹשֶׁ֥ה וְעַֽל־אַהֲרֹ֖ן בַּמִּדְבָּֽר׃

‎3 ‏וַיֹּאמְר֨וּ אֲלֵהֶ֜ם בְּנֵ֣י יִשְׂרָאֵ֗ל מִֽי־יִתֵּ֨ן מוּתֵ֤נוּ בְיַד־יְהוָה֙ בְּאֶ֣רֶץ מִצְרַ֔יִם בְּשִׁבְתֵּ֙נוּ֙ עַל־סִ֣יר הַבָּשָׂ֔ר בְּאָכְלֵ֥נוּ לֶ֖חֶם לָשֹׂ֑בַע כִּֽי־הוֹצֵאתֶ֤ם אֹתָ֙נוּ֙ אֶל־הַמִּדְבָּ֣ר הַזֶּ֔ה לְהָמִ֛ית אֶת־כָּל־הַקָּהָ֥ל הַזֶּ֖ה בָּרָעָֽב׃ ס

‎4 ‏וַיֹּ֤אמֶר יְהוָה֙ אֶל־מֹשֶׁ֔ה הִנְנִ֨י מַמְטִ֥יר לָכֶ֛ם לֶ֖חֶם מִן־הַשָּׁמָ֑יִם וְיָצָ֨א הָעָ֤ם וְלָֽקְטוּ֙ דְּבַר־י֣וֹם בְּיוֹמ֔וֹ לְמַ֧עַן אֲנַסֶּ֛נּוּ הֲיֵלֵ֥ךְ בְּתוֹרָתִ֖י אִם־לֹֽא׃

‎5 ‏וְהָיָה֙ בַּיּ֣וֹם הַשִּׁשִּׁ֔י וְהֵכִ֖ינוּ אֵ֣ת אֲשֶׁר־יָבִ֑יאוּ וְהָיָ֣ה מִשְׁנֶ֔ה עַ֥ל אֲשֶֽׁר־יִלְקְט֖וּ י֥וֹם׀ יֽוֹם׃ ס

‎6 ‏וַיֹּ֤אמֶר מֹשֶׁה֙ וְאַהֲרֹ֔ן אֶֽל־כָּל־בְּנֵ֖י יִשְׂרָאֵ֑ל עֶ֕רֶב וִֽידַעְתֶּ֕ם כִּ֧י יְהוָ֛ה הוֹצִ֥יא אֶתְכֶ֖ם מֵאֶ֥רֶץ מִצְרָֽיִם׃

‎7 ‏וּבֹ֗קֶר וּרְאִיתֶם֙ אֶת־כְּב֣וֹד יְהוָ֔ה בְּשָׁמְע֥וֹ אֶת־תְּלֻנֹּתֵיכֶ֖ם עַל־יְהוָ֑ה וְנַ֣חְנוּ מָ֔ה כִּ֥י תלונו תַלִּ֖ינוּ עָלֵֽינוּ׃

‎8 ‏וַיֹּ֣אמֶר מֹשֶׁ֗ה בְּתֵ֣ת יְהוָה֩ לָכֶ֨ם בָּעֶ֜רֶב בָּשָׂ֣ר לֶאֱכֹ֗ל וְלֶ֤חֶם בַּבֹּ֙קֶר֙ לִשְׂבֹּ֔עַ בִּשְׁמֹ֤עַ יְהוָה֙ אֶת־תְּלֻנֹּ֣תֵיכֶ֔ם אֲשֶׁר־אַתֶּ֥ם מַלִּינִ֖ם עָלָ֑יו וְנַ֣חְנוּ מָ֔ה לֹא־עָלֵ֥ינוּ תְלֻנֹּתֵיכֶ֖ם כִּ֥י עַל־יְהוָֽה׃

‎9 ‏וַיֹּ֤אמֶר מֹשֶׁה֙ אֶֽל־אַהֲרֹ֔ן אֱמֹ֗ר אֶֽל־כָּל־עֲדַת֙ בְּנֵ֣י יִשְׂרָאֵ֔ל קִרְב֖וּ לִפְנֵ֣י יְהוָ֑ה כִּ֣י שָׁמַ֔ע אֵ֖ת תְּלֻנֹּתֵיכֶֽם׃

‎10 ‏וַיְהִ֗י כְּדַבֵּ֤ר אַהֲרֹן֙ אֶל־כָּל־עֲדַ֣ת בְּנֵֽי־יִשְׂרָאֵ֔ל וַיִּפְנ֖וּ אֶל־הַמִּדְבָּ֑ר וְהִנֵּה֙ כְּב֣וֹד יְהוָ֔ה נִרְאָ֖ה בֶּעָנָֽן׃ פ

‎11 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎12 ‏שָׁמַ֗עְתִּי אֶת־תְּלוּנֹּת֮ בְּנֵ֣י יִשְׂרָאֵל֒ דַּבֵּ֨ר אֲלֵהֶ֜ם לֵאמֹ֗ר בֵּ֤ין הָֽעַרְבַּ֙יִם֙ תֹּאכְל֣וּ בָשָׂ֔ר וּבַבֹּ֖קֶר תִּשְׂבְּעוּ־לָ֑חֶם וִֽידַעְתֶּ֕ם כִּ֛י אֲנִ֥י יְהוָ֖ה אֱלֹהֵיכֶֽם׃

‎13 ‏וַיְהִ֣י בָעֶ֔רֶב וַתַּ֣עַל הַשְּׂלָ֔ו וַתְּכַ֖ס אֶת־הַֽמַּחֲנֶ֑ה וּבַבֹּ֗קֶר הָֽיְתָה֙ שִׁכְבַ֣ת הַטַּ֔ל סָבִ֖יב לַֽמַּחֲנֶֽה׃

‎14 ‏וַתַּ֖עַל שִׁכְבַ֣ת הַטָּ֑ל וְהִנֵּ֞ה עַל־פְּנֵ֤י הַמִּדְבָּר֙ דַּ֣ק מְחֻסְפָּ֔ס דַּ֥ק כַּכְּפֹ֖ר עַל־הָאָֽרֶץ׃

‎15 ‏וַיִּרְא֣וּ בְנֵֽי־יִשְׂרָאֵ֗ל וַיֹּ֨אמְר֜וּ אִ֤ישׁ אֶל־אָחִיו֙ מָ֣ן ה֔וּא כִּ֛י לֹ֥א יָדְע֖וּ מַה־ה֑וּא וַיֹּ֤אמֶר מֹשֶׁה֙ אֲלֵהֶ֔ם ה֣וּא הַלֶּ֔חֶם אֲשֶׁ֨ר נָתַ֧ן יְהוָ֛ה לָכֶ֖ם לְאָכְלָֽה׃

‎16 ‏זֶ֤ה הַדָּבָר֙ אֲשֶׁ֣ר צִוָּ֣ה יְהוָ֔ה לִקְט֣וּ מִמֶּ֔נּוּ אִ֖ישׁ לְפִ֣י אָכְל֑וֹ עֹ֣מֶר לַגֻּלְגֹּ֗לֶת מִסְפַּר֙ נַפְשֹׁ֣תֵיכֶ֔ם אִ֛ישׁ לַאֲשֶׁ֥ר בְּאָהֳל֖וֹ תִּקָּֽחוּ׃

‎17 ‏וַיַּעֲשׂוּ־כֵ֖ן בְּנֵ֣י יִשְׂרָאֵ֑ל וַֽיִּלְקְט֔וּ הַמַּרְבֶּ֖ה וְהַמַּמְעִֽיט׃

‎18 ‏וַיָּמֹ֣דּוּ בָעֹ֔מֶר וְלֹ֤א הֶעְדִּיף֙ הַמַּרְבֶּ֔ה וְהַמַּמְעִ֖יט לֹ֣א הֶחְסִ֑יר אִ֥ישׁ לְפִֽי־אָכְל֖וֹ לָקָֽטוּ׃

‎19 ‏וַיֹּ֥אמֶר מֹשֶׁ֖ה אֲלֵהֶ֑ם אִ֕ישׁ אַל־יוֹתֵ֥ר מִמֶּ֖נּוּ עַד־בֹּֽקֶר׃

‎20 ‏וְלֹא־שָׁמְע֣וּ אֶל־מֹשֶׁ֗ה וַיּוֹתִ֨רוּ אֲנָשִׁ֤ים מִמֶּ֙נּוּ֙ עַד־בֹּ֔קֶר וַיָּ֥רֻם תּוֹלָעִ֖ים וַיִּבְאַ֑שׁ וַיִּקְצֹ֥ף עֲלֵהֶ֖ם מֹשֶֽׁה׃

‎21 ‏וַיִּלְקְט֤וּ אֹתוֹ֙ בַּבֹּ֣קֶר בַּבֹּ֔קֶר אִ֖ישׁ כְּפִ֣י אָכְל֑וֹ וְחַ֥ם הַשֶּׁ֖מֶשׁ וְנָמָֽס׃

‎22 ‏וַיְהִ֣י׀ בַּיּ֣וֹם הַשִּׁשִּׁ֗י לָֽקְט֥וּ לֶ֙חֶם֙ מִשְׁנֶ֔ה שְׁנֵ֥י הָעֹ֖מֶר לָאֶחָ֑ד וַיָּבֹ֙אוּ֙ כָּל־נְשִׂיאֵ֣י הָֽעֵדָ֔ה וַיַּגִּ֖ידוּ לְמֹשֶֽׁה׃

‎23 ‏וַיֹּ֣אמֶר אֲלֵהֶ֗ם ה֚וּא אֲשֶׁ֣ר דִּבֶּ֣ר יְהוָ֔ה שַׁבָּת֧וֹן שַׁבַּת־קֹ֛דֶשׁ לַֽיהוָ֖ה מָחָ֑ר אֵ֣ת אֲשֶׁר־תֹּאפ֞וּ אֵפ֗וּ וְאֵ֤ת אֲשֶֽׁר־תְּבַשְּׁלוּ֙ בַּשֵּׁ֔לוּ וְאֵת֙ כָּל־הָ֣עֹדֵ֔ף הַנִּ֧יחוּ לָכֶ֛ם לְמִשְׁמֶ֖רֶת עַד־הַבֹּֽקֶר׃

‎24 ‏וַיַּנִּ֤יחוּ אֹתוֹ֙ עַד־הַבֹּ֔קֶר כַּאֲשֶׁ֖ר צִוָּ֣ה מֹשֶׁ֑ה וְלֹ֣א הִבְאִ֔ישׁ וְרִמָּ֖ה לֹא־הָ֥יְתָה בּֽוֹ׃

‎25 ‏וַיֹּ֤אמֶר מֹשֶׁה֙ אִכְלֻ֣הוּ הַיּ֔וֹם כִּֽי־שַׁבָּ֥ת הַיּ֖וֹם לַיהוָ֑ה הַיּ֕וֹם לֹ֥א תִמְצָאֻ֖הוּ בַּשָּׂדֶֽה׃

‎26 ‏שֵׁ֥שֶׁת יָמִ֖ים תִּלְקְטֻ֑הוּ וּבַיּ֧וֹם הַשְּׁבִיעִ֛י שַׁבָּ֖ת לֹ֥א יִֽהְיֶה־בּֽוֹ׃

‎27 ‏וַֽיְהִי֙ בַּיּ֣וֹם הַשְּׁבִיעִ֔י יָצְא֥וּ מִן־הָעָ֖ם לִלְקֹ֑ט וְלֹ֖א מָצָֽאוּ׃ ס

‎28 ‏וַיֹּ֥אמֶר יְהוָ֖ה אֶל־מֹשֶׁ֑ה עַד־אָ֙נָה֙ מֵֽאַנְתֶּ֔ם לִשְׁמֹ֥ר מִצְוֹתַ֖י וְתוֹרֹתָֽי׃

‎29 ‏רְא֗וּ כִּֽי־יְהוָה֮ נָתַ֣ן לָכֶ֣ם הַשַּׁבָּת֒ עַל־כֵּ֠ן ה֣וּא נֹתֵ֥ן לָכֶ֛ם בַּיּ֥וֹם הַשִּׁשִּׁ֖י לֶ֣חֶם יוֹמָ֑יִם שְׁב֣וּ׀ אִ֣ישׁ תַּחְתָּ֗יו אַל־יֵ֥צֵא אִ֛ישׁ מִמְּקֹמ֖וֹ בַּיּ֥וֹם הַשְּׁבִיעִֽי׃

‎30 ‏וַיִּשְׁבְּת֥וּ הָעָ֖ם בַּיּ֥וֹם הַשְּׁבִעִֽי׃

‎31 ‏וַיִּקְרְא֧וּ בֵֽית־יִשְׂרָאֵ֛ל אֶת־שְׁמ֖וֹ מָ֑ן וְה֗וּא כְּזֶ֤רַע גַּד֙ לָבָ֔ן וְטַעְמ֖וֹ כְּצַפִּיחִ֥ת בִּדְבָֽשׁ׃

‎32 ‏וַיֹּ֣אמֶר מֹשֶׁ֗ה זֶ֤ה הַדָּבָר֙ אֲשֶׁ֣ר צִוָּ֣ה יְהוָ֔ה מְלֹ֤א הָעֹ֙מֶר֙ מִמֶּ֔נּוּ לְמִשְׁמֶ֖רֶת לְדֹרֹתֵיכֶ֑ם לְמַ֣עַן׀ יִרְא֣וּ אֶת־הַלֶּ֗חֶם אֲשֶׁ֨ר הֶאֱכַ֤לְתִּי אֶתְכֶם֙ בַּמִּדְבָּ֔ר בְּהוֹצִיאִ֥י אֶתְכֶ֖ם מֵאֶ֥רֶץ מִצְרָֽיִם׃

‎33 ‏וַיֹּ֨אמֶר מֹשֶׁ֜ה אֶֽל־אַהֲרֹ֗ן קַ֚ח צִנְצֶ֣נֶת אַחַ֔ת וְתֶן־שָׁ֥מָּה מְלֹֽא־הָעֹ֖מֶר מָ֑ן וְהַנַּ֤ח אֹתוֹ֙ לִפְנֵ֣י יְהוָ֔ה לְמִשְׁמֶ֖רֶת לְדֹרֹתֵיכֶֽם׃

‎34 ‏כַּאֲשֶׁ֛ר צִוָּ֥ה יְהוָ֖ה אֶל־מֹשֶׁ֑ה וַיַּנִּיחֵ֧הוּ אַהֲרֹ֛ן לִפְנֵ֥י הָעֵדֻ֖ת לְמִשְׁמָֽרֶת׃

‎35 ‏וּבְנֵ֣י יִשְׂרָאֵ֗ל אָֽכְל֤וּ אֶת־הַמָּן֙ אַרְבָּעִ֣ים שָׁנָ֔ה עַד־בֹּאָ֖ם אֶל־אֶ֣רֶץ נוֹשָׁ֑בֶת אֶת־הַמָּן֙ אָֽכְל֔וּ עַד־בֹּאָ֕ם אֶל־קְצֵ֖ה אֶ֥רֶץ כְּנָֽעַן׃

‎36 ‏וְהָעֹ֕מֶר עֲשִׂרִ֥ית הָאֵיפָ֖ה הֽוּא׃ פ

1 wayyisə‘û mē’êlim wayyāḇō’û kāl-‘ăḏaṯ bənê-yiśərā’ēl ’el-miḏəbar-sîn ’ăšer bên-’êlim ûḇên sînāy b^aḥămiššâ ‘āśār ywōm l^aḥōḏeš haššēnî ləṣē’ṯām mē’ereṣ miṣərāyim:

2 wayyallînû wayyillwōnû kāl-‘ăḏaṯ bənê-yiśərā’ēl ‘al-mōšeh wə‘al-’ahărōn bammiḏəbār:

3 wayyō’mərû ’ălēhem bənê yiśərā’ēl mî-yitēn mûṯēnû ḇəyaḏ-yəhwâ bə’ereṣ miṣərayim bəšiḇətēnû ‘al-sîr habāśār bə’āḵəlēnû leḥem lāśōḇ^a‘ kî-hwōṣē’ṯem ’ōṯānû ’el-hammiḏəbār hazzeh ləhāmîṯ ’eṯ-kāl-haqqâāl hazzeh bārā‘āḇ: s

4 wayyō’mer yəhwâ ’el-mōšeh hinənî maməṭîr lāḵem leḥem min-haššāmāyim wəyāṣā’ hā‘ām wəlāqəṭû dəḇar-ywōm bəywōmwō ləm^a‘an ’ănassennû hăyēlēḵə bəṯwōrāṯî ’im-lō’:

5 wəhāyâ bayywōm haššiššî wəhēḵînû ’ēṯ ’ăšer-yāḇî’û wəhāyâ mišəneh ‘al ’ăšer-yiləqəṭû ywōm| ywōm: s

6 wayyō’mer mōšeh wə’ahărōn ’el-kāl-bənê yiśərā’ēl ‘ereḇ wîḏ^a‘ətem kî yəhwâ hwōṣî’ ’eṯəḵem mē’ereṣ miṣərāyim:

7 ûḇōqer ûrə’îṯem ’eṯ-kəḇwōḏ yəhwâ bəšāmə‘wō ’eṯ-təlunnōṯêḵem ‘al-yəhwâ wən^aḥənû mâ kî ṯallwōnû ṯallînû ‘ālênû:

8 wayyō’mer mōšeh bəṯēṯ yəhwâ lāḵem bā‘ereḇ bāśār le’ĕḵōl wəleḥem babōqer liśəbō‘a bišəmō‘a yəhwâ ’eṯ-təlunnōṯêḵem ’ăšer-’atem mallînim ‘ālāyw wən^aḥənû mâ lō’-‘ālênû ṯəlunnōṯêḵem kî ‘al-yəhwâ:

9 wayyō’mer mōšeh ’el-’ahărōn ’ĕmōr ’el-kāl-‘ăḏaṯ bənê yiśərā’ēl qirəḇû lifənê yəhwâ kî šām^a‘ ’ēṯ təlunnōṯêḵem:

10 wayəhî kəḏabēr ’ahărōn ’el-kāl-‘ăḏaṯ bənê-yiśərā’ēl wayyifənû ’el-hammiḏəbār wəhinnēh kəḇwōḏ yəhwâ nirə’â be‘ānān: f

11 wayəḏabēr yəhwâ ’el-mōšeh llē’mōr:

12 šām^a‘ətî ’eṯ-təlûnnōṯ bənê yiśərā’ēl dabēr ’ălēhem lē’mōr bên hā‘arəbayim tō’ḵəlû ḇāśār ûḇabōqer tiśəbə‘û-lāḥem wîḏ^a‘ətem kî ’ănî yəhwâ ’ĕlōhêḵem:

13 wayəhî ḇā‘ereḇ wat^a‘al haśśəlāw watəḵas ’eṯ-hamm^aḥăneh ûḇabōqer hāyəṯâ šiḵəḇaṯ haṭṭal sāḇîḇ lamm^aḥăneh:

14 wat^a‘al šiḵəḇaṯ haṭṭāl wəhinnēh ‘al-pənê hammiḏəbār daq məḥusəpās daq kakəfōr ‘al-hā’āreṣ:

15 wayyirə’û ḇənê-yiśərā’ēl wayyō’mərû ’îš ’el-’āḥîw mān hû’ kî lō’ yāḏə‘û mah-hû’ wayyō’mer mōšeh ’ălēhem hû’ halleḥem ’ăšer nāṯan yəhwâ lāḵem lə’āḵəlâ:

16 zeh hadāḇār ’ăšer ṣiûâ yəhwâ liqəṭû mimmennû ’îš ləfî ’āḵəlwō ‘ōmer laguləgōleṯ misəpar nafəšōṯêḵem ’îš la’ăšer bə’âŏlwō tiqqāḥû:

17 wayy^a‘ăśû-ḵēn bənê yiśərā’ēl wayyiləqəṭû hammarəbeh wəhammamə‘îṭ:

18 wayyāmōdû ḇā‘ōmer wəlō’ he‘ədîf hammarəbeh wəhammamə‘îṭ lō’ heḥəsîr ’îš ləfî-’āḵəlwō lāqāṭû:

19 wayyō’mer mōšeh ’ălēhem ’îš ’al-ywōṯēr mimmennû ‘aḏ-bōqer:

20 wəlō’-šāmə‘û ’el-mōšeh wayywōṯirû ’ănāšîm mimmennû ‘aḏ-bōqer wayyārum twōlā‘îm wayyiḇə’aš wayyiqəṣōf ‘ălēhem mōšeh:

21 wayyiləqəṭû ’ōṯwō babōqer babōqer ’îš kəfî ’āḵəlwō wəḥam haššemeš wənāmās:

22 wayəhî| bayywōm haššiššî lāqəṭû leḥem mišəneh šənê hā‘ōmer lā’eḥāḏ wayyāḇō’û kāl-nəśî’ê hā‘ēḏâ wayyagîḏû ləmōšeh:

23 wayyō’mer ’ălēhem hû’ ’ăšer diber yəhwâ šabāṯwōn šabaṯ-qōḏeš layhwâ māḥār ’ēṯ ’ăšer-tō’fû ’ēfû wə’ēṯ ’ăšer-təḇaššəlû baššēlû wə’ēṯ kāl-hā‘ōḏēf hannîḥû lāḵem ləmišəmereṯ ‘aḏ-habōqer:

24 wayyannîḥû ’ōṯwō ‘aḏ-habōqer ka’ăšer ṣiûâ mōšeh wəlō’ hiḇə’îš wərimmâ lō’-hāyəṯâ bwō:

25 wayyō’mer mōšeh ’iḵəluhû hayywōm kî-šabāṯ hayywōm layhwâ hayywōm lō’ ṯiməṣā’uhû baśśāḏeh:

26 šēšeṯ yāmîm tiləqəṭuhû ûḇayywōm haššəḇî‘î šabāṯ lō’ yihəyeh-bwō:

27 wayəhî bayywōm haššəḇî‘î yāṣə’û min-hā‘ām liləqōṭ wəlō’ māṣā’û: s

28 wayyō’mer yəhwâ ’el-mōšeh ‘aḏ-’ānâ mē’anətem lišəmōr miṣəwōṯay wəṯwōrōṯāy:

29 rə’û kî-yəhwâ nāṯan lāḵem haššabāṯ ‘al-kēn hû’ nōṯēn lāḵem bayywōm haššiššî leḥem ywōmāyim šəḇû| ’îš t^aḥətāyw ’al-yēṣē’ ’îš mimməqōmwō bayywōm haššəḇî‘î:

30 wayyišəbəṯû hā‘ām bayywōm haššəḇi‘î:

31 wayyiqərə’û ḇêṯ-yiśərā’ēl ’eṯ-šəmwō mān wəhû’ kəzer^a‘ gaḏ lāḇān wəṭ^a‘əmwō kəṣapîḥiṯ biḏəḇāš:

32 wayyō’mer mōšeh zeh hadāḇār ’ăšer ṣiûâ yəhwâ məlō’ hā‘ōmer mimmennû ləmišəmereṯ ləḏōrōṯêḵem ləm^a‘an| yirə’û ’eṯ-halleḥem ’ăšer he’ĕḵalətî ’eṯəḵem bammiḏəbār bəhwōṣî’î ’eṯəḵem mē’ereṣ miṣərāyim:

33 wayyō’mer mōšeh ’el-’ahărōn q^aḥ ṣinəṣeneṯ ’^aḥaṯ wəṯen-šāmmâ məlō’-hā‘ōmer mān wəhann^aḥ ’ōṯwō lifənê yəhwâ ləmišəmereṯ ləḏōrōṯêḵem:

34 ka’ăšer ṣiûâ yəhwâ ’el-mōšeh wayyannîḥēhû ’ahărōn lifənê hā‘ēḏuṯ ləmišəmāreṯ:

35 ûḇənê yiśərā’ēl ’āḵəlû ’eṯ-hammān ’arəbā‘îm šānâ ‘aḏ-bō’ām ’el-’ereṣ nwōšāḇeṯ ’eṯ-hammān ’āḵəlû ‘aḏ-bō’ām ’el-qəṣēh ’ereṣ kənā‘an:

36 wəhā‘ōmer ‘ăśirîṯ hā’êfâ hû’: f