Exodus (Shemot) Chapter 26

‎1 ‏וְאֶת־הַמִּשְׁכָּ֥ן תַּעֲשֶׂ֖ה עֶ֣שֶׂר יְרִיעֹ֑ת שֵׁ֣שׁ מָשְׁזָ֗ר וּתְכֵ֤לֶת וְאַרְגָּמָן֙ וְתֹלַ֣עַת שָׁנִ֔י כְּרֻבִ֛ים מַעֲשֵׂ֥ה חֹשֵׁ֖ב תַּעֲשֶׂ֥ה אֹתָֽם׃

‎2 ‏אֹ֣רֶךְ׀ הַיְרִיעָ֣ה הָֽאַחַ֗ת שְׁמֹנֶ֤ה וְעֶשְׂרִים֙ בָּֽאַמָּ֔ה וְרֹ֙חַב֙ אַרְבַּ֣ע בָּאַמָּ֔ה הַיְרִיעָ֖ה הָאֶחָ֑ת מִדָּ֥ה אַחַ֖ת לְכָל־הַיְרִיעֹֽת׃

‎3 ‏חֲמֵ֣שׁ הַיְרִיעֹ֗ת תִּֽהְיֶ֙יןָ֙ חֹֽבְרֹ֔ת אִשָּׁ֖ה אֶל־אֲחֹתָ֑הּ וְחָמֵ֤שׁ יְרִיעֹת֙ חֹֽבְרֹ֔ת אִשָּׁ֖ה אֶל־אֲחֹתָֽהּ׃

‎4 ‏וְעָשִׂ֜יתָ לֻֽלְאֹ֣ת תְּכֵ֗לֶת עַ֣ל שְׂפַ֤ת הַיְרִיעָה֙ הָאֶחָ֔ת מִקָּצָ֖ה בַּחֹבָ֑רֶת וְכֵ֤ן תַּעֲשֶׂה֙ בִּשְׂפַ֣ת הַיְרִיעָ֔ה הַקִּ֣יצוֹנָ֔ה בַּמַּחְבֶּ֖רֶת הַשֵּׁנִֽית׃

‎5 ‏חֲמִשִּׁ֣ים לֻֽלָאֹ֗ת תַּעֲשֶׂה֮ בַּיְרִיעָ֣ה הָאֶחָת֒ וַחֲמִשִּׁ֣ים לֻֽלָאֹ֗ת תַּעֲשֶׂה֙ בִּקְצֵ֣ה הַיְרִיעָ֔ה אֲשֶׁ֖ר בַּמַּחְבֶּ֣רֶת הַשֵּׁנִ֑ית מַקְבִּילֹת֙ הַלֻּ֣לָאֹ֔ת אִשָּׁ֖ה אֶל־אֲחֹתָֽהּ׃

‎6 ‏וְעָשִׂ֕יתָ חֲמִשִּׁ֖ים קַרְסֵ֣י זָהָ֑ב וְחִבַּרְתָּ֙ אֶת־הַיְרִיעֹ֜ת אִשָּׁ֤ה אֶל־אֲחֹתָהּ֙ בַּקְּרָסִ֔ים וְהָיָ֥ה הַמִּשְׁכָּ֖ן אֶחָֽד׃ פ

‎7 ‏וְעָשִׂ֙יתָ֙ יְרִיעֹ֣ת עִזִּ֔ים לְאֹ֖הֶל עַל־הַמִּשְׁכָּ֑ן עַשְׁתֵּי־עֶשְׂרֵ֥ה יְרִיעֹ֖ת תַּעֲשֶׂ֥ה אֹתָֽם׃

‎8 ‏אֹ֣רֶךְ׀ הַיְרִיעָ֣ה הָֽאַחַ֗ת שְׁלֹשִׁים֙ בָּֽאַמָּ֔ה וְרֹ֙חַב֙ אַרְבַּ֣ע בָּאַמָּ֔ה הַיְרִיעָ֖ה הָאֶחָ֑ת מִדָּ֣ה אַחַ֔ת לְעַשְׁתֵּ֥י עֶשְׂרֵ֖ה יְרִיעֹֽת׃

‎9 ‏וְחִבַּרְתָּ֞ אֶת־חֲמֵ֤שׁ הַיְרִיעֹת֙ לְבָ֔ד וְאֶת־שֵׁ֥שׁ הַיְרִיעֹ֖ת לְבָ֑ד וְכָפַלְתָּ֙ אֶת־הַיְרִיעָ֣ה הַשִּׁשִּׁ֔ית אֶל־מ֖וּל פְּנֵ֥י הָאֹֽהֶל׃

‎10 ‏וְעָשִׂ֜יתָ חֲמִשִּׁ֣ים לֻֽלָאֹ֗ת עַ֣ל שְׂפַ֤ת הַיְרִיעָה֙ הָֽאֶחָ֔ת הַקִּיצֹנָ֖ה בַּחֹבָ֑רֶת וַחֲמִשִּׁ֣ים לֻֽלָאֹ֗ת עַ֚ל שְׂפַ֣ת הַיְרִיעָ֔ה הַחֹבֶ֖רֶת הַשֵּׁנִֽית׃

‎11 ‏וְעָשִׂ֛יתָ קַרְסֵ֥י נְחֹ֖שֶׁת חֲמִשִּׁ֑ים וְהֵבֵאתָ֤ אֶת־הַקְּרָסִים֙ בַּלֻּ֣לָאֹ֔ת וְחִבַּרְתָּ֥ אֶת־הָאֹ֖הֶל וְהָיָ֥ה אֶחָֽד׃

‎12 ‏וְסֶ֙רַח֙ הָעֹדֵ֔ף בִּירִיעֹ֖ת הָאֹ֑הֶל חֲצִ֤י הַיְרִיעָה֙ הָעֹדֶ֔פֶת תִּסְרַ֕ח עַ֖ל אֲחֹרֵ֥י הַמִּשְׁכָּֽן׃

‎13 ‏וְהָאַמָּ֨ה מִזֶּ֜ה וְהָאַמָּ֤ה מִזֶּה֙ בָּעֹדֵ֔ף בְּאֹ֖רֶךְ יְרִיעֹ֣ת הָאֹ֑הֶל יִהְיֶ֨ה סָר֜וּחַ עַל־צִדֵּ֧י הַמִּשְׁכָּ֛ן מִזֶּ֥ה וּמִזֶּ֖ה לְכַסֹּתֽוֹ׃

‎14 ‏וְעָשִׂ֤יתָ מִכְסֶה֙ לָאֹ֔הֶל עֹרֹ֥ת אֵילִ֖ם מְאָדָּמִ֑ים וּמִכְסֵ֛ה עֹרֹ֥ת תְּחָשִׁ֖ים מִלְמָֽעְלָה׃ פ

‎15 ‏וְעָשִׂ֥יתָ אֶת־הַקְּרָשִׁ֖ים לַמִּשְׁכָּ֑ן עֲצֵ֥י שִׁטִּ֖ים עֹמְדִֽים׃

‎16 ‏עֶ֥שֶׂר אַמּ֖וֹת אֹ֣רֶךְ הַקָּ֑רֶשׁ וְאַמָּה֙ וַחֲצִ֣י הָֽאַמָּ֔ה רֹ֖חַב הַקֶּ֥רֶשׁ הָאֶחָֽד׃

‎17 ‏שְׁתֵּ֣י יָד֗וֹת לַקֶּ֙רֶשׁ֙ הָאֶחָ֔ד מְשֻׁלָּבֹ֔ת אִשָּׁ֖ה אֶל־אֲחֹתָ֑הּ כֵּ֣ן תַּעֲשֶׂ֔ה לְכֹ֖ל קַרְשֵׁ֥י הַמִּשְׁכָּֽן׃

‎18 ‏וְעָשִׂ֥יתָ אֶת־הַקְּרָשִׁ֖ים לַמִּשְׁכָּ֑ן עֶשְׂרִ֣ים קֶ֔רֶשׁ לִפְאַ֖ת נֶ֥גְבָּה תֵימָֽנָה׃

‎19 ‏וְאַרְבָּעִים֙ אַדְנֵי־כֶ֔סֶף תַּעֲשֶׂ֕ה תַּ֖חַת עֶשְׂרִ֣ים הַקָּ֑רֶשׁ שְׁנֵ֨י אֲדָנִ֜ים תַּֽחַת־הַקֶּ֤רֶשׁ הָאֶחָד֙ לִשְׁתֵּ֣י יְדֹתָ֔יו וּשְׁנֵ֧י אֲדָנִ֛ים תַּֽחַת־הַקֶּ֥רֶשׁ הָאֶחָ֖ד לִשְׁתֵּ֥י יְדֹתָֽיו׃

‎20 ‏וּלְצֶ֧לַע הַמִּשְׁכָּ֛ן הַשֵּׁנִ֖ית לִפְאַ֣ת צָפ֑וֹן עֶשְׂרִ֖ים קָֽרֶשׁ׃

‎21 ‏וְאַרְבָּעִ֥ים אַדְנֵיהֶ֖ם כָּ֑סֶף שְׁנֵ֣י אֲדָנִ֗ים תַּ֚חַת הַקֶּ֣רֶשׁ הָֽאֶחָ֔ד וּשְׁנֵ֣י אֲדָנִ֔ים תַּ֖חַת הַקֶּ֥רֶשׁ הָאֶחָֽד׃

‎22 ‏וּֽלְיַרְכְּתֵ֥י הַמִּשְׁכָּ֖ן יָ֑מָּה תַּעֲשֶׂ֖ה שִׁשָּׁ֥ה קְרָשִֽׁים׃

‎23 ‏וּשְׁנֵ֤י קְרָשִׁים֙ תַּעֲשֶׂ֔ה לִמְקֻצְעֹ֖ת הַמִּשְׁכָּ֑ן בַּיַּרְכָתָֽיִם׃

‎24 ‏וְיִֽהְי֣וּ תֹֽאֲמִים֮ מִלְּמַטָּה֒ וְיַחְדָּ֗ו יִהְי֤וּ³ תַמִּים֙ עַל־רֹאשׁ֔וֹ אֶל־הַטַּבַּ֖עַת הָאֶחָ֑ת כֵּ֚ן יִהְיֶ֣ה לִשְׁנֵיהֶ֔ם לִשְׁנֵ֥י הַמִּקְצֹעֹ֖ת יִהְיֽוּ׃

‎25 ‏וְהָיוּ֙ שְׁמֹנָ֣ה קְרָשִׁ֔ים וְאַדְנֵיהֶ֣ם כֶּ֔סֶף שִׁשָּׁ֥ה עָשָׂ֖ר אֲדָנִ֑ים שְׁנֵ֣י אֲדָנִ֗ים תַּ֚חַת הַקֶּ֣רֶשׁ הָאֶחָ֔ד וּשְׁנֵ֣י אֲדָנִ֔ים תַּ֖חַת הַקֶּ֥רֶשׁ הָאֶחָֽד׃

‎26 ‏וְעָשִׂ֥יתָ בְרִיחִ֖ם עֲצֵ֣י שִׁטִּ֑ים חֲמִשָּׁ֕ה לְקַרְשֵׁ֥י צֶֽלַע־הַמִּשְׁכָּ֖ן הָאֶחָֽד׃

‎27 ‏וַחֲמִשָּׁ֣ה בְרִיחִ֔ם לְקַרְשֵׁ֥י צֶֽלַע־הַמִּשְׁכָּ֖ן הַשֵּׁנִ֑ית וַחֲמִשָּׁ֣ה בְרִיחִ֗ם לְקַרְשֵׁי֙ צֶ֣לַע הַמִּשְׁכָּ֔ן לַיַּרְכָתַ֖יִם יָֽמָּה׃

‎28 ‏וְהַבְּרִ֥יחַ הַתִּיכֹ֖ן בְּת֣וֹךְ הַקְּרָשִׁ֑ים מַבְרִ֕חַ מִן־הַקָּצֶ֖ה אֶל־הַקָּצֶֽה׃

‎29 ‏וְֽאֶת־הַקְּרָשִׁ֞ים תְּצַפֶּ֣ה זָהָ֗ב וְאֶת־טַבְּעֹֽתֵיהֶם֙ תַּעֲשֶׂ֣ה זָהָ֔ב בָּתִּ֖ים לַבְּרִיחִ֑ם וְצִפִּיתָ֥ אֶת־הַבְּרִיחִ֖ם זָהָֽב׃

‎30 ‏וַהֲקֵמֹתָ֖ אֶת־הַמִּשְׁכָּ֑ן כְּמִ֨שְׁפָּט֔וֹ אֲשֶׁ֥ר הָרְאֵ֖יתָ בָּהָֽר׃ ס

‎31 ‏וְעָשִׂ֣יתָ פָרֹ֗כֶת תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ מָשְׁזָ֑ר מַעֲשֵׂ֥ה חֹשֵׁ֛ב יַעֲשֶׂ֥ה אֹתָ֖הּ כְּרֻבִֽים׃

‎32 ‏וְנָתַתָּ֣ה אֹתָ֗הּ עַל־אַרְבָּעָה֙ עַמּוּדֵ֣י שִׁטִּ֔ים מְצֻפִּ֣ים זָהָ֔ב וָוֵיהֶ֖ם זָהָ֑ב עַל־אַרְבָּעָ֖ה אַדְנֵי־כָֽסֶף׃

‎33 ‏וְנָתַתָּ֣ה אֶת־הַפָּרֹכֶת֮ תַּ֣חַת הַקְּרָסִים֒ וְהֵבֵאתָ֥ שָׁ֙מָּה֙ מִבֵּ֣ית לַפָּרֹ֔כֶת אֵ֖ת אֲר֣וֹן הָעֵד֑וּת וְהִבְדִּילָ֤ה הַפָּרֹ֙כֶת֙ לָכֶ֔ם בֵּ֣ין הַקֹּ֔דֶשׁ וּבֵ֖ין קֹ֥דֶשׁ הַקֳּדָשִֽׁים׃

‎34 ‏וְנָתַתָּ֙ אֶת־הַכַּפֹּ֔רֶת עַ֖ל אֲר֣וֹן הָעֵדֻ֑ת בְּקֹ֖דֶשׁ הַקֳּדָשִֽׁים׃

‎35 ‏וְשַׂמְתָּ֤ אֶת־הַשֻּׁלְחָן֙ מִח֣וּץ לַפָּרֹ֔כֶת וְאֶת־הַמְּנֹרָה֙ נֹ֣כַח הַשֻּׁלְחָ֔ן עַ֛ל צֶ֥לַע הַמִּשְׁכָּ֖ן תֵּימָ֑נָה וְהַ֨שֻּׁלְחָ֔ן תִּתֵּ֖ן עַל־צֶ֥לַע צָפֽוֹן׃

‎36 ‏וְעָשִׂ֤יתָ מָסָךְ֙ לְפֶ֣תַח הָאֹ֔הֶל תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ מָשְׁזָ֑ר מַעֲשֵׂ֖ה רֹקֵֽם׃

‎37 ‏וְעָשִׂ֣יתָ לַמָּסָ֗ךְ חֲמִשָּׁה֙ עַמּוּדֵ֣י שִׁטִּ֔ים וְצִפִּיתָ֤ אֹתָם֙ זָהָ֔ב וָוֵיהֶ֖ם זָהָ֑ב וְיָצַקְתָּ֣ לָהֶ֔ם חֲמִשָּׁ֖ה אַדְנֵ֥י נְחֹֽשֶׁת׃ ס

1 wə’eṯ-hammišəkān t^a‘ăśeh ‘eśer yərî‘ōṯ šēš māšəzār ûṯəḵēleṯ wə’arəgāmān wəṯōl^a‘aṯ šānî kəruḇîm m^a‘ăśēh ḥōšēḇ t^a‘ăśeh ’ōṯām:

2 ’ōreḵə| hayərî‘â hā’^aḥaṯ šəmōneh wə‘eśərîm bā’ammâ wərōḥaḇ ’arəb^a‘ bā’ammâ hayərî‘â hā’eḥāṯ midâ ’^aḥaṯ ləḵāl-hayərî‘ōṯ:

3 ḥămēš hayərî‘ōṯ tihəyeynā ḥōḇərōṯ ’iššâ ’el-’ăḥōṯāh wəḥāmēš yərî‘ōṯ ḥōḇərōṯ ’iššâ ’el-’ăḥōṯāh:

4 wə‘āśîṯā lulə’ōṯ təḵēleṯ ‘al śəfaṯ hayərî‘â hā’eḥāṯ miqqāṣâ b^aḥōḇāreṯ wəḵēn t^a‘ăśeh biśəfaṯ hayərî‘â haqqîṣwōnâ bamm^aḥəbereṯ haššēnîṯ:

5 ḥămiššîm lulā’ōṯ t^a‘ăśeh bayərî‘â hā’eḥāṯ w^aḥămiššîm lulā’ōṯ t^a‘ăśeh biqəṣēh hayərî‘â ’ăšer bamm^aḥəbereṯ haššēnîṯ maqəbîlōṯ hallulā’ōṯ ’iššâ ’el-’ăḥōṯāh:

6 wə‘āśîṯā ḥămiššîm qarəsê zâāḇ wəḥibarətā ’eṯ-hayərî‘ōṯ ’iššâ ’el-’ăḥōṯāh baqqərāsîm wəhāyâ hammišəkān ’eḥāḏ: f

7 wə‘āśîṯā yərî‘ōṯ ‘izzîm lə’ōhel ‘al-hammišəkān ‘ašətê-‘eśərēh yərî‘ōṯ t^a‘ăśeh ’ōṯām:

8 ’ōreḵə| hayərî‘â hā’^aḥaṯ šəlōšîm bā’ammâ wərōḥaḇ ’arəb^a‘ bā’ammâ hayərî‘â hā’eḥāṯ midâ ’^aḥaṯ lə‘ašətê ‘eśərēh yərî‘ōṯ:

9 wəḥibarətā ’eṯ-ḥămēš hayərî‘ōṯ ləḇāḏ wə’eṯ-šēš hayərî‘ōṯ ləḇāḏ wəḵāfalətā ’eṯ-hayərî‘â haššiššîṯ ’el-mûl pənê hā’ōhel:

10 wə‘āśîṯā ḥămiššîm lulā’ōṯ ‘al śəfaṯ hayərî‘â hā’eḥāṯ haqqîṣōnâ b^aḥōḇāreṯ w^aḥămiššîm lulā’ōṯ ‘al śəfaṯ hayərî‘â h^aḥōḇereṯ haššēnîṯ:

11 wə‘āśîṯā qarəsê nəḥōšeṯ ḥămiššîm wəhēḇē’ṯā ’eṯ-haqqərāsîm ballulā’ōṯ wəḥibarətā ’eṯ-hā’ōhel wəhāyâ ’eḥāḏ:

12 wəser^aḥ hā‘ōḏēf bîrî‘ōṯ hā’ōhel ḥăṣî hayərî‘â hā‘ōḏefeṯ tisər^aḥ ‘al ’ăḥōrê hammišəkān:

13 wəhā’ammâ mizzeh wəhā’ammâ mizzeh bā‘ōḏēf bə’ōreḵə yərî‘ōṯ hā’ōhel yihəyeh sārûḥa ‘al-ṣidê hammišəkān mizzeh ûmizzeh ləḵassōṯwō:

14 wə‘āśîṯā miḵəseh lā’ōhel ‘ōrōṯ ’êlim mə’ādāmîm ûmiḵəsēh ‘ōrōṯ təḥāšîm miləmā‘əlâ: f

15 wə‘āśîṯā ’eṯ-haqqərāšîm lammišəkān ‘ăṣê šiṭṭîm ‘ōməḏîm:

16 ‘eśer ’ammwōṯ ’ōreḵə haqqāreš wə’ammâ w^aḥăṣî hā’ammâ rōḥaḇ haqqereš hā’eḥāḏ:

17 šətê yāḏwōṯ laqqereš hā’eḥāḏ məšullāḇōṯ ’iššâ ’el-’ăḥōṯāh kēn t^a‘ăśeh ləḵōl qarəšê hammišəkān:

18 wə‘āśîṯā ’eṯ-haqqərāšîm lammišəkān ‘eśərîm qereš lifə’aṯ neḡəbâ ṯêmānâ:

19 wə’arəbā‘îm ’aḏənê-ḵesef t^a‘ăśeh t^aḥaṯ ‘eśərîm haqqāreš šənê ’ăḏānîm t^aḥaṯ-haqqereš hā’eḥāḏ lišətê yəḏōṯāyw ûšənê ’ăḏānîm t^aḥaṯ-haqqereš hā’eḥāḏ lišətê yəḏōṯāyw:

20 ûləṣel^a‘ hammišəkān haššēnîṯ lifə’aṯ ṣāfwōn ‘eśərîm qāreš:

21 wə’arəbā‘îm ’aḏənêhem kāsef šənê ’ăḏānîm t^aḥaṯ haqqereš hā’eḥāḏ ûšənê ’ăḏānîm t^aḥaṯ haqqereš hā’eḥāḏ:

22 ûləyarəkəṯê hammišəkān yāmmâ t^a‘ăśeh šiššâ qərāšîm:

23 ûšənê qərāšîm t^a‘ăśeh liməquṣə‘ōṯ hammišəkān bayyarəḵāṯāyim:

24 wəyihəyû ṯō’ămîm milləmaṭṭâ wəy^aḥədāw yihəyû³ ṯammîm ‘al-rō’šwō ’el-haṭṭab^a‘aṯ hā’eḥāṯ kēn yihəyeh lišənêhem lišənê hammiqəṣō‘ōṯ yihəyû:

25 wəhāyû šəmōnâ qərāšîm wə’aḏənêhem kesef šiššâ ‘āśār ’ăḏānîm šənê ’ăḏānîm t^aḥaṯ haqqereš hā’eḥāḏ ûšənê ’ăḏānîm t^aḥaṯ haqqereš hā’eḥāḏ:

26 wə‘āśîṯā ḇərîḥim ‘ăṣê šiṭṭîm ḥămiššâ ləqarəšê ṣel^a‘-hammišəkān hā’eḥāḏ:

27 w^aḥămiššâ ḇərîḥim ləqarəšê ṣel^a‘-hammišəkān haššēnîṯ w^aḥămiššâ ḇərîḥim ləqarəšê ṣel^a‘ hammišəkān layyarəḵāṯayim yāmmâ:

28 wəhabərîḥa hatîḵōn bəṯwōḵə haqqərāšîm maḇəriḥa min-haqqāṣeh ’el-haqqāṣeh:

29 wə’eṯ-haqqərāšîm təṣapeh zâāḇ wə’eṯ-ṭabə‘ōṯêhem t^a‘ăśeh zâāḇ bātîm labərîḥim wəṣipîṯā ’eṯ-habərîḥim zâāḇ:

30 wahăqēmōṯā ’eṯ-hammišəkān kəmišəpāṭwō ’ăšer hārə’êṯā bâār: s

31 wə‘āśîṯā fārōḵeṯ təḵēleṯ wə’arəgāmān wəṯwōl^a‘aṯ šānî wəšēš māšəzār m^a‘ăśēh ḥōšēḇ y^a‘ăśeh ’ōṯāh kəruḇîm:

32 wənāṯatâ ’ōṯāh ‘al-’arəbā‘â ‘ammûḏê šiṭṭîm məṣupîm zâāḇ wāwêhem zâāḇ ‘al-’arəbā‘â ’aḏənê-ḵāsef:

33 wənāṯatâ ’eṯ-hapārōḵeṯ t^aḥaṯ haqqərāsîm wəhēḇē’ṯā šāmmâ mibêṯ lapārōḵeṯ ’ēṯ ’ărwōn hā‘ēḏûṯ wəhiḇədîlâ hapārōḵeṯ lāḵem bên haqqōḏeš ûḇên qōḏeš haqqŏḏāšîm:

34 wənāṯatā ’eṯ-hakapōreṯ ‘al ’ărwōn hā‘ēḏuṯ bəqōḏeš haqqŏḏāšîm:

35 wəśamətā ’eṯ-haššuləḥān miḥûṣ lapārōḵeṯ wə’eṯ-hammənōrâ nōḵ^aḥ haššuləḥān ‘al ṣel^a‘ hammišəkān têmānâ wəhaššuləḥān titēn ‘al-ṣel^a‘ ṣāfwōn:

36 wə‘āśîṯā māsāḵə ləfeṯ^aḥ hā’ōhel təḵēleṯ wə’arəgāmān wəṯwōl^a‘aṯ šānî wəšēš māšəzār m^a‘ăśēh rōqēm:

37 wə‘āśîṯā lammāsāḵə ḥămiššâ ‘ammûḏê šiṭṭîm wəṣipîṯā ’ōṯām zâāḇ wāwêhem zâāḇ wəyāṣaqətā lâem ḥămiššâ ’aḏənê nəḥōšeṯ: s