Exodus (Shemot) Chapter 34

‎1 ‏וַיֹּ֤אמֶר יְהוָה֙ אֶל־מֹשֶׁ֔ה פְּסָל־לְךָ֛ שְׁנֵֽי־לֻחֹ֥ת אֲבָנִ֖ים כָּרִאשֹׁנִ֑ים וְכָתַבְתִּי֙ עַל־הַלֻּחֹ֔ת אֶת־הַדְּבָרִ֔ים אֲשֶׁ֥ר הָי֛וּ עַל־הַלֻּחֹ֥ת הָרִאשֹׁנִ֖ים אֲשֶׁ֥ר שִׁבַּֽרְתָּ׃

‎2 ‏וֶהְיֵ֥ה נָכ֖וֹן לַבֹּ֑קֶר וְעָלִ֤יתָ בַבֹּ֙קֶר֙ אֶל־הַ֣ר סִינַ֔י וְנִצַּבְתָּ֥ לִ֛י שָׁ֖ם עַל־רֹ֥אשׁ הָהָֽר׃

‎3 ‏וְאִישׁ֙ לֹֽא־יַעֲלֶ֣ה עִמָּ֔ךְ וְגַם־אִ֥ישׁ אַל־יֵרָ֖א בְּכָל־הָהָ֑ר גַּם־הַצֹּ֤אן וְהַבָּקָר֙ אַל־יִרְע֔וּ אֶל־מ֖וּל הָהָ֥ר הַהֽוּא׃

‎4 ‏וַיִּפְסֹ֡ל שְׁנֵֽי־לֻחֹ֨ת אֲבָנִ֜ים כָּרִאשֹׁנִ֗ים וַיַּשְׁכֵּ֨ם מֹשֶׁ֤ה בַבֹּ֙קֶר֙ וַיַּ֙עַל֙ אֶל־הַ֣ר סִינַ֔י כַּאֲשֶׁ֛ר צִוָּ֥ה יְהוָ֖ה אֹת֑וֹ וַיִּקַּ֣ח בְּיָד֔וֹ שְׁנֵ֖י לֻחֹ֥ת אֲבָנִֽים׃

‎5 ‏וַיֵּ֤רֶד יְהוָה֙ בֶּֽעָנָ֔ן וַיִּתְיַצֵּ֥ב עִמּ֖וֹ שָׁ֑ם וַיִּקְרָ֥א בְשֵׁ֖ם יְהוָֽה׃

‎6 ‏וַיַּעֲבֹ֨ר יְהוָ֥ה׀ עַל־פָּנָיו֮ וַיִּקְרָא֒ יְהוָ֣ה׀ יְהוָ֔ה אֵ֥ל רַח֖וּם וְחַנּ֑וּן אֶ֥רֶךְ אַפַּ֖יִם וְרַב־חֶ֥סֶד וֶאֱמֶֽת׃

‎7 ‏נֹצֵ֥ר חֶ֙סֶד֙ לָאֲלָפִ֔ים נֹשֵׂ֥א עָוֹ֛ן וָפֶ֖שַׁע וְחַטָּאָ֑ה וְנַקֵּה֙ לֹ֣א יְנַקֶּ֔ה פֹּקֵ֣ד׀ עֲוֹ֣ן אָב֗וֹת עַל־בָּנִים֙ וְעַל־בְּנֵ֣י בָנִ֔ים עַל־שִׁלֵּשִׁ֖ים וְעַל־רִבֵּעִֽים׃

‎8 ‏וַיְמַהֵ֖ר מֹשֶׁ֑ה וַיִּקֹּ֥ד אַ֖רְצָה וַיִּשְׁתָּֽחוּ׃

‎9 ‏וַיֹּ֡אמֶר אִם־נָא֩ מָצָ֨אתִי חֵ֤ן בְּעֵינֶ֙יךָ֙ אֲדֹנָ֔י יֵֽלֶךְ־נָ֥א אֲדֹנָ֖י בְּקִרְבֵּ֑נוּ כִּ֤י עַם־קְשֵׁה־עֹ֙רֶף֙ ה֔וּא וְסָלַחְתָּ֛ לַעֲוֹנֵ֥נוּ וּלְחַטָּאתֵ֖נוּ וּנְחַלְתָּֽנוּ׃

‎10 ‏וַיֹּ֗אמֶר הִנֵּ֣ה אָנֹכִי֮ כֹּרֵ֣ת בְּרִית֒ נֶ֤גֶד כָּֽל־עַמְּךָ֙ אֶעֱשֶׂ֣ה נִפְלָאֹ֔ת אֲשֶׁ֛ר לֹֽא־נִבְרְא֥וּ בְכָל־הָאָ֖רֶץ וּבְכָל־הַגּוֹיִ֑ם וְרָאָ֣ה כָל־הָ֠עָם אֲשֶׁר־אַתָּ֨ה בְקִרְבּ֜וֹ אֶת־מַעֲשֵׂ֤ה יְהוָה֙ כִּֽי־נוֹרָ֣א ה֔וּא אֲשֶׁ֥ר אֲנִ֖י עֹשֶׂ֥ה עִמָּֽךְ׃

‎11 ‏שְׁמָ֨ר־לְךָ֔ אֵ֛ת אֲשֶׁ֥ר אָנֹכִ֖י מְצַוְּךָ֣ הַיּ֑וֹם הִנְנִ֧י גֹרֵ֣שׁ מִפָּנֶ֗יךָ אֶת־הָאֱמֹרִי֙ וְהַֽכְּנַעֲנִ֔י וְהַחִתִּי֙ וְהַפְּרִזִּ֔י וְהַחִוִּ֖י וְהַיְבוּסִֽי׃

‎12 ‏הִשָּׁ֣מֶר לְךָ֗ פֶּן־תִּכְרֹ֤ת בְּרִית֙ לְיוֹשֵׁ֣ב הָאָ֔רֶץ אֲשֶׁ֥ר אַתָּ֖ה בָּ֣א עָלֶ֑יהָ פֶּן־יִהְיֶ֥ה לְמוֹקֵ֖שׁ בְּקִרְבֶּֽךָ׃

‎13 ‏כִּ֤י אֶת־מִזְבְּחֹתָם֙ תִּתֹּצ֔וּן וְאֶת־מַצֵּבֹתָ֖ם תְּשַׁבֵּר֑וּן וְאֶת־אֲשֵׁרָ֖יו תִּכְרֹתֽוּן׃

‎14 ‏כִּ֛י לֹ֥א תִֽשְׁתַּחֲוֶ֖ה לְאֵ֣ל אַחֵ֑ר כִּ֤י יְהוָה֙ קַנָּ֣א שְׁמ֔וֹ אֵ֥ל קַנָּ֖א הֽוּא׃

‎15 ‏פֶּן־תִּכְרֹ֥ת בְּרִ֖ית לְיוֹשֵׁ֣ב הָאָ֑רֶץ וְזָנ֣וּ׀ אַחֲרֵ֣י אֱלֹֽהֵיהֶ֗ם וְזָבְחוּ֙ לֵאלֹ֣הֵיהֶ֔ם וְקָרָ֣א לְךָ֔ וְאָכַלְתָּ֖ מִזִּבְחֽוֹ׃

‎16 ‏וְלָקַחְתָּ֥ מִבְּנֹתָ֖יו לְבָנֶ֑יךָ וְזָנ֣וּ בְנֹתָ֗יו אַחֲרֵי֙ אֱלֹ֣הֵיהֶ֔ן וְהִזְנוּ֙ אֶת־בָּנֶ֔יךָ אַחֲרֵ֖י אֱלֹהֵיהֶֽן׃

‎17 ‏אֱלֹהֵ֥י מַסֵּכָ֖ה לֹ֥א תַעֲשֶׂה־לָּֽךְ׃

‎18 ‏אֶת־חַ֣ג הַמַּצּוֹת֮ תִּשְׁמֹר֒ שִׁבְעַ֨ת יָמִ֜ים תֹּאכַ֤ל מַצּוֹת֙ אֲשֶׁ֣ר צִוִּיתִ֔ךָ לְמוֹעֵ֖ד חֹ֣דֶשׁ הָאָבִ֑יב כִּ֚י בְּחֹ֣דֶשׁ הָֽאָבִ֔יב יָצָ֖אתָ מִמִּצְרָֽיִם׃

‎19 ‏כָּל־פֶּ֥טֶר רֶ֖חֶם לִ֑י וְכָֽל־מִקְנְךָ֙ תִּזָּכָ֔ר פֶּ֖טֶר שׁ֥וֹר וָשֶֽׂה׃

‎20 ‏וּפֶ֤טֶר חֲמוֹר֙ תִּפְדֶּ֣ה בְשֶׂ֔ה וְאִם־לֹ֥א תִפְדֶּ֖ה וַעֲרַפְתּ֑וֹ כֹּ֣ל בְּכ֤וֹר בָּנֶ֙יךָ֙ תִּפְדֶּ֔ה וְלֹֽא־יֵרָא֥וּ פָנַ֖י רֵיקָֽם׃

‎21 ‏שֵׁ֤שֶׁת יָמִים֙ תַּעֲבֹ֔ד וּבַיּ֥וֹם הַשְּׁבִיעִ֖י תִּשְׁבֹּ֑ת בֶּחָרִ֥ישׁ וּבַקָּצִ֖יר תִּשְׁבֹּֽת׃

‎22 ‏וְחַ֤ג שָׁבֻעֹת֙ תַּעֲשֶׂ֣ה לְךָ֔ בִּכּוּרֵ֖י קְצִ֣יר חִטִּ֑ים וְחַג֙ הָֽאָסִ֔יף תְּקוּפַ֖ת הַשָּׁנָֽה׃

‎23 ‏שָׁלֹ֥שׁ פְּעָמִ֖ים בַּשָּׁנָ֑ה יֵרָאֶה֙ כָּל־זְכ֣וּרְךָ֔ אֶת־פְּנֵ֛י הָֽאָדֹ֥ן׀ יְהוָ֖ה אֱלֹהֵ֥י יִשְׂרָאֵֽל׃

‎24 ‏כִּֽי־אוֹרִ֤ישׁ גּוֹיִם֙ מִפָּנֶ֔יךָ וְהִרְחַבְתִּ֖י אֶת־גְּבוּלֶ֑ךָ וְלֹא־יַחְמֹ֥ד אִישׁ֙ אֶֽת־אַרְצְךָ֔ בַּעֲלֹֽתְךָ֗ לֵרָאוֹת֙ אֶת־פְּנֵי֙ יְהוָ֣ה אֱלֹהֶ֔יךָ שָׁלֹ֥שׁ פְּעָמִ֖ים בַּשָּׁנָֽה׃

‎25 ‏לֹֽא־תִשְׁחַ֥ט עַל־חָמֵ֖ץ דַּם־זִבְחִ֑י וְלֹא־יָלִ֣ין לַבֹּ֔קֶר זֶ֖בַח חַ֥ג הַפָּֽסַח׃

‎26 ‏רֵאשִׁ֗ית בִּכּוּרֵי֙ אַדְמָ֣תְךָ֔ תָּבִ֕יא בֵּ֖ית יְהוָ֣ה אֱלֹהֶ֑יךָ לֹא־תְבַשֵּׁ֥ל גְּדִ֖י בַּחֲלֵ֥ב אִמּֽוֹ׃ פ

‎27 ‏וַיֹּ֤אמֶר יְהוָה֙ אֶל־מֹשֶׁ֔ה כְּתָב־לְךָ֖ אֶת־הַדְּבָרִ֣ים הָאֵ֑לֶּה כִּ֞י עַל־פִּ֣י׀ הַדְּבָרִ֣ים הָאֵ֗לֶּה כָּרַ֧תִּי אִתְּךָ֛ בְּרִ֖ית וְאֶת־יִשְׂרָאֵֽל׃

‎28 ‏וַֽיְהִי־שָׁ֣ם עִם־יְהוָ֗ה אַרְבָּעִ֥ים יוֹם֙ וְאַרְבָּעִ֣ים לַ֔יְלָה לֶ֚חֶם לֹ֣א אָכַ֔ל וּמַ֖יִם לֹ֣א שָׁתָ֑ה וַיִּכְתֹּ֣ב עַל־הַלֻּחֹ֗ת אֵ֚ת דִּבְרֵ֣י הַבְּרִ֔ית עֲשֶׂ֖רֶת הַדְּבָרִֽים׃

‎29 ‏וַיְהִ֗י בְּרֶ֤דֶת מֹשֶׁה֙ מֵהַ֣ר סִינַ֔י וּשְׁנֵ֨י לֻחֹ֤ת הָֽעֵדֻת֙ בְּיַד־מֹשֶׁ֔ה בְּרִדְתּ֖וֹ מִן־הָהָ֑ר וּמֹשֶׁ֣ה לֹֽא־יָדַ֗ע כִּ֥י קָרַ֛ן ע֥וֹר פָּנָ֖יו בְּדַבְּר֥וֹ אִתּֽוֹ׃

‎30 ‏וַיַּ֨רְא אַהֲרֹ֜ן וְכָל־בְּנֵ֤י יִשְׂרָאֵל֙ אֶת־מֹשֶׁ֔ה וְהִנֵּ֥ה קָרַ֖ן ע֣וֹר פָּנָ֑יו וַיִּֽירְא֖וּ מִגֶּ֥שֶׁת אֵלָֽיו׃

‎31 ‏וַיִּקְרָ֤א אֲלֵהֶם֙ מֹשֶׁ֔ה וַיָּשֻׁ֧בוּ אֵלָ֛יו אַהֲרֹ֥ן וְכָל־הַנְּשִׂאִ֖ים בָּעֵדָ֑ה וַיְדַבֵּ֥ר מֹשֶׁ֖ה אֲלֵהֶֽם׃

‎32 ‏וְאַחֲרֵי־כֵ֥ן נִגְּשׁ֖וּ כָּל־בְּנֵ֣י יִשְׂרָאֵ֑ל וַיְצַוֵּ֕ם אֵת֩ כָּל־אֲשֶׁ֨ר דִּבֶּ֧ר יְהוָ֛ה אִתּ֖וֹ בְּהַ֥ר סִינָֽי׃

‎33 ‏וַיְכַ֣ל מֹשֶׁ֔ה מִדַּבֵּ֖ר אִתָּ֑ם וַיִּתֵּ֥ן עַל־פָּנָ֖יו מַסְוֶֽה׃

‎34 ‏וּבְבֹ֨א מֹשֶׁ֜ה לִפְנֵ֤י יְהוָה֙ לְדַבֵּ֣ר אִתּ֔וֹ יָסִ֥יר אֶת־הַמַּסְוֶ֖ה עַד־צֵאת֑וֹ וְיָצָ֗א וְדִבֶּר֙ אֶל־בְּנֵ֣י יִשְׂרָאֵ֔ל אֵ֖ת אֲשֶׁ֥ר יְצֻוֶּֽה׃

‎35 ‏וְרָא֤וּ בְנֵֽי־יִשְׂרָאֵל֙ אֶת־פְּנֵ֣י מֹשֶׁ֔ה כִּ֣י קָרַ֔ן ע֖וֹר פְּנֵ֣י מֹשֶׁ֑ה וְהֵשִׁ֨יב מֹשֶׁ֤ה אֶת־הַמַּסְוֶה֙ עַל־פָּנָ֔יו עַד־בֹּא֖וֹ לְדַבֵּ֥ר אִתּֽוֹ׃ ס

1 wayyō’mer yəhwâ ’el-mōšeh pəsāl-ləḵā šənê-luḥōṯ ’ăḇānîm kāri’šōnîm wəḵāṯaḇətî ‘al-halluḥōṯ ’eṯ-hadəḇārîm ’ăšer hāyû ‘al-halluḥōṯ hāri’šōnîm ’ăšer šibarətā:

2 wehəyēh nāḵwōn labōqer wə‘ālîṯā ḇabōqer ’el-har sînay wəniṣṣaḇətā lî šām ‘al-rō’š hâār:

3 wə’îš lō’-y^a‘ăleh ‘immāḵə wəḡam-’îš ’al-yērā’ bəḵāl-hâār gam-haṣṣō’n wəhabāqār ’al-yirə‘û ’el-mûl hâār hahû’:

4 wayyifəsōl šənê-luḥōṯ ’ăḇānîm kāri’šōnîm wayyašəkēm mōšeh ḇabōqer wayy^a‘al ’el-har sînay ka’ăšer ṣiûâ yəhwâ ’ōṯwō wayyiqq^aḥ bəyāḏwō šənê luḥōṯ ’ăḇānîm:

5 wayyēreḏ yəhwâ be‘ānān wayyiṯəyaṣṣēḇ ‘immwō šām wayyiqərā’ ḇəšēm yəhwâ:

6 wayy^a‘ăḇōr yəhwâ| ‘al-pānāyw wayyiqərā’ yəhwâ| yəhwâ ’ēl r^aḥûm wəḥannûn ’ereḵə ’apayim wəraḇ-ḥeseḏ we’ĕmeṯ:

7 nōṣēr ḥeseḏ lā’ălāfîm nōśē’ ‘āwōn wāfeš^a‘ wəḥaṭṭā’â wənaqqēh lō’ yənaqqeh pōqēḏ| ‘ăwōn ’āḇwōṯ ‘al-bānîm wə‘al-bənê ḇānîm ‘al-šillēšîm wə‘al-ribē‘îm:

8 wayəmahēr mōšeh wayyiqqōḏ ’arəṣâ wayyišətāḥû:

9 wayyō’mer ’im-nā’ māṣā’ṯî ḥēn bə‘êneyḵā ’ăḏōnāy yēleḵə-nā’ ’ăḏōnāy bəqirəbēnû kî ‘am-qəšēh-‘ōref hû’ wəsāl^aḥətā l^a‘ăwōnēnû ûləḥaṭṭā’ṯēnû ûnəḥalətānû:

10 wayyō’mer hinnēh ’ānōḵî kōrēṯ bərîṯ neḡeḏ kāl-‘amməḵā ’e‘ĕśeh nifəlā’ōṯ ’ăšer lō’-niḇərə’û ḇəḵāl-hā’āreṣ ûḇəḵāl-hagwōyim wərā’â ḵāl-hā‘ām ’ăšer-’atâ ḇəqirəbwō ’eṯ-m^a‘ăśēh yəhwâ kî-nwōrā’ hû’ ’ăšer ’ănî ‘ōśeh ‘immāḵə:

11 šəmār-ləḵā ’ēṯ ’ăšer ’ānōḵî məṣaûəḵā hayywōm hinənî ḡōrēš mipāneyḵā ’eṯ-hā’ĕmōrî wəhakən^a‘ănî wəh^aḥitî wəhapərizzî wəh^aḥiûî wəhayəḇûsî:

12 hiššāmer ləḵā pen-tiḵərōṯ bərîṯ ləywōšēḇ hā’āreṣ ’ăšer ’atâ bā’ ‘āleyhā pen-yihəyeh ləmwōqēš bəqirəbeḵā:

13 kî ’eṯ-mizəbəḥōṯām titōṣûn wə’eṯ-maṣṣēḇōṯām təšabērûn wə’eṯ-’ăšērāyw tiḵərōṯûn:

14 kî lō’ ṯišət^aḥăweh lə’ēl ’^aḥēr kî yəhwâ qannā’ šəmwō ’ēl qannā’ hû’:

15 pen-tiḵərōṯ bərîṯ ləywōšēḇ hā’āreṣ wəzānû| ’^aḥărê ’ĕlōhêhem wəzāḇəḥû lē’lōhêhem wəqārā’ ləḵā wə’āḵalətā mizziḇəḥwō:

16 wəlāq^aḥətā mibənōṯāyw ləḇāneyḵā wəzānû ḇənōṯāyw ’^aḥărê ’ĕlōhêhen wəhizənû ’eṯ-bāneyḵā ’^aḥărê ’ĕlōhêhen:

17 ’ĕlōhê massēḵâ lō’ ṯ^a‘ăśeh-llāḵə:

18 ’eṯ-ḥaḡ hammaṣṣwōṯ tišəmōr šiḇə‘aṯ yāmîm tō’ḵal maṣṣwōṯ ’ăšer ṣiûîṯiḵā ləmwō‘ēḏ ḥōḏeš hā’āḇîḇ kî bəḥōḏeš hā’āḇîḇ yāṣā’ṯā mimmiṣərāyim:

19 kāl-peṭer reḥem lî wəḵāl-miqənəḵā tizzāḵār peṭer šwōr wāśeh:

20 ûfeṭer ḥămwōr tifədeh ḇəśeh wə’im-lō’ ṯifədeh w^a‘ărafətwō kōl bəḵwōr bāneyḵā tifədeh wəlō’-yērā’û fānay rêqām:

21 šēšeṯ yāmîm t^a‘ăḇōḏ ûḇayywōm haššəḇî‘î tišəbōṯ beḥārîš ûḇaqqāṣîr tišəbōṯ:

22 wəḥaḡ šāḇu‘ōṯ t^a‘ăśeh ləḵā bikûrê qəṣîr ḥiṭṭîm wəḥaḡ hā’āsîf təqûfaṯ haššānâ:

23 šālōš pə‘āmîm baššānâ yērā’eh kāl-zəḵûrəḵā ’eṯ-pənê hā’āḏōn| yəhwâ ’ĕlōhê yiśərā’ēl:

24 kî-’wōrîš gwōyim mipāneyḵā wəhirəḥaḇətî ’eṯ-gəḇûleḵā wəlō’-y^aḥəmōḏ ’îš ’eṯ-’arəṣəḵā b^a‘ălōṯəḵā lērā’wōṯ ’eṯ-pənê yəhwâ ’ĕlōheyḵā šālōš pə‘āmîm baššānâ:

25 lō’-ṯišəḥaṭ ‘al-ḥāmēṣ dam-ziḇəḥî wəlō’-yālîn labōqer zeḇ^aḥ ḥaḡ hapās^aḥ:

26 rē’šîṯ bikûrê ’aḏəmāṯəḵā tāḇî’ bêṯ yəhwâ ’ĕlōheyḵā lō’-ṯəḇaššēl gəḏî b^aḥălēḇ ’immwō: f

27 wayyō’mer yəhwâ ’el-mōšeh kəṯāḇ-ləḵā ’eṯ-hadəḇārîm hā’ēlleh kî ‘al-pî| hadəḇārîm hā’ēlleh kāratî ’itəḵā bərîṯ wə’eṯ-yiśərā’ēl:

28 wayəhî-šām ‘im-yəhwâ ’arəbā‘îm ywōm wə’arəbā‘îm layəlâ leḥem lō’ ’āḵal ûmayim lō’ šāṯâ wayyiḵətōḇ ‘al-halluḥōṯ ’ēṯ diḇərê habərîṯ ‘ăśereṯ hadəḇārîm:

29 wayəhî bəreḏeṯ mōšeh mēhar sînay ûšənê luḥōṯ hā‘ēḏuṯ bəyaḏ-mōšeh bəriḏətwō min-hâār ûmōšeh lō’-yāḏ^a‘ kî qāran ‘wōr pānāyw bəḏabərwō ’itwō:

30 wayyarə’ ’ahărōn wəḵāl-bənê yiśərā’ēl ’eṯ-mōšeh wəhinnēh qāran ‘wōr pānāyw wayyîrə’û migešeṯ ’ēlāyw:

31 wayyiqərā’ ’ălēhem mōšeh wayyāšuḇû ’ēlāyw ’ahărōn wəḵāl-hannəśi’îm bā‘ēḏâ wayəḏabēr mōšeh ’ălēhem:

32 wə’^aḥărê-ḵēn nigəšû kāl-bənê yiśərā’ēl wayəṣaûēm ’ēṯ kāl-’ăšer diber yəhwâ ’itwō bəhar sînāy:

33 wayəḵal mōšeh midabēr ’itām wayyitēn ‘al-pānāyw masəweh:

34 ûḇəḇō’ mōšeh lifənê yəhwâ ləḏabēr ’itwō yāsîr ’eṯ-hammasəweh ‘aḏ-ṣē’ṯwō wəyāṣā’ wəḏiber ’el-bənê yiśərā’ēl ’ēṯ ’ăšer yəṣuûeh:

35 wərā’û ḇənê-yiśərā’ēl ’eṯ-pənê mōšeh kî qāran ‘wōr pənê mōšeh wəhēšîḇ mōšeh ’eṯ-hammasəweh ‘al-pānāyw ‘aḏ-bō’wō ləḏabēr ’itwō: s