Ezekiel (Yechezqel) Chapter 2

‎1 ‏וַיֹּ֖אמֶר אֵלָ֑י בֶּן־אָדָם֙ עֲמֹ֣ד עַל־רַגְלֶ֔יךָ וַאֲדַבֵּ֖ר אֹתָֽךְ׃

‎2 ‏וַתָּ֧בֹא בִ֣י ר֗וּחַ כַּֽאֲשֶׁר֙ דִּבֶּ֣ר אֵלַ֔י וַתַּעֲמִדֵ֖נִי עַל־רַגְלָ֑י וָאֶשְׁמַ֕ע אֵ֖ת מִדַּבֵּ֥ר אֵלָֽי׃ פ

‎3 ‏וַיֹּ֣אמֶר אֵלַ֗י בֶּן־אָדָם֙ שׁוֹלֵ֨חַ אֲנִ֤י אֽוֹתְךָ֙ אֶל־בְּנֵ֣י יִשְׂרָאֵ֔ל אֶל־גּוֹיִ֥ם הַמּוֹרְדִ֖ים אֲשֶׁ֣ר מָרְדוּ־בִ֑י הֵ֤מָּה וַאֲבוֹתָם֙ פָּ֣שְׁעוּ בִ֔י עַד־עֶ֖צֶם הַיּ֥וֹם הַזֶּֽה׃

‎4 ‏וְהַבָּנִ֗ים קְשֵׁ֤י פָנִים֙ וְחִזְקֵי־לֵ֔ב אֲנִ֛י שׁוֹלֵ֥חַ אוֹתְךָ֖ אֲלֵיהֶ֑ם וְאָמַרְתָּ֣ אֲלֵיהֶ֔ם כֹּ֥ה אָמַ֖ר אֲדֹנָ֥י יְהוִֹֽה׃

‎5 ‏וְהֵ֙מָּה֙ אִם־יִשְׁמְע֣וּ וְאִם־יֶחְדָּ֔לוּ כִּ֛י בֵּ֥ית מְרִ֖י הֵ֑מָּה וְיָ֣דְע֔וּ כִּ֥י נָבִ֖יא הָיָ֥ה בְתוֹכָֽם׃ פ

‎6 ‏וְאַתָּ֣ה בֶן־אָ֠דָם אַל־תִּירָ֨א מֵהֶ֜ם וּמִדִּבְרֵיהֶ֣ם אַל־תִּירָ֗א כִּ֣י סָרָבִ֤ים וְסַלּוֹנִים֙ אוֹתָ֔ךְ וְאֶל־עַקְרַבִּ֖ים אַתָּ֣ה יוֹשֵׁ֑ב מִדִּבְרֵיהֶ֤ם אַל־תִּירָא֙ וּמִפְּנֵיהֶ֣ם אַל־תֵּחָ֔ת כִּ֛י בֵּ֥ית מְרִ֖י הֵֽמָּה׃

‎7 ‏וְדִבַּרְתָּ֤ אֶת־דְּבָרַי֙ אֲלֵיהֶ֔ם אִֽם־יִשְׁמְע֖וּ וְאִם־יֶחְדָּ֑לוּ כִּ֥י מְרִ֖י הֵֽמָּה׃ פ

‎8 ‏וְאַתָּ֣ה בֶן־אָדָ֗ם שְׁמַע֙ אֵ֤ת אֲשֶׁר־אֲנִי֙ מְדַבֵּ֣ר אֵלֶ֔יךָ אַל־תְּהִי־מֶ֖רִי כְּבֵ֣ית הַמֶּ֑רִי פְּצֵ֣ה פִ֔יךָ וֶאֱכֹ֕ל אֵ֥ת אֲשֶׁר־אֲנִ֖י נֹתֵ֥ן אֵלֶֽיךָ׃

‎9 ‏וָאֶרְאֶ֕ה וְהִנֵּה־יָ֖ד שְׁלוּחָ֣ה אֵלָ֑י וְהִנֵּה־ב֖וֹ מְגִלַּת־סֵֽפֶר׃

‎10 ‏וַיִּפְרֹ֤שׂ אוֹתָהּ֙ לְפָנַ֔י וְהִ֥יא כְתוּבָ֖ה פָּנִ֣ים וְאָח֑וֹר וְכָת֣וּב אֵלֶ֔יהָ קִנִ֥ים וָהֶ֖גֶה וָהִֽי׃ ס

1 wayyō’mer ’ēlāy ben-’āḏām ‘ămōḏ ‘al-raḡəleyḵā wa’ăḏabēr ’ōṯāḵə:

2 watāḇō’ ḇî rûḥa ka’ăšer diber ’ēlay wat^a‘ămiḏēnî ‘al-raḡəlāy wā’ešəm^a‘ ’ēṯ midabēr ’ēlāy: f

3 wayyō’mer ’ēlay ben-’āḏām šwōlēḥa ’ănî ’wōṯəḵā ’el-bənê yiśərā’ēl ’el-gwōyim hammwōrəḏîm ’ăšer mārəḏû-ḇî hēmmâ wa’ăḇwōṯām pāšə‘û ḇî ‘aḏ-‘eṣem hayywōm hazzeh:

4 wəhabānîm qəšê fānîm wəḥizəqê-lēḇ ’ănî šwōlēḥa ’wōṯəḵā ’ălêhem wə’āmarətā ’ălêhem kōh ’āmar ’ăḏōnāy yəhwōih:

5 wəhēmmâ ’im-yišəmə‘û wə’im-yeḥədālû kî bêṯ mərî hēmmâ wəyāḏə‘û kî nāḇî’ hāyâ ḇəṯwōḵām: f

6 wə’atâ ḇen-’āḏām ’al-tîrā’ mēhem ûmidiḇərêhem ’al-tîrā’ kî sārāḇîm wəsallwōnîm ’wōṯāḵə wə’el-‘aqərabîm ’atâ ywōšēḇ midiḇərêhem ’al-tîrā’ ûmipənêhem ’al-tēḥāṯ kî bêṯ mərî hēmmâ:

7 wəḏibarətā ’eṯ-dəḇāray ’ălêhem ’im-yišəmə‘û wə’im-yeḥədālû kî mərî hēmmâ: f

8 wə’atâ ḇen-’āḏām šəm^a‘ ’ēṯ ’ăšer-’ănî məḏabēr ’ēleyḵā ’al-təhî-merî kəḇêṯ hammerî pəṣēh fîḵā we’ĕḵōl ’ēṯ ’ăšer-’ănî nōṯēn ’ēleyḵā:

9 wā’erə’eh wəhinnēh-yāḏ šəlûḥâ ’ēlāy wəhinnēh-ḇwō məḡillaṯ-sēfer:

10 wayyifərōś ’wōṯāh ləfānay wəhî’ ḵəṯûḇâ pānîm wə’āḥwōr wəḵāṯûḇ ’ēleyhā qinîm wâeḡeh wâî: s