Ezekiel (Yechezqel) Chapter 17

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֕ם ח֥וּד חִידָ֖ה וּמְשֹׁ֣ל מָשָׁ֑ל אֶל־בֵּ֖ית יִשְׂרָאֵֽל׃

‎3 ‏וְאָמַרְתָּ֞ כֹּה־אָמַ֣ר׀ אֲדֹנָ֣י יְהוִ֗ה הַנֶּ֤שֶׁר הַגָּדוֹל֙ גְּד֤וֹל הַכְּנָפַ֙יִם֙ אֶ֣רֶךְ הָאֵ֔בֶר מָלֵא֙ הַנּוֹצָ֔ה אֲשֶׁר־ל֖וֹ הָֽרִקְמָ֑ה בָּ֚א אֶל־הַלְּבָנ֔וֹן וַיִּקַּ֖ח אֶת־צַמֶּ֥רֶת הָאָֽרֶז׃

‎4 ‏אֵ֛ת רֹ֥אשׁ יְנִֽיקוֹתָ֖יו קָטָ֑ף וַיְבִיאֵ֙הוּ֙ אֶל־אֶ֣רֶץ כְּנַ֔עַן בְּעִ֥יר רֹכְלִ֖ים שָׂמֽוֹ׃

‎5 ‏וַיִּקַּח֙ מִזֶּ֣רַע הָאָ֔רֶץ וַֽיִּתְּנֵ֖הוּ בִּשְׂדֵה־זָ֑רַע קָ֚ח עַל־מַ֣יִם רַבִּ֔ים צַפְצָפָ֖ה שָׂמֽוֹ׃

‎6 ‏וַיִּצְמַ֡ח וַיְהִי֩ לְגֶ֨פֶן סֹרַ֜חַת שִׁפְלַ֣ת קוֹמָ֗ה לִפְנ֤וֹת דָּלִיּוֹתָיו֙ אֵלָ֔יו וְשָׁרָשָׁ֖יו תַּחְתָּ֣יו יִֽהְי֑וּ וַתְּהִ֣י לְגֶ֔פֶן וַתַּ֣עַשׂ בַּדִּ֔ים וַתְּשַׁלַּ֖ח פֹּארֽוֹת׃

‎7 ‏וַיְהִ֤י נֶֽשֶׁר־אֶחָד֙ גָּד֔וֹל גְּד֥וֹל כְּנָפַ֖יִם וְרַב־נוֹצָ֑ה וְהִנֵּה֩ הַגֶּ֨פֶן הַזֹּ֜את כָּֽפְנָ֧ה שָׁרֳשֶׁ֣יהָ עָלָ֗יו וְדָֽלִיּוֹתָיו֙ שִׁלְחָה־לּ֔וֹ לְהַשְׁק֣וֹת אוֹתָ֔הּ מֵעֲרֻג֖וֹת מַטָּעָֽהּ׃

‎8 ‏אֶל־שָׂ֥דֶה טּ֛וֹב אֶל־מַ֥יִם רַבִּ֖ים הִ֣יא שְׁתוּלָ֑ה לַעֲשׂ֤וֹת עָנָף֙ וְלָשֵׂ֣את פֶּ֔רִי לִהְי֖וֹת לְגֶ֥פֶן אַדָּֽרֶת׃ ס

‎9 ‏אֱמֹ֗ר כֹּ֥ה אָמַ֛ר אֲדֹנָ֥י יְהוִֹ֖ה תִּצְלָ֑ח הֲלוֹא֩ אֶת־שָׁרָשֶׁ֨יהָ יְנַתֵּ֜ק וְאֶת־פִּרְיָ֣הּ׀ יְקוֹסֵ֣ס וְיָבֵ֗שׁ כָּל־טַרְפֵּ֤י צִמְחָהּ֙ תִּיבָ֔שׁ וְלֹֽא־בִזְרֹ֤עַ גְּדוֹלָה֙ וּבְעַם־רָ֔ב לְמַשְׂא֥וֹת אוֹתָ֖הּ מִשָּׁרָשֶֽׁיהָ׃

‎10 ‏וְהִנֵּ֥ה שְׁתוּלָ֖ה הֲתִצְלָ֑ח הֲלוֹא֩ כְגַ֨עַת בָּ֜הּ ר֤וּחַ הַקָּדִים֙ תִּיבַ֣שׁ יָבֹ֔שׁ עַל־עֲרֻגֹ֥ת צִמְחָ֖הּ תִּיבָֽשׁ׃ פ

‎11 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎12 ‏אֱמָר־נָא֙ לְבֵ֣ית הַמֶּ֔רִי הֲלֹ֥א יְדַעְתֶּ֖ם מָה־אֵ֑לֶּה אֱמֹ֗ר הִנֵּה־בָ֨א מֶֽלֶךְ־בָּבֶ֤ל יְרוּשָׁלִַ֙ם֙ וַיִּקַּ֤ח אֶת־מַלְכָּהּ֙ וְאֶת־שָׂרֶ֔יהָ וַיָּבֵ֥א אוֹתָ֛ם אֵלָ֖יו בָּבֶֽלָה׃

‎13 ‏וַיִּקַּח֙ מִזֶּ֣רַע הַמְּלוּכָ֔ה וַיִּכְרֹ֥ת אִתּ֖וֹ בְּרִ֑ית וַיָּבֵ֤א אֹתוֹ֙ בְּאָלָ֔ה וְאֶת־אֵילֵ֥י הָאָ֖רֶץ לָקָֽח׃

‎14 ‏לִֽהְיוֹת֙ מַמְלָכָ֣ה שְׁפָלָ֔ה לְבִלְתִּ֖י הִתְנַשֵּׂ֑א לִשְׁמֹ֥ר אֶת־בְּרִית֖וֹ לְעָמְדָֽהּ׃

‎15 ‏וַיִּמְרָד־בּ֗וֹ לִשְׁלֹ֤חַ מַלְאָכָיו֙ מִצְרַ֔יִם לָֽתֶת־ל֥וֹ סוּסִ֖ים וְעַם־רָ֑ב הֲיִצְלָ֤ח הֲיִמָּלֵט֙ הָעֹשֵׂ֣ה אֵ֔לֶּה וְהֵפֵ֥ר בְּרִ֖ית וְנִמְלָֽט׃

‎16 ‏חַי־אָ֗נִי נְאֻם֮ אֲדֹנָ֣י יְהוִה֒ אִם־לֹ֗א בִּמְקוֹם֙ הַמֶּ֙לֶךְ֙ הַמַּמְלִ֣יךְ אֹת֔וֹ אֲשֶׁ֤ר בָּזָה֙ אֶת־אָ֣לָת֔וֹ וַאֲשֶׁ֥ר הֵפֵ֖ר אֶת־בְּרִית֑וֹ אִתּ֥וֹ בְתוֹךְ־בָּבֶ֖ל יָמֽוּת׃

‎17 ‏וְלֹא֩ בְחַ֨יִל גָּד֜וֹל וּבְקָהָ֣ל רָ֗ב יַעֲשֶׂ֨ה אוֹת֤וֹ פַרְעֹה֙ בַּמִּלְחָמָ֔ה בִּשְׁפֹּ֥ךְ סֹלְלָ֖ה וּבִבְנ֣וֹת דָּיֵ֑ק לְהַכְרִ֖ית נְפָשׁ֥וֹת רַבּֽוֹת׃

‎18 ‏וּבָזָ֥ה אָלָ֖ה לְהָפֵ֣ר בְּרִ֑ית וְהִנֵּ֨ה נָתַ֥ן יָד֛וֹ וְכָל־אֵ֥לֶּה עָשָׂ֖ה לֹ֥א יִמָּלֵֽט׃ ס

‎19 ‏לָכֵ֞ן כֹּה־אָמַ֨ר אֲדֹנָ֣י יְהוִה֮ חַי־אָנִי֒ אִם־לֹ֗א אָֽלָתִי֙ אֲשֶׁ֣ר בָּזָ֔ה וּבְרִיתִ֖י אֲשֶׁ֣ר הֵפִ֑יר וּנְתַתִּ֖יו בְּרֹאשֽׁוֹ׃

‎20 ‏וּפָרַשְׂתִּ֤י עָלָיו֙ רִשְׁתִּ֔י וְנִתְפַּ֖שׂ בִּמְצֽוּדָתִ֑י וַהֲבִיאוֹתִ֣יהוּ בָבֶ֗לָה וְנִשְׁפַּטְתִּ֤י אִתּוֹ֙ שָׁ֔ם מַעֲל֖וֹ אֲשֶׁ֥ר מָֽעַל־בִּֽי׃

‎21 ‏וְאֵ֨ת כָּל־מברחו מִבְרָחָ֤יו בְּכָל־אֲגַפָּיו֙ בַּחֶ֣רֶב יִפֹּ֔לוּ וְהַנִּשְׁאָרִ֖ים לְכָל־ר֣וּחַ יִפָּרֵ֑שׂוּ וִידַעְתֶּ֕ם כִּ֛י אֲנִ֥י יְהוָ֖ה דִּבַּֽרְתִּי׃ ס

‎22 ‏כֹּ֤ה אָמַר֙ אֲדֹנָ֣י יְהוִ֔ה וְלָקַ֣חְתִּי אָ֗נִי מִצַּמֶּ֧רֶת הָאֶ֛רֶז הָרָמָ֖ה וְנָתָ֑תִּי מֵרֹ֤אשׁ יֹֽנְקוֹתָיו֙ רַ֣ךְ אֶקְטֹ֔ף וְשָׁתַ֣לְתִּי אָ֔נִי עַ֥ל הַר־גָּבֹ֖הַ וְתָלֽוּל׃

‎23 ‏בְּהַ֨ר מְר֤וֹם יִשְׂרָאֵל֙ אֶשְׁתֳּלֶ֔נּוּ וְנָשָׂ֤א עָנָף֙ וְעָ֣שָׂה פֶ֔רִי וְהָיָ֖ה לְאֶ֣רֶז אַדִּ֑יר וְשָׁכְנ֣וּ תַחְתָּ֗יו כֹּ֚ל צִפּ֣וֹר כָּל־כָּנָ֔ף בְּצֵ֥ל דָּלִיּוֹתָ֖יו תִּשְׁכֹּֽנָּה׃

‎24 ‏וְֽיָדְע֞וּ כָּל־עֲצֵ֣י הַשָּׂדֶ֗ה כִּ֣י אֲנִ֤י יְהוָה֙ הִשְׁפַּ֣לְתִּי׀ עֵ֣ץ גָּבֹ֗הַ הִגְבַּ֙הְתִּי֙ עֵ֣ץ שָׁפָ֔ל הוֹבַ֙שְׁתִּי֙ עֵ֣ץ לָ֔ח וְהִפְרַ֖חְתִּי עֵ֣ץ יָבֵ֑שׁ אֲנִ֥י יְהוָ֖ה דִּבַּ֥רְתִּי וְעָשִֽׂיתִי׃ פ

1 wayəhî ḏəḇar-yəhwâ ’ēlay lē’mōr:

2 ben-’āḏām ḥûḏ ḥîḏâ ûməšōl māšāl ’el-bêṯ yiśərā’ēl:

3 wə’āmarətā kōh-’āmar| ’ăḏōnāy yəhwih hannešer hagāḏwōl gəḏwōl hakənāfayim ’ereḵə hā’ēḇer mālē’ hannwōṣâ ’ăšer-lwō hāriqəmâ bā’ ’el-halləḇānwōn wayyiqq^aḥ ’eṯ-ṣammereṯ hā’ārez:

4 ’ēṯ rō’š yənîqwōṯāyw qāṭāf wayəḇî’ēhû ’el-’ereṣ kən^a‘an bə‘îr rōḵəlîm śāmwō:

5 wayyiqq^aḥ mizzer^a‘ hā’āreṣ wayyitənēhû biśəḏēh-zār^a‘ qāḥ ‘al-mayim rabîm ṣafəṣāfâ śāmwō:

6 wayyiṣəm^aḥ wayəhî ləḡefen sōr^aḥaṯ šifəlaṯ qwōmâ lifənwōṯ dālîywōṯāyw ’ēlāyw wəšārāšāyw t^aḥətāyw yihəyû watəhî ləḡefen wat^a‘aś badîm watəšall^aḥ pō’rwōṯ:

7 wayəhî nešer-’eḥāḏ gāḏwōl gəḏwōl kənāfayim wəraḇ-nwōṣâ wəhinnēh hagefen hazzō’ṯ kāfənâ šārŏšeyhā ‘ālāyw wəḏālîywōṯāyw šiləḥâ-llwō ləhašəqwōṯ ’wōṯāh mē‘ăruḡwōṯ maṭṭā‘āh:

8 ’el-śāḏeh ṭṭwōḇ ’el-mayim rabîm hî’ šəṯûlâ l^a‘ăśwōṯ ‘ānāf wəlāśē’ṯ perî lihəywōṯ ləḡefen ’adāreṯ: s

9 ’ĕmōr kōh ’āmar ’ăḏōnāy yəhwōih tiṣəlāḥ hălwō’ ’eṯ-šārāšeyhā yənatēq wə’eṯ-pirəyāh| yəqwōsēs wəyāḇēš kāl-ṭarəpê ṣiməḥāh tîḇāš wəlō’-ḇizərō‘a gəḏwōlâ ûḇə‘am-rāḇ ləmaśə’wōṯ ’wōṯāh miššārāšeyhā:

10 wəhinnēh šəṯûlâ hăṯiṣəlāḥ hălwō’ ḵəḡ^a‘aṯ bāh rûḥa haqqāḏîm tîḇaš yāḇōš ‘al-‘ăruḡōṯ ṣiməḥāh tîḇāš: f

11 wayəhî ḏəḇar-yəhwâ ’ēlay lē’mōr:

12 ’ĕmār-nā’ ləḇêṯ hammerî hălō’ yəḏ^a‘ətem mâ-’ēlleh ’ĕmōr hinnēh-ḇā’ meleḵə-bāḇel yərûšālaim wayyiqq^aḥ ’eṯ-maləkāh wə’eṯ-śāreyhā wayyāḇē’ ’wōṯām ’ēlāyw bāḇelâ:

13 wayyiqq^aḥ mizzer^a‘ hamməlûḵâ wayyiḵərōṯ ’itwō bərîṯ wayyāḇē’ ’ōṯwō bə’ālâ wə’eṯ-’êlê hā’āreṣ lāqāḥ:

14 lihəywōṯ maməlāḵâ šəfālâ ləḇilətî hiṯənaśśē’ lišəmōr ’eṯ-bərîṯwō lə‘āməḏāh:

15 wayyimərāḏ-bwō lišəlōḥa malə’āḵāyw miṣərayim lāṯeṯ-lwō sûsîm wə‘am-rāḇ hăyiṣəlāḥ hăyimmālēṭ hā‘ōśēh ’ēlleh wəhēfēr bərîṯ wəniməlāṭ:

16 ḥay-’ānî nə’um ’ăḏōnāy yəhwih ’im-lō’ biməqwōm hammeleḵə hammaməlîḵə ’ōṯwō ’ăšer bāzâ ’eṯ-’ālāṯwō wa’ăšer hēfēr ’eṯ-bərîṯwō ’itwō ḇəṯwōḵə-bāḇel yāmûṯ:

17 wəlō’ ḇəḥayil gāḏwōl ûḇəqâāl rāḇ y^a‘ăśeh ’wōṯwō farə‘ōh bammiləḥāmâ bišəpōḵə sōləlâ ûḇiḇənwōṯ dāyēq ləhaḵərîṯ nəfāšwōṯ rabwōṯ:

18 ûḇāzâ ’ālâ ləhāfēr bərîṯ wəhinnēh nāṯan yāḏwō wəḵāl-’ēlleh ‘āśâ lō’ yimmālēṭ: s

19 lāḵēn kōh-’āmar ’ăḏōnāy yəhwih ḥay-’ānî ’im-lō’ ’ālāṯî ’ăšer bāzâ ûḇərîṯî ’ăšer hēfîr ûnəṯatîw bərō’šwō:

20 ûfāraśətî ‘ālāyw rišətî wəniṯəpaś biməṣûḏāṯî wahăḇî’wōṯîhû ḇāḇelâ wənišəpaṭətî ’itwō šām m^a‘ălwō ’ăšer mā‘al-bî:

21 wə’ēṯ kāl-miḇərāḥwō miḇərāḥāyw bəḵāl-’ăḡapāyw b^aḥereḇ yipōlû wəhannišə’ārîm ləḵāl-rûḥa yipārēśû wîḏ^a‘ətem kî ’ănî yəhwâ dibarətî: s

22 kōh ’āmar ’ăḏōnāy yəhwih wəlāq^aḥətî ’ānî miṣṣammereṯ hā’erez hārāmâ wənāṯātî mērō’š yōnəqwōṯāyw raḵə ’eqəṭōf wəšāṯalətî ’ānî ‘al har-gāḇōha wəṯālûl:

23 bəhar mərwōm yiśərā’ēl ’ešətŏlennû wənāśā’ ‘ānāf wə‘āśâ ferî wəhāyâ lə’erez ’adîr wəšāḵənû ṯ^aḥətāyw kōl ṣipwōr kāl-kānāf bəṣēl dālîywōṯāyw tišəkōnnâ:

24 wəyāḏə‘û kāl-‘ăṣê haśśāḏeh kî ’ănî yəhwâ hišəpalətî| ‘ēṣ gāḇōha hiḡəbahətî ‘ēṣ šāfāl hwōḇašətî ‘ēṣ lāḥ wəhifər^aḥətî ‘ēṣ yāḇēš ’ănî yəhwâ dibarətî wə‘āśîṯî: f