Ezekiel (Yechezqel) Chapter 33

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֗ם דַּבֵּ֤ר אֶל־בְּנֵֽי־עַמְּךָ֙ וְאָמַרְתָּ֣ אֲלֵיהֶ֔ם אֶ֕רֶץ כִּֽי־אָבִ֥יא עָלֶ֖יהָ חָ֑רֶב וְלָקְח֨וּ עַם־הָאָ֜רֶץ אִ֤ישׁ אֶחָד֙ מִקְצֵיהֶ֔ם וְנָתְנ֥וּ אֹת֛וֹ לָהֶ֖ם לְצֹפֶֽה׃

‎3 ‏וְרָאָ֥ה אֶת־הַחֶ֖רֶב בָּאָ֣ה עַל־הָאָ֑רֶץ וְתָקַ֥ע בַּשּׁוֹפָ֖ר וְהִזְהִ֥יר אֶת־הָעָֽם׃

‎4 ‏וְשָׁמַ֨ע הַשֹּׁמֵ֜עַ אֶת־ק֤וֹל הַשּׁוֹפָר֙ וְלֹ֣א נִזְהָ֔ר וַתָּ֥בוֹא חֶ֖רֶב וַתִּקָּחֵ֑הוּ דָּמ֥וֹ בְרֹאשׁ֖וֹ יִֽהְיֶֽה׃

‎5 ‏אֵת֩ ק֨וֹל הַשּׁוֹפָ֤ר שָׁמַע֙ וְלֹ֣א נִזְהָ֔ר דָּמ֖וֹ בּ֣וֹ יִֽהְיֶ֑ה וְה֥וּא נִזְהָ֖ר נַפְשׁ֥וֹ מִלֵּֽט׃

‎6 ‏וְ֠הַצֹּפֶה כִּֽי־יִרְאֶ֨ה אֶת־הַחֶ֜רֶב בָּאָ֗ה וְלֹֽא־תָקַ֤ע בַּשּׁוֹפָר֙ וְהָעָ֣ם לֹֽא־נִזְהָ֔ר וַתָּב֣וֹא חֶ֔רֶב וַתִּקַּ֥ח מֵהֶ֖ם נָ֑פֶשׁ ה֚וּא בַּעֲוֹנ֣וֹ נִלְקָ֔ח וְדָמ֖וֹ מִיַּֽד־הַצֹּפֶ֥ה אֶדְרֹֽשׁ׃ ס

‎7 ‏וְאַתָּ֣ה בֶן־אָדָ֔ם צֹפֶ֥ה נְתַתִּ֖יךָ לְבֵ֣ית יִשְׂרָאֵ֑ל וְשָׁמַעְתָּ֤ מִפִּי֙ דָּבָ֔ר וְהִזְהַרְתָּ֥ אֹתָ֖ם מִמֶּֽנִּי׃

‎8 ‏בְּאָמְרִ֣י לָרָשָׁ֗ע רָשָׁע֙ מ֣וֹת תָּמ֔וּת וְלֹ֣א דִבַּ֔רְתָּ לְהַזְהִ֥יר רָשָׁ֖ע מִדַּרְכּ֑וֹ ה֤וּא רָשָׁע֙ בַּעֲוֹנ֣וֹ יָמ֔וּת וְדָמ֖וֹ מִיָּדְךָ֥ אֲבַקֵּֽשׁ׃

‎9 ‏וְ֠אַתָּה כִּֽי־הִזְהַ֨רְתָּ רָשָׁ֤ע מִדַּרְכּוֹ֙ לָשׁ֣וּב מִמֶּ֔נָּה וְלֹא־שָׁ֖ב מִדַּרְכּ֑וֹ ה֚וּא בַּעֲוֹנ֣וֹ יָמ֔וּת וְאַתָּ֖ה נַפְשְׁךָ֥ הִצַּֽלְתָּ׃ ס

‎10 ‏וְאַתָּ֣ה בֶן־אָדָ֗ם אֱמֹר֙ אֶל־בֵּ֣ית יִשְׂרָאֵ֔ל כֵּ֤ן אֲמַרְתֶּם֙ לֵאמֹ֔ר כִּֽי־פְשָׁעֵ֥ינוּ וְחַטֹּאתֵ֖ינוּ עָלֵ֑ינוּ וּבָ֛ם אֲנַ֥חְנוּ נְמַקִּ֖ים וְאֵ֥יךְ נִֽחְיֶֽה׃

‎11 ‏אֱמֹ֨ר אֲלֵיהֶ֜ם חַי־אָ֣נִי׀ נְאֻ֣ם׀ אֲדֹנָ֣י יְהוִ֗ה אִם־אֶחְפֹּץ֙ בְּמ֣וֹת הָרָשָׁ֔ע כִּ֣י אִם־בְּשׁ֥וּב רָשָׁ֛ע מִדַּרְכּ֖וֹ וְחָיָ֑ה שׁ֣וּבוּ שׁ֜וּבוּ מִדַּרְכֵיכֶ֧ם הָרָעִ֛ים וְלָ֥מָּה תָמ֖וּתוּ בֵּ֥ית יִשְׂרָאֵֽל׃ פ

‎12 ‏וְאַתָּ֣ה בֶן־אָדָ֗ם אֱמֹ֤ר אֶל־בְּנֵֽי־עַמְּךָ֙ צִדְקַ֣ת הַצַּדִּ֗יק לֹ֤א תַצִּילֶ֙נּוּ֙ בְּי֣וֹם פִּשְׁע֔וֹ וְרִשְׁעַ֤ת הָֽרָשָׁע֙ לֹֽא־יִכָּ֣שֶׁל בָּ֔הּ בְּי֖וֹם שׁוּב֣וֹ מֵֽרִשְׁע֑וֹ וְצַדִּ֗יק לֹ֥א יוּכַ֛ל לִֽחְי֥וֹת בָּ֖הּ בְּי֥וֹם חֲטֹאתֽוֹ׃

‎13 ‏בְּאָמְרִ֤י לַצַּדִּיק֙ חָיֹ֣ה יִֽחְיֶ֔ה וְהֽוּא־בָטַ֥ח עַל־צִדְקָת֖וֹ וְעָ֣שָׂה עָ֑וֶל כָּל־צדקתו צִדְקֹתָיו֙ לֹ֣א תִזָּכַ֔רְנָה וּבְעַוְל֥וֹ אֲשֶׁר־עָשָׂ֖ה בּ֥וֹ יָמֽוּת׃

‎14 ‏וּבְאָמְרִ֥י לָֽרָשָׁ֖ע מ֣וֹת תָּמ֑וּת וְשָׁב֙ מֵֽחַטָּאת֔וֹ וְעָשָׂ֥ה מִשְׁפָּ֖ט וּצְדָקָֽה׃

‎15 ‏חֲבֹ֨ל יָשִׁ֤יב רָשָׁע֙ גְּזֵלָ֣ה יְשַׁלֵּ֔ם בְּחֻקּ֤וֹת הַֽחַיִּים֙ הָלַ֔ךְ לְבִלְתִּ֖י עֲשׂ֣וֹת עָ֑וֶל חָי֥וֹ יִֽחְיֶ֖ה לֹ֥א יָמֽוּת׃

‎16 ‏כָּל־חטאתו חַטֹּאתָיו֙ אֲשֶׁ֣ר חָטָ֔א לֹ֥א תִזָּכַ֖רְנָה ל֑וֹ מִשְׁפָּ֧ט וּצְדָקָ֛ה עָשָׂ֖ה חָי֥וֹ יִֽחְיֶֽה׃

‎17 ‏וְאָמְרוּ֙ בְּנֵ֣י עַמְּךָ֔ לֹ֥א יִתָּכֵ֖ן דֶּ֣רֶךְ אֲדֹנָ֑י וְהֵ֖מָּה דַּרְכָּ֥ם לֹֽא־יִתָּכֵֽן׃

‎18 ‏בְּשׁוּב־צַדִּ֥יק מִצִּדְקָת֖וֹ וְעָ֣שָׂה עָ֑וֶל וּמֵ֖ת בָּהֶֽם׃

‎19 ‏וּבְשׁ֤וּב רָשָׁע֙ מֵֽרִשְׁעָת֔וֹ וְעָשָׂ֥ה מִשְׁפָּ֖ט וּצְדָקָ֑ה עֲלֵיהֶ֖ם ה֥וּא יִֽחְיֶֽה׃

‎20 ‏וַאֲמַרְתֶּ֕ם לֹ֥א יִתָּכֵ֖ן דֶּ֣רֶךְ אֲדֹנָ֑י אִ֧ישׁ כִּדְרָכָ֛יו אֶשְׁפּ֥וֹט אֶתְכֶ֖ם בֵּ֥ית יִשְׂרָאֵֽל׃ פ

‎21 ‏וַיְהִ֞י בִּשְׁתֵּ֧י עֶשְׂרֵ֣ה שָׁנָ֗ה בָּעֲשִׂרִ֛י בַּחֲמִשָּׁ֥ה לַחֹ֖דֶשׁ לְגָלוּתֵ֑נוּ בָּא־אֵלַ֨י הַפָּלִ֧יט מִירוּשָׁלִַ֛ם לֵאמֹ֖ר הֻכְּתָ֥ה הָעִֽיר׃

‎22 ‏וְיַד־יְהוָה֩ הָיְתָ֨ה אֵלַ֜י בָּעֶ֗רֶב לִפְנֵי֙ בּ֣וֹא הַפָּלִ֔יט וַיִּפְתַּ֣ח אֶת־פִּ֔י עַד־בּ֥וֹא אֵלַ֖י בַּבֹּ֑קֶר וַיִּפָּ֣תַח פִּ֔י וְלֹ֥א נֶאֱלַ֖מְתִּי עֽוֹד׃ פ

‎23 ‏וַיְהִ֥י דְבַר־יְהוָ֖ה³ אֵלַ֥י לֵאמֹֽר׃

‎24 ‏בֶּן־אָדָ֗ם יֹ֠שְׁבֵי הֶחֳרָב֨וֹת הָאֵ֜לֶּה עַל־אַדְמַ֤ת יִשְׂרָאֵל֙ אֹמְרִ֣ים לֵאמֹ֔ר אֶחָד֙ הָיָ֣ה אַבְרָהָ֔ם וַיִּירַ֖שׁ אֶת־הָאָ֑רֶץ וַאֲנַ֣חְנוּ רַבִּ֔ים לָ֛נוּ נִתְּנָ֥ה הָאָ֖רֶץ לְמוֹרָשָֽׁה׃ ס

‎25 ‏לָכֵן֩ אֱמֹ֨ר אֲלֵיהֶ֜ם כֹּֽה־אָמַ֣ר׀ אֲדֹנָ֣י יְהוִֹ֗ה עַל־הַדָּ֧ם׀ תֹּאכֵ֛לוּ וְעֵינֵכֶ֛ם תִּשְׂא֥וּ אֶל־גִּלּוּלֵיכֶ֖ם וְדָ֣ם תִּשְׁפֹּ֑כוּ וְהָאָ֖רֶץ תִּירָֽשׁוּ׃

‎26 ‏עֲמַדְתֶּ֤ם עַֽל־חַרְבְּכֶם֙ עֲשִׂיתֶ֣ן תּוֹעֵבָ֔ה וְאִ֛ישׁ אֶת־אֵ֥שֶׁת רֵעֵ֖הוּ טִמֵּאתֶ֑ם וְהָאָ֖רֶץ תִּירָֽשׁוּ׃ ס

‎27 ‏כֹּֽה־תֹאמַ֨ר אֲלֵהֶ֜ם כֹּה־אָמַ֨ר אֲדֹנָ֣י יְהוִה֮ חַי־אָנִי֒ אִם־לֹ֞א אֲשֶׁ֤ר בֶּֽחֳרָבוֹת֙ בַּחֶ֣רֶב יִפֹּ֔לוּ וַֽאֲשֶׁר֙ עַל־פְּנֵ֣י הַשָּׂדֶ֔ה לַחַיָּ֥ה נְתַתִּ֖יו לְאָכְל֑וֹ וַאֲשֶׁ֛ר בַּמְּצָד֥וֹת וּבַמְּעָר֖וֹת בַּדֶּ֥בֶר יָמֽוּתוּ׃

‎28 ‏וְנָתַתִּ֤י אֶת־הָאָ֙רֶץ֙ שְׁמָמָ֣ה וּמְשַׁמָּ֔ה וְנִשְׁבַּ֖ת גְּא֣וֹן עֻזָּ֑הּ וְשָֽׁמְמ֛וּ הָרֵ֥י יִשְׂרָאֵ֖ל מֵאֵ֥ין עוֹבֵֽר׃

‎29 ‏וְיָדְע֖וּ כִּֽי־אֲנִ֣י יְהוָ֑ה בְּתִתִּ֤י אֶת־הָאָ֙רֶץ֙ שְׁמָמָ֣ה וּמְשַׁמָּ֔ה עַ֥ל כָּל־תּוֹעֲבֹתָ֖ם אֲשֶׁ֥ר עָשֽׂוּ׃ ס

‎30 ‏וְאַתָּ֣ה בֶן־אָדָ֔ם בְּנֵ֣י עַמְּךָ֗ הַנִּדְבָּרִ֤ים בְּךָ֙ אֵ֣צֶל הַקִּיר֔וֹת וּבְפִתְחֵ֖י הַבָּתִּ֑ים וְדִבֶּר־חַ֣ד אֶת־אַחַ֗ד אִ֤ישׁ אֶת־אָחִיו֙ לֵאמֹ֔ר בֹּֽאוּ־נָ֣א וְשִׁמְע֔וּ מָ֣ה הַדָּבָ֔ר הַיּוֹצֵ֖א מֵאֵ֥ת יְהוָֽה׃

‎31 ‏וְיָב֣וֹאוּ אֵ֠לֶיךָ כִּמְבוֹא־עָ֞ם וְיֵשְׁב֤וּ לְפָנֶ֙יךָ֙ עַמִּ֔י וְשָֽׁמְעוּ֙ אֶת־דְּבָרֶ֔יךָ וְאוֹתָ֖ם לֹ֣א יַֽעֲשׂ֑וּ כִּֽי־עֲגָבִ֤ים בְּפִיהֶם֙ הֵ֣מָּה עֹשִׂ֔ים אַחֲרֵ֥י בִצְעָ֖ם לִבָּ֥ם הֹלֵֽךְ׃

‎32 ‏וְהִנְּךָ֤ לָהֶם֙ כְּשִׁ֣יר עֲגָבִ֔ים יְפֵ֥ה ק֖וֹל וּמֵטִ֣ב נַגֵּ֑ן וְשָֽׁמְעוּ֙ אֶת־דְּבָרֶ֔יךָ וְעֹשִׂ֥ים אֵינָ֖ם אוֹתָֽם׃

‎33 ‏וּבְבֹאָ֑הּ הִנֵּ֣ה בָאָ֔ה וְיָ֣דְע֔וּ כִּ֥י נָבִ֖יא הָיָ֥ה בְתוֹכָֽם׃ ס

1 wayəhî ḏəḇar-yəhwâ ’ēlay lē’mōr:

2 ben-’āḏām dabēr ’el-bənê-‘amməḵā wə’āmarətā ’ălêhem ’ereṣ kî-’āḇî’ ‘āleyhā ḥāreḇ wəlāqəḥû ‘am-hā’āreṣ ’îš ’eḥāḏ miqəṣêhem wənāṯənû ’ōṯwō lâem ləṣōfeh:

3 wərā’â ’eṯ-h^aḥereḇ bā’â ‘al-hā’āreṣ wəṯāq^a‘ baššwōfār wəhizəhîr ’eṯ-hā‘ām:

4 wəšām^a‘ haššōmē‘a ’eṯ-qwōl haššwōfār wəlō’ nizəhār watāḇwō’ ḥereḇ watiqqāḥēhû dāmwō ḇərō’šwō yihəyeh:

5 ’ēṯ qwōl haššwōfār šām^a‘ wəlō’ nizəhār dāmwō bwō yihəyeh wəhû’ nizəhār nafəšwō millēṭ:

6 wəhaṣṣōfeh kî-yirə’eh ’eṯ-h^aḥereḇ bā’â wəlō’-ṯāq^a‘ baššwōfār wəhā‘ām lō’-nizəhār watāḇwō’ ḥereḇ watiqq^aḥ mēhem nāfeš hû’ b^a‘ăwōnwō niləqāḥ wəḏāmwō mîyaḏ-haṣṣōfeh ’eḏərōš: s

7 wə’atâ ḇen-’āḏām ṣōfeh nəṯatîḵā ləḇêṯ yiśərā’ēl wəšām^a‘ətā mipî dāḇār wəhizəharətā ’ōṯām mimmennî:

8 bə’āmərî lārāšā‘ rāšā‘ mwōṯ tāmûṯ wəlō’ ḏibarətā ləhazəhîr rāšā‘ midarəkwō hû’ rāšā‘ b^a‘ăwōnwō yāmûṯ wəḏāmwō mîyāḏəḵā ’ăḇaqqēš:

9 wə’atâ kî-hizəharətā rāšā‘ midarəkwō lāšûḇ mimmennâ wəlō’-šāḇ midarəkwō hû’ b^a‘ăwōnwō yāmûṯ wə’atâ nafəšəḵā hiṣṣalətā: s

10 wə’atâ ḇen-’āḏām ’ĕmōr ’el-bêṯ yiśərā’ēl kēn ’ămarətem lē’mōr kî-fəšā‘ênû wəḥaṭṭō’ṯênû ‘ālênû ûḇām ’ăn^aḥənû nəmaqqîm wə’êḵə niḥəyeh:

11 ’ĕmōr ’ălêhem ḥay-’ānî| nə’um| ’ăḏōnāy yəhwih ’im-’eḥəpōṣ bəmwōṯ hārāšā‘ kî ’im-bəšûḇ rāšā‘ midarəkwō wəḥāyâ šûḇû šûḇû midarəḵêḵem hārā‘îm wəlāmmâ ṯāmûṯû bêṯ yiśərā’ēl: f

12 wə’atâ ḇen-’āḏām ’ĕmōr ’el-bənê-‘amməḵā ṣiḏəqaṯ haṣṣadîq lō’ ṯaṣṣîlennû bəywōm pišə‘wō wərišə‘aṯ hārāšā‘ lō’-yikāšel bāh bəywōm šûḇwō mērišə‘wō wəṣadîq lō’ yûḵal liḥəywōṯ bāh bəywōm ḥăṭō’ṯwō:

13 bə’āmərî laṣṣadîq ḥāyōh yiḥəyeh wəhû’-ḇāṭ^aḥ ‘al-ṣiḏəqāṯwō wə‘āśâ ‘āwel kāl-ṣiḏəqāṯwō ṣiḏəqōṯāyw lō’ ṯizzāḵarənâ ûḇə‘awəlwō ’ăšer-‘āśâ bwō yāmûṯ:

14 ûḇə’āmərî lārāšā‘ mwōṯ tāmûṯ wəšāḇ mēḥaṭṭā’ṯwō wə‘āśâ mišəpāṭ ûṣəḏāqâ:

15 ḥăḇōl yāšîḇ rāšā‘ gəzēlâ yəšallēm bəḥuqqwōṯ h^aḥayyîm hālaḵə ləḇilətî ‘ăśwōṯ ‘āwel ḥāywō yiḥəyeh lō’ yāmûṯ:

16 kāl-ḥaṭṭō’ṯāw ḥaṭṭō’ṯāyw ’ăšer ḥāṭā’ lō’ ṯizzāḵarənâ lwō mišəpāṭ ûṣəḏāqâ ‘āśâ ḥāywō yiḥəyeh:

17 wə’āmərû bənê ‘amməḵā lō’ yitāḵēn dereḵə ’ăḏōnāy wəhēmmâ darəkām lō’-yitāḵēn:

18 bəšûḇ-ṣadîq miṣṣiḏəqāṯwō wə‘āśâ ‘āwel ûmēṯ bâem:

19 ûḇəšûḇ rāšā‘ mērišə‘āṯwō wə‘āśâ mišəpāṭ ûṣəḏāqâ ‘ălêhem hû’ yiḥəyeh:

20 wa’ămarətem lō’ yitāḵēn dereḵə ’ăḏōnāy ’îš kiḏərāḵāyw ’ešəpwōṭ ’eṯəḵem bêṯ yiśərā’ēl: f

21 wayəhî bišətê ‘eśərēh šānâ bā‘ăśirî b^aḥămiššâ l^aḥōḏeš ləḡālûṯēnû bā’-’ēlay hapālîṭ mîrûšālaim lē’mōr hukəṯâ hā‘îr:

22 wəyaḏ-yəhwâ hāyəṯâ ’ēlay bā‘ereḇ lifənê bwō’ hapālîṭ wayyifət^aḥ ’eṯ-pî ‘aḏ-bwō’ ’ēlay babōqer wayyipāṯ^aḥ pî wəlō’ ne’ĕlamətî ‘wōḏ: f

23 wayəhî ḏəḇar-yəhwâ³ ’ēlay lē’mōr:

24 ben-’āḏām yōšəḇê heḥŏrāḇwōṯ hā’ēlleh ‘al-’aḏəmaṯ yiśərā’ēl ’ōmərîm lē’mōr ’eḥāḏ hāyâ ’aḇərâām wayyîraš ’eṯ-hā’āreṣ wa’ăn^aḥənû rabîm lānû nitənâ hā’āreṣ ləmwōrāšâ: s

25 lāḵēn ’ĕmōr ’ălêhem kōh-’āmar| ’ăḏōnāy yəhwōih ‘al-hadām| tō’ḵēlû wə‘ênēḵem tiśə’û ’el-gillûlêḵem wəḏām tišəpōḵû wəhā’āreṣ tîrāšû:

26 ‘ămaḏətem ‘al-ḥarəbəḵem ‘ăśîṯen twō‘ēḇâ wə’îš ’eṯ-’ēšeṯ rē‘ēhû ṭimmē’ṯem wəhā’āreṣ tîrāšû: s

27 kōh-ṯō’mar ’ălēhem kōh-’āmar ’ăḏōnāy yəhwih ḥay-’ānî ’im-lō’ ’ăšer beḥŏrāḇwōṯ b^aḥereḇ yipōlû wa’ăšer ‘al-pənê haśśāḏeh l^aḥayyâ nəṯatîw lə’āḵəlwō wa’ăšer bamməṣāḏwōṯ ûḇammə‘ārwōṯ badeḇer yāmûṯû:

28 wənāṯatî ’eṯ-hā’āreṣ šəmāmâ ûməšammâ wənišəbaṯ gə’wōn ‘uzzāh wəšāməmû hārê yiśərā’ēl mē’ên ‘wōḇēr:

29 wəyāḏə‘û kî-’ănî yəhwâ bəṯitî ’eṯ-hā’āreṣ šəmāmâ ûməšammâ ‘al kāl-twō‘ăḇōṯām ’ăšer ‘āśû: s

30 wə’atâ ḇen-’āḏām bənê ‘amməḵā hanniḏəbārîm bəḵā ’ēṣel haqqîrwōṯ ûḇəfiṯəḥê habātîm wəḏiber-ḥaḏ ’eṯ-’^aḥaḏ ’îš ’eṯ-’āḥîw lē’mōr bō’û-nā’ wəšimə‘û mâ hadāḇār hayywōṣē’ mē’ēṯ yəhwâ:

31 wəyāḇwō’û ’ēleyḵā kiməḇwō’-‘ām wəyēšəḇû ləfāneyḵā ‘ammî wəšāmə‘û ’eṯ-dəḇāreyḵā wə’wōṯām lō’ y^a‘ăśû kî-‘ăḡāḇîm bəfîhem hēmmâ ‘ōśîm ’^aḥărê ḇiṣə‘ām libām hōlēḵə:

32 wəhinnəḵā lâem kəšîr ‘ăḡāḇîm yəfēh qwōl ûmēṭiḇ nagēn wəšāmə‘û ’eṯ-dəḇāreyḵā wə‘ōśîm ’ênām ’wōṯām:

33 ûḇəḇō’āh hinnēh ḇā’â wəyāḏə‘û kî nāḇî’ hāyâ ḇəṯwōḵām: s