Ezra Chapter 5

‎1 ‏וְהִתְנַבִּ֞י חַגַּ֣י נביאה נְבִיָּ֗א וּזְכַרְיָ֤ה בַר־עִדּוֹא֙ נביאיא נְבִיַּיָּ֔א עַל־יְה֣וּדָיֵ֔א דִּ֥י בִיה֖וּד וּבִירוּשְׁלֶ֑ם בְּשֻׁ֛ם אֱלָ֥הּ יִשְׂרָאֵ֖ל עֲלֵיהֽוֹן׃ ס

‎2 ‏בֵּאדַ֡יִן קָ֠מוּ זְרֻבָּבֶ֤ל בַּר־שְׁאַלְתִּיאֵל֙ וְיֵשׁ֣וּעַ בַּר־יֽוֹצָדָ֔ק וְשָׁרִ֣יו לְמִבְנֵ֔א בֵּ֥ית אֱלָהָ֖א דִּ֣י בִירֽוּשְׁלֶ֑ם וְעִמְּה֛וֹן נביאיא נְבִיַּיָּ֥א דִֽי־אֱלָהָ֖א מְסָעֲדִ֥ין לְהֽוֹן׃³ פ

‎3 ‏בֵּהּ־זִמְנָא֩ אֲתָ֨א עֲלֵיה֜וֹן תַּ֠תְּנַי פַּחַ֧ת עֲבַֽר־נַהֲרָ֛ה וּשְׁתַ֥ר בּוֹזְנַ֖י וּכְנָוָתְה֑וֹן וְכֵן֙ אָמְרִ֣ין לְהֹ֔ם מַן־שָׂ֨ם לְכֹ֜ם טְעֵ֗ם בַּיְתָ֤א דְנָה֙ לִבְּנֵ֔א וְאֻשַּׁרְנָ֥א דְנָ֖ה לְשַׁכְלָלָֽה׃ ס

‎4 ‏אֱדַ֥יִן כְּנֵ֖מָא אֲמַ֣רְנָא לְּהֹ֑ם מַן־אִנּוּן֙ שְׁמָהָ֣ת גֻּבְרַיָּ֔א דִּֽי־דְנָ֥ה בִנְיָנָ֖א בָּנַֽיִן׃

‎5 ‏וְעֵ֣ין אֱלָהֲהֹ֗ם הֲוָת֙ עַל־שָׂבֵ֣י יְהוּדָיֵ֔א וְלָא־בַטִּ֣לוּ הִמּ֔וֹ עַד־טַעְמָ֖א לְדָרְיָ֣וֶשׁ יְהָ֑ךְ וֶאֱדַ֛יִן יְתִיב֥וּן נִשְׁתְּוָנָ֖א עַל־דְּנָֽה׃ פ

‎6 ‏פַּרְשֶׁ֣גֶן אִ֠גַּרְתָּא דִּֽי־שְׁלַ֞ח תַּתְּנַ֣י׀ פַּחַ֣ת עֲבַֽר־נַהֲרָ֗ה וּשְׁתַ֤ר בּוֹזְנַי֙ וּכְנָ֣וָתֵ֔הּ אֲפַ֨רְסְכָיֵ֔א דִּ֖י בַּעֲבַ֣ר נַהֲרָ֑ה עַל־דָּרְיָ֖וֶשׁ מַלְכָּֽא׃

‎7 ‏פִּתְגָמָ֖א שְׁלַ֣חוּ עֲל֑וֹהִי וְכִדְנָה֙ כְּתִ֣יב בְּגַוֵּ֔הּ לְדָרְיָ֥וֶשׁ מַלְכָּ֖א שְׁלָמָ֥א כֹֽלָּא׃ ס

‎8 ‏יְדִ֣יעַ׀ לֶהֱוֵ֣א לְמַלְכָּ֗א דִּֽי־אֲזַ֜לְנָא לִיה֤וּד מְדִֽינְתָּא֙ לְבֵית֙ אֱלָהָ֣א רַבָּ֔א וְה֤וּא מִתְבְּנֵא֙ אֶ֣בֶן גְּלָ֔ל וְאָ֖ע מִתְּשָׂ֣ם בְּכֻתְלַיָּ֑א וַעֲבִ֥ידְתָּא דָ֛ךְ אָסְפַּ֥רְנָא מִתְעַבְדָ֖א וּמַצְלַ֥ח בְּיֶדְהֹֽם׃ ס

‎9 ‏אֱדַ֗יִן שְׁאֵ֙לְנָא֙ לְשָׂבַיָּ֣א אִלֵּ֔ךְ כְּנֵ֖מָא אֲמַ֣רְנָא לְּהֹ֑ם³ מַן־שָׂ֨ם לְכֹ֜ם טְעֵ֗ם בַּיְתָ֤א דְנָה֙ לְמִבְנְיָ֔ה וְאֻשַּׁרְנָ֥א דְנָ֖ה לְשַׁכְלָלָֽה׃

‎10 ‏וְאַ֧ף שְׁמָהָתְהֹ֛ם שְׁאֵ֥לְנָא לְּהֹ֖ם³ לְהוֹדָעוּתָ֑ךְ דִּ֛י נִכְתֻּ֥ב שֻׁם־גֻּבְרַיָּ֖א דִּ֥י בְרָאשֵׁיהֹֽם׃ ס

‎11 ‏וּכְנֵ֥מָא פִתְגָמָ֖א הֲתִיב֣וּנָא לְמֵמַ֑ר אֲנַ֣חְנָא הִמּ֡וֹ עַבְדוֹהִי֩ דִֽי־אֱלָ֨הּ שְׁמַיָּ֜א וְאַרְעָ֗א וּבָנַ֤יִן בַּיְתָא֙ דִּֽי־הֲוָ֨א בְנֵ֜ה מִקַּדְמַ֤ת דְּנָה֙ שְׁנִ֣ין שַׂגִּיאָ֔ן וּמֶ֤לֶךְ לְיִשְׂרָאֵל֙ רַ֔ב בְּנָ֖הִי וְשַׁכְלְלֵֽהּ׃

‎12 ‏לָהֵ֗ן מִן־דִּ֨י הַרְגִּ֤זוּ אֲבָהֳתַ֙נָא֙ לֶאֱלָ֣הּ שְׁמַיָּ֔א יְהַ֣ב הִמּ֔וֹ בְּיַ֛ד נְבוּכַדְנֶצַּ֥ר מֶֽלֶךְ־בָּבֶ֖ל כסדיא כַּסְדָּאָ֑ה וּבַיְתָ֤ה דְנָה֙ סַתְרֵ֔הּ וְעַמָּ֖ה הַגְלִ֥י לְבָבֶֽל׃ ס

‎13 ‏בְּרַם֙ בִּשְׁנַ֣ת חֲדָ֔ה לְכ֥וֹרֶשׁ מַלְכָּ֖א דִּ֣י בָבֶ֑ל כּ֤וֹרֶשׁ מַלְכָּא֙ שָׂ֣ם טְעֵ֔ם בֵּית־אֱלָהָ֥א דְנָ֖ה לִבְּנֵֽא׃

‎14 ‏וְ֠אַף מָאנַיָּ֣א דִֽי־בֵית־אֱלָהָא֮ דִּ֣י דַהֲבָ֣ה וְכַסְפָּא֒ דִּ֣י נְבוּכַדְנֶצַּ֗ר הַנְפֵּק֙ מִן־הֵֽיכְלָא֙ דִּ֣י בִֽירוּשְׁלֶ֔ם וְהֵיבֵ֣ל הִמּ֔וֹ לְהֵיכְלָ֖א דִּ֣י בָבֶ֑ל הַנְפֵּ֨ק הִמּ֜וֹ כּ֣וֹרֶשׁ מַלְכָּ֗א מִן־הֵֽיכְלָא֙ דִּ֣י בָבֶ֔ל וִיהִ֙יבוּ֙ לְשֵׁשְׁבַּצַּ֣ר שְׁמֵ֔הּ דִּ֥י פֶחָ֖ה שָׂמֵֽהּ׃

‎15 ‏וַאֲמַר־לֵ֓הּ׀ אלה אֵ֚ל מָֽאנַיָּ֔א שֵׂ֚א אֵֽזֶל־אֲחֵ֣ת הִמּ֔וֹ בְּהֵיכְלָ֖א דִּ֣י בִירוּשְׁלֶ֑ם וּבֵ֥ית אֱלָהָ֖א יִתְבְּנֵ֥א עַל־אַתְרֵֽהּ׃ ס

‎16 ‏אֱדַ֙יִן֙ שֵׁשְׁבַּצַּ֣ר דֵּ֔ךְ אֲתָ֗א יְהַ֧ב אֻשַּׁיָּ֛א דִּי־בֵ֥ית אֱלָהָ֖א דִּ֣י בִירוּשְׁלֶ֑ם וּמִן־אֱדַ֧יִן וְעַד־כְּעַ֛ן מִתְבְּנֵ֖א וְלָ֥א שְׁלִֽם׃

‎17 ‏וּכְעַ֞ן הֵ֧ן עַל־מַלְכָּ֣א טָ֗ב יִ֠תְבַּקַּר³ בְּבֵ֨ית גִּנְזַיָּ֜א דִּי־מַלְכָּ֣א תַמָּה֮ דִּ֣י בְּבָבֶל֒ הֵ֣ן אִיתַ֗י דִּֽי־מִן־כּ֤וֹרֶשׁ מַלְכָּא֙ שִׂ֣ים טְעֵ֔ם לְמִבְנֵ֛א בֵּית־אֱלָהָ֥א דֵ֖ךְ בִּירוּשְׁלֶ֑ם וּרְע֥וּת מַלְכָּ֛א עַל־דְּנָ֖ה יִשְׁלַ֥ח עֲלֶֽינָא׃ ס

1 wəhiṯənabî ḥagay nəḇî’â nəḇîyā’ ûzəḵarəyâ ḇar-‘idwō’ nəḇî’ayyā’ nəḇîyayyā’ ‘al-yəhûḏāyē’ dî ḇîhûḏ ûḇîrûšəlem bəšum ’ĕlāh yiśərā’ēl ‘ălêhwōn: s

2 bē’ḏayin qāmû zərubāḇel bar-šə’alətî’ēl wəyēšû‘a bar-ywōṣāḏāq wəšārîw ləmiḇənē’ bêṯ ’ĕlâā’ dî ḇîrûšəlem wə‘imməhwōn nəḇî’ayyā’ nəḇîyayyā’ ḏî-’ĕlâā’ məsā‘ăḏîn ləhwōn:³ f

3 bēhh-zimənā’ ’ăṯā’ ‘ălêhwōn tatənay p^aḥaṯ ‘ăḇar-nahărâ ûšəṯar bwōzənay ûḵənāwāṯəhwōn wəḵēn ’āmərîn ləhōm man-śām ləḵōm ṭə‘ēm bayəṯā’ ḏənâ libənē’ wə’uššarənā’ ḏənâ ləšaḵəlālâ: s

4 ’ĕḏayin kənēmā’ ’ămarənā’ lləhōm man-’innûn šəmâāṯ guḇərayyā’ dî-ḏənâ ḇinəyānā’ bānayin:

5 wə‘ên ’ĕlâăhōm hăwāṯ ‘al-śāḇê yəhûḏāyē’ wəlā’-ḇaṭṭilû himmwō ‘aḏ-ṭ^a‘əmā’ ləḏārəyāweš yəhāḵə we’ĕḏayin yəṯîḇûn nišətəwānā’ ‘al-dənâ: f

6 parəšeḡen ’igarətā’ dî-šəl^aḥ tatənay| p^aḥaṯ ‘ăḇar-nahărâ ûšəṯar bwōzənay ûḵənāwāṯēhh ’ăfarəsəḵāyē’ dî b^a‘ăḇar nahărâ ‘al-dārəyāweš maləkā’:

7 piṯəḡāmā’ šəl^aḥû ‘ălwōhî wəḵiḏənâ kəṯîḇ bəḡaûēhh ləḏārəyāweš maləkā’ šəlāmā’ ḵōllā’: s

8 yəḏî‘a| lehĕwē’ ləmaləkā’ dî-’ăzalənā’ lîhûḏ məḏînətā’ ləḇêṯ ’ĕlâā’ rabā’ wəhû’ miṯəbənē’ ’eḇen gəlāl wə’ā‘ mitəśām bəḵuṯəlayyā’ w^a‘ăḇîḏətā’ ḏāḵə ’āsəparənā’ miṯə‘aḇəḏā’ ûmaṣəl^aḥ bəyeḏəhōm: s

9 ’ĕḏayin šə’ēlənā’ ləśāḇayyā’ ’illēḵə kənēmā’ ’ămarənā’ lləhōm³ man-śām ləḵōm ṭə‘ēm bayəṯā’ ḏənâ ləmiḇənəyâ wə’uššarənā’ ḏənâ ləšaḵəlālâ:

10 wə’af šəmâāṯəhōm šə’ēlənā’ lləhōm³ ləhwōḏā‘ûṯāḵə dî niḵətuḇ šum-guḇərayyā’ dî ḇərā’šêhōm: s

11 ûḵənēmā’ fiṯəḡāmā’ hăṯîḇûnā’ ləmēmar ’ăn^aḥənā’ himmwō ‘aḇəḏwōhî ḏî-’ĕlāh šəmayyā’ wə’arə‘ā’ ûḇānayin bayəṯā’ dî-hăwā’ ḇənēh miqqaḏəmaṯ dənâ šənîn śagî’ān ûmeleḵə ləyiśərā’ēl raḇ bənâî wəšaḵələlēhh:

12 lâēn min-dî harəgizû ’ăḇâŏṯanā’ le’ĕlāh šəmayyā’ yəhaḇ himmwō bəyaḏ nəḇûḵaḏəneṣṣar meleḵə-bāḇel kasədāyā’ kasədā’â ûḇayəṯâ ḏənâ saṯərēhh wə‘ammâ haḡəlî ləḇāḇel: s

13 bəram bišənaṯ ḥăḏâ ləḵwōreš maləkā’ dî ḇāḇel kwōreš maləkā’ śām ṭə‘ēm bêṯ-’ĕlâā’ ḏənâ libənē’:

14 wə’af mā’nayyā’ ḏî-ḇêṯ-’ĕlâā’ dî ḏahăḇâ wəḵasəpā’ dî nəḇûḵaḏəneṣṣar hanəpēq min-hêḵəlā’ dî ḇîrûšəlem wəhêḇēl himmwō ləhêḵəlā’ dî ḇāḇel hanəpēq himmwō kwōreš maləkā’ min-hêḵəlā’ dî ḇāḇel wîhîḇû ləšēšəbaṣṣar šəmēhh dî feḥâ śāmēhh:

15 wa’ămar-lēhh| ’ēlleh ’ēl mā’nayyā’ śē’ ’ēzel-’ăḥēṯ himmwō bəhêḵəlā’ dî ḇîrûšəlem ûḇêṯ ’ĕlâā’ yiṯəbənē’ ‘al-’aṯərēhh: s

16 ’ĕḏayin šēšəbaṣṣar dēḵə ’ăṯā’ yəhaḇ ’uššayyā’ dî-ḇêṯ ’ĕlâā’ dî ḇîrûšəlem ûmin-’ĕḏayin wə‘aḏ-kə‘an miṯəbənē’ wəlā’ šəlim:

17 ûḵə‘an hēn ‘al-maləkā’ ṭāḇ yiṯəbaqqar³ bəḇêṯ ginəzayyā’ dî-maləkā’ ṯammâ dî bəḇāḇel hēn ’îṯay dî-min-kwōreš maləkā’ śîm ṭə‘ēm ləmiḇənē’ bêṯ-’ĕlâā’ ḏēḵə bîrûšəlem ûrə‘ûṯ maləkā’ ‘al-dənâ yišəl^aḥ ‘ăleynā’: s