Genesis (Bereshit) Chapter 19

‎1 ‏וַ֠יָּבֹאוּ שְׁנֵ֨י הַמַּלְאָכִ֤ים סְדֹ֙מָה֙ בָּעֶ֔רֶב וְל֖וֹט יֹשֵׁ֣ב בְּשַֽׁעַר־סְדֹ֑ם וַיַּרְא־לוֹט֙ וַיָּ֣קָם לִקְרָאתָ֔ם וַיִּשְׁתַּ֥חוּ אַפַּ֖יִם אָֽרְצָה׃

‎2 ‏וַיֹּ֜אמֶר הִנֶּ֣ה נָּא־אֲדֹנַ֗י ס֣וּרוּ נָ֠א אֶל־בֵּ֨ית עַבְדְּכֶ֤ם וְלִ֙ינוּ֙ וְרַחֲצ֣וּ רַגְלֵיכֶ֔ם וְהִשְׁכַּמְתֶּ֖ם וַהֲלַכְתֶּ֣ם³ לְדַרְכְּכֶ֑ם וַיֹּאמְר֣וּ לֹּ֔א כִּ֥י בָרְח֖וֹב נָלִֽין׃

‎3 ‏וַיִּפְצַר־בָּ֣ם מְאֹ֔ד וַיָּסֻ֣רוּ אֵלָ֔יו וַיָּבֹ֖אוּ אֶל־בֵּית֑וֹ וַיַּ֤עַשׂ לָהֶם֙ מִשְׁתֶּ֔ה וּמַצּ֥וֹת אָפָ֖ה וַיֹּאכֵֽלוּ׃

‎4 ‏טֶרֶם֮ יִשְׁכָּבוּ֒ וְאַנְשֵׁ֨י הָעִ֜יר אַנְשֵׁ֤י סְדֹם֙ נָסַ֣בּוּ עַל־הַבַּ֔יִת מִנַּ֖עַר וְעַד־זָקֵ֑ן כָּל־הָעָ֖ם מִקָּצֶֽה׃

‎5 ‏וַיִּקְרְא֤וּ אֶל־לוֹט֙ וַיֹּ֣אמְרוּ ל֔וֹ אַיֵּ֧ה הָאֲנָשִׁ֛ים³ אֲשֶׁר־בָּ֥אוּ אֵלֶ֖יךָ הַלָּ֑יְלָה הוֹצִיאֵ֣ם אֵלֵ֔ינוּ וְנֵדְעָ֖ה אֹתָֽם׃

‎6 ‏וַיֵּצֵ֧א אֲלֵהֶ֛ם ל֖וֹט הַפֶּ֑תְחָה וְהַדֶּ֖לֶת סָגַ֥ר אַחֲרָֽיו׃

‎7 ‏וַיֹּאמַ֑ר אַל־נָ֥א אַחַ֖י תָּרֵֽעוּ׃

‎8 ‏הִנֵּה־נָ֨א לִ֜י שְׁתֵּ֣י בָנ֗וֹת אֲשֶׁ֤ר לֹֽא־יָדְעוּ֙ אִ֔ישׁ אוֹצִֽיאָה־נָּ֤א אֶתְהֶן֙ אֲלֵיכֶ֔ם וַעֲשׂ֣וּ לָהֶ֔ן כַּטּ֖וֹב בְּעֵינֵיכֶ֑ם רַ֠ק לָֽאֲנָשִׁ֤ים הָאֵל֙ אַל־תַּעֲשׂ֣וּ דָבָ֔ר כִּֽי־עַל־כֵּ֥ן בָּ֖אוּ בְּצֵ֥ל קֹרָתִֽי׃

‎9 ‏וַיֹּאמְר֣וּ׀ גֶּשׁ־הָ֗לְאָה וַיֹּֽאמְרוּ֙ הָאֶחָ֤ד בָּֽא־לָגוּר֙ וַיִּשְׁפֹּ֣ט שָׁפ֔וֹט עַתָּ֕ה נָרַ֥ע לְךָ֖ מֵהֶ֑ם וַיִּפְצְר֨וּ בָאִ֤ישׁ בְּלוֹט֙ מְאֹ֔ד וַֽיִּגְּשׁ֖וּ לִשְׁבֹּ֥ר הַדָּֽלֶת׃

‎10 ‏וַיִּשְׁלְח֤וּ הָֽאֲנָשִׁים֙ אֶת־יָדָ֔ם וַיָּבִ֧יאוּ אֶת־ל֛וֹט אֲלֵיהֶ֖ם הַבָּ֑יְתָה וְאֶת־הַדֶּ֖לֶת סָגָֽרוּ׃

‎11 ‏וְֽאֶת־הָאֲנָשִׁ֞ים אֲשֶׁר־פֶּ֣תַח הַבַּ֗יִת הִכּוּ֙ בַּסַּנְוֵרִ֔ים מִקָּטֹ֖ן וְעַד־גָּד֑וֹל וַיִּלְא֖וּ לִמְצֹ֥א הַפָּֽתַח׃

‎12 ‏וַיֹּאמְר֨וּ³ הָאֲנָשִׁ֜ים אֶל־ל֗וֹט עֹ֚ד מִֽי־לְךָ֣ פֹ֔ה חָתָן֙ וּבָנֶ֣יךָ וּבְנֹתֶ֔יךָ וְכֹ֥ל אֲשֶׁר־לְךָ֖ בָּעִ֑יר הוֹצֵ֖א מִן־הַמָּקֽוֹם׃

‎13 ‏כִּֽי־מַשְׁחִתִ֣ים אֲנַ֔חְנוּ אֶת־הַמָּק֖וֹם הַזֶּ֑ה כִּֽי־גָֽדְלָ֤ה צַעֲקָתָם֙ אֶת־פְּנֵ֣י יְהוָ֔ה וַיְשַׁלְּחֵ֥נוּ יְהוָ֖ה לְשַׁחֲתָֽהּ׃

‎14 ‏וַיֵּצֵ֨א ל֜וֹט וַיְדַבֵּ֣ר׀ אֶל־חֲתָנָ֣יו׀ לֹקְחֵ֣י בְנֹתָ֗יו וַיֹּ֙אמֶר֙ ק֤וּמוּ צְּאוּ֙ מִן־הַמָּק֣וֹם הַזֶּ֔ה כִּֽי־מַשְׁחִ֥ית יְהוָ֖ה אֶת־הָעִ֑יר וַיְהִ֥י כִמְצַחֵ֖ק בְּעֵינֵ֥י חֲתָנָֽיו׃

‎15 ‏וּכְמוֹ֙ הַשַּׁ֣חַר עָלָ֔ה וַיָּאִ֥יצוּ הַמַּלְאָכִ֖ים בְּל֣וֹט לֵאמֹ֑ר קוּם֩ קַ֨ח אֶֽת־אִשְׁתְּךָ֜ וְאֶת־שְׁתֵּ֤י בְנֹתֶ֙יךָ֙ הַנִּמְצָאֹ֔ת פֶּן־תִּסָּפֶ֖ה בַּעֲוֹ֥ן הָעִֽיר׃

‎16 ‏וַֽיִּתְמַהְמָ֓הּ׀ וַיַּחֲזִ֨קוּ³ הָאֲנָשִׁ֜ים בְּיָד֣וֹ וּבְיַד־אִשְׁתּ֗וֹ וּבְיַד֙ שְׁתֵּ֣י בְנֹתָ֔יו בְּחֶמְלַ֥ת יְהוָ֖ה עָלָ֑יו וַיֹּצִאֻ֥הוּ וַיַּנִּחֻ֖הוּ מִח֥וּץ לָעִֽיר׃

‎17 ‏וַיְהִי֩ כְהוֹצִיאָ֨ם אֹתָ֜ם הַח֗וּצָה וַיֹּ֙אמֶר֙ הִמָּלֵ֣ט עַל־נַפְשֶׁ֔ךָ אַל־תַּבִּ֣יט אַחֲרֶ֔יךָ וְאַֽל־תַּעֲמֹ֖ד בְּכָל־הַכִּכָּ֑ר הָהָ֥רָה הִמָּלֵ֖ט פֶּן־תִּסָּפֶֽה׃

‎18 ‏וַיֹּ֥אמֶר ל֖וֹט אֲלֵהֶ֑ם אַל־נָ֖א אֲדֹנָֽי׃

‎19 ‏הִנֵּה־נָ֠א מָצָ֨א עַבְדְּךָ֣ חֵן֮ בְּעֵינֶיךָ֒ וַתַּגְדֵּ֣ל חַסְדְּךָ֗ אֲשֶׁ֤ר עָשִׂ֙יתָ֙ עִמָּדִ֔י לְהַחֲי֖וֹת אֶת־נַפְשִׁ֑י וְאָנֹכִ֗י לֹ֤א אוּכַל֙ לְהִמָּלֵ֣ט הָהָ֔רָה פֶּן־תִּדְבָּקַ֥נִי הָרָעָ֖ה וָמַֽתִּי׃

‎20 ‏הִנֵּה־נָ֠א הָעִ֨יר הַזֹּ֧את קְרֹבָ֛ה לָנ֥וּס שָׁ֖מָּה וְהִ֣יא מִצְעָ֑ר אִמָּלְטָ֨ה נָּ֜א שָׁ֗מָּה הֲלֹ֥א מִצְעָ֛ר הִ֖וא וּתְחִ֥י נַפְשִֽׁי׃

‎21 ‏וַיֹּ֣אמֶר אֵלָ֔יו הִנֵּה֙ נָשָׂ֣אתִי פָנֶ֔יךָ גַּ֖ם לַדָּבָ֣ר הַזֶּ֑ה לְבִלְתִּ֛י הָפְכִּ֥י אֶת־הָעִ֖יר אֲשֶׁ֥ר דִּבַּֽרְתָּ׃

‎22 ‏מַהֵר֙ הִמָּלֵ֣ט שָׁ֔מָּה כִּ֣י לֹ֤א אוּכַל֙ לַעֲשׂ֣וֹת דָּבָ֔ר עַד־בֹּאֲךָ֖ שָׁ֑מָּה עַל־כֵּ֛ן קָרָ֥א שֵׁם־הָעִ֖יר צֽוֹעַר׃

‎23 ‏הַשֶּׁ֖מֶשׁ יָצָ֣א עַל־הָאָ֑רֶץ וְל֖וֹט בָּ֥א צֹֽעֲרָה׃

‎24 ‏וַֽיהוָ֗ה הִמְטִ֧יר עַל־סְדֹ֛ם וְעַל־עֲמֹרָ֖ה גָּפְרִ֣ית וָאֵ֑שׁ מֵאֵ֥ת יְהוָ֖ה מִן־הַשָּׁמָֽיִם׃

‎25 ‏וַֽיַּהֲפֹךְ֙ אֶת־הֶעָרִ֣ים הָאֵ֔ל וְאֵ֖ת כָּל־הַכִּכָּ֑ר וְאֵת֙ כָּל־יֹשְׁבֵ֣י הֶעָרִ֔ים וְצֶ֖מַח הָאֲדָמָֽה׃

‎26 ‏וַתַּבֵּ֥ט אִשְׁתּ֖וֹ מֵאַחֲרָ֑יו וַתְּהִ֖י נְצִ֥יב מֶֽלַח׃

‎27 ‏וַיַּשְׁכֵּ֥ם אַבְרָהָ֖ם בַּבֹּ֑קֶר אֶל־הַ֨מָּק֔וֹם אֲשֶׁר־עָ֥מַד שָׁ֖ם אֶת־פְּנֵ֥י יְהוָֽה׃

‎28 ‏וַיַּשְׁקֵ֗ף עַל־פְּנֵ֤י סְדֹם֙ וַעֲמֹרָ֔ה וְעַֽל־כָּל־פְּנֵ֖י אֶ֣רֶץ הַכִּכָּ֑ר וַיַּ֗רְא וְהִנֵּ֤ה עָלָה֙ קִיטֹ֣ר הָאָ֔רֶץ כְּקִיטֹ֖ר הַכִּבְשָֽׁן׃

‎29 ‏וַיְהִ֗י בְּשַׁחֵ֤ת אֱלֹהִים֙ אֶת־עָרֵ֣י הַכִּכָּ֔ר וַיִּזְכֹּ֥ר אֱלֹהִ֖ים אֶת־אַבְרָהָ֑ם וַיְשַׁלַּ֤ח אֶת־לוֹט֙ מִתּ֣וֹךְ הַהֲפֵכָ֔ה בַּהֲפֹךְ֙ אֶת־הֶ֣עָרִ֔ים אֲשֶׁר־יָשַׁ֥ב בָּהֵ֖ן לֽוֹט׃

‎30 ‏וַיַּעַל֩ ל֨וֹט מִצּ֜וֹעַר וַיֵּ֣שֶׁב בָּהָ֗ר וּשְׁתֵּ֤י בְנֹתָיו֙ עִמּ֔וֹ כִּ֥י יָרֵ֖א לָשֶׁ֣בֶת בְּצ֑וֹעַר וַיֵּ֙שֶׁב֙ בַּמְּעָרָ֔ה ה֖וּא וּשְׁתֵּ֥י בְנֹתָֽיו׃

‎31 ‏וַתֹּ֧אמֶר הַבְּכִירָ֛ה אֶל־הַצְּעִירָ֖ה אָבִ֣ינוּ זָקֵ֑ן וְאִ֨ישׁ אֵ֤ין בָּאָ֙רֶץ֙ לָב֣וֹא עָלֵ֔ינוּ כְּדֶ֖רֶךְ כָּל־הָאָֽרֶץ׃

‎32 ‏לְכָ֨ה נַשְׁקֶ֧ה אֶת־אָבִ֛ינוּ יַ֖יִן וְנִשְׁכְּבָ֣ה עִמּ֑וֹ וּנְחַיֶּ֥ה מֵאָבִ֖ינוּ זָֽרַע׃

‎33 ‏וַתַּשְׁקֶ֧יןָ אֶת־אֲבִיהֶ֛ן יַ֖יִן בַּלַּ֣יְלָה ה֑וּא וַתָּבֹ֤א הַבְּכִירָה֙ וַתִּשְׁכַּ֣ב אֶת־אָבִ֔יהָ וְלֹֽא־יָדַ֥ע בְּשִׁכְבָ֖הּ וּבְקוּׅמָֽהּ׃⁴

‎34 ‏וַֽיְהִי֙ מִֽמָּחֳרָ֔ת וַתֹּ֤אמֶר הַבְּכִירָה֙ אֶל־הַצְּעִירָ֔ה הֵן־שָׁכַ֥בְתִּי אֶ֖מֶשׁ אֶת־אָבִ֑י נַשְׁקֶ֨נּוּ יַ֜יִן גַּם־הַלַּ֗יְלָה וּבֹ֙אִי֙ שִׁכְבִ֣י עִמּ֔וֹ וּנְחַיֶּ֥ה מֵאָבִ֖ינוּ זָֽרַע׃

‎35 ‏וַתַּשְׁקֶ֜יןָ גַּ֣ם בַּלַּ֧יְלָה הַה֛וּא אֶת־אֲבִיהֶ֖ן יָ֑יִן וַתָּ֤קָם הַצְּעִירָה֙ וַתִּשְׁכַּ֣ב עִמּ֔וֹ וְלֹֽא־יָדַ֥ע בְּשִׁכְבָ֖הּ וּבְקֻמָֽהּ׃

‎36 ‏וַֽתַּהֲרֶ֛יןָ שְׁתֵּ֥י בְנֽוֹת־ל֖וֹט מֵאֲבִיהֶֽן׃

‎37 ‏וַתֵּ֤לֶד הַבְּכִירָה֙ בֵּ֔ן וַתִּקְרָ֥א שְׁמ֖וֹ מוֹאָ֑ב ה֥וּא אֲבִֽי־מוֹאָ֖ב עַד־הַיּֽוֹם׃

‎38 ‏וְהַצְּעִירָ֤ה גַם־הִוא֙ יָ֣לְדָה בֵּ֔ן וַתִּקְרָ֥א שְׁמ֖וֹ בֶּן־עַמִּ֑י ה֛וּא אֲבִ֥י בְנֵֽי־עַמּ֖וֹן עַד־הַיּֽוֹם׃ ס

1 wayyāḇō’û šənê hammalə’āḵîm səḏōmâ bā‘ereḇ wəlwōṭ yōšēḇ bəš^a‘ar-səḏōm wayyarə’-lwōṭ wayyāqām liqərā’ṯām wayyišət^aḥû ’apayim ’ārəṣâ:

2 wayyō’mer hinneh nnā’-’ăḏōnay sûrû nā’ ’el-bêṯ ‘aḇədəḵem wəlînû wər^aḥăṣû raḡəlêḵem wəhišəkamətem wahălaḵətem³ ləḏarəkəḵem wayyō’mərû llō’ kî ḇārəḥwōḇ nālîn:

3 wayyifəṣar-bām mə’ōḏ wayyāsurû ’ēlāyw wayyāḇō’û ’el-bêṯwō wayy^a‘aś lâem mišəteh ûmaṣṣwōṯ ’āfâ wayyō’ḵēlû:

4 ṭerem yišəkāḇû wə’anəšê hā‘îr ’anəšê səḏōm nāsabû ‘al-habayiṯ minn^a‘ar wə‘aḏ-zāqēn kāl-hā‘ām miqqāṣeh:

5 wayyiqərə’û ’el-lwōṭ wayyō’mərû lwō ’ayyēh hā’ănāšîm³ ’ăšer-bā’û ’ēleyḵā hallāyəlâ hwōṣî’ēm ’ēlênû wənēḏə‘â ’ōṯām:

6 wayyēṣē’ ’ălēhem lwōṭ hapeṯəḥâ wəhadeleṯ sāḡar ’^aḥărāyw:

7 wayyō’mar ’al-nā’ ’^aḥay tārē‘û:

8 hinnēh-nā’ lî šətê ḇānwōṯ ’ăšer lō’-yāḏə‘û ’îš ’wōṣî’â-nnā’ ’eṯəhen ’ălêḵem w^a‘ăśû lâen kaṭṭwōḇ bə‘ênêḵem raq lā’ănāšîm hā’ēl ’al-t^a‘ăśû ḏāḇār kî-‘al-kēn bā’û bəṣēl qōrāṯî:

9 wayyō’mərû| geš-hālə’â wayyō’mərû hā’eḥāḏ bā’-lāḡûr wayyišəpōṭ šāfwōṭ ‘atâ nār^a‘ ləḵā mēhem wayyifəṣərû ḇā’îš bəlwōṭ mə’ōḏ wayyigəšû lišəbōr hadāleṯ:

10 wayyišələḥû hā’ănāšîm ’eṯ-yāḏām wayyāḇî’û ’eṯ-lwōṭ ’ălêhem habāyəṯâ wə’eṯ-hadeleṯ sāḡārû:

11 wə’eṯ-hā’ănāšîm ’ăšer-peṯ^aḥ habayiṯ hikû bassanəwērîm miqqāṭōn wə‘aḏ-gāḏwōl wayyilə’û liməṣō’ hapāṯ^aḥ:

12 wayyō’mərû³ hā’ănāšîm ’el-lwōṭ ‘ōḏ mî-ləḵā fōh ḥāṯān ûḇāneyḵā ûḇənōṯeyḵā wəḵōl ’ăšer-ləḵā bā‘îr hwōṣē’ min-hammāqwōm:

13 kî-mašəḥiṯîm ’ăn^aḥənû ’eṯ-hammāqwōm hazzeh kî-ḡāḏəlâ ṣ^a‘ăqāṯām ’eṯ-pənê yəhwâ wayəšalləḥēnû yəhwâ ləš^aḥăṯāh:

14 wayyēṣē’ lwōṭ wayəḏabēr| ’el-ḥăṯānāyw| lōqəḥê ḇənōṯāyw wayyō’mer qûmû ṣṣə’û min-hammāqwōm hazzeh kî-mašəḥîṯ yəhwâ ’eṯ-hā‘îr wayəhî ḵiməṣ^aḥēq bə‘ênê ḥăṯānāyw:

15 ûḵəmwō hašš^aḥar ‘ālâ wayyā’îṣû hammalə’āḵîm bəlwōṭ lē’mōr qûm q^aḥ ’eṯ-’išətəḵā wə’eṯ-šətê ḇənōṯeyḵā hanniməṣā’ōṯ pen-tissāfeh b^a‘ăwōn hā‘îr:

16 wayyiṯəmahəmāh| wayy^aḥăziqû³ hā’ănāšîm bəyāḏwō ûḇəyaḏ-’išətwō ûḇəyaḏ šətê ḇənōṯāyw bəḥeməlaṯ yəhwâ ‘ālāyw wayyōṣi’uhû wayyanniḥuhû miḥûṣ lā‘îr:

17 wayəhî ḵəhwōṣî’ām ’ōṯām h^aḥûṣâ wayyō’mer himmālēṭ ‘al-nafəšeḵā ’al-tabîṭ ’^aḥăreyḵā wə’al-t^a‘ămōḏ bəḵāl-hakikār hâārâ himmālēṭ pen-tissāfeh:

18 wayyō’mer lwōṭ ’ălēhem ’al-nā’ ’ăḏōnāy:

19 hinnēh-nā’ māṣā’ ‘aḇədəḵā ḥēn bə‘êneyḵā wataḡədēl ḥasədəḵā ’ăšer ‘āśîṯā ‘immāḏî ləh^aḥăywōṯ ’eṯ-nafəšî wə’ānōḵî lō’ ’ûḵal ləhimmālēṭ hâārâ pen-tiḏəbāqanî hārā‘â wāmatî:

20 hinnēh-nā’ hā‘îr hazzō’ṯ qərōḇâ lānûs šāmmâ wəhî’ miṣə‘ār ’immāləṭâ nnā’ šāmmâ hălō’ miṣə‘ār hiw’ ûṯəḥî nafəšî:

21 wayyō’mer ’ēlāyw hinnēh nāśā’ṯî fāneyḵā gam ladāḇār hazzeh ləḇilətî hāfəkî ’eṯ-hā‘îr ’ăšer dibarətā:

22 mahēr himmālēṭ šāmmâ kî lō’ ’ûḵal l^a‘ăśwōṯ dāḇār ‘aḏ-bō’ăḵā šāmmâ ‘al-kēn qārā’ šēm-hā‘îr ṣwō‘ar:

23 haššemeš yāṣā’ ‘al-hā’āreṣ wəlwōṭ bā’ ṣō‘ărâ:

24 wayhwâ himəṭîr ‘al-səḏōm wə‘al-‘ămōrâ gāfərîṯ wā’ēš mē’ēṯ yəhwâ min-haššāmāyim:

25 wayyahăfōḵə ’eṯ-he‘ārîm hā’ēl wə’ēṯ kāl-hakikār wə’ēṯ kāl-yōšəḇê he‘ārîm wəṣem^aḥ hā’ăḏāmâ:

26 watabēṭ ’išətwō mē’^aḥărāyw watəhî nəṣîḇ mel^aḥ:

27 wayyašəkēm ’aḇərâām babōqer ’el-hammāqwōm ’ăšer-‘āmaḏ šām ’eṯ-pənê yəhwâ:

28 wayyašəqēf ‘al-pənê səḏōm w^a‘ămōrâ wə‘al-kāl-pənê ’ereṣ hakikār wayyarə’ wəhinnēh ‘ālâ qîṭōr hā’āreṣ kəqîṭōr hakiḇəšān:

29 wayəhî bəš^aḥēṯ ’ĕlōhîm ’eṯ-‘ārê hakikār wayyizəkōr ’ĕlōhîm ’eṯ-’aḇərâām wayəšall^aḥ ’eṯ-lwōṭ mitwōḵə hahăfēḵâ bahăfōḵə ’eṯ-he‘ārîm ’ăšer-yāšaḇ bâēn lwōṭ:

30 wayy^a‘al lwōṭ miṣṣwō‘ar wayyēšeḇ bâār ûšətê ḇənōṯāyw ‘immwō kî yārē’ lāšeḇeṯ bəṣwō‘ar wayyēšeḇ bammə‘ārâ hû’ ûšətê ḇənōṯāyw:

31 watō’mer habəḵîrâ ’el-haṣṣə‘îrâ ’āḇînû zāqēn wə’îš ’ên bā’āreṣ lāḇwō’ ‘ālênû kəḏereḵə kāl-hā’āreṣ:

32 ləḵâ našəqeh ’eṯ-’āḇînû yayin wənišəkəḇâ ‘immwō ûnəḥayyeh mē’āḇînû zār^a‘:

33 watašəqeynā ’eṯ-’ăḇîhen yayin ballayəlâ hû’ watāḇō’ habəḵîrâ watišəkaḇ ’eṯ-’āḇîhā wəlō’-yāḏ^a‘ bəšiḵəḇāh ûḇəqûׅmāh:⁴

34 wayəhî mimmāḥŏrāṯ watō’mer habəḵîrâ ’el-haṣṣə‘îrâ hēn-šāḵaḇətî ’emeš ’eṯ-’āḇî našəqennû yayin gam-hallayəlâ ûḇō’î šiḵəḇî ‘immwō ûnəḥayyeh mē’āḇînû zār^a‘:

35 watašəqeynā gam ballayəlâ hahû’ ’eṯ-’ăḇîhen yāyin watāqām haṣṣə‘îrâ watišəkaḇ ‘immwō wəlō’-yāḏ^a‘ bəšiḵəḇāh ûḇəqumāh:

36 watahăreynā šətê ḇənwōṯ-lwōṭ mē’ăḇîhen:

37 watēleḏ habəḵîrâ bēn watiqərā’ šəmwō mwō’āḇ hû’ ’ăḇî-mwō’āḇ ‘aḏ-hayywōm:

38 wəhaṣṣə‘îrâ ḡam-hiw’ yāləḏâ bēn watiqərā’ šəmwō ben-‘ammî hû’ ’ăḇî ḇənê-‘ammwōn ‘aḏ-hayywōm: s