Genesis (Bereshit) Chapter 26

‎1 ‏וַיְהִ֤י רָעָב֙ בָּאָ֔רֶץ מִלְּבַד֙ הָרָעָ֣ב הָרִאשׁ֔וֹן אֲשֶׁ֥ר הָיָ֖ה בִּימֵ֣י אַבְרָהָ֑ם וַיֵּ֧לֶךְ יִצְחָ֛ק אֶל־אֲבִימֶּ֥לֶךְ¹ מֶֽלֶךְ־פְּלִשְׁתִּ֖ים גְּרָֽרָה׃

‎2 ‏וַיֵּרָ֤א אֵלָיו֙ יְהוָ֔ה וַיֹּ֖אמֶר אַל־תֵּרֵ֣ד מִצְרָ֑יְמָה שְׁכֹ֣ן בָּאָ֔רֶץ אֲשֶׁ֖ר אֹמַ֥ר אֵלֶֽיךָ׃

‎3 ‏גּ֚וּר³ בָּאָ֣רֶץ הַזֹּ֔את וְאֶֽהְיֶ֥ה עִמְּךָ֖ וַאֲבָרְכֶ֑ךָּ כִּֽי־לְךָ֣ וּֽלְזַרְעֲךָ֗ אֶתֵּן֙ אֶת־כָּל־הָֽאֲרָצֹ֣ת הָאֵ֔ל וַהֲקִֽמֹתִי֙ אֶת־הַשְּׁבֻעָ֔ה אֲשֶׁ֥ר נִשְׁבַּ֖עְתִּי לְאַבְרָהָ֥ם אָבִֽיךָ׃

‎4 ‏וְהִרְבֵּיתִ֤י אֶֽת־זַרְעֲךָ֙ כְּכוֹכְבֵ֣י הַשָּׁמַ֔יִם וְנָתַתִּ֣י לְזַרְעֲךָ֔ אֵ֥ת כָּל־הָאֲרָצֹ֖ת הָאֵ֑ל וְהִתְבָּרֲכ֣וּ בְזַרְעֲךָ֔ כֹּ֖ל גּוֹיֵ֥י הָאָֽרֶץ׃

‎5 ‏עֵ֕קֶב אֲשֶׁר־שָׁמַ֥ע אַבְרָהָ֖ם בְּקֹלִ֑י וַיִּשְׁמֹר֙ מִשְׁמַרְתִּ֔י מִצְוֹתַ֖י חֻקּוֹתַ֥י וְתוֹרֹתָֽי׃

‎6 ‏וַיֵּ֥שֶׁב יִצְחָ֖ק בִּגְרָֽר׃

‎7 ‏וַֽיִּשְׁאֲל֞וּ אַנְשֵׁ֤י הַמָּקוֹם֙ לְאִשְׁתּ֔וֹ וַיֹּ֖אמֶר אֲחֹ֣תִי הִ֑וא כִּ֤י יָרֵא֙ לֵאמֹ֣ר אִשְׁתִּ֔י פֶּן־יַֽהַרְגֻ֜נִי אַנְשֵׁ֤י הַמָּקוֹם֙ עַל־רִבְקָ֔ה כִּֽי־טוֹבַ֥ת מַרְאֶ֖ה הִֽיא׃

‎8 ‏וַיְהִ֗י כִּ֣י אָֽרְכוּ־ל֥וֹ שָׁם֙ הַיָּמִ֔ים וַיַּשְׁקֵ֗ף אֲבִימֶ֙לֶךְ֙ מֶ֣לֶךְ פְּלִשְׁתִּ֔ים בְּעַ֖ד הַֽחַלּ֑וֹן וַיַּ֗רְא וְהִנֵּ֤ה יִצְחָק֙ מְצַחֵ֔ק אֵ֖ת רִבְקָ֥ה אִשְׁתּֽוֹ׃

‎9 ‏וַיִּקְרָ֨א אֲבִימֶ֜לֶךְ לְיִצְחָ֗ק וַיֹּ֙אמֶר֙ אַ֣ךְ הִנֵּ֤ה אִשְׁתְּךָ֙ הִ֔וא וְאֵ֥יךְ אָמַ֖רְתָּ אֲחֹ֣תִי הִ֑וא וַיֹּ֤אמֶר אֵלָיו֙ יִצְחָ֔ק כִּ֣י אָמַ֔רְתִּי פֶּן־אָמ֖וּת עָלֶֽיהָ׃

‎10 ‏וַיֹּ֣אמֶר אֲבִימֶ֔לֶךְ מַה־זֹּ֖את עָשִׂ֣יתָ לָּ֑נוּ כִּ֠מְעַט שָׁכַ֞ב אַחַ֤ד הָעָם֙ אֶת־אִשְׁתֶּ֔ךָ וְהֵבֵאתָ֥ עָלֵ֖ינוּ אָשָֽׁם׃

‎11 ‏וַיְצַ֣ו אֲבִימֶ֔לֶךְ אֶת־כָּל־הָעָ֖ם לֵאמֹ֑ר הַנֹּגֵ֜עַ בָּאִ֥ישׁ הַזֶּ֛ה וּבְאִשְׁתּ֖וֹ מ֥וֹת יוּמָֽת׃

‎12 ‏וַיִּזְרַ֤ע יִצְחָק֙ בָּאָ֣רֶץ הַהִ֔וא וַיִּמְצָ֛א בַּשָּׁנָ֥ה הַהִ֖וא מֵאָ֣ה שְׁעָרִ֑ים וַֽיְבָרֲכֵ֖הוּ יְהוָֽה׃

‎13 ‏וַיִּגְדַּ֖ל הָאִ֑ישׁ וַיֵּ֤לֶךְ הָלוֹךְ֙ וְגָדֵ֔ל עַ֥ד כִּֽי־גָדַ֖ל מְאֹֽד׃

‎14 ‏וַֽיְהִי־ל֤וֹ מִקְנֵה־צֹאן֙ וּמִקְנֵ֣ה בָקָ֔ר וַעֲבֻדָּ֖ה רַבָּ֑ה וַיְקַנְא֥וּ אֹת֖וֹ פְּלִשְׁתִּֽים׃

‎15 ‏וְכָל־הַבְּאֵרֹ֗ת אֲשֶׁ֤ר חָֽפְרוּ֙ עַבְדֵ֣י אָבִ֔יו בִּימֵ֖י אַבְרָהָ֣ם אָבִ֑יו סִתְּמ֣וּם פְּלִשְׁתִּ֔ים וַיְמַלְא֖וּם עָפָֽר׃

‎16 ‏וַיֹּ֥אמֶר אֲבִימֶ֖לֶךְ אֶל־יִצְחָ֑ק לֵ֚ךְ מֵֽעִמָּ֔נוּ כִּֽי־עָצַֽמְתָּ־מִמֶּ֖נּוּ³ מְאֹֽד׃

‎17 ‏וַיֵּ֥לֶךְ מִשָּׁ֖ם יִצְחָ֑ק וַיִּ֥חַן בְּנַֽחַל־גְּרָ֖ר וַיֵּ֥שֶׁב שָֽׁם׃

‎18 ‏וַיָּ֨שָׁב יִצְחָ֜ק וַיַּחְפֹּ֣ר׀ אֶת־בְּאֵרֹ֣ת הַמַּ֗יִם אֲשֶׁ֤ר חָֽפְרוּ֙ בִּימֵי֙ אַבְרָהָ֣ם אָבִ֔יו וַיְסַתְּמ֣וּם פְּלִשְׁתִּ֔ים אַחֲרֵ֖י מ֣וֹת אַבְרָהָ֑ם וַיִּקְרָ֤א לָהֶן֙ שֵׁמ֔וֹת כַּשֵּׁמֹ֕ת אֲשֶׁר־קָרָ֥א לָהֶ֖ן אָבִֽיו׃

‎19 ‏וַיַּחְפְּר֥וּ עַבְדֵֽי־יִצְחָ֖ק בַּנָּ֑חַל וַיִּ֨מְצְאוּ־שָׁ֔ם בְּאֵ֖ר מַ֥יִם חַיִּֽים׃

‎20 ‏וַיָּרִ֜יבוּ רֹעֵ֣י גְרָ֗ר עִם־רֹעֵ֥י יִצְחָ֛ק לֵאמֹ֖ר לָ֣נוּ הַמָּ֑יִם וַיִּקְרָ֤א שֵֽׁם־הַבְּאֵר֙ עֵ֔שֶׂק כִּ֥י הִֽתְעַשְּׂק֖וּ עִמּֽוֹ׃

‎21 ‏וַֽיַּחְפְּרוּ֙ בְּאֵ֣ר אַחֶ֔רֶת וַיָּרִ֖יבוּ גַּם־עָלֶ֑יהָ וַיִּקְרָ֥א שְׁמָ֖הּ שִׂטְנָֽה׃

‎22 ‏וַיַּעְתֵּ֣ק מִשָּׁ֗ם וַיַּחְפֹּר֙ בְּאֵ֣ר אַחֶ֔רֶת וְלֹ֥א רָב֖וּ עָלֶ֑יהָ וַיִּקְרָ֤א שְׁמָהּ֙ רְחֹב֔וֹת וַיֹּ֗אמֶר כִּֽי־עַתָּ֞ה הִרְחִ֧יב יְהוָ֛ה לָ֖נוּ וּפָרִ֥ינוּ בָאָֽרֶץ׃

‎23 ‏וַיַּ֥עַל מִשָּׁ֖ם בְּאֵ֥ר שָֽׁבַע׃

‎24 ‏וַיֵּרָ֨א אֵלָ֤יו יְהוָה֙ בַּלַּ֣יְלָה הַה֔וּא וַיֹּ֕אמֶר אָנֹכִ֕י אֱלֹהֵ֖י אַבְרָהָ֣ם אָבִ֑יךָ אַל־תִּירָא֙ כִּֽי־אִתְּךָ֣ אָנֹ֔כִי וּבֵֽרַכְתִּ֙יךָ֙ וְהִרְבֵּיתִ֣י אֶֽת־זַרְעֲךָ֔ בַּעֲב֖וּר אַבְרָהָ֥ם עַבְדִּֽי׃

‎25 ‏וַיִּ֧בֶן שָׁ֣ם מִזְבֵּ֗חַ וַיִּקְרָא֙ בְּשֵׁ֣ם יְהוָ֔ה וַיֶּט־שָׁ֖ם אָהֳל֑וֹ וַיִּכְרוּ־שָׁ֥ם עַבְדֵי־יִצְחָ֖ק בְּאֵֽר׃

‎26 ‏וַאֲבִימֶ֕לֶךְ הָלַ֥ךְ אֵלָ֖יו מִגְּרָ֑ר וַאֲחֻזַּת֙ מֵֽרֵעֵ֔הוּ וּפִיכֹ֖ל שַׂר־צְבָאֽוֹ׃

‎27 ‏וַיֹּ֤אמֶר אֲלֵהֶם֙ יִצְחָ֔ק מַדּ֖וּעַ בָּאתֶ֣ם אֵלָ֑י וְאַתֶּם֙ שְׂנֵאתֶ֣ם אֹתִ֔י וַתְּשַׁלְּח֖וּנִי מֵאִתְּכֶֽם׃

‎28 ‏וַיֹּאמְר֗וּ רָא֣וֹ רָאִינוּ֮ כִּֽי־הָיָ֣ה יְהוָ֣ה׀ עִמָּךְ֒ וַנֹּ֗אמֶר תְּהִ֨י נָ֥א אָלָ֛ה בֵּינוֹתֵ֖ינוּ בֵּינֵ֣ינוּ וּבֵינֶ֑ךָ וְנִכְרְתָ֥ה בְרִ֖ית עִמָּֽךְ׃

‎29 ‏אִם־תַּעֲשֵׂ֨ה¹ עִמָּ֜נוּ רָעָ֗ה כַּאֲשֶׁר֙ לֹ֣א נְגַֽעֲנ֔וּךָ וְכַאֲשֶׁ֨ר עָשִׂ֤ינוּ עִמְּךָ֙ רַק־ט֔וֹב וַנְּשַׁלֵּֽחֲךָ֖ בְּשָׁל֑וֹם אַתָּ֥ה עַתָּ֖ה בְּר֥וּךְ יְהוָֽה׃

‎30 ‏וַיַּ֤עַשׂ לָהֶם֙ מִשְׁתֶּ֔ה וַיֹּאכְל֖וּ וַיִּשְׁתּֽוּ׃

‎31 ‏וַיַּשְׁכִּ֣ימוּ בַבֹּ֔קֶר וַיִּשָּׁבְע֖וּ אִ֣ישׁ לְאָחִ֑יו וַיְשַׁלְּחֵ֣ם יִצְחָ֔ק וַיֵּלְכ֥וּ מֵאִתּ֖וֹ בְּשָׁלֽוֹם׃

‎32 ‏וַיְהִ֣י׀ בַּיּ֣וֹם הַה֗וּא וַיָּבֹ֙אוּ֙ עַבְדֵ֣י יִצְחָ֔ק וַיַּגִּ֣דוּ ל֔וֹ עַל־אֹד֥וֹת הַבְּאֵ֖ר אֲשֶׁ֣ר חָפָ֑רוּ וַיֹּ֥אמְרוּ ל֖וֹ מָצָ֥אנוּ מָֽיִם׃

‎33 ‏וַיִּקְרָ֥א אֹתָ֖הּ שִׁבְעָ֑ה עַל־כֵּ֤ן שֵׁם־הָעִיר֙ בְּאֵ֣ר שֶׁ֔בַע עַ֖ד הַיּ֥וֹם הַזֶּֽה׃ ס

‎34 ‏וַיְהִ֤י עֵשָׂו֙ בֶּן־אַרְבָּעִ֣ים שָׁנָ֔ה וַיִּקַּ֤ח אִשָּׁה֙ אֶת־יְהוּדִ֔ית בַּת־בְּאֵרִ֖י הַֽחִתִּ֑י וְאֶת־בָּ֣שְׂמַ֔ת בַּת־אֵילֹ֖ן הַֽחִתִּֽי׃

‎35 ‏וַתִּהְיֶ֖יןָ מֹ֣רַת ר֑וּחַ לְיִצְחָ֖ק וּלְרִבְקָֽה׃ ס

1 wayəhî rā‘āḇ bā’āreṣ milləḇaḏ hārā‘āḇ hāri’šwōn ’ăšer hāyâ bîmê ’aḇərâām wayyēleḵə yiṣəḥāq ’el-’ăḇîmmeleḵə¹ meleḵə-pəlišətîm gərārâ:

2 wayyērā’ ’ēlāyw yəhwâ wayyō’mer ’al-tērēḏ miṣərāyəmâ šəḵōn bā’āreṣ ’ăšer ’ōmar ’ēleyḵā:

3 gûr³ bā’āreṣ hazzō’ṯ wə’ehəyeh ‘imməḵā wa’ăḇārəḵeḵḵā kî-ləḵā ûləzarə‘ăḵā ’etēn ’eṯ-kāl-hā’ărāṣōṯ hā’ēl wahăqimōṯî ’eṯ-haššəḇu‘â ’ăšer nišəb^a‘ətî lə’aḇərâām ’āḇîḵā:

4 wəhirəbêṯî ’eṯ-zarə‘ăḵā kəḵwōḵəḇê haššāmayim wənāṯatî ləzarə‘ăḵā ’ēṯ kāl-hā’ărāṣōṯ hā’ēl wəhiṯəbārăḵû ḇəzarə‘ăḵā kōl gwōyê hā’āreṣ:

5 ‘ēqeḇ ’ăšer-šām^a‘ ’aḇərâām bəqōlî wayyišəmōr mišəmarətî miṣəwōṯay ḥuqqwōṯay wəṯwōrōṯāy:

6 wayyēšeḇ yiṣəḥāq biḡərār:

7 wayyišə’ălû ’anəšê hammāqwōm lə’išətwō wayyō’mer ’ăḥōṯî hiw’ kî yārē’ lē’mōr ’išətî pen-yaharəḡunî ’anəšê hammāqwōm ‘al-riḇəqâ kî-ṭwōḇaṯ marə’eh hî’:

8 wayəhî kî ’ārəḵû-lwō šām hayyāmîm wayyašəqēf ’ăḇîmeleḵə meleḵə pəlišətîm bə‘aḏ h^aḥallwōn wayyarə’ wəhinnēh yiṣəḥāq məṣ^aḥēq ’ēṯ riḇəqâ ’išətwō:

9 wayyiqərā’ ’ăḇîmeleḵə ləyiṣəḥāq wayyō’mer ’aḵə hinnēh ’išətəḵā hiw’ wə’êḵə ’āmarətā ’ăḥōṯî hiw’ wayyō’mer ’ēlāyw yiṣəḥāq kî ’āmarətî pen-’āmûṯ ‘āleyhā:

10 wayyō’mer ’ăḇîmeleḵə mah-zzō’ṯ ‘āśîṯā llānû kimə‘aṭ šāḵaḇ ’^aḥaḏ hā‘ām ’eṯ-’išəteḵā wəhēḇē’ṯā ‘ālênû ’āšām:

11 wayəṣaw ’ăḇîmeleḵə ’eṯ-kāl-hā‘ām lē’mōr hannōḡē‘a bā’îš hazzeh ûḇə’išətwō mwōṯ yûmāṯ:

12 wayyizər^a‘ yiṣəḥāq bā’āreṣ hahiw’ wayyiməṣā’ baššānâ hahiw’ mē’â šə‘ārîm wayəḇārăḵēhû yəhwâ:

13 wayyiḡədal hā’îš wayyēleḵə hālwōḵə wəḡāḏēl ‘aḏ kî-ḡāḏal mə’ōḏ:

14 wayəhî-lwō miqənēh-ṣō’n ûmiqənēh ḇāqār w^a‘ăḇudâ rabâ wayəqanə’û ’ōṯwō pəlišətîm:

15 wəḵāl-habə’ērōṯ ’ăšer ḥāfərû ‘aḇəḏê ’āḇîw bîmê ’aḇərâām ’āḇîw sitəmûm pəlišətîm wayəmalə’ûm ‘āfār:

16 wayyō’mer ’ăḇîmeleḵə ’el-yiṣəḥāq lēḵə mē‘immānû kî-‘āṣamətā-mimmennû³ mə’ōḏ:

17 wayyēleḵə miššām yiṣəḥāq wayyiḥan bən^aḥal-gərār wayyēšeḇ šām:

18 wayyāšāḇ yiṣəḥāq wayy^aḥəpōr| ’eṯ-bə’ērōṯ hammayim ’ăšer ḥāfərû bîmê ’aḇərâām ’āḇîw wayəsatəmûm pəlišətîm ’^aḥărê mwōṯ ’aḇərâām wayyiqərā’ lâen šēmwōṯ kaššēmōṯ ’ăšer-qārā’ lâen ’āḇîw:

19 wayy^aḥəpərû ‘aḇəḏê-yiṣəḥāq bannāḥal wayyiməṣə’û-šām bə’ēr mayim ḥayyîm:

20 wayyārîḇû rō‘ê ḡərār ‘im-rō‘ê yiṣəḥāq lē’mōr lānû hammāyim wayyiqərā’ šēm-habə’ēr ‘ēśeq kî hiṯə‘aśśəqû ‘immwō:

21 wayy^aḥəpərû bə’ēr ’^aḥereṯ wayyārîḇû gam-‘āleyhā wayyiqərā’ šəmāh śiṭənâ:

22 wayy^a‘ətēq miššām wayy^aḥəpōr bə’ēr ’^aḥereṯ wəlō’ rāḇû ‘āleyhā wayyiqərā’ šəmāh rəḥōḇwōṯ wayyō’mer kî-‘atâ hirəḥîḇ yəhwâ lānû ûfārînû ḇā’āreṣ:

23 wayy^a‘al miššām bə’ēr šāḇ^a‘:

24 wayyērā’ ’ēlāyw yəhwâ ballayəlâ hahû’ wayyō’mer ’ānōḵî ’ĕlōhê ’aḇərâām ’āḇîḵā ’al-tîrā’ kî-’itəḵā ’ānōḵî ûḇēraḵətîḵā wəhirəbêṯî ’eṯ-zarə‘ăḵā b^a‘ăḇûr ’aḇərâām ‘aḇədî:

25 wayyiḇen šām mizəbēḥa wayyiqərā’ bəšēm yəhwâ wayyeṭ-šām ’âŏlwō wayyiḵərû-šām ‘aḇəḏê-yiṣəḥāq bə’ēr:

26 wa’ăḇîmeleḵə hālaḵə ’ēlāyw migərār wa’ăḥuzzaṯ mērē‘ēhû ûfîḵōl śar-ṣəḇā’wō:

27 wayyō’mer ’ălēhem yiṣəḥāq madû‘a bā’ṯem ’ēlāy wə’atem śənē’ṯem ’ōṯî watəšalləḥûnî mē’itəḵem:

28 wayyō’mərû rā’wō rā’înû kî-hāyâ yəhwâ| ‘immāḵə wannō’mer təhî nā’ ’ālâ bênwōṯênû bênênû ûḇêneḵā wəniḵərəṯâ ḇərîṯ ‘immāḵə:

29 ’im-t^a‘ăśēh¹ ‘immānû rā‘â ka’ăšer lō’ nəḡ^a‘ănûḵā wəḵa’ăšer ‘āśînû ‘imməḵā raq-ṭwōḇ wannəšallēḥăḵā bəšālwōm ’atâ ‘atâ bərûḵə yəhwâ:

30 wayy^a‘aś lâem mišəteh wayyō’ḵəlû wayyišətû:

31 wayyašəkîmû ḇabōqer wayyiššāḇə‘û ’îš lə’āḥîw wayəšalləḥēm yiṣəḥāq wayyēləḵû mē’itwō bəšālwōm:

32 wayəhî| bayywōm hahû’ wayyāḇō’û ‘aḇəḏê yiṣəḥāq wayyagiḏû lwō ‘al-’ōḏwōṯ habə’ēr ’ăšer ḥāfārû wayyō’mərû lwō māṣā’nû māyim:

33 wayyiqərā’ ’ōṯāh šiḇə‘â ‘al-kēn šēm-hā‘îr bə’ēr šeḇ^a‘ ‘aḏ hayywōm hazzeh: s

34 wayəhî ‘ēśāw ben-’arəbā‘îm šānâ wayyiqq^aḥ ’iššâ ’eṯ-yəhûḏîṯ baṯ-bə’ērî h^aḥitî wə’eṯ-bāśəmaṯ baṯ-’êlōn h^aḥitî:

35 watihəyeynā mōraṯ rûḥa ləyiṣəḥāq ûləriḇəqâ: s