Genesis (Bereshit) Chapter 30

‎1 ‏וַתֵּ֣רֶא רָחֵ֗ל כִּ֣י לֹ֤א יָֽלְדָה֙ לְיַעֲקֹ֔ב וַתְּקַנֵּ֥א רָחֵ֖ל בַּאֲחֹתָ֑הּ וַתֹּ֤אמֶר אֶֽל־יַעֲקֹב֙ הָֽבָה־לִּ֣י בָנִ֔ים וְאִם־אַ֖יִן מֵתָ֥ה אָנֹֽכִי׃

‎2 ‏וַיִּֽחַר־אַ֥ף יַעֲקֹ֖ב בְּרָחֵ֑ל וַיֹּ֗אמֶר הֲתַ֤חַת אֱלֹהִים֙ אָנֹ֔כִי אֲשֶׁר־מָנַ֥ע מִמֵּ֖ךְ פְּרִי־בָֽטֶן׃

‎3 ‏וַתֹּ֕אמֶר הִנֵּ֛ה אֲמָתִ֥י בִלְהָ֖ה בֹּ֣א אֵלֶ֑יהָ וְתֵלֵד֙ עַל־בִּרְכַּ֔י וְאִבָּנֶ֥ה גַם־אָנֹכִ֖י מִמֶּֽנָּה׃

‎4 ‏וַתִּתֶּן־ל֛וֹ אֶת־בִּלְהָ֥ה שִׁפְחָתָ֖הּ לְאִשָּׁ֑ה וַיָּבֹ֥א אֵלֶ֖יהָ יַעֲקֹֽב׃

‎5 ‏וַתַּ֣הַר בִּלְהָ֔ה וַתֵּ֥לֶד לְיַעֲקֹ֖ב בֵּֽן׃

‎6 ‏וַתֹּ֤אמֶר רָחֵל֙ דָּנַ֣נִּי אֱלֹהִ֔ים וְגַם֙ שָׁמַ֣ע בְּקֹלִ֔י וַיִּתֶּן־לִ֖י בֵּ֑ן עַל־כֵּ֛ן קָרְאָ֥ה שְׁמ֖וֹ דָּֽן׃

‎7 ‏וַתַּ֣הַר ע֔וֹד וַתֵּ֕לֶד בִּלְהָ֖ה שִׁפְחַ֣ת רָחֵ֑ל בֵּ֥ן שֵׁנִ֖י לְיַעֲקֹֽב׃

‎8 ‏וַתֹּ֣אמֶר רָחֵ֗ל נַפְתּוּלֵ֨י אֱלֹהִ֧ים׀ נִפְתַּ֛לְתִּי עִם־אֲחֹתִ֖י גַּם־יָכֹ֑לְתִּי וַתִּקְרָ֥א שְׁמ֖וֹ נַפְתָּלִֽי׃

‎9 ‏וַתֵּ֣רֶא לֵאָ֔ה כִּ֥י עָמְדָ֖ה מִלֶּ֑דֶת וַתִּקַּח֙ אֶת־זִלְפָּ֣ה שִׁפְחָתָ֔הּ וַתִּתֵּ֥ן אֹתָ֛הּ לְיַעֲקֹ֖ב לְאִשָּֽׁה׃

‎10 ‏וַתֵּ֗לֶד זִלְפָּ֛ה שִׁפְחַ֥ת לֵאָ֖ה לְיַעֲקֹ֥ב בֵּֽן׃

‎11 ‏וַתֹּ֥אמֶר לֵאָ֖ה בגד בָּ֣א גָ֑ד וַתִּקְרָ֥א אֶת־שְׁמ֖וֹ גָּֽד׃

‎12 ‏וַתֵּ֗לֶד זִלְפָּה֙ שִׁפְחַ֣ת לֵאָ֔ה בֵּ֥ן שֵׁנִ֖י לְיַעֲקֹֽב׃

‎13 ‏וַתֹּ֣אמֶר לֵאָ֔ה בְּאָשְׁרִ֕י כִּ֥י אִשְּׁר֖וּנִי בָּנ֑וֹת וַתִּקְרָ֥א אֶת־שְׁמ֖וֹ אָשֵֽׁר׃

‎14 ‏וַיֵּ֨לֶךְ רְאוּבֵ֜ן בִּימֵ֣י קְצִיר־חִטִּ֗ים וַיִּמְצָ֤א דֽוּדָאִים֙ בַּשָּׂדֶ֔ה וַיָּבֵ֣א אֹתָ֔ם אֶל־לֵאָ֖ה אִמּ֑וֹ וַתֹּ֤אמֶר רָחֵל֙ אֶל־לֵאָ֔ה תְּנִי־נָ֣א לִ֔י מִדּוּדָאֵ֖י בְּנֵֽךְ׃

‎15 ‏וַתֹּ֣אמֶר לָ֗הּ הַמְעַט֙ קַחְתֵּ֣ךְ אֶת־אִישִׁ֔י וְלָקַ֕חַת גַּ֥ם אֶת־דּוּדָאֵ֖י בְּנִ֑י וַתֹּ֣אמֶר רָחֵ֗ל לָכֵן֙ יִשְׁכַּ֤ב עִמָּךְ֙ הַלַּ֔יְלָה תַּ֖חַת דּוּדָאֵ֥י בְנֵֽךְ׃

‎16 ‏וַיָּבֹ֨א יַעֲקֹ֣ב³ מִן־הַשָּׂדֶה֮ בָּעֶרֶב֒ וַתֵּצֵ֨א לֵאָ֜ה לִקְרָאת֗וֹ וַתֹּ֙אמֶר֙ אֵלַ֣י תָּב֔וֹא כִּ֚י שָׂכֹ֣ר שְׂכַרְתִּ֔יךָ בְּדוּדָאֵ֖י בְּנִ֑י וַיִּשְׁכַּ֥ב עִמָּ֖הּ בַּלַּ֥יְלָה הֽוּא׃

‎17 ‏וַיִּשְׁמַ֥ע אֱלֹהִ֖ים אֶל־לֵאָ֑ה וַתַּ֛הַר וַתֵּ֥לֶד לְיַעֲקֹ֖ב בֵּ֥ן חֲמִישִֽׁי׃

‎18 ‏וַתֹּ֣אמֶר לֵאָ֗ה נָתַ֤ן אֱלֹהִים֙ שְׂכָרִ֔י אֲשֶׁר־נָתַ֥תִּי שִׁפְחָתִ֖י לְאִישִׁ֑י וַתִּקְרָ֥א שְׁמ֖וֹ יִשָּׂשכָֽר׃

‎19 ‏וַתַּ֤הַר עוֹד֙ לֵאָ֔ה וַתֵּ֥לֶד בֵּן־שִׁשִּׁ֖י לְּיַעֲקֹֽב׃¹

‎20 ‏וַתֹּ֣אמֶר לֵאָ֗ה זְבָדַ֨נִי אֱלֹהִ֥ים׀ אֹתִי֮ זֵ֣בֶד טוֹב֒ הַפַּ֙עַם֙ יִזְבְּלֵ֣נִי אִישִׁ֔י כִּֽי־יָלַ֥דְתִּי ל֖וֹ שִׁשָּׁ֣ה בָנִ֑ים וַתִּקְרָ֥א אֶת־שְׁמ֖וֹ זְבֻלֽוּן׃

‎21 ‏וְאַחַ֖ר יָ֣לְדָה בַּ֑ת וַתִּקְרָ֥א אֶת־שְׁמָ֖הּ דִּינָֽה׃

‎22 ‏וַיִּזְכֹּ֥ר אֱלֹהִ֖ים אֶת־רָחֵ֑ל וַיִּשְׁמַ֤ע אֵלֶ֙יהָ֙ אֱלֹהִ֔ים וַיִּפְתַּ֖ח אֶת־רַחְמָֽהּ׃

‎23 ‏וַתַּ֖הַר וַתֵּ֣לֶד בֵּ֑ן וַתֹּ֕אמֶר אָסַ֥ף אֱלֹהִ֖ים אֶת־חֶרְפָּתִֽי׃

‎24 ‏וַתִּקְרָ֧א אֶת־שְׁמ֛וֹ יוֹסֵ֖ף לֵאמֹ֑ר יֹסֵ֧ף יְהוָ֛ה לִ֖י בֵּ֥ן אַחֵֽר׃

‎25 ‏וַיְהִ֕י כַּאֲשֶׁ֛ר יָלְדָ֥ה רָחֵ֖ל אֶת־יוֹסֵ֑ף וַיֹּ֤אמֶר יַעֲקֹב֙ אֶל־לָבָ֔ן שַׁלְּחֵ֙נִי֙ וְאֵ֣לְכָ֔ה אֶל־מְקוֹמִ֖י וּלְאַרְצִֽי׃

‎26 ‏תְּנָ֞ה אֶת־נָשַׁ֣י וְאֶת־יְלָדַ֗י אֲשֶׁ֨ר עָבַ֧דְתִּי אֹֽתְךָ֛ בָּהֵ֖ן וְאֵלֵ֑כָה כִּ֚י אַתָּ֣ה יָדַ֔עְתָּ אֶת־עֲבֹדָתִ֖י אֲשֶׁ֥ר עֲבַדְתִּֽיךָ׃

‎27 ‏וַיֹּ֤אמֶר אֵלָיו֙ לָבָ֔ן אִם־נָ֛א מָצָ֥אתִי חֵ֖ן בְּעֵינֶ֑יךָ נִחַ֕שְׁתִּי וַיְבָרֲכֵ֥נִי יְהוָ֖ה בִּגְלָלֶֽךָ׃

‎28 ‏וַיֹּאמַ֑ר נָקְבָ֧ה שְׂכָרְךָ֛ עָלַ֖י וְאֶתֵּֽנָה׃

‎29 ‏וַיֹּ֣אמֶר אֵלָ֔יו אַתָּ֣ה יָדַ֔עְתָּ אֵ֖ת אֲשֶׁ֣ר עֲבַדְתִּ֑יךָ וְאֵ֛ת אֲשֶׁר־הָיָ֥ה מִקְנְךָ֖ אִתִּֽי׃

‎30 ‏כִּ֡י מְעַט֩ אֲשֶׁר־הָיָ֨ה לְךָ֤ לְפָנַי֙ וַיִּפְרֹ֣ץ לָרֹ֔ב וַיְבָ֧רֶךְ יְהוָ֛ה אֹתְךָ֖ לְרַגְלִ֑י וְעַתָּ֗ה מָתַ֛י אֶֽעֱשֶׂ֥ה גַם־אָנֹכִ֖י לְבֵיתִֽי׃

‎31 ‏וַיֹּ֖אמֶר מָ֣ה אֶתֶּן־לָ֑ךְ וַיֹּ֤אמֶר יַעֲקֹב֙ לֹא־תִתֶּן־לִ֣י³ מְא֔וּמָה אִם־תַּֽעֲשֶׂה־לִּי֙ הַדָּבָ֣ר הַזֶּ֔ה אָשׁ֛וּבָה אֶרְעֶ֥ה צֹֽאנְךָ֖ אֶשְׁמֹֽר׃

‎32 ‏אֶֽעֱבֹ֨ר בְּכָל־צֹֽאנְךָ֜ הַיּ֗וֹם הָסֵ֨ר מִשָּׁ֜ם כָּל־שֶׂ֣ה׀ נָקֹ֣ד וְטָל֗וּא וְכָל־שֶׂה־חוּם֙ בַּכְּשָׂבִ֔ים וְטָל֥וּא וְנָקֹ֖ד בָּעִזִּ֑ים וְהָיָ֖ה שְׂכָרִֽי׃

‎33 ‏וְעָֽנְתָה־בִּ֤י צִדְקָתִי֙ בְּי֣וֹם מָחָ֔ר כִּֽי־תָב֥וֹא עַל־שְׂכָרִ֖י לְפָנֶ֑יךָ כֹּ֣ל אֲשֶׁר־אֵינֶנּוּ֩ נָקֹ֨ד וְטָל֜וּא בָּֽעִזִּ֗ים וְחוּם֙ בַּכְּשָׂבִ֔ים גָּנ֥וּב ה֖וּא אִתִּֽי׃

‎34 ‏וַיֹּ֥אמֶר לָבָ֖ן הֵ֑ן ל֖וּ יְהִ֥י כִדְבָרֶֽךָ׃

‎35 ‏וַיָּ֣סַר בַּיּוֹם֩ הַה֨וּא אֶת־הַתְּיָשִׁ֜ים הָֽעֲקֻדִּ֣ים וְהַטְּלֻאִ֗ים וְאֵ֤ת כָּל־הָֽעִזִּים֙ הַנְּקֻדּ֣וֹת וְהַטְּלֻאֹ֔ת כֹּ֤ל³ אֲשֶׁר־לָבָן֙ בּ֔וֹ וְכָל־ח֖וּם בַּכְּשָׂבִ֑ים וַיִּתֵּ֖ן בְּיַד־בָּנָֽיו׃

‎36 ‏וַיָּ֗שֶׂם דֶּ֚רֶךְ שְׁלֹ֣שֶׁת יָמִ֔ים בֵּינ֖וֹ וּבֵ֣ין יַעֲקֹ֑ב וְיַעֲקֹ֗ב רֹעֶ֛ה אֶת־צֹ֥אן לָבָ֖ן הַנּוֹתָרֹֽת׃

‎37 ‏וַיִּֽקַּֽח־ל֣וֹ יַעֲקֹ֗ב מַקַּ֥ל לִבְנֶ֛ה לַ֖ח וְל֣וּז וְעֶרְמ֑וֹן¹ וַיְפַצֵּ֤ל בָּהֵן֙ פְּצָל֣וֹת לְבָנ֔וֹת מַחְשֹׂף֙ הַלָּבָ֔ן אֲשֶׁ֖ר עַל־הַמַּקְלֽוֹת׃

‎38 ‏וַיַּצֵּ֗ג אֶת־הַמַּקְלוֹת֙ אֲשֶׁ֣ר פִּצֵּ֔ל בָּרֳהָטִ֖ים בְּשִֽׁקֲת֣וֹת הַמָּ֑יִם אֲשֶׁר֩ תָּבֹ֨אןָ הַצֹּ֤אן לִשְׁתּוֹת֙ לְנֹ֣כַח הַצֹּ֔אן וַיֵּחַ֖מְנָה בְּבֹאָ֥ן לִשְׁתּֽוֹת׃

‎39 ‏וַיֶּחֱמ֥וּ הַצֹּ֖אן אֶל־הַמַּקְל֑וֹת וַתֵּלַ֣דְןָ הַצֹּ֔אן עֲקֻדִּ֥ים נְקֻדִּ֖ים וּטְלֻאִֽים׃

‎40 ‏וְהַכְּשָׂבִים֮ הִפְרִ֣יד יַעֲקֹב֒ וַ֠יִּתֵּן פְּנֵ֨י הַצֹּ֧אן אֶל־עָקֹ֛ד וְכָל־ח֖וּם בְּצֹ֣אן לָבָ֑ן וַיָּֽשֶׁת־ל֤וֹ עֲדָרִים֙ לְבַדּ֔וֹ וְלֹ֥א שָׁתָ֖ם עַל־צֹ֥אן לָבָֽן׃

‎41 ‏וְהָיָ֗ה בְּכָל־יַחֵם֮ הַצֹּ֣אן הַמְקֻשָּׁרוֹת֒ וְשָׂ֨ם יַעֲקֹ֧ב אֶת־הַמַּקְל֛וֹת לְעֵינֵ֥י הַצֹּ֖אן בָּרֳהָטִ֑ים לְיַחְמֵ֖נָּה בַּמַּקְלֽוֹת׃

‎42 ‏וּבְהַעֲטִ֥יף הַצֹּ֖אן לֹ֣א יָשִׂ֑ים וְהָיָ֤ה הָעֲטֻפִים֙ לְלָבָ֔ן וְהַקְּשֻׁרִ֖ים לְיַעֲקֹֽב׃

‎43 ‏וַיִּפְרֹ֥ץ הָאִ֖ישׁ מְאֹ֣ד מְאֹ֑ד וַֽיְהִי־לוֹ֙ צֹ֣אן רַבּ֔וֹת וּשְׁפָחוֹת֙ וַעֲבָדִ֔ים וּגְמַלִּ֖ים וַחֲמֹרִֽים׃

1 watēre’ rāḥēl kî lō’ yāləḏâ ləy^a‘ăqōḇ watəqannē’ rāḥēl ba’ăḥōṯāh watō’mer ’el-y^a‘ăqōḇ hāḇâ-llî ḇānîm wə’im-’ayin mēṯâ ’ānōḵî:

2 wayyiḥar-’af y^a‘ăqōḇ bərāḥēl wayyō’mer hăṯ^aḥaṯ ’ĕlōhîm ’ānōḵî ’ăšer-mān^a‘ mimmēḵə pərî-ḇāṭen:

3 watō’mer hinnēh ’ămāṯî ḇiləhâ bō’ ’ēleyhā wəṯēlēḏ ‘al-birəkay wə’ibāneh ḡam-’ānōḵî mimmennâ:

4 watiten-lwō ’eṯ-biləhâ šifəḥāṯāh lə’iššâ wayyāḇō’ ’ēleyhā y^a‘ăqōḇ:

5 watahar biləhâ watēleḏ ləy^a‘ăqōḇ bēn:

6 watō’mer rāḥēl dānannî ’ĕlōhîm wəḡam šām^a‘ bəqōlî wayyiten-lî bēn ‘al-kēn qārə’â šəmwō dān:

7 watahar ‘wōḏ watēleḏ biləhâ šifəḥaṯ rāḥēl bēn šēnî ləy^a‘ăqōḇ:

8 watō’mer rāḥēl nafətûlê ’ĕlōhîm| nifətalətî ‘im-’ăḥōṯî gam-yāḵōlətî watiqərā’ šəmwō nafətālî:

9 watēre’ lē’â kî ‘āməḏâ milleḏeṯ watiqq^aḥ ’eṯ-ziləpâ šifəḥāṯāh watitēn ’ōṯāh ləy^a‘ăqōḇ lə’iššâ:

10 watēleḏ ziləpâ šifəḥaṯ lē’â ləy^a‘ăqōḇ bēn:

11 watō’mer lē’â bəḡāḏ bā’ ḡāḏ watiqərā’ ’eṯ-šəmwō gāḏ:

12 watēleḏ ziləpâ šifəḥaṯ lē’â bēn šēnî ləy^a‘ăqōḇ:

13 watō’mer lē’â bə’āšərî kî ’iššərûnî bānwōṯ watiqərā’ ’eṯ-šəmwō ’āšēr:

14 wayyēleḵə rə’ûḇēn bîmê qəṣîr-ḥiṭṭîm wayyiməṣā’ ḏûḏā’îm baśśāḏeh wayyāḇē’ ’ōṯām ’el-lē’â ’immwō watō’mer rāḥēl ’el-lē’â tənî-nā’ lî midûḏā’ê bənēḵə:

15 watō’mer lāh hamə‘aṭ q^aḥətēḵə ’eṯ-’îšî wəlāq^aḥaṯ gam ’eṯ-dûḏā’ê bənî watō’mer rāḥēl lāḵēn yišəkaḇ ‘immāḵə hallayəlâ t^aḥaṯ dûḏā’ê ḇənēḵə:

16 wayyāḇō’ y^a‘ăqōḇ³ min-haśśāḏeh bā‘ereḇ watēṣē’ lē’â liqərā’ṯwō watō’mer ’ēlay tāḇwō’ kî śāḵōr śəḵarətîḵā bəḏûḏā’ê bənî wayyišəkaḇ ‘immāh ballayəlâ hû’:

17 wayyišəm^a‘ ’ĕlōhîm ’el-lē’â watahar watēleḏ ləy^a‘ăqōḇ bēn ḥămîšî:

18 watō’mer lē’â nāṯan ’ĕlōhîm śəḵārî ’ăšer-nāṯatî šifəḥāṯî lə’îšî watiqərā’ šəmwō yiśśāsḵār:

19 watahar ‘wōḏ lē’â watēleḏ bēn-šiššî lləy^a‘ăqōḇ:¹

20 watō’mer lē’â zəḇāḏanî ’ĕlōhîm| ’ōṯî zēḇeḏ ṭwōḇ hap^a‘am yizəbəlēnî ’îšî kî-yālaḏətî lwō šiššâ ḇānîm watiqərā’ ’eṯ-šəmwō zəḇulûn:

21 wə’^aḥar yāləḏâ baṯ watiqərā’ ’eṯ-šəmāh dînâ:

22 wayyizəkōr ’ĕlōhîm ’eṯ-rāḥēl wayyišəm^a‘ ’ēleyhā ’ĕlōhîm wayyifət^aḥ ’eṯ-r^aḥəmāh:

23 watahar watēleḏ bēn watō’mer ’āsaf ’ĕlōhîm ’eṯ-ḥerəpāṯî:

24 watiqərā’ ’eṯ-šəmwō ywōsēf lē’mōr yōsēf yəhwâ lî bēn ’^aḥēr:

25 wayəhî ka’ăšer yāləḏâ rāḥēl ’eṯ-ywōsēf wayyō’mer y^a‘ăqōḇ ’el-lāḇān šalləḥēnî wə’ēləḵâ ’el-məqwōmî ûlə’arəṣî:

26 tənâ ’eṯ-nāšay wə’eṯ-yəlāḏay ’ăšer ‘āḇaḏətî ’ōṯəḵā bâēn wə’ēlēḵâ kî ’atâ yāḏ^a‘ətā ’eṯ-‘ăḇōḏāṯî ’ăšer ‘ăḇaḏətîḵā:

27 wayyō’mer ’ēlāyw lāḇān ’im-nā’ māṣā’ṯî ḥēn bə‘êneyḵā niḥašətî wayəḇārăḵēnî yəhwâ biḡəlāleḵā:

28 wayyō’mar nāqəḇâ śəḵārəḵā ‘ālay wə’etēnâ:

29 wayyō’mer ’ēlāyw ’atâ yāḏ^a‘ətā ’ēṯ ’ăšer ‘ăḇaḏətîḵā wə’ēṯ ’ăšer-hāyâ miqənəḵā ’itî:

30 kî mə‘aṭ ’ăšer-hāyâ ləḵā ləfānay wayyifərōṣ lārōḇ wayəḇāreḵə yəhwâ ’ōṯəḵā ləraḡəlî wə‘atâ māṯay ’e‘ĕśeh ḡam-’ānōḵî ləḇêṯî:

31 wayyō’mer mâ ’eten-lāḵə wayyō’mer y^a‘ăqōḇ lō’-ṯiten-lî³ mə’ûmâ ’im-t^a‘ăśeh-llî hadāḇār hazzeh ’āšûḇâ ’erə‘eh ṣō’nəḵā ’ešəmōr:

32 ’e‘ĕḇōr bəḵāl-ṣō’nəḵā hayywōm hāsēr miššām kāl-śeh| nāqōḏ wəṭālû’ wəḵāl-śeh-ḥûm bakəśāḇîm wəṭālû’ wənāqōḏ bā‘izzîm wəhāyâ śəḵārî:

33 wə‘ānəṯâ-bî ṣiḏəqāṯî bəywōm māḥār kî-ṯāḇwō’ ‘al-śəḵārî ləfāneyḵā kōl ’ăšer-’ênennû nāqōḏ wəṭālû’ bā‘izzîm wəḥûm bakəśāḇîm gānûḇ hû’ ’itî:

34 wayyō’mer lāḇān hēn lû yəhî ḵiḏəḇāreḵā:

35 wayyāsar bayywōm hahû’ ’eṯ-hatəyāšîm hā‘ăqudîm wəhaṭṭəlu’îm wə’ēṯ kāl-hā‘izzîm hannəqudwōṯ wəhaṭṭəlu’ōṯ kōl³ ’ăšer-lāḇān bwō wəḵāl-ḥûm bakəśāḇîm wayyitēn bəyaḏ-bānāyw:

36 wayyāśem dereḵə šəlōšeṯ yāmîm bênwō ûḇên y^a‘ăqōḇ wəy^a‘ăqōḇ rō‘eh ’eṯ-ṣō’n lāḇān hannwōṯārōṯ:

37 wayyiqq^aḥ-lwō y^a‘ăqōḇ maqqal liḇəneh l^aḥ wəlûz wə‘erəmwōn¹ wayəfaṣṣēl bâēn pəṣālwōṯ ləḇānwōṯ m^aḥəśōf hallāḇān ’ăšer ‘al-hammaqəlwōṯ:

38 wayyaṣṣēḡ ’eṯ-hammaqəlwōṯ ’ăšer piṣṣēl bārŏhāṭîm bəšiqăṯwōṯ hammāyim ’ăšer tāḇō’nā haṣṣō’n lišətwōṯ lənōḵ^aḥ haṣṣō’n wayyēḥamənâ bəḇō’ān lišətwōṯ:

39 wayyeḥĕmû haṣṣō’n ’el-hammaqəlwōṯ watēlaḏənā haṣṣō’n ‘ăqudîm nəqudîm ûṭəlu’îm:

40 wəhakəśāḇîm hifərîḏ y^a‘ăqōḇ wayyitēn pənê haṣṣō’n ’el-‘āqōḏ wəḵāl-ḥûm bəṣō’n lāḇān wayyāšeṯ-lwō ‘ăḏārîm ləḇadwō wəlō’ šāṯām ‘al-ṣō’n lāḇān:

41 wəhāyâ bəḵāl-y^aḥēm haṣṣō’n haməquššārwōṯ wəśām y^a‘ăqōḇ ’eṯ-hammaqəlwōṯ lə‘ênê haṣṣō’n bārŏhāṭîm ləy^aḥəmēnnâ bammaqəlwōṯ:

42 ûḇəh^a‘ăṭîf haṣṣō’n lō’ yāśîm wəhāyâ hā‘ăṭufîm ləlāḇān wəhaqqəšurîm ləy^a‘ăqōḇ:

43 wayyifərōṣ hā’îš mə’ōḏ mə’ōḏ wayəhî-lwō ṣō’n rabwōṯ ûšəfāḥwōṯ w^a‘ăḇāḏîm ûḡəmallîm w^aḥămōrîm: