Genesis (Bereshit) Chapter 32

‎1 ‏וַיַּשְׁכֵּ֨ם לָבָ֜ן בַּבֹּ֗קֶר וַיְנַשֵּׁ֧ק לְבָנָ֛יו וְלִבְנוֹתָ֖יו וַיְבָ֣רֶךְ אֶתְהֶ֑ם וַיֵּ֛לֶךְ וַיָּ֥שָׁב לָבָ֖ן לִמְקֹמֽוֹ׃

‎2 ‏וְיַעֲקֹ֖ב הָלַ֣ךְ לְדַרְכּ֑וֹ וַיִּפְגְּעוּ־ב֖וֹ מַלְאֲכֵ֥י אֱלֹהִֽים׃

‎3 ‏וַיֹּ֤אמֶר יַעֲקֹב֙ כַּאֲשֶׁ֣ר רָאָ֔ם מַחֲנֵ֥ה אֱלֹהִ֖ים זֶ֑ה וַיִּקְרָ֛א שֵֽׁם־הַמָּק֥וֹם הַה֖וּא מַֽחֲנָֽיִם׃ פ

‎4 ‏וַיִּשְׁלַ֨ח יַעֲקֹ֤ב מַלְאָכִים֙ לְפָנָ֔יו אֶל־עֵשָׂ֖ו אָחִ֑יו אַ֥רְצָה שֵׂעִ֖יר שְׂדֵ֥ה אֱדֽוֹם׃

‎5 ‏וַיְצַ֤ו אֹתָם֙ לֵאמֹ֔ר כֹּ֣ה תֹאמְר֔וּן לַֽאדֹנִ֖י לְעֵשָׂ֑ו כֹּ֤ה אָמַר֙ עַבְדְּךָ֣³ יַעֲקֹ֔ב עִם־לָבָ֣ן גַּ֔רְתִּי וָאֵחַ֖ר עַד־עָֽתָּה׃

‎6 ‏וַֽיְהִי־לִי֙ שׁ֣וֹר וַחֲמ֔וֹר צֹ֖אן וְעֶ֣בֶד וְשִׁפְחָ֑ה וָֽאֶשְׁלְחָה֙ לְהַגִּ֣יד לַֽאדֹנִ֔י לִמְצֹא־חֵ֖ן בְּעֵינֶֽיךָ׃

‎7 ‏וַיָּשֻׁ֙בוּ֙ הַמַּלְאָכִ֔ים אֶֽל־יַעֲקֹ֖ב לֵאמֹ֑ר בָּ֤אנוּ אֶל־אָחִ֙יךָ֙ אֶל־עֵשָׂ֔ו וְגַם֙ הֹלֵ֣ךְ לִקְרָֽאתְךָ֔ וְאַרְבַּע־מֵא֥וֹת אִ֖ישׁ עִמּֽוֹ׃

‎8 ‏וַיִּירָ֧א יַעֲקֹ֛ב מְאֹ֖ד וַיֵּ֣צֶר ל֑וֹ וַיַּ֜חַץ אֶת־הָעָ֣ם אֲשֶׁר־אִתּ֗וֹ וְאֶת־הַצֹּ֧אן וְאֶת־הַבָּקָ֛ר וְהַגְּמַלִּ֖ים לִשְׁנֵ֥י מַחֲנֽוֹת׃

‎9 ‏וַיֹּ֕אמֶר אִם־יָב֥וֹא עֵשָׂ֛ו אֶל־הַמַּחֲנֶ֥ה הָאַחַ֖ת וְהִכָּ֑הוּ וְהָיָ֛ה הַמַּחֲנֶ֥ה הַנִּשְׁאָ֖ר לִפְלֵיטָֽה׃

‎10 ‏וַיֹּאמֶר֮ יַעֲקֹב֒ אֱלֹהֵי֙ אָבִ֣י אַבְרָהָ֔ם וֵאלֹהֵ֖י אָבִ֣י יִצְחָ֑ק יְהוָ֞ה הָאֹמֵ֣ר אֵלַ֗י שׁ֧וּב לְאַרְצְךָ֛ וּלְמוֹלַדְתְּךָ֖ וְאֵיטִ֥יבָה עִמָּֽךְ׃

‎11 ‏קָטֹ֜נְתִּי מִכֹּ֤ל הַחֲסָדִים֙ וּמִכָּל־הָ֣אֱמֶ֔ת אֲשֶׁ֥ר עָשִׂ֖יתָ אֶת־עַבְדֶּ֑ךָ כִּ֣י בְמַקְלִ֗י עָבַ֙רְתִּי֙ אֶת־הַיַּרְדֵּ֣ן הַזֶּ֔ה וְעַתָּ֥ה הָיִ֖יתִי לִשְׁנֵ֥י מַחֲנֽוֹת׃

‎12 ‏הַצִּילֵ֥נִי נָ֛א מִיַּ֥ד אָחִ֖י מִיַּ֣ד עֵשָׂ֑ו כִּֽי־יָרֵ֤א אָנֹכִי֙ אֹת֔וֹ פֶּן־יָב֣וֹא וְהִכַּ֔נִי אֵ֖ם עַל־בָּנִֽים׃

‎13 ‏וְאַתָּ֣ה אָמַ֔רְתָּ הֵיטֵ֥ב אֵיטִ֖יב עִמָּ֑ךְ וְשַׂמְתִּ֤י אֶֽת־זַרְעֲךָ֙ כְּח֣וֹל הַיָּ֔ם אֲשֶׁ֥ר לֹא־יִסָּפֵ֖ר מֵרֹֽב׃

‎14 ‏וַיָּ֥לֶן שָׁ֖ם בַּלַּ֣יְלָה הַה֑וּא וַיִּקַּ֞ח מִן־הַבָּ֧א בְיָד֛וֹ מִנְחָ֖ה לְעֵשָׂ֥ו אָחִֽיו׃

‎15 ‏עִזִּ֣ים מָאתַ֔יִם וּתְיָשִׁ֖ים עֶשְׂרִ֑ים רְחֵלִ֥ים מָאתַ֖יִם וְאֵילִ֥ים עֶשְׂרִֽים׃

‎16 ‏גְּמַלִּ֧ים מֵינִיק֛וֹת וּבְנֵיהֶ֖ם שְׁלֹשִׁ֑ים פָּר֤וֹת אַרְבָּעִים֙ וּפָרִ֣ים עֲשָׂרָ֔ה אֲתֹנֹ֣ת עֶשְׂרִ֔ים וַעְיָרִ֖ם¹ עֲשָׂרָֽה׃

‎17 ‏וַיִּתֵּן֙ בְּיַד־עֲבָדָ֔יו עֵ֥דֶר עֵ֖דֶר לְבַדּ֑וֹ וַ֤יֹּאמֶר אֶל־עֲבָדָיו֙ עִבְר֣וּ לְפָנַ֔י וְרֶ֣וַח תָּשִׂ֔ימוּ בֵּ֥ין עֵ֖דֶר וּבֵ֥ין עֵֽדֶר׃

‎18 ‏וַיְצַ֥ו אֶת־הָרִאשׁ֖וֹן לֵאמֹ֑ר כִּ֣י יִֽפְגָּשְׁךָ֞¹ עֵשָׂ֣ו אָחִ֗י וִשְׁאֵֽלְךָ֙¹ לֵאמֹ֔ר לְמִי־אַ֙תָּה֙ וְאָ֣נָה תֵלֵ֔ךְ וּלְמִ֖י אֵ֥לֶּה לְפָנֶֽיךָ׃

‎19 ‏וְאָֽמַרְתָּ֙ לְעַבְדְּךָ֣ לְיַעֲקֹ֔ב מִנְחָ֥ה הִוא֙ שְׁלוּחָ֔ה לַֽאדֹנִ֖י לְעֵשָׂ֑ו וְהִנֵּ֥ה גַם־ה֖וּא אַחֲרֵֽינוּ׃

‎20 ‏וַיְצַ֞ו גַּ֣ם אֶת־הַשֵּׁנִ֗י גַּ֚ם אֶת־הַשְּׁלִישִׁ֔י גַּ֚ם אֶת־כָּל־הַהֹ֣לְכִ֔ים אַחֲרֵ֥י הָעֲדָרִ֖ים לֵאמֹ֑ר כַּדָּבָ֤ר הַזֶּה֙ תְּדַבְּר֣וּן אֶל־עֵשָׂ֔ו בְּמֹצַאֲכֶ֖ם אֹתֽוֹ׃

‎21 ‏וַאֲמַרְתֶּ֕ם גַּ֗ם הִנֵּ֛ה עַבְדְּךָ֥ יַעֲקֹ֖ב אַחֲרֵ֑ינוּ כִּֽי־אָמַ֞ר אֲכַפְּרָ֣ה פָנָ֗יו בַּמִּנְחָה֙ הַהֹלֶ֣כֶת לְפָנָ֔י וְאַחֲרֵי־כֵן֙ אֶרְאֶ֣ה פָנָ֔יו אוּלַ֖י יִשָּׂ֥א פָנָֽי׃

‎22 ‏וַתַּעֲבֹ֥ר הַמִּנְחָ֖ה עַל־פָּנָ֑יו וְה֛וּא לָ֥ן בַּלַּֽיְלָה־הַה֖וּא בַּֽמַּחֲנֶֽה׃

‎23 ‏וַיָּ֣קָם׀ בַּלַּ֣יְלָה ה֗וּא וַיִּקַּ֞ח אֶת־שְׁתֵּ֤י נָשָׁיו֙ וְאֶת־שְׁתֵּ֣י שִׁפְחֹתָ֔יו וְאֶת־אַחַ֥ד עָשָׂ֖ר יְלָדָ֑יו וַֽיַּעֲבֹ֔ר אֵ֖ת מַעֲבַ֥ר יַבֹּֽק׃

‎24 ‏וַיִּקָּחֵ֔ם וַיַּֽעֲבִרֵ֖ם אֶת־הַנָּ֑חַל וַֽיַּעֲבֵ֖ר אֶת־אֲשֶׁר־לוֹ׃¹

‎25 ‏וַיִּוָּתֵ֥ר יַעֲקֹ֖ב לְבַדּ֑וֹ וַיֵּאָבֵ֥ק אִישׁ֙ עִמּ֔וֹ עַ֖ד עֲל֥וֹת הַשָּֽׁחַר׃

‎26 ‏וַיַּ֗רְא כִּ֣י לֹ֤א יָכֹל֙ ל֔וֹ וַיִּגַּ֖ע בְּכַף־יְרֵכ֑וֹ וַתֵּ֙קַע֙ כַּף־יֶ֣רֶךְ יַעֲקֹ֔ב בְּהֵֽאָבְק֖וֹ עִמּֽוֹ׃

‎27 ‏וַיֹּ֣אמֶר שַׁלְּחֵ֔נִי כִּ֥י עָלָ֖ה הַשָּׁ֑חַר וַיֹּ֙אמֶר֙ לֹ֣א אֲשַֽׁלֵּחֲךָ֔ כִּ֖י אִם־בֵּרַכְתָּֽנִי׃

‎28 ‏וַיֹּ֥אמֶר אֵלָ֖יו מַה־שְּׁמֶ֑ךָ וַיֹּ֖אמֶר יַעֲקֹֽב׃

‎29 ‏וַיֹּ֗אמֶר לֹ֤א יַעֲקֹב֙ יֵאָמֵ֥ר עוֹד֙ שִׁמְךָ֔ כִּ֖י אִם־יִשְׂרָאֵ֑ל כִּֽי־שָׂרִ֧יתָ עִם־אֱלֹהִ֛ים וְעִם־אֲנָשִׁ֖ים וַתּוּכָֽל׃

‎30 ‏וַיִּשְׁאַ֣ל יַעֲקֹ֗ב וַיֹּ֙אמֶר֙ הַגִּֽידָה־נָּ֣א שְׁמֶ֔ךָ וַיֹּ֕אמֶר לָ֥מָּה זֶּ֖ה תִּשְׁאַ֣ל לִשְׁמִ֑י וַיְבָ֥רֶךְ אֹת֖וֹ שָֽׁם׃

‎31 ‏וַיִּקְרָ֧א יַעֲקֹ֛ב שֵׁ֥ם הַמָּק֖וֹם פְּנִיאֵ֑ל כִּֽי־רָאִ֤יתִי אֱלֹהִים֙ פָּנִ֣ים אֶל־פָּנִ֔ים וַתִּנָּצֵ֖ל נַפְשִֽׁי׃

‎32 ‏וַיִּֽזְרַֽח־ל֣וֹ הַשֶּׁ֔מֶשׁ כַּאֲשֶׁ֥ר עָבַ֖ר אֶת־פְּנוּאֵ֑ל וְה֥וּא צֹלֵ֖עַ עַל־יְרֵכֽוֹ׃

‎33 ‏עַל־כֵּ֡ן לֹֽא־יֹאכְל֨וּ בְנֵֽי־יִשְׂרָאֵ֜ל אֶת־גִּ֣יד הַנָּשֶׁ֗ה אֲשֶׁר֙ עַל־כַּ֣ף הַיָּרֵ֔ךְ עַ֖ד הַיּ֣וֹם הַזֶּ֑ה כִּ֤י נָגַע֙ בְּכַף־יֶ֣רֶךְ יַעֲקֹ֔ב בְּגִ֖יד הַנָּשֶֽׁה׃

1 wayyašəkēm lāḇān babōqer wayənaššēq ləḇānāyw wəliḇənwōṯāyw wayəḇāreḵə ’eṯəhem wayyēleḵə wayyāšāḇ lāḇān liməqōmwō:

2 wəy^a‘ăqōḇ hālaḵə ləḏarəkwō wayyifəgə‘û-ḇwō malə’ăḵê ’ĕlōhîm:

3 wayyō’mer y^a‘ăqōḇ ka’ăšer rā’ām m^aḥănēh ’ĕlōhîm zeh wayyiqərā’ šēm-hammāqwōm hahû’ m^aḥănāyim: f

4 wayyišəl^aḥ y^a‘ăqōḇ malə’āḵîm ləfānāyw ’el-‘ēśāw ’āḥîw ’arəṣâ śē‘îr śəḏēh ’ĕḏwōm:

5 wayəṣaw ’ōṯām lē’mōr kōh ṯō’mərûn la’ḏōnî lə‘ēśāw kōh ’āmar ‘aḇədəḵā³ y^a‘ăqōḇ ‘im-lāḇān garətî wā’ēḥar ‘aḏ-‘ātâ:

6 wayəhî-lî šwōr w^aḥămwōr ṣō’n wə‘eḇeḏ wəšifəḥâ wā’ešələḥâ ləhagîḏ la’ḏōnî liməṣō’-ḥēn bə‘êneyḵā:

7 wayyāšuḇû hammalə’āḵîm ’el-y^a‘ăqōḇ lē’mōr bā’nû ’el-’āḥîḵā ’el-‘ēśāw wəḡam hōlēḵə liqərā’ṯəḵā wə’arəb^a‘-mē’wōṯ ’îš ‘immwō:

8 wayyîrā’ y^a‘ăqōḇ mə’ōḏ wayyēṣer lwō wayy^aḥaṣ ’eṯ-hā‘ām ’ăšer-’itwō wə’eṯ-haṣṣō’n wə’eṯ-habāqār wəhagəmallîm lišənê m^aḥănwōṯ:

9 wayyō’mer ’im-yāḇwō’ ‘ēśāw ’el-hamm^aḥăneh hā’^aḥaṯ wəhikâû wəhāyâ hamm^aḥăneh hannišə’ār lifəlêṭâ:

10 wayyō’mer y^a‘ăqōḇ ’ĕlōhê ’āḇî ’aḇərâām wē’lōhê ’āḇî yiṣəḥāq yəhwâ hā’ōmēr ’ēlay šûḇ lə’arəṣəḵā ûləmwōlaḏətəḵā wə’êṭîḇâ ‘immāḵə:

11 qāṭōnətî mikōl h^aḥăsāḏîm ûmikāl-hā’ĕmeṯ ’ăšer ‘āśîṯā ’eṯ-‘aḇədeḵā kî ḇəmaqəlî ‘āḇarətî ’eṯ-hayyarədēn hazzeh wə‘atâ hāyîṯî lišənê m^aḥănwōṯ:

12 haṣṣîlēnî nā’ mîyaḏ ’āḥî mîyaḏ ‘ēśāw kî-yārē’ ’ānōḵî ’ōṯwō pen-yāḇwō’ wəhikanî ’ēm ‘al-bānîm:

13 wə’atâ ’āmarətā hêṭēḇ ’êṭîḇ ‘immāḵə wəśamətî ’eṯ-zarə‘ăḵā kəḥwōl hayyām ’ăšer lō’-yissāfēr mērōḇ:

14 wayyālen šām ballayəlâ hahû’ wayyiqq^aḥ min-habā’ ḇəyāḏwō minəḥâ lə‘ēśāw ’āḥîw:

15 ‘izzîm mā’ṯayim ûṯəyāšîm ‘eśərîm rəḥēlîm mā’ṯayim wə’êlîm ‘eśərîm:

16 gəmallîm mênîqwōṯ ûḇənêhem šəlōšîm pārwōṯ ’arəbā‘îm ûfārîm ‘ăśārâ ’ăṯōnōṯ ‘eśərîm w^a‘əyārim¹ ‘ăśārâ:

17 wayyitēn bəyaḏ-‘ăḇāḏāyw ‘ēḏer ‘ēḏer ləḇadwō wayyō’mer ’el-‘ăḇāḏāyw ‘iḇərû ləfānay wərew^aḥ tāśîmû bên ‘ēḏer ûḇên ‘ēḏer:

18 wayəṣaw ’eṯ-hāri’šwōn lē’mōr kî yifəgāšəḵā¹ ‘ēśāw ’āḥî wišə’ēləḵā¹ lē’mōr ləmî-’atâ wə’ānâ ṯēlēḵə ûləmî ’ēlleh ləfāneyḵā:

19 wə’āmarətā lə‘aḇədəḵā ləy^a‘ăqōḇ minəḥâ hiw’ šəlûḥâ la’ḏōnî lə‘ēśāw wəhinnēh ḡam-hû’ ’^aḥărênû:

20 wayəṣaw gam ’eṯ-haššēnî gam ’eṯ-haššəlîšî gam ’eṯ-kāl-hahōləḵîm ’^aḥărê hā‘ăḏārîm lē’mōr kadāḇār hazzeh təḏabərûn ’el-‘ēśāw bəmōṣa’ăḵem ’ōṯwō:

21 wa’ămarətem gam hinnēh ‘aḇədəḵā y^a‘ăqōḇ ’^aḥărênû kî-’āmar ’ăḵapərâ fānāyw bamminəḥâ hahōleḵeṯ ləfānāy wə’^aḥărê-ḵēn ’erə’eh fānāyw ’ûlay yiśśā’ fānāy:

22 wat^a‘ăḇōr hamminəḥâ ‘al-pānāyw wəhû’ lān ballayəlâ-hahû’ bamm^aḥăneh:

23 wayyāqām| ballayəlâ hû’ wayyiqq^aḥ ’eṯ-šətê nāšāyw wə’eṯ-šətê šifəḥōṯāyw wə’eṯ-’^aḥaḏ ‘āśār yəlāḏāyw wayy^a‘ăḇōr ’ēṯ m^a‘ăḇar yabōq:

24 wayyiqqāḥēm wayy^a‘ăḇirēm ’eṯ-hannāḥal wayy^a‘ăḇēr ’eṯ-’ăšer-lwō:¹

25 wayyiûāṯēr y^a‘ăqōḇ ləḇadwō wayyē’āḇēq ’îš ‘immwō ‘aḏ ‘ălwōṯ haššāḥar:

26 wayyarə’ kî lō’ yāḵōl lwō wayyig^a‘ bəḵaf-yərēḵwō watēq^a‘ kaf-yereḵə y^a‘ăqōḇ bəhē’āḇəqwō ‘immwō:

27 wayyō’mer šalləḥēnî kî ‘ālâ haššāḥar wayyō’mer lō’ ’ăšallēḥăḵā kî ’im-bēraḵətānî:

28 wayyō’mer ’ēlāyw mah-ššəmeḵā wayyō’mer y^a‘ăqōḇ:

29 wayyō’mer lō’ y^a‘ăqōḇ yē’āmēr ‘wōḏ šiməḵā kî ’im-yiśərā’ēl kî-śārîṯā ‘im-’ĕlōhîm wə‘im-’ănāšîm watûḵāl:

30 wayyišə’al y^a‘ăqōḇ wayyō’mer hagîḏâ-nnā’ šəmeḵā wayyō’mer lāmmâ zzeh tišə’al lišəmî wayəḇāreḵə ’ōṯwō šām:

31 wayyiqərā’ y^a‘ăqōḇ šēm hammāqwōm pənî’ēl kî-rā’îṯî ’ĕlōhîm pānîm ’el-pānîm watinnāṣēl nafəšî:

32 wayyizər^aḥ-lwō haššemeš ka’ăšer ‘āḇar ’eṯ-pənû’ēl wəhû’ ṣōlē‘a ‘al-yərēḵwō:

33 ‘al-kēn lō’-yō’ḵəlû ḇənê-yiśərā’ēl ’eṯ-gîḏ hannāšeh ’ăšer ‘al-kaf hayyārēḵə ‘aḏ hayywōm hazzeh kî nāḡ^a‘ bəḵaf-yereḵə y^a‘ăqōḇ bəḡîḏ hannāšeh: