Genesis (Bereshit) Chapter 41

‎1 ‏וַיְהִ֕י מִקֵּ֖ץ שְׁנָתַ֣יִם יָמִ֑ים וּפַרְעֹ֣ה חֹלֵ֔ם וְהִנֵּ֖ה עֹמֵ֥ד עַל־הַיְאֹֽר׃

‎2 ‏וְהִנֵּ֣ה מִן־הַיְאֹ֗ר עֹלֹת֙ שֶׁ֣בַע פָּר֔וֹת יְפ֥וֹת מַרְאֶ֖ה וּבְרִיאֹ֣ת בָּשָׂ֑ר וַתִּרְעֶ֖ינָה בָּאָֽחוּ׃

‎3 ‏וְהִנֵּ֞ה שֶׁ֧בַע פָּר֣וֹת אֲחֵר֗וֹת עֹל֤וֹת אַחֲרֵיהֶן֙ מִן־הַיְאֹ֔ר רָע֥וֹת מַרְאֶ֖ה וְדַקּ֣וֹת בָּשָׂ֑ר וַֽתַּעֲמֹ֛דְנָה אֵ֥צֶל הַפָּר֖וֹת עַל־שְׂפַ֥ת הַיְאֹֽר׃

‎4 ‏וַתֹּאכַ֣לְנָה הַפָּר֗וֹת רָע֤וֹת הַמַּרְאֶה֙ וְדַקֹּ֣ת הַבָּשָׂ֔ר אֵ֚ת שֶׁ֣בַע הַפָּר֔וֹת יְפֹ֥ת הַמַּרְאֶ֖ה וְהַבְּרִיאֹ֑ת וַיִּיקַ֖ץ פַּרְעֹֽה׃

‎5 ‏וַיִּישָׁ֕ן וַֽיַּחֲלֹ֖ם שֵׁנִ֑ית וְהִנֵּ֣ה׀ שֶׁ֣בַע שִׁבֳּלִ֗ים עֹל֛וֹת בְּקָנֶ֥ה אֶחָ֖ד בְּרִיא֥וֹת וְטֹבֽוֹת׃

‎6 ‏וְהִנֵּה֙ שֶׁ֣בַע שִׁבֳּלִ֔ים דַּקּ֖וֹת וּשְׁדוּפֹ֣ת קָדִ֑ים צֹמְח֖וֹת אַחֲרֵיהֶֽן׃

‎7 ‏וַתִּבְלַ֙עְנָה֙ הַשִּׁבֳּלִ֣ים הַדַּקּ֔וֹת אֵ֚ת שֶׁ֣בַע הַֽשִּׁבֳּלִ֔ים הַבְּרִיא֖וֹת וְהַמְּלֵא֑וֹת וַיִּיקַ֥ץ פַּרְעֹ֖ה וְהִנֵּ֥ה חֲלֽוֹם׃

‎8 ‏וַיְהִ֤י בַבֹּ֙קֶר֙ וַתִּפָּ֣עֶם רוּח֔וֹ וַיִּשְׁלַ֗ח וַיִּקְרָ֛א אֶת־כָּל־חַרְטֻמֵּ֥י מִצְרַ֖יִם וְאֶת־כָּל־חֲכָמֶ֑יהָ וַיְסַפֵּ֨ר פַּרְעֹ֤ה לָהֶם֙ אֶת־חֲלֹמ֔וֹ וְאֵין־פּוֹתֵ֥ר אוֹתָ֖ם לְפַרְעֹֽה׃

‎9 ‏וַיְדַבֵּר֙ שַׂ֣ר הַמַּשְׁקִ֔ים אֶת־פַּרְעֹ֖ה לֵאמֹ֑ר אֶת־חֲטָאַ֕י אֲנִ֖י מַזְכִּ֥יר הַיּֽוֹם׃

‎10 ‏פַּרְעֹ֖ה קָצַ֣ף עַל־עֲבָדָ֑יו וַיִּתֵּ֨ן אֹתִ֜י בְּמִשְׁמַ֗ר בֵּ֚ית שַׂ֣ר הַטַּבָּחִ֔ים אֹתִ֕י וְאֵ֖ת שַׂ֥ר הָאֹפִֽים׃

‎11 ‏וַנַּֽחַלְמָ֥ה חֲל֛וֹם בְּלַ֥יְלָה אֶחָ֖ד אֲנִ֣י וָה֑וּא אִ֛ישׁ כְּפִתְר֥וֹן חֲלֹמ֖וֹ חָלָֽמְנוּ׃

‎12 ‏וְשָׁ֨ם אִתָּ֜נוּ נַ֣עַר עִבְרִ֗י עֶ֚בֶד לְשַׂ֣ר הַטַּבָּחִ֔ים וַנְּ֨סַפֶּר־ל֔וֹ¹ וַיִּפְתָּר־לָ֖נוּ אֶת־חֲלֹמֹתֵ֑ינוּ אִ֥ישׁ כַּחֲלֹמ֖וֹ פָּתָֽר׃

‎13 ‏וַיְהִ֛י כַּאֲשֶׁ֥ר פָּֽתַר־לָ֖נוּ כֵּ֣ן הָיָ֑ה אֹתִ֛י הֵשִׁ֥יב עַל־כַּנִּ֖י וְאֹת֥וֹ תָלָֽה׃

‎14 ‏וַיִּשְׁלַ֤ח פַּרְעֹה֙ וַיִּקְרָ֣א אֶת־יוֹסֵ֔ף וַיְרִיצֻ֖הוּ מִן־הַבּ֑וֹר וַיְגַלַּח֙ וַיְחַלֵּ֣ף שִׂמְלֹתָ֔יו וַיָּבֹ֖א אֶל־פַּרְעֹֽה׃

‎15 ‏וַיֹּ֤אמֶר פַּרְעֹה֙ אֶל־יוֹסֵ֔ף חֲל֣וֹם חָלַ֔מְתִּי וּפֹתֵ֖ר אֵ֣ין אֹת֑וֹ וַאֲנִ֗י שָׁמַ֤עְתִּי עָלֶ֙יךָ֙ לֵאמֹ֔ר תִּשְׁמַ֥ע חֲל֖וֹם לִפְתֹּ֥ר אֹתֽוֹ׃

‎16 ‏וַיַּ֨עַן יוֹסֵ֧ף אֶת־פַּרְעֹ֛ה לֵאמֹ֖ר בִּלְעָדָ֑י אֱלֹהִ֕ים יַעֲנֶ֖ה אֶת־שְׁל֥וֹם פַּרְעֹֽה׃

‎17 ‏וַיְדַבֵּ֥ר פַּרְעֹ֖ה אֶל־יוֹסֵ֑ף בַּחֲלֹמִ֕י הִנְנִ֥י עֹמֵ֖ד עַל־שְׂפַ֥ת הַיְאֹֽר׃

‎18 ‏וְהִנֵּ֣ה מִן־הַיְאֹ֗ר עֹלֹת֙ שֶׁ֣בַע פָּר֔וֹת בְּרִיא֥וֹת בָּשָׂ֖ר וִיפֹ֣ת תֹּ֑אַר וַתִּרְעֶ֖ינָה בָּאָֽחוּ׃

‎19 ‏וְהִנֵּ֞ה שֶֽׁבַע־פָּר֤וֹת אֲחֵרוֹת֙ עֹל֣וֹת אַחֲרֵיהֶ֔ן דַּלּ֨וֹת וְרָע֥וֹת תֹּ֛אַר מְאֹ֖ד וְרַקּ֣וֹת בָּשָׂ֑ר לֹֽא־רָאִ֧יתִי כָהֵ֛נָּה בְּכָל־אֶ֥רֶץ מִצְרַ֖יִם לָרֹֽעַ׃

‎20 ‏וַתֹּאכַ֙לְנָה֙ הַפָּר֔וֹת הָרַקּ֖וֹת וְהָרָע֑וֹת אֵ֣ת שֶׁ֧בַע הַפָּר֛וֹת הָרִאשֹׁנ֖וֹת הַבְּרִיאֹֽת׃

‎21 ‏וַתָּבֹ֣אנָה אֶל־קִרְבֶּ֗נָה וְלֹ֤א נוֹדַע֙ כִּי־בָ֣אוּ אֶל־קִרְבֶּ֔נָה וּמַרְאֵיהֶ֣ן רַ֔ע כַּאֲשֶׁ֖ר בַּתְּחִלָּ֑ה וָאִיקָֽץ׃

‎22 ‏וָאֵ֖רֶא בַּחֲלֹמִ֑י וְהִנֵּ֣ה׀ שֶׁ֣בַע שִׁבֳּלִ֗ים עֹלֹ֛ת בְּקָנֶ֥ה אֶחָ֖ד מְלֵאֹ֥ת וְטֹבֽוֹת׃

‎23 ‏וְהִנֵּה֙ שֶׁ֣בַע שִׁבֳּלִ֔ים צְנֻמ֥וֹת דַּקּ֖וֹת שְׁדֻפ֣וֹת קָדִ֑ים צֹמְח֖וֹת אַחֲרֵיהֶֽם׃

‎24 ‏וַתִּבְלַ֙עְןָ֙ הָשִׁבֳּלִ֣ים¹ הַדַּקֹּ֔ת אֵ֛ת שֶׁ֥בַע הַֽשִׁבֳּלִ֖ים הַטֹּב֑וֹת וָֽאֹמַר֙ אֶל־הַֽחַרְטֻמִּ֔ים וְאֵ֥ין מַגִּ֖יד לִֽי׃

‎25 ‏וַיֹּ֤אמֶר יוֹסֵף֙ אֶל־פַּרְעֹ֔ה חֲל֥וֹם פַּרְעֹ֖ה אֶחָ֣ד ה֑וּא אֵ֣ת אֲשֶׁ֧ר הָאֱלֹהִ֛ים עֹשֶׂ֖ה הִגִּ֥יד לְפַרְעֹֽה׃

‎26 ‏שֶׁ֧בַע פָּרֹ֣ת הַטֹּבֹ֗ת שֶׁ֤בַע שָׁנִים֙ הֵ֔נָּה וְשֶׁ֤בַע הַֽשִּׁבֳּלִים֙³ הַטֹּבֹ֔ת שֶׁ֥בַע שָׁנִ֖ים הֵ֑נָּה חֲל֖וֹם אֶחָ֥ד הֽוּא׃

‎27 ‏וְשֶׁ֣בַע הַ֠פָּרוֹת הָֽרַקּ֨וֹת וְהָרָעֹ֜ת הָעֹלֹ֣ת אַחֲרֵיהֶ֗ן שֶׁ֤בַע שָׁנִים֙ הֵ֔נָּה וְשֶׁ֤בַע הַֽשִׁבֳּלִים֙ הָרֵק֔וֹת שְׁדֻפ֖וֹת הַקָּדִ֑ים יִהְי֕וּ שֶׁ֖בַע שְׁנֵ֥י רָעָֽב׃

‎28 ‏ה֣וּא הַדָּבָ֔ר אֲשֶׁ֥ר דִּבַּ֖רְתִּי אֶל־פַּרְעֹ֑ה אֲשֶׁ֧ר הָאֱלֹהִ֛ים עֹשֶׂ֖ה הֶרְאָ֥ה אֶת־פַּרְעֹֽה׃

‎29 ‏הִנֵּ֛ה שֶׁ֥בַע שָׁנִ֖ים בָּא֑וֹת שָׂבָ֥ע גָּד֖וֹל בְּכָל־אֶ֥רֶץ מִצְרָֽיִם׃

‎30 ‏וְ֠קָמוּ שֶׁ֨בַע שְׁנֵ֤י רָעָב֙ אַחֲרֵיהֶ֔ן וְנִשְׁכַּ֥ח כָּל־הַשָּׂבָ֖ע בְּאֶ֣רֶץ מִצְרָ֑יִם וְכִלָּ֥ה הָרָעָ֖ב אֶת־הָאָֽרֶץ׃

‎31 ‏וְלֹֽא־יִוָּדַ֤ע הַשָּׂבָע֙ בָּאָ֔רֶץ מִפְּנֵ֛י הָרָעָ֥ב הַה֖וּא אַחֲרֵי־כֵ֑ן כִּֽי־כָבֵ֥ד ה֖וּא מְאֹֽד׃

‎32 ‏וְעַ֨ל הִשָּׁנ֧וֹת הַחֲל֛וֹם אֶל־פַּרְעֹ֖ה פַּעֲמָ֑יִם כִּֽי־נָכ֤וֹן הַדָּבָר֙ מֵעִ֣ם הָאֱלֹהִ֔ים וּמְמַהֵ֥ר הָאֱלֹהִ֖ים לַעֲשֹׂתֽוֹ׃

‎33 ‏וְעַתָּה֙ יֵרֶ֣א פַרְעֹ֔ה אִ֖ישׁ נָב֣וֹן וְחָכָ֑ם וִישִׁיתֵ֖הוּ עַל־אֶ֥רֶץ מִצְרָֽיִם׃

‎34 ‏יַעֲשֶׂ֣ה פַרְעֹ֔ה וְיַפְקֵ֥ד פְּקִדִ֖ים עַל־הָאָ֑רֶץ וְחִמֵּשׁ֙ אֶת־אֶ֣רֶץ מִצְרַ֔יִם בְּשֶׁ֖בַע שְׁנֵ֥י הַשָּׂבָֽע׃

‎35 ‏וְיִקְבְּצ֗וּ אֶת־כָּל־אֹ֙כֶל֙ הַשָּׁנִ֣ים הַטֹּבֹ֔ת הַבָּאֹ֖ת הָאֵ֑לֶּה וְיִצְבְּרוּ־בָ֞ר תַּ֧חַת יַד־פַּרְעֹ֛ה אֹ֥כֶל בֶּעָרִ֖ים וְשָׁמָֽרוּ׃

‎36 ‏וְהָיָ֨ה הָאֹ֤כֶל לְפִקָּדוֹן֙ לָאָ֔רֶץ לְשֶׁ֙בַע֙ שְׁנֵ֣י הָרָעָ֔ב אֲשֶׁ֥ר תִּהְיֶ֖יןָ בְּאֶ֣רֶץ מִצְרָ֑יִם וְלֹֽא־תִכָּרֵ֥ת הָאָ֖רֶץ בָּרָעָֽב׃

‎37 ‏וַיִּיטַ֥ב הַדָּבָ֖ר בְּעֵינֵ֣י פַרְעֹ֑ה וּבְעֵינֵ֖י כָּל־עֲבָדָֽיו׃

‎38 ‏וַיֹּ֥אמֶר פַּרְעֹ֖ה אֶל־עֲבָדָ֑יו הֲנִמְצָ֣א כָזֶ֔ה אִ֕ישׁ אֲשֶׁ֛ר ר֥וּחַ אֱלֹהִ֖ים בּֽוֹ׃

‎39 ‏וַיֹּ֤אמֶר פַּרְעֹה֙ אֶל־יוֹסֵ֔ף אַחֲרֵ֨י הוֹדִ֧יעַ אֱלֹהִ֛ים אוֹתְךָ֖ אֶת־כָּל־זֹ֑את אֵין־נָב֥וֹן וְחָכָ֖ם כָּמֽוֹךָ׃

‎40 ‏אַתָּה֙ תִּהְיֶ֣ה עַל־בֵּיתִ֔י וְעַל־פִּ֖יךָ יִשַּׁ֣ק כָּל־עַמִּ֑י רַ֥ק הַכִּסֵּ֖א אֶגְדַּ֥ל מִמֶּֽךָּ׃

‎41 ‏וַיֹּ֥אמֶר פַּרְעֹ֖ה אֶל־יוֹסֵ֑ף רְאֵה֙ נָתַ֣תִּי אֹֽתְךָ֔ עַ֖ל כָּל־אֶ֥רֶץ מִצְרָֽיִם׃

‎42 ‏וַיָּ֨סַר פַּרְעֹ֤ה אֶת־טַבַּעְתּוֹ֙ מֵעַ֣ל יָד֔וֹ וַיִּתֵּ֥ן אֹתָ֖הּ עַל־יַ֣ד יוֹסֵ֑ף וַיַּלְבֵּ֤שׁ אֹתוֹ֙ בִּגְדֵי־שֵׁ֔שׁ וַיָּ֛שֶׂם רְבִ֥ד הַזָּהָ֖ב עַל־צַוָּארֽוֹ׃

‎43 ‏וַיַּרְכֵּ֣ב אֹת֗וֹ בְּמִרְכֶּ֤בֶת הַמִּשְׁנֶה֙ אֲשֶׁר־ל֔וֹ וַיִּקְרְא֥וּ לְפָנָ֖יו אַבְרֵ֑ךְ וְנָת֣וֹן אֹת֔וֹ עַ֖ל כָּל־אֶ֥רֶץ מִצְרָֽיִם׃

‎44 ‏וַיֹּ֧אמֶר פַּרְעֹ֛ה אֶל־יוֹסֵ֖ף אֲנִ֣י פַרְעֹ֑ה וּבִלְעָדֶ֗יךָ לֹֽא־יָרִ֨ים אִ֧ישׁ אֶת־יָד֛וֹ וְאֶת־רַגְל֖וֹ בְּכָל־אֶ֥רֶץ מִצְרָֽיִם׃

‎45 ‏וַיִּקְרָ֨א פַרְעֹ֣ה שֵׁם־יוֹסֵף֮ צָֽפְנַ֣ת פַּעְנֵחַ֒ וַיִּתֶּן־ל֣וֹ אֶת־אָֽסְנַ֗ת בַּת־פּ֥וֹטִי פֶ֛רַע כֹּהֵ֥ן אֹ֖ן לְאִשָּׁ֑ה וַיֵּצֵ֥א יוֹסֵ֖ף עַל־אֶ֥רֶץ מִצְרָֽיִם׃

‎46 ‏וְיוֹסֵף֙ בֶּן־שְׁלֹשִׁ֣ים שָׁנָ֔ה בְּעָמְד֕וֹ לִפְנֵ֖י פַּרְעֹ֣ה מֶֽלֶךְ־מִצְרָ֑יִם וַיֵּצֵ֤א יוֹסֵף֙ מִלִּפְנֵ֣י פַרְעֹ֔ה וַֽיַּעְבֹ֖ר¹ בְּכָל־אֶ֥רֶץ מִצְרָֽיִם׃

‎47 ‏וַתַּ֣עַשׂ הָאָ֔רֶץ בְּשֶׁ֖בַע שְׁנֵ֣י הַשָּׂבָ֑ע לִקְמָצִֽים׃

‎48 ‏וַיִּקְבֹּ֞ץ אֶת־כָּל־אֹ֣כֶל׀ שֶׁ֣בַע שָׁנִ֗ים אֲשֶׁ֤ר הָיוּ֙ בְּאֶ֣רֶץ מִצְרַ֔יִם וַיִּתֶּן־אֹ֖כֶל בֶּעָרִ֑ים אֹ֧כֶל שְׂדֵה־הָעִ֛יר אֲשֶׁ֥ר סְבִיבֹתֶ֖יהָ נָתַ֥ן בְּתוֹכָֽהּ׃

‎49 ‏וַיִּצְבֹּ֨ר יוֹסֵ֥ף בָּ֛ר כְּח֥וֹל הַיָּ֖ם הַרְבֵּ֣ה מְאֹ֑ד עַ֛ד כִּי־חָדַ֥ל לִסְפֹּ֖ר כִּי־אֵ֥ין מִסְפָּֽר׃

‎50 ‏וּלְיוֹסֵ֤ף יֻלַּד֙ שְׁנֵ֣י בָנִ֔ים בְּטֶ֥רֶם תָּב֖וֹא שְׁנַ֣ת הָרָעָ֑ב אֲשֶׁ֤ר יָֽלְדָה־לּוֹ֙ אָֽסְנַ֔ת בַּת־פּ֥וֹטִי פֶ֖רַע כֹּהֵ֥ן אֽוֹן׃

‎51 ‏וַיִּקְרָ֥א יוֹסֵ֛ף אֶת־שֵׁ֥ם הַבְּכ֖וֹר מְנַשֶּׁ֑ה כִּֽי־נַשַּׁ֤נִי אֱלֹהִים֙ אֶת־כָּל־עֲמָלִ֔י וְאֵ֖ת כָּל־בֵּ֥ית אָבִֽי׃

‎52 ‏וְאֵ֛ת שֵׁ֥ם הַשֵּׁנִ֖י קָרָ֣א אֶפְרָ֑יִם כִּֽי־הִפְרַ֥נִי אֱלֹהִ֖ים בְּאֶ֥רֶץ עָנְיִֽי׃

‎53 ‏וַתִּכְלֶ֕ינָה שֶׁ֖בַע שְׁנֵ֣י הַשָּׂבָ֑ע אֲשֶׁ֥ר הָיָ֖ה בְּאֶ֥רֶץ מִצְרָֽיִם׃

‎54 ‏וַתְּחִלֶּ֜ינָה שֶׁ֣בַע שְׁנֵ֤י הָרָעָב֙ לָב֔וֹא כַּאֲשֶׁ֖ר אָמַ֣ר יוֹסֵ֑ף וַיְהִ֤י רָעָב֙ בְּכָל־הָ֣אֲרָצ֔וֹת וּבְכָל־אֶ֥רֶץ מִצְרַ֖יִם הָ֥יָה לָֽחֶם׃

‎55 ‏וַתִּרְעַב֙ כָּל־אֶ֣רֶץ מִצְרַ֔יִם וַיִּצְעַ֥ק הָעָ֛ם אֶל־פַּרְעֹ֖ה לַלָּ֑חֶם וַיֹּ֨אמֶר פַּרְעֹ֤ה לְכָל־מִצְרַ֙יִם֙ לְכ֣וּ אֶל־יוֹסֵ֔ף אֲשֶׁר־יֹאמַ֥ר לָכֶ֖ם תַּעֲשֽׂוּ׃

‎56 ‏וְהָרָעָ֣ב הָיָ֔ה עַ֖ל כָּל־פְּנֵ֣י הָאָ֑רֶץ וַיִּפְתַּ֨ח יוֹסֵ֜ף אֶֽת־כָּל־אֲשֶׁ֤ר בָּהֶם֙ וַיִּשְׁבֹּ֣ר לְמִצְרַ֔יִם וַיֶּחֱזַ֥ק הָֽרָעָ֖ב בְּאֶ֥רֶץ מִצְרָֽיִם׃

‎57 ‏וְכָל־הָאָ֙רֶץ֙ בָּ֣אוּ מִצְרַ֔יְמָה לִשְׁבֹּ֖ר אֶל־יוֹסֵ֑ף כִּֽי־חָזַ֥ק הָרָעָ֖ב בְּכָל־הָאָֽרֶץ׃

1 wayəhî miqqēṣ šənāṯayim yāmîm ûfarə‘ōh ḥōlēm wəhinnēh ‘ōmēḏ ‘al-hayə’ōr:

2 wəhinnēh min-hayə’ōr ‘ōlōṯ šeḇ^a‘ pārwōṯ yəfwōṯ marə’eh ûḇərî’ōṯ bāśār watirə‘eynâ bā’āḥû:

3 wəhinnēh šeḇ^a‘ pārwōṯ ’ăḥērwōṯ ‘ōlwōṯ ’^aḥărêhen min-hayə’ōr rā‘wōṯ marə’eh wəḏaqqwōṯ bāśār wat^a‘ămōḏənâ ’ēṣel hapārwōṯ ‘al-śəfaṯ hayə’ōr:

4 watō’ḵalənâ hapārwōṯ rā‘wōṯ hammarə’eh wəḏaqqōṯ habāśār ’ēṯ šeḇ^a‘ hapārwōṯ yəfōṯ hammarə’eh wəhabərî’ōṯ wayyîqaṣ parə‘ōh:

5 wayyîšān wayy^aḥălōm šēnîṯ wəhinnēh| šeḇ^a‘ šibŏlîm ‘ōlwōṯ bəqāneh ’eḥāḏ bərî’wōṯ wəṭōḇwōṯ:

6 wəhinnēh šeḇ^a‘ šibŏlîm daqqwōṯ ûšəḏûfōṯ qāḏîm ṣōməḥwōṯ ’^aḥărêhen:

7 watiḇəl^a‘ənâ haššibŏlîm hadaqqwōṯ ’ēṯ šeḇ^a‘ haššibŏlîm habərî’wōṯ wəhamməlē’wōṯ wayyîqaṣ parə‘ōh wəhinnēh ḥălwōm:

8 wayəhî ḇabōqer watipā‘em rûḥwō wayyišəl^aḥ wayyiqərā’ ’eṯ-kāl-ḥarəṭummê miṣərayim wə’eṯ-kāl-ḥăḵāmeyhā wayəsapēr parə‘ōh lâem ’eṯ-ḥălōmwō wə’ên-pwōṯēr ’wōṯām ləfarə‘ōh:

9 wayəḏabēr śar hammašəqîm ’eṯ-parə‘ōh lē’mōr ’eṯ-ḥăṭā’ay ’ănî mazəkîr hayywōm:

10 parə‘ōh qāṣaf ‘al-‘ăḇāḏāyw wayyitēn ’ōṯî bəmišəmar bêṯ śar haṭṭabāḥîm ’ōṯî wə’ēṯ śar hā’ōfîm:

11 wann^aḥaləmâ ḥălwōm bəlayəlâ ’eḥāḏ ’ănî wâû’ ’îš kəfiṯərwōn ḥălōmwō ḥālāmənû:

12 wəšām ’itānû n^a‘ar ‘iḇərî ‘eḇeḏ ləśar haṭṭabāḥîm wannəsaper-lwō¹ wayyifətār-lānû ’eṯ-ḥălōmōṯênû ’îš k^aḥălōmwō pāṯār:

13 wayəhî ka’ăšer pāṯar-lānû kēn hāyâ ’ōṯî hēšîḇ ‘al-kannî wə’ōṯwō ṯālâ:

14 wayyišəl^aḥ parə‘ōh wayyiqərā’ ’eṯ-ywōsēf wayərîṣuhû min-habwōr wayəḡall^aḥ wayəḥallēf śiməlōṯāyw wayyāḇō’ ’el-parə‘ōh:

15 wayyō’mer parə‘ōh ’el-ywōsēf ḥălwōm ḥālamətî ûfōṯēr ’ên ’ōṯwō wa’ănî šām^a‘ətî ‘āleyḵā lē’mōr tišəm^a‘ ḥălwōm lifətōr ’ōṯwō:

16 wayy^a‘an ywōsēf ’eṯ-parə‘ōh lē’mōr bilə‘āḏāy ’ĕlōhîm y^a‘ăneh ’eṯ-šəlwōm parə‘ōh:

17 wayəḏabēr parə‘ōh ’el-ywōsēf b^aḥălōmî hinənî ‘ōmēḏ ‘al-śəfaṯ hayə’ōr:

18 wəhinnēh min-hayə’ōr ‘ōlōṯ šeḇ^a‘ pārwōṯ bərî’wōṯ bāśār wîfōṯ tō’ar watirə‘eynâ bā’āḥû:

19 wəhinnēh šeḇ^a‘-pārwōṯ ’ăḥērwōṯ ‘ōlwōṯ ’^aḥărêhen dallwōṯ wərā‘wōṯ tō’ar mə’ōḏ wəraqqwōṯ bāśār lō’-rā’îṯî ḵâēnnâ bəḵāl-’ereṣ miṣərayim lārō‘a:

20 watō’ḵalənâ hapārwōṯ hāraqqwōṯ wəhārā‘wōṯ ’ēṯ šeḇ^a‘ hapārwōṯ hāri’šōnwōṯ habərî’ōṯ:

21 watāḇō’nâ ’el-qirəbenâ wəlō’ nwōḏ^a‘ kî-ḇā’û ’el-qirəbenâ ûmarə’êhen r^a‘ ka’ăšer batəḥillâ wā’îqāṣ:

22 wā’ēre’ b^aḥălōmî wəhinnēh| šeḇ^a‘ šibŏlîm ‘ōlōṯ bəqāneh ’eḥāḏ məlē’ōṯ wəṭōḇwōṯ:

23 wəhinnēh šeḇ^a‘ šibŏlîm ṣənumwōṯ daqqwōṯ šəḏufwōṯ qāḏîm ṣōməḥwōṯ ’^aḥărêhem:

24 watiḇəl^a‘ənā hāšibŏlîm¹ hadaqqōṯ ’ēṯ šeḇ^a‘ hašibŏlîm haṭṭōḇwōṯ wā’ōmar ’el-h^aḥarəṭummîm wə’ên magîḏ lî:

25 wayyō’mer ywōsēf ’el-parə‘ōh ḥălwōm parə‘ōh ’eḥāḏ hû’ ’ēṯ ’ăšer hā’ĕlōhîm ‘ōśeh higîḏ ləfarə‘ōh:

26 šeḇ^a‘ pārōṯ haṭṭōḇōṯ šeḇ^a‘ šānîm hēnnâ wəšeḇ^a‘ haššibŏlîm³ haṭṭōḇōṯ šeḇ^a‘ šānîm hēnnâ ḥălwōm ’eḥāḏ hû’:

27 wəšeḇ^a‘ hapārwōṯ hāraqqwōṯ wəhārā‘ōṯ hā‘ōlōṯ ’^aḥărêhen šeḇ^a‘ šānîm hēnnâ wəšeḇ^a‘ hašibŏlîm hārēqwōṯ šəḏufwōṯ haqqāḏîm yihəyû šeḇ^a‘ šənê rā‘āḇ:

28 hû’ hadāḇār ’ăšer dibarətî ’el-parə‘ōh ’ăšer hā’ĕlōhîm ‘ōśeh herə’â ’eṯ-parə‘ōh:

29 hinnēh šeḇ^a‘ šānîm bā’wōṯ śāḇā‘ gāḏwōl bəḵāl-’ereṣ miṣərāyim:

30 wəqāmû šeḇ^a‘ šənê rā‘āḇ ’^aḥărêhen wənišək^aḥ kāl-haśśāḇā‘ bə’ereṣ miṣərāyim wəḵillâ hārā‘āḇ ’eṯ-hā’āreṣ:

31 wəlō’-yiûāḏ^a‘ haśśāḇā‘ bā’āreṣ mipənê hārā‘āḇ hahû’ ’^aḥărê-ḵēn kî-ḵāḇēḏ hû’ mə’ōḏ:

32 wə‘al hiššānwōṯ h^aḥălwōm ’el-parə‘ōh p^a‘ămāyim kî-nāḵwōn hadāḇār mē‘im hā’ĕlōhîm ûməmahēr hā’ĕlōhîm l^a‘ăśōṯwō:

33 wə‘atâ yēre’ farə‘ōh ’îš nāḇwōn wəḥāḵām wîšîṯēhû ‘al-’ereṣ miṣərāyim:

34 y^a‘ăśeh farə‘ōh wəyafəqēḏ pəqiḏîm ‘al-hā’āreṣ wəḥimmēš ’eṯ-’ereṣ miṣərayim bəšeḇ^a‘ šənê haśśāḇā‘:

35 wəyiqəbəṣû ’eṯ-kāl-’ōḵel haššānîm haṭṭōḇōṯ habā’ōṯ hā’ēlleh wəyiṣəbərû-ḇār t^aḥaṯ yaḏ-parə‘ōh ’ōḵel be‘ārîm wəšāmārû:

36 wəhāyâ hā’ōḵel ləfiqqāḏwōn lā’āreṣ ləšeḇ^a‘ šənê hārā‘āḇ ’ăšer tihəyeynā bə’ereṣ miṣərāyim wəlō’-ṯikārēṯ hā’āreṣ bārā‘āḇ:

37 wayyîṭaḇ hadāḇār bə‘ênê farə‘ōh ûḇə‘ênê kāl-‘ăḇāḏāyw:

38 wayyō’mer parə‘ōh ’el-‘ăḇāḏāyw hăniməṣā’ ḵāzeh ’îš ’ăšer rûḥa ’ĕlōhîm bwō:

39 wayyō’mer parə‘ōh ’el-ywōsēf ’^aḥărê hwōḏî‘a ’ĕlōhîm ’wōṯəḵā ’eṯ-kāl-zō’ṯ ’ên-nāḇwōn wəḥāḵām kāmwōḵā:

40 ’atâ tihəyeh ‘al-bêṯî wə‘al-pîḵā yiššaq kāl-‘ammî raq hakissē’ ’eḡədal mimmeḵḵā:

41 wayyō’mer parə‘ōh ’el-ywōsēf rə’ēh nāṯatî ’ōṯəḵā ‘al kāl-’ereṣ miṣərāyim:

42 wayyāsar parə‘ōh ’eṯ-ṭab^a‘ətwō mē‘al yāḏwō wayyitēn ’ōṯāh ‘al-yaḏ ywōsēf wayyaləbēš ’ōṯwō biḡəḏê-šēš wayyāśem rəḇiḏ hazzâāḇ ‘al-ṣaûā’rwō:

43 wayyarəkēḇ ’ōṯwō bəmirəkeḇeṯ hammišəneh ’ăšer-lwō wayyiqərə’û ləfānāyw ’aḇərēḵə wənāṯwōn ’ōṯwō ‘al kāl-’ereṣ miṣərāyim:

44 wayyō’mer parə‘ōh ’el-ywōsēf ’ănî farə‘ōh ûḇilə‘āḏeyḵā lō’-yārîm ’îš ’eṯ-yāḏwō wə’eṯ-raḡəlwō bəḵāl-’ereṣ miṣərāyim:

45 wayyiqərā’ farə‘ōh šēm-ywōsēf ṣāfənaṯ p^a‘ənēḥa wayyiten-lwō ’eṯ-’āsənaṯ baṯ-pwōṭî fer^a‘ kōhēn ’ōn lə’iššâ wayyēṣē’ ywōsēf ‘al-’ereṣ miṣərāyim:

46 wəywōsēf ben-šəlōšîm šānâ bə‘āməḏwō lifənê parə‘ōh meleḵə-miṣərāyim wayyēṣē’ ywōsēf millifənê farə‘ōh wayy^a‘əḇōr¹ bəḵāl-’ereṣ miṣərāyim:

47 wat^a‘aś hā’āreṣ bəšeḇ^a‘ šənê haśśāḇā‘ liqəmāṣîm:

48 wayyiqəbōṣ ’eṯ-kāl-’ōḵel| šeḇ^a‘ šānîm ’ăšer hāyû bə’ereṣ miṣərayim wayyiten-’ōḵel be‘ārîm ’ōḵel śəḏēh-hā‘îr ’ăšer səḇîḇōṯeyhā nāṯan bəṯwōḵāh:

49 wayyiṣəbōr ywōsēf bār kəḥwōl hayyām harəbēh mə’ōḏ ‘aḏ kî-ḥāḏal lisəpōr kî-’ên misəpār:

50 ûləywōsēf yullaḏ šənê ḇānîm bəṭerem tāḇwō’ šənaṯ hārā‘āḇ ’ăšer yāləḏâ-llwō ’āsənaṯ baṯ-pwōṭî fer^a‘ kōhēn ’wōn:

51 wayyiqərā’ ywōsēf ’eṯ-šēm habəḵwōr mənaššeh kî-naššanî ’ĕlōhîm ’eṯ-kāl-‘ămālî wə’ēṯ kāl-bêṯ ’āḇî:

52 wə’ēṯ šēm haššēnî qārā’ ’efərāyim kî-hifəranî ’ĕlōhîm bə’ereṣ ‘ānəyî:

53 watiḵəleynâ šeḇ^a‘ šənê haśśāḇā‘ ’ăšer hāyâ bə’ereṣ miṣərāyim:

54 watəḥilleynâ šeḇ^a‘ šənê hārā‘āḇ lāḇwō’ ka’ăšer ’āmar ywōsēf wayəhî rā‘āḇ bəḵāl-hā’ărāṣwōṯ ûḇəḵāl-’ereṣ miṣərayim hāyâ lāḥem:

55 watirə‘aḇ kāl-’ereṣ miṣərayim wayyiṣə‘aq hā‘ām ’el-parə‘ōh lallāḥem wayyō’mer parə‘ōh ləḵāl-miṣərayim ləḵû ’el-ywōsēf ’ăšer-yō’mar lāḵem t^a‘ăśû:

56 wəhārā‘āḇ hāyâ ‘al kāl-pənê hā’āreṣ wayyifət^aḥ ywōsēf ’eṯ-kāl-’ăšer bâem wayyišəbōr ləmiṣərayim wayyeḥĕzaq hārā‘āḇ bə’ereṣ miṣərāyim:

57 wəḵāl-hā’āreṣ bā’û miṣərayəmâ lišəbōr ’el-ywōsēf kî-ḥāzaq hārā‘āḇ bəḵāl-hā’āreṣ: