Genesis (Bereshit) Chapter 43

‎1 ‏וְהָרָעָ֖ב כָּבֵ֥ד בָּאָֽרֶץ׃

‎2 ‏וַיְהִ֗י כַּאֲשֶׁ֤ר כִּלּוּ֙ לֶאֱכֹ֣ל אֶת־הַשֶּׁ֔בֶר אֲשֶׁ֥ר הֵבִ֖יאוּ מִמִּצְרָ֑יִם וַיֹּ֤אמֶר אֲלֵיהֶם֙ אֲבִיהֶ֔ם שֻׁ֖בוּ שִׁבְרוּ־לָ֥נוּ מְעַט־אֹֽכֶל׃

‎3 ‏וַיֹּ֧אמֶר אֵלָ֛יו יְהוּדָ֖ה לֵאמֹ֑ר הָעֵ֣ד הֵעִד֩ בָּ֨נוּ הָאִ֤ישׁ לֵאמֹר֙ לֹֽא־תִרְא֣וּ פָנַ֔י בִּלְתִּ֖י אֲחִיכֶ֥ם אִתְּכֶֽם׃

‎4 ‏אִם־יֶשְׁךָ֛ מְשַׁלֵּ֥חַ אֶת־אָחִ֖ינוּ אִתָּ֑נוּ נֵרְדָ֕ה וְנִשְׁבְּרָ֥ה לְךָ֖ אֹֽכֶל׃

‎5 ‏וְאִם־אֵינְךָ֥ מְשַׁלֵּ֖חַ לֹ֣א נֵרֵ֑ד כִּֽי־הָאִ֞ישׁ אָמַ֤ר אֵלֵ֙ינוּ֙ לֹֽא־תִרְא֣וּ פָנַ֔י בִּלְתִּ֖י אֲחִיכֶ֥ם אִתְּכֶֽם׃

‎6 ‏וַיֹּ֙אמֶר֙ יִשְׂרָאֵ֔ל לָמָ֥ה הֲרֵעֹתֶ֖ם לִ֑י לְהַגִּ֣יד לָאִ֔ישׁ הַע֥וֹד לָכֶ֖ם אָֽח׃

‎7 ‏וַיֹּאמְר֡וּ שָׁא֣וֹל שָֽׁאַל־הָ֠אִישׁ לָ֣נוּ וּלְמֽוֹלַדְתֵּ֜נוּ לֵאמֹ֗ר הַע֨וֹד אֲבִיכֶ֥ם חַי֙ הֲיֵ֣שׁ לָכֶ֣ם אָ֔ח וַנַ֨גֶּד־ל֔וֹ¹ עַל־פִּ֖י הַדְּבָרִ֣ים הָאֵ֑לֶּה הֲיָד֣וֹעַ נֵדַ֔ע כִּ֣י יֹאמַ֔ר הוֹרִ֖ידוּ אֶת־אֲחִיכֶֽם׃

‎8 ‏וַיֹּ֨אמֶר יְהוּדָ֜ה אֶל־יִשְׂרָאֵ֣ל אָבִ֗יו שִׁלְחָ֥ה הַנַּ֛עַר אִתִּ֖י וְנָק֣וּמָה וְנֵלֵ֑כָה וְנִֽחְיֶה֙ וְלֹ֣א נָמ֔וּת גַּם־אֲנַ֥חְנוּ גַם־אַתָּ֖ה גַּם־טַפֵּֽנוּ׃

‎9 ‏אָֽנֹכִי֙ אֶֽעֶרְבֶ֔נּוּ מִיָּדִ֖י תְּבַקְשֶׁ֑נּוּ אִם־לֹ֨א הֲבִיאֹתִ֤יו אֵלֶ֙יךָ֙ וְהִצַּגְתִּ֣יו לְפָנֶ֔יךָ וְחָטָ֥אתִֽי לְךָ֖ כָּל־הַיָּמִֽים׃

‎10 ‏כִּ֖י לוּלֵ֣א הִתְמַהְמָ֑הְנוּ כִּֽי־עַתָּ֥ה שַׁ֖בְנוּ זֶ֥ה פַעֲמָֽיִם׃

‎11 ‏וַיֹּ֨אמֶר אֲלֵהֶ֜ם יִשְׂרָאֵ֣ל אֲבִיהֶ֗ם אִם־כֵּ֣ן׀ אֵפוֹא֮ זֹ֣את עֲשׂוּ֒ קְח֞וּ מִזִּמְרַ֤ת הָאָ֙רֶץ֙ בִּכְלֵיכֶ֔ם וְהוֹרִ֥ידוּ לָאִ֖ישׁ מִנְחָ֑ה מְעַ֤ט צֳרִי֙ וּמְעַ֣ט דְּבַ֔שׁ נְכֹ֣את וָלֹ֔ט בָּטְנִ֖ים וּשְׁקֵדִֽים׃

‎12 ‏וְכֶ֥סֶף מִשְׁנֶ֖ה קְח֣וּ בְיֶדְכֶ֑ם וְאֶת־הַכֶּ֜סֶף הַמּוּשָׁ֨ב בְּפִ֤י אַמְתְּחֹֽתֵיכֶם֙ תָּשִׁ֣יבוּ בְיֶדְכֶ֔ם אוּלַ֥י מִשְׁגֶּ֖ה הֽוּא׃

‎13 ‏וְאֶת־אֲחִיכֶ֖ם קָ֑חוּ וְק֖וּמוּ שׁ֥וּבוּ אֶל־הָאִֽישׁ׃

‎14 ‏וְאֵ֣ל שַׁדַּ֗י יִתֵּ֨ן לָכֶ֤ם רַחֲמִים֙ לִפְנֵ֣י הָאִ֔ישׁ וְשִׁלַּ֥ח לָכֶ֛ם אֶת־אֲחִיכֶ֥ם אַחֵ֖ר וְאֶת־בִּנְיָמִ֑ין וַאֲנִ֕י כַּאֲשֶׁ֥ר שָׁכֹ֖לְתִּי שָׁכָֽלְתִּי׃

‎15 ‏וַיִּקְח֤וּ הָֽאֲנָשִׁים֙ אֶת־הַמִּנְחָ֣ה הַזֹּ֔את וּמִשְׁנֶה־כֶּ֛סֶף לָקְח֥וּ בְיָדָ֖ם וְאֶת־בִּנְיָמִ֑ן וַיָּקֻ֙מוּ֙ וַיֵּרְד֣וּ מִצְרַ֔יִם וַיַּֽעַמְד֖וּ לִפְנֵ֥י יוֹסֵֽף׃

‎16 ‏וַיַּ֨רְא יוֹסֵ֣ף אִתָּם֮ אֶת־בִּנְיָמִין֒ וַיֹּ֙אמֶר֙ לַֽאֲשֶׁ֣ר עַל־בֵּית֔וֹ הָבֵ֥א אֶת־הָאֲנָשִׁ֖ים הַבָּ֑יְתָה וּטְבֹ֤חַ טֶ֙בַח֙ וְהָכֵ֔ן כִּ֥י אִתִּ֛י יֹאכְל֥וּ הָאֲנָשִׁ֖ים בַּֽצָּהֳרָֽיִם׃

‎17 ‏וַיַּ֣עַשׂ הָאִ֔ישׁ כַּֽאֲשֶׁ֖ר אָמַ֣ר יוֹסֵ֑ף וַיָּבֵ֥א הָאִ֛ישׁ אֶת־הָאֲנָשִׁ֖ים בֵּ֥יתָה יוֹסֵֽף׃

‎18 ‏וַיִּֽירְא֣וּ הָֽאֲנָשִׁ֗ים כִּ֣י הֽוּבְאוּ֮ בֵּ֣ית יוֹסֵף֒ וַיֹּאמְר֗וּ עַל־דְּבַ֤ר הַכֶּ֙סֶף֙ הַשָּׁ֤ב בְּאַמְתְּחֹתֵ֙ינוּ֙ בַּתְּחִלָּ֔ה אֲנַ֖חְנוּ מֽוּבָאִ֑ים לְהִתְגֹּלֵ֤ל עָלֵ֙ינוּ֙ וּלְהִתְנַפֵּ֣ל עָלֵ֔ינוּ וְלָקַ֧חַת אֹתָ֛נוּ לַעֲבָדִ֖ים וְאֶת־חֲמֹרֵֽינוּ׃

‎19 ‏וַֽיִּגְּשׁוּ֙ אֶל־הָאִ֔ישׁ אֲשֶׁ֖ר עַל־בֵּ֣ית יוֹסֵ֑ף וַיְדַבְּר֥וּ אֵלָ֖יו פֶּ֥תַח הַבָּֽיִת׃

‎20 ‏וַיֹּאמְר֖וּ בִּ֣י אֲדֹנִ֑י יָרֹ֥ד יָרַ֛דְנוּ בַּתְּחִלָּ֖ה לִשְׁבָּר־אֹֽכֶל׃

‎21 ‏וַֽיְהִ֞י כִּי־בָ֣אנוּ אֶל־הַמָּל֗וֹן וַֽנִּפְתְּחָה֙ אֶת־אַמְתְּחֹתֵ֔ינוּ וְהִנֵּ֤ה כֶֽסֶף־אִישׁ֙ בְּפִ֣י אַמְתַּחְתּ֔וֹ כַּסְפֵּ֖נוּ בְּמִשְׁקָל֑וֹ וַנָּ֥שֶׁב אֹת֖וֹ בְּיָדֵֽנוּ׃

‎22 ‏וְכֶ֧סֶף אַחֵ֛ר הוֹרַ֥דְנוּ בְיָדֵ֖נוּ לִשְׁבָּר־אֹ֑כֶל לֹ֣א יָדַ֔עְנוּ מִי־שָׂ֥ם כַּסְפֵּ֖נוּ בְּאַמְתְּחֹתֵֽינוּ׃

‎23 ‏וַיֹּאמֶר֩ שָׁל֨וֹם לָכֶ֜ם אַל־תִּירָ֗אוּ אֱלֹ֨הֵיכֶ֜ם וֵֽאלֹהֵ֤י אֲבִיכֶם֙ נָתַ֨ן לָכֶ֤ם מַטְמוֹן֙ בְּאַמְתְּחֹ֣תֵיכֶ֔ם כַּסְפְּכֶ֖ם בָּ֣א אֵלָ֑י וַיּוֹצֵ֥א אֲלֵהֶ֖ם אֶת־שִׁמְעֽוֹן׃

‎24 ‏וַיָּבֵ֥א הָאִ֛ישׁ אֶת־הָאֲנָשִׁ֖ים בֵּ֣יתָה יוֹסֵ֑ף וַיִּתֶּן־מַ֙יִם֙ וַיִּרְחֲצ֣וּ רַגְלֵיהֶ֔ם וַיִּתֵּ֥ן מִסְפּ֖וֹא לַחֲמֹֽרֵיהֶֽם׃

‎25 ‏וַיָּכִ֙ינוּ֙ אֶת־הַמִּנְחָ֔ה עַד־בּ֥וֹא יוֹסֵ֖ף בַּֽצָּהֳרָ֑יִם כִּ֣י שָֽׁמְע֔וּ כִּי־שָׁ֖ם יֹ֥אכְלוּ לָֽחֶם׃

‎26 ‏וַיָּבֹ֤א יוֹסֵף֙ הַבַּ֔יְתָה וַיָּבִ֥יאּוּ ל֛וֹ אֶת־הַמִּנְחָ֥ה אֲשֶׁר־בְּיָדָ֖ם הַבָּ֑יְתָה וַיִּשְׁתַּחֲווּ־ל֖וֹ אָֽרְצָה׃

‎27 ‏וַיִּשְׁאַ֤ל לָהֶם֙ לְשָׁל֔וֹם וַיֹּ֗אמֶר הֲשָׁל֛וֹם אֲבִיכֶ֥ם הַזָּקֵ֖ן אֲשֶׁ֣ר אֲמַרְתֶּ֑ם הַעוֹדֶ֖נּוּ חָֽי׃

‎28 ‏וַיֹּאמְר֗וּ שָׁל֛וֹם לְעַבְדְּךָ֥ לְאָבִ֖ינוּ עוֹדֶ֣נּוּ חָ֑י וַֽיִּקְּד֖וּ וישתחו וַיִּֽשְׁתַּחֲוּֽוּ׃¹

‎29 ‏וַיִּשָּׂ֣א עֵינָ֗יו וַיַּ֞רְא אֶת־בִּנְיָמִ֣ין אָחִיו֮ בֶּן־אִמּוֹ֒ וַיֹּ֗אמֶר הֲזֶה֙ אֲחִיכֶ֣ם הַקָּטֹ֔ן אֲשֶׁ֥ר אֲמַרְתֶּ֖ם אֵלָ֑י וַיֹּאמַ֕ר אֱלֹהִ֥ים יָחְנְךָ֖ בְּנִֽי׃

‎30 ‏וַיְמַהֵ֣ר יוֹסֵ֗ף כִּֽי־נִכְמְר֤וּ רַחֲמָיו֙ אֶל־אָחִ֔יו וַיְבַקֵּ֖שׁ לִבְכּ֑וֹת וַיָּבֹ֥א הַחַ֖דְרָה וַיֵּ֥בְךְּ שָֽׁמָּה׃

‎31 ‏וַיִּרְחַ֥ץ פָּנָ֖יו וַיֵּצֵ֑א וַיִּ֨תְאַפַּ֔ק וַיֹּ֖אמֶר שִׂ֥ימוּ לָֽחֶם׃

‎32 ‏וַיָּשִׂ֥ימוּ ל֛וֹ לְבַדּ֖וֹ וְלָהֶ֣ם לְבַדָּ֑ם וְלַמִּצְרִ֞ים הָאֹכְלִ֤ים אִתּוֹ֙ לְבַדָּ֔ם כִּי֩ לֹ֨א יוּכְל֜וּן הַמִּצְרִ֗ים לֶאֱכֹ֤ל אֶת־הָֽעִבְרִים֙ לֶ֔חֶם כִּי־תוֹעֵבָ֥ה הִ֖וא לְמִצְרָֽיִם׃

‎33 ‏וַיֵּשְׁב֣וּ לְפָנָ֔יו הַבְּכֹר֙ כִּבְכֹ֣רָת֔וֹ וְהַצָּעִ֖יר כִּצְעִרָת֑וֹ וַיִּתְמְה֥וּ הָאֲנָשִׁ֖ים אִ֥ישׁ אֶל־רֵעֵֽהוּ׃

‎34 ‏וַיִּשָּׂ֨א מַשְׂאֹ֜ת מֵאֵ֣ת פָּנָיו֮ אֲלֵהֶם֒ וַתֵּ֜רֶב מַשְׂאַ֧ת בִּנְיָמִ֛ן מִמַּשְׂאֹ֥ת כֻּלָּ֖ם חָמֵ֣שׁ יָד֑וֹת וַיִּשְׁתּ֥וּ וַֽיִּשְׁכְּר֖וּ עִמּֽוֹ׃

1 wəhārā‘āḇ kāḇēḏ bā’āreṣ:

2 wayəhî ka’ăšer killû le’ĕḵōl ’eṯ-haššeḇer ’ăšer hēḇî’û mimmiṣərāyim wayyō’mer ’ălêhem ’ăḇîhem šuḇû šiḇərû-lānû mə‘aṭ-’ōḵel:

3 wayyō’mer ’ēlāyw yəhûḏâ lē’mōr hā‘ēḏ hē‘iḏ bānû hā’îš lē’mōr lō’-ṯirə’û fānay bilətî ’ăḥîḵem ’itəḵem:

4 ’im-yešəḵā məšallēḥa ’eṯ-’āḥînû ’itānû nērəḏâ wənišəbərâ ləḵā ’ōḵel:

5 wə’im-’ênəḵā məšallēḥa lō’ nērēḏ kî-hā’îš ’āmar ’ēlênû lō’-ṯirə’û fānay bilətî ’ăḥîḵem ’itəḵem:

6 wayyō’mer yiśərā’ēl lāmâ hărē‘ōṯem lî ləhagîḏ lā’îš h^a‘wōḏ lāḵem ’āḥ:

7 wayyō’mərû šā’wōl šā’al-hā’îš lānû ûləmwōlaḏətēnû lē’mōr h^a‘wōḏ ’ăḇîḵem ḥay hăyēš lāḵem ’āḥ wanageḏ-lwō¹ ‘al-pî hadəḇārîm hā’ēlleh hăyāḏwō‘a nēḏ^a‘ kî yō’mar hwōrîḏû ’eṯ-’ăḥîḵem:

8 wayyō’mer yəhûḏâ ’el-yiśərā’ēl ’āḇîw šiləḥâ hann^a‘ar ’itî wənāqûmâ wənēlēḵâ wəniḥəyeh wəlō’ nāmûṯ gam-’ăn^aḥənû ḡam-’atâ gam-ṭapēnû:

9 ’ānōḵî ’e‘erəḇennû mîyāḏî təḇaqəšennû ’im-lō’ hăḇî’ōṯîw ’ēleyḵā wəhiṣṣaḡətîw ləfāneyḵā wəḥāṭā’ṯî ləḵā kāl-hayyāmîm:

10 kî lûlē’ hiṯəmahəmâənû kî-‘atâ šaḇənû zeh f^a‘ămāyim:

11 wayyō’mer ’ălēhem yiśərā’ēl ’ăḇîhem ’im-kēn| ’ēfwō’ zō’ṯ ‘ăśû qəḥû mizziməraṯ hā’āreṣ biḵəlêḵem wəhwōrîḏû lā’îš minəḥâ mə‘aṭ ṣŏrî ûmə‘aṭ dəḇaš nəḵō’ṯ wālōṭ bāṭənîm ûšəqēḏîm:

12 wəḵesef mišəneh qəḥû ḇəyeḏəḵem wə’eṯ-hakesef hammûšāḇ bəfî ’amətəḥōṯêḵem tāšîḇû ḇəyeḏəḵem ’ûlay mišəgeh hû’:

13 wə’eṯ-’ăḥîḵem qāḥû wəqûmû šûḇû ’el-hā’îš:

14 wə’ēl šaday yitēn lāḵem r^aḥămîm lifənê hā’îš wəšill^aḥ lāḵem ’eṯ-’ăḥîḵem ’^aḥēr wə’eṯ-binəyāmîn wa’ănî ka’ăšer šāḵōlətî šāḵālətî:

15 wayyiqəḥû hā’ănāšîm ’eṯ-hamminəḥâ hazzō’ṯ ûmišəneh-kesef lāqəḥû ḇəyāḏām wə’eṯ-binəyāmin wayyāqumû wayyērəḏû miṣərayim wayy^a‘aməḏû lifənê ywōsēf:

16 wayyarə’ ywōsēf ’itām ’eṯ-binəyāmîn wayyō’mer la’ăšer ‘al-bêṯwō hāḇē’ ’eṯ-hā’ănāšîm habāyəṯâ ûṭəḇōḥa ṭeḇ^aḥ wəhāḵēn kî ’itî yō’ḵəlû hā’ănāšîm baṣṣâŏrāyim:

17 wayy^a‘aś hā’îš ka’ăšer ’āmar ywōsēf wayyāḇē’ hā’îš ’eṯ-hā’ănāšîm bêṯâ ywōsēf:

18 wayyîrə’û hā’ănāšîm kî hûḇə’û bêṯ ywōsēf wayyō’mərû ‘al-dəḇar hakesef haššāḇ bə’amətəḥōṯênû batəḥillâ ’ăn^aḥənû mûḇā’îm ləhiṯəgōlēl ‘ālênû ûləhiṯənapēl ‘ālênû wəlāq^aḥaṯ ’ōṯānû l^a‘ăḇāḏîm wə’eṯ-ḥămōrênû:

19 wayyigəšû ’el-hā’îš ’ăšer ‘al-bêṯ ywōsēf wayəḏabərû ’ēlāyw peṯ^aḥ habāyiṯ:

20 wayyō’mərû bî ’ăḏōnî yārōḏ yāraḏənû batəḥillâ lišəbār-’ōḵel:

21 wayəhî kî-ḇā’nû ’el-hammālwōn wannifətəḥâ ’eṯ-’amətəḥōṯênû wəhinnēh ḵesef-’îš bəfî ’amət^aḥətwō kasəpēnû bəmišəqālwō wannāšeḇ ’ōṯwō bəyāḏēnû:

22 wəḵesef ’^aḥēr hwōraḏənû ḇəyāḏēnû lišəbār-’ōḵel lō’ yāḏ^a‘ənû mî-śām kasəpēnû bə’amətəḥōṯênû:

23 wayyō’mer šālwōm lāḵem ’al-tîrā’û ’ĕlōhêḵem wē’lōhê ’ăḇîḵem nāṯan lāḵem maṭəmwōn bə’amətəḥōṯêḵem kasəpəḵem bā’ ’ēlāy wayywōṣē’ ’ălēhem ’eṯ-šimə‘wōn:

24 wayyāḇē’ hā’îš ’eṯ-hā’ănāšîm bêṯâ ywōsēf wayyiten-mayim wayyirəḥăṣû raḡəlêhem wayyitēn misəpwō’ l^aḥămōrêhem:

25 wayyāḵînû ’eṯ-hamminəḥâ ‘aḏ-bwō’ ywōsēf baṣṣâŏrāyim kî šāmə‘û kî-šām yō’ḵəlû lāḥem:

26 wayyāḇō’ ywōsēf habayəṯâ wayyāḇî’’û lwō ’eṯ-hamminəḥâ ’ăšer-bəyāḏām habāyəṯâ wayyišət^aḥăwû-lwō ’ārəṣâ:

27 wayyišə’al lâem ləšālwōm wayyō’mer hăšālwōm ’ăḇîḵem hazzāqēn ’ăšer ’ămarətem h^a‘wōḏennû ḥāy:

28 wayyō’mərû šālwōm lə‘aḇədəḵā lə’āḇînû ‘wōḏennû ḥāy wayyiqqəḏû wayyišət^aḥû wayyišət^aḥăûû:¹

29 wayyiśśā’ ‘ênāyw wayyarə’ ’eṯ-binəyāmîn ’āḥîw ben-’immwō wayyō’mer hăzeh ’ăḥîḵem haqqāṭōn ’ăšer ’ămarətem ’ēlāy wayyō’mar ’ĕlōhîm yāḥənəḵā bənî:

30 wayəmahēr ywōsēf kî-niḵəmərû r^aḥămāyw ’el-’āḥîw wayəḇaqqēš liḇəkwōṯ wayyāḇō’ h^aḥaḏərâ wayyēḇəḵḵə šāmmâ:

31 wayyirəḥaṣ pānāyw wayyēṣē’ wayyiṯə’apaq wayyō’mer śîmû lāḥem:

32 wayyāśîmû lwō ləḇadwō wəlâem ləḇadām wəlammiṣərîm hā’ōḵəlîm ’itwō ləḇadām kî lō’ yûḵəlûn hammiṣərîm le’ĕḵōl ’eṯ-hā‘iḇərîm leḥem kî-ṯwō‘ēḇâ hiw’ ləmiṣərāyim:

33 wayyēšəḇû ləfānāyw habəḵōr kiḇəḵōrāṯwō wəhaṣṣā‘îr kiṣə‘irāṯwō wayyiṯəməhû hā’ănāšîm ’îš ’el-rē‘ēhû:

34 wayyiśśā’ maśə’ōṯ mē’ēṯ pānāyw ’ălēhem watēreḇ maśə’aṯ binəyāmin mimmaśə’ōṯ kullām ḥāmēš yāḏwōṯ wayyišətû wayyišəkərû ‘immwō: