Hosea (Hoshea) Chapter 2

‎1 ‏וְֽ֠הָיָה מִסְפַּ֤ר בְּנֵֽי־יִשְׂרָאֵל֙ כְּח֣וֹל הַיָּ֔ם אֲשֶׁ֥ר לֹֽא־יִמַּ֖ד וְלֹ֣א יִסָּפֵ֑ר וְֽ֠הָיָה בִּמְק֞וֹם אֲשֶׁר־יֵאָמֵ֤ר לָהֶם֙ לֹֽא־עַמִּ֣י אַתֶּ֔ם יֵאָמֵ֥ר לָהֶ֖ם בְּנֵ֥י אֵֽל־חָֽי׃

‎2 ‏וְ֠נִקְבְּצוּ בְּנֵֽי־יְהוּדָ֤ה וּבְנֵֽי־יִשְׂרָאֵל֙ יַחְדָּ֔ו וְשָׂמ֥וּ לָהֶ֛ם רֹ֥אשׁ אֶחָ֖ד וְעָל֣וּ מִן־הָאָ֑רֶץ כִּ֥י גָד֖וֹל י֥וֹם יִזְרְעֶֽאל׃

‎3 ‏אִמְר֥וּ לַאֲחֵיכֶ֖ם עַמִּ֑י וְלַאֲחֽוֹתֵיכֶ֖ם רֻחָֽמָה׃

‎4 ‏רִ֤יבוּ בְאִמְּכֶם֙ רִ֔יבוּ כִּֽי־הִיא֙ לֹ֣א אִשְׁתִּ֔י וְאָנֹכִ֖י לֹ֣א אִישָׁ֑הּ וְתָסֵ֤ר זְנוּנֶ֙יהָ֙ מִפָּנֶ֔יה וְנַאֲפוּפֶ֖יהָ מִבֵּ֥ין שָׁדֶֽיהָ׃

‎5 ‏פֶּן־אַפְשִׁיטֶ֣נָּה עֲרֻמָּ֔ה וְהִ֨צַּגְתִּ֔יהָ כְּי֖וֹם הִוָּֽלְדָ֑הּ וְשַׂמְתִּ֣יהָ כַמִּדְבָּ֗ר וְשַׁתִּ֙הָ֙ כְּאֶ֣רֶץ צִיָּ֔ה וַהֲמִתִּ֖יהָ בַּצָּמָֽא׃

‎6 ‏וְאֶת־בָּנֶ֖יהָ לֹ֣א אֲרַחֵ֑ם כִּֽי־בְנֵ֥י זְנוּנִ֖ים הֵֽמָּה׃

‎7 ‏כִּ֤י זָֽנְתָה֙ אִמָּ֔ם הֹבִ֖ישָׁה הֽוֹרָתָ֑ם כִּ֣י אָמְרָ֗ה אֵלְכָ֞ה אַחֲרֵ֤י מְאַהֲבַי֙ נֹתְנֵ֤י לַחְמִי֙ וּמֵימַ֔י צַמְרִ֣י וּפִשְׁתִּ֔י שַׁמְנִ֖י וְשִׁקּוּיָֽי׃

‎8 ‏לָכֵ֛ן הִנְנִי־שָׂ֥ךְ אֶת־דַּרְכֵּ֖ךְ בַּסִּירִ֑ים וְגָֽדַרְתִּי֙ אֶת־גְּדֵרָ֔הּ וּנְתִיבוֹתֶ֖יהָ לֹ֥א תִמְצָֽא׃

‎9 ‏וְרִדְּפָ֤ה אֶת־מְאַהֲבֶ֙יהָ֙ וְלֹֽא־תַשִּׂ֣יג אֹתָ֔ם וּבִקְשָׁ֖תַם וְלֹ֣א תִמְצָ֑א וְאָמְרָ֗ה אֵלְכָ֤ה וְאָשׁ֙וּבָה֙ אֶל־אִישִׁ֣י הָֽרִאשׁ֔וֹן כִּ֣י ט֥וֹב לִ֛י אָ֖ז מֵעָֽתָּה׃

‎10 ‏וְהִיא֙ לֹ֣א יָֽדְעָ֔ה כִּ֤י אָֽנֹכִי֙ נָתַ֣תִּי לָ֔הּ הַדָּגָ֖ן וְהַתִּיר֣וֹשׁ וְהַיִּצְהָ֑ר וְכֶ֨סֶף הִרְבֵּ֥יתִי לָ֛הּ וְזָהָ֖ב עָשׂ֥וּ לַבָּֽעַל׃

‎11 ‏לָכֵ֣ן אָשׁ֔וּב וְלָקַחְתִּ֤י דְגָנִי֙ בְּעִתּ֔וֹ וְתִירוֹשִׁ֖י בְּמֽוֹעֲד֑וֹ וְהִצַּלְתִּי֙ צַמְרִ֣י וּפִשְׁתִּ֔י לְכַסּ֖וֹת אֶת־עֶרְוָתָֽהּ׃

‎12 ‏וְעַתָּ֛ה אֲגַלֶּ֥ה אֶת־נַבְלֻתָ֖הּ לְעֵינֵ֣י מְאַהֲבֶ֑יהָ וְאִ֖ישׁ לֹֽא־יַצִּילֶ֥נָּה מִיָּדִֽי׃

‎13 ‏וְהִשְׁבַּתִּי֙ כָּל־מְשׂוֹשָׂ֔הּ חַגָּ֖הּ חָדְשָׁ֣הּ וְשַׁבַּתָּ֑הּ וְכֹ֖ל מוֹעֲדָֽהּ׃

‎14 ‏וַהֲשִׁמֹּתִ֗י גַּפְנָהּ֙ וּתְאֵ֣נָתָ֔הּ אֲשֶׁ֣ר אָמְרָ֗ה אֶתְנָ֥ה הֵ֙מָּה֙ לִ֔י אֲשֶׁ֥ר נָֽתְנוּ־לִ֖י מְאַֽהֲבָ֑י וְשַׂמְתִּ֣ים לְיַ֔עַר וַאֲכָלָ֖תַם חַיַּ֥ת הַשָּׂדֶֽה׃

‎15 ‏וּפָקַדְתִּ֣י עָלֶ֗יהָ אֶת־יְמֵ֤י הַבְּעָלִים֙ אֲשֶׁ֣ר תַּקְטִ֣יר לָהֶ֔ם וַתַּ֤עַד נִזְמָהּ֙ וְחֶלְיָתָ֔הּ וַתֵּ֖לֶךְ אַחֲרֵ֣י מְאַהֲבֶ֑יהָ וְאֹתִ֥י שָׁכְחָ֖ה נְאֻם־יְהוָֽה׃ פ

‎16 ‏לָכֵ֗ן הִנֵּ֤ה אָֽנֹכִי֙ מְפַתֶּ֔יהָ וְהֹֽלַכְתִּ֖יהָ הַמִּדְבָּ֑ר וְדִבַּרְתִּ֖י עַל־לִבָּֽהּ׃

‎17 ‏וְנָתַ֨תִּי לָ֤הּ אֶת־כְּרָמֶ֙יהָ֙ מִשָּׁ֔ם וְאֶת־עֵ֥מֶק עָכ֖וֹר לְפֶ֣תַח תִּקְוָ֑ה וְעָ֤נְתָה שָּׁ֙מָּה֙ כִּימֵ֣י נְעוּרֶ֔יהָ וִּכְי֖וֹם¹ עֲלֹתָ֥הּ מֵאֶֽרֶץ־מִצְרָֽיִם׃ ס

‎18 ‏וְהָיָ֤ה בַיּוֹם־הַהוּא֙ נְאֻם־יְהוָ֔ה תִּקְרְאִ֖י אִישִׁ֑י וְלֹֽא־תִקְרְאִי־לִ֥י ע֖וֹד בַּעְלִֽי׃

‎19 ‏וַהֲסִרֹתִ֛י אֶת־שְׁמ֥וֹת הַבְּעָלִ֖ים מִפִּ֑יהָ וְלֹֽא־יִזָּכְר֥וּ ע֖וֹד בִּשְׁמָֽם׃

‎20 ‏וְכָרַתִּ֨י לָהֶ֤ם בְּרִית֙ בַּיּ֣וֹם הַה֔וּא עִם־חַיַּ֤ת הַשָּׂדֶה֙ וְעִם־ע֣וֹף הַשָּׁמַ֔יִם וְרֶ֖מֶשׂ הָֽאֲדָמָ֑ה וְקֶ֨שֶׁת וְחֶ֤רֶב וּמִלְחָמָה֙ אֶשְׁבּ֣וֹר מִן־הָאָ֔רֶץ וְהִשְׁכַּבְתִּ֖ים לָבֶֽטַח׃

‎21 ‏וְאֵרַשְׂתִּ֥יךְ לִ֖י לְעוֹלָ֑ם וְאֵרַשְׂתִּ֥יךְ לִי֙ בְּצֶ֣דֶק וּבְמִשְׁפָּ֔ט וּבְחֶ֖סֶד וּֽבְרַחֲמִֽים׃

‎22 ‏וְאֵרַשְׂתִּ֥יךְ לִ֖י בֶּאֱמוּנָ֑ה וְיָדַ֖עַתְּ אֶת־יְהוָֽה׃ ס

‎23 ‏וְהָיָ֣ה׀ בַּיּ֣וֹם הַה֗וּא אֶֽעֱנֶה֙ נְאֻם־יְהוָ֔ה אֶעֱנֶ֖ה אֶת־הַשָּׁמָ֑יִם וְהֵ֖ם יַעֲנ֥וּ אֶת־הָאָֽרֶץ׃

‎24 ‏וְהָאָ֣רֶץ תַּעֲנֶ֔ה אֶת־הַדָּגָ֖ן וְאֶת־הַתִּיר֣וֹשׁ וְאֶת־הַיִּצְהָ֑ר וְהֵ֖ם יַעֲנ֥וּ אֶֽת־יִזְרְעֶֽאל׃

‎25 ‏וּזְרַעְתִּ֤יהָ לִּי֙ בָּאָ֔רֶץ וְרִֽחַמְתִּ֖י אֶת־לֹ֣א רֻחָ֑מָה וְאָמַרְתִּ֤י לְלֹֽא־עַמִּי֙ עַמִּי־אַ֔תָּה וְה֖וּא יֹאמַ֥ר אֱלֹהָֽי׃ פ

1 wəhāyâ misəpar bənê-yiśərā’ēl kəḥwōl hayyām ’ăšer lō’-yimmaḏ wəlō’ yissāfēr wəhāyâ biməqwōm ’ăšer-yē’āmēr lâem lō’-‘ammî ’atem yē’āmēr lâem bənê ’ēl-ḥāy:

2 wəniqəbəṣû bənê-yəhûḏâ ûḇənê-yiśərā’ēl y^aḥədāw wəśāmû lâem rō’š ’eḥāḏ wə‘ālû min-hā’āreṣ kî ḡāḏwōl ywōm yizərə‘e’l:

3 ’imərû la’ăḥêḵem ‘ammî wəla’ăḥwōṯêḵem ruḥāmâ:

4 rîḇû ḇə’imməḵem rîḇû kî-hî’ lō’ ’išətî wə’ānōḵî lō’ ’îšāh wəṯāsēr zənûneyhā mipāneyh wəna’ăfûfeyhā mibên šāḏeyhā:

5 pen-’afəšîṭennâ ‘ărummâ wəhiṣṣaḡətîhā kəywōm hiûāləḏāh wəśamətîhā ḵammiḏəbār wəšatihā kə’ereṣ ṣîyâ wahămitîhā baṣṣāmā’:

6 wə’eṯ-bāneyhā lō’ ’ăr^aḥēm kî-ḇənê zənûnîm hēmmâ:

7 kî zānəṯâ ’immām hōḇîšâ hwōrāṯām kî ’āmərâ ’ēləḵâ ’^aḥărê mə’ahăḇay nōṯənê l^aḥəmî ûmêmay ṣamərî ûfišətî šamənî wəšiqqûyāy:

8 lāḵēn hinənî-śāḵə ’eṯ-darəkēḵə bassîrîm wəḡāḏarətî ’eṯ-gəḏērāh ûnəṯîḇwōṯeyhā lō’ ṯiməṣā’:

9 wəridəfâ ’eṯ-mə’ahăḇeyhā wəlō’-ṯaśśîḡ ’ōṯām ûḇiqəšāṯam wəlō’ ṯiməṣā’ wə’āmərâ ’ēləḵâ wə’āšûḇâ ’el-’îšî hāri’šwōn kî ṭwōḇ lî ’āz mē‘ātâ:

10 wəhî’ lō’ yāḏə‘â kî ’ānōḵî nāṯatî lāh hadāḡān wəhatîrwōš wəhayyiṣəhār wəḵesef hirəbêṯî lāh wəzâāḇ ‘āśû labā‘al:

11 lāḵēn ’āšûḇ wəlāq^aḥətî ḏəḡānî bə‘itwō wəṯîrwōšî bəmwō‘ăḏwō wəhiṣṣalətî ṣamərî ûfišətî ləḵasswōṯ ’eṯ-‘erəwāṯāh:

12 wə‘atâ ’ăḡalleh ’eṯ-naḇəluṯāh lə‘ênê mə’ahăḇeyhā wə’îš lō’-yaṣṣîlennâ mîyāḏî:

13 wəhišəbatî kāl-məśwōśāh ḥagāh ḥāḏəšāh wəšabatāh wəḵōl mwō‘ăḏāh:

14 wahăšimmōṯî gafənāh ûṯə’ēnāṯāh ’ăšer ’āmərâ ’eṯənâ hēmmâ lî ’ăšer nāṯənû-lî mə’ahăḇāy wəśamətîm ləy^a‘ar wa’ăḵālāṯam ḥayyaṯ haśśāḏeh:

15 ûfāqaḏətî ‘āleyhā ’eṯ-yəmê habə‘ālîm ’ăšer taqəṭîr lâem wat^a‘aḏ nizəmāh wəḥeləyāṯāh watēleḵə ’^aḥărê mə’ahăḇeyhā wə’ōṯî šāḵəḥâ nə’um-yəhwâ: f

16 lāḵēn hinnēh ’ānōḵî məfateyhā wəhōlaḵətîhā hammiḏəbār wəḏibarətî ‘al-libāh:

17 wənāṯatî lāh ’eṯ-kərāmeyhā miššām wə’eṯ-‘ēmeq ‘āḵwōr ləfeṯ^aḥ tiqəwâ wə‘ānəṯâ ššāmmâ kîmê nə‘ûreyhā ûiḵəywōm¹ ‘ălōṯāh mē’ereṣ-miṣərāyim: s

18 wəhāyâ ḇayywōm-hahû’ nə’um-yəhwâ tiqərə’î ’îšî wəlō’-ṯiqərə’î-lî ‘wōḏ b^a‘əlî:

19 wahăsirōṯî ’eṯ-šəmwōṯ habə‘ālîm mipîhā wəlō’-yizzāḵərû ‘wōḏ bišəmām:

20 wəḵāratî lâem bərîṯ bayywōm hahû’ ‘im-ḥayyaṯ haśśāḏeh wə‘im-‘wōf haššāmayim wəremeś hā’ăḏāmâ wəqešeṯ wəḥereḇ ûmiləḥāmâ ’ešəbwōr min-hā’āreṣ wəhišəkaḇətîm lāḇeṭ^aḥ:

21 wə’ēraśətîḵə lî lə‘wōlām wə’ēraśətîḵə lî bəṣeḏeq ûḇəmišəpāṭ ûḇəḥeseḏ ûḇər^aḥămîm:

22 wə’ēraśətîḵə lî be’ĕmûnâ wəyāḏ^a‘atə ’eṯ-yəhwâ: s

23 wəhāyâ| bayywōm hahû’ ’e‘ĕneh nə’um-yəhwâ ’e‘ĕneh ’eṯ-haššāmāyim wəhēm y^a‘ănû ’eṯ-hā’āreṣ:

24 wəhā’āreṣ t^a‘ăneh ’eṯ-hadāḡān wə’eṯ-hatîrwōš wə’eṯ-hayyiṣəhār wəhēm y^a‘ănû ’eṯ-yizərə‘e’l:

25 ûzər^a‘ətîhā llî bā’āreṣ wəriḥamətî ’eṯ-lō’ ruḥāmâ wə’āmarətî ləlō’-‘ammî ‘ammî-’atâ wəhû’ yō’mar ’ĕlōhāy: f