Isaiah (Yisheyah) Chapter 1

‎1 ‏חֲזוֹן֙ יְשַֽׁעְיָ֣הוּ בֶן־אָמ֔וֹץ אֲשֶׁ֣ר חָזָ֔ה עַל־יְהוּדָ֖ה וִירוּשָׁלִָ֑ם בִּימֵ֨י עֻזִּיָּ֧הוּ יוֹתָ֛ם אָחָ֥ז יְחִזְקִיָּ֖הוּ מַלְכֵ֥י יְהוּדָֽה׃

‎2 ‏שִׁמְע֤וּ שָׁמַ֙יִם֙ וְהַאֲזִ֣ינִי אֶ֔רֶץ כִּ֥י יְהוָ֖ה דִּבֵּ֑ר בָּנִים֙ גִּדַּ֣לְתִּי וְרוֹמַ֔מְתִּי וְהֵ֖ם פָּ֥שְׁעוּ בִֽי׃

‎3 ‏יָדַ֥ע שׁוֹר֙ קֹנֵ֔הוּ וַחֲמ֖וֹר אֵב֣וּס בְּעָלָ֑יו יִשְׂרָאֵל֙ לֹ֣א יָדַ֔ע עַמִּ֖י לֹ֥א הִתְבּוֹנָֽן׃

‎4 ‏ה֣וֹי׀ גּ֣וֹי חֹטֵ֗א עַ֚ם כֶּ֣בֶד עָוֹ֔ן זֶ֣רַע מְרֵעִ֔ים בָּנִ֖ים מַשְׁחִיתִ֑ים עָזְב֣וּ אֶת־יְהוָ֗ה נִֽאֲצ֛וּ אֶת־קְד֥וֹשׁ יִשְׂרָאֵ֖ל נָזֹ֥רוּ אָחֽוֹר׃

‎5 ‏עַ֣ל מֶ֥ה תֻכּ֛וּ ע֖וֹד תּוֹסִ֣יפוּ סָרָ֑ה כָּל־רֹ֣אשׁ לָחֳלִ֔י וְכָל־לֵבָ֖ב דַּוָּֽי׃

‎6 ‏מִכַּף־רֶ֤גֶל וְעַד־רֹאשׁ֙ אֵֽין־בּ֣וֹ מְתֹ֔ם פֶּ֥צַע וְחַבּוּרָ֖ה וּמַכָּ֣ה טְרִיָּ֑ה לֹא־זֹ֙רוּ֙ וְלֹ֣א חֻבָּ֔שׁוּ וְלֹ֥א רֻכְּכָ֖ה בַּשָּֽׁמֶן׃

‎7 ‏אַרְצְכֶ֣ם שְׁמָמָ֔ה עָרֵיכֶ֖ם שְׂרֻפ֣וֹת אֵ֑שׁ אַדְמַתְכֶ֗ם לְנֶגְדְּכֶם֙ זָרִים֙ אֹכְלִ֣ים אֹתָ֔הּ וּשְׁמָמָ֖ה כְּמַהְפֵּכַ֥ת זָרִֽים׃

‎8 ‏וְנוֹתְרָ֥ה בַת־צִיּ֖וֹן כְּסֻכָּ֣ה בְכָ֑רֶם כִּמְלוּנָ֥ה בְמִקְשָׁ֖ה כְּעִ֥יר נְצוּרָֽה׃

‎9 ‏לוּלֵי֙ יְהוָ֣ה צְבָא֔וֹת הוֹתִ֥יר לָ֛נוּ שָׂרִ֖יד כִּמְעָ֑ט כִּסְדֹ֣ם הָיִ֔ינוּ לַעֲמֹרָ֖ה דָּמִֽינוּ׃ ס

‎10 ‏שִׁמְע֥וּ דְבַר־יְהוָ֖ה קְצִינֵ֣י סְדֹ֑ם הַאֲזִ֛ינוּ תּוֹרַ֥ת אֱלֹהֵ֖ינוּ עַ֥ם עֲמֹרָֽה׃

‎11 ‏לָמָּה־לִּ֤י רֹב־זִבְחֵיכֶם֙ יֹאמַ֣ר יְהוָ֔ה שָׂבַ֛עְתִּי עֹל֥וֹת אֵילִ֖ים וְחֵ֣לֶב מְרִיאִ֑ים וְדַ֨ם פָּרִ֧ים וּכְבָשִׂ֛ים וְעַתּוּדִ֖ים לֹ֥א חָפָֽצְתִּי׃

‎12 ‏כִּ֣י תָבֹ֔אוּ לֵרָא֖וֹת פָּנָ֑י מִי־בִקֵּ֥שׁ זֹ֛את מִיֶּדְכֶ֖ם רְמֹ֥ס חֲצֵרָֽי׃

‎13 ‏לֹ֣א תוֹסִ֗יפוּ הָבִיא֙ מִנְחַת־שָׁ֔וְא קְטֹ֧רֶת תּוֹעֵבָ֛ה הִ֖יא לִ֑י חֹ֤דֶשׁ וְשַׁבָּת֙ קְרֹ֣א מִקְרָ֔א לֹא־אוּכַ֥ל אָ֖וֶן וַעֲצָרָֽה׃

‎14 ‏חָדְשֵׁיכֶ֤ם וּמוֹעֲדֵיכֶם֙ שָׂנְאָ֣ה נַפְשִׁ֔י הָי֥וּ עָלַ֖י לָטֹ֑רַח נִלְאֵ֖יתִי נְשֹֽׂא׃

‎15 ‏וּבְפָרִשְׂכֶ֣ם כַּפֵּיכֶ֗ם אַעְלִ֤ים עֵינַי֙ מִכֶּ֔ם גַּ֛ם כִּֽי־תַרְבּ֥וּ תְפִלָּ֖ה אֵינֶ֣נִּי שֹׁמֵ֑עַ יְדֵיכֶ֖ם דָּמִ֥ים מָלֵֽאוּ׃

‎16 ‏רַחֲצוּ֙ הִזַּכּ֔וּ הָסִ֛ירוּ רֹ֥עַ מַעַלְלֵיכֶ֖ם מִנֶּ֣גֶד עֵינָ֑י חִדְל֖וּ הָרֵֽעַ׃

‎17 ‏לִמְד֥וּ הֵיטֵ֛ב דִּרְשׁ֥וּ מִשְׁפָּ֖ט אַשְּׁר֣וּ חָמ֑וֹץ שִׁפְט֣וּ יָת֔וֹם רִ֖יבוּ אַלְמָנָֽה׃ ס

‎18 ‏לְכוּ־נָ֛א וְנִוָּֽכְחָ֖ה יֹאמַ֣ר יְהוָ֑ה אִם־יִֽהְי֨וּ חֲטָאֵיכֶ֤ם כַּשָּׁנִים֙ כַּשֶּׁ֣לֶג יַלְבִּ֔ינוּ אִם־יַאְדִּ֥ימוּ כַתּוֹלָ֖ע כַּצֶּ֥מֶר יִהְיֽוּ׃

‎19 ‏אִם־תֹּאב֖וּ וּשְׁמַעְתֶּ֑ם ט֥וּב הָאָ֖רֶץ תֹּאכֵֽלוּ׃

‎20 ‏וְאִם־תְּמָאֲנ֖וּ וּמְרִיתֶ֑ם חֶ֣רֶב תְּאֻכְּל֔וּ כִּ֛י פִּ֥י יְהוָ֖ה דִּבֵּֽר׃ ס

‎21 ‏אֵיכָה֙ הָיְתָ֣ה לְזוֹנָ֔ה קִרְיָ֖ה נֶאֱמָנָ֑ה מְלֵאֲתִ֣י מִשְׁפָּ֗ט צֶ֛דֶק יָלִ֥ין בָּ֖הּ וְעַתָּ֥ה מְרַצְּחִֽים׃

‎22 ‏כַּסְפֵּ֖ךְ הָיָ֣ה לְסִיגִ֑ים סָבְאֵ֖ךְ מָה֥וּל בַּמָּֽיִם׃

‎23 ‏שָׂרַ֣יִךְ סוֹרְרִ֗ים וְחַבְרֵי֙ גַּנָּבִ֔ים כֻּלּוֹ֙ אֹהֵ֣ב שֹׁ֔חַד וְרֹדֵ֖ף שַׁלְמֹנִ֑ים יָתוֹם֙ לֹ֣א יִשְׁפֹּ֔טוּ וְרִ֥יב אַלְמָנָ֖ה לֹֽא־יָב֥וֹא אֲלֵיהֶֽם׃ פ

‎24 ‏לָכֵ֗ן נְאֻ֤ם הָֽאָדוֹן֙ יְהוָ֣ה צְבָא֔וֹת אֲבִ֖יר יִשְׂרָאֵ֑ל ה֚וֹי אֶנָּחֵ֣ם מִצָּרַ֔י וְאִנָּקְמָ֖ה מֵאוֹיְבָֽי׃

‎25 ‏וְאָשִׁ֤יבָה יָדִי֙ עָלַ֔יִךְ וְאֶצְרֹ֥ף כַּבֹּ֖ר סִיגָ֑יִךְ וְאָסִ֖ירָה כָּל־בְּדִילָֽיִךְ׃

‎26 ‏וְאָשִׁ֤יבָה שֹׁפְטַ֙יִךְ֙ כְּבָרִ֣אשֹׁנָ֔ה וְיֹעֲצַ֖יִךְ כְּבַתְּחִלָּ֑ה אַחֲרֵי־כֵ֗ן יִקָּ֤רֵא לָךְ֙ עִ֣יר הַצֶּ֔דֶק קִרְיָ֖ה נֶאֱמָנָֽה׃

‎27 ‏צִיּ֖וֹן בְּמִשְׁפָּ֣ט תִּפָּדֶ֑ה וְשָׁבֶ֖יהָ בִּצְדָקָֽה׃

‎28 ‏וְשֶׁ֧בֶר פֹּשְׁעִ֛ים וְחַטָּאִ֖ים יַחְדָּ֑ו וְעֹזְבֵ֥י יְהוָ֖ה יִכְלֽוּ׃

‎29 ‏כִּ֣י יֵבֹ֔שׁוּ מֵאֵילִ֖ים אֲשֶׁ֣ר חֲמַדְתֶּ֑ם וְתַ֨חְפְּר֔וּ מֵהַגַּנּ֖וֹת אֲשֶׁ֥ר בְּחַרְתֶּֽם׃

‎30 ‏כִּ֣י תִֽהְי֔וּ כְּאֵלָ֖ה נֹבֶ֣לֶת עָלֶ֑הָ וּֽכְגַנָּ֔ה אֲשֶׁר־מַ֖יִם אֵ֥ין לָֽהּ׃

‎31 ‏וְהָיָ֤ה הֶחָסֹן֙ לִנְעֹ֔רֶת וּפֹעֲל֖וֹ לְנִיצ֑וֹץ וּבָעֲר֧וּ שְׁנֵיהֶ֛ם יַחְדָּ֖ו וְאֵ֥ין מְכַבֶּֽה׃ ס

1 ḥăzwōn yəš^a‘əyâû ḇen-’āmwōṣ ’ăšer ḥāzâ ‘al-yəhûḏâ wîrûšālāim bîmê ‘uzzîyâû ywōṯām ’āḥāz yəḥizəqîyâû maləḵê yəhûḏâ:

2 šimə‘û šāmayim wəha’ăzînî ’ereṣ kî yəhwâ dibēr bānîm gidalətî wərwōmamətî wəhēm pāšə‘û ḇî:

3 yāḏ^a‘ šwōr qōnēhû w^aḥămwōr ’ēḇûs bə‘ālāyw yiśərā’ēl lō’ yāḏ^a‘ ‘ammî lō’ hiṯəbwōnān:

4 hwōy| gwōy ḥōṭē’ ‘am keḇeḏ ‘āwōn zer^a‘ mərē‘îm bānîm mašəḥîṯîm ‘āzəḇû ’eṯ-yəhwâ ni’ăṣû ’eṯ-qəḏwōš yiśərā’ēl nāzōrû ’āḥwōr:

5 ‘al meh ṯukû ‘wōḏ twōsîfû sārâ kāl-rō’š lāḥŏlî wəḵāl-lēḇāḇ daûāy:

6 mikaf-reḡel wə‘aḏ-rō’š ’ên-bwō məṯōm peṣ^a‘ wəḥabûrâ ûmakâ ṭərîyâ lō’-zōrû wəlō’ ḥubāšû wəlō’ rukəḵâ baššāmen:

7 ’arəṣəḵem šəmāmâ ‘ārêḵem śərufwōṯ ’ēš ’aḏəmaṯəḵem ləneḡədəḵem zārîm ’ōḵəlîm ’ōṯāh ûšəmāmâ kəmahəpēḵaṯ zārîm:

8 wənwōṯərâ ḇaṯ-ṣîywōn kəsukâ ḇəḵārem kiməlûnâ ḇəmiqəšâ kə‘îr nəṣûrâ:

9 lûlê yəhwâ ṣəḇā’wōṯ hwōṯîr lānû śārîḏ kimə‘āṭ kisəḏōm hāyînû l^a‘ămōrâ dāmînû: s

10 šimə‘û ḏəḇar-yəhwâ qəṣînê səḏōm ha’ăzînû twōraṯ ’ĕlōhênû ‘am ‘ămōrâ:

11 lāmmâ-llî rōḇ-ziḇəḥêḵem yō’mar yəhwâ śāḇ^a‘ətî ‘ōlwōṯ ’êlîm wəḥēleḇ mərî’îm wəḏam pārîm ûḵəḇāśîm wə‘atûḏîm lō’ ḥāfāṣətî:

12 kî ṯāḇō’û lērā’wōṯ pānāy mî-ḇiqqēš zō’ṯ mîyeḏəḵem rəmōs ḥăṣērāy:

13 lō’ ṯwōsîfû hāḇî’ minəḥaṯ-šāwə’ qəṭōreṯ twō‘ēḇâ hî’ lî ḥōḏeš wəšabāṯ qərō’ miqərā’ lō’-’ûḵal ’āwen w^a‘ăṣārâ:

14 ḥāḏəšêḵem ûmwō‘ăḏêḵem śānə’â nafəšî hāyû ‘ālay lāṭōr^aḥ nilə’êṯî nəśō’:

15 ûḇəfāriśəḵem kapêḵem ’^a‘əlîm ‘ênay mikem gam kî-ṯarəbû ṯəfillâ ’ênennî šōmē‘a yəḏêḵem dāmîm mālē’û:

16 r^aḥăṣû hizzakû hāsîrû rō‘a m^a‘aləlêḵem minneḡeḏ ‘ênāy ḥiḏəlû hārē‘a:

17 liməḏû hêṭēḇ dirəšû mišəpāṭ ’aššərû ḥāmwōṣ šifəṭû yāṯwōm rîḇû ’aləmānâ: s

18 ləḵû-nā’ wəniûāḵəḥâ yō’mar yəhwâ ’im-yihəyû ḥăṭā’êḵem kaššānîm kaššeleḡ yaləbînû ’im-ya’ədîmû ḵatwōlā‘ kaṣṣemer yihəyû:

19 ’im-tō’ḇû ûšəm^a‘ətem ṭûḇ hā’āreṣ tō’ḵēlû:

20 wə’im-təmā’ănû ûmərîṯem ḥereḇ tə’ukəlû kî pî yəhwâ dibēr: s

21 ’êḵâ hāyəṯâ ləzwōnâ qirəyâ ne’ĕmānâ məlē’ăṯî mišəpāṭ ṣeḏeq yālîn bāh wə‘atâ məraṣṣəḥîm:

22 kasəpēḵə hāyâ ləsîḡîm sāḇə’ēḵə mâûl bammāyim:

23 śārayiḵə swōrərîm wəḥaḇərê gannāḇîm kullwō ’ōhēḇ šōḥaḏ wərōḏēf šaləmōnîm yāṯwōm lō’ yišəpōṭû wərîḇ ’aləmānâ lō’-yāḇwō’ ’ălêhem: f

24 lāḵēn nə’um hā’āḏwōn yəhwâ ṣəḇā’wōṯ ’ăḇîr yiśərā’ēl hwōy ’ennāḥēm miṣṣāray wə’innāqəmâ mē’wōyəḇāy:

25 wə’āšîḇâ yāḏî ‘ālayiḵə wə’eṣərōf kabōr sîḡāyiḵə wə’āsîrâ kāl-bəḏîlāyiḵə:

26 wə’āšîḇâ šōfəṭayiḵə kəḇāri’šōnâ wəyō‘ăṣayiḵə kəḇatəḥillâ ’^aḥărê-ḵēn yiqqārē’ lāḵə ‘îr haṣṣeḏeq qirəyâ ne’ĕmānâ:

27 ṣîywōn bəmišəpāṭ tipāḏeh wəšāḇeyhā biṣəḏāqâ:

28 wəšeḇer pōšə‘îm wəḥaṭṭā’îm y^aḥədāw wə‘ōzəḇê yəhwâ yiḵəlû:

29 kî yēḇōšû mē’êlîm ’ăšer ḥămaḏətem wəṯ^aḥəpərû mēhagannwōṯ ’ăšer bəḥarətem:

30 kî ṯihəyû kə’ēlâ nōḇeleṯ ‘ālehā ûḵəḡannâ ’ăšer-mayim ’ên lāh:

31 wəhāyâ heḥāsōn linə‘ōreṯ ûfō‘ălwō lənîṣwōṣ ûḇā‘ărû šənêhem y^aḥədāw wə’ên məḵabeh: s