Isaiah (Yisheyah) Chapter 5

‎1 ‏אָשִׁ֤ירָה נָּא֙ לִֽידִידִ֔י שִׁירַ֥ת דּוֹדִ֖י לְכַרְמ֑וֹ כֶּ֛רֶם הָיָ֥ה לִֽידִידִ֖י בְּקֶ֥רֶן בֶּן־שָֽׁמֶן׃

‎2 ‏וַֽיְעַזְּקֵ֣הוּ וַֽיְסַקְּלֵ֗הוּ וַיִּטָּעֵ֙הוּ֙ שֹׂרֵ֔ק וַיִּ֤בֶן מִגְדָּל֙ בְּתוֹכ֔וֹ וְגַם־יֶ֖קֶב חָצֵ֣ב בּ֑וֹ וַיְקַ֛ו לַעֲשׂ֥וֹת עֲנָבִ֖ים וַיַּ֥עַשׂ בְּאֻשִֽׁים׃

‎3 ‏וְעַתָּ֛ה יוֹשֵׁ֥ב יְרוּשָׁלִַ֖ם וְאִ֣ישׁ יְהוּדָ֑ה שִׁפְטוּ־נָ֕א בֵּינִ֖י וּבֵ֥ין כַּרְמִֽי׃

‎4 ‏מַה־לַּעֲשׂ֥וֹת עוֹד֙ לְכַרְמִ֔י וְלֹ֥א עָשִׂ֖יתִי בּ֑וֹ מַדּ֧וּעַ קִוֵּ֛יתִי לַעֲשׂ֥וֹת עֲנָבִ֖ים וַיַּ֥עַשׂ בְּאֻשִֽׁים׃

‎5 ‏וְעַתָּה֙ אוֹדִֽיעָה־נָּ֣א אֶתְכֶ֔ם אֵ֛ת אֲשֶׁר־אֲנִ֥י עֹשֶׂ֖ה לְכַרְמִ֑י הָסֵ֤ר מְשׂוּכָּתוֹ֙ וְהָיָ֣ה לְבָעֵ֔ר פָּרֹ֥ץ גְּדֵר֖וֹ וְהָיָ֥ה לְמִרְמָֽס׃

‎6 ‏וַאֲשִׁיתֵ֣הוּ בָתָ֗ה לֹ֤א יִזָּמֵר֙ וְלֹ֣א יֵעָדֵ֔ר וְעָלָ֥ה שָׁמִ֖יר וָשָׁ֑יִת וְעַ֤ל הֶעָבִים֙ אֲצַוֶּ֔ה מֵהַמְטִ֥יר עָלָ֖יו מָטָֽר׃

‎7 ‏כִּ֣י כֶ֜רֶם יְהוָ֤ה צְבָאוֹת֙ בֵּ֣ית יִשְׂרָאֵ֔ל וְאִ֣ישׁ יְהוּדָ֔ה נְטַ֖ע שַׁעֲשׁוּעָ֑יו וַיְקַ֤ו לְמִשְׁפָּט֙ וְהִנֵּ֣ה מִשְׂפָּ֔ח לִצְדָקָ֖ה וְהִנֵּ֥ה צְעָקָֽה׃ ס

‎8 ‏ה֗וֹי מַגִּיעֵ֥י בַ֙יִת֙ בְּבַ֔יִת שָׂדֶ֥ה בְשָׂדֶ֖ה יַקְרִ֑יבוּ עַ֚ד אֶ֣פֶס מָק֔וֹם וְהֽוּשַׁבְתֶּ֥ם לְבַדְּכֶ֖ם בְּקֶ֥רֶב הָאָֽרֶץ׃

‎9 ‏בְּאָזְנָ֖י יְהוָ֣ה צְבָא֑וֹת אִם־לֹ֞א בָּתִּ֤ים רַבִּים֙ לְשַׁמָּ֣ה יִֽהְי֔וּ גְּדֹלִ֥ים וְטוֹבִ֖ים מֵאֵ֥ין יוֹשֵֽׁב׃

‎10 ‏כִּ֗י עֲשֶׂ֙רֶת֙ צִמְדֵּי־כֶ֔רֶם יַעֲשׂ֖וּ בַּ֣ת אֶחָ֑ת וְזֶ֥רַע חֹ֖מֶר יַעֲשֶׂ֥ה אֵיפָֽה׃ פ

‎11 ‏ה֛וֹי מַשְׁכִּימֵ֥י בַבֹּ֖קֶר שֵׁכָ֣ר יִרְדֹּ֑פוּ מְאַחֲרֵ֣י בַנֶּ֔שֶׁף יַ֖יִן יַדְלִיקֵֽם׃

‎12 ‏וְהָיָ֨ה כִנּ֜וֹר וָנֶ֗בֶל תֹּ֧ף וְחָלִ֛יל וָיַ֖יִן מִשְׁתֵּיהֶ֑ם וְאֵ֨ת פֹּ֤עַל יְהוָה֙ לֹ֣א יַבִּ֔יטוּ וּמַעֲשֵׂ֥ה יָדָ֖יו לֹ֥א רָאֽוּ׃

‎13 ‏לָכֵ֛ן גָּלָ֥ה עַמִּ֖י מִבְּלִי־דָ֑עַת וּכְבוֹדוֹ֙ מְתֵ֣י רָעָ֔ב וַהֲמוֹנ֖וֹ צִחֵ֥ה צָמָֽא׃

‎14 ‏לָכֵ֗ן הִרְחִ֤יבָה שְּׁאוֹל֙ נַפְשָׁ֔הּ וּפָעֲרָ֥ה פִ֖יהָ לִבְלִי־חֹ֑ק וְיָרַ֨ד הֲדָרָ֧הּ וַהֲמוֹנָ֛הּ וּשְׁאוֹנָ֖הּ וְעָלֵ֥ז בָּֽהּ׃

‎15 ‏וַיִּשַּׁ֥ח אָדָ֖ם וַיִּשְׁפַּל־אִ֑ישׁ וְעֵינֵ֥י גְבֹהִ֖ים תִּשְׁפַּֽלְנָה׃

‎16 ‏וַיִּגְבַּ֛ה¹ יְהוָ֥ה צְבָא֖וֹת בַּמִּשְׁפָּ֑ט וְהָאֵל֙ הַקָּד֔וֹשׁ נִקְדָּ֖שׁ בִּצְדָקָֽה׃

‎17 ‏וְרָע֥וּ כְבָשִׂ֖ים כְּדָבְרָ֑ם וְחָרְב֥וֹת מֵחִ֖ים גָּרִ֥ים יֹאכֵֽלוּ׃

‎18 ‏ה֛וֹי מֹשְׁכֵ֥י הֶֽעָוֹ֖ן בְּחַבְלֵ֣י הַשָּׁ֑וְא וְכַעֲב֥וֹת הָעֲגָלָ֖ה חַטָּאָֽה׃

‎19 ‏הָאֹמְרִ֗ים יְמַהֵ֧ר׀ יָחִ֛ישָׁה מַעֲשֵׂ֖הוּ לְמַ֣עַן נִרְאֶ֑ה וְתִקְרַ֣ב וְתָב֗וֹאָה עֲצַ֛ת קְד֥וֹשׁ יִשְׂרָאֵ֖ל וְנֵדָֽעָה׃ ס

‎20 ‏ה֣וֹי הָאֹמְרִ֥ים לָרַ֛ע ט֖וֹב וְלַטּ֣וֹב רָ֑ע שָׂמִ֨ים חֹ֤שֶׁךְ לְאוֹר֙ וְא֣וֹר לְחֹ֔שֶׁךְ שָׂמִ֥ים מַ֛ר לְמָת֖וֹק וּמָת֥וֹק לְמָֽר׃ ס

‎21 ‏ה֖וֹי חֲכָמִ֣ים בְּעֵֽינֵיהֶ֑ם וְנֶ֥גֶד פְּנֵיהֶ֖ם נְבֹנִֽים׃

‎22 ‏ה֕וֹי גִּבּוֹרִ֖ים לִשְׁתּ֣וֹת יָ֑יִן וְאַנְשֵׁי־חַ֖יִל לִמְסֹ֥ךְ שֵׁכָֽר׃

‎23 ‏מַצְדִּיקֵ֥י רָשָׁ֖ע עֵ֣קֶב שֹׁ֑חַד וְצִדְקַ֥ת צַדִּיקִ֖ים יָסִ֥ירוּ מִמֶּֽנּוּ׃ ס

‎24 ‏לָכֵן֩ כֶּאֱכֹ֨ל קַ֜שׁ לְשׁ֣וֹן אֵ֗שׁ וַחֲשַׁ֤שׁ לֶֽהָבָה֙ יִרְפֶּ֔ה שָׁרְשָׁם֙ כַּמָּ֣ק יִֽהְיֶ֔ה וּפִרְחָ֖ם כָּאָבָ֣ק יַעֲלֶ֑ה כִּ֣י מָאֲס֗וּ אֵ֚ת תּוֹרַת֙ יְהוָ֣ה צְבָא֔וֹת וְאֵ֛ת אִמְרַ֥ת קְדֽוֹשׁ־יִשְׂרָאֵ֖ל נִאֵֽצוּ׃

‎25 ‏עַל־כֵּ֡ן חָרָה֩ אַף־יְהוָ֨ה בְּעַמּ֜וֹ וַיֵּ֣ט יָד֧וֹ עָלָ֣יו וַיַּכֵּ֗הוּ וַֽיִּרְגְּזוּ֙ הֶֽהָרִ֔ים וַתְּהִ֧י נִבְלָתָ֛ם כַּסּוּחָ֖ה בְּקֶ֣רֶב חוּצ֑וֹת בְּכָל־זֹאת֙ לֹא־שָׁ֣ב אַפּ֔וֹ וְע֖וֹד יָד֥וֹ נְטוּיָֽה׃

‎26 ‏וְנָֽשָׂא־נֵ֤ס לַגּוֹיִם֙ מֵרָח֔וֹק וְשָׁ֥רַק ל֖וֹ מִקְצֵ֣ה הָאָ֑רֶץ וְהִנֵּ֥ה מְהֵרָ֖ה קַ֥ל יָבֽוֹא׃

‎27 ‏אֵין־עָיֵ֤ף וְאֵין־כּוֹשֵׁל֙ בּ֔וֹ לֹ֥א יָנ֖וּם וְלֹ֣א יִישָׁ֑ן וְלֹ֤א נִפְתַּח֙ אֵז֣וֹר חֲלָצָ֔יו וְלֹ֥א נִתַּ֖ק שְׂר֥וֹךְ נְעָלָֽיו׃

‎28 ‏אֲשֶׁ֤ר חִצָּיו֙ שְׁנוּנִ֔ים וְכָל־קַשְּׁתֹתָ֖יו דְּרֻכ֑וֹת פַּרְס֤וֹת סוּסָיו֙ כַּצַּ֣ר נֶחְשָׁ֔בוּ וְגַלְגִּלָּ֖יו כַּסּוּפָֽה׃

‎29 ‏שְׁאָגָ֥ה ל֖וֹ כַּלָּבִ֑יא ושאג יִשְׁאַ֨ג כַּכְּפִירִ֤ים וְיִנְהֹם֙ וְיֹאחֵ֣ז טֶ֔רֶף וְיַפְלִ֖יט וְאֵ֥ין מַצִּֽיל׃

‎30 ‏וְיִנְהֹ֥ם עָלָ֛יו בַּיּ֥וֹם הַה֖וּא כְּנַהֲמַת־יָ֑ם וְנִבַּ֤ט לָאָ֙רֶץ֙ וְהִנֵּה־חֹ֔שֶׁךְ צַ֣ר וָא֔וֹר חָשַׁ֖ךְ בַּעֲרִיפֶֽיהָ׃ פ

1 ’āšîrâ nnā’ lîḏîḏî šîraṯ dwōḏî ləḵarəmwō kerem hāyâ lîḏîḏî bəqeren ben-šāmen:

2 wayə‘azzəqēhû wayəsaqqəlēhû wayyiṭṭā‘ēhû śōrēq wayyiḇen miḡədāl bəṯwōḵwō wəḡam-yeqeḇ ḥāṣēḇ bwō wayəqaw l^a‘ăśwōṯ ‘ănāḇîm wayy^a‘aś bə’ušîm:

3 wə‘atâ ywōšēḇ yərûšālaim wə’îš yəhûḏâ šifəṭû-nā’ bênî ûḇên karəmî:

4 mah-ll^a‘ăśwōṯ ‘wōḏ ləḵarəmî wəlō’ ‘āśîṯî bwō madû‘a qiûêṯî l^a‘ăśwōṯ ‘ănāḇîm wayy^a‘aś bə’ušîm:

5 wə‘atâ ’wōḏî‘â-nnā’ ’eṯəḵem ’ēṯ ’ăšer-’ănî ‘ōśeh ləḵarəmî hāsēr məśûkāṯwō wəhāyâ ləḇā‘ēr pārōṣ gəḏērwō wəhāyâ ləmirəmās:

6 wa’ăšîṯēhû ḇāṯâ lō’ yizzāmēr wəlō’ yē‘āḏēr wə‘ālâ šāmîr wāšāyiṯ wə‘al he‘āḇîm ’ăṣaûeh mēhaməṭîr ‘ālāyw māṭār:

7 kî ḵerem yəhwâ ṣəḇā’wōṯ bêṯ yiśərā’ēl wə’îš yəhûḏâ nəṭ^a‘ š^a‘ăšû‘āyw wayəqaw ləmišəpāṭ wəhinnēh miśəpāḥ liṣəḏāqâ wəhinnēh ṣə‘āqâ: s

8 hwōy magî‘ê ḇayiṯ bəḇayiṯ śāḏeh ḇəśāḏeh yaqərîḇû ‘aḏ ’efes māqwōm wəhûšaḇətem ləḇadəḵem bəqereḇ hā’āreṣ:

9 bə’āzənāy yəhwâ ṣəḇā’wōṯ ’im-lō’ bātîm rabîm ləšammâ yihəyû gəḏōlîm wəṭwōḇîm mē’ên ywōšēḇ:

10 kî ‘ăśereṯ ṣimədê-ḵerem y^a‘ăśû baṯ ’eḥāṯ wəzer^a‘ ḥōmer y^a‘ăśeh ’êfâ: f

11 hwōy mašəkîmê ḇabōqer šēḵār yirədōfû mə’^aḥărê ḇannešef yayin yaḏəlîqēm:

12 wəhāyâ ḵinnwōr wāneḇel tōf wəḥālîl wāyayin mišətêhem wə’ēṯ pō‘al yəhwâ lō’ yabîṭû ûm^a‘ăśēh yāḏāyw lō’ rā’û:

13 lāḵēn gālâ ‘ammî mibəlî-ḏā‘aṯ ûḵəḇwōḏwō məṯê rā‘āḇ wahămwōnwō ṣiḥēh ṣāmā’:

14 lāḵēn hirəḥîḇâ ššə’wōl nafəšāh ûfā‘ărâ fîhā liḇəlî-ḥōq wəyāraḏ hăḏārāh wahămwōnāh ûšə’wōnāh wə‘ālēz bāh:

15 wayyišš^aḥ ’āḏām wayyišəpal-’îš wə‘ênê ḡəḇōhîm tišəpalənâ:

16 wayyiḡəbah¹ yəhwâ ṣəḇā’wōṯ bammišəpāṭ wəhā’ēl haqqāḏwōš niqədāš biṣəḏāqâ:

17 wərā‘û ḵəḇāśîm kəḏāḇərām wəḥārəḇwōṯ mēḥîm gārîm yō’ḵēlû:

18 hwōy mōšəḵê he‘āwōn bəḥaḇəlê haššāwə’ wəḵ^a‘ăḇwōṯ hā‘ăḡālâ ḥaṭṭā’â:

19 hā’ōmərîm yəmahēr| yāḥîšâ m^a‘ăśēhû ləm^a‘an nirə’eh wəṯiqəraḇ wəṯāḇwō’â ‘ăṣaṯ qəḏwōš yiśərā’ēl wənēḏā‘â: s

20 hwōy hā’ōmərîm lār^a‘ ṭwōḇ wəlaṭṭwōḇ rā‘ śāmîm ḥōšeḵə lə’wōr wə’wōr ləḥōšeḵə śāmîm mar ləmāṯwōq ûmāṯwōq ləmār: s

21 hwōy ḥăḵāmîm bə‘ênêhem wəneḡeḏ pənêhem nəḇōnîm:

22 hwōy gibwōrîm lišətwōṯ yāyin wə’anəšê-ḥayil liməsōḵə šēḵār:

23 maṣədîqê rāšā‘ ‘ēqeḇ šōḥaḏ wəṣiḏəqaṯ ṣadîqîm yāsîrû mimmennû: s

24 lāḵēn ke’ĕḵōl qaš ləšwōn ’ēš w^aḥăšaš lehāḇâ yirəpeh šārəšām kammāq yihəyeh ûfirəḥām kā’āḇāq y^a‘ăleh kî mā’ăsû ’ēṯ twōraṯ yəhwâ ṣəḇā’wōṯ wə’ēṯ ’iməraṯ qəḏwōš-yiśərā’ēl ni’ēṣû:

25 ‘al-kēn ḥārâ ’af-yəhwâ bə‘ammwō wayyēṭ yāḏwō ‘ālāyw wayyakēhû wayyirəgəzû hehārîm watəhî niḇəlāṯām kassûḥâ bəqereḇ ḥûṣwōṯ bəḵāl-zō’ṯ lō’-šāḇ ’apwō wə‘wōḏ yāḏwō nəṭûyâ:

26 wənāśā’-nēs lagwōyim mērāḥwōq wəšāraq lwō miqəṣēh hā’āreṣ wəhinnēh məhērâ qal yāḇwō’:

27 ’ên-‘āyēf wə’ên-kwōšēl bwō lō’ yānûm wəlō’ yîšān wəlō’ nifət^aḥ ’ēzwōr ḥălāṣāyw wəlō’ nitaq śərwōḵə nə‘ālāyw:

28 ’ăšer ḥiṣṣāyw šənûnîm wəḵāl-qaššəṯōṯāyw dəruḵwōṯ parəswōṯ sûsāyw kaṣṣar neḥəšāḇû wəḡaləgillāyw kassûfâ:

29 šə’āḡâ lwō kallāḇî’ wəšā’aḡ yišə’aḡ kakəfîrîm wəyinəhōm wəyō’ḥēz ṭeref wəyafəlîṭ wə’ên maṣṣîl:

30 wəyinəhōm ‘ālāyw bayywōm hahû’ kənahămaṯ-yām wənibaṭ lā’āreṣ wəhinnēh-ḥōšeḵə ṣar wā’wōr ḥāšaḵə b^a‘ărîfeyhā: f