Isaiah (Yisheyah) Chapter 7

‎1 ‏וַיְהִ֡י בִּימֵ֣י אָ֠חָז בֶּן־יוֹתָ֨ם בֶּן־עֻזִּיָּ֜הוּ מֶ֣לֶךְ יְהוּדָ֗ה עָלָ֣ה רְצִ֣ין מֶֽלֶךְ־אֲ֠רָם וּפֶ֨קַח בֶּן־רְמַלְיָ֤הוּ מֶֽלֶךְ־יִשְׂרָאֵל֙ יְר֣וּשָׁלִַ֔ם לַמִּלְחָמָ֖ה עָלֶ֑יהָ וְלֹ֥א יָכֹ֖ל לְהִלָּחֵ֥ם עָלֶֽיהָ׃

‎2 ‏וַיֻּגַּ֗ד לְבֵ֤ית דָּוִד֙ לֵאמֹ֔ר נָ֥חָֽה אֲרָ֖ם עַל־אֶפְרָ֑יִם וַיָּ֤נַע לְבָבוֹ֙ וּלְבַ֣ב עַמּ֔וֹ כְּנ֥וֹעַ עֲצֵי־יַ֖עַר מִפְּנֵי־רֽוּחַ׃

‎3 ‏וַיֹּ֣אמֶר יְהוָה֮ אֶֽל־יְשַׁעְיָהוּ֒ צֵא־נָא֙ לִקְרַ֣את אָחָ֔ז אַתָּ֕ה וּשְׁאָ֖ר יָשׁ֣וּב בְּנֶ֑ךָ אֶל־קְצֵ֗ה תְּעָלַת֙ הַבְּרֵכָ֣ה הָעֶלְיוֹנָ֔ה אֶל־מְסִלַּ֖ת שְׂדֵ֥ה כוֹבֵֽס׃

‎4 ‏וְאָמַרְתָּ֣ אֵ֠לָיו הִשָּׁמֵ֨ר וְהַשְׁקֵ֜ט אַל־תִּירָ֗א וּלְבָבְךָ֙ אַל־יֵרַ֔ךְ מִשְּׁנֵ֨י זַנְב֧וֹת הָאוּדִ֛ים הָעֲשֵׁנִ֖ים הָאֵ֑לֶּה בָּחֳרִי־אַ֛ף רְצִ֥ין וַאֲרָ֖ם וּבֶן־רְמַלְיָֽהוּ׃

‎5 ‏יַ֗עַן כִּֽי־יָעַ֥ץ עָלֶ֛יךָ אֲרָ֖ם רָעָ֑ה אֶפְרַ֥יִם וּבֶן־רְמַלְיָ֖הוּ לֵאמֹֽר׃

‎6 ‏נַעֲלֶ֤ה בִֽיהוּדָה֙ וּנְקִיצֶ֔נָּה וְנַבְקִעֶ֖נָּה אֵלֵ֑ינוּ וְנַמְלִ֥יךְ מֶ֙לֶךְ֙ בְּתוֹכָ֔הּ אֵ֖ת בֶּן־טָֽבְאַֽל׃ ס

‎7 ‏כֹּ֥ה אָמַ֖ר אֲדֹנָ֣י יְהוִ֑ה לֹ֥א תָק֖וּם וְלֹ֥א תִֽהְיֶֽה׃

‎8 ‏כִּ֣י רֹ֤אשׁ אֲרָם֙ דַּמֶּ֔שֶׂק וְרֹ֥אשׁ דַּמֶּ֖שֶׂק רְצִ֑ין וּבְע֗וֹד שִׁשִּׁ֤ים וְחָמֵשׁ֙ שָׁנָ֔ה יֵחַ֥ת אֶפְרַ֖יִם מֵעָֽם׃

‎9 ‏וְרֹ֤אשׁ אֶפְרַ֙יִם֙ שֹׁמְר֔וֹן וְרֹ֥אשׁ שֹׁמְר֖וֹן בֶּן־רְמַלְיָ֑הוּ אִ֚ם לֹ֣א תַאֲמִ֔ינוּ כִּ֖י לֹ֥א תֵאָמֵֽנוּ׃ ס

‎10 ‏וַיּ֣וֹסֶף יְהוָ֔ה דַּבֵּ֥ר אֶל־אָחָ֖ז לֵאמֹֽר׃

‎11 ‏שְׁאַל־לְךָ֣ א֔וֹת מֵעִ֖ם יְהוָ֣ה אֱלֹהֶ֑יךָ הַעְמֵ֣ק שְׁאָ֔לָה א֖וֹ הַגְבֵּ֥הַּ לְמָֽעְלָה׃

‎12 ‏וַיֹּ֖אמֶר אָחָ֑ז לֹא־אֶשְׁאַ֥ל וְלֹֽא־אֲנַסֶּ֖ה אֶת־יְהוָֽה׃

‎13 ‏וַיֹּ֕אמֶר שִׁמְעוּ־נָ֖א בֵּ֣ית דָּוִ֑ד הַמְעַ֤ט מִכֶּם֙ הַלְא֣וֹת אֲנָשִׁ֔ים כִּ֥י תַלְא֖וּ גַּ֥ם אֶת־אֱלֹהָֽי׃

‎14 ‏לָ֠כֵן יִתֵּ֨ן אֲדֹנָ֥י ה֛וּא לָכֶ֖ם א֑וֹת הִנֵּ֣ה הָעַלְמָ֗ה הָרָה֙ וְיֹלֶ֣דֶת בֵּ֔ן וְקָרָ֥את שְׁמ֖וֹ עִמָּ֥נוּ אֵֽל׃

‎15 ‏חֶמְאָ֥ה וּדְבַ֖שׁ יֹאכֵ֑ל לְדַעְתּ֛וֹ מָא֥וֹס בָּרָ֖ע וּבָח֥וֹר בַּטּֽוֹב׃

‎16 ‏כִּ֠י בְּטֶ֨רֶם יֵדַ֥ע הַנַּ֛עַר מָאֹ֥ס בָּרָ֖ע וּבָחֹ֣ר בַּטּ֑וֹב תֵּעָזֵ֤ב הָאֲדָמָה֙ אֲשֶׁ֣ר אַתָּ֣ה קָ֔ץ מִפְּנֵ֖י שְׁנֵ֥י מְלָכֶֽיהָ׃

‎17 ‏יָבִ֨יא יְהוָ֜ה עָלֶ֗יךָ וְעַֽל־עַמְּךָ֮ וְעַל־בֵּ֣ית אָבִיךָ֒ יָמִים֙ אֲשֶׁ֣ר לֹא־בָ֔אוּ לְמִיּ֥וֹם סוּר־אֶפְרַ֖יִם מֵעַ֣ל יְהוּדָ֑ה אֵ֖ת מֶ֥לֶךְ אַשּֽׁוּר׃ פ

‎18 ‏וְהָיָ֣ה׀ בַּיּ֣וֹם הַה֗וּא יִשְׁרֹ֤ק יְהוָה֙ לַזְּב֔וּב אֲשֶׁ֥ר בִּקְצֵ֖ה יְאֹרֵ֣י מִצְרָ֑יִם וְלַ֨דְּבוֹרָ֔ה אֲשֶׁ֖ר בְּאֶ֥רֶץ אַשּֽׁוּר׃

‎19 ‏וּבָ֨אוּ וְנָח֤וּ כֻלָּם֙ בְּנַחֲלֵ֣י הַבַּתּ֔וֹת וּבִנְקִיקֵ֖י הַסְּלָעִ֑ים וּבְכֹל֙ הַנַּ֣עֲצוּצִ֔ים וּבְכֹ֖ל הַנַּהֲלֹלִֽים׃

‎20 ‏בַּיּ֣וֹם הַה֡וּא יְגַלַּ֣ח אֲדֹנָי֩ בְּתַ֨עַר הַשְּׂכִירָ֜ה בְּעֶבְרֵ֤י נָהָר֙ בְּמֶ֣לֶךְ אַשּׁ֔וּר אֶת־הָרֹ֖אשׁ וְשַׂ֣עַר הָרַגְלָ֑יִם³ וְגַ֥ם אֶת־הַזָּקָ֖ן תִּסְפֶּֽה׃ ס

‎21 ‏וְהָיָ֖ה בַּיּ֣וֹם הַה֑וּא יְחַיֶּה־אִ֛ישׁ עֶגְלַ֥ת בָּקָ֖ר וּשְׁתֵּי־צֹֽאן׃

‎22 ‏וְהָיָ֗ה מֵרֹ֛ב עֲשׂ֥וֹת חָלָ֖ב יֹאכַ֣ל חֶמְאָ֑ה כִּֽי־חֶמְאָ֤ה וּדְבַשׁ֙ יֹאכֵ֔ל כָּל־הַנּוֹתָ֖ר בְּקֶ֥רֶב הָאָֽרֶץ׃

‎23 ‏וְהָיָה֙ בַּיּ֣וֹם הַה֔וּא יִֽהְיֶ֣ה כָל־מָק֗וֹם אֲשֶׁ֧ר יִֽהְיֶה־שָּׁ֛ם אֶ֥לֶף גֶּ֖פֶן בְּאֶ֣לֶף כָּ֑סֶף לַשָּׁמִ֥יר וְלַשַּׁ֖יִת יִֽהְיֶֽה׃

‎24 ‏בַּחִצִּ֥ים וּבַקֶּ֖שֶׁת יָ֣בוֹא שָׁ֑מָּה כִּי־שָׁמִ֥יר וָשַׁ֖יִת תִּֽהְיֶ֥ה כָל־הָאָֽרֶץ׃

‎25 ‏וְכֹ֣ל הֶהָרִ֗ים אֲשֶׁ֤ר בַּמַּעְדֵּר֙ יֵעָ֣דֵר֔וּן לֹֽא־תָב֣וֹא שָׁ֔מָּה יִרְאַ֖ת שָׁמִ֣יר וָשָׁ֑יִת וְהָיָה֙ לְמִשְׁלַ֣ח שׁ֔וֹר וּלְמִרְמַ֖ס שֶֽׂה׃ פ

1 wayəhî bîmê ’āḥāz ben-ywōṯām ben-‘uzzîyâû meleḵə yəhûḏâ ‘ālâ rəṣîn meleḵə-’ărām ûfeq^aḥ ben-rəmaləyâû meleḵə-yiśərā’ēl yərûšālaim lammiləḥāmâ ‘āleyhā wəlō’ yāḵōl ləhillāḥēm ‘āleyhā:

2 wayyugaḏ ləḇêṯ dāwiḏ lē’mōr nāḥâ ’ărām ‘al-’efərāyim wayyān^a‘ ləḇāḇwō ûləḇaḇ ‘ammwō kənwō‘a ‘ăṣê-y^a‘ar mipənê-rûḥa:

3 wayyō’mer yəhwâ ’el-yəš^a‘əyâû ṣē’-nā’ liqəra’ṯ ’āḥāz ’atâ ûšə’ār yāšûḇ bəneḵā ’el-qəṣēh tə‘ālaṯ habərēḵâ hā‘eləywōnâ ’el-məsillaṯ śəḏēh ḵwōḇēs:

4 wə’āmarətā ’ēlāyw hiššāmēr wəhašəqēṭ ’al-tîrā’ ûləḇāḇəḵā ’al-yēraḵə miššənê zanəḇwōṯ hā’ûḏîm hā‘ăšēnîm hā’ēlleh bāḥŏrî-’af rəṣîn wa’ărām ûḇen-rəmaləyâû:

5 y^a‘an kî-yā‘aṣ ‘āleyḵā ’ărām rā‘â ’efərayim ûḇen-rəmaləyâû lē’mōr:

6 n^a‘ăleh ḇîhûḏâ ûnəqîṣennâ wənaḇəqi‘ennâ ’ēlênû wənaməlîḵə meleḵə bəṯwōḵāh ’ēṯ ben-ṭāḇə’al: s

7 kōh ’āmar ’ăḏōnāy yəhwih lō’ ṯāqûm wəlō’ ṯihəyeh:

8 kî rō’š ’ărām dammeśeq wərō’š dammeśeq rəṣîn ûḇə‘wōḏ šiššîm wəḥāmēš šānâ yēḥaṯ ’efərayim mē‘ām:

9 wərō’š ’efərayim šōmərwōn wərō’š šōmərwōn ben-rəmaləyâû ’im lō’ ṯa’ămînû kî lō’ ṯē’āmēnû: s

10 wayywōsef yəhwâ dabēr ’el-’āḥāz lē’mōr:

11 šə’al-ləḵā ’wōṯ mē‘im yəhwâ ’ĕlōheyḵā h^a‘əmēq šə’ālâ ’wō haḡəbēhha ləmā‘əlâ:

12 wayyō’mer ’āḥāz lō’-’ešə’al wəlō’-’ănasseh ’eṯ-yəhwâ:

13 wayyō’mer šimə‘û-nā’ bêṯ dāwiḏ hamə‘aṭ mikem halə’wōṯ ’ănāšîm kî ṯalə’û gam ’eṯ-’ĕlōhāy:

14 lāḵēn yitēn ’ăḏōnāy hû’ lāḵem ’wōṯ hinnēh hā‘aləmâ hārâ wəyōleḏeṯ bēn wəqārā’ṯ šəmwō ‘immānû ’ēl:

15 ḥemə’â ûḏəḇaš yō’ḵēl ləḏ^a‘ətwō mā’wōs bārā‘ ûḇāḥwōr baṭṭwōḇ:

16 kî bəṭerem yēḏ^a‘ hann^a‘ar mā’ōs bārā‘ ûḇāḥōr baṭṭwōḇ tē‘āzēḇ hā’ăḏāmâ ’ăšer ’atâ qāṣ mipənê šənê məlāḵeyhā:

17 yāḇî’ yəhwâ ‘āleyḵā wə‘al-‘amməḵā wə‘al-bêṯ ’āḇîḵā yāmîm ’ăšer lō’-ḇā’û ləmîywōm sûr-’efərayim mē‘al yəhûḏâ ’ēṯ meleḵə ’aššûr: f

18 wəhāyâ| bayywōm hahû’ yišərōq yəhwâ lazzəḇûḇ ’ăšer biqəṣēh yə’ōrê miṣərāyim wəladəḇwōrâ ’ăšer bə’ereṣ ’aššûr:

19 ûḇā’û wənāḥû ḵullām bən^aḥălê habatwōṯ ûḇinəqîqê hassəlā‘îm ûḇəḵōl hann^a‘ăṣûṣîm ûḇəḵōl hannahălōlîm:

20 bayywōm hahû’ yəḡall^aḥ ’ăḏōnāy bəṯ^a‘ar haśśəḵîrâ bə‘eḇərê nâār bəmeleḵə ’aššûr ’eṯ-hārō’š wəś^a‘ar hāraḡəlāyim³ wəḡam ’eṯ-hazzāqān tisəpeh: s

21 wəhāyâ bayywōm hahû’ yəḥayyeh-’îš ‘eḡəlaṯ bāqār ûšətê-ṣō’n:

22 wəhāyâ mērōḇ ‘ăśwōṯ ḥālāḇ yō’ḵal ḥemə’â kî-ḥemə’â ûḏəḇaš yō’ḵēl kāl-hannwōṯār bəqereḇ hā’āreṣ:

23 wəhāyâ bayywōm hahû’ yihəyeh ḵāl-māqwōm ’ăšer yihəyeh-ššām ’elef gefen bə’elef kāsef laššāmîr wəlaššayiṯ yihəyeh:

24 b^aḥiṣṣîm ûḇaqqešeṯ yāḇwō’ šāmmâ kî-šāmîr wāšayiṯ tihəyeh ḵāl-hā’āreṣ:

25 wəḵōl hehārîm ’ăšer bamm^a‘ədēr yē‘āḏērûn lō’-ṯāḇwō’ šāmmâ yirə’aṯ šāmîr wāšāyiṯ wəhāyâ ləmišəl^aḥ šwōr ûləmirəmas śeh: f