Isaiah (Yisheyah) Chapter 20

‎1 ‏בִּשְׁנַ֨ת בֹּ֤א תַרְתָּן֙ אַשְׁדּ֔וֹדָה בִּשְׁלֹ֣ח אֹת֔וֹ סַֽרְג֖וֹן מֶ֣לֶךְ אַשּׁ֑וּר וַיִּלָּ֥חֶם בְּאַשְׁדּ֖וֹד וַֽיִּלְכְּדָֽהּ׃

‎2 ‏בָּעֵ֣ת הַהִ֗יא דִּבֶּ֣ר יְהוָה֮ בְּיַ֣ד יְשַׁעְיָ֣הוּ בֶן־אָמוֹץ֮ לֵאמֹר֒ לֵ֗ךְ וּפִתַּחְתָּ֤ הַשַּׂק֙ מֵעַ֣ל מָתְנֶ֔יךָ וְנַעַלְךָ֥ תַחֲלֹ֖ץ מֵעַ֣ל רַגְלֶ֑יךָ וַיַּ֣עַשׂ כֵּ֔ן הָלֹ֖ךְ עָר֥וֹם וְיָחֵֽף׃ ס

‎3 ‏וַיֹּ֣אמֶר יְהוָ֔ה כַּאֲשֶׁ֥ר הָלַ֛ךְ עַבְדִּ֥י יְשַׁעְיָ֖הוּ עָר֣וֹם וְיָחֵ֑ף שָׁלֹ֤שׁ שָׁנִים֙ א֣וֹת וּמוֹפֵ֔ת עַל־מִצְרַ֖יִם וְעַל־כּֽוּשׁ׃

‎4 ‏כֵּ֣ן יִנְהַ֣ג מֶֽלֶךְ־אַ֠שּׁוּר אֶת־שְׁבִ֨י מִצְרַ֜יִם וְאֶת־גָּל֥וּת כּ֛וּשׁ נְעָרִ֥ים וּזְקֵנִ֖ים עָר֣וֹם וְיָחֵ֑ף וַחֲשׂוּפַ֥י שֵׁ֖ת עֶרְוַ֥ת מִצְרָֽיִם׃

‎5 ‏וְחַתּ֖וּ וָבֹ֑שׁוּ מִכּוּשׁ֙ מַבָּטָ֔ם וּמִן־מִצְרַ֖יִם תִּפְאַרְתָּֽם׃

‎6 ‏וְ֠אָמַר יֹשֵׁ֨ב הָאִ֣י הַזֶּה֮ בַּיּ֣וֹם הַהוּא֒ הִנֵּה־כֹ֣ה מַבָּטֵ֗נוּ אֲשֶׁר־נַ֤סְנוּ שָׁם֙ לְעֶזְרָ֔ה לְהִ֨נָּצֵ֔ל מִפְּנֵ֖י מֶ֣לֶךְ אַשּׁ֑וּר וְאֵ֖יךְ נִמָּלֵ֥ט אֲנָֽחְנוּ׃ ס

1 bišənaṯ bō’ ṯarətān ’ašədwōḏâ bišəlōḥ ’ōṯwō sarəḡwōn meleḵə ’aššûr wayyillāḥem bə’ašədwōḏ wayyiləkəḏāh:

2 bā‘ēṯ hahî’ diber yəhwâ bəyaḏ yəš^a‘əyâû ḇen-’āmwōṣ lē’mōr lēḵə ûfit^aḥətā haśśaq mē‘al māṯəneyḵā wən^a‘aləḵā ṯ^aḥălōṣ mē‘al raḡəleyḵā wayy^a‘aś kēn hālōḵə ‘ārwōm wəyāḥēf: s

3 wayyō’mer yəhwâ ka’ăšer hālaḵə ‘aḇədî yəš^a‘əyâû ‘ārwōm wəyāḥēf šālōš šānîm ’wōṯ ûmwōfēṯ ‘al-miṣərayim wə‘al-kûš:

4 kēn yinəhaḡ meleḵə-’aššûr ’eṯ-šəḇî miṣərayim wə’eṯ-gālûṯ kûš nə‘ārîm ûzəqēnîm ‘ārwōm wəyāḥēf w^aḥăśûfay šēṯ ‘erəwaṯ miṣərāyim:

5 wəḥatû wāḇōšû mikûš mabāṭām ûmin-miṣərayim tifə’arətām:

6 wə’āmar yōšēḇ hā’î hazzeh bayywōm hahû’ hinnēh-ḵōh mabāṭēnû ’ăšer-nasənû šām lə‘ezərâ ləhinnāṣēl mipənê meleḵə ’aššûr wə’êḵə nimmālēṭ ’ănāḥənû: s