Isaiah (Yisheyah) Chapter 31

‎1 ‏ה֣וֹי הַיֹּרְדִ֤ים מִצְרַ֙יִם֙ לְעֶזְרָ֔ה עַל־סוּסִ֖ים יִשָּׁעֵ֑נוּ וַיִּבְטְח֨וּ עַל־רֶ֜כֶב כִּ֣י רָ֗ב וְעַ֤ל פָּֽרָשִׁים֙ כִּֽי־עָצְמ֣וּ מְאֹ֔ד וְלֹ֤א שָׁעוּ֙ עַל־קְד֣וֹשׁ יִשְׂרָאֵ֔ל וְאֶת־יְהוָ֖ה לֹ֥א דָרָֽשׁוּ׃

‎2 ‏וְגַם־ה֤וּא חָכָם֙ וַיָּ֣בֵא רָ֔ע וְאֶת־דְּבָרָ֖יו לֹ֣א הֵסִ֑יר וְקָם֙ עַל־בֵּ֣ית מְרֵעִ֔ים וְעַל־עֶזְרַ֖ת פֹּ֥עֲלֵי אָֽוֶן׃

‎3 ‏וּמִצְרַ֤יִם אָדָם֙ וְֽלֹא־אֵ֔ל וְסוּסֵיהֶ֥ם בָּשָׂ֖ר וְלֹא־ר֑וּחַ וַֽיהוָ֞ה יַטֶּ֣ה יָד֗וֹ וְכָשַׁ֤ל עוֹזֵר֙ וְנָפַ֣ל עָזֻ֔ר וְיַחְדָּ֖ו כֻּלָּ֥ם יִכְלָיֽוּן׃ ס

‎4 ‏כִּ֣י כֹ֣ה אָֽמַר־יְהוָ֣ה׀ אֵלַ֡י כַּאֲשֶׁ֣ר יֶהְגֶּה֩ הָאַרְיֵ֨ה וְהַכְּפִ֜יר עַל־טַרְפּ֗וֹ אֲשֶׁ֨ר יִקָּרֵ֤א עָלָיו֙ מְלֹ֣א רֹעִ֔ים מִקּוֹלָם֙ לֹ֣א יֵחָ֔ת וּמֵֽהֲמוֹנָ֖ם לֹ֣א יַֽעֲנֶ֑ה כֵּ֗ן יֵרֵד֙ יְהוָ֣ה צְבָא֔וֹת לִצְבֹּ֥א עַל־הַר־צִיּ֖וֹן וְעַל־גִּבְעָתָֽהּ׃

‎5 ‏כְּצִפֳּרִ֣ים עָפ֔וֹת כֵּ֗ן יָגֵ֛ן יְהוָ֥ה צְבָא֖וֹת עַל־יְרֽוּשָׁלִָ֑ם גָּנ֥וֹן וְהִצִּ֖יל פָּסֹ֥חַ וְהִמְלִֽיט׃

‎6 ‏שׁ֗וּבוּ לַאֲשֶׁ֛ר הֶעְמִ֥יקוּ סָרָ֖ה בְּנֵ֥י יִשְׂרָאֵֽל׃

‎7 ‏כִּ֚י בַּיּ֣וֹם הַה֔וּא יִמְאָס֗וּן אִ֚ישׁ אֱלִילֵ֣י כַסְפּ֔וֹ וֶאֱלִילֵ֖י זְהָב֑וֹ אֲשֶׁ֨ר עָשׂ֥וּ לָכֶ֛ם יְדֵיכֶ֖ם חֵֽטְא׃

‎8 ‏וְנָפַ֤ל אַשּׁוּר֙ בְּחֶ֣רֶב לֹא־אִ֔ישׁ וְחֶ֥רֶב לֹֽא־אָדָ֖ם תֹּֽאכֲלֶ֑נּוּ וְנָ֥ס לוֹ֙ מִפְּנֵי־חֶ֔רֶב וּבַחוּרָ֖יו לָמַ֥ס יִהְיֽוּ׃

‎9 ‏וְסַלְעוֹ֙ מִמָּג֣וֹר יַֽעֲב֔וֹר וְחַתּ֥וּ מִנֵּ֖ס שָׂרָ֑יו נְאֻם־יְהוָ֗ה אֲשֶׁר־א֥וּר לוֹ֙ בְּצִיּ֔וֹן וְתַנּ֥וּר ל֖וֹ בִּירוּשָׁלִָֽם׃ ס

1 hwōy hayyōrəḏîm miṣərayim lə‘ezərâ ‘al-sûsîm yiššā‘ēnû wayyiḇəṭəḥû ‘al-reḵeḇ kî rāḇ wə‘al pārāšîm kî-‘āṣəmû mə’ōḏ wəlō’ šā‘û ‘al-qəḏwōš yiśərā’ēl wə’eṯ-yəhwâ lō’ ḏārāšû:

2 wəḡam-hû’ ḥāḵām wayyāḇē’ rā‘ wə’eṯ-dəḇārāyw lō’ hēsîr wəqām ‘al-bêṯ mərē‘îm wə‘al-‘ezəraṯ pō‘ălê ’āwen:

3 ûmiṣərayim ’āḏām wəlō’-’ēl wəsûsêhem bāśār wəlō’-rûḥa wayhwâ yaṭṭeh yāḏwō wəḵāšal ‘wōzēr wənāfal ‘āzur wəy^aḥədāw kullām yiḵəlāyûn: s

4 kî ḵōh ’āmar-yəhwâ| ’ēlay ka’ăšer yehəgeh hā’arəyēh wəhakəfîr ‘al-ṭarəpwō ’ăšer yiqqārē’ ‘ālāyw məlō’ rō‘îm miqqwōlām lō’ yēḥāṯ ûmēhămwōnām lō’ y^a‘ăneh kēn yērēḏ yəhwâ ṣəḇā’wōṯ liṣəbō’ ‘al-har-ṣîywōn wə‘al-giḇə‘āṯāh:

5 kəṣipŏrîm ‘āfwōṯ kēn yāḡēn yəhwâ ṣəḇā’wōṯ ‘al-yərûšālāim gānwōn wəhiṣṣîl pāsōḥa wəhiməlîṭ:

6 šûḇû la’ăšer he‘əmîqû sārâ bənê yiśərā’ēl:

7 kî bayywōm hahû’ yimə’āsûn ’îš ’ĕlîlê ḵasəpwō we’ĕlîlê zəhāḇwō ’ăšer ‘āśû lāḵem yəḏêḵem ḥēṭə’:

8 wənāfal ’aššûr bəḥereḇ lō’-’îš wəḥereḇ lō’-’āḏām tō’ḵălennû wənās lwō mipənê-ḥereḇ ûḇ^aḥûrāyw lāmas yihəyû:

9 wəsalə‘wō mimmāḡwōr y^a‘ăḇwōr wəḥatû minnēs śārāyw nə’um-yəhwâ ’ăšer-’ûr lwō bəṣîywōn wəṯannûr lwō bîrûšālāim: s