Isaiah (Yisheyah) Chapter 33

‎1 ‏ה֣וֹי שׁוֹדֵ֗ד וְאַתָּה֙ לֹ֣א שָׁד֔וּד וּבוֹגֵ֖ד וְלֹא־בָ֣גְדוּ ב֑וֹ כַּהֲתִֽמְךָ֤ שׁוֹדֵד֙ תּוּשַּׁ֔ד כַּנְּלֹתְךָ֥ לִבְגֹּ֖ד יִבְגְּדוּ־בָֽךְ׃ ס

‎2 ‏יְהוָ֥ה חָנֵּ֖נוּ לְךָ֣ קִוִּ֑ינוּ הֱיֵ֤ה זְרֹעָם֙ לַבְּקָרִ֔ים אַף־יְשׁוּעָתֵ֖נוּ בְּעֵ֥ת צָרָֽה׃

‎3 ‏מִקּ֣וֹל הָמ֔וֹן נָדְד֖וּ עַמִּ֑ים מֵר֣וֹמְמֻתֶ֔ךָ נָפְצ֖וּ גּוֹיִֽם׃

‎4 ‏וְאֻסַּ֣ף שְׁלַלְכֶ֔ם אֹ֖סֶף הֶֽחָסִ֑יל כְּמַשַּׁ֥ק גֵּבִ֖ים שׁוֹקֵ֥ק בּֽוֹ׃

‎5 ‏נִשְׂגָּ֣ב יְהוָ֔ה כִּ֥י שֹׁכֵ֖ן מָר֑וֹם מִלֵּ֣א צִיּ֔וֹן מִשְׁפָּ֖ט וּצְדָקָֽה׃

‎6 ‏וְהָיָה֙ אֱמוּנַ֣ת עִתֶּ֔יךָ חֹ֥סֶן יְשׁוּעֹ֖ת חָכְמַ֣ת וָדָ֑עַת יִרְאַ֥ת יְהוָ֖ה הִ֥יא אוֹצָרֽוֹ׃ ס

‎7 ‏הֵ֚ן אֶרְאֶלָּ֔ם צָעֲק֖וּ חֻ֑צָה מַלְאֲכֵ֣י שָׁל֔וֹם מַ֖ר יִבְכָּיֽוּן׃

‎8 ‏נָשַׁ֣מּוּ מְסִלּ֔וֹת שָׁבַ֖ת עֹבֵ֣ר אֹ֑רַח הֵפֵ֤ר בְּרִית֙ מָאַ֣ס עָרִ֔ים לֹ֥א חָשַׁ֖ב אֱנֽוֹשׁ׃

‎9 ‏אָבַ֤ל אֻמְלְלָה֙ אָ֔רֶץ הֶחְפִּ֥יר לְבָנ֖וֹן קָמַ֑ל הָיָ֤ה הַשָּׁרוֹן֙ כָּֽעֲרָבָ֔ה וְנֹעֵ֥ר בָּשָׁ֖ן וְכַרְמֶֽל׃

‎10 ‏עַתָּ֥ה אָק֖וּם יֹאמַ֣ר יְהוָ֑ה עַתָּה֙ אֵֽרוֹמָ֔ם עַתָּ֖ה אֶנָּשֵֽׂא׃

‎11 ‏תַּהֲר֥וּ חֲשַׁ֖שׁ תֵּ֣לְדוּ קַ֑שׁ רוּחֲכֶ֕ם אֵ֖שׁ תֹּאכַלְכֶֽם׃

‎12 ‏וְהָי֥וּ עַמִּ֖ים מִשְׂרְפ֣וֹת שִׂ֑יד קוֹצִ֥ים כְּסוּחִ֖ים בָּאֵ֥שׁ יִצַּֽתּוּ׃ ס

‎13 ‏שִׁמְע֥וּ רְחוֹקִ֖ים אֲשֶׁ֣ר עָשִׂ֑יתִי וּדְע֥וּ קְרוֹבִ֖ים גְּבֻרָתִֽי׃

‎14 ‏פָּחֲד֤וּ בְצִיּוֹן֙ חַטָּאִ֔ים אָחֲזָ֥ה רְעָדָ֖ה חֲנֵפִ֑ים מִ֣י׀ יָג֣וּר לָ֗נוּ אֵ֚שׁ אוֹכֵלָ֔ה מִי־יָג֥וּר לָ֖נוּ מוֹקְדֵ֥י עוֹלָֽם׃

‎15 ‏הֹלֵ֣ךְ צְדָק֔וֹת וְדֹבֵ֖ר מֵֽישָׁרִ֑ים מֹאֵ֞ס בְּבֶ֣צַע מַעֲשַׁקּ֗וֹת נֹעֵ֤ר כַּפָּיו֙ מִתְּמֹ֣ךְ בַּשֹּׁ֔חַד אֹטֵ֤ם אָזְנוֹ֙ מִשְּׁמֹ֣עַ דָּמִ֔ים וְעֹצֵ֥ם עֵינָ֖יו מֵרְא֥וֹת בְּרָֽע׃

‎16 ‏ה֚וּא מְרוֹמִ֣ים יִשְׁכֹּ֔ן מְצָד֥וֹת סְלָעִ֖ים מִשְׂגַּבּ֑וֹ לַחְמ֣וֹ נִתָּ֔ן מֵימָ֖יו נֶאֱמָנִֽים׃

‎17 ‏מֶ֥לֶךְ בְּיָפְי֖וֹ תֶּחֱזֶ֣ינָה עֵינֶ֑יךָ תִּרְאֶ֖ינָה אֶ֥רֶץ מַרְחַקִּֽים׃

‎18 ‏לִבְּךָ֖ יֶהְגֶּ֣ה אֵימָ֑ה אַיֵּ֤ה סֹפֵר֙ אַיֵּ֣ה שֹׁקֵ֔ל אַיֵּ֖ה סֹפֵ֥ר אֶת־הַמִּגְדָּלִֽים׃

‎19 ‏אֶת־עַ֥ם נוֹעָ֖ז לֹ֣א תִרְאֶ֑ה עַ֣ם עִמְקֵ֤י שָׂפָה֙ מִשְּׁמ֔וֹעַ נִלְעַ֥ג לָשׁ֖וֹן אֵ֥ין בִּינָֽה׃

‎20 ‏חֲזֵ֣ה צִיּ֔וֹן קִרְיַ֖ת מֽוֹעֲדֵ֑נוּ עֵינֶיךָ֩ תִרְאֶ֨ינָה יְרוּשָׁלִַ֜ם נָוֶ֣ה שַׁאֲנָ֗ן אֹ֤הֶל בַּל־יִצְעָן֙ בַּל־יִסַּ֤ע יְתֵֽדֹתָיו֙ לָנֶ֔צַח וְכָל־חֲבָלָ֖יו בַּל־יִנָּתֵֽקוּ׃

‎21 ‏כִּ֣י אִם־שָׁ֞ם אַדִּ֤יר יְהוָה֙ לָ֔נוּ מְקוֹם־נְהָרִ֥ים יְאֹרִ֖ים רַחֲבֵ֣י יָדָ֑יִם בַּל־תֵּ֤לֶךְ בּוֹ֙ אֳנִי־שַׁ֔יִט וְצִ֥י אַדִּ֖יר לֹ֥א יַעַבְרֶֽנּוּ׃

‎22 ‏כִּ֤י יְהוָה֙ שֹׁפְטֵ֔נוּ יְהוָ֖ה מְחֹקְקֵ֑נוּ יְהוָ֥ה מַלְכֵּ֖נוּ ה֥וּא יוֹשִׁיעֵֽנוּ׃

‎23 ‏נִטְּשׁ֖וּ חֲבָלָ֑יִךְ בַּל־יְחַזְּק֤וּ כֵן־תָּרְנָם֙ בַּל־פָּ֣רְשׂוּ נֵ֔ס אָ֣ז חֻלַּ֤ק עַֽד־שָׁלָל֙ מַרְבֶּ֔ה פִּסְחִ֖ים בָּ֥זְזוּ בַֽז׃

‎24 ‏וּבַל־יֹאמַ֥ר שָׁכֵ֖ן חָלִ֑יתִי הָעָ֛ם הַיֹּשֵׁ֥ב בָּ֖הּ נְשֻׂ֥א עָוֹֽן׃

1 hwōy šwōḏēḏ wə’atâ lō’ šāḏûḏ ûḇwōḡēḏ wəlō’-ḇāḡəḏû ḇwō kahăṯiməḵā šwōḏēḏ tûššaḏ kannəlōṯəḵā liḇəgōḏ yiḇəgəḏû-ḇāḵə: s

2 yəhwâ ḥānnēnû ləḵā qiûînû hĕyēh zərō‘ām labəqārîm ’af-yəšû‘āṯēnû bə‘ēṯ ṣārâ:

3 miqqwōl hāmwōn nāḏəḏû ‘ammîm mērwōməmuṯeḵā nāfəṣû gwōyim:

4 wə’ussaf šəlaləḵem ’ōsef heḥāsîl kəmaššaq gēḇîm šwōqēq bwō:

5 niśəgāḇ yəhwâ kî šōḵēn mārwōm millē’ ṣîywōn mišəpāṭ ûṣəḏāqâ:

6 wəhāyâ ’ĕmûnaṯ ‘iteyḵā ḥōsen yəšû‘ōṯ ḥāḵəmaṯ wāḏā‘aṯ yirə’aṯ yəhwâ hî’ ’wōṣārwō: s

7 hēn ’erə’ellām ṣā‘ăqû ḥuṣâ malə’ăḵê šālwōm mar yiḇəkāyûn:

8 nāšammû məsillwōṯ šāḇaṯ ‘ōḇēr ’ōr^aḥ hēfēr bərîṯ mā’as ‘ārîm lō’ ḥāšaḇ ’ĕnwōš:

9 ’āḇal ’umələlâ ’āreṣ heḥəpîr ləḇānwōn qāmal hāyâ haššārwōn kā‘ărāḇâ wənō‘ēr bāšān wəḵarəmel:

10 ‘atâ ’āqûm yō’mar yəhwâ ‘atâ ’ērwōmām ‘atâ ’ennāśē’:

11 tahărû ḥăšaš tēləḏû qaš rûḥăḵem ’ēš tō’ḵaləḵem:

12 wəhāyû ‘ammîm miśərəfwōṯ śîḏ qwōṣîm kəsûḥîm bā’ēš yiṣṣatû: s

13 šimə‘û rəḥwōqîm ’ăšer ‘āśîṯî ûḏə‘û qərwōḇîm gəḇurāṯî:

14 pāḥăḏû ḇəṣîywōn ḥaṭṭā’îm ’āḥăzâ rə‘āḏâ ḥănēfîm mî| yāḡûr lānû ’ēš ’wōḵēlâ mî-yāḡûr lānû mwōqəḏê ‘wōlām:

15 hōlēḵə ṣəḏāqwōṯ wəḏōḇēr mêšārîm mō’ēs bəḇeṣ^a‘ m^a‘ăšaqqwōṯ nō‘ēr kapāyw mitəmōḵə baššōḥaḏ ’ōṭēm ’āzənwō miššəmō‘a dāmîm wə‘ōṣēm ‘ênāyw mērə’wōṯ bərā‘:

16 hû’ mərwōmîm yišəkōn məṣāḏwōṯ səlā‘îm miśəgabwō l^aḥəmwō nitān mêmāyw ne’ĕmānîm:

17 meleḵə bəyāfəywō teḥĕzeynâ ‘êneyḵā tirə’eynâ ’ereṣ marəḥaqqîm:

18 libəḵā yehəgeh ’êmâ ’ayyēh sōfēr ’ayyēh šōqēl ’ayyēh sōfēr ’eṯ-hammiḡədālîm:

19 ’eṯ-‘am nwō‘āz lō’ ṯirə’eh ‘am ‘iməqê śāfâ miššəmwō‘a nilə‘aḡ lāšwōn ’ên bînâ:

20 ḥăzēh ṣîywōn qirəyaṯ mwō‘ăḏēnû ‘êneyḵā ṯirə’eynâ yərûšālaim nāweh ša’ănān ’ōhel bal-yiṣə‘ān bal-yiss^a‘ yəṯēḏōṯāyw lāneṣ^aḥ wəḵāl-ḥăḇālāyw bal-yinnāṯēqû:

21 kî ’im-šām ’adîr yəhwâ lānû məqwōm-nəhārîm yə’ōrîm r^aḥăḇê yāḏāyim bal-tēleḵə bwō ’ŏnî-šayiṭ wəṣî ’adîr lō’ y^a‘aḇərennû:

22 kî yəhwâ šōfəṭēnû yəhwâ məḥōqəqēnû yəhwâ maləkēnû hû’ ywōšî‘ēnû:

23 niṭṭəšû ḥăḇālāyiḵə bal-yəḥazzəqû ḵēn-tārənām bal-pārəśû nēs ’āz ḥullaq ‘aḏ-šālāl marəbeh pisəḥîm bāzəzû ḇaz:

24 ûḇal-yō’mar šāḵēn ḥālîṯî hā‘ām hayyōšēḇ bāh nəśu’ ‘āwōn: