Isaiah (Yisheyah) Chapter 40

‎1 ‏נַחֲמ֥וּ נַחֲמ֖וּ עַמִּ֑י יֹאמַ֖ר אֱלֹהֵיכֶֽם׃

‎2 ‏דַּבְּר֞וּ עַל־לֵ֤ב יְרֽוּשָׁלִַ֙ם֙ וְקִרְא֣וּ אֵלֶ֔יהָ כִּ֤י מָֽלְאָה֙ צְבָאָ֔הּ כִּ֥י נִרְצָ֖ה עֲוֹנָ֑הּ כִּ֤י לָקְחָה֙ מִיַּ֣ד יְהוָ֔ה כִּפְלַ֖יִם בְּכָל־חַטֹּאתֶֽיהָ׃ ס

‎3 ‏ק֣וֹל קוֹרֵ֔א בַּמִּדְבָּ֕ר פַּנּ֖וּ דֶּ֣רֶךְ יְהוָ֑ה יַשְּׁרוּ֙ בָּעֲרָבָ֔ה מְסִלָּ֖ה לֵאלֹהֵֽינוּ׃

‎4 ‏כָּל־גֶּיא֙ יִנָּשֵׂ֔א וְכָל־הַ֥ר וְגִבְעָ֖ה יִשְׁפָּ֑לוּ וְהָיָ֤ה הֶֽעָקֹב֙ לְמִישׁ֔וֹר וְהָרְכָסִ֖ים לְבִקְעָֽה׃

‎5 ‏וְנִגְלָ֖ה כְּב֣וֹד יְהוָ֑ה וְרָא֤וּ כָל־בָּשָׂר֙ יַחְדָּ֔ו כִּ֛י פִּ֥י יְהוָ֖ה דִּבֵּֽר׃ ס

‎6 ‏ק֚וֹל אֹמֵ֣ר קְרָ֔א וְאָמַ֖ר מָ֣ה אֶקְרָ֑א כָּל־הַבָּשָׂ֣ר חָצִ֔יר וְכָל־חַסְדּ֖וֹ כְּצִ֥יץ הַשָּׂדֶֽה׃

‎7 ‏יָבֵ֤שׁ חָצִיר֙ נָ֣בֵֽל צִ֔יץ כִּ֛י ר֥וּחַ יְהוָ֖ה נָ֣שְׁבָה בּ֑וֹ אָכֵ֥ן חָצִ֖יר הָעָֽם׃

‎8 ‏יָבֵ֥שׁ חָצִ֖יר נָ֣בֵֽל צִ֑יץ וּדְבַר־אֱלֹהֵ֖ינוּ יָק֥וּם לְעוֹלָֽם׃ ס

‎9 ‏עַ֣ל הַר־גָּבֹ֤הַ עֲלִי־לָךְ֙ מְבַשֶּׂ֣רֶת צִיּ֔וֹן הָרִ֤ימִי בַכֹּ֙חַ֙ קוֹלֵ֔ךְ מְבַשֶּׂ֖רֶת יְרוּשָׁלִָ֑ם הָרִ֙ימִי֙ אַל־תִּירָ֔אִי אִמְרִי֙ לְעָרֵ֣י יְהוּדָ֔ה הִנֵּ֖ה אֱלֹהֵיכֶֽם׃

‎10 ‏הִנֵּ֨ה אֲדֹנָ֤י יְהוִה֙ בְּחָזָ֣ק יָב֔וֹא וּזְרֹע֖וֹ מֹ֣שְׁלָה ל֑וֹ הִנֵּ֤ה שְׂכָרוֹ֙ אִתּ֔וֹ וּפְעֻלָּת֖וֹ לְפָנָֽיו׃

‎11 ‏כְּרֹעֶה֙ עֶדְר֣וֹ יִרְעֶ֔ה בִּזְרֹעוֹ֙ יְקַבֵּ֣ץ טְלָאִ֔ים וּבְחֵיק֖וֹ יִשָּׂ֑א עָל֖וֹת יְנַהֵֽל׃ ס

‎12 ‏מִֽי־מָדַ֨ד בְּשָׁעֳל֜וֹ מַ֗יִם וְשָׁמַ֙יִם֙ בַּזֶּ֣רֶת תִּכֵּ֔ן וְכָ֥ל בַּשָּׁלִ֖שׁ עֲפַ֣ר הָאָ֑רֶץ וְשָׁקַ֤ל בַּפֶּ֙לֶס֙ הָרִ֔ים וּגְבָע֖וֹת בְּמֹאזְנָֽיִם׃

‎13 ‏מִֽי־תִכֵּ֥ן אֶת־ר֖וּחַ³ יְהוָ֑ה וְאִ֥ישׁ עֲצָת֖וֹ יוֹדִיעֶֽנּוּ׃

‎14 ‏אֶת־מִ֤י נוֹעָץ֙ וַיְבִינֵ֔הוּ וַֽיְלַמְּדֵ֖הוּ בְּאֹ֣רַח מִשְׁפָּ֑ט וַיְלַמְּדֵ֣הוּ דַ֔עַת וְדֶ֥רֶךְ תְּבוּנ֖וֹת יוֹדִיעֶֽנּוּ׃

‎15 ‏הֵ֤ן גּוֹיִם֙ כְּמַ֣ר מִדְּלִ֔י וּכְשַׁ֥חַק מֹאזְנַ֖יִם נֶחְשָׁ֑בוּ הֵ֥ן אִיִּ֖ים כַּדַּ֥ק יִטּֽוֹל׃

‎16 ‏וּלְבָנ֕וֹן אֵ֥ין דֵּ֖י בָּעֵ֑ר וְחַיָּת֔וֹ אֵ֥ין דֵּ֖י עוֹלָֽה׃ ס

‎17 ‏כָּל־הַגּוֹיִ֖ם כְּאַ֣יִן נֶגְדּ֑וֹ מֵאֶ֥פֶס וָתֹ֖הוּ נֶחְשְׁבוּ־לֽוֹ׃

‎18 ‏וְאֶל־מִ֖י תְּדַמְּי֣וּן אֵ֑ל וּמַה־דְּמ֖וּת תַּ֥עַרְכוּ לֽוֹ׃

‎19 ‏הַפֶּ֙סֶל֙ נָסַ֣ךְ חָרָ֔שׁ וְצֹרֵ֖ף בַּזָּהָ֣ב יְרַקְּעֶ֑נּוּ וּרְתֻק֥וֹת כֶּ֖סֶף צוֹרֵֽף׃

‎20 ‏הַֽמְסֻכָּ֣ן תְּרוּמָ֔ה עֵ֥ץ לֹֽא־יִרְקַ֖ב יִבְחָ֑ר חָרָ֤שׁ חָכָם֙ יְבַקֶּשׁ־ל֔וֹ לְהָכִ֥ין פֶּ֖סֶל לֹ֥א יִמּֽוֹט׃

‎21 ‏הֲל֤וֹא תֵֽדְעוּ֙ הֲל֣וֹא תִשְׁמָ֔עוּ הֲל֛וֹא הֻגַּ֥ד מֵרֹ֖אשׁ לָכֶ֑ם הֲלוֹא֙ הֲבִ֣ינֹתֶ֔ם מוֹסְד֖וֹת הָאָֽרֶץ׃

‎22 ‏הַיֹּשֵׁב֙ עַל־ח֣וּג הָאָ֔רֶץ וְיֹשְׁבֶ֖יהָ כַּחֲגָבִ֑ים הַנּוֹטֶ֤ה כַדֹּק֙ שָׁמַ֔יִם וַיִּמְתָּחֵ֥ם כָּאֹ֖הֶל לָשָֽׁבֶת׃

‎23 ‏הַנּוֹתֵ֥ן רוֹזְנִ֖ים לְאָ֑יִן שֹׁ֥פְטֵי אֶ֖רֶץ כַּתֹּ֥הוּ עָשָֽׂה׃

‎24 ‏אַ֣ף בַּל־נִטָּ֗עוּ אַ֚ף בַּל־זֹרָ֔עוּ אַ֛ף בַּל־שֹׁרֵ֥שׁ בָּאָ֖רֶץ גִּזְעָ֑ם וְגַם־נָשַׁ֤ף בָּהֶם֙ וַיִּבָ֔שׁוּ וּסְעָרָ֖ה כַּקַּ֥שׁ תִּשָּׂאֵֽם׃ ס

‎25 ‏וְאֶל־מִ֥י תְדַמְּי֖וּנִי וְאֶשְׁוֶ֑ה יֹאמַ֖ר קָדֽוֹשׁ׃

‎26 ‏שְׂאוּ־מָר֨וֹם עֵינֵיכֶ֤ם וּרְאוּ֙ מִי־בָרָ֣א אֵ֔לֶּה הַמּוֹצִ֥יא בְמִסְפָּ֖ר צְבָאָ֑ם לְכֻלָּם֙ בְּשֵׁ֣ם יִקְרָ֔א מֵרֹ֤ב אוֹנִים֙ וְאַמִּ֣יץ כֹּ֔חַ אִ֖ישׁ לֹ֥א נֶעְדָּֽר׃ ס

‎27 ‏לָ֤מָּה תֹאמַר֙ יַֽעֲקֹ֔ב וּתְדַבֵּ֖ר יִשְׂרָאֵ֑ל נִסְתְּרָ֤ה דַרְכִּי֙ מֵיְהוָ֔ה³ וּמֵאֱלֹהַ֖י מִשְׁפָּטִ֥י יַעֲבֽוֹר׃

‎28 ‏הֲל֨וֹא יָדַ֜עְתָּ אִם־לֹ֣א שָׁמַ֗עְתָּ אֱלֹהֵ֨י עוֹלָ֤ם׀ יְהוָה֙ בּוֹרֵא֙ קְצ֣וֹת הָאָ֔רֶץ לֹ֥א יִיעַ֖ף וְלֹ֣א יִיגָ֑ע אֵ֥ין חֵ֖קֶר לִתְבוּנָתֽוֹ׃

‎29 ‏נֹתֵ֥ן לַיָּעֵ֖ף כֹּ֑חַ וּלְאֵ֥ין אוֹנִ֖ים עָצְמָ֥ה יַרְבֶּֽה׃

‎30 ‏וְיִֽעֲפ֥וּ נְעָרִ֖ים וְיִגָ֑עוּ וּבַחוּרִ֖ים כָּשׁ֥וֹל יִכָּשֵֽׁלוּ׃

‎31 ‏וְקוֹיֵ֤ יְהוָה֙ יַחֲלִ֣יפוּ כֹ֔חַ יַעֲל֥וּ אֵ֖בֶר כַּנְּשָׁרִ֑ים יָר֙וּצוּ֙ וְלֹ֣א יִיגָ֔עוּ יֵלְכ֖וּ וְלֹ֥א יִיעָֽפוּ׃ פ

1 n^aḥămû n^aḥămû ‘ammî yō’mar ’ĕlōhêḵem:

2 dabərû ‘al-lēḇ yərûšālaim wəqirə’û ’ēleyhā kî mālə’â ṣəḇā’āh kî nirəṣâ ‘ăwōnāh kî lāqəḥâ mîyaḏ yəhwâ kifəlayim bəḵāl-ḥaṭṭō’ṯeyhā: s

3 qwōl qwōrē’ bammiḏəbār pannû dereḵə yəhwâ yaššərû bā‘ărāḇâ məsillâ lē’lōhênû:

4 kāl-gey’ yinnāśē’ wəḵāl-har wəḡiḇə‘â yišəpālû wəhāyâ he‘āqōḇ ləmîšwōr wəhārəḵāsîm ləḇiqə‘â:

5 wəniḡəlâ kəḇwōḏ yəhwâ wərā’û ḵāl-bāśār y^aḥədāw kî pî yəhwâ dibēr: s

6 qwōl ’ōmēr qərā’ wə’āmar mâ ’eqərā’ kāl-habāśār ḥāṣîr wəḵāl-ḥasədwō kəṣîṣ haśśāḏeh:

7 yāḇēš ḥāṣîr nāḇēl ṣîṣ kî rûḥa yəhwâ nāšəḇâ bwō ’āḵēn ḥāṣîr hā‘ām:

8 yāḇēš ḥāṣîr nāḇēl ṣîṣ ûḏəḇar-’ĕlōhênû yāqûm lə‘wōlām: s

9 ‘al har-gāḇōha ‘ălî-lāḵə məḇaśśereṯ ṣîywōn hārîmî ḇakōḥa qwōlēḵə məḇaśśereṯ yərûšālāim hārîmî ’al-tîrā’î ’imərî lə‘ārê yəhûḏâ hinnēh ’ĕlōhêḵem:

10 hinnēh ’ăḏōnāy yəhwih bəḥāzāq yāḇwō’ ûzərō‘wō mōšəlâ lwō hinnēh śəḵārwō ’itwō ûfə‘ullāṯwō ləfānāyw:

11 kərō‘eh ‘eḏərwō yirə‘eh bizərō‘wō yəqabēṣ ṭəlā’îm ûḇəḥêqwō yiśśā’ ‘ālwōṯ yənahēl: s

12 mî-māḏaḏ bəšā‘ŏlwō mayim wəšāmayim bazzereṯ tikēn wəḵāl baššāliš ‘ăfar hā’āreṣ wəšāqal bapeles hārîm ûḡəḇā‘wōṯ bəmō’zənāyim:

13 mî-ṯikēn ’eṯ-rûḥa³ yəhwâ wə’îš ‘ăṣāṯwō ywōḏî‘ennû:

14 ’eṯ-mî nwō‘āṣ wayəḇînēhû wayəlamməḏēhû bə’ōr^aḥ mišəpāṭ wayəlamməḏēhû ḏ^a‘aṯ wəḏereḵə təḇûnwōṯ ywōḏî‘ennû:

15 hēn gwōyim kəmar midəlî ûḵəš^aḥaq mō’zənayim neḥəšāḇû hēn ’îyîm kadaq yiṭṭwōl:

16 ûləḇānwōn ’ên dê bā‘ēr wəḥayyāṯwō ’ên dê ‘wōlâ: s

17 kāl-hagwōyim kə’ayin neḡədwō mē’efes wāṯōhû neḥəšəḇû-lwō:

18 wə’el-mî təḏamməyûn ’ēl ûmah-dəmûṯ t^a‘arəḵû lwō:

19 hapesel nāsaḵə ḥārāš wəṣōrēf bazzâāḇ yəraqqə‘ennû ûrəṯuqwōṯ kesef ṣwōrēf:

20 haməsukān tərûmâ ‘ēṣ lō’-yirəqaḇ yiḇəḥār ḥārāš ḥāḵām yəḇaqqeš-lwō ləhāḵîn pesel lō’ yimmwōṭ:

21 hălwō’ ṯēḏə‘û hălwō’ ṯišəmā‘û hălwō’ hugaḏ mērō’š lāḵem hălwō’ hăḇînōṯem mwōsəḏwōṯ hā’āreṣ:

22 hayyōšēḇ ‘al-ḥûḡ hā’āreṣ wəyōšəḇeyhā k^aḥăḡāḇîm hannwōṭeh ḵadōq šāmayim wayyimətāḥēm kā’ōhel lāšāḇeṯ:

23 hannwōṯēn rwōzənîm lə’āyin šōfəṭê ’ereṣ katōhû ‘āśâ:

24 ’af bal-niṭṭā‘û ’af bal-zōrā‘û ’af bal-šōrēš bā’āreṣ gizə‘ām wəḡam-nāšaf bâem wayyiḇāšû ûsə‘ārâ kaqqaš tiśśā’ēm: s

25 wə’el-mî ṯəḏamməyûnî wə’ešəweh yō’mar qāḏwōš:

26 śə’û-mārwōm ‘ênêḵem ûrə’û mî-ḇārā’ ’ēlleh hammwōṣî’ ḇəmisəpār ṣəḇā’ām ləḵullām bəšēm yiqərā’ mērōḇ ’wōnîm wə’ammîṣ kōḥa ’îš lō’ ne‘ədār: s

27 lāmmâ ṯō’mar y^a‘ăqōḇ ûṯəḏabēr yiśərā’ēl nisətərâ ḏarəkî mêəhwâ³ ûmē’ĕlōhay mišəpāṭî y^a‘ăḇwōr:

28 hălwō’ yāḏ^a‘ətā ’im-lō’ šām^a‘ətā ’ĕlōhê ‘wōlām| yəhwâ bwōrē’ qəṣwōṯ hā’āreṣ lō’ yî‘af wəlō’ yîḡā‘ ’ên ḥēqer liṯəḇûnāṯwō:

29 nōṯēn layyā‘ēf kōḥa ûlə’ên ’wōnîm ‘āṣəmâ yarəbeh:

30 wəyi‘ăfû nə‘ārîm wəyiḡā‘û ûḇ^aḥûrîm kāšwōl yikāšēlû:

31 wəqwōyē yəhwâ y^aḥălîfû ḵōḥa y^a‘ălû ’ēḇer kannəšārîm yārûṣû wəlō’ yîḡā‘û yēləḵû wəlō’ yî‘āfû: f