Isaiah (Yisheyah) Chapter 46

‎1 ‏כָּרַ֥ע בֵּל֙ קֹרֵ֣ס נְב֔וֹ הָיוּ֙ עֲצַבֵּיהֶ֔ם לַחַיָּ֖ה וְלַבְּהֵמָ֑ה נְשֻׂאֹתֵיכֶ֣ם עֲמוּס֔וֹת מַשָּׂ֖א לַעֲיֵפָֽה׃

‎2 ‏קָרְס֤וּ כָֽרְעוּ֙ יַחְדָּ֔ו לֹ֥א יָכְל֖וּ מַלֵּ֣ט מַשָּׂ֑א וְנַפְשָׁ֖ם בַּשְּׁבִ֥י הָלָֽכָה׃ ס

‎3 ‏שִׁמְע֤וּ אֵלַי֙ בֵּ֣ית יַעֲקֹ֔ב וְכָל־שְׁאֵרִ֖ית בֵּ֣ית יִשְׂרָאֵ֑ל הַֽעֲמֻסִים֙ מִנִּי־בֶ֔טֶן הַנְּשֻׂאִ֖ים מִנִּי־רָֽחַם׃

‎4 ‏וְעַד־זִקְנָה֙ אֲנִ֣י ה֔וּא וְעַד־שֵיבָ֖ה¹ אֲנִ֣י אֶסְבֹּ֑ל אֲנִ֤י עָשִׂ֙יתִי֙ וַאֲנִ֣י אֶשָּׂ֔א וַאֲנִ֥י אֶסְבֹּ֖ל וַאֲמַלֵּֽט׃ ס

‎5 ‏לְמִ֥י תְדַמְי֖וּנִי וְתַשְׁו֑וּ וְתַמְשִׁל֖וּנִי וְנִדְמֶֽה׃

‎6 ‏הַזָּלִ֤ים זָהָב֙ מִכִּ֔יס וְכֶ֖סֶף בַּקָּנֶ֣ה יִשְׁקֹ֑לוּ יִשְׂכְּר֤וּ צוֹרֵף֙ וְיַעֲשֵׂ֣הוּ אֵ֔ל יִסְגְּד֖וּ אַף־יִֽשְׁתַּחֲוּֽוּ׃¹

‎7 ‏יִ֠שָּׂאֻהוּ עַל־כָּתֵ֨ף יִסְבְּלֻ֜הוּ וְיַנִּיחֻ֤הוּ תַחְתָּיו֙ וְיַֽעֲמֹ֔ד מִמְּקוֹמ֖וֹ לֹ֣א יָמִ֑ישׁ אַף־יִצְעַ֤ק אֵלָיו֙ וְלֹ֣א יַעֲנֶ֔ה מִצָּרָת֖וֹ לֹ֥א יוֹשִׁיעֶֽנּוּ׃ ס

‎8 ‏זִכְרוּ־זֹ֖את וְהִתְאֹשָׁ֑שׁוּ הָשִׁ֥יבוּ פוֹשְׁעִ֖ים עַל־לֵֽב׃

‎9 ‏זִכְר֥וּ רִאשֹׁנ֖וֹת מֵעוֹלָ֑ם כִּ֣י אָנֹכִ֥י אֵל֙ וְאֵ֣ין ע֔וֹד אֱלֹהִ֖ים וְאֶ֥פֶס כָּמֽוֹנִי׃

‎10 ‏מַגִּ֤יד מֵֽרֵאשִׁית֙ אַחֲרִ֔ית וּמִקֶּ֖דֶם אֲשֶׁ֣ר לֹא־נַעֲשׂ֑וּ אֹמֵר֙ עֲצָתִ֣י תָק֔וּם וְכָל־חֶפְצִ֖י אֶעֱשֶֽׂה׃

‎11 ‏קֹרֵ֤א מִמִּזְרָח֙ עַ֔יִט מֵאֶ֥רֶץ מֶרְחָ֖ק אִ֣ישׁ עצתו עֲצָתִ֑י אַף־דִּבַּ֙רְתִּי֙ אַף־אֲבִיאֶ֔נָּה יָצַ֖רְתִּי אַף־אֶעֱשֶֽׂנָּה׃ ס

‎12 ‏שִׁמְע֥וּ אֵלַ֖י אַבִּ֣ירֵי לֵ֑ב הָרְחוֹקִ֖ים מִצְּדָקָֽה׃

‎13 ‏קֵרַ֤בְתִּי צִדְקָתִי֙ לֹ֣א תִרְחָ֔ק וּתְשׁוּעָתִ֖י לֹ֣א תְאַחֵ֑ר וְנָתַתִּ֤י בְצִיּוֹן֙ תְּשׁוּעָ֔ה לְיִשְׂרָאֵ֖ל תִּפְאַרְתִּֽי׃ ס

1 kār^a‘ bēl qōrēs nəḇwō hāyû ‘ăṣabêhem l^aḥayyâ wəlabəhēmâ nəśu’ōṯêḵem ‘ămûswōṯ maśśā’ l^a‘ăyēfâ:

2 qārəsû ḵārə‘û y^aḥədāw lō’ yāḵəlû mallēṭ maśśā’ wənafəšām baššəḇî hālāḵâ: s

3 šimə‘û ’ēlay bêṯ y^a‘ăqōḇ wəḵāl-šə’ērîṯ bêṯ yiśərā’ēl h^a‘ămusîm minnî-ḇeṭen hannəśu’îm minnî-rāḥam:

4 wə‘aḏ-ziqənâ ’ănî hû’ wə‘aḏ-sêḇâ¹ ’ănî ’esəbōl ’ănî ‘āśîṯî wa’ănî ’eśśā’ wa’ănî ’esəbōl wa’ămallēṭ: s

5 ləmî ṯəḏaməyûnî wəṯašəwû wəṯaməšilûnî wəniḏəmeh:

6 hazzālîm zâāḇ mikîs wəḵesef baqqāneh yišəqōlû yiśəkərû ṣwōrēf wəy^a‘ăśēhû ’ēl yisəgəḏû ’af-yišət^aḥăûû:¹

7 yiśśā’uhû ‘al-kāṯēf yisəbəluhû wəyannîḥuhû ṯ^aḥətāyw wəy^a‘ămōḏ mimməqwōmwō lō’ yāmîš ’af-yiṣə‘aq ’ēlāyw wəlō’ y^a‘ăneh miṣṣārāṯwō lō’ ywōšî‘ennû: s

8 ziḵərû-zō’ṯ wəhiṯə’ōšāšû hāšîḇû fwōšə‘îm ‘al-lēḇ:

9 ziḵərû ri’šōnwōṯ mē‘wōlām kî ’ānōḵî ’ēl wə’ên ‘wōḏ ’ĕlōhîm wə’efes kāmwōnî:

10 magîḏ mērē’šîṯ ’^aḥărîṯ ûmiqqeḏem ’ăšer lō’-n^a‘ăśû ’ōmēr ‘ăṣāṯî ṯāqûm wəḵāl-ḥefəṣî ’e‘ĕśeh:

11 qōrē’ mimmizərāḥ ‘ayiṭ mē’ereṣ merəḥāq ’îš ‘ăṣāṯwō ‘ăṣāṯî ’af-dibarətî ’af-’ăḇî’ennâ yāṣarətî ’af-’e‘ĕśennâ: s

12 šimə‘û ’ēlay ’abîrê lēḇ hārəḥwōqîm miṣṣəḏāqâ:

13 qēraḇətî ṣiḏəqāṯî lō’ ṯirəḥāq ûṯəšû‘āṯî lō’ ṯə’^aḥēr wənāṯatî ḇəṣîywōn təšû‘â ləyiśərā’ēl tifə’arətî: s