Isaiah (Yisheyah) Chapter 51

‎1 ‏שִׁמְע֥וּ אֵלַ֛י רֹ֥דְפֵי צֶ֖דֶק מְבַקְשֵׁ֣י יְהוָ֑ה הַבִּ֙יטוּ֙ אֶל־צ֣וּר חֻצַּבְתֶּ֔ם וְאֶל־מַקֶּ֥בֶת בּ֖וֹר נֻקַּרְתֶּֽם׃

‎2 ‏הַבִּ֙יטוּ֙ אֶל־אַבְרָהָ֣ם אֲבִיכֶ֔ם וְאֶל־שָׂרָ֖ה תְּחוֹלֶלְכֶ֑ם כִּי־אֶחָ֣ד קְרָאתִ֔יו וַאֲבָרְכֵ֖הוּ וְאַרְבֵּֽהוּ׃ ס

‎3 ‏כִּֽי־נִחַ֨ם יְהוָ֜ה צִיּ֗וֹן נִחַם֙ כָּל־חָרְבֹתֶ֔יהָ וַיָּ֤שֶׂם מִדְבָּרָהּ֙ כְּעֵ֔דֶן וְעַרְבָתָ֖הּ כְּגַן־יְהוָ֑ה שָׂשׂ֤וֹן וְשִׂמְחָה֙ יִמָּ֣צֵא בָ֔הּ תּוֹדָ֖ה וְק֥וֹל זִמְרָֽה׃ ס

‎4 ‏הַקְשִׁ֤יבוּ אֵלַי֙ עַמִּ֔י וּלְאוּמִּ֖י אֵלַ֣י הַאֲזִ֑ינוּ כִּ֤י תוֹרָה֙ מֵאִתִּ֣י תֵצֵ֔א וּמִשְׁפָּטִ֔י לְא֥וֹר עַמִּ֖ים אַרְגִּֽיעַ׃

‎5 ‏קָר֤וֹב צִדְקִי֙ יָצָ֣א יִשְׁעִ֔י וּזְרֹעַ֖י עַמִּ֣ים יִשְׁפֹּ֑טוּ אֵלַי֙ אִיִּ֣ים יְקַוּ֔וּ וְאֶל־זְרֹעִ֖י יְיַחֵלֽוּן׃

‎6 ‏שְׂאוּ֩ לַשָּׁמַ֨יִם עֵֽינֵיכֶ֜ם וְֽהַבִּ֧יטוּ אֶל־הָאָ֣רֶץ מִתַּ֗חַת כִּֽי־שָׁמַ֜יִם כֶּעָשָׁ֤ן נִמְלָ֙חוּ֙ וְהָאָ֙רֶץ֙ כַּבֶּ֣גֶד תִּבְלֶ֔ה וְיֹשְׁבֶ֖יהָ כְּמוֹ־כֵ֣ן יְמוּת֑וּן וִישֽׁוּעָתִי֙ לְעוֹלָ֣ם תִּֽהְיֶ֔ה וְצִדְקָתִ֖י לֹ֥א תֵחָֽת׃ ס

‎7 ‏שִׁמְע֤וּ אֵלַי֙ יֹ֣דְעֵי צֶ֔דֶק עַ֖ם תּוֹרָתִ֣י בְלִבָּ֑ם אַל־תִּֽירְאוּ֙ חֶרְפַּ֣ת אֱנ֔וֹשׁ וּמִגִּדֻּפֹתָ֖ם אַל־תֵּחָֽתּוּ׃

‎8 ‏כִּ֤י כַבֶּ֙גֶד֙ יֹאכְלֵ֣ם עָ֔שׁ וְכַצֶּ֖מֶר יֹאכְלֵ֣ם סָ֑ס וְצִדְקָתִי֙ לְעוֹלָ֣ם תִּֽהְיֶ֔ה וִישׁוּעָתִ֖י לְד֥וֹר דּוֹרִֽים׃ ס

‎9 ‏עוּרִ֨י עוּרִ֤י לִבְשִׁי־עֹז֙ זְר֣וֹעַ יְהוָ֔ה ע֚וּרִי כִּ֣ימֵי קֶ֔דֶם דֹּר֖וֹת עוֹלָמִ֑ים הֲל֥וֹא אַתְּ־הִ֛יא הַמַּחְצֶ֥בֶת רַ֖הַב מְחוֹלֶ֥לֶת תַּנִּֽין׃

‎10 ‏הֲל֤וֹא אַתְּ־הִיא֙ הַמַּחֲרֶ֣בֶת יָ֔ם מֵ֖י תְּה֣וֹם רַבָּ֑ה הַשָּׂ֙מָה֙ מַֽעֲמַקֵּי־יָ֔ם דֶּ֖רֶךְ לַעֲבֹ֥ר גְּאוּלִֽים׃

‎11 ‏וּפְדוּיֵ֨י יְהוָ֜ה יְשׁוּב֗וּן וּבָ֤אוּ צִיּוֹן֙ בְּרִנָּ֔ה וְשִׂמְחַ֥ת עוֹלָ֖ם עַל־רֹאשָׁ֑ם שָׂשׂ֤וֹן וְשִׂמְחָה֙ יַשִּׂיג֔וּן נָ֖סוּ יָג֥וֹן וַאֲנָחָֽה׃ ס

‎12 ‏אָנֹכִ֧י אָנֹכִ֛י ה֖וּא מְנַחֶמְכֶ֑ם מִֽי־אַ֤תְּ וַתִּֽירְאִי֙ מֵאֱנ֣וֹשׁ יָמ֔וּת וּמִבֶּן־אָדָ֖ם חָצִ֥יר יִנָּתֵֽן׃

‎13 ‏וַתִּשְׁכַּ֞ח יְהוָ֣ה עֹשֶׂ֗ךָ נוֹטֶ֣ה שָׁמַיִם֮ וְיֹסֵ֣ד אָרֶץ֒ וַתְּפַחֵ֨ד תָּמִ֜יד³ כָּל־הַיּ֗וֹם מִפְּנֵי֙ חֲמַ֣ת הַמֵּצִ֔יק כַּאֲשֶׁ֥ר כּוֹנֵ֖ן לְהַשְׁחִ֑ית וְאַיֵּ֖ה חֲמַ֥ת הַמֵּצִֽיק׃

‎14 ‏מִהַ֥ר צֹעֶ֖ה לְהִפָּתֵ֑חַ וְלֹא־יָמ֣וּת לַשַּׁ֔חַת וְלֹ֥א יֶחְסַ֖ר לַחְמֽוֹ׃

‎15 ‏וְאָֽנֹכִי֙ יְהוָ֣ה אֱלֹהֶ֔יךָ רֹגַ֣ע הַיָּ֔ם וַיֶּהֱמ֖וּ גַּלָּ֑יו יְהוָ֥ה צְבָא֖וֹת שְׁמֽוֹ׃

‎16 ‏וָאָשִׂ֤ים דְּבָרַי֙ בְּפִ֔יךָ וּבְצֵ֥ל יָדִ֖י כִּסִּיתִ֑יךָ לִנְטֹ֤עַ שָׁמַ֙יִם֙ וְלִיסֹ֣ד אָ֔רֶץ וְלֵאמֹ֥ר לְצִיּ֖וֹן עַמִּי־אָֽתָּה׃ ס

‎17 ‏הִתְעוֹרְרִ֣י הִֽתְעוֹרְרִ֗י ק֚וּמִי יְר֣וּשָׁלִַ֔ם אֲשֶׁ֥ר שָׁתִ֛ית מִיַּ֥ד יְהוָ֖ה אֶת־כּ֣וֹס חֲמָת֑וֹ אֶת־קֻבַּ֜עַת כּ֧וֹס הַתַּרְעֵלָ֛ה שָׁתִ֖ית מָצִֽית׃

‎18 ‏אֵין־מְנַהֵ֣ל לָ֔הּ מִכָּל־בָּנִ֖ים יָלָ֑דָה וְאֵ֤ין מַחֲזִיק֙ בְּיָדָ֔הּ מִכָּל־בָּנִ֖ים גִּדֵּֽלָה׃

‎19 ‏שְׁתַּ֤יִם הֵ֙נָּה֙ קֹֽרְאֹתַ֔יִךְ מִ֖י יָנ֣וּד לָ֑ךְ הַשֹּׁ֧ד וְהַשֶּׁ֛בֶר וְהָרָעָ֥ב וְהַחֶ֖רֶב מִ֥י אֲנַחֲמֵֽךְ׃

‎20 ‏בָּנַ֜יִךְ עֻלְּפ֥וּ שָׁכְב֛וּ בְּרֹ֥אשׁ כָּל־חוּצ֖וֹת כְּת֣וֹא מִכְמָ֑ר הַֽמְלֵאִ֥ים חֲמַת־יְהוָ֖ה גַּעֲרַ֥ת אֱלֹהָֽיִךְ׃

‎21 ‏לָכֵ֛ן שִׁמְעִי־נָ֥א זֹ֖את עֲנִיָּ֑ה וּשְׁכֻרַ֖ת וְלֹ֥א מִיָּֽיִן׃ ס

‎22 ‏כֹּֽה־אָמַ֞ר אֲדֹנַ֣יִךְ יְהוָ֗ה וֵאלֹהַ֙יִךְ֙ יָרִ֣יב עַמּ֔וֹ הִנֵּ֥ה לָקַ֛חְתִּי מִיָּדֵ֖ךְ אֶת־כּ֣וֹס הַתַּרְעֵלָ֑ה אֶת־קֻבַּ֙עַת֙ כּ֣וֹס חֲמָתִ֔י לֹא־תוֹסִ֥יפִי לִשְׁתּוֹתָ֖הּ עֽוֹד׃

‎23 ‏וְשַׂמְתִּ֙יהָ֙ בְּיַד־מוֹגַ֔יִךְ אֲשֶׁר־אָמְר֥וּ לְנַפְשֵׁ֖ךְ שְׁחִ֣י וְנַעֲבֹ֑רָה וַתָּשִׂ֤ימִי כָאָ֙רֶץ֙ גֵּוֵ֔ךְ וְכַח֖וּץ לַעֹבְרִֽים׃ ס

1 šimə‘û ’ēlay rōḏəfê ṣeḏeq məḇaqəšê yəhwâ habîṭû ’el-ṣûr ḥuṣṣaḇətem wə’el-maqqeḇeṯ bwōr nuqqarətem:

2 habîṭû ’el-’aḇərâām ’ăḇîḵem wə’el-śārâ təḥwōleləḵem kî-’eḥāḏ qərā’ṯîw wa’ăḇārəḵēhû wə’arəbēhû: s

3 kî-niḥam yəhwâ ṣîywōn niḥam kāl-ḥārəḇōṯeyhā wayyāśem miḏəbārāh kə‘ēḏen wə‘arəḇāṯāh kəḡan-yəhwâ śāśwōn wəśiməḥâ yimmāṣē’ ḇāh twōḏâ wəqwōl zimərâ: s

4 haqəšîḇû ’ēlay ‘ammî ûlə’ûmmî ’ēlay ha’ăzînû kî ṯwōrâ mē’itî ṯēṣē’ ûmišəpāṭî lə’wōr ‘ammîm ’arəgî‘a:

5 qārwōḇ ṣiḏəqî yāṣā’ yišə‘î ûzərō‘ay ‘ammîm yišəpōṭû ’ēlay ’îyîm yəqaûû wə’el-zərō‘î yəy^aḥēlûn:

6 śə’û laššāmayim ‘ênêḵem wəhabîṭû ’el-hā’āreṣ mit^aḥaṯ kî-šāmayim ke‘āšān niməlāḥû wəhā’āreṣ kabeḡeḏ tiḇəleh wəyōšəḇeyhā kəmwō-ḵēn yəmûṯûn wîšû‘āṯî lə‘wōlām tihəyeh wəṣiḏəqāṯî lō’ ṯēḥāṯ: s

7 šimə‘û ’ēlay yōḏə‘ê ṣeḏeq ‘am twōrāṯî ḇəlibām ’al-tîrə’û ḥerəpaṯ ’ĕnwōš ûmigidufōṯām ’al-tēḥātû:

8 kî ḵabeḡeḏ yō’ḵəlēm ‘āš wəḵaṣṣemer yō’ḵəlēm sās wəṣiḏəqāṯî lə‘wōlām tihəyeh wîšû‘āṯî ləḏwōr dwōrîm: s

9 ‘ûrî ‘ûrî liḇəšî-‘ōz zərwō‘a yəhwâ ‘ûrî kîmê qeḏem dōrwōṯ ‘wōlāmîm hălwō’ ’atə-hî’ hamm^aḥəṣeḇeṯ rahaḇ məḥwōleleṯ tannîn:

10 hălwō’ ’atə-hî’ hamm^aḥăreḇeṯ yām mê təhwōm rabâ haśśāmâ m^a‘ămaqqê-yām dereḵə l^a‘ăḇōr gə’ûlîm:

11 ûfəḏûyê yəhwâ yəšûḇûn ûḇā’û ṣîywōn bərinnâ wəśiməḥaṯ ‘wōlām ‘al-rō’šām śāśwōn wəśiməḥâ yaśśîḡûn nāsû yāḡwōn wa’ănāḥâ: s

12 ’ānōḵî ’ānōḵî hû’ mən^aḥeməḵem mî-’atə watîrə’î mē’ĕnwōš yāmûṯ ûmiben-’āḏām ḥāṣîr yinnāṯēn:

13 watišək^aḥ yəhwâ ‘ōśeḵā nwōṭeh šāmayim wəyōsēḏ ’āreṣ watəf^aḥēḏ tāmîḏ³ kāl-hayywōm mipənê ḥămaṯ hammēṣîq ka’ăšer kwōnēn ləhašəḥîṯ wə’ayyēh ḥămaṯ hammēṣîq:

14 mihar ṣō‘eh ləhipāṯēḥa wəlō’-yāmûṯ lašš^aḥaṯ wəlō’ yeḥəsar l^aḥəmwō:

15 wə’ānōḵî yəhwâ ’ĕlōheyḵā rōḡ^a‘ hayyām wayyehĕmû gallāyw yəhwâ ṣəḇā’wōṯ šəmwō:

16 wā’āśîm dəḇāray bəfîḵā ûḇəṣēl yāḏî kissîṯîḵā linəṭō‘a šāmayim wəlîsōḏ ’āreṣ wəlē’mōr ləṣîywōn ‘ammî-’ātâ: s

17 hiṯə‘wōrərî hiṯə‘wōrərî qûmî yərûšālaim ’ăšer šāṯîṯ mîyaḏ yəhwâ ’eṯ-kwōs ḥămāṯwō ’eṯ-qub^a‘aṯ kwōs hatarə‘ēlâ šāṯîṯ māṣîṯ:

18 ’ên-mənahēl lāh mikāl-bānîm yālāḏâ wə’ên m^aḥăzîq bəyāḏāh mikāl-bānîm gidēlâ:

19 šətayim hēnnâ qōrə’ōṯayiḵə mî yānûḏ lāḵə haššōḏ wəhaššeḇer wəhārā‘āḇ wəh^aḥereḇ mî ’ăn^aḥămēḵə:

20 bānayiḵə ‘ulləfû šāḵəḇû bərō’š kāl-ḥûṣwōṯ kəṯwō’ miḵəmār haməlē’îm ḥămaṯ-yəhwâ g^a‘ăraṯ ’ĕlōhāyiḵə:

21 lāḵēn šimə‘î-nā’ zō’ṯ ‘ănîyâ ûšəḵuraṯ wəlō’ mîyāyin: s

22 kōh-’āmar ’ăḏōnayiḵə yəhwâ wē’lōhayiḵə yārîḇ ‘ammwō hinnēh lāq^aḥətî mîyāḏēḵə ’eṯ-kwōs hatarə‘ēlâ ’eṯ-qub^a‘aṯ kwōs ḥămāṯî lō’-ṯwōsîfî lišətwōṯāh ‘wōḏ:

23 wəśamətîhā bəyaḏ-mwōḡayiḵə ’ăšer-’āmərû lənafəšēḵə šəḥî wən^a‘ăḇōrâ watāśîmî ḵā’āreṣ gēwēḵə wəḵ^aḥûṣ l^a‘ōḇərîm: s