Isaiah (Yisheyah) Chapter 54

‎1 ‏רָנִּ֥י עֲקָרָ֖ה לֹ֣א יָלָ֑דָה פִּצְחִ֨י רִנָּ֤ה וְצַהֲלִי֙ לֹא־חָ֔לָה כִּֽי־רַבִּ֧ים בְּֽנֵי־שׁוֹמֵמָ֛ה מִבְּנֵ֥י בְעוּלָ֖ה אָמַ֥ר יְהוָֽה׃

‎2 ‏הַרְחִ֣יבִי׀ מְק֣וֹם אָהֳלֵ֗ךְ וִירִיע֧וֹת מִשְׁכְּנוֹתַ֛יִךְ יַטּ֖וּ אַל־תַּחְשֹׂ֑כִי הַאֲרִ֙יכִי֙ מֵֽיתָרַ֔יִךְ וִיתֵדֹתַ֖יִךְ חַזֵּֽקִי׃

‎3 ‏כִּי־יָמִ֥ין וּשְׂמֹ֖אול תִּפְרֹ֑צִי וְזַרְעֵךְ֙ גּוֹיִ֣ם יִירָ֔שׁ וְעָרִ֥ים נְשַׁמּ֖וֹת יוֹשִֽׁיבוּ׃

‎4 ‏אַל־תִּֽירְאִי֙ כִּי־לֹ֣א תֵב֔וֹשִׁי וְאַל־תִּכָּלְמִ֖י כִּ֣י לֹ֣א תַחְפִּ֑ירִי כִּ֣י בֹ֤שֶׁת עֲלוּמַ֙יִךְ֙ תִּשְׁכָּ֔חִי וְחֶרְפַּ֥ת אַלְמְנוּתַ֖יִךְ לֹ֥א תִזְכְּרִי־עֽוֹד׃

‎5 ‏כִּ֤י בֹעֲלַ֙יִךְ֙ עֹשַׂ֔יִךְ יְהוָ֥ה צְבָא֖וֹת שְׁמ֑וֹ וְגֹֽאֲלֵךְ֙ קְד֣וֹשׁ יִשְׂרָאֵ֔ל אֱלֹהֵ֥י כָל־הָאָ֖רֶץ יִקָּרֵֽא׃

‎6 ‏כִּֽי־כְאִשָּׁ֧ה עֲזוּבָ֛ה וַעֲצ֥וּבַת ר֖וּחַ קְרָאָ֣ךְ יְהוָ֑ה וְאֵ֧שֶׁת נְעוּרִ֛ים כִּ֥י תִמָּאֵ֖ס אָמַ֥ר אֱלֹהָֽיִךְ׃

‎7 ‏בְּרֶ֥גַע קָטֹ֖ן עֲזַבְתִּ֑יךְ וּבְרַחֲמִ֥ים גְּדֹלִ֖ים אֲקַבְּצֵֽךְ׃

‎8 ‏בְּשֶׁ֣צֶף קֶ֗צֶף הִסְתַּ֨רְתִּי פָנַ֥י רֶ֙גַע֙ מִמֵּ֔ךְ וּבְחֶ֥סֶד עוֹלָ֖ם רִֽחַמְתִּ֑יךְ אָמַ֥ר גֹּאֲלֵ֖ךְ יְהוָֽה׃ ס

‎9 ‏כִּי־מֵ֥י נֹ֙חַ֙ זֹ֣את לִ֔י אֲשֶׁ֣ר נִשְׁבַּ֗עְתִּי מֵעֲבֹ֥ר מֵי־נֹ֛חַ ע֖וֹד עַל־הָאָ֑רֶץ כֵּ֥ן נִשְׁבַּ֛עְתִּי מִקְּצֹ֥ף עָלַ֖יִךְ וּמִגְּעָר־בָּֽךְ׃

‎10 ‏כִּ֤י הֶֽהָרִים֙ יָמ֔וּשׁוּ וְהַגְּבָע֖וֹת תְּמוּטֶ֑נָה וְחַסְדִּ֞י מֵאִתֵּ֣ךְ לֹֽא־יָמ֗וּשׁ וּבְרִ֤ית שְׁלוֹמִי֙ לֹ֣א תָמ֔וּט אָמַ֥ר מְרַחֲמֵ֖ךְ יְהוָֽה׃ ס

‎11 ‏עֲנִיָּ֥ה סֹעֲרָ֖ה לֹ֣א נֻחָ֑מָה הִנֵּ֨ה אָנֹכִ֜י מַרְבִּ֤יץ בַּפּוּךְ֙ אֲבָנַ֔יִךְ וִיסַדְתִּ֖יךְ בַּסַּפִּירִֽים׃

‎12 ‏וְשַׂמְתִּ֤י כַּֽדְכֹד֙ שִׁמְשֹׁתַ֔יִךְ וּשְׁעָרַ֖יִךְ לְאַבְנֵ֣י אֶקְדָּ֑ח וְכָל־גְּבוּלֵ֖ךְ לְאַבְנֵי־חֵֽפֶץ׃

‎13 ‏וְכָל־בָּנַ֖יִךְ לִמּוּדֵ֣י יְהוָ֑ה וְרַ֖ב שְׁל֥וֹם בָּנָֽיִךְ׃

‎14 ‏בִּצְדָקָ֖ה תִּכּוֹנָ֑נִי רַחֲקִ֤י מֵעֹ֙שֶׁק֙ כִּֽי־לֹ֣א תִירָ֔אִי וּמִ֨מְּחִתָּ֔ה כִּ֥י לֹֽא־תִקְרַ֖ב אֵלָֽיִךְ׃

‎15 ‏הֵ֣ן גּ֥וֹר יָג֛וּר אֶ֖פֶס מֵֽאוֹתִ֑י מִי־גָ֥ר אִתָּ֖ךְ עָלַ֥יִךְ יִפּֽוֹל׃

‎16 ‏הן הִנֵּ֤ה אָֽנֹכִי֙ בָּרָ֣אתִי חָרָ֔שׁ נֹפֵ֙חַ֙ בְּאֵ֣שׁ פֶּחָ֔ם וּמוֹצִ֥יא כְלִ֖י לְמַעֲשֵׂ֑הוּ וְאָנֹכִ֛י בָּרָ֥אתִי מַשְׁחִ֖ית לְחַבֵּֽל׃

‎17 ‏כָּל־כְּלִ֞י יוּצַ֤ר עָלַ֙יִךְ֙ לֹ֣א יִצְלָ֔ח וְכָל־לָשׁ֛וֹן תָּֽקוּם־אִתָּ֥ךְ¹ לַמִּשְׁפָּ֖ט תַּרְשִׁ֑יעִי זֹ֡את נַחֲלַת֩ עַבְדֵ֨י יְהוָ֧ה וְצִדְקָתָ֛ם מֵאִתִּ֖י נְאֻם־יְהוָֽה׃ ס

1 rānnî ‘ăqārâ lō’ yālāḏâ piṣəḥî rinnâ wəṣahălî lō’-ḥālâ kî-rabîm bənê-šwōmēmâ mibənê ḇə‘ûlâ ’āmar yəhwâ:

2 harəḥîḇî| məqwōm ’âŏlēḵə wîrî‘wōṯ mišəkənwōṯayiḵə yaṭṭû ’al-t^aḥəśōḵî ha’ărîḵî mêṯārayiḵə wîṯēḏōṯayiḵə ḥazzēqî:

3 kî-yāmîn ûśəmō’wl tifərōṣî wəzarə‘ēḵə gwōyim yîrāš wə‘ārîm nəšammwōṯ ywōšîḇû:

4 ’al-tîrə’î kî-lō’ ṯēḇwōšî wə’al-tikāləmî kî lō’ ṯ^aḥəpîrî kî ḇōšeṯ ‘ălûmayiḵə tišəkāḥî wəḥerəpaṯ ’aləmənûṯayiḵə lō’ ṯizəkərî-‘wōḏ:

5 kî ḇō‘ălayiḵə ‘ōśayiḵə yəhwâ ṣəḇā’wōṯ šəmwō wəḡō’ălēḵə qəḏwōš yiśərā’ēl ’ĕlōhê ḵāl-hā’āreṣ yiqqārē’:

6 kî-ḵə’iššâ ‘ăzûḇâ w^a‘ăṣûḇaṯ rûḥa qərā’āḵə yəhwâ wə’ēšeṯ nə‘ûrîm kî ṯimmā’ēs ’āmar ’ĕlōhāyiḵə:

7 bəreḡ^a‘ qāṭōn ‘ăzaḇətîḵə ûḇər^aḥămîm gəḏōlîm ’ăqabəṣēḵə:

8 bəšeṣef qeṣef hisətarətî fānay reḡ^a‘ mimmēḵə ûḇəḥeseḏ ‘wōlām riḥamətîḵə ’āmar gō’ălēḵə yəhwâ: s

9 kî-mê nōḥa zō’ṯ lî ’ăšer nišəb^a‘ətî mē‘ăḇōr mê-nōḥa ‘wōḏ ‘al-hā’āreṣ kēn nišəb^a‘ətî miqqəṣōf ‘ālayiḵə ûmigə‘ār-bāḵə:

10 kî hehārîm yāmûšû wəhagəḇā‘wōṯ təmûṭenâ wəḥasədî mē’itēḵə lō’-yāmûš ûḇərîṯ šəlwōmî lō’ ṯāmûṭ ’āmar mər^aḥămēḵə yəhwâ: s

11 ‘ănîyâ sō‘ărâ lō’ nuḥāmâ hinnēh ’ānōḵî marəbîṣ bapûḵə ’ăḇānayiḵə wîsaḏətîḵə bassapîrîm:

12 wəśamətî kaḏəḵōḏ šiməšōṯayiḵə ûšə‘ārayiḵə lə’aḇənê ’eqədāḥ wəḵāl-gəḇûlēḵə lə’aḇənê-ḥēfeṣ:

13 wəḵāl-bānayiḵə limmûḏê yəhwâ wəraḇ šəlwōm bānāyiḵə:

14 biṣəḏāqâ tikwōnānî r^aḥăqî mē‘ōšeq kî-lō’ ṯîrā’î ûmimməḥitâ kî lō’-ṯiqəraḇ ’ēlāyiḵə:

15 hēn gwōr yāḡûr ’efes mē’wōṯî mî-ḡār ’itāḵə ‘ālayiḵə yipwōl:

16 hēn hinnēh ’ānōḵî bārā’ṯî ḥārāš nōfēḥa bə’ēš peḥām ûmwōṣî’ ḵəlî ləm^a‘ăśēhû wə’ānōḵî bārā’ṯî mašəḥîṯ ləḥabēl:

17 kāl-kəlî yûṣar ‘ālayiḵə lō’ yiṣəlāḥ wəḵāl-lāšwōn tāqûm-’itāḵə¹ lammišəpāṭ tarəšî‘î zō’ṯ n^aḥălaṯ ‘aḇəḏê yəhwâ wəṣiḏəqāṯām mē’itî nə’um-yəhwâ: s