Isaiah (Yisheyah) Chapter 57

‎1 ‏הַצַּדִּ֣יק אָבָ֔ד וְאֵ֥ין אִ֖ישׁ שָׂ֣ם עַל־לֵ֑ב וְאַנְשֵׁי־חֶ֤סֶד נֶֽאֱסָפִים֙ בְּאֵ֣ין מֵבִ֔ין כִּֽי־מִפְּנֵ֥י הָרָעָ֖ה נֶאֱסַ֥ף הַצַּדִּֽיק׃

‎2 ‏יָב֣וֹא שָׁל֔וֹם יָנ֖וּחוּ עַל־מִשְׁכְּבוֹתָ֑ם הֹלֵ֖ךְ נְכֹחֽוֹ׃

‎3 ‏וְאַתֶּ֥ם קִרְבוּ־הֵ֖נָּה בְּנֵ֣י עֹנְנָ֑ה זֶ֥רַע מְנָאֵ֖ף וַתִּזְנֶֽה׃

‎4 ‏עַל־מִי֙ תִּתְעַנָּ֔גוּ עַל־מִ֛י תַּרְחִ֥יבוּ פֶ֖ה תַּאֲרִ֣יכוּ לָשׁ֑וֹן הֲלֽוֹא־אַתֶּ֥ם יִלְדֵי־פֶ֖שַׁע זֶ֥רַע שָֽׁקֶר׃

‎5 ‏הַנֵּֽחָמִים֙ בָּֽאֵלִ֔ים תַּ֖חַת כָּל־עֵ֣ץ רַעֲנָ֑ן שֹׁחֲטֵ֤י הַיְלָדִים֙ בַּנְּחָלִ֔ים תַּ֖חַת סְעִפֵ֥י הַסְּלָעִֽים׃

‎6 ‏בְּחַלְּקֵי־נַ֣חַל חֶלְקֵ֔ךְ הֵ֥ם הֵ֖ם גּוֹרָלֵ֑ךְ גַּם־לָהֶ֞ם שָׁפַ֥כְתְּ נֶ֙סֶךְ֙ הֶעֱלִ֣ית מִנְחָ֔ה הַ֥עַל אֵ֖לֶּה אֶנָּחֵֽם׃

‎7 ‏עַ֤ל הַר־גָּבֹ֙הַּ֙ וְנִשָּׂ֔א שַׂ֖מְתְּ מִשְׁכָּבֵ֑ךְ גַּם־שָׁ֥ם עָלִ֖ית לִזְבֹּ֥חַ זָֽבַח׃

‎8 ‏וְאַחַ֤ר הַדֶּ֙לֶת֙ וְהַמְּזוּזָ֔ה שַׂ֖מְתְּ זִכְרוֹנֵ֑ךְ כִּ֣י מֵאִתִּ֞י גִּלִּ֣ית וַֽתַּעֲלִ֗י הִרְחַ֤בְתְּ מִשְׁכָּבֵךְ֙ וַתִּכְרָת־לָ֣ךְ מֵהֶ֔ם אָהַ֥בְתְּ מִשְׁכָּבָ֖ם יָ֥ד חָזִֽית׃

‎9 ‏וַתָּשֻׁ֤רִי לַמֶּ֙לֶךְ֙ בַּשֶּׁ֔מֶן וַתַּרְבִּ֖י רִקֻּחָ֑יִךְ וַתְּשַׁלְּחִ֤י צִרַ֙יִךְ֙ עַד־מֵ֣רָחֹ֔ק וַתַּשְׁפִּ֖ילִי עַד־שְׁאֽוֹל׃

‎10 ‏בְּרֹ֤ב דַּרְכֵּךְ֙ יָגַ֔עַתְּ לֹ֥א אָמַ֖רְתְּ נוֹאָ֑שׁ חַיַּ֤ת יָדֵךְ֙ מָצָ֔את עַל־כֵּ֖ן לֹ֥א חָלִֽית׃

‎11 ‏וְאֶת־מִ֞י דָּאַ֤גְתְּ וַתִּֽירְאִי֙ כִּ֣י תְכַזֵּ֔בִי וְאוֹתִי֙ לֹ֣א זָכַ֔רְתְּ לֹא־שַׂ֖מְתְּ עַל־לִבֵּ֑ךְ הֲלֹ֨א אֲנִ֤י מַחְשֶׁה֙ וּמֵ֣עֹלָ֔ם וְאוֹתִ֖י לֹ֥א תִירָֽאִי׃

‎12 ‏אֲנִ֥י אַגִּ֖יד צִדְקָתֵ֑ךְ וְאֶֽת־מַעֲשַׂ֖יִךְ וְלֹ֥א יוֹעִילֽוּךְ׃

‎13 ‏בְּזַֽעֲקֵךְ֙ יַצִּילֻ֣ךְ קִבּוּצַ֔יִךְ וְאֶת־כֻּלָּ֥ם יִשָּׂא־ר֖וּחַ יִקַּח־הָ֑בֶל וְהַחוֹסֶ֥ה בִי֙ יִנְחַל־אֶ֔רֶץ וְיִירַ֖שׁ הַר־קָדְשִֽׁי׃

‎14 ‏וְאָמַ֥ר סֹֽלּוּ־סֹ֖לּוּ פַּנּוּ־דָ֑רֶךְ הָרִ֥ימוּ מִכְשׁ֖וֹל מִדֶּ֥רֶךְ עַמִּֽי׃ ס

‎15 ‏כִּי֩ כֹ֨ה אָמַ֜ר רָ֣ם וְנִשָּׂ֗א שֹׁכֵ֥ן עַד֙ וְקָד֣וֹשׁ שְׁמ֔וֹ מָר֥וֹם וְקָד֖וֹשׁ אֶשְׁכּ֑וֹן וְאֶת־דַּכָּא֙ וּשְׁפַל־ר֔וּחַ לְהַחֲיוֹת֙ ר֣וּחַ שְׁפָלִ֔ים וּֽלְהַחֲי֖וֹת לֵ֥ב נִדְכָּאִֽים׃

‎16 ‏כִּ֣י לֹ֤א לְעוֹלָם֙ אָרִ֔יב וְלֹ֥א לָנֶ֖צַח אֶקְּצ֑וֹף כִּי־ר֙וּחַ֙ מִלְּפָנַ֣י יַֽעֲט֔וֹף וּנְשָׁמ֖וֹת אֲנִ֥י עָשִֽׂיתִי׃

‎17 ‏בַּעֲוֹ֥ן בִּצְע֛וֹ קָצַ֥פְתִּי וְאַכֵּ֖הוּ הַסְתֵּ֣ר וְאֶקְצֹ֑ף וַיֵּ֥לֶךְ שׁוֹבָ֖ב בְּדֶ֥רֶךְ לִבּֽוֹ׃

‎18 ‏דְּרָכָ֥יו רָאִ֖יתִי וְאֶרְפָּאֵ֑הוּ וְאַנְחֵ֕הוּ וַאֲשַׁלֵּ֧ם נִֽחֻמִ֛ים ל֖וֹ וְלַאֲבֵלָֽיו׃

‎19 ‏בּוֹרֵ֖א נוב נִ֣יב שְׂפָתָ֑יִם שָׁל֨וֹם׀ שָׁל֜וֹם לָרָח֧וֹק וְלַקָּר֛וֹב אָמַ֥ר יְהוָ֖ה וּרְפָאתִֽיו׃

‎20 ‏וְהָרְשָׁעִ֖ים כַּיָּ֣ם נִגְרָ֑שׁ כִּ֤י הַשְׁקֵט֙ לֹ֣א יוּכָ֔ל וַיִּגְרְשׁ֥וּ מֵימָ֖יו רֶ֥פֶשׁ וָטִֽיט׃

‎21 ‏אֵ֣ין שָׁל֔וֹם אָמַ֥ר אֱלֹהַ֖י לָרְשָׁעִֽים׃ ס

1 haṣṣadîq ’āḇāḏ wə’ên ’îš śām ‘al-lēḇ wə’anəšê-ḥeseḏ ne’ĕsāfîm bə’ên mēḇîn kî-mipənê hārā‘â ne’ĕsaf haṣṣadîq:

2 yāḇwō’ šālwōm yānûḥû ‘al-mišəkəḇwōṯām hōlēḵə nəḵōḥwō:

3 wə’atem qirəḇû-hēnnâ bənê ‘ōnənâ zer^a‘ mənā’ēf watizəneh:

4 ‘al-mî tiṯə‘annāḡû ‘al-mî tarəḥîḇû feh ta’ărîḵû lāšwōn hălwō’-’atem yiləḏê-feš^a‘ zer^a‘ šāqer:

5 hannēḥāmîm bā’ēlîm t^aḥaṯ kāl-‘ēṣ r^a‘ănān šōḥăṭê hayəlāḏîm bannəḥālîm t^aḥaṯ sə‘ifê hassəlā‘îm:

6 bəḥalləqê-n^aḥal ḥeləqēḵə hēm hēm gwōrālēḵə gam-lâem šāfaḵətə neseḵə he‘ĕlîṯ minəḥâ h^a‘al ’ēlleh ’ennāḥēm:

7 ‘al har-gāḇōhha wəniśśā’ śamətə mišəkāḇēḵə gam-šām ‘ālîṯ lizəbōḥa zāḇ^aḥ:

8 wə’^aḥar hadeleṯ wəhamməzûzâ śamətə ziḵərwōnēḵə kî mē’itî gillîṯ wat^a‘ălî hirəḥaḇətə mišəkāḇēḵə watiḵərāṯ-lāḵə mēhem ’âaḇətə mišəkāḇām yāḏ ḥāzîṯ:

9 watāšurî lammeleḵə baššemen watarəbî riqquḥāyiḵə watəšalləḥî ṣirayiḵə ‘aḏ-mērāḥōq watašəpîlî ‘aḏ-šə’wōl:

10 bərōḇ darəkēḵə yāḡ^a‘atə lō’ ’āmarətə nwō’āš ḥayyaṯ yāḏēḵə māṣā’ṯ ‘al-kēn lō’ ḥālîṯ:

11 wə’eṯ-mî dā’aḡətə watîrə’î kî ṯəḵazzēḇî wə’wōṯî lō’ zāḵarətə lō’-śamətə ‘al-libēḵə hălō’ ’ănî m^aḥəšeh ûmē‘ōlām wə’wōṯî lō’ ṯîrā’î:

12 ’ănî ’agîḏ ṣiḏəqāṯēḵə wə’eṯ-m^a‘ăśayiḵə wəlō’ ywō‘îlûḵə:

13 bəz^a‘ăqēḵə yaṣṣîluḵə qibûṣayiḵə wə’eṯ-kullām yiśśā’-rûḥa yiqq^aḥ-hāḇel wəh^aḥwōseh ḇî yinəḥal-’ereṣ wəyîraš har-qāḏəšî:

14 wə’āmar sōllû-sōllû pannû-ḏāreḵə hārîmû miḵəšwōl midereḵə ‘ammî: s

15 kî ḵōh ’āmar rām wəniśśā’ šōḵēn ‘aḏ wəqāḏwōš šəmwō mārwōm wəqāḏwōš ’ešəkwōn wə’eṯ-dakā’ ûšəfal-rûḥa ləh^aḥăywōṯ rûḥa šəfālîm ûləh^aḥăywōṯ lēḇ niḏəkā’îm:

16 kî lō’ lə‘wōlām ’ārîḇ wəlō’ lāneṣ^aḥ ’eqqəṣwōf kî-rûḥa milləfānay y^a‘ăṭwōf ûnəšāmwōṯ ’ănî ‘āśîṯî:

17 b^a‘ăwōn biṣə‘wō qāṣafətî wə’akēhû hasətēr wə’eqəṣōf wayyēleḵə šwōḇāḇ bəḏereḵə libwō:

18 dərāḵāyw rā’îṯî wə’erəpā’ēhû wə’anəḥēhû wa’ăšallēm niḥumîm lwō wəla’ăḇēlāyw:

19 bwōrē’ nûḇ nîḇ śəfāṯāyim šālwōm| šālwōm lārāḥwōq wəlaqqārwōḇ ’āmar yəhwâ ûrəfā’ṯîw:

20 wəhārəšā‘îm kayyām niḡərāš kî hašəqēṭ lō’ yûḵāl wayyiḡərəšû mêmāyw refeš wāṭîṭ:

21 ’ên šālwōm ’āmar ’ĕlōhay lārəšā‘îm: s