Isaiah (Yisheyah) Chapter 60

‎1 ‏ק֥וּמִי א֖וֹרִי כִּ֣י בָ֣א אוֹרֵ֑ךְ וּכְב֥וֹד יְהוָ֖ה עָלַ֥יִךְ זָרָֽח׃

‎2 ‏כִּֽי־הִנֵּ֤ה הַחֹ֙שֶׁךְ֙ יְכַסֶּה־אֶ֔רֶץ וַעֲרָפֶ֖ל לְאֻמִּ֑ים וְעָלַ֙יִךְ֙ יִזְרַ֣ח יְהוָ֔ה וּכְבוֹד֖וֹ עָלַ֥יִךְ יֵרָאֶֽה׃

‎3 ‏וְהָלְכ֥וּ גוֹיִ֖ם לְאוֹרֵ֑ךְ וּמְלָכִ֖ים לְנֹ֥גַהּ זַרְחֵֽךְ׃

‎4 ‏שְׂאִֽי־סָבִ֤יב עֵינַ֙יִךְ֙ וּרְאִ֔י כֻּלָּ֖ם נִקְבְּצ֣וּ בָֽאוּ־לָ֑ךְ בָּנַ֙יִךְ֙ מֵרָח֣וֹק יָבֹ֔אוּ וּבְנֹתַ֖יִךְ עַל־צַ֥ד תֵּאָמַֽנָה׃

‎5 ‏אָ֤ז תִּרְאִי֙ וְנָהַ֔רְתְּ וּפָחַ֥ד וְרָחַ֖ב לְבָבֵ֑ךְ כִּֽי־יֵהָפֵ֤ךְ עָלַ֙יִךְ֙ הֲמ֣וֹן יָ֔ם חֵ֥יל גּוֹיִ֖ם יָבֹ֥אוּ לָֽךְ׃

‎6 ‏שִֽׁפְעַ֨ת גְּמַלִּ֜ים תְּכַסֵּ֗ךְ בִּכְרֵ֤י מִדְיָן֙ וְעֵיפָ֔ה כֻּלָּ֖ם מִשְּׁבָ֣א יָבֹ֑אוּ זָהָ֤ב וּלְבוֹנָה֙ יִשָּׂ֔אוּ וּתְהִלֹּ֥ת יְהוָ֖ה יְבַשֵּֽׂרוּ׃

‎7 ‏כָּל־צֹ֤אן קֵדָר֙ יִקָּ֣בְצוּ לָ֔ךְ אֵילֵ֥י נְבָי֖וֹת יְשָׁרְת֑וּנֶךְ יַעֲל֤וּ עַל־רָצוֹן֙ מִזְבְּחִ֔י וּבֵ֥ית תִּפְאַרְתִּ֖י אֲפָאֵֽר׃

‎8 ‏מִי־אֵ֖לֶּה כָּעָ֣ב תְּעוּפֶ֑ינָה וְכַיּוֹנִ֖ים אֶל־אֲרֻבֹּתֵיהֶֽם׃

‎9 ‏כִּֽי־לִ֣י׀ אִיִּ֣ים יְקַוּ֗וּ וָאֳנִיּ֤וֹת תַּרְשִׁישׁ֙ בָּרִ֣אשֹׁנָ֔ה לְהָבִ֤יא בָנַ֙יִךְ֙ מֵֽרָח֔וֹק כַּסְפָּ֥ם וּזְהָבָ֖ם אִתָּ֑ם לְשֵׁם֙ יְהוָ֣ה אֱלֹהַ֔יִךְ וְלִקְד֥וֹשׁ יִשְׂרָאֵ֖ל כִּ֥י פֵאֲרָֽךְ׃

‎10 ‏וּבָנ֤וּ בְנֵֽי־נֵכָר֙ חֹמֹתַ֔יִךְ וּמַלְכֵיהֶ֖ם יְשָׁרְת֑וּנֶךְ כִּ֤י בְקִצְפִּי֙ הִכִּיתִ֔יךְ וּבִרְצוֹנִ֖י רִֽחַמְתִּֽיךְ׃

‎11 ‏וּפִתְּח֨וּ שְׁעָרַ֧יִךְ תָּמִ֛יד יוֹמָ֥ם וָלַ֖יְלָה לֹ֣א יִסָּגֵ֑רוּ³ לְהָבִ֤יא אֵלַ֙יִךְ֙ חֵ֣יל גּוֹיִ֔ם וּמַלְכֵיהֶ֖ם נְהוּגִֽים׃

‎12 ‏כִּֽי־הַגּ֧וֹי וְהַמַּמְלָכָ֛ה אֲשֶׁ֥ר לֹא־יַעַבְד֖וּךְ יֹאבֵ֑דוּ וְהַגּוֹיִ֖ם חָרֹ֥ב יֶחֱרָֽבוּ׃

‎13 ‏כְּב֤וֹד הַלְּבָנוֹן֙ אֵלַ֣יִךְ יָב֔וֹא בְּר֛וֹשׁ תִּדְהָ֥ר וּתְאַשּׁ֖וּר יַחְדָּ֑ו לְפָאֵר֙ מְק֣וֹם מִקְדָּשִׁ֔י וּמְק֥וֹם רַגְלַ֖י אֲכַבֵּֽד׃

‎14 ‏וְהָלְכ֨וּ אֵלַ֤יִךְ שְׁח֙וֹחַ֙ בְּנֵ֣י מְעַנַּ֔יִךְ וְהִֽשְׁתַּחֲו֛וּ עַל־כַּפּ֥וֹת רַגְלַ֖יִךְ כָּל־מְנַֽאֲצָ֑יִךְ וְקָ֤רְאוּ לָךְ֙ עִ֣יר יְהוָ֔ה צִיּ֖וֹן קְד֥וֹשׁ יִשְׂרָאֵֽל׃

‎15 ‏תַּ֧חַת הֱיוֹתֵ֛ךְ עֲזוּבָ֥ה וּשְׂנוּאָ֖ה וְאֵ֣ין עוֹבֵ֑ר וְשַׂמְתִּיךְ֙ לִגְא֣וֹן עוֹלָ֔ם מְשׂ֖וֹשׂ דּ֥וֹר וָדֽוֹר׃

‎16 ‏וְיָנַקְתְּ֙ חֲלֵ֣ב גּוֹיִ֔ם וְשֹׁ֥ד מְלָכִ֖ים תִּינָ֑קִי וְיָדַ֗עַתְּ כִּ֣י אֲנִ֤י יְהוָה֙ מֽוֹשִׁיעֵ֔ךְ וְגֹאֲלֵ֖ךְ אֲבִ֥יר יַעֲקֹֽב׃

‎17 ‏תַּ֣חַת הַנְּחֹ֜שֶׁת אָבִ֣יא זָהָ֗ב וְתַ֤חַת הַבַּרְזֶל֙ אָ֣בִיא כֶ֔סֶף וְתַ֤חַת הָֽעֵצִים֙ נְחֹ֔שֶׁת וְתַ֥חַת הָאֲבָנִ֖ים בַּרְזֶ֑ל וְשַׂמְתִּ֤י פְקֻדָּתֵךְ֙ שָׁל֔וֹם וְנֹגְשַׂ֖יִךְ צְדָקָֽה׃

‎18 ‏לֹא־יִשָּׁמַ֨ע ע֤וֹד חָמָס֙ בְּאַרְצֵ֔ךְ שֹׁ֥ד וָשֶׁ֖בֶר בִּגְבוּלָ֑יִךְ וְקָרָ֤את יְשׁוּעָה֙ חוֹמֹתַ֔יִךְ וּשְׁעָרַ֖יִךְ תְּהִלָּֽה׃

‎19 ‏לֹא־יִֽהְיֶה־לָּ֨ךְ ע֤וֹד הַשֶּׁ֙מֶשׁ֙ לְא֣וֹר יוֹמָ֔ם וּלְנֹ֕גַהּ הַיָּרֵ֖חַ לֹא־יָאִ֣יר לָ֑ךְ וְהָיָה־לָ֤ךְ יְהוָה֙ לְא֣וֹר עוֹלָ֔ם וֵאלֹהַ֖יִךְ לְתִפְאַרְתֵּֽךְ׃

‎20 ‏לֹא־יָב֥וֹא עוֹד֙ שִׁמְשֵׁ֔ךְ וִירֵחֵ֖ךְ לֹ֣א יֵאָסֵ֑ף כִּ֣י יְהוָ֗ה יִֽהְיֶה־לָּךְ֙ לְא֣וֹר עוֹלָ֔ם וְשָׁלְמ֖וּ יְמֵ֥י אֶבְלֵֽךְ׃

‎21 ‏וְעַמֵּךְ֙ כֻּלָּ֣ם צַדִּיקִ֔ים לְעוֹלָ֖ם יִ֣ירְשׁוּ אָ֑רֶץ נֵ֧צֶר מטעו מַטָּעַ֛י מַעֲשֵׂ֥ה יָדַ֖י לְהִתְפָּאֵֽר׃

‎22 ‏הַקָּטֹן֙ יִֽהְיֶ֣ה לָאֶ֔לֶף וְהַצָּעִ֖יר לְג֣וֹי עָצ֑וּם אֲנִ֥י יְהוָ֖ה בְּעִתָּ֥הּ אֲחִישֶֽׁנָּה׃ ס

1 qûmî ’wōrî kî ḇā’ ’wōrēḵə ûḵəḇwōḏ yəhwâ ‘ālayiḵə zārāḥ:

2 kî-hinnēh h^aḥōšeḵə yəḵasseh-’ereṣ w^a‘ărāfel lə’ummîm wə‘ālayiḵə yizər^aḥ yəhwâ ûḵəḇwōḏwō ‘ālayiḵə yērā’eh:

3 wəhāləḵû ḡwōyim lə’wōrēḵə ûməlāḵîm lənōḡ^ah zarəḥēḵə:

4 śə’î-sāḇîḇ ‘ênayiḵə ûrə’î kullām niqəbəṣû ḇā’û-lāḵə bānayiḵə mērāḥwōq yāḇō’û ûḇənōṯayiḵə ‘al-ṣaḏ tē’āmanâ:

5 ’āz tirə’î wənâarətə ûfāḥaḏ wərāḥaḇ ləḇāḇēḵə kî-yēhāfēḵə ‘ālayiḵə hămwōn yām ḥêl gwōyim yāḇō’û lāḵə:

6 šifə‘aṯ gəmallîm təḵassēḵə biḵərê miḏəyān wə‘êfâ kullām miššəḇā’ yāḇō’û zâāḇ ûləḇwōnâ yiśśā’û ûṯəhillōṯ yəhwâ yəḇaśśērû:

7 kāl-ṣō’n qēḏār yiqqāḇəṣû lāḵə ’êlê nəḇāywōṯ yəšārəṯûneḵə y^a‘ălû ‘al-rāṣwōn mizəbəḥî ûḇêṯ tifə’arətî ’ăfā’ēr:

8 mî-’ēlleh kā‘āḇ tə‘ûfeynâ wəḵayywōnîm ’el-’ărubōṯêhem:

9 kî-lî| ’îyîm yəqaûû wā’ŏnîywōṯ tarəšîš bāri’šōnâ ləhāḇî’ ḇānayiḵə mērāḥwōq kasəpām ûzəhāḇām ’itām ləšēm yəhwâ ’ĕlōhayiḵə wəliqəḏwōš yiśərā’ēl kî fē’ărāḵə:

10 ûḇānû ḇənê-nēḵār ḥōmōṯayiḵə ûmaləḵêhem yəšārəṯûneḵə kî ḇəqiṣəpî hikîṯîḵə ûḇirəṣwōnî riḥamətîḵə:

11 ûfitəḥû šə‘ārayiḵə tāmîḏ ywōmām wālayəlâ lō’ yissāḡērû³ ləhāḇî’ ’ēlayiḵə ḥêl gwōyim ûmaləḵêhem nəhûḡîm:

12 kî-hagwōy wəhammaməlāḵâ ’ăšer lō’-y^a‘aḇəḏûḵə yō’ḇēḏû wəhagwōyim ḥārōḇ yeḥĕrāḇû:

13 kəḇwōḏ halləḇānwōn ’ēlayiḵə yāḇwō’ bərwōš tiḏəhār ûṯə’aššûr y^aḥədāw ləfā’ēr məqwōm miqədāšî ûməqwōm raḡəlay ’ăḵabēḏ:

14 wəhāləḵû ’ēlayiḵə šəḥwōḥa bənê mə‘annayiḵə wəhišət^aḥăwû ‘al-kapwōṯ raḡəlayiḵə kāl-məna’ăṣāyiḵə wəqārə’û lāḵə ‘îr yəhwâ ṣîywōn qəḏwōš yiśərā’ēl:

15 t^aḥaṯ hĕywōṯēḵə ‘ăzûḇâ ûśənû’â wə’ên ‘wōḇēr wəśamətîḵə liḡə’wōn ‘wōlām məśwōś dwōr wāḏwōr:

16 wəyānaqətə ḥălēḇ gwōyim wəšōḏ məlāḵîm tînāqî wəyāḏ^a‘atə kî ’ănî yəhwâ mwōšî‘ēḵə wəḡō’ălēḵə ’ăḇîr y^a‘ăqōḇ:

17 t^aḥaṯ hannəḥōšeṯ ’āḇî’ zâāḇ wəṯ^aḥaṯ habarəzel ’āḇî’ ḵesef wəṯ^aḥaṯ hā‘ēṣîm nəḥōšeṯ wəṯ^aḥaṯ hā’ăḇānîm barəzel wəśamətî fəqudāṯēḵə šālwōm wənōḡəśayiḵə ṣəḏāqâ:

18 lō’-yiššām^a‘ ‘wōḏ ḥāmās bə’arəṣēḵə šōḏ wāšeḇer biḡəḇûlāyiḵə wəqārā’ṯ yəšû‘â ḥwōmōṯayiḵə ûšə‘ārayiḵə təhillâ:

19 lō’-yihəyeh-llāḵə ‘wōḏ haššemeš lə’wōr ywōmām ûlənōḡ^ah hayyārēḥa lō’-yā’îr lāḵə wəhāyâ-lāḵə yəhwâ lə’wōr ‘wōlām wē’lōhayiḵə ləṯifə’arətēḵə:

20 lō’-yāḇwō’ ‘wōḏ šiməšēḵə wîrēḥēḵə lō’ yē’āsēf kî yəhwâ yihəyeh-llāḵə lə’wōr ‘wōlām wəšāləmû yəmê ’eḇəlēḵə:

21 wə‘ammēḵə kullām ṣadîqîm lə‘wōlām yîrəšû ’āreṣ nēṣer maṭṭā‘wō maṭṭā‘ay m^a‘ăśēh yāḏay ləhiṯəpā’ēr:

22 haqqāṭōn yihəyeh lā’elef wəhaṣṣā‘îr ləḡwōy ‘āṣûm ’ănî yəhwâ bə‘itāh ’ăḥîšennâ: s