Judges (Shoftim) Chapter 15

‎1 ‏וַיְהִ֨י מִיָּמִ֜ים בִּימֵ֣י קְצִיר־חִטִּ֗ים וַיִּפְקֹ֨ד שִׁמְשׁ֤וֹן אֶת־אִשְׁתּוֹ֙ בִּגְדִ֣י עִזִּ֔ים וַיֹּ֕אמֶר אָבֹ֥אָה אֶל־אִשְׁתִּ֖י הֶחָ֑דְרָה וְלֹֽא־נְתָנ֥וֹ אָבִ֖יהָ לָבֽוֹא׃

‎2 ‏וַיֹּ֣אמֶר אָבִ֗יהָ אָמֹ֤ר אָמַ֙רְתִּי֙ כִּי־שָׂנֹ֣א שְׂנֵאתָ֔הּ וָאֶתְּנֶ֖נָּה לְמֵרֵעֶ֑ךָ הֲלֹ֨א אֲחֹתָ֤הּ הַקְּטַנָּה֙ טוֹבָ֣ה מִמֶּ֔נָּה תְּהִי־נָ֥א לְךָ֖ תַּחְתֶּֽיהָ׃

‎3 ‏וַיֹּ֤אמֶר לָהֶם֙ שִׁמְשׁ֔וֹן נִקֵּ֥יתִי הַפַּ֖עַם מִפְּלִשְׁתִּ֑ים כִּֽי־עֹשֶׂ֥ה אֲנִ֛י עִמָּ֖ם רָעָֽה׃

‎4 ‏וַיֵּ֣לֶךְ שִׁמְשׁ֔וֹן וַיִּלְכֹּ֖ד שְׁלֹשׁ־מֵא֣וֹת שׁוּעָלִ֑ים וַיִּקַּ֣ח לַפִּדִ֗ים וַיֶּ֤פֶן זָנָב֙ אֶל־זָנָ֔ב וַיָּ֨שֶׂם לַפִּ֥יד אֶחָ֛ד בֵּין־שְׁנֵ֥י הַזְּנָב֖וֹת בַּתָּֽוֶךְ׃

‎5 ‏וַיַּבְעֶר־אֵשׁ֙ בַּלַּפִּידִ֔ים וַיְשַׁלַּ֖ח בְּקָמ֣וֹת פְּלִשְׁתִּ֑ים וַיַּבְעֵ֛ר מִגָּדִ֥ישׁ וְעַד־קָמָ֖ה וְעַד־כֶּ֥רֶם זָֽיִת׃

‎6 ‏וַיֹּאמְר֣וּ פְלִשְׁתִּים֮ מִ֣י עָ֣שָׂה זֹאת֒ וַיֹּאמְר֗וּ שִׁמְשׁוֹן֙ חֲתַ֣ן הַתִּמְנִ֔י כִּ֚י לָקַ֣ח אֶת־אִשְׁתּ֔וֹ וַֽיִּתְּנָ֖הּ לְמֵרֵעֵ֑הוּ וַיַּעֲל֣וּ פְלִשְׁתִּ֔ים וַיִּשְׂרְפ֥וּ אוֹתָ֛הּ וְאֶת־אָבִ֖יהָ בָּאֵֽשׁ׃

‎7 ‏וַיֹּ֤אמֶר לָהֶם֙ שִׁמְשׁ֔וֹן אִֽם־תַּעֲשׂ֖וּן כָּזֹ֑את כִּ֛י אִם־נִקַּ֥מְתִּי בָכֶ֖ם וְאַחַ֥ר אֶחְדָּֽל׃

‎8 ‏וַיַּ֨ךְ אוֹתָ֥ם שׁ֛וֹק עַל־יָרֵ֖ךְ מַכָּ֣ה גְדוֹלָ֑ה וַיֵּ֣רֶד וַיֵּ֔שֶׁב בִּסְעִ֖יף סֶ֥לַע עֵיטָֽם׃ ס

‎9 ‏וַיַּעֲל֣וּ פְלִשְׁתִּ֔ים וַֽיַּחֲנ֖וּ בִּיהוּדָ֑ה וַיִּנָּטְשׁ֖וּ בַּלֶּֽחִי׃

‎10 ‏וַיֹּֽאמְרוּ֙ אִ֣ישׁ יְהוּדָ֔ה לָמָ֖ה עֲלִיתֶ֣ם עָלֵ֑ינוּ וַיֹּאמְר֗וּ לֶאֱס֤וֹר אֶת־שִׁמְשׁוֹן֙ עָלִ֔ינוּ לַעֲשׂ֣וֹת ל֔וֹ כַּאֲשֶׁ֖ר עָ֥שָׂה לָֽנוּ׃

‎11 ‏וַיֵּרְד֡וּ שְׁלֹשֶׁת֩ אֲלָפִ֨ים אִ֜ישׁ מִֽיהוּדָ֗ה אֶל־סְעִיף֮ סֶ֣לַע עֵיטָם֒ וַיֹּאמְר֣וּ לְשִׁמְשׁ֗וֹן הֲלֹ֤א יָדַ֙עְתָּ֙ כִּֽי־מֹשְׁלִ֥ים בָּ֙נוּ֙ פְּלִשְׁתִּ֔ים וּמַה־זֹּ֖את עָשִׂ֣יתָ לָּ֑נוּ וַיֹּ֣אמֶר לָהֶ֔ם כַּאֲשֶׁר֙ עָ֣שׂוּ לִ֔י כֵּ֖ן עָשִׂ֥יתִי לָהֶֽם׃

‎12 ‏וַיֹּ֤אמְרוּ לוֹ֙ לֶאֱסָרְךָ֣ יָרַ֔דְנוּ לְתִתְּךָ֖ בְּיַד־פְּלִשְׁתִּ֑ים וַיֹּ֤אמֶר לָהֶם֙ שִׁמְשׁ֔וֹן הִשָּׁבְע֣וּ לִ֔י פֶּֽן־תִּפְגְּע֥וּן בִּ֖י אַתֶּֽם׃

‎13 ‏וַיֹּ֧אמְרוּ ל֣וֹ לֵאמֹ֗ר לֹ֤א כִּֽי־אָסֹ֤ר נֶֽאֱסָרְךָ֙ וּנְתַנּ֣וּךָ בְיָדָ֔ם וְהָמֵ֖ת לֹ֣א נְמִיתֶ֑ךָ וַיַּאַסְרֻ֗הוּ בִּשְׁנַ֙יִם֙ עֲבֹתִ֣ים חֲדָשִׁ֔ים וַֽיַּעֲל֖וּהוּ מִן־הַסָּֽלַע׃

‎14 ‏הוּא־בָ֣א עַד־לֶ֔חִי וּפְלִשְׁתִּ֖ים הֵרִ֣יעוּ לִקְרָאת֑וֹ וַתִּצְלַ֨ח עָלָ֜יו ר֣וּחַ יְהוָ֗ה וַתִּהְיֶ֨ינָה הָעֲבֹתִ֜ים אֲשֶׁ֣ר עַל־זְרוֹעוֹתָ֗יו כַּפִּשְׁתִּים֙ אֲשֶׁ֣ר בָּעֲר֣וּ בָאֵ֔שׁ וַיִּמַּ֥סּוּ אֱסוּרָ֖יו מֵעַ֥ל יָדָֽיו׃

‎15 ‏וַיִּמְצָ֥א לְחִֽי־חֲמ֖וֹר טְרִיָּ֑ה וַיִּשְׁלַ֤ח יָדוֹ֙ וַיִּקָּחֶ֔הָ וַיַּךְ־בָּ֖הּ אֶ֥לֶף אִֽישׁ׃

‎16 ‏וַיֹּ֣אמֶר שִׁמְשׁ֔וֹן בִּלְחִ֣י הַחֲמ֔וֹר חֲמ֖וֹר חֲמֹרָתָ֑יִם בִּלְחִ֣י הַחֲמ֔וֹר הִכֵּ֖יתִי אֶ֥לֶף אִֽישׁ׃

‎17 ‏וַֽיְהִי֙ כְּכַלֹּת֣וֹ לְדַבֵּ֔ר וַיַּשְׁלֵ֥ךְ הַלְּחִ֖י מִיָּד֑וֹ וַיִּקְרָ֛א לַמָּק֥וֹם הַה֖וּא רָ֥מַת לֶֽחִי׃

‎18 ‏וַיִּצְמָא֮ מְאֹד֒ וַיִּקְרָ֤א אֶל־יְהוָה֙ וַיֹּאמַ֔ר אַתָּה֙ נָתַ֣תָּ בְיַֽד־עַבְדְּךָ֔ אֶת־הַתְּשׁוּעָ֥ה הַגְּדֹלָ֖ה הַזֹּ֑את וְעַתָּה֙ אָמ֣וּת בַּצָּמָ֔א וְנָפַלְתִּ֖י בְּיַ֥ד הָעֲרֵלִֽים׃

‎19 ‏וַיִּבְקַ֨ע אֱלֹהִ֜ים אֶת־הַמַּכְתֵּ֣שׁ אֲשֶׁר־בַּלֶּ֗חִי וַיֵּצְא֨וּ מִמֶּ֤נּוּ מַ֙יִם֙ וַיֵּ֔שְׁתְּ וַתָּ֥שָׁב רוּח֖וֹ וַיֶּ֑חִי עַל־כֵּ֣ן׀ קָרָ֣א שְׁמָ֗הּ עֵ֤ין הַקּוֹרֵא֙ אֲשֶׁ֣ר בַּלֶּ֔חִי עַ֖ד הַיּ֥וֹם הַזֶּֽה׃

‎20 ‏וַיִּשְׁפֹּ֧ט אֶת־יִשְׂרָאֵ֛ל בִּימֵ֥י פְלִשְׁתִּ֖ים עֶשְׂרִ֥ים שָׁנָֽה׃ פ

1 wayəhî mîyāmîm bîmê qəṣîr-ḥiṭṭîm wayyifəqōḏ šiməšwōn ’eṯ-’išətwō biḡəḏî ‘izzîm wayyō’mer ’āḇō’â ’el-’išətî heḥāḏərâ wəlō’-nəṯānwō ’āḇîhā lāḇwō’:

2 wayyō’mer ’āḇîhā ’āmōr ’āmarətî kî-śānō’ śənē’ṯāh wā’etənennâ ləmērē‘eḵā hălō’ ’ăḥōṯāh haqqəṭannâ ṭwōḇâ mimmennâ təhî-nā’ ləḵā t^aḥəteyhā:

3 wayyō’mer lâem šiməšwōn niqqêṯî hap^a‘am mipəlišətîm kî-‘ōśeh ’ănî ‘immām rā‘â:

4 wayyēleḵə šiməšwōn wayyiləkōḏ šəlōš-mē’wōṯ šû‘ālîm wayyiqq^aḥ lapiḏîm wayyefen zānāḇ ’el-zānāḇ wayyāśem lapîḏ ’eḥāḏ bên-šənê hazzənāḇwōṯ batāweḵə:

5 wayyaḇə‘er-’ēš ballapîḏîm wayəšall^aḥ bəqāmwōṯ pəlišətîm wayyaḇə‘ēr migāḏîš wə‘aḏ-qāmâ wə‘aḏ-kerem zāyiṯ:

6 wayyō’mərû fəlišətîm mî ‘āśâ zō’ṯ wayyō’mərû šiməšwōn ḥăṯan hatimənî kî lāq^aḥ ’eṯ-’išətwō wayyitənāh ləmērē‘ēhû wayy^a‘ălû fəlišətîm wayyiśərəfû ’wōṯāh wə’eṯ-’āḇîhā bā’ēš:

7 wayyō’mer lâem šiməšwōn ’im-t^a‘ăśûn kāzō’ṯ kî ’im-niqqamətî ḇāḵem wə’^aḥar ’eḥədāl:

8 wayyaḵə ’wōṯām šwōq ‘al-yārēḵə makâ ḡəḏwōlâ wayyēreḏ wayyēšeḇ bisə‘îf sel^a‘ ‘êṭām: s

9 wayy^a‘ălû fəlišətîm wayy^aḥănû bîhûḏâ wayyinnāṭəšû balleḥî:

10 wayyō’mərû ’îš yəhûḏâ lāmâ ‘ălîṯem ‘ālênû wayyō’mərû le’ĕswōr ’eṯ-šiməšwōn ‘ālînû l^a‘ăśwōṯ lwō ka’ăšer ‘āśâ lānû:

11 wayyērəḏû šəlōšeṯ ’ălāfîm ’îš mîhûḏâ ’el-sə‘îf sel^a‘ ‘êṭām wayyō’mərû ləšiməšwōn hălō’ yāḏ^a‘ətā kî-mōšəlîm bānû pəlišətîm ûmah-zzō’ṯ ‘āśîṯā llānû wayyō’mer lâem ka’ăšer ‘āśû lî kēn ‘āśîṯî lâem:

12 wayyō’mərû lwō le’ĕsārəḵā yāraḏənû ləṯitəḵā bəyaḏ-pəlišətîm wayyō’mer lâem šiməšwōn hiššāḇə‘û lî pen-tifəgə‘ûn bî ’atem:

13 wayyō’mərû lwō lē’mōr lō’ kî-’āsōr ne’ĕsārəḵā ûnəṯannûḵā ḇəyāḏām wəhāmēṯ lō’ nəmîṯeḵā wayya’asəruhû bišənayim ‘ăḇōṯîm ḥăḏāšîm wayy^a‘ălûhû min-hassāl^a‘:

14 hû’-ḇā’ ‘aḏ-leḥî ûfəlišətîm hērî‘û liqərā’ṯwō watiṣəl^aḥ ‘ālāyw rûḥa yəhwâ watihəyeynâ hā‘ăḇōṯîm ’ăšer ‘al-zərwō‘wōṯāyw kapišətîm ’ăšer bā‘ărû ḇā’ēš wayyimmassû ’ĕsûrāyw mē‘al yāḏāyw:

15 wayyiməṣā’ ləḥî-ḥămwōr ṭərîyâ wayyišəl^aḥ yāḏwō wayyiqqāḥehā wayyaḵə-bāh ’elef ’îš:

16 wayyō’mer šiməšwōn biləḥî h^aḥămwōr ḥămwōr ḥămōrāṯāyim biləḥî h^aḥămwōr hikêṯî ’elef ’îš:

17 wayəhî kəḵallōṯwō ləḏabēr wayyašəlēḵə halləḥî mîyāḏwō wayyiqərā’ lammāqwōm hahû’ rāmaṯ leḥî:

18 wayyiṣəmā’ mə’ōḏ wayyiqərā’ ’el-yəhwâ wayyō’mar ’atâ nāṯatā ḇəyaḏ-‘aḇədəḵā ’eṯ-hatəšû‘â hagəḏōlâ hazzō’ṯ wə‘atâ ’āmûṯ baṣṣāmā’ wənāfalətî bəyaḏ hā‘ărēlîm:

19 wayyiḇəq^a‘ ’ĕlōhîm ’eṯ-hammaḵətēš ’ăšer-balleḥî wayyēṣə’û mimmennû mayim wayyēšətə watāšāḇ rûḥwō wayyeḥî ‘al-kēn| qārā’ šəmāh ‘ên haqqwōrē’ ’ăšer balleḥî ‘aḏ hayywōm hazzeh:

20 wayyišəpōṭ ’eṯ-yiśərā’ēl bîmê fəlišətîm ‘eśərîm šānâ: f