Judges (Shoftim) Chapter 18

‎1 ‏בַּיָּמִ֣ים הָהֵ֔ם אֵ֥ין מֶ֖לֶךְ בְּיִשְׂרָאֵ֑ל וּבַיָּמִ֣ים הָהֵ֗ם שֵׁ֣בֶט הַדָּנִ֞י מְבַקֶּשׁ־ל֤וֹ נַֽחֲלָה֙ לָשֶׁ֔בֶת כִּי֩ לֹֽא־נָ֨פְלָה לּ֜וֹ עַד־הַיּ֥וֹם הַה֛וּא בְּתוֹךְ־שִׁבְטֵ֥י יִשְׂרָאֵ֖ל בְּנַחֲלָֽה׃ ס

‎2 ‏וַיִּשְׁלְח֣וּ בְנֵי־דָ֣ן׀ מִֽמִּשְׁפַּחְתָּ֡ם חֲמִשָּׁ֣ה אֲנָשִׁ֣ים מִקְצוֹתָם֩ אֲנָשִׁ֨ים בְּנֵי־חַ֜יִל מִצָּרְעָ֣ה וּמֵֽאֶשְׁתָּאֹ֗ל לְרַגֵּ֤ל אֶת־הָאָ֙רֶץ֙ וּלְחָקְרָ֔הּ וַיֹּאמְר֣וּ אֲלֵהֶ֔ם לְכ֖וּ חִקְר֣וּ אֶת־הָאָ֑רֶץ וַיָּבֹ֤אוּ הַר־אֶפְרַ֙יִם֙ עַד־בֵּ֣ית מִיכָ֔ה וַיָּלִ֖ינוּ שָֽׁם׃

‎3 ‏הֵ֚מָּה עִם־בֵּ֣ית מִיכָ֔ה וְהֵ֣מָּה הִכִּ֔ירוּ אֶת־ק֥וֹל הַנַּ֖עַר הַלֵּוִ֑י וַיָּס֣וּרוּ שָׁ֗ם וַיֹּ֤אמְרוּ לוֹ֙ מִֽי־הֱבִיאֲךָ֣ הֲלֹ֔ם וּמָֽה־אַתָּ֥ה עֹשֶׂ֛ה בָּזֶ֖ה וּמַה־לְּךָ֥ פֹֽה׃

‎4 ‏וַיֹּ֣אמֶר אֲלֵהֶ֔ם כָּזֹ֣ה וְכָזֶ֔ה עָ֥שָׂה לִ֖י מִיכָ֑ה וַיִּשְׂכְּרֵ֕נִי וָאֱהִי־ל֖וֹ לְכֹהֵֽן׃

‎5 ‏וַיֹּ֥אמְרוּ ל֖וֹ שְׁאַל־נָ֣א בֵאלֹהִ֑ים וְנֵ֣דְעָ֔ה הֲתַצְלִ֣יחַ דַּרְכֵּ֔נוּ אֲשֶׁ֥ר אֲנַ֖חְנוּ הֹלְכִ֥ים עָלֶֽיהָ׃

‎6 ‏וַיֹּ֧אמֶר לָהֶ֛ם הַכֹּהֵ֖ן לְכ֣וּ לְשָׁל֑וֹם נֹ֣כַח יְהוָ֔ה דַּרְכְּכֶ֖ם אֲשֶׁ֥ר תֵּֽלְכוּ־בָֽהּ׃ פ

‎7 ‏וַיֵּלְכוּ֙ חֲמֵ֣שֶׁת הָאֲנָשִׁ֔ים וַיָּבֹ֖אוּ לָ֑יְשָׁה וַיִּרְא֣וּ אֶת־הָעָ֣ם אֲשֶׁר־בְּקִרְבָּ֣הּ יוֹשֶֽׁבֶת־לָ֠בֶטַח כְּמִשְׁפַּ֨ט צִדֹנִ֜ים שֹׁקֵ֣ט׀ וּבֹטֵ֗חַ וְאֵין־מַכְלִ֨ים דָּבָ֤ר בָּאָ֙רֶץ֙ יוֹרֵ֣שׁ עֶ֔צֶר וּרְחֹקִ֥ים הֵ֙מָּה֙ מִצִּ֣דֹנִ֔ים וְדָבָ֥ר אֵין־לָהֶ֖ם עִם־אָדָֽם׃

‎8 ‏וַיָּבֹ֙אוּ֙ אֶל־אֲחֵיהֶ֔ם צָרְעָ֖ה וְאֶשְׁתָּאֹ֑ל וַיֹּאמְר֥וּ לָהֶ֛ם אֲחֵיהֶ֖ם מָ֥ה אַתֶּֽם׃

‎9 ‏וַיֹּאמְר֗וּ ק֚וּמָה וְנַעֲלֶ֣ה עֲלֵיהֶ֔ם כִּ֤י רָאִ֙ינוּ֙ אֶת־הָאָ֔רֶץ וְהִנֵּ֥ה טוֹבָ֖ה מְאֹ֑ד וְאַתֶּ֣ם מַחְשִׁ֔ים אַל־תֵּעָ֣צְל֔וּ לָלֶ֥כֶת לָבֹ֖א לָרֶ֥שֶׁת אֶת־הָאָֽרֶץ׃

‎10 ‏כְּבֹאֲכֶ֞ם תָּבֹ֣אוּ׀ אֶל־עַ֣ם בֹּטֵ֗חַ וְהָאָ֙רֶץ֙ רַחֲבַ֣ת יָדַ֔יִם כִּֽי־נְתָנָ֥הּ אֱלֹהִ֖ים בְּיֶדְכֶ֑ם מָקוֹם֙ אֲשֶׁ֣ר אֵֽין־שָׁ֣ם מַחְס֔וֹר כָּל־דָּבָ֖ר אֲשֶׁ֥ר בָּאָֽרֶץ׃

‎11 ‏וַיִּסְע֤וּ מִשָּׁם֙ מִמִּשְׁפַּ֣חַת הַדָּנִ֔י מִצָּרְעָ֖ה וּמֵאֶשְׁתָּאֹ֑ל שֵֽׁשׁ־מֵא֣וֹת אִ֔ישׁ חָג֖וּר כְּלֵ֥י מִלְחָמָֽה׃

‎12 ‏וַֽיַּעֲל֗וּ וַֽיַּחֲנ֛וּ בְּקִרְיַ֥ת יְעָרִ֖ים בִּֽיהוּדָ֑ה עַל־כֵּ֡ן קָרְאוּ֩ לַמָּק֨וֹם הַה֜וּא מַחֲנֵה־דָ֗ן עַ֚ד הַיּ֣וֹם הַזֶּ֔ה הִנֵּ֕ה אַחֲרֵ֖י קִרְיַ֥ת יְעָרִֽים׃

‎13 ‏וַיַּעַבְר֥וּ מִשָּׁ֖ם הַר־אֶפְרָ֑יִם וַיָּבֹ֖אוּ עַד־בֵּ֥ית מִיכָֽה׃

‎14 ‏וַֽיַּעֲנ֞וּ חֲמֵ֣שֶׁת הָאֲנָשִׁ֗ים הַהֹלְכִים֮ לְרַגֵּל֮ אֶת־הָאָ֣רֶץ לַיִשׁ֒ וַיֹּֽאמְרוּ֙ אֶל־אֲחֵיהֶ֔ם הַיְדַעְתֶּ֗ם כִּ֠י יֵ֣שׁ בַּבָּתִּ֤ים הָאֵ֙לֶּה֙ אֵפ֣וֹד וּתְרָפִ֔ים וּפֶ֖סֶל וּמַסֵּכָ֑ה וְעַתָּ֖ה דְּע֥וּ מַֽה־תַּעֲשֽׂוּ׃

‎15 ‏וַיָּס֣וּרוּ שָׁ֔מָּה וַיָּבֹ֛אוּ אֶל־בֵּֽית־הַנַּ֥עַר הַלֵּוִ֖י בֵּ֣ית מִיכָ֑ה וַיִּשְׁאֲלוּ־ל֖וֹ לְשָׁלֽוֹם׃

‎16 ‏וְשֵׁשׁ־מֵא֣וֹת אִ֗ישׁ חֲגוּרִים֙ כְּלֵ֣י מִלְחַמְתָּ֔ם נִצָּבִ֖ים פֶּ֣תַח הַשָּׁ֑עַר אֲשֶׁ֖ר מִבְּנֵי־דָֽן׃

‎17 ‏וַֽיַּעֲל֞וּ חֲמֵ֣שֶׁת הָאֲנָשִׁ֗ים הַהֹלְכִים֮ לְרַגֵּ֣ל אֶת־הָאָרֶץ֒ בָּ֣אוּ שָׁ֔מָּה לָקְח֗וּ אֶת־הַפֶּ֙סֶל֙ וְאֶת־הָ֣אֵפ֔וֹד וְאֶת־הַתְּרָפִ֖ים וְאֶת־הַמַּסֵּכָ֑ה וְהַכֹּהֵ֗ן נִצָּב֙ פֶּ֣תַח הַשַּׁ֔עַר וְשֵׁשׁ־מֵא֣וֹת הָאִ֔ישׁ הֶחָג֖וּר כְּלֵ֥י הַמִּלְחָמָֽה׃

‎18 ‏וְאֵ֗לֶּה בָּ֚אוּ בֵּ֣ית מִיכָ֔ה וַיִּקְחוּ֙ אֶת־פֶּ֣סֶל הָאֵפ֔וֹד וְאֶת־הַתְּרָפִ֖ים וְאֶת־הַמַּסֵּכָ֑ה וַיֹּ֤אמֶר אֲלֵיהֶם֙ הַכֹּהֵ֔ן מָ֥ה אַתֶּ֖ם עֹשִֽׂים׃

‎19 ‏וַיֹּאמְרוּ֩ ל֨וֹ הַחֲרֵ֜שׁ שִֽׂים־יָדְךָ֤ עַל־פִּ֙יךָ֙ וְלֵ֣ךְ עִמָּ֔נוּ וֶֽהְיֵה־לָ֖נוּ לְאָ֣ב וּלְכֹהֵ֑ן הֲט֣וֹב׀ הֱיוֹתְךָ֣ כֹהֵ֗ן לְבֵית֙ אִ֣ישׁ אֶחָ֔ד א֚וֹ הֱיוֹתְךָ֣ כֹהֵ֔ן לְשֵׁ֥בֶט וּלְמִשְׁפָּחָ֖ה בְּיִשְׂרָאֵֽל׃

‎20 ‏וַיִּיטַב֙ לֵ֣ב הַכֹּהֵ֔ן וַיִּקַּח֙ אֶת־הָ֣אֵפ֔וֹד וְאֶת־הַתְּרָפִ֖ים וְאֶת־הַפָּ֑סֶל וַיָּבֹ֖א בְּקֶ֥רֶב הָעָֽם׃

‎21 ‏וַיִּפְנ֖וּ וַיֵּלֵ֑כוּ וַיָּשִׂ֨ימוּ אֶת־הַטַּ֧ף וְאֶת־הַמִּקְנֶ֛ה וְאֶת־הַכְּבוּדָּ֖ה לִפְנֵיהֶֽם׃

‎22 ‏הֵ֥מָּה הִרְחִ֖יקוּ מִבֵּ֣ית מִיכָ֑ה וְהָאֲנָשִׁ֗ים אֲשֶׁ֤ר בַּבָּתִּים֙ אֲשֶׁר֙ עִם־בֵּ֣ית מִיכָ֔ה נִֽזְעֲק֔וּ וַיַּדְבִּ֖יקוּ אֶת־בְּנֵי־דָֽן׃

‎23 ‏וַֽיִּקְרְאוּ֙ אֶל־בְּנֵי־דָ֔ן וַיַּסֵּ֖בּוּ פְּנֵיהֶ֑ם וַיֹּאמְר֣וּ לְמִיכָ֔ה מַה־לְּךָ֖ כִּ֥י נִזְעָֽקְתָּ׃

‎24 ‏וַיֹּ֡אמֶר אֶת־אֱלֹהַי֩ אֲשֶׁר־עָשִׂ֨יתִי לְקַחְתֶּ֧ם וְֽאֶת־הַכֹּהֵ֛ן וַתֵּלְכ֖וּ וּמַה־לִּ֣י ע֑וֹד וּמַה־זֶּ֛ה תֹּאמְר֥וּ אֵלַ֖י מַה־לָּֽךְ׃

‎25 ‏וַיֹּאמְר֤וּ אֵלָיו֙ בְּנֵי־דָ֔ן אַל־תַּשְׁמַ֥ע קוֹלְךָ֖ עִמָּ֑נוּ פֶּֽן־יִפְגְּע֣וּ בָכֶ֗ם אֲנָשִׁים֙ מָ֣רֵי נֶ֔פֶשׁ וְאָסַפְתָּ֥ה נַפְשְׁךָ֖ וְנֶ֥פֶשׁ בֵּיתֶֽךָ׃

‎26 ‏וַיֵּלְכ֥וּ בְנֵי־דָ֖ן לְדַרְכָּ֑ם וַיַּ֣רְא מִיכָ֗ה כִּי־חֲזָקִ֥ים הֵ֙מָּה֙ מִמֶּ֔נּוּ וַיִּ֖פֶן וַיָּ֥שָׁב אֶל־בֵּיתֽוֹ׃

‎27 ‏וְהֵ֨מָּה לָקְח֜וּ אֵ֧ת אֲשֶׁר־עָשָׂ֣ה מִיכָ֗ה וְֽאֶת־הַכֹּהֵן֮ אֲשֶׁ֣ר הָיָה־לוֹ֒ וַיָּבֹ֣אוּ עַל־לַ֗יִשׁ עַל־עַם֙ שֹׁקֵ֣ט וּבֹטֵ֔חַ וַיַּכּ֥וּ אוֹתָ֖ם לְפִי־חָ֑רֶב וְאֶת־הָעִ֖יר שָׂרְפ֥וּ בָאֵֽשׁ׃

‎28 ‏וְאֵ֨ין מַצִּ֜יל כִּ֧י רְֽחוֹקָה־הִ֣יא מִצִּיד֗וֹן וְדָבָ֤ר אֵין־לָהֶם֙ עִם־אָדָ֔ם וְהִ֕יא בָּעֵ֖מֶק אֲשֶׁ֣ר לְבֵית־רְח֑וֹב וַיִּבְנ֥וּ אֶת־הָעִ֖יר וַיֵּ֥שְׁבוּ בָֽהּ׃

‎29 ‏וַיִּקְרְא֤וּ שֵׁם־הָעִיר֙ דָּ֔ן בְּשֵׁם֙ דָּ֣ן אֲבִיהֶ֔ם אֲשֶׁ֥ר יוּלַּ֖ד לְיִשְׂרָאֵ֑ל וְאוּלָ֛ם לַ֥יִשׁ שֵׁם־הָעִ֖יר לָרִאשֹׁנָֽה׃

‎30 ‏וַיָּקִ֧ימוּ לָהֶ֛ם בְּנֵי־דָ֖ן אֶת־הַפָּ֑סֶל וִ֠יהוֹנָתָן בֶּן־גֵּרְשֹׁ֨ם בֶּן־מְנַ⁷שֶּׁ֜ה ה֣וּא וּבָנָ֗יו הָי֤וּ כֹהֲנִים֙ לְשֵׁ֣בֶט הַדָּנִ֔י עַד־י֖וֹם גְּל֥וֹת הָאָֽרֶץ׃

‎31 ‏וַיָּשִׂ֣ימוּ לָהֶ֔ם אֶת־פֶּ֥סֶל מִיכָ֖ה אֲשֶׁ֣ר עָשָׂ֑ה כָּל־יְמֵ֛י הֱי֥וֹת בֵּית־הָאֱלֹהִ֖ים בְּשִׁלֹֽה׃ פ

1 bayyāmîm hâēm ’ên meleḵə bəyiśərā’ēl ûḇayyāmîm hâēm šēḇeṭ hadānî məḇaqqeš-lwō n^aḥălâ lāšeḇeṯ kî lō’-nāfəlâ llwō ‘aḏ-hayywōm hahû’ bəṯwōḵə-šiḇəṭê yiśərā’ēl bən^aḥălâ: s

2 wayyišələḥû ḇənê-ḏān| mimmišəp^aḥətām ḥămiššâ ’ănāšîm miqəṣwōṯām ’ănāšîm bənê-ḥayil miṣṣārə‘â ûmē’ešətā’ōl ləragēl ’eṯ-hā’āreṣ ûləḥāqərāh wayyō’mərû ’ălēhem ləḵû ḥiqərû ’eṯ-hā’āreṣ wayyāḇō’û har-’efərayim ‘aḏ-bêṯ mîḵâ wayyālînû šām:

3 hēmmâ ‘im-bêṯ mîḵâ wəhēmmâ hikîrû ’eṯ-qwōl hann^a‘ar hallēwî wayyāsûrû šām wayyō’mərû lwō mî-hĕḇî’ăḵā hălōm ûmâ-’atâ ‘ōśeh bāzeh ûmah-lləḵā fōh:

4 wayyō’mer ’ălēhem kāzōh wəḵāzeh ‘āśâ lî mîḵâ wayyiśəkərēnî wā’ĕhî-lwō ləḵōhēn:

5 wayyō’mərû lwō šə’al-nā’ ḇē’lōhîm wənēḏə‘â hăṯaṣəlîḥa darəkēnû ’ăšer ’ăn^aḥənû hōləḵîm ‘āleyhā:

6 wayyō’mer lâem hakōhēn ləḵû ləšālwōm nōḵ^aḥ yəhwâ darəkəḵem ’ăšer tēləḵû-ḇāh: f

7 wayyēləḵû ḥămēšeṯ hā’ănāšîm wayyāḇō’û lāyəšâ wayyirə’û ’eṯ-hā‘ām ’ăšer-bəqirəbāh ywōšeḇeṯ-lāḇeṭ^aḥ kəmišəpaṭ ṣiḏōnîm šōqēṭ| ûḇōṭēḥa wə’ên-maḵəlîm dāḇār bā’āreṣ ywōrēš ‘eṣer ûrəḥōqîm hēmmâ miṣṣiḏōnîm wəḏāḇār ’ên-lâem ‘im-’āḏām:

8 wayyāḇō’û ’el-’ăḥêhem ṣārə‘â wə’ešətā’ōl wayyō’mərû lâem ’ăḥêhem mâ ’atem:

9 wayyō’mərû qûmâ wən^a‘ăleh ‘ălêhem kî rā’înû ’eṯ-hā’āreṣ wəhinnēh ṭwōḇâ mə’ōḏ wə’atem m^aḥəšîm ’al-tē‘āṣəlû lāleḵeṯ lāḇō’ lārešeṯ ’eṯ-hā’āreṣ:

10 kəḇō’ăḵem tāḇō’û| ’el-‘am bōṭēḥa wəhā’āreṣ r^aḥăḇaṯ yāḏayim kî-nəṯānāh ’ĕlōhîm bəyeḏəḵem māqwōm ’ăšer ’ên-šām m^aḥəswōr kāl-dāḇār ’ăšer bā’āreṣ:

11 wayyisə‘û miššām mimmišəp^aḥaṯ hadānî miṣṣārə‘â ûmē’ešətā’ōl šēš-mē’wōṯ ’îš ḥāḡûr kəlê miləḥāmâ:

12 wayy^a‘ălû wayy^aḥănû bəqirəyaṯ yə‘ārîm bîhûḏâ ‘al-kēn qārə’û lammāqwōm hahû’ m^aḥănēh-ḏān ‘aḏ hayywōm hazzeh hinnēh ’^aḥărê qirəyaṯ yə‘ārîm:

13 wayy^a‘aḇərû miššām har-’efərāyim wayyāḇō’û ‘aḏ-bêṯ mîḵâ:

14 wayy^a‘ănû ḥămēšeṯ hā’ănāšîm hahōləḵîm ləragēl ’eṯ-hā’āreṣ layiš wayyō’mərû ’el-’ăḥêhem hayəḏ^a‘ətem kî yēš babātîm hā’ēlleh ’ēfwōḏ ûṯərāfîm ûfesel ûmassēḵâ wə‘atâ də‘û mah-t^a‘ăśû:

15 wayyāsûrû šāmmâ wayyāḇō’û ’el-bêṯ-hann^a‘ar hallēwî bêṯ mîḵâ wayyišə’ălû-lwō ləšālwōm:

16 wəšēš-mē’wōṯ ’îš ḥăḡûrîm kəlê miləḥamətām niṣṣāḇîm peṯ^aḥ haššā‘ar ’ăšer mibənê-ḏān:

17 wayy^a‘ălû ḥămēšeṯ hā’ănāšîm hahōləḵîm ləragēl ’eṯ-hā’āreṣ bā’û šāmmâ lāqəḥû ’eṯ-hapesel wə’eṯ-hā’ēfwōḏ wə’eṯ-hatərāfîm wə’eṯ-hammassēḵâ wəhakōhēn niṣṣāḇ peṯ^aḥ hašš^a‘ar wəšēš-mē’wōṯ hā’îš heḥāḡûr kəlê hammiləḥāmâ:

18 wə’ēlleh bā’û bêṯ mîḵâ wayyiqəḥû ’eṯ-pesel hā’ēfwōḏ wə’eṯ-hatərāfîm wə’eṯ-hammassēḵâ wayyō’mer ’ălêhem hakōhēn mâ ’atem ‘ōśîm:

19 wayyō’mərû lwō h^aḥărēš śîm-yāḏəḵā ‘al-pîḵā wəlēḵə ‘immānû wehəyēh-lānû lə’āḇ ûləḵōhēn hăṭwōḇ| hĕywōṯəḵā ḵōhēn ləḇêṯ ’îš ’eḥāḏ ’wō hĕywōṯəḵā ḵōhēn ləšēḇeṭ ûləmišəpāḥâ bəyiśərā’ēl:

20 wayyîṭaḇ lēḇ hakōhēn wayyiqq^aḥ ’eṯ-hā’ēfwōḏ wə’eṯ-hatərāfîm wə’eṯ-hapāsel wayyāḇō’ bəqereḇ hā‘ām:

21 wayyifənû wayyēlēḵû wayyāśîmû ’eṯ-haṭṭaf wə’eṯ-hammiqəneh wə’eṯ-hakəḇûdâ lifənêhem:

22 hēmmâ hirəḥîqû mibêṯ mîḵâ wəhā’ănāšîm ’ăšer babātîm ’ăšer ‘im-bêṯ mîḵâ nizə‘ăqû wayyaḏəbîqû ’eṯ-bənê-ḏān:

23 wayyiqərə’û ’el-bənê-ḏān wayyassēbû pənêhem wayyō’mərû ləmîḵâ mah-lləḵā kî nizə‘āqətā:

24 wayyō’mer ’eṯ-’ĕlōhay ’ăšer-‘āśîṯî ləq^aḥətem wə’eṯ-hakōhēn watēləḵû ûmah-llî ‘wōḏ ûmah-zzeh tō’mərû ’ēlay mah-llāḵə:

25 wayyō’mərû ’ēlāyw bənê-ḏān ’al-tašəm^a‘ qwōləḵā ‘immānû pen-yifəgə‘û ḇāḵem ’ănāšîm mārê nefeš wə’āsafətâ nafəšəḵā wənefeš bêṯeḵā:

26 wayyēləḵû ḇənê-ḏān ləḏarəkām wayyarə’ mîḵâ kî-ḥăzāqîm hēmmâ mimmennû wayyifen wayyāšāḇ ’el-bêṯwō:

27 wəhēmmâ lāqəḥû ’ēṯ ’ăšer-‘āśâ mîḵâ wə’eṯ-hakōhēn ’ăšer hāyâ-lwō wayyāḇō’û ‘al-layiš ‘al-‘am šōqēṭ ûḇōṭēḥa wayyakû ’wōṯām ləfî-ḥāreḇ wə’eṯ-hā‘îr śārəfû ḇā’ēš:

28 wə’ên maṣṣîl kî rəḥwōqâ-hî’ miṣṣîḏwōn wəḏāḇār ’ên-lâem ‘im-’āḏām wəhî’ bā‘ēmeq ’ăšer ləḇêṯ-rəḥwōḇ wayyiḇənû ’eṯ-hā‘îr wayyēšəḇû ḇāh:

29 wayyiqərə’û šēm-hā‘îr dān bəšēm dān ’ăḇîhem ’ăšer yûllaḏ ləyiśərā’ēl wə’ûlām layiš šēm-hā‘îr lāri’šōnâ:

30 wayyāqîmû lâem bənê-ḏān ’eṯ-hapāsel wîhwōnāṯān ben-gērəšōm ben-məna⁷ššeh hû’ ûḇānāyw hāyû ḵōhănîm ləšēḇeṭ hadānî ‘aḏ-ywōm gəlwōṯ hā’āreṣ:

31 wayyāśîmû lâem ’eṯ-pesel mîḵâ ’ăšer ‘āśâ kāl-yəmê hĕywōṯ bêṯ-hā’ĕlōhîm bəšilōh: f