Jeremiah (Yermiyah) Chapter 4

‎1 ‏אִם־תָּשׁ֨וּב יִשְׂרָאֵ֧ל׀ נְאֻם־יְהוָ֛ה אֵלַ֖י תָּשׁ֑וּב וְאִם־תָּסִ֧יר שִׁקּוּצֶ֛יךָ מִפָּנַ֖י וְלֹ֥א תָנֽוּד׃

‎2 ‏וְנִשְׁבַּ֙עְתָּ֙ חַי־יְהוָ֔ה בֶּאֱמֶ֖ת בְּמִשְׁפָּ֣ט וּבִצְדָקָ֑ה וְהִתְבָּ֥רְכוּ ב֛וֹ גּוֹיִ֖ם וּב֥וֹ יִתְהַלָּֽלוּ׃ ס

‎3 ‏כִּי־כֹ֣ה׀ אָמַ֣ר יְהוָֹ֗ה לְאִ֤ישׁ יְהוּדָה֙ וְלִיר֣וּשָׁלִַ֔ם נִ֥ירוּ לָכֶ֖ם נִ֑יר וְאַֽל־תִּזְרְע֖וּ אֶל־קוֹצִֽים׃

‎4 ‏הִמֹּ֣לוּ לַיהוָֹ֗ה וְהָסִ֙רוּ֙ עָרְל֣וֹת לְבַבְכֶ֔ם אִ֥ישׁ יְהוּדָ֖ה וְיֹשְׁבֵ֣י יְרוּשָׁלִָ֑ם פֶּן־תֵּצֵ֨א כָאֵ֜שׁ חֲמָתִ֗י וּבָעֲרָה֙ וְאֵ֣ין מְכַבֶּ֔ה מִפְּנֵ֖י רֹ֥עַ מַעַלְלֵיכֶֽם׃

‎5 ‏הַגִּ֣ידוּ בִֽיהוּדָ֗ה וּבִירוּשָׁלִַ֙ם֙ הַשְׁמִ֔יעוּ וְאִמְר֕וּ ותקעו תִּקְע֥וּ שׁוֹפָ֖ר בָּאָ֑רֶץ קִרְא֤וּ מַלְאוּ֙ וְאִמְר֔וּ הֵאָסְפ֥וּ וְנָב֖וֹאָה אֶל־עָרֵ֥י הַמִּבְצָֽר׃

‎6 ‏שְׂאוּ־נֵ֣ס צִיּ֔וֹנָה הָעִ֖יזוּ אַֽל־תַּעֲמֹ֑דוּ כִּ֣י רָעָ֗ה אָנֹכִ֛י מֵבִ֥יא מִצָּפ֖וֹן וְשֶׁ֥בֶר גָּדֽוֹל׃

‎7 ‏עָלָ֤ה אַרְיֵה֙ מִֽסֻּבְּכ֔וֹ וּמַשְׁחִ֣ית גּוֹיִ֔ם נָסַ֖ע יָצָ֣א מִמְּקֹמ֑וֹ לָשׂ֤וּם אַרְצֵךְ֙ לְשַׁמָּ֔ה עָרַ֥יִךְ תִּצֶּ֖ינָה מֵאֵ֥ין יוֹשֵֽׁב׃

‎8 ‏עַל־זֹ֛את חִגְר֥וּ שַׂקִּ֖ים סִפְד֣וּ וְהֵילִ֑ילוּ כִּ֥י לֹא־שָׁ֛ב חֲר֥וֹן אַף־יְהוָֹ֖ה מִמֶּֽנּוּ׃ פ

‎9 ‏וְהָיָ֤ה בַיּוֹם־הַהוּא֙ נְאֻם־יְהוָ֔ה יֹאבַ֥ד לֵב־הַמֶּ֖לֶךְ וְלֵ֣ב הַשָּׂרִ֑ים וְנָשַׁ֙מּוּ֙ הַכֹּ֣הֲנִ֔ים וְהַנְּבִיאִ֖ים יִתְמָֽהוּ׃

‎10 ‏וָאֹמַ֞ר אֲהָ֣הּ׀ אֲדֹנָ֣י יְהוִ֗ה אָכֵן֩ הַשֵּׁ֨א הִשֵּׁ֜אתָ לָעָ֤ם הַזֶּה֙ וְלִירוּשָׁלִַ֣ם לֵאמֹ֔ר שָׁל֖וֹם יִהְיֶ֣ה לָכֶ֑ם וְנָגְעָ֥ה חֶ֖רֶב עַד־הַנָּֽפֶשׁ׃

‎11 ‏בָּעֵ֣ת הַהִ֗יא יֵאָמֵ֤ר לָֽעָם־הַזֶּה֙ וְלִיר֣וּשָׁלִַ֔ם ר֣וּחַ צַ֤ח שְׁפָיִים֙ בַּמִּדְבָּ֔ר דֶּ֖רֶךְ בַּת־עַמִּ֑י ל֥וֹא לִזְר֖וֹת וְל֥וֹא לְהָבַֽר׃

‎12 ‏ר֧וּחַ מָלֵ֛א מֵאֵ֖לֶּה יָ֣בוֹא לִ֑י עַתָּ֕ה גַּם־אֲנִ֛י אֲדַבֵּ֥ר מִשְׁפָּטִ֖ים אוֹתָֽם׃

‎13 ‏הִנֵּ֣ה׀ כַּעֲנָנִ֣ים יַעֲלֶ֗ה וְכַסּוּפָה֙ מַרְכְּבוֹתָ֔יו קַלּ֥וּ מִנְּשָׁרִ֖ים סוּסָ֑יו א֥וֹי לָ֖נוּ כִּ֥י שֻׁדָּֽדְנוּ׃

‎14 ‏כַּבְּסִ֨י מֵרָעָ֤ה לִבֵּךְ֙ יְר֣וּשָׁלִַ֔ם לְמַ֖עַן תִּוָּשֵׁ֑עִי עַד־מָתַ֛י תָּלִ֥ין בְּקִרְבֵּ֖ךְ מַחְשְׁב֥וֹת אוֹנֵֽךְ׃

‎15 ‏כִּ֛י ק֥וֹל מַגִּ֖יד מִדָּ֑ן וּמַשְׁמִ֥יעַ אָ֖וֶן מֵהַ֥ר אֶפְרָֽיִם׃

‎16 ‏הַזְכִּ֣ירוּ לַגּוֹיִ֗ם הִנֵּה֙ הַשְׁמִ֣יעוּ עַל־יְרוּשָׁלִַ֔ם נֹצְרִ֥ים בָּאִ֖ים מֵאֶ֣רֶץ הַמֶּרְחָ֑ק וַֽיִּתְּנ֛וּ עַל־עָרֵ֥י יְהוּדָ֖ה קוֹלָֽם׃

‎17 ‏כְּשֹׁמְרֵ֣י שָׂדַ֔י הָי֥וּ עָלֶ֖יהָ מִסָּבִ֑יב כִּי־אֹתִ֥י מָרָ֖תָה נְאֻם־יְהוָֽה׃

‎18 ‏דַּרְכֵּךְ֙ וּמַ֣עֲלָלַ֔יִךְ עָשׂ֥וֹ אֵ֖לֶּה לָ֑ךְ זֹ֤את רָעָתֵךְ֙ כִּ֣י מָ֔ר כִּ֥י נָגַ֖ע עַד־לִבֵּֽךְ׃ ס

‎19 ‏מֵעַ֣י׀ מֵעַ֨י׀ אחולה אוֹחִ֜ילָה קִיר֥וֹת לִבִּ֛י הֹֽמֶה־לִּ֥י לִבִּ֖י לֹ֣א אַחֲרִ֑ישׁ כִּ֣י ק֤וֹל שׁוֹפָר֙ שמעתי שָׁמַ֣עַתְּ נַפְשִׁ֔י תְּרוּעַ֖ת מִלְחָמָֽה׃

‎20 ‏שֶׁ֤בֶר עַל־שֶׁ֙בֶר֙ נִקְרָ֔א כִּ֥י שֻׁדְּדָ֖ה כָּל־הָאָ֑רֶץ פִּתְאֹם֙ שֻׁדְּד֣וּ אֹהָלַ֔י רֶ֖גַע יְרִיעֹתָֽי׃

‎21 ‏עַד־מָתַ֖י אֶרְאֶה־נֵּ֑ס אֶשְׁמְעָ֖ה ק֥וֹל שׁוֹפָֽר׃ ס

‎22 ‏כִּ֣י׀ אֱוִ֣יל עַמִּ֗י אוֹתִי֙ לֹ֣א יָדָ֔עוּ בָּנִ֤ים סְכָלִים֙ הֵ֔מָּה וְלֹ֥א נְבוֹנִ֖ים הֵ֑מָּה חֲכָמִ֥ים הֵ֙מָּה֙ לְהָרַ֔ע וּלְהֵיטִ֖יב לֹ֥א יָדָֽעוּ׃

‎23 ‏רָאִ֙יתִי֙ אֶת־הָאָ֔רֶץ וְהִנֵּה־תֹ֖הוּ וָבֹ֑הוּ וְאֶל־הַשָּׁמַ֖יִם וְאֵ֥ין אוֹרָֽם׃

‎24 ‏רָאִ֙יתִי֙ הֶֽהָרִ֔ים וְהִנֵּ֖ה רֹעֲשִׁ֑ים וְכָל־הַגְּבָע֖וֹת הִתְקַלְקָֽלוּ׃

‎25 ‏רָאִ֕יתִי וְהִנֵּ֖ה אֵ֣ין הָאָדָ֑ם וְכָל־ע֥וֹף הַשָּׁמַ֖יִם נָדָֽדוּ׃

‎26 ‏רָאִ֕יתִי וְהִנֵּ֥ה הַכַּרְמֶ֖ל הַמִּדְבָּ֑ר וְכָל־עָרָ֗יו נִתְּצוּ֙ מִפְּנֵ֣י יְהוָ֔ה מִפְּנֵ֖י חֲר֥וֹן אַפּֽוֹ׃ ס

‎27 ‏כִּי־כֹה֙ אָמַ֣ר יְהוָ֔ה שְׁמָמָ֥ה תִהְיֶ֖ה כָּל־הָאָ֑רֶץ וְכָלָ֖ה לֹ֥א אֶעֱשֶֽׂה׃

‎28 ‏עַל־זֹאת֙ תֶּאֱבַ֣ל הָאָ֔רֶץ וְקָדְר֥וּ הַשָּׁמַ֖יִם מִמָּ֑עַל עַ֤ל כִּי־דִבַּ֙רְתִּי֙ זַמֹּ֔תִי וְלֹ֥א נִחַ֖מְתִּי וְלֹא־אָשׁ֥וּב מִמֶּֽנָּה׃

‎29 ‏מִקּ֨וֹל פָּרָ֜שׁ וְרֹ֣מֵה קֶ֗שֶׁת בֹּרַ֙חַת֙ כָּל־הָעִ֔יר בָּ֚אוּ בֶּעָבִ֔ים וּבַכֵּפִ֖ים עָל֑וּ כָּל־הָעִ֣יר עֲזוּבָ֔ה וְאֵין־יוֹשֵׁ֥ב בָּהֵ֖ן אִֽישׁ׃

‎30 ‏ואתי וְאַ֨תְּ שָׁד֜וּד מַֽה־תַּעֲשִׂ֗י כִּֽי־תִלְבְּשִׁ֨י שָׁנִ֜י כִּי־תַעְדִּ֣י עֲדִי־זָהָ֗ב כִּֽי־תִקְרְעִ֤י בַפּוּךְ֙ עֵינַ֔יִךְ לַשָּׁ֖וְא תִּתְיַפִּ֑י מָאֲסוּ־בָ֥ךְ עֹגְבִ֖ים נַפְשֵׁ֥ךְ יְבַקֵּֽשׁוּ׃

‎31 ‏כִּי֩ ק֨וֹל כְּחוֹלָ֜ה שָׁמַ֗עְתִּי צָרָה֙ כְּמַבְכִּירָ֔ה ק֧וֹל בַּת־צִיּ֛וֹן תִּתְיַפֵּ֖חַ תְּפָרֵ֣שׂ כַּפֶּ֑יהָ אֽוֹי־נָ֣א לִ֔י כִּֽי־עָיְפָ֥ה נַפְשִׁ֖י לְהֹרְגִֽים׃ פ

1 ’im-tāšûḇ yiśərā’ēl| nə’um-yəhwâ ’ēlay tāšûḇ wə’im-tāsîr šiqqûṣeyḵā mipānay wəlō’ ṯānûḏ:

2 wənišəb^a‘ətā ḥay-yəhwâ be’ĕmeṯ bəmišəpāṭ ûḇiṣəḏāqâ wəhiṯəbārəḵû ḇwō gwōyim ûḇwō yiṯəhallālû: s

3 kî-ḵōh| ’āmar yəhwōâ lə’îš yəhûḏâ wəlîrûšālaim nîrû lāḵem nîr wə’al-tizərə‘û ’el-qwōṣîm:

4 himmōlû layhwōâ wəhāsirû ‘ārəlwōṯ ləḇaḇəḵem ’îš yəhûḏâ wəyōšəḇê yərûšālāim pen-tēṣē’ ḵā’ēš ḥămāṯî ûḇā‘ărâ wə’ên məḵabeh mipənê rō‘a m^a‘aləlêḵem:

5 hagîḏû ḇîhûḏâ ûḇîrûšālaim hašəmî‘û wə’imərû wəṯiqə‘û tiqə‘û šwōfār bā’āreṣ qirə’û malə’û wə’imərû hē’āsəfû wənāḇwō’â ’el-‘ārê hammiḇəṣār:

6 śə’û-nēs ṣîywōnâ hā‘îzû ’al-t^a‘ămōḏû kî rā‘â ’ānōḵî mēḇî’ miṣṣāfwōn wəšeḇer gāḏwōl:

7 ‘ālâ ’arəyēh missubəḵwō ûmašəḥîṯ gwōyim nās^a‘ yāṣā’ mimməqōmwō lāśûm ’arəṣēḵə ləšammâ ‘ārayiḵə tiṣṣeynâ mē’ên ywōšēḇ:

8 ‘al-zō’ṯ ḥiḡərû śaqqîm sifəḏû wəhêlîlû kî lō’-šāḇ ḥărwōn ’af-yəhwōâ mimmennû: f

9 wəhāyâ ḇayywōm-hahû’ nə’um-yəhwâ yō’ḇaḏ lēḇ-hammeleḵə wəlēḇ haśśārîm wənāšammû hakōhănîm wəhannəḇî’îm yiṯəmâû:

10 wā’ōmar ’ăhāh| ’ăḏōnāy yəhwih ’āḵēn haššē’ hiššē’ṯā lā‘ām hazzeh wəlîrûšālaim lē’mōr šālwōm yihəyeh lāḵem wənāḡə‘â ḥereḇ ‘aḏ-hannāfeš:

11 bā‘ēṯ hahî’ yē’āmēr lā‘ām-hazzeh wəlîrûšālaim rûḥa ṣ^aḥ šəfāyîm bammiḏəbār dereḵə baṯ-‘ammî lwō’ lizərwōṯ wəlwō’ ləhāḇar:

12 rûḥa mālē’ mē’ēlleh yāḇwō’ lî ‘atâ gam-’ănî ’ăḏabēr mišəpāṭîm ’wōṯām:

13 hinnēh| k^a‘ănānîm y^a‘ăleh wəḵassûfâ marəkəḇwōṯāyw qallû minnəšārîm sûsāyw ’wōy lānû kî šudāḏənû:

14 kabəsî mērā‘â libēḵə yərûšālaim ləm^a‘an tiûāšē‘î ‘aḏ-māṯay tālîn bəqirəbēḵə m^aḥəšəḇwōṯ ’wōnēḵə:

15 kî qwōl magîḏ midān ûmašəmî‘a ’āwen mēhar ’efərāyim:

16 hazəkîrû lagwōyim hinnēh hašəmî‘û ‘al-yərûšālaim nōṣərîm bā’îm mē’ereṣ hammerəḥāq wayyitənû ‘al-‘ārê yəhûḏâ qwōlām:

17 kəšōmərê śāḏay hāyû ‘āleyhā missāḇîḇ kî-’ōṯî mārāṯâ nə’um-yəhwâ:

18 darəkēḵə ûm^a‘ălālayiḵə ‘āśwō ’ēlleh lāḵə zō’ṯ rā‘āṯēḵə kî mār kî nāḡ^a‘ ‘aḏ-libēḵə: s

19 mē‘ay| mē‘ay| ’āḥûlâ ’wōḥîlâ qîrwōṯ libî hōmeh-llî libî lō’ ’^aḥărîš kî qwōl šwōfār šām^a‘ətî šām^a‘atə nafəšî tərû‘aṯ miləḥāmâ:

20 šeḇer ‘al-šeḇer niqərā’ kî šudəḏâ kāl-hā’āreṣ piṯə’ōm šudəḏû ’ōhālay reḡ^a‘ yərî‘ōṯāy:

21 ‘aḏ-māṯay ’erə’eh-nnēs ’ešəmə‘â qwōl šwōfār: s

22 kî| ’ĕwîl ‘ammî ’wōṯî lō’ yāḏā‘û bānîm səḵālîm hēmmâ wəlō’ nəḇwōnîm hēmmâ ḥăḵāmîm hēmmâ ləhār^a‘ ûləhêṭîḇ lō’ yāḏā‘û:

23 rā’îṯî ’eṯ-hā’āreṣ wəhinnēh-ṯōhû wāḇōhû wə’el-haššāmayim wə’ên ’wōrām:

24 rā’îṯî hehārîm wəhinnēh rō‘ăšîm wəḵāl-hagəḇā‘wōṯ hiṯəqaləqālû:

25 rā’îṯî wəhinnēh ’ên hā’āḏām wəḵāl-‘wōf haššāmayim nāḏāḏû:

26 rā’îṯî wəhinnēh hakarəmel hammiḏəbār wəḵāl-‘ārāyw nitəṣû mipənê yəhwâ mipənê ḥărwōn ’apwō: s

27 kî-ḵōh ’āmar yəhwâ šəmāmâ ṯihəyeh kāl-hā’āreṣ wəḵālâ lō’ ’e‘ĕśeh:

28 ‘al-zō’ṯ te’ĕḇal hā’āreṣ wəqāḏərû haššāmayim mimmā‘al ‘al kî-ḏibarətî zammōṯî wəlō’ niḥamətî wəlō’-’āšûḇ mimmennâ:

29 miqqwōl pārāš wərōmēh qešeṯ bōr^aḥaṯ kāl-hā‘îr bā’û be‘āḇîm ûḇakēfîm ‘ālû kāl-hā‘îr ‘ăzûḇâ wə’ên-ywōšēḇ bâēn ’îš:

30 wə’atî wə’atə šāḏûḏ mah-t^a‘ăśî kî-ṯiləbəšî šānî kî-ṯ^a‘ədî ‘ăḏî-zâāḇ kî-ṯiqərə‘î ḇapûḵə ‘ênayiḵə laššāwə’ tiṯəyapî mā’ăsû-ḇāḵə ‘ōḡəḇîm nafəšēḵə yəḇaqqēšû:

31 kî qwōl kəḥwōlâ šām^a‘ətî ṣārâ kəmaḇəkîrâ qwōl baṯ-ṣîywōn tiṯəyapēḥa təfārēś kapeyhā ’wōy-nā’ lî kî-‘āyəfâ nafəšî ləhōrəḡîm: f