Jeremiah (Yermiyah) Chapter 14

‎1 ‏אֲשֶׁ֨ר הָיָ֤ה דְבַר־יְהוָה֙ אֶֽל־יִרְמְיָ֔הוּ עַל־דִּבְרֵ֖י הַבַּצָּרֽוֹת׃

‎2 ‏אָבְלָ֣ה יְהוּדָ֔ה וּשְׁעָרֶ֥יהָ אֻמְלְל֖וּ קָדְר֣וּ לָאָ֑רֶץ וְצִוְחַ֥ת יְרוּשָׁלִַ֖ם עָלָֽתָה׃

‎3 ‏וְאַדִּ֣רֵיהֶ֔ם שָׁלְח֥וּ צעוריהם צְעִירֵיהֶ֖ם לַמָּ֑יִם בָּ֣אוּ עַל־גֵּבִ֞ים לֹא־מָ֣צְאוּ מַ֗יִם שָׁ֤בוּ כְלֵיהֶם֙ רֵיקָ֔ם בֹּ֥שׁוּ וְהָכְלְמ֖וּ וְחָפ֥וּ רֹאשָֽׁם׃

‎4 ‏בַּעֲב֤וּר הָאֲדָמָה֙ חַ֔תָּה כִּ֛י לֹא־הָיָ֥ה גֶ֖שֶׁם בָּאָ֑רֶץ בֹּ֥שׁוּ אִכָּרִ֖ים חָפ֥וּ רֹאשָֽׁם׃

‎5 ‏כִּ֤י גַם־אַיֶּ֙לֶת֙ בַּשָּׂדֶ֔ה יָלְדָ֖ה וְעָז֑וֹב כִּ֥י לֹֽא־הָיָ֖ה דֶּֽשֶׁא׃

‎6 ‏וּפְרָאִים֙ עָמְד֣וּ עַל־שְׁפָיִ֔ם שָׁאֲפ֥וּ ר֖וּחַ כַּתַּנִּ֑ים כָּל֥וּ עֵינֵיהֶ֖ם כִּי־אֵ֥ין עֵֽשֶׂב׃

‎7 ‏אִם־עֲוֹנֵ֙ינוּ֙ עָ֣נוּ בָ֔נוּ יְהוָ֕ה עֲשֵׂ֖ה לְמַ֣עַן שְׁמֶ֑ךָ כִּֽי־רַבּ֥וּ מְשׁוּבֹתֵ֖ינוּ לְךָ֥ חָטָֽאנוּ׃

‎8 ‏מִקְוֵה֙ יִשְׂרָאֵ֔ל מֽוֹשִׁיע֖וֹ בְּעֵ֣ת צָרָ֑ה לָ֤מָּה תִֽהְיֶה֙ כְּגֵ֣ר בָּאָ֔רֶץ וּכְאֹרֵ֖חַ נָטָ֥ה לָלֽוּן׃

‎9 ‏לָ֤מָּה תִֽהְיֶה֙ כְּאִ֣ישׁ נִדְהָ֔ם כְּגִבּ֖וֹר לֹא־יוּכַ֣ל לְהוֹשִׁ֑יעַ וְאַתָּ֧ה בְקִרְבֵּ֣נוּ יְהוָ֗ה וְשִׁמְךָ֛ עָלֵ֥ינוּ נִקְרָ֖א אַל־תַּנִּחֵֽנוּ׃ ס

‎10 ‏כֹּֽה־אָמַ֨ר יְהוָ֜ה לָעָ֣ם הַזֶּ֗ה כֵּ֤ן אָֽהֲבוּ֙ לָנ֔וּעַ רַגְלֵיהֶ֖ם לֹ֣א חָשָׂ֑כוּ וַיהוָה֙ לֹ֣א רָצָ֔ם עַתָּה֙ יִזְכֹּ֣ר עֲוֹנָ֔ם וְיִפְקֹ֖ד חַטֹּאתָֽם׃ ס

‎11 ‏וַיֹּ֥אמֶר יְהוָ֖ה אֵלָ֑י אַל־תִּתְפַּלֵּ֛ל בְּעַד־הָעָ֥ם הַזֶּ֖ה לְטוֹבָֽה׃

‎12 ‏כִּ֣י יָצֻ֗מוּ אֵינֶ֤נִּי שֹׁמֵ֙עַ֙ אֶל־רִנָּתָ֔ם וְכִ֧י יַעֲל֛וּ עֹלָ֥ה וּמִנְחָ֖ה אֵינֶ֣נִּי רֹצָ֑ם כִּ֗י בַּחֶ֙רֶב֙ וּבָרָעָ֣ב וּבַדֶּ֔בֶר אָנֹכִ֖י מְכַלֶּ֥ה אוֹתָֽם׃ ס

‎13 ‏וָאֹמַ֞ר אֲהָ֣הּ׀ אֲדֹנָ֣י יְהוִ֗ה הִנֵּ֨ה הַנְּבִאִ֜ים אֹמְרִ֤ים לָהֶם֙ לֹֽא־תִרְא֣וּ חֶ֔רֶב וְרָעָ֖ב לֹֽא־יִהְיֶ֣ה לָכֶ֑ם כִּֽי־שְׁל֤וֹם אֱמֶת֙ אֶתֵּ֣ן לָכֶ֔ם בַּמָּק֖וֹם הַזֶּֽה׃ ס

‎14 ‏וַיֹּ֨אמֶר יְהוָ֜ה אֵלַ֗י שֶׁ֚קֶר הַנְּבִאִים֙ נִבְּאִ֣ים בִּשְׁמִ֔י לֹ֤א שְׁלַחְתִּים֙ וְלֹ֣א צִוִּיתִ֔ים וְלֹ֥א דִבַּ֖רְתִּי אֲלֵיהֶ֑ם חֲז֨וֹן שֶׁ֜קֶר וְקֶ֤סֶם ואלול וֶֽאֱלִיל֙ ותרמות וְתַרְמִ֣ית לִבָּ֔ם הֵ֖מָּה מִֽתְנַבְּאִ֥ים לָכֶֽם׃ ס

‎15 ‏לָכֵ֞ן כֹּֽה־אָמַ֣ר יְהוָ֗ה עַֽל־הַנְּבִאִ֞ים הַנִּבְּאִ֣ים בִּשְׁמִי֮ וַאֲנִ֣י לֹֽא־שְׁלַחְתִּים֒ וְהֵ֙מָּה֙ אֹֽמְרִ֔ים חֶ֣רֶב וְרָעָ֔ב לֹ֥א יִהְיֶ֖ה בָּאָ֣רֶץ הַזֹּ֑את בַּחֶ֤רֶב וּבָֽרָעָב֙ יִתַּ֔מּוּ הַנְּבִאִ֖ים הָהֵֽמָּה׃

‎16 ‏וְהָעָ֣ם אֲשֶׁר־הֵ֣מָּה נִבְּאִ֣ים לָהֶ֡ם יִֽהְי֣וּ מֻשְׁלָכִים֩ בְּחֻצ֨וֹת יְרוּשָׁלִַ֜ם מִפְּנֵ֣י׀ הָרָעָ֣ב וְהַחֶ֗רֶב וְאֵ֤ין מְקַבֵּר֙ לָהֵ֔מָּה הֵ֣מָּה נְשֵׁיהֶ֔ם וּבְנֵיהֶ֖ם וּבְנֹֽתֵיהֶ֑ם וְשָׁפַכְתִּ֥י עֲלֵיהֶ֖ם אֶת־רָעָתָֽם׃

‎17 ‏וְאָמַרְתָּ֤ אֲלֵיהֶם֙ אֶת־הַדָּבָ֣ר הַזֶּ֔ה תֵּרַ֨דְנָה עֵינַ֥י דִּמְעָ֛ה לַ֥יְלָה וְיוֹמָ֖ם וְאַל־תִּדְמֶ֑ינָה כִּי֩ שֶׁ֨בֶר גָּד֜וֹל נִשְׁבְּרָ֗ה בְּתוּלַת֙ בַּת־עַמִּ֔י מַכָּ֖ה נַחְלָ֥ה מְאֹֽד׃

‎18 ‏אִם־יָצָ֣אתִי הַשָּׂדֶ֗ה וְהִנֵּה֙ חַלְלֵי־חֶ֔רֶב וְאִם֙ בָּ֣אתִי הָעִ֔יר וְהִנֵּ֖ה תַּחֲלוּאֵ֣י רָעָ֑ב כִּֽי־גַם־נָבִ֧יא גַם־כֹּהֵ֛ן סָחֲר֥וּ אֶל־אֶ֖רֶץ וְלֹ֥א יָדָֽעוּ׃ ס

‎19 ‏הֲמָאֹ֨ס מָאַ֜סְתָּ אֶת־יְהוּדָ֗ה אִם־בְּצִיּוֹן֙ גָּעֲלָ֣ה נַפְשֶׁ֔ךָ מַדּ֙וּעַ֙ הִכִּיתָ֔נוּ וְאֵ֥ין לָ֖נוּ מַרְפֵּ֑א קַוֵּ֤ה לְשָׁלוֹם֙ וְאֵ֣ין ט֔וֹב וּלְעֵ֥ת מַרְפֵּ֖א וְהִנֵּ֥ה בְעָתָֽה׃

‎20 ‏יָדַ֧עְנוּ יְהוָ֛ה רִשְׁעֵ֖נוּ עֲוֹ֣ן אֲבוֹתֵ֑ינוּ כִּ֥י חָטָ֖אנוּ לָֽךְ׃

‎21 ‏אַל־תִּנְאַץ֙ לְמַ֣עַן שִׁמְךָ֔ אַל־תְּנַבֵּ֖ל כִּסֵּ֣א כְבוֹדֶ֑ךָ זְכֹ֕ר אַל־תָּפֵ֥ר בְּרִֽיתְךָ֖ אִתָּֽנוּ׃

‎22 ‏הֲיֵ֨שׁ בְּהַבְלֵ֤י הַגּוֹיִם֙ מַגְשִׁמִ֔ים וְאִם־הַשָּׁמַ֖יִם יִתְּנ֣וּ רְבִבִ֑ים הֲלֹ֨א אַתָּה־ה֜וּא יְהוָ֤ה אֱלֹהֵ֙ינוּ֙ וּ֨נְקַוֶּה־לָּ֔ךְ כִּֽי־אַתָּ֥ה עָשִׂ֖יתָ אֶת־כָּל־אֵֽלֶּה׃ פ

1 ’ăšer hāyâ ḏəḇar-yəhwâ ’el-yirəməyâû ‘al-diḇərê habaṣṣārwōṯ:

2 ’āḇəlâ yəhûḏâ ûšə‘āreyhā ’umələlû qāḏərû lā’āreṣ wəṣiwəḥaṯ yərûšālaim ‘ālāṯâ:

3 wə’adirêhem šāləḥû ṣə‘wōrêhem ṣə‘îrêhem lammāyim bā’û ‘al-gēḇîm lō’-māṣə’û mayim šāḇû ḵəlêhem rêqām bōšû wəhāḵələmû wəḥāfû rō’šām:

4 b^a‘ăḇûr hā’ăḏāmâ ḥatâ kî lō’-hāyâ ḡešem bā’āreṣ bōšû ’ikārîm ḥāfû rō’šām:

5 kî ḡam-’ayyeleṯ baśśāḏeh yāləḏâ wə‘āzwōḇ kî lō’-hāyâ deše’:

6 ûfərā’îm ‘āməḏû ‘al-šəfāyim šā’ăfû rûḥa katannîm kālû ‘ênêhem kî-’ên ‘ēśeḇ:

7 ’im-‘ăwōnênû ‘ānû ḇānû yəhwâ ‘ăśēh ləm^a‘an šəmeḵā kî-rabû məšûḇōṯênû ləḵā ḥāṭā’nû:

8 miqəwēh yiśərā’ēl mwōšî‘wō bə‘ēṯ ṣārâ lāmmâ ṯihəyeh kəḡēr bā’āreṣ ûḵə’ōrēḥa nāṭâ lālûn:

9 lāmmâ ṯihəyeh kə’îš niḏəhām kəḡibwōr lō’-yûḵal ləhwōšî‘a wə’atâ ḇəqirəbēnû yəhwâ wəšiməḵā ‘ālênû niqərā’ ’al-tanniḥēnû: s

10 kōh-’āmar yəhwâ lā‘ām hazzeh kēn ’âăḇû lānû‘a raḡəlêhem lō’ ḥāśāḵû wayhwâ lō’ rāṣām ‘atâ yizəkōr ‘ăwōnām wəyifəqōḏ ḥaṭṭō’ṯām: s

11 wayyō’mer yəhwâ ’ēlāy ’al-tiṯəpallēl bə‘aḏ-hā‘ām hazzeh ləṭwōḇâ:

12 kî yāṣumû ’ênennî šōmē‘a ’el-rinnāṯām wəḵî y^a‘ălû ‘ōlâ ûminəḥâ ’ênennî rōṣām kî b^aḥereḇ ûḇārā‘āḇ ûḇadeḇer ’ānōḵî məḵalleh ’wōṯām: s

13 wā’ōmar ’ăhāh| ’ăḏōnāy yəhwih hinnēh hannəḇi’îm ’ōmərîm lâem lō’-ṯirə’û ḥereḇ wərā‘āḇ lō’-yihəyeh lāḵem kî-šəlwōm ’ĕmeṯ ’etēn lāḵem bammāqwōm hazzeh: s

14 wayyō’mer yəhwâ ’ēlay šeqer hannəḇi’îm nibə’îm bišəmî lō’ šəl^aḥətîm wəlō’ ṣiûîṯîm wəlō’ ḏibarətî ’ălêhem ḥăzwōn šeqer wəqesem we’ĕlûl we’ĕlîl wəṯarəmûṯ wəṯarəmîṯ libām hēmmâ miṯənabə’îm lāḵem: s

15 lāḵēn kōh-’āmar yəhwâ ‘al-hannəḇi’îm hannibə’îm bišəmî wa’ănî lō’-šəl^aḥətîm wəhēmmâ ’ōmərîm ḥereḇ wərā‘āḇ lō’ yihəyeh bā’āreṣ hazzō’ṯ b^aḥereḇ ûḇārā‘āḇ yitammû hannəḇi’îm hâēmmâ:

16 wəhā‘ām ’ăšer-hēmmâ nibə’îm lâem yihəyû mušəlāḵîm bəḥuṣwōṯ yərûšālaim mipənê| hārā‘āḇ wəh^aḥereḇ wə’ên məqabēr lâēmmâ hēmmâ nəšêhem ûḇənêhem ûḇənōṯêhem wəšāfaḵətî ‘ălêhem ’eṯ-rā‘āṯām:

17 wə’āmarətā ’ălêhem ’eṯ-hadāḇār hazzeh tēraḏənâ ‘ênay dimə‘â layəlâ wəywōmām wə’al-tiḏəmeynâ kî šeḇer gāḏwōl nišəbərâ bəṯûlaṯ baṯ-‘ammî makâ n^aḥəlâ mə’ōḏ:

18 ’im-yāṣā’ṯî haśśāḏeh wəhinnēh ḥaləlê-ḥereḇ wə’im bā’ṯî hā‘îr wəhinnēh t^aḥălû’ê rā‘āḇ kî-ḡam-nāḇî’ ḡam-kōhēn sāḥărû ’el-’ereṣ wəlō’ yāḏā‘û: s

19 hămā’ōs mā’asətā ’eṯ-yəhûḏâ ’im-bəṣîywōn gā‘ălâ nafəšeḵā madû‘a hikîṯānû wə’ên lānû marəpē’ qaûēh ləšālwōm wə’ên ṭwōḇ ûlə‘ēṯ marəpē’ wəhinnēh ḇə‘āṯâ:

20 yāḏ^a‘ənû yəhwâ rišə‘ēnû ‘ăwōn ’ăḇwōṯênû kî ḥāṭā’nû lāḵə:

21 ’al-tinə’aṣ ləm^a‘an šiməḵā ’al-tənabēl kissē’ ḵəḇwōḏeḵā zəḵōr ’al-tāfēr bərîṯəḵā ’itānû:

22 hăyēš bəhaḇəlê hagwōyim maḡəšimîm wə’im-haššāmayim yitənû rəḇiḇîm hălō’ ’atâ-hû’ yəhwâ ’ĕlōhênû ûnəqaûeh-llāḵə kî-’atâ ‘āśîṯā ’eṯ-kāl-’ēlleh: f