Jeremiah (Yermiyah) Chapter 16

‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏לֹֽא־תִקַּ֥ח לְךָ֖ אִשָּׁ֑ה וְלֹֽא־יִהְי֤וּ לְךָ֙ בָּנִ֣ים וּבָנ֔וֹת בַּמָּק֖וֹם הַזֶּֽה׃

‎3 ‏כִּי־כֹ֣ה׀ אָמַ֣ר יְהוָ֗ה עַל־הַבָּנִים֙ וְעַל־הַבָּנ֔וֹת הַיִּלּוֹדִ֖ים בַּמָּק֣וֹם הַזֶּ֑ה וְעַֽל־אִמֹּתָ֞ם הַיֹּלְד֣וֹת אוֹתָ֗ם וְעַל־אֲבוֹתָ֛ם הַמּוֹלִדִ֥ים אוֹתָ֖ם בָּאָ֥רֶץ הַזֹּֽאת׃

‎4 ‏מְמוֹתֵ֨י תַחֲלֻאִ֜ים יָמֻ֗תוּ לֹ֤א יִסָּֽפְדוּ֙ וְלֹ֣א יִקָּבֵ֔רוּ לְדֹ֛מֶן עַל־פְּנֵ֥י הָאֲדָמָ֖ה יִֽהְי֑וּ וּבַחֶ֤רֶב וּבָֽרָעָב֙ יִכְל֔וּ וְהָיְתָ֤ה נִבְלָתָם֙ לְמַאֲכָ֔ל לְע֥וֹף הַשָּׁמַ֖יִם וּלְבֶהֱמַ֥ת הָאָֽרֶץ׃ ס

‎5 ‏כִּֽי־כֹ֣ה׀ אָמַ֣ר יְהוָ֗ה אַל־תָּבוֹא֙ בֵּ֣ית מַרְזֵ֔חַ וְאַל־תֵּלֵ֣ךְ לִסְפּ֔וֹד וְאַל־תָּנֹ֖ד לָהֶ֑ם כִּֽי־אָסַ֨פְתִּי אֶת־שְׁלוֹמִ֜י מֵאֵ֨ת הָעָ֤ם־הַזֶּה֙ נְאֻם־יְהוָ֔ה אֶת־הַחֶ֖סֶד וְאֶת־הָֽרַחֲמִֽים׃

‎6 ‏וּמֵ֨תוּ גְדֹלִ֧ים וּקְטַנִּ֛ים בָּאָ֥רֶץ הַזֹּ֖את לֹ֣א יִקָּבֵ֑רוּ וְלֹֽא־יִסְפְּד֣וּ לָהֶ֔ם וְלֹ֣א יִתְגֹּדַ֔ד וְלֹ֥א יִקָּרֵ֖חַ לָהֶֽם׃

‎7 ‏וְלֹֽא־יִפְרְס֥וּ לָהֶ֛ם עַל־אֵ֖בֶל לְנַחֲמ֣וֹ עַל־מֵ֑ת וְלֹֽא־יַשְׁק֤וּ אוֹתָם֙ כּ֣וֹס תַּנְחוּמִ֔ים עַל־אָבִ֖יו וְעַל־אִמּֽוֹ׃

‎8 ‏וּבֵית־מִשְׁתֶּ֥ה לֹא־תָב֖וֹא לָשֶׁ֣בֶת אוֹתָ֑ם לֶאֱכֹ֖ל וְלִשְׁתּֽוֹת׃ ס

‎9 ‏כִּי֩ כֹ֨ה אָמַ֜ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל הִנְנִ֨י מַשְׁבִּ֜ית מִן־הַמָּק֥וֹם הַזֶּ֛ה לְעֵינֵיכֶ֖ם וּבִֽימֵיכֶ֑ם ק֤וֹל שָׂשׂוֹן֙ וְק֣וֹל שִׂמְחָ֔ה ק֥וֹל חָתָ֖ן וְק֥וֹל כַּלָּֽה׃

‎10 ‏וְהָיָ֗ה כִּ֤י תַגִּיד֙ לָעָ֣ם הַזֶּ֔ה אֵ֥ת כָּל־הַדְּבָרִ֖ים הָאֵ֑לֶּה וְאָמְר֣וּ אֵלֶ֗יךָ עַל־מֶה֩ דִבֶּ֨ר יְהוָ֤ה עָלֵ֙ינוּ֙ אֵ֣ת כָּל־הָרָעָ֤ה הַגְּדוֹלָה֙ הַזֹּ֔את וּמֶ֤ה עֲוֹנֵ֙נוּ֙ וּמֶ֣ה חַטָּאתֵ֔נוּ אֲשֶׁ֥ר חָטָ֖אנוּ לַֽיהוָ֥ה אֱלֹהֵֽינוּ׃

‎11 ‏וְאָמַרְתָּ֣ אֲלֵיהֶ֗ם עַל֩ אֲשֶׁר־עָזְב֨וּ אֲבוֹתֵיכֶ֤ם אוֹתִי֙ נְאֻם־יְהוָ֔ה וַיֵּלְכ֗וּ אַֽחֲרֵי֙ אֱלֹהִ֣ים אֲחֵרִ֔ים וַיַּעַבְד֖וּם וַיִּשְׁתַּחֲו֣וּ לָהֶ֑ם וְאֹתִ֣י עָזָ֔בוּ וְאֶת־תּוֹרָתִ֖י לֹ֥א שָׁמָֽרוּ׃

‎12 ‏וְאַתֶּ֛ם הֲרֵעֹתֶ֥ם לַעֲשׂ֖וֹת מֵאֲבֽוֹתֵיכֶ֑ם וְהִנְּכֶ֣ם הֹלְכִ֗ים אִ֚ישׁ אַֽחֲרֵי֙ שְׁרִר֣וּת לִבּֽוֹ־הָרָ֔ע לְבִלְתִּ֖י שְׁמֹ֥עַ אֵלָֽי׃

‎13 ‏וְהֵטַלְתִּ֣י אֶתְכֶ֗ם מֵעַל֙ הָאָ֣רֶץ הַזֹּ֔את עַל־הָאָ֕רֶץ אֲשֶׁר֙ לֹ֣א יְדַעְתֶּ֔ם אַתֶּ֖ם וַאֲבֽוֹתֵיכֶ֑ם וַעֲבַדְתֶּם־שָׁ֞ם אֶת־אֱלֹהִ֤ים אֲחֵרִים֙ יוֹמָ֣ם וָלַ֔יְלָה אֲשֶׁ֛ר לֹֽא־אֶתֵּ֥ן לָכֶ֖ם חֲנִינָֽה׃ ס

‎14 ‏לָכֵ֛ן הִנֵּֽה־יָמִ֥ים בָּאִ֖ים נְאֻם־יְהוָ֑ה וְלֹֽא־יֵאָמֵ֥ר עוֹד֙ חַי־יְהוָ֔ה אֲשֶׁ֧ר הֶעֱלָ֛ה אֶת־בְּנֵ֥י יִשְׂרָאֵ֖ל מֵאֶ֥רֶץ מִצְרָֽיִם׃

‎15 ‏כִּ֣י אִם־חַי־יְהוָ֗ה אֲשֶׁ֨ר הֶעֱלָ֜ה אֶת־בְּנֵ֤י יִשְׂרָאֵל֙ מֵאֶ֣רֶץ צָפ֔וֹן וּמִכֹּל֙ הָֽאֲרָצ֔וֹת אֲשֶׁ֥ר הִדִּיחָ֖ם שָׁ֑מָּה וַהֲשִֽׁבֹתִים֙ עַל־אַדְמָתָ֔ם אֲשֶׁ֥ר נָתַ֖תִּי לַאֲבוֹתָֽם׃ ס

‎16 ‏הִנְנִ֨י שֹׁלֵ֜חַ לדוגים לְדַיָּגִ֥ים רַבִּ֛ים נְאֻם־יְהוָ֖ה וְדִיג֑וּם וְאַֽחֲרֵי־כֵ֗ן אֶשְׁלַח֙ לְרַבִּ֣ים צַיָּדִ֔ים וְצָד֞וּם מֵעַ֤ל כָּל־הַר֙ וּמֵעַ֣ל כָּל־גִּבְעָ֔ה וּמִנְּקִיקֵ֖י הַסְּלָעִֽים׃

‎17 ‏כִּ֤י עֵינַי֙ עַל־כָּל־דַּרְכֵיהֶ֔ם לֹ֥א נִסְתְּר֖וּ מִלְּפָנָ֑י וְלֹֽא־נִצְפַּ֥ן עֲוֹנָ֖ם מִנֶּ֥גֶד עֵינָֽי׃

‎18 ‏וְשִׁלַּמְתִּ֣י רִֽאשׁוֹנָ֗ה מִשְׁנֵ֤ה עֲוֹנָם֙ וְחַטָּאתָ֔ם עַ֖ל חַלְּלָ֣ם אֶת־אַרְצִ֑י בְּנִבְלַ֤ת שִׁקּֽוּצֵיהֶם֙ וְתוֹעֲב֣וֹתֵיהֶ֔ם מָלְא֖וּ אֶת־נַחֲלָתִֽי׃ ס

‎19 ‏יְהוָ֞ה עֻזִּ֧י וּמָעֻזִּ֛י וּמְנוּסִ֖י בְּי֣וֹם צָרָ֑ה אֵלֶ֗יךָ גּוֹיִ֤ם יָבֹ֙אוּ֙ מֵֽאַפְסֵי־אָ֔רֶץ וְיֹאמְר֗וּ אַךְ־שֶׁ֙קֶר֙ נָחֲל֣וּ אֲבוֹתֵ֔ינוּ הֶ֖בֶל וְאֵֽין־בָּ֥ם מוֹעִֽיל׃

‎20 ‏הֲיַעֲשֶׂה־לּ֥וֹ אָדָ֖ם אֱלֹהִ֑ים וְהֵ֖מָּה לֹ֥א אֱלֹהִֽים׃

‎21 ‏לָכֵן֙ הִנְנִ֣י מֽוֹדִיעָ֔ם בַּפַּ֣עַם הַזֹּ֔את אוֹדִיעֵ֥ם אֶת־יָדִ֖י וְאֶת־גְּבֽוּרָתִ֑י וְיָדְע֖וּ כִּֽי־שְׁמִ֥י יְהוָֽה׃ ס

1 wayəhî ḏəḇar-yəhwâ ’ēlay lē’mōr:

2 lō’-ṯiqq^aḥ ləḵā ’iššâ wəlō’-yihəyû ləḵā bānîm ûḇānwōṯ bammāqwōm hazzeh:

3 kî-ḵōh| ’āmar yəhwâ ‘al-habānîm wə‘al-habānwōṯ hayyillwōḏîm bammāqwōm hazzeh wə‘al-’immōṯām hayyōləḏwōṯ ’wōṯām wə‘al-’ăḇwōṯām hammwōliḏîm ’wōṯām bā’āreṣ hazzō’ṯ:

4 məmwōṯê ṯ^aḥălu’îm yāmuṯû lō’ yissāfəḏû wəlō’ yiqqāḇērû ləḏōmen ‘al-pənê hā’ăḏāmâ yihəyû ûḇ^aḥereḇ ûḇārā‘āḇ yiḵəlû wəhāyəṯâ niḇəlāṯām ləma’ăḵāl lə‘wōf haššāmayim ûləḇehĕmaṯ hā’āreṣ: s

5 kî-ḵōh| ’āmar yəhwâ ’al-tāḇwō’ bêṯ marəzēḥa wə’al-tēlēḵə lisəpwōḏ wə’al-tānōḏ lâem kî-’āsafətî ’eṯ-šəlwōmî mē’ēṯ hā‘ām-hazzeh nə’um-yəhwâ ’eṯ-h^aḥeseḏ wə’eṯ-hār^aḥămîm:

6 ûmēṯû ḡəḏōlîm ûqəṭannîm bā’āreṣ hazzō’ṯ lō’ yiqqāḇērû wəlō’-yisəpəḏû lâem wəlō’ yiṯəgōḏaḏ wəlō’ yiqqārēḥa lâem:

7 wəlō’-yifərəsû lâem ‘al-’ēḇel lən^aḥămwō ‘al-mēṯ wəlō’-yašəqû ’wōṯām kwōs tanəḥûmîm ‘al-’āḇîw wə‘al-’immwō:

8 ûḇêṯ-mišəteh lō’-ṯāḇwō’ lāšeḇeṯ ’wōṯām le’ĕḵōl wəlišətwōṯ: s

9 kî ḵōh ’āmar yəhwâ ṣəḇā’wōṯ ’ĕlōhê yiśərā’ēl hinənî mašəbîṯ min-hammāqwōm hazzeh lə‘ênêḵem ûḇîmêḵem qwōl śāśwōn wəqwōl śiməḥâ qwōl ḥāṯān wəqwōl kallâ:

10 wəhāyâ kî ṯagîḏ lā‘ām hazzeh ’ēṯ kāl-hadəḇārîm hā’ēlleh wə’āmərû ’ēleyḵā ‘al-meh ḏiber yəhwâ ‘ālênû ’ēṯ kāl-hārā‘â hagəḏwōlâ hazzō’ṯ ûmeh ‘ăwōnēnû ûmeh ḥaṭṭā’ṯēnû ’ăšer ḥāṭā’nû layhwâ ’ĕlōhênû:

11 wə’āmarətā ’ălêhem ‘al ’ăšer-‘āzəḇû ’ăḇwōṯêḵem ’wōṯî nə’um-yəhwâ wayyēləḵû ’^aḥărê ’ĕlōhîm ’ăḥērîm wayy^a‘aḇəḏûm wayyišət^aḥăwû lâem wə’ōṯî ‘āzāḇû wə’eṯ-twōrāṯî lō’ šāmārû:

12 wə’atem hărē‘ōṯem l^a‘ăśwōṯ mē’ăḇwōṯêḵem wəhinnəḵem hōləḵîm ’îš ’^aḥărê šərirûṯ libwō-hārā‘ ləḇilətî šəmō‘a ’ēlāy:

13 wəhēṭalətî ’eṯəḵem mē‘al hā’āreṣ hazzō’ṯ ‘al-hā’āreṣ ’ăšer lō’ yəḏ^a‘ətem ’atem wa’ăḇwōṯêḵem w^a‘ăḇaḏətem-šām ’eṯ-’ĕlōhîm ’ăḥērîm ywōmām wālayəlâ ’ăšer lō’-’etēn lāḵem ḥănînâ: s

14 lāḵēn hinnēh-yāmîm bā’îm nə’um-yəhwâ wəlō’-yē’āmēr ‘wōḏ ḥay-yəhwâ ’ăšer he‘ĕlâ ’eṯ-bənê yiśərā’ēl mē’ereṣ miṣərāyim:

15 kî ’im-ḥay-yəhwâ ’ăšer he‘ĕlâ ’eṯ-bənê yiśərā’ēl mē’ereṣ ṣāfwōn ûmikōl hā’ărāṣwōṯ ’ăšer hidîḥām šāmmâ wahăšiḇōṯîm ‘al-’aḏəmāṯām ’ăšer nāṯatî la’ăḇwōṯām: s

16 hinənî šōlēḥa ləḏaûāḡîm ləḏayyāḡîm rabîm nə’um-yəhwâ wəḏîḡûm wə’^aḥărê-ḵēn ’ešəl^aḥ lərabîm ṣayyāḏîm wəṣāḏûm mē‘al kāl-har ûmē‘al kāl-giḇə‘â ûminnəqîqê hassəlā‘îm:

17 kî ‘ênay ‘al-kāl-darəḵêhem lō’ nisətərû milləfānāy wəlō’-niṣəpan ‘ăwōnām minneḡeḏ ‘ênāy:

18 wəšillamətî ri’šwōnâ mišənēh ‘ăwōnām wəḥaṭṭā’ṯām ‘al ḥalləlām ’eṯ-’arəṣî bəniḇəlaṯ šiqqûṣêhem wəṯwō‘ăḇwōṯêhem mālə’û ’eṯ-n^aḥălāṯî: s

19 yəhwâ ‘uzzî ûmā‘uzzî ûmənûsî bəywōm ṣārâ ’ēleyḵā gwōyim yāḇō’û mē’afəsê-’āreṣ wəyō’mərû ’aḵə-šeqer nāḥălû ’ăḇwōṯênû heḇel wə’ên-bām mwō‘îl:

20 hăy^a‘ăśeh-llwō ’āḏām ’ĕlōhîm wəhēmmâ lō’ ’ĕlōhîm:

21 lāḵēn hinənî mwōḏî‘ām bap^a‘am hazzō’ṯ ’wōḏî‘ēm ’eṯ-yāḏî wə’eṯ-gəḇûrāṯî wəyāḏə‘û kî-šəmî yəhwâ: s