Jeremiah (Yermiyah) Chapter 20

‎1 ‏וַיִּשְׁמַ֤ע פַּשְׁחוּר֙ בֶּן־אִמֵּ֣ר הַכֹּהֵ֔ן וְהֽוּא־פָקִ֥יד נָגִ֖יד בְּבֵ֣ית יְהוָ֑ה אֶֽת־יִרְמְיָ֔הוּ נִבָּ֖א אֶת־הַדְּבָרִ֥ים הָאֵֽלֶּה׃

‎2 ‏וַיַּכֶּ֣ה פַשְׁח֔וּר אֵ֖ת יִרְמְיָ֣הוּ הַנָּבִ֑יא וַיִּתֵּ֨ן אֹת֜וֹ עַל־הַמַּהְפֶּ֗כֶת אֲשֶׁ֨ר בְּשַׁ֤עַר בִּנְיָמִן֙ הָֽעֶלְי֔וֹן אֲשֶׁ֖ר בְּבֵ֥ית יְהוָֽה׃

‎3 ‏וַֽיְהִי֙ מִֽמָּחֳרָ֔ת וַיֹּצֵ֥א פַשְׁח֛וּר אֶֽת־יִרְמְיָ֖הוּ מִן־הַמַּהְפָּ֑כֶת וַיֹּ֨אמֶר אֵלָ֜יו יִרְמְיָ֗הוּ לֹ֤א פַשְׁחוּר֙ קָרָ֤א יְהוָה֙ שְׁמֶ֔ךָ כִּ֖י אִם־מָג֥וֹר מִסָּבִֽיב׃ פ

‎4 ‏כִּ֣י כֹ֣ה אָמַ֣ר יְהוָ֡ה הִנְנִי֩ נֹתֶנְךָ֙ לְמָג֜וֹר לְךָ֣ וּלְכָל־אֹהֲבֶ֗יךָ וְנָֽפְל֛וּ בְּחֶ֥רֶב אֹיְבֵיהֶ֖ם וְעֵינֶ֣יךָ רֹא֑וֹת וְאֶת־כָּל־יְהוּדָ֗ה אֶתֵּן֙ בְּיַ֣ד מֶֽלֶךְ־בָּבֶ֔ל וְהִגְלָ֥ם בָּבֶ֖לָה וְהִכָּ֥ם בֶּחָֽרֶב׃

‎5 ‏וְנָתַתִּ֗י אֶת־כָּל־חֹ֙סֶן֙ הָעִ֣יר הַזֹּ֔את וְאֶת־כָּל־יְגִיעָ֖הּ וְאֶת־כָּל־יְקָרָ֑הּ וְאֵ֨ת כָּל־אוֹצְר֜וֹת מַלְכֵ֣י יְהוּדָ֗ה אֶתֵּן֙ בְּיַ֣ד אֹֽיְבֵיהֶ֔ם וּבְזָזוּם֙ וּלְקָח֔וּם וֶהֱבִיא֖וּם בָּבֶֽלָה׃

‎6 ‏וְאַתָּ֣ה פַשְׁח֗וּר וְכֹל֙ יֹשְׁבֵ֣י בֵיתֶ֔ךָ תֵּלְכ֖וּ בַּשֶּׁ֑בִי וּבָבֶ֣ל תָּב֗וֹא וְשָׁ֤ם תָּמוּת֙ וְשָׁ֣ם תִּקָּבֵ֔ר אַתָּה֙ וְכָל־אֹ֣הֲבֶ֔יךָ אֲשֶׁר־נִבֵּ֥אתָ לָהֶ֖ם בַּשָּֽׁקֶר׃ ס

‎7 ‏פִּתִּיתַ֤נִי יְהוָה֙ וָֽאֶפָּ֔ת חֲזַקְתַּ֖נִי וַתּוּכָ֑ל הָיִ֤יתִי לִשְׂחוֹק֙ כָּל־הַיּ֔וֹם כֻּלֹּ֖ה לֹעֵ֥ג לִֽי׃

‎8 ‏כִּֽי־מִדֵּ֤י אֲדַבֵּר֙ אֶזְעָ֔ק חָמָ֥ס וָשֹׁ֖ד אֶקְרָ֑א כִּֽי־הָיָ֨ה דְבַר־יְהוָ֥ה לִ֛י לְחֶרְפָּ֥ה וּלְקֶ֖לֶס כָּל־הַיּֽוֹם׃

‎9 ‏וְאָמַרְתִּ֣י לֹֽא־אֶזְכְּרֶ֗נּוּ וְלֹֽא־אֲדַבֵּ֥ר עוֹד֙ בִּשְׁמ֔וֹ וְהָיָ֤ה בְלִבִּי֙ כְּאֵ֣שׁ בֹּעֶ֔רֶת עָצֻ֖ר בְּעַצְמֹתָ֑י וְנִלְאֵ֥יתִי כַּֽלְכֵ֖ל וְלֹ֥א אוּכָֽל׃

‎10 ‏כִּ֣י שָׁמַ֜עְתִּי דִּבַּ֣ת רַבִּים֮ מָג֣וֹר מִסָּבִיב֒ הַגִּ֙ידוּ֙ וְנַגִּידֶ֔נּוּ כֹּ֚ל אֱנ֣וֹשׁ שְׁלוֹמִ֔י שֹׁמְרֵ֖י צַלְעִ֑י אוּלַ֤י יְפֻתֶּה֙ וְנ֣וּכְלָה ל֔וֹ וְנִקְחָ֥ה נִקְמָתֵ֖נוּ מִמֶּֽנּוּ׃

‎11 ‏וַֽיהוָ֤ה אוֹתִי֙ כְּגִבּ֣וֹר עָרִ֔יץ עַל־כֵּ֛ן רֹדְפַ֥י יִכָּשְׁל֖וּ וְלֹ֣א יֻכָ֑לוּ בֹּ֤שׁוּ מְאֹד֙ כִּֽי־לֹ֣א הִשְׂכִּ֔ילוּ כְּלִמַּ֥ת עוֹלָ֖ם לֹ֥א תִשָּׁכֵֽחַ׃

‎12 ‏וַיהוָ֤ה צְבָאוֹת֙ בֹּחֵ֣ן צַדִּ֔יק רֹאֶ֥ה כְלָי֖וֹת וָלֵ֑ב אֶרְאֶ֤ה נִקְמָֽתְךָ֙ מֵהֶ֔ם כִּ֥י אֵלֶ֖יךָ גִּלִּ֥יתִי אֶת־רִיבִֽי׃ ס

‎13 ‏שִׁ֚ירוּ לַֽיהוָ֔ה הַֽלְל֖וּ אֶת־יְהוָ֑ה כִּ֥י הִצִּ֛יל אֶת־נֶ֥פֶשׁ אֶבְי֖וֹן מִיַּ֥ד מְרֵעִֽים׃ ס

‎14 ‏אָר֣וּר הַיּ֔וֹם אֲשֶׁ֥ר יֻלַּ֖דְתִּי בּ֑וֹ י֛וֹם אֲשֶׁר־יְלָדַ֥תְנִי אִמִּ֖י אַל־יְהִ֥י בָרֽוּךְ׃

‎15 ‏אָר֣וּר הָאִ֗ישׁ אֲשֶׁ֨ר בִּשַּׂ֤ר אֶת־אָבִי֙ לֵאמֹ֔ר יֻֽלַּד־לְךָ֖ בֵּ֣ן זָכָ֑ר שַׂמֵּ֖חַ שִׂמֳּחָֽהוּ׃

‎16 ‏וְהָיָה֙ הָאִ֣ישׁ הַה֔וּא כֶּֽעָרִ֛ים אֲשֶׁר־הָפַ֥ךְ יְהוָ֖ה וְלֹ֣א נִחָ֑ם וְשָׁמַ֤ע זְעָקָה֙ בַּבֹּ֔קֶר וּתְרוּעָ֖ה בְּעֵ֥ת צָהֳרָֽיִם׃

‎17 ‏אֲשֶׁ֥ר לֹא־מוֹתְתַ֖נִי מֵרָ֑חֶם וַתְּהִי־לִ֤י אִמִּי֙ קִבְרִ֔י וְרַחְמָ֖הֿ הֲרַ֥ת עוֹלָֽם׃

‎18 ‏לָ֤מָּה זֶּה֙ מֵרֶ֣חֶם יָצָ֔אתִי לִרְא֥וֹת עָמָ֖ל וְיָג֑וֹן וַיִּכְל֥וּ בְּבֹ֖שֶׁת יָמָֽי׃ פ

1 wayyišəm^a‘ pašəḥûr ben-’immēr hakōhēn wəhû’-fāqîḏ nāḡîḏ bəḇêṯ yəhwâ ’eṯ-yirəməyâû nibā’ ’eṯ-hadəḇārîm hā’ēlleh:

2 wayyakeh fašəḥûr ’ēṯ yirəməyâû hannāḇî’ wayyitēn ’ōṯwō ‘al-hammahəpeḵeṯ ’ăšer bəš^a‘ar binəyāmin hā‘eləywōn ’ăšer bəḇêṯ yəhwâ:

3 wayəhî mimmāḥŏrāṯ wayyōṣē’ fašəḥûr ’eṯ-yirəməyâû min-hammahəpāḵeṯ wayyō’mer ’ēlāyw yirəməyâû lō’ fašəḥûr qārā’ yəhwâ šəmeḵā kî ’im-māḡwōr missāḇîḇ: f

4 kî ḵōh ’āmar yəhwâ hinənî nōṯenəḵā ləmāḡwōr ləḵā ûləḵāl-’ōhăḇeyḵā wənāfəlû bəḥereḇ ’ōyəḇêhem wə‘êneyḵā rō’wōṯ wə’eṯ-kāl-yəhûḏâ ’etēn bəyaḏ meleḵə-bāḇel wəhiḡəlām bāḇelâ wəhikām beḥāreḇ:

5 wənāṯatî ’eṯ-kāl-ḥōsen hā‘îr hazzō’ṯ wə’eṯ-kāl-yəḡî‘āh wə’eṯ-kāl-yəqārāh wə’ēṯ kāl-’wōṣərwōṯ maləḵê yəhûḏâ ’etēn bəyaḏ ’ōyəḇêhem ûḇəzāzûm ûləqāḥûm wehĕḇî’ûm bāḇelâ:

6 wə’atâ fašəḥûr wəḵōl yōšəḇê ḇêṯeḵā tēləḵû baššeḇî ûḇāḇel tāḇwō’ wəšām tāmûṯ wəšām tiqqāḇēr ’atâ wəḵāl-’ōhăḇeyḵā ’ăšer-nibē’ṯā lâem baššāqer: s

7 pitîṯanî yəhwâ wā’epāṯ ḥăzaqətanî watûḵāl hāyîṯî liśəḥwōq kāl-hayywōm kullōh lō‘ēḡ lî:

8 kî-midê ’ăḏabēr ’ezə‘āq ḥāmās wāšōḏ ’eqərā’ kî-hāyâ ḏəḇar-yəhwâ lî ləḥerəpâ ûləqeles kāl-hayywōm:

9 wə’āmarətî lō’-’ezəkərennû wəlō’-’ăḏabēr ‘wōḏ bišəmwō wəhāyâ ḇəlibî kə’ēš bō‘ereṯ ‘āṣur bə‘aṣəmōṯāy wənilə’êṯî kaləḵēl wəlō’ ’ûḵāl:

10 kî šām^a‘ətî dibaṯ rabîm māḡwōr missāḇîḇ hagîḏû wənagîḏennû kōl ’ĕnwōš šəlwōmî šōmərê ṣalə‘î ’ûlay yəfuteh wənûḵəlâ lwō wəniqəḥâ niqəmāṯēnû mimmennû:

11 wayhwâ ’wōṯî kəḡibwōr ‘ārîṣ ‘al-kēn rōḏəfay yikāšəlû wəlō’ yuḵālû bōšû mə’ōḏ kî-lō’ hiśəkîlû kəlimmaṯ ‘wōlām lō’ ṯiššāḵēḥa:

12 wayhwâ ṣəḇā’wōṯ bōḥēn ṣadîq rō’eh ḵəlāywōṯ wālēḇ ’erə’eh niqəmāṯəḵā mēhem kî ’ēleyḵā gillîṯî ’eṯ-rîḇî: s

13 šîrû layhwâ haləlû ’eṯ-yəhwâ kî hiṣṣîl ’eṯ-nefeš ’eḇəywōn mîyaḏ mərē‘îm: s

14 ’ārûr hayywōm ’ăšer yullaḏətî bwō ywōm ’ăšer-yəlāḏaṯənî ’immî ’al-yəhî ḇārûḵə:

15 ’ārûr hā’îš ’ăšer biśśar ’eṯ-’āḇî lē’mōr yullaḏ-ləḵā bēn zāḵār śammēḥa śimmŏḥâû:

16 wəhāyâ hā’îš hahû’ ke‘ārîm ’ăšer-hāfaḵə yəhwâ wəlō’ niḥām wəšām^a‘ zə‘āqâ babōqer ûṯərû‘â bə‘ēṯ ṣâŏrāyim:

17 ’ăšer lō’-mwōṯəṯanî mērāḥem watəhî-lî ’immî qiḇərî wər^aḥəmâ hăraṯ ‘wōlām:

18 lāmmâ zzeh mēreḥem yāṣā’ṯî lirə’wōṯ ‘āmāl wəyāḡwōn wayyiḵəlû bəḇōšeṯ yāmāy: f