Jeremiah (Yermiyah) Chapter 25

‎1 ‏הַדָּבָ֞ר אֲשֶׁר־הָיָ֤ה עַֽל־יִרְמְיָ֙הוּ֙ עַל־כָּל־עַ֣ם יְהוּדָ֔ה בַּשָּׁנָה֙ הָֽרְבִעִ֔ית לִיהוֹיָקִ֥ים בֶּן־יֹאשִׁיָּ֖הוּ מֶ֣לֶךְ יְהוּדָ֑ה הִ֗יא הַשָּׁנָה֙ הָרִ֣אשֹׁנִ֔ית לִנְבֽוּכַדְרֶאצַּ֖ר מֶ֥לֶךְ בָּבֶֽל׃

‎2 ‏אֲשֶׁ֨ר דִּבֶּ֜ר יִרְמְיָ֤הוּ הַנָּבִיא֙ עַל־כָּל־עַ֣ם יְהוּדָ֔ה וְאֶ֛ל כָּל־יֹשְׁבֵ֥י יְרוּשָׁלִַ֖ם לֵאמֹֽר׃

‎3 ‏מִן־שְׁלֹ֣שׁ עֶשְׂרֵ֣ה שָׁנָ֡ה לְיֹאשִׁיָּ֣הוּ בֶן־אָמוֹן֩ מֶ֨לֶךְ יְהוּדָ֜ה וְעַ֣ד׀ הַיּ֣וֹם הַזֶּ֗ה זֶ֚ה שָׁלֹ֤שׁ וְעֶשְׂרִים֙ שָׁנָ֔ה הָיָ֥ה דְבַר־יְהוָ֖ה אֵלָ֑י וָאֲדַבֵּ֧ר אֲלֵיכֶ֛ם אַשְׁכֵּ֥ים וְדַבֵּ֖ר וְלֹ֥א שְׁמַעְתֶּֽם׃

‎4 ‏וְשָׁלַח֩ יְהוָ֨ה אֲלֵיכֶ֜ם אֶֽת־כָּל־עֲבָדָ֧יו הַנְּבִאִ֛ים הַשְׁכֵּ֥ם וְשָׁלֹ֖חַ וְלֹ֣א שְׁמַעְתֶּ֑ם וְלֹֽא־הִטִּיתֶ֥ם אֶֽת־אָזְנְכֶ֖ם לִשְׁמֹֽעַ׃

‎5 ‏לֵאמֹ֗ר שֽׁוּבוּ־נָ֞א אִ֣ישׁ מִדַּרְכּ֤וֹ הָֽרָעָה֙ וּמֵרֹ֣עַ מַעַלְלֵיכֶ֔ם וּשְׁבוּ֙ עַל־הָ֣אֲדָמָ֔ה אֲשֶׁ֨ר נָתַ֧ן יְהוָ֛ה לָכֶ֖ם וְלַאֲבֽוֹתֵיכֶ֑ם לְמִן־עוֹלָ֖ם וְעַד־עוֹלָֽם׃

‎6 ‏וְאַל־תֵּלְכ֗וּ אַֽחֲרֵי֙ אֱלֹהִ֣ים אֲחֵרִ֔ים לְעָבְדָ֖ם וּלְהִשְׁתַּחֲוֹ֣ת לָהֶ֑ם וְלֹֽא־תַכְעִ֤יסוּ אוֹתִי֙ בְּמַעֲשֵׂ֣ה יְדֵיכֶ֔ם וְלֹ֥א אָרַ֖ע לָכֶֽם׃

‎7 ‏וְלֹֽא־שְׁמַעְתֶּ֥ם אֵלַ֖י נְאֻם־יְהוָ֑ה לְמַ֧עַן הכעסוני הַכְעִיסֵ֛נִי בְּמַעֲשֵׂ֥ה יְדֵיכֶ֖ם לְרַ֥ע לָכֶֽם׃ ס

‎8 ‏לָכֵ֕ן כֹּ֥ה אָמַ֖ר יְהוָ֣ה צְבָא֑וֹת יַ֕עַן אֲשֶׁ֥ר לֹֽא־שְׁמַעְתֶּ֖ם אֶת־דְּבָרָֽי׃

‎9 ‏הִנְנִ֣י שֹׁלֵ֡חַ וְלָקַחְתִּי֩ אֶת־כָּל־מִשְׁפְּח֨וֹת צָפ֜וֹן נְאֻם־יְהוָ֗ה וְאֶל־נְבֽוּכַדְרֶאצַּ֣ר מֶֽלֶךְ־בָּבֶל֮ עַבְדִּי֒ וַהֲבִ֨אֹתִ֜ים עַל־הָאָ֤רֶץ הַזֹּאת֙ וְעַל־יֹ֣שְׁבֶ֔יהָ וְעַ֛ל כָּל־הַגּוֹיִ֥ם הָאֵ֖לֶּה סָבִ֑יב וְהַ֣חֲרַמְתִּ֔ים וְשַׂמְתִּים֙ לְשַׁמָּ֣ה וְלִשְׁרֵקָ֔ה וּלְחָרְב֖וֹת עוֹלָֽם׃

‎10 ‏וְהַאֲבַדְתִּ֣י מֵהֶ֗ם ק֤וֹל שָׂשׂוֹן֙ וְק֣וֹל שִׂמְחָ֔ה ק֥וֹל חָתָ֖ן וְק֣וֹל כַּלָּ֑ה ק֥וֹל רֵחַ֖יִם וְא֥וֹר נֵֽר׃

‎11 ‏וְהָֽיְתָה֙ כָּל־הָאָ֣רֶץ הַזֹּ֔את לְחָרְבָּ֖ה לְשַׁמָּ֑ה וְעָ֨בְד֜וּ הַגּוֹיִ֥ם הָאֵ֛לֶּה אֶת־מֶ֥לֶךְ בָּבֶ֖ל שִׁבְעִ֥ים שָׁנָֽה׃

‎12 ‏וְהָיָ֣ה כִמְלֹ֣אות שִׁבְעִ֣ים שָׁנָ֡ה אֶפְקֹ֣ד עַל־מֶֽלֶךְ־בָּבֶל֩ וְעַל־הַגּ֨וֹי הַה֧וּא נְאֻם־יְהוָ֛ה אֶת־עֲוֹנָ֖ם וְעַל־אֶ֣רֶץ כַּשְׂדִּ֑ים וְשַׂמְתִּ֥י אֹת֖וֹ לְשִֽׁמְמ֥וֹת עוֹלָֽם׃

‎13 ‏והבאיתי וְהֵֽבֵאתִי֙ עַל־הָאָ֣רֶץ הַהִ֔יא אֶת־כָּל־דְּבָרַ֖י אֲשֶׁר־דִּבַּ֣רְתִּי עָלֶ֑יהָ אֵ֤ת כָּל־הַכָּתוּב֙ בַּסֵּ֣פֶר הַזֶּ֔ה אֲשֶׁר־נִבָּ֥א יִרְמְיָ֖הוּ עַל־כָּל־הַגּוֹיִֽם׃

‎14 ‏כִּ֣י עָֽבְדוּ־בָ֤ם גַּם־הֵ֙מָּה֙ גּוֹיִ֣ם רַבִּ֔ים וּמְלָכִ֖ים גְּדוֹלִ֑ים וְשִׁלַּמְתִּ֥י לָהֶ֛ם כְּפָעֳלָ֖ם וּכְמַעֲשֵׂ֥ה יְדֵיהֶֽם׃ ס

‎15 ‏כִּ֣י כֹה֩ אָמַ֨ר יְהוָ֜ה אֱלֹהֵ֤י יִשְׂרָאֵל֙ אֵלַ֔י קַ֠ח אֶת־כּ֨וֹס הַיַּ֧יִן הַחֵמָ֛ה הַזֹּ֖את מִיָּדִ֑י וְהִשְׁקִיתָ֤ה אֹתוֹ֙ אֶת־כָּל־הַגּוֹיִ֔ם אֲשֶׁ֧ר אָנֹכִ֛י שֹׁלֵ֥חַ אוֹתְךָ֖ אֲלֵיהֶֽם׃

‎16 ‏וְשָׁת֕וּ וְהִֽתְגֹּֽעֲשׁ֖וּ וְהִתְהֹלָ֑לוּ מִפְּנֵ֣י הַחֶ֔רֶב אֲשֶׁ֛ר אָנֹכִ֥י שֹׁלֵ֖חַ בֵּינֹתָֽם׃

‎17 ‏וָאֶקַּ֥ח אֶת־הַכּ֖וֹס מִיַּ֣ד יְהוָ֑ה וָֽאַשְׁקֶה֙ אֶת־כָּל־הַגּוֹיִ֔ם אֲשֶׁר־שְׁלָחַ֥נִי יְהוָ֖ה אֲלֵיהֶֽם׃

‎18 ‏אֶת־יְרוּשָׁלִַ֙ם֙ וְאֶת־עָרֵ֣י יְהוּדָ֔ה וְאֶת־מְלָכֶ֖יהָ אֶת־שָׂרֶ֑יהָ לָתֵ֨ת אֹתָ֜ם לְחָרְבָּ֧ה לְשַׁמָּ֛ה לִשְׁרֵקָ֥ה וְלִקְלָלָ֖ה כַּיּ֥וֹם הַזֶּֽה׃

‎19 ‏אֶת־פַּרְעֹ֧ה מֶֽלֶךְ־מִצְרַ֛יִם וְאֶת־עֲבָדָ֥יו וְאֶת־שָׂרָ֖יו וְאֶת־כָּל־עַמּֽוֹ׃

‎20 ‏וְאֵת֙ כָּל־הָעֶ֔רֶב וְאֵ֕ת כָּל־מַלְכֵ֖י אֶ֣רֶץ הָע֑וּץ וְאֵ֗ת כָּל־מַלְכֵי֙ אֶ֣רֶץ פְּלִשְׁתִּ֔ים וְאֶת־אַשְׁקְל֤וֹן וְאֶת־עַזָּה֙ וְאֶת־עֶקְר֔וֹן וְאֵ֖ת שְׁאֵרִ֥ית אַשְׁדּֽוֹד׃

‎21 ‏אֶת־אֱד֥וֹם וְאֶת־מוֹאָ֖ב וְאֶת־בְּנֵ֥י עַמּֽוֹן׃

‎22 ‏וְאֵת֙ כָּל־מַלְכֵי־צֹ֔ר וְאֵ֖ת כָּל־מַלְכֵ֣י צִיד֑וֹן וְאֵת֙ מַלְכֵ֣י הָאִ֔י אֲשֶׁ֖ר בְּעֵ֥בֶר הַיָּֽם׃

‎23 ‏וְאֶת־דְּדָ֤ן וְאֶת־תֵּימָא֙ וְאֶת־בּ֔וּז וְאֵ֖ת כָּל־קְצוּצֵ֥י פֵאָֽה׃

‎24 ‏וְאֵ֖ת כָּל־מַלְכֵ֣י עֲרָ֑ב וְאֵת֙ כָּל־מַלְכֵ֣י הָעֶ֔רֶב הַשֹּׁכְנִ֖ים בַּמִּדְבָּֽר׃

‎25 ‏וְאֵ֣ת׀ כָּל־מַלְכֵ֣י זִמְרִ֗י וְאֵת֙ כָּל־מַלְכֵ֣י עֵילָ֔ם וְאֵ֖ת כָּל־מַלְכֵ֥י מָדָֽי׃

‎26 ‏וְאֵ֣ת׀ כָּל־מַלְכֵ֣י הַצָּפ֗וֹן הַקְּרֹבִ֤ים וְהָֽרְחֹקִים֙ אִ֣ישׁ אֶל־אָחִ֔יו וְאֵת֙ כָּל־הַמַּמְלְכ֣וֹת הָאָ֔רֶץ אֲשֶׁ֖ר עַל־פְּנֵ֣י הָאֲדָמָ֑ה וּמֶ֥לֶךְ שֵׁשַׁ֖ךְ יִשְׁתֶּ֥ה אַחֲרֵיהֶֽם׃

‎27 ‏וְאָמַרְתָּ֣ אֲלֵיהֶ֡ם סכֹּֽה־אָמַר֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל שְׁת֤וּ וְשִׁכְרוּ֙ וּקְי֔וּ וְנִפְל֖וּ וְלֹ֣א תָק֑וּמוּ מִפְּנֵ֣י הַחֶ֔רֶב אֲשֶׁ֛ר אָנֹכִ֥י שֹׁלֵ֖חַ בֵּינֵיכֶֽם׃

‎28 ‏וְהָיָ֗ה כִּ֧י יְמָאֲנ֛וּ לָקַֽחַת־הַכּ֥וֹס מִיָּדְךָ֖ לִשְׁתּ֑וֹת וְאָמַרְתָּ֣ אֲלֵיהֶ֗ם כֹּ֥ה אָמַ֛ר יְהוָ֥ה צְבָא֖וֹת שָׁת֥וֹ תִשְׁתּֽוּ׃

‎29 ‏כִּי֩ הִנֵּ֨ה בָעִ֜יר אֲשֶׁ֧ר נִֽקְרָא־שְׁמִ֣י עָלֶ֗יהָ אָֽנֹכִי֙ מֵחֵ֣ל לְהָרַ֔ע וְאַתֶּ֖ם הִנָּקֵ֣ה תִנָּק֑וּ לֹ֣א תִנָּק֔וּ כִּ֣י חֶ֗רֶב אֲנִ֤י קֹרֵא֙ עַל־כָּל־יֹשְׁבֵ֣י הָאָ֔רֶץ נְאֻ֖ם יְהוָ֥ה צְבָאֽוֹת׃

‎30 ‏וְאַתָּה֙ תִּנָּבֵ֣א אֲלֵיהֶ֔ם אֵ֥ת כָּל־הַדְּבָרִ֖ים הָאֵ֑לֶּה וְאָמַרְתָּ֣ אֲלֵיהֶ֗ם יְהוָ֞ה מִמָּר֤וֹם יִשְׁאָג֙ וּמִמְּע֤וֹן קָדְשׁוֹ֙ יִתֵּ֣ן קוֹל֔וֹ שָׁאֹ֤ג יִשְׁאַג֙ עַל־נָוֵ֔הוּ הֵידָד֙ כְּדֹרְכִ֣ים יַֽעֲנֶ֔ה אֶ֥ל כָּל־יֹשְׁבֵ֖י הָאָֽרֶץ׃

‎31 ‏בָּ֤א שָׁאוֹן֙ עַד־קְצֵ֣ה הָאָ֔רֶץ כִּ֣י רִ֤יב לַֽיהוָה֙ בַּגּוֹיִ֔ם נִשְׁפָּ֥ט ה֖וּא לְכָל־בָּשָׂ֑ר הָרְשָׁעִ֛ים נְתָנָ֥ם לַחֶ֖רֶב נְאֻם־יְהוָֽה׃ ס

‎32 ‏כֹּ֤ה אָמַר֙ יְהוָ֣ה צְבָא֔וֹת הִנֵּ֥ה רָעָ֛ה יֹצֵ֖את מִגּ֣וֹי אֶל־גּ֑וֹי וְסַ֣עַר גָּד֔וֹל יֵע֖וֹר מִיַּרְכְּתֵי־אָֽרֶץ׃

‎33 ‏וְהָי֞וּ חַֽלְלֵ֤י יְהוָה֙ בַּיּ֣וֹם הַה֔וּא מִקְצֵ֥ה הָאָ֖רֶץ וְעַד־קְצֵ֣ה הָאָ֑רֶץ לֹ֣א יִסָּפְד֗וּ וְלֹ֤א יֵאָֽסְפוּ֙ וְלֹ֣א יִקָּבֵ֔רוּ לְדֹ֛מֶן עַל־פְּנֵ֥י הָאֲדָמָ֖ה יִֽהְיֽוּ׃

‎34 ‏הֵילִ֨ילוּ הָרֹעִ֜ים וְזַעֲק֗וּ וְהִֽתְפַּלְּשׁוּ֙ אַדִּירֵ֣י הַצֹּ֔אן כִּֽי־מָלְא֥וּ יְמֵיכֶ֖ם לִטְב֑וֹחַ וּתְפוֹצ֣וֹתִיכֶ֔ם וּנְפַלְתֶּ֖ם כִּכְלִ֥י חֶמְדָּֽה׃

‎35 ‏וְאָבַ֥ד מָנ֖וֹס מִן־הָֽרֹעִ֑ים וּפְלֵיטָ֖ה מֵאַדִּירֵ֥י הַצֹּֽאן׃

‎36 ‏ק֚וֹל צַעֲקַ֣ת הָֽרֹעִ֔ים וִֽילְלַ֖ת אַדִּירֵ֣י הַצֹּ֑אן כִּֽי־שֹׁדֵ֥ד יְהוָ֖ה אֶת־מַרְעִיתָֽם׃

‎37 ‏וְנָדַ֖מּוּ נְא֣וֹת הַשָּׁל֑וֹם מִפְּנֵ֖י חֲר֥וֹן אַף־יְהוָֽה׃

‎38 ‏עָזַ֥ב כַּכְּפִ֖יר סֻכּ֑וֹ כִּֽי־הָיְתָ֤ה אַרְצָם֙ לְשַׁמָּ֔ה מִפְּנֵי֙ חֲר֣וֹן הַיּוֹנָ֔ה וּמִפְּנֵ֖י חֲר֥וֹן אַפּֽוֹ׃ פ

1 hadāḇār ’ăšer-hāyâ ‘al-yirəməyâû ‘al-kāl-‘am yəhûḏâ baššānâ hārəḇi‘îṯ lîhwōyāqîm ben-yō’šîyâû meleḵə yəhûḏâ hî’ haššānâ hāri’šōnîṯ linəḇûḵaḏəre’ṣṣar meleḵə bāḇel:

2 ’ăšer diber yirəməyâû hannāḇî’ ‘al-kāl-‘am yəhûḏâ wə’el kāl-yōšəḇê yərûšālaim lē’mōr:

3 min-šəlōš ‘eśərēh šānâ ləyō’šîyâû ḇen-’āmwōn meleḵə yəhûḏâ wə‘aḏ| hayywōm hazzeh zeh šālōš wə‘eśərîm šānâ hāyâ ḏəḇar-yəhwâ ’ēlāy wā’ăḏabēr ’ălêḵem ’ašəkêm wəḏabēr wəlō’ šəm^a‘ətem:

4 wəšāl^aḥ yəhwâ ’ălêḵem ’eṯ-kāl-‘ăḇāḏāyw hannəḇi’îm hašəkēm wəšālōḥa wəlō’ šəm^a‘ətem wəlō’-hiṭṭîṯem ’eṯ-’āzənəḵem lišəmō‘a:

5 lē’mōr šûḇû-nā’ ’îš midarəkwō hārā‘â ûmērō‘a m^a‘aləlêḵem ûšəḇû ‘al-hā’ăḏāmâ ’ăšer nāṯan yəhwâ lāḵem wəla’ăḇwōṯêḵem ləmin-‘wōlām wə‘aḏ-‘wōlām:

6 wə’al-tēləḵû ’^aḥărê ’ĕlōhîm ’ăḥērîm lə‘āḇəḏām ûləhišət^aḥăwōṯ lâem wəlō’-ṯaḵə‘îsû ’wōṯî bəm^a‘ăśēh yəḏêḵem wəlō’ ’ār^a‘ lāḵem:

7 wəlō’-šəm^a‘ətem ’ēlay nə’um-yəhwâ ləm^a‘an hiḵə‘isûnî haḵə‘îsēnî bəm^a‘ăśēh yəḏêḵem lər^a‘ lāḵem: s

8 lāḵēn kōh ’āmar yəhwâ ṣəḇā’wōṯ y^a‘an ’ăšer lō’-šəm^a‘ətem ’eṯ-dəḇārāy:

9 hinənî šōlēḥa wəlāq^aḥətî ’eṯ-kāl-mišəpəḥwōṯ ṣāfwōn nə’um-yəhwâ wə’el-nəḇûḵaḏəre’ṣṣar meleḵə-bāḇel ‘aḇədî wahăḇi’ōṯîm ‘al-hā’āreṣ hazzō’ṯ wə‘al-yōšəḇeyhā wə‘al kāl-hagwōyim hā’ēlleh sāḇîḇ wəh^aḥăramətîm wəśamətîm ləšammâ wəlišərēqâ ûləḥārəḇwōṯ ‘wōlām:

10 wəha’ăḇaḏətî mēhem qwōl śāśwōn wəqwōl śiməḥâ qwōl ḥāṯān wəqwōl kallâ qwōl rēḥayim wə’wōr nēr:

11 wəhāyəṯâ kāl-hā’āreṣ hazzō’ṯ ləḥārəbâ ləšammâ wə‘āḇəḏû hagwōyim hā’ēlleh ’eṯ-meleḵə bāḇel šiḇə‘îm šānâ:

12 wəhāyâ ḵiməlō’wṯ šiḇə‘îm šānâ ’efəqōḏ ‘al-meleḵə-bāḇel wə‘al-hagwōy hahû’ nə’um-yəhwâ ’eṯ-‘ăwōnām wə‘al-’ereṣ kaśədîm wəśamətî ’ōṯwō ləšiməmwōṯ ‘wōlām:

13 wəhēḇē’yṯî wəhēḇē’ṯî ‘al-hā’āreṣ hahî’ ’eṯ-kāl-dəḇāray ’ăšer-dibarətî ‘āleyhā ’ēṯ kāl-hakāṯûḇ bassēfer hazzeh ’ăšer-nibā’ yirəməyâû ‘al-kāl-hagwōyim:

14 kî ‘āḇəḏû-ḇām gam-hēmmâ gwōyim rabîm ûməlāḵîm gəḏwōlîm wəšillamətî lâem kəfā‘ŏlām ûḵəm^a‘ăśēh yəḏêhem: s

15 kî ḵōh ’āmar yəhwâ ’ĕlōhê yiśərā’ēl ’ēlay q^aḥ ’eṯ-kwōs hayyayin h^aḥēmâ hazzō’ṯ mîyāḏî wəhišəqîṯâ ’ōṯwō ’eṯ-kāl-hagwōyim ’ăšer ’ānōḵî šōlēḥa ’wōṯəḵā ’ălêhem:

16 wəšāṯû wəhiṯəgō‘ăšû wəhiṯəhōlālû mipənê h^aḥereḇ ’ăšer ’ānōḵî šōlēḥa bênōṯām:

17 wā’eqq^aḥ ’eṯ-hakwōs mîyaḏ yəhwâ wā’ašəqeh ’eṯ-kāl-hagwōyim ’ăšer-šəlāḥanî yəhwâ ’ălêhem:

18 ’eṯ-yərûšālaim wə’eṯ-‘ārê yəhûḏâ wə’eṯ-məlāḵeyhā ’eṯ-śāreyhā lāṯēṯ ’ōṯām ləḥārəbâ ləšammâ lišərēqâ wəliqəlālâ kayywōm hazzeh:

19 ’eṯ-parə‘ōh meleḵə-miṣərayim wə’eṯ-‘ăḇāḏāyw wə’eṯ-śārāyw wə’eṯ-kāl-‘ammwō:

20 wə’ēṯ kāl-hā‘ereḇ wə’ēṯ kāl-maləḵê ’ereṣ hā‘ûṣ wə’ēṯ kāl-maləḵê ’ereṣ pəlišətîm wə’eṯ-’ašəqəlwōn wə’eṯ-‘azzâ wə’eṯ-‘eqərwōn wə’ēṯ šə’ērîṯ ’ašədwōḏ:

21 ’eṯ-’ĕḏwōm wə’eṯ-mwō’āḇ wə’eṯ-bənê ‘ammwōn:

22 wə’ēṯ kāl-maləḵê-ṣōr wə’ēṯ kāl-maləḵê ṣîḏwōn wə’ēṯ maləḵê hā’î ’ăšer bə‘ēḇer hayyām:

23 wə’eṯ-dəḏān wə’eṯ-têmā’ wə’eṯ-bûz wə’ēṯ kāl-qəṣûṣê fē’â:

24 wə’ēṯ kāl-maləḵê ‘ărāḇ wə’ēṯ kāl-maləḵê hā‘ereḇ haššōḵənîm bammiḏəbār:

25 wə’ēṯ| kāl-maləḵê zimərî wə’ēṯ kāl-maləḵê ‘êlām wə’ēṯ kāl-maləḵê māḏāy:

26 wə’ēṯ| kāl-maləḵê haṣṣāfwōn haqqərōḇîm wəhārəḥōqîm ’îš ’el-’āḥîw wə’ēṯ kāl-hammamələḵwōṯ hā’āreṣ ’ăšer ‘al-pənê hā’ăḏāmâ ûmeleḵə šēšaḵə yišəteh ’^aḥărêhem:

27 wə’āmarətā ’ălêhem skōh-’āmar yəhwâ ṣəḇā’wōṯ ’ĕlōhê yiśərā’ēl šəṯû wəšiḵərû ûqəyû wənifəlû wəlō’ ṯāqûmû mipənê h^aḥereḇ ’ăšer ’ānōḵî šōlēḥa bênêḵem:

28 wəhāyâ kî yəmā’ănû lāq^aḥaṯ-hakwōs mîyāḏəḵā lišətwōṯ wə’āmarətā ’ălêhem kōh ’āmar yəhwâ ṣəḇā’wōṯ šāṯwō ṯišətû:

29 kî hinnēh ḇā‘îr ’ăšer niqərā’-šəmî ‘āleyhā ’ānōḵî mēḥēl ləhār^a‘ wə’atem hinnāqēh ṯinnāqû lō’ ṯinnāqû kî ḥereḇ ’ănî qōrē’ ‘al-kāl-yōšəḇê hā’āreṣ nə’um yəhwâ ṣəḇā’wōṯ:

30 wə’atâ tinnāḇē’ ’ălêhem ’ēṯ kāl-hadəḇārîm hā’ēlleh wə’āmarətā ’ălêhem yəhwâ mimmārwōm yišə’āḡ ûmimmə‘wōn qāḏəšwō yitēn qwōlwō šā’ōḡ yišə’aḡ ‘al-nāwēhû hêḏāḏ kəḏōrəḵîm y^a‘ăneh ’el kāl-yōšəḇê hā’āreṣ:

31 bā’ šā’wōn ‘aḏ-qəṣēh hā’āreṣ kî rîḇ layhwâ bagwōyim nišəpāṭ hû’ ləḵāl-bāśār hārəšā‘îm nəṯānām l^aḥereḇ nə’um-yəhwâ: s

32 kōh ’āmar yəhwâ ṣəḇā’wōṯ hinnēh rā‘â yōṣē’ṯ migwōy ’el-gwōy wəs^a‘ar gāḏwōl yē‘wōr mîyarəkəṯê-’āreṣ:

33 wəhāyû ḥaləlê yəhwâ bayywōm hahû’ miqəṣēh hā’āreṣ wə‘aḏ-qəṣēh hā’āreṣ lō’ yissāfəḏû wəlō’ yē’āsəfû wəlō’ yiqqāḇērû ləḏōmen ‘al-pənê hā’ăḏāmâ yihəyû:

34 hêlîlû hārō‘îm wəz^a‘ăqû wəhiṯəpalləšû ’adîrê haṣṣō’n kî-mālə’û yəmêḵem liṭəḇwōḥa ûṯəfwōṣwōṯîḵem ûnəfalətem kiḵəlî ḥemədâ:

35 wə’āḇaḏ mānwōs min-hārō‘îm ûfəlêṭâ mē’adîrê haṣṣō’n:

36 qwōl ṣ^a‘ăqaṯ hārō‘îm wîləlaṯ ’adîrê haṣṣō’n kî-šōḏēḏ yəhwâ ’eṯ-marə‘îṯām:

37 wənāḏammû nə’wōṯ haššālwōm mipənê ḥărwōn ’af-yəhwâ:

38 ‘āzaḇ kakəfîr sukwō kî-hāyəṯâ ’arəṣām ləšammâ mipənê ḥărwōn hayywōnâ ûmipənê ḥărwōn ’apwō: f