Jeremiah (Yermiyah) Chapter 37

‎1 ‏וַיִּ֨מְלָךְ־מֶ֔לֶךְ צִדְקִיָּ֖הוּ בֶּן־יֹֽאשִׁיָּ֑הוּ תַּ֗חַת כָּנְיָ֙הוּ֙ בֶּן־יְה֣וֹיָקִ֔ים אֲשֶׁ֥ר הִמְלִ֛יךְ נְבוּכַדְרֶאצַּ֥ר מֶֽלֶךְ־בָּבֶ֖ל בְּאֶ֥רֶץ יְהוּדָֽה׃

‎2 ‏וְלֹ֥א שָׁמַ֛ע ה֥וּא וַעֲבָדָ֖יו וְעַ֣ם הָאָ֑רֶץ אֶל־דִּבְרֵ֣י יְהוָ֔ה אֲשֶׁ֣ר דִּבֶּ֔ר בְּיַ֖ד יִרְמְיָ֥הוּ הַנָּבִֽיא׃

‎3 ‏וַיִּשְׁלַח֩ הַמֶּ֨לֶךְ צִדְקִיָּ֜הוּ אֶת־יְהוּכַ֣ל בֶּן־שֶֽׁלֶמְיָ֗ה וְאֶת־צְפַנְיָ֤הוּ בֶן־מַֽעֲשֵׂיָה֙ הַכֹּהֵ֔ן אֶל־יִרְמְיָ֥הוּ הַנָּבִ֖יא לֵאמֹ֑ר הִתְפַּלֶּל־נָ֣א בַעֲדֵ֔נוּ אֶל־יְהוָ֖ה אֱלֹהֵֽינוּ׃

‎4 ‏וְיִרְמְיָ֕הוּ בָּ֥א וְיֹצֵ֖א בְּת֣וֹךְ הָעָ֑ם וְלֹֽא־נָתְנ֥וּ אֹת֖וֹ בֵּ֥ית הכליא הַכְּלֽוּא׃

‎5 ‏וְחֵ֥יל פַּרְעֹ֖ה יָצָ֣א מִמִּצְרָ֑יִם וַיִּשְׁמְע֨וּ הַכַּשְׂדִּ֜ים הַצָּרִ֤ים עַל־יְרוּשָׁלִַ֙ם֙ אֶת־שִׁמְעָ֔ם וַיֵּ֣עָל֔וּ מֵעַ֖ל יְרוּשָׁלִָֽם׃ פ

‎6 ‏וַֽיְהִי֙ דְּבַר־יְהוָ֔ה אֶל־יִרְמְיָ֥הוּ הַנָּבִ֖יא לֵאמֹֽר׃

‎7 ‏כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל כֹּ֚ה תֹֽאמְרוּ֙ אֶל־מֶ֣לֶךְ יְהוּדָ֔ה הַשֹּׁלֵ֧חַ אֶתְכֶ֛ם אֵלַ֖י לְדָרְשֵׁ֑נִי הִנֵּ֣ה׀ חֵ֣יל פַּרְעֹ֗ה הַיֹּצֵ֤א לָכֶם֙ לְעֶזְרָ֔ה שָׁ֥ב לְאַרְצ֖וֹ מִצְרָֽיִם׃

‎8 ‏וְשָׁ֙בוּ֙ הַכַּשְׂדִּ֔ים וְנִלְחֲמ֖וּ עַל־הָעִ֣יר הַזֹּ֑את וּלְכָדֻ֖הָ וּשְׂרָפֻ֥הָ בָאֵֽשׁ׃ ס

‎9 ‏כֹּ֣ה׀ אָמַ֣ר יְהוָ֗ה אַל־תַּשִּׁ֤אוּ נַפְשֹֽׁתֵיכֶם֙ לֵאמֹ֔ר הָלֹ֛ךְ יֵלְכ֥וּ מֵעָלֵ֖ינוּ הַכַּשְׂדִּ֑ים כִּי־לֹ֖א יֵלֵֽכוּ׃

‎10 ‏כִּ֣י אִם־הִכִּיתֶ֞ם כָּל־חֵ֤יל כַּשְׂדִּים֙ הַנִּלְחָמִ֣ים אִתְּכֶ֔ם וְנִ֨שְׁאֲרוּ בָ֔ם אֲנָשִׁ֖ים מְדֻקָּרִ֑ים אִ֤ישׁ בְּאָהֳלוֹ֙ יָק֔וּמוּ וְשָֽׂרְפ֛וּ אֶת־הָעִ֥יר הַזֹּ֖את בָּאֵֽשׁ׃

‎11 ‏וְהָיָ֗ה בְּהֵֽעָלוֹת֙ חֵ֣יל הַכַּשְׂדִּ֔ים מֵעַ֖ל יְרֽוּשָׁלִָ֑ם מִפְּנֵ֖י חֵ֥יל פַּרְעֹֽה׃ ס

‎12 ‏וַיֵּצֵ֤א יִרְמְיָ֙הוּ֙ מִיר֣וּשָׁלִַ֔ם לָלֶ֖כֶת אֶ֣רֶץ בִּנְיָמִ֑ן לַחֲלִ֥ק מִשָּׁ֖ם בְּת֥וֹךְ הָעָֽם׃

‎13 ‏וַיְהִי־ה֞וּא בְּשַׁ֣עַר בִּנְיָמִ֗ן וְשָׁם֙ בַּ֣עַל פְּקִדֻ֔ת וּשְׁמוֹ֙ יִרְאִיָּ֔יה בֶּן־שֶֽׁלֶמְיָ֖ה בֶּן־חֲנַנְיָ֑ה וַיִּתְפֹּ֞שׂ אֶֽת־יִרְמְיָ֤הוּ הַנָּבִיא֙ לֵאמֹ֔ר אֶל־הַכַּשְׂדִּ֖ים אַתָּ֥ה נֹפֵֽל׃

‎14 ‏וַיֹּ֨אמֶר יִרְמְיָ֜הוּ שֶׁ֗קֶר אֵינֶ֤נִּי נֹפֵל֙ עַל־הַכַּשְׂדִּ֔ים וְלֹ֥א שָׁמַ֖ע אֵלָ֑יו וַיִּתְפֹּ֤שׂ יִרְאִיָּיה֙ בְּיִרְמְיָ֔הוּ וַיְבִאֵ֖הוּ אֶל־הַשָּׂרִֽים׃

‎15 ‏וַיִּקְצְפ֧וּ הַשָּׂרִ֛ים עַֽל־יִרְמְיָ֖הוּ וְהִכּ֣וּ אֹת֑וֹ וְנָתְנ֨וּ אוֹת֜וֹ בֵּ֣ית הָאֵס֗וּר בֵּ֚ית יְהוֹנָתָ֣ן הַסֹּפֵ֔ר כִּֽי־אֹת֥וֹ עָשׂ֖וּ לְבֵ֥ית הַכֶּֽלֶא׃

‎16 ‏כִּ֣י בָ֧א יִרְמְיָ֛הוּ אֶל־בֵּ֥ית הַבּ֖וֹר וְאֶל־הַֽחֲנֻ֑יוֹת וַיֵּֽשֶׁב־שָׁ֥ם יִרְמְיָ֖הוּ יָמִ֥ים רַבִּֽים׃ פ

‎17 ‏וַיִּשְׁלַח֩ הַמֶּ֨לֶךְ צִדְקִיָּ֜הוּ וַיִּקָּחֵ֗הוּ וַיִּשְׁאָלֵ֨הוּ הַמֶּ֤לֶךְ בְּבֵיתוֹ֙ בַּסֵּ֔תֶר וַיֹּ֕אמֶר הֲיֵ֥שׁ דָּבָ֖ר מֵאֵ֣ת יְהוָ֑ה וַיֹּ֤אמֶר יִרְמְיָ֙הוּ֙ יֵ֔שׁ וַיֹּ֕אמֶר בְּיַ֥ד מֶֽלֶךְ־בָּבֶ֖ל תִּנָּתֵֽן׃ ס

‎18 ‏וַיֹּ֣אמֶר יִרְמְיָ֔הוּ אֶל־הַמֶּ֖לֶךְ צִדְקִיָּ֑הוּ מֶה֩ חָטָ֨אתִֽי לְךָ֤ וְלַעֲבָדֶ֙יךָ֙ וְלָעָ֣ם הַזֶּ֔ה כִּֽי־נְתַתֶּ֥ם אוֹתִ֖י אֶל־בֵּ֥ית הַכֶּֽלֶא׃

‎19 ‏ואיו וְאַיֵּה֙ נְבִ֣יאֵיכֶ֔ם אֲשֶׁר־נִבְּא֥וּ לָכֶ֖ם לֵאמֹ֑ר לֹֽא־יָבֹ֤א מֶֽלֶךְ־בָּבֶל֙ עֲלֵיכֶ֔ם וְעַ֖ל הָאָ֥רֶץ הַזֹּֽאת׃

‎20 ‏וְעַתָּ֕ה שְֽׁמַֽע־נָ֖א אֲדֹנִ֣י הַמֶּ֑לֶךְ תִּפָּל־נָ֤א תְחִנָּתִי֙ לְפָנֶ֔יךָ וְאַל־תְּשִׁבֵ֗נִי בֵּ֚ית יְהוֹנָתָ֣ן הַסֹּפֵ֔ר וְלֹ֥א אָמ֖וּת שָֽׁם׃

‎21 ‏וַיְצַוֶּ֞ה הַמֶּ֣לֶךְ צִדְקִיָּ֗הוּ וַיַּפְקִ֣דוּ אֶֽת־יִרְמְיָהוּ֮ בַּחֲצַ֣ר הַמַּטָּרָה֒ וְנָתֹן֩ ל֨וֹ כִכַּר־לֶ֤חֶם לַיּוֹם֙ מִח֣וּץ הָאֹפִ֔ים עַד־תֹּ֥ם כָּל־הַלֶּ֖חֶם מִן־הָעִ֑יר וַיֵּ֣שֶׁב יִרְמְיָ֔הוּ בַּחֲצַ֖ר הַמַּטָּרָֽה׃

1 wayyiməlāḵə-meleḵə ṣiḏəqîyâû ben-yō’šîyâû t^aḥaṯ kānəyâû ben-yəhwōyāqîm ’ăšer himəlîḵə nəḇûḵaḏəre’ṣṣar meleḵə-bāḇel bə’ereṣ yəhûḏâ:

2 wəlō’ šām^a‘ hû’ w^a‘ăḇāḏāyw wə‘am hā’āreṣ ’el-diḇərê yəhwâ ’ăšer diber bəyaḏ yirəməyâû hannāḇî’:

3 wayyišəl^aḥ hammeleḵə ṣiḏəqîyâû ’eṯ-yəhûḵal ben-šeleməyâ wə’eṯ-ṣəfanəyâû ḇen-m^a‘ăśêâ hakōhēn ’el-yirəməyâû hannāḇî’ lē’mōr hiṯəpallel-nā’ ḇ^a‘ăḏēnû ’el-yəhwâ ’ĕlōhênû:

4 wəyirəməyâû bā’ wəyōṣē’ bəṯwōḵə hā‘ām wəlō’-nāṯənû ’ōṯwō bêṯ hakəlî’ hakəlû’:

5 wəḥêl parə‘ōh yāṣā’ mimmiṣərāyim wayyišəmə‘û hakaśədîm haṣṣārîm ‘al-yərûšālaim ’eṯ-šimə‘ām wayyē‘ālû mē‘al yərûšālāim: f

6 wayəhî dəḇar-yəhwâ ’el-yirəməyâû hannāḇî’ lē’mōr:

7 kōh-’āmar yəhwâ ’ĕlōhê yiśərā’ēl kōh ṯō’mərû ’el-meleḵə yəhûḏâ haššōlēḥa ’eṯəḵem ’ēlay ləḏārəšēnî hinnēh| ḥêl parə‘ōh hayyōṣē’ lāḵem lə‘ezərâ šāḇ lə’arəṣwō miṣərāyim:

8 wəšāḇû hakaśədîm wəniləḥămû ‘al-hā‘îr hazzō’ṯ ûləḵāḏuhā ûśərāfuhā ḇā’ēš: s

9 kōh| ’āmar yəhwâ ’al-tašši’û nafəšōṯêḵem lē’mōr hālōḵə yēləḵû mē‘ālênû hakaśədîm kî-lō’ yēlēḵû:

10 kî ’im-hikîṯem kāl-ḥêl kaśədîm hanniləḥāmîm ’itəḵem wənišə’ărû ḇām ’ănāšîm məḏuqqārîm ’îš bə’âŏlwō yāqûmû wəśārəfû ’eṯ-hā‘îr hazzō’ṯ bā’ēš:

11 wəhāyâ bəhē‘ālwōṯ ḥêl hakaśədîm mē‘al yərûšālāim mipənê ḥêl parə‘ōh: s

12 wayyēṣē’ yirəməyâû mîrûšālaim lāleḵeṯ ’ereṣ binəyāmin l^aḥăliq miššām bəṯwōḵə hā‘ām:

13 wayəhî-hû’ bəš^a‘ar binəyāmin wəšām b^a‘al pəqiḏuṯ ûšəmwō yirə’îyāyh ben-šeleməyâ ben-ḥănanəyâ wayyiṯəpōś ’eṯ-yirəməyâû hannāḇî’ lē’mōr ’el-hakaśədîm ’atâ nōfēl:

14 wayyō’mer yirəməyâû šeqer ’ênennî nōfēl ‘al-hakaśədîm wəlō’ šām^a‘ ’ēlāyw wayyiṯəpōś yirə’îyāyh bəyirəməyâû wayəḇi’ēhû ’el-haśśārîm:

15 wayyiqəṣəfû haśśārîm ‘al-yirəməyâû wəhikû ’ōṯwō wənāṯənû ’wōṯwō bêṯ hā’ēsûr bêṯ yəhwōnāṯān hassōfēr kî-’ōṯwō ‘āśû ləḇêṯ hakele’:

16 kî ḇā’ yirəməyâû ’el-bêṯ habwōr wə’el-h^aḥănuywōṯ wayyēšeḇ-šām yirəməyâû yāmîm rabîm: f

17 wayyišəl^aḥ hammeleḵə ṣiḏəqîyâû wayyiqqāḥēhû wayyišə’ālēhû hammeleḵə bəḇêṯwō bassēṯer wayyō’mer hăyēš dāḇār mē’ēṯ yəhwâ wayyō’mer yirəməyâû yēš wayyō’mer bəyaḏ meleḵə-bāḇel tinnāṯēn: s

18 wayyō’mer yirəməyâû ’el-hammeleḵə ṣiḏəqîyâû meh ḥāṭā’ṯî ləḵā wəl^a‘ăḇāḏeyḵā wəlā‘ām hazzeh kî-nəṯatem ’wōṯî ’el-bêṯ hakele’:

19 wə’ayywō wə’ayyēh nəḇî’êḵem ’ăšer-nibə’û lāḵem lē’mōr lō’-yāḇō’ meleḵə-bāḇel ‘ălêḵem wə‘al hā’āreṣ hazzō’ṯ:

20 wə‘atâ šəm^a‘-nā’ ’ăḏōnî hammeleḵə tipāl-nā’ ṯəḥinnāṯî ləfāneyḵā wə’al-təšiḇēnî bêṯ yəhwōnāṯān hassōfēr wəlō’ ’āmûṯ šām:

21 wayəṣaûeh hammeleḵə ṣiḏəqîyâû wayyafəqiḏû ’eṯ-yirəməyâû b^aḥăṣar hammaṭṭārâ wənāṯōn lwō ḵikar-leḥem layywōm miḥûṣ hā’ōfîm ‘aḏ-tōm kāl-halleḥem min-hā‘îr wayyēšeḇ yirəməyâû b^aḥăṣar hammaṭṭārâ: