Jeremiah (Yermiyah) Chapter 48

‎1 ‏לְמוֹאָ֡ב כֹּֽה־אָמַר֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל ה֤וֹי אֶל־נְבוֹ֙ כִּ֣י שֻׁדָּ֔דָה הֹבִ֥ישָׁה נִלְכְּדָ֖ה קִרְיָתָ֑יִם הֹבִ֥ישָׁה הַמִּשְׂגָּ֖ב וָחָֽתָּה׃

‎2 ‏אֵ֣ין עוֹד֮ תְּהִלַּ֣ת מוֹאָב֒ בְּחֶשְׁבּ֗וֹן חָשְׁב֤וּ עָלֶ֙יהָ֙ רָעָ֔ה לְכ֖וּ וְנַכְרִיתֶ֣נָּה מִגּ֑וֹי גַּם־מַדְמֵ֣ן תִּדֹּ֔מִּי אַחֲרַ֖יִךְ תֵּ֥לֶךְ חָֽרֶב׃

‎3 ‏ק֥וֹל צְעָקָ֖ה מֵחֹֽרוֹנָ֑יִם שֹׁ֖ד וָשֶׁ֥בֶר גָּדֽוֹל׃

‎4 ‏נִשְׁבְּרָ֖ה מוֹאָ֑ב הִשְׁמִ֥יעוּ זְּעָקָ֖ה צעוריה צְעִירֶֽיהָ׃

‎5 ‏כִּ֚י מַעֲלֵ֣ה הלחות הַלּוּחִ֔ית³ בִּבְכִ֖י יַֽעֲלֶה־בֶּ֑כִי כִּ֚י בְּמוֹרַ֣ד חוֹרֹנַ֔יִם צָרֵ֥י צַֽעֲקַת־שֶׁ֖בֶר שָׁמֵֽעוּ׃

‎6 ‏נֻ֖סוּ מַלְּט֣וּ נַפְשְׁכֶ֑ם וְתִֽהְיֶ֕ינָה כַּעֲרוֹעֵ֖ר בַּמִּדְבָּֽר׃

‎7 ‏כִּ֠י יַ֣עַן בִּטְחֵ֤ךְ בְּמַעֲשַׂ֙יִךְ֙ וּבְא֣וֹצְרוֹתַ֔יִךְ גַּם־אַ֖תְּ תִּלָּכֵ֑דִי וְיָצָ֤א כמיש כְמוֹשׁ֙ בַּגּוֹלָ֔ה כֹּהֲנָ֥יו וְשָׂרָ֖יו יחד יַחְדָּֽיו׃

‎8 ‏וְיָבֹ֨א שֹׁדֵ֜ד אֶל־כָּל־עִ֗יר וְעִיר֙ לֹ֣א תִמָּלֵ֔ט וְאָבַ֥ד הָעֵ֖מֶק וְנִשְׁמַ֣ד הַמִּישֹׁ֑ר אֲשֶׁ֖ר אָמַ֥ר יְהוָֽה׃

‎9 ‏תְּנוּ־צִ֣יץ לְמוֹאָ֔ב כִּ֥י נָצֹ֖א תֵּצֵ֑א וְעָרֶ֙יהָ֙ לְשַׁמָּ֣ה תִֽהְיֶ֔ינָה מֵאֵ֥ין יוֹשֵׁ֖ב בָּהֵֽן׃

‎10 ‏אָר֗וּר עֹשֶׂ֛ה מְלֶ֥אכֶת יְהוָ֖ה רְמִיָּ֑ה וְאָר֕וּר מֹנֵ֥עַ חַרְבּ֖וֹ מִדָּֽם׃

‎11 ‏שַׁאֲנַ֨ן מוֹאָ֜ב מִנְּעוּרָ֗יו וְשֹׁקֵ֥ט הוּא֙ אֶל־שְׁמָרָ֔יו וְלֹֽא־הוּרַ֤ק מִכְּלִי֙ אֶל־כֶּ֔לִי וּבַגּוֹלָ֖ה לֹ֣א הָלָ֑ךְ עַל־כֵּ֗ן עָמַ֤ד טַעְמוֹ֙ בּ֔וֹ וְרֵיח֖וֹ לֹ֥א נָמָֽר׃ ס

‎12 ‏לָכֵ֞ן הִנֵּ֖ה־יָמִ֤ים בָּאִים֙ נְאֻם־יְהוָ֔ה וְשִׁלַּחְתִּי־ל֥וֹ צֹעִ֖ים וְצֵעֻ֑הוּ וְכֵלָ֣יו יָרִ֔יקוּ וְנִבְלֵיהֶ֖ם יְנַפֵּֽצוּ׃

‎13 ‏וּבֹ֥שׁ מוֹאָ֖ב מִכְּמ֑וֹשׁ כַּאֲשֶׁר־בֹּ֙שׁוּ֙ בֵּ֣ית יִשְׂרָאֵ֔ל מִבֵּ֥ית אֵ֖ל מִבְטֶחָֽם׃

‎14 ‏אֵ֚יךְ תֹּֽאמְר֔וּ גִּבּוֹרִ֖ים אֲנָ֑חְנוּ וְאַנְשֵׁי־חַ֖יִל לַמִּלְחָמָֽה׃

‎15 ‏שֻׁדַּ֤ד מוֹאָב֙ וְעָרֶ֣יהָ עָלָ֔ה וּמִבְחַ֥ר בַּֽחוּרָ֖יו יָרְד֣וּ לַטָּ֑בַח נְאֻ֨ם־הַמֶּ֔לֶךְ יְהוָ֥ה צְבָא֖וֹת שְׁמֽוֹ׃

‎16 ‏קָר֥וֹב אֵיד־מוֹאָ֖ב לָב֑וֹא וְרָ֣עָת֔וֹ מִהֲרָ֖ה מְאֹֽד׃

‎17 ‏נֻ֤דוּ לוֹ֙ כָּל־סְבִיבָ֔יו וְכֹ֖ל יֹדְעֵ֣י שְׁמ֑וֹ אִמְר֗וּ אֵיכָ֤ה נִשְׁבַּר֙ מַטֵּה־עֹ֔ז מַקֵּ֖ל תִּפְאָרָֽה׃

‎18 ‏רְדִ֤י מִכָּבוֹד֙ ישבי וּשְׁבִ֣י בַצָּמָ֔א יֹשֶׁ֖בֶת בַּת־דִּיב֑וֹן כִּֽי־שֹׁדֵ֤ד מוֹאָב֙ עָ֣לָה בָ֔ךְ שִׁחֵ֖ת מִבְצָרָֽיִךְ׃

‎19 ‏אֶל־דֶּ֛רֶךְ עִמְדִ֥י וְצַפִּ֖י יוֹשֶׁ֣בֶת עֲרוֹעֵ֑ר שַׁאֲלִי־נָ֣ס וְנִמְלָ֔טָה אִמְרִ֖י מַה־נִּֽהְיָֽתָה׃

‎20 ‏הֹבִ֥ישׁ מוֹאָ֛ב כִּֽי־חַ֖תָּה הילילי הֵילִ֣ילוּ׀ וזעקי וּֽזְעָ֑קוּ הַגִּ֣ידוּ בְאַרְנ֔וֹן כִּ֥י שֻׁדַּ֖ד מוֹאָֽב׃

‎21 ‏וּמִשְׁפָּ֥ט בָּ֖א אֶל־אֶ֣רֶץ הַמִּישֹׁ֑ר אֶל־חֹל֥וֹן וְאֶל־יַ֖הְצָה וְעַל־מופעת מֵיפָֽעַת׃

‎22 ‏וְעַל־דִּיב֣וֹן וְעַל־נְב֔וֹ וְעַל־בֵּ֖ית דִּבְלָתָֽיִם׃

‎23 ‏וְעַ֧ל קִרְיָתַ֛יִם וְעַל־בֵּ֥ית גָּמ֖וּל וְעַל־בֵּ֥ית מְעֽוֹן׃

‎24 ‏וְעַל־קְרִיּ֖וֹת וְעַל־בָּצְרָ֑ה וְעַ֗ל כָּל־עָרֵי֙ אֶ֣רֶץ מוֹאָ֔ב הָרְחֹק֖וֹת וְהַקְּרֹבֽוֹת׃

‎25 ‏נִגְדְּעָה֙ קֶ֣רֶן מוֹאָ֔ב וּזְרֹע֖וֹ נִשְׁבָּ֑רָה נְאֻ֖ם יְהוָֽה׃

‎26 ‏הַשְׁכִּירֻ֕הוּ כִּ֥י עַל־יְהוָ֖ה הִגְדִּ֑יל וְסָפַ֤ק מוֹאָב֙ בְּקִיא֔וֹ וְהָיָ֥ה לִשְׂחֹ֖ק גַּם־הֽוּא׃

‎27 ‏וְאִ֣ם׀ ל֣וֹא הַשְּׂחֹ֗ק הָיָ֤ה לְךָ֙ יִשְׂרָאֵ֔ל אִם־בְּגַנָּבִ֖ים נמצאה נִמְצָ֑א כִּֽי־מִדֵּ֧י דְבָרֶ֥יךָ בּ֖וֹ תִּתְנוֹדָֽד׃

‎28 ‏עִזְב֤וּ עָרִים֙ וְשִׁכְנ֣וּ בַּסֶּ֔לַע יֹשְׁבֵ֖י מוֹאָ֑ב וִֽהְי֣וּ כְיוֹנָ֔ה תְּקַנֵּ֖ן בְּעֶבְרֵ֥י פִי־פָֽחַת׃

‎29 ‏שָׁמַ֥עְנוּ גְאוֹן־מוֹאָ֖ב גֵּאֶ֣ה מְאֹ֑ד גָּבְה֧וֹ וּגְאוֹנ֛וֹ וְגַאֲוָת֖וֹ וְרֻ֥ם לִבּֽוֹ׃

‎30 ‏אֲנִ֤י יָדַ֨עְתִּ֨י נְאֻם־יְהוָ֔ה עֶבְרָת֖וֹ וְלֹא־כֵ֑ן בַּדָּ֖יו לֹא־כֵ֥ן עָשֽׂוּ׃

‎31 ‏עַל־כֵּן֙ עַל־מוֹאָ֣ב אֲיֵלִ֔יל וּלְמוֹאָ֥ב כֻּלֹּ֖ה אֶזְעָ֑ק אֶל־אַנְשֵׁ֥י קִֽיר־חֶ֖רֶשׂ יֶהְגֶּֽה׃

‎32 ‏מִבְּכִ֨י יַעְזֵ֤ר אֶבְכֶּה־לָּךְ֙ הַגֶּ֣פֶן שִׂבְמָ֔ה נְטִֽישֹׁתַ֙יִךְ֙ עָ֣בְרוּ יָ֔ם עַ֛ד יָ֥ם יַעְזֵ֖ר נָגָ֑עוּ עַל־קֵיצֵ֥ךְ וְעַל־בְּצִירֵ֖ךְ שֹׁדֵ֖ד נָפָֽל׃

‎33 ‏וְנֶאֶסְפָ֨ה שִׂמְחָ֥ה וָגִ֛יל מִכַּרְמֶ֖ל וּמֵאֶ֣רֶץ מוֹאָ֑ב וְיַ֙יִן֙ מִיקָבִ֣ים הִשְׁבַּ֔תִּי לֹֽא־יִדְרֹ֣ךְ הֵידָ֔ד הֵידָ֖ד לֹ֥א הֵידָֽד׃

‎34 ‏מִזַּעֲקַ֨ת חֶשְׁבּ֜וֹן עַד־אֶלְעָלֵ֗ה עַד־יַ֙הַץ֙ נָתְנ֣וּ קוֹלָ֔ם מִצֹּ֙עַר֙ עַד־חֹ֣רֹנַ֔יִם עֶגְלַ֖ת שְׁלִֽשִׁיָּ֑ה כִּ֚י גַּם־מֵ֣י נִמְרִ֔ים לִמְשַׁמּ֖וֹת יִהְיֽוּ׃

‎35 ‏וְהִשְׁבַּתִּ֥י לְמוֹאָ֖ב נְאֻם־יְהוָ֑ה מַעֲלֶ֣ה בָמָ֔ה וּמַקְטִ֖יר לֵאלֹהָֽיו׃

‎36 ‏עַל־כֵּ֞ן לִבִּ֤י לְמוֹאָב֙ כַּחֲלִלִ֣ים יֶהֱמֶ֔ה וְלִבִּי֙ אֶל־אַנְשֵׁ֣י קִֽיר־חֶ֔רֶשׂ כַּחֲלִילִ֖ים יֶהֱמֶ֑ה עַל־כֵּ֛ן יִתְרַ֥ת עָשָׂ֖ה אָבָֽדוּ׃

‎37 ‏כִּ֤י כָל־רֹאשׁ֙ קָרְחָ֔ה וְכָל־זָקָ֖ן גְּרֻעָ֑ה עַ֤ל כָּל־יָדַ֙יִם֙ גְּדֻדֹ֔ת וְעַל־מָתְנַ֖יִם שָֽׂק׃

‎38 ‏עַ֣ל כָּל־גַּגּ֥וֹת מוֹאָ֛ב וּבִרְחֹבֹתֶ֖יהָ כֻּלֹּ֣ה מִסְפֵּ֑ד כִּֽי־שָׁבַ֣רְתִּי אֶת־מוֹאָ֗ב כִּכְלִ֛י אֵֽין־חֵ֥פֶץ בּ֖וֹ נְאֻם־יְהוָֽה׃

‎39 ‏אֵ֥יךְ חַ֙תָּה֙ הֵילִ֔ילוּ אֵ֛יךְ הִפְנָה־עֹ֥רֶף מוֹאָ֖ב בּ֑וֹשׁ וְהָיָ֥ה מוֹאָ֛ב לִשְׂחֹ֥ק וְלִמְחִתָּ֖ה לְכָל־סְבִיבָֽיו׃ ס

‎40 ‏כִּי־כֹה֙ אָמַ֣ר יְהוָ֔ה הִנֵּ֥ה כַנֶּ֖שֶׁר יִדְאֶ֑ה וּפָרַ֥שׂ כְּנָפָ֖יו אֶל־מוֹאָֽב׃

‎41 ‏נִלְכְּדָה֙ הַקְּרִיּ֔וֹת וְהַמְּצָד֖וֹת נִתְפָּ֑שָׂה וְֽ֠הָיָה לֵ֞ב גִּבּוֹרֵ֤י מוֹאָב֙ בַּיּ֣וֹם הַה֔וּא כְּלֵ֖ב אִשָּׁ֥ה מְצֵרָֽה׃

‎42 ‏וְנִשְׁמַ֥ד מוֹאָ֖ב מֵעָ֑ם כִּ֥י עַל־יְהוָ֖ה הִגְדִּֽיל׃

‎43 ‏פַּ֥חַד וָפַ֖חַת וָפָ֑ח עָלֶ֛יךָ יוֹשֵׁ֥ב מוֹאָ֖ב נְאֻם־יְהוָֽה׃

‎44 ‏הניס הַנָּ֞ס מִפְּנֵ֤י הַפַּ֙חַד֙ יִפֹּ֣ל אֶל־הַפַּ֔חַת וְהָֽעֹלֶה֙ מִן־הַפַּ֔חַת יִלָּכֵ֖ד בַּפָּ֑ח כִּֽי־אָבִ֨יא אֵלֶ֧יהָ אֶל־מוֹאָ֛ב שְׁנַ֥ת פְּקֻדָּתָ֖ם נְאֻם־יְהוָֽה׃

‎45 ‏בְּצֵ֥ל חֶשְׁבּ֛וֹן עָמְד֖וּ מִכֹּ֣חַ נָסִ֑ים כִּֽי־אֵ֞שׁ יָצָ֣א מֵחֶשְׁבּ֗וֹן וְלֶֽהָבָה֙ מִבֵּ֣ין סִיח֔וֹן וַתֹּ֙אכַל֙ פְּאַ֣ת מוֹאָ֔ב וְקָדְקֹ֖ד בְּנֵ֥י שָׁאֽוֹן׃

‎46 ‏אוֹי־לְךָ֣ מוֹאָ֔ב אָבַ֖ד עַם־כְּמ֑וֹשׁ כִּֽי־לֻקְּח֤וּ בָנֶ֙יךָ֙ בַּשֶּׁ֔בִי וּבְנֹתֶ֖יךָ בַּשִּׁבְיָֽה׃

‎47 ‏וְשַׁבְתִּ֧י שְׁבוּת־מוֹאָ֛ב בְּאַחֲרִ֥ית הַיָּמִ֖ים נְאֻם־יְהוָ֑ה עַד־הֵ֖נָּה מִשְׁפַּ֥ט מוֹאָֽב׃ ס

1 ləmwō’āḇ kōh-’āmar yəhwâ ṣəḇā’wōṯ ’ĕlōhê yiśərā’ēl hwōy ’el-nəḇwō kî šudāḏâ hōḇîšâ niləkəḏâ qirəyāṯāyim hōḇîšâ hammiśəgāḇ wāḥātâ:

2 ’ên ‘wōḏ təhillaṯ mwō’āḇ bəḥešəbwōn ḥāšəḇû ‘āleyhā rā‘â ləḵû wənaḵərîṯennâ migwōy gam-maḏəmēn tidōmmî ’^aḥărayiḵə tēleḵə ḥāreḇ:

3 qwōl ṣə‘āqâ mēḥōrwōnāyim šōḏ wāšeḇer gāḏwōl:

4 nišəbərâ mwō’āḇ hišəmî‘û zzə‘āqâ ṣə‘wōreyhā ṣə‘îreyhā:

5 kî m^a‘ălēh halluḥwōṯ hallûḥîṯ³ biḇəḵî y^a‘ăleh-beḵî kî bəmwōraḏ ḥwōrōnayim ṣārê ṣ^a‘ăqaṯ-šeḇer šāmē‘û:

6 nusû malləṭû nafəšəḵem wəṯihəyeynâ k^a‘ărwō‘ēr bammiḏəbār:

7 kî y^a‘an biṭəḥēḵə bəm^a‘ăśayiḵə ûḇə’wōṣərwōṯayiḵə gam-’atə tillāḵēḏî wəyāṣā’ ḵəmîš ḵəmwōš bagwōlâ kōhănāyw wəśārāyw y^aḥaḏ y^aḥədāyw:

8 wəyāḇō’ šōḏēḏ ’el-kāl-‘îr wə‘îr lō’ ṯimmālēṭ wə’āḇaḏ hā‘ēmeq wənišəmaḏ hammîšōr ’ăšer ’āmar yəhwâ:

9 tənû-ṣîṣ ləmwō’āḇ kî nāṣō’ tēṣē’ wə‘āreyhā ləšammâ ṯihəyeynâ mē’ên ywōšēḇ bâēn:

10 ’ārûr ‘ōśeh məle’ḵeṯ yəhwâ rəmîyâ wə’ārûr mōnē‘a ḥarəbwō midām:

11 ša’ănan mwō’āḇ minnə‘ûrāyw wəšōqēṭ hû’ ’el-šəmārāyw wəlō’-hûraq mikəlî ’el-kelî ûḇagwōlâ lō’ hālāḵə ‘al-kēn ‘āmaḏ ṭ^a‘əmwō bwō wərêḥwō lō’ nāmār: s

12 lāḵēn hinnēh-yāmîm bā’îm nə’um-yəhwâ wəšill^aḥətî-lwō ṣō‘îm wəṣē‘uhû wəḵēlāyw yārîqû wəniḇəlêhem yənapēṣû:

13 ûḇōš mwō’āḇ mikəmwōš ka’ăšer-bōšû bêṯ yiśərā’ēl mibêṯ ’ēl miḇəṭeḥām:

14 ’êḵə tō’mərû gibwōrîm ’ănāḥənû wə’anəšê-ḥayil lammiləḥāmâ:

15 šudaḏ mwō’āḇ wə‘āreyhā ‘ālâ ûmiḇəḥar b^aḥûrāyw yārəḏû laṭṭāḇ^aḥ nə’um-hammeleḵə yəhwâ ṣəḇā’wōṯ šəmwō:

16 qārwōḇ ’êḏ-mwō’āḇ lāḇwō’ wərā‘āṯwō mihărâ mə’ōḏ:

17 nuḏû lwō kāl-səḇîḇāyw wəḵōl yōḏə‘ê šəmwō ’imərû ’êḵâ nišəbar maṭṭēh-‘ōz maqqēl tifə’ārâ:

18 rəḏî mikāḇwōḏ yōšəḇey ûšəḇî ḇaṣṣāmā’ yōšeḇeṯ baṯ-dîḇwōn kî-šōḏēḏ mwō’āḇ ‘ālâ ḇāḵə šiḥēṯ miḇəṣārāyiḵə:

19 ’el-dereḵə ‘iməḏî wəṣapî ywōšeḇeṯ ‘ărwō‘ēr ša’ălî-nās wəniməlāṭâ ’imərî mah-nnihəyāṯâ:

20 hōḇîš mwō’āḇ kî-ḥatâ hêlîlî hêlîlû| ûzə‘āqî ûzə‘āqû hagîḏû ḇə’arənwōn kî šudaḏ mwō’āḇ:

21 ûmišəpāṭ bā’ ’el-’ereṣ hammîšōr ’el-ḥōlwōn wə’el-yahəṣâ wə‘al-mwōfā‘aṯ mêfā‘aṯ:

22 wə‘al-dîḇwōn wə‘al-nəḇwō wə‘al-bêṯ diḇəlāṯāyim:

23 wə‘al qirəyāṯayim wə‘al-bêṯ gāmûl wə‘al-bêṯ mə‘wōn:

24 wə‘al-qərîywōṯ wə‘al-bāṣərâ wə‘al kāl-‘ārê ’ereṣ mwō’āḇ hārəḥōqwōṯ wəhaqqərōḇwōṯ:

25 niḡədə‘â qeren mwō’āḇ ûzərō‘wō nišəbārâ nə’um yəhwâ:

26 hašəkîruhû kî ‘al-yəhwâ hiḡədîl wəsāfaq mwō’āḇ bəqî’wō wəhāyâ liśəḥōq gam-hû’:

27 wə’im| lwō’ haśśəḥōq hāyâ ləḵā yiśərā’ēl ’im-bəḡannāḇîm niməṣā’â niməṣā’ kî-midê ḏəḇāreyḵā bwō tiṯənwōḏāḏ:

28 ‘izəḇû ‘ārîm wəšiḵənû bassel^a‘ yōšəḇê mwō’āḇ wihəyû ḵəywōnâ təqannēn bə‘eḇərê fî-fāḥaṯ:

29 šām^a‘ənû ḡə’wōn-mwō’āḇ gē’eh mə’ōḏ gāḇəhwō ûḡə’wōnwō wəḡa’ăwāṯwō wərum libwō:

30 ’ănî yāḏ^a‘ətî nə’um-yəhwâ ‘eḇərāṯwō wəlō’-ḵēn badāyw lō’-ḵēn ‘āśû:

31 ‘al-kēn ‘al-mwō’āḇ ’ăyēlîl ûləmwō’āḇ kullōh ’ezə‘āq ’el-’anəšê qîr-ḥereś yehəgeh:

32 mibəḵî y^a‘əzēr ’eḇəkeh-llāḵə hagefen śiḇəmâ nəṭîšōṯayiḵə ‘āḇərû yām ‘aḏ yām y^a‘əzēr nāḡā‘û ‘al-qêṣēḵə wə‘al-bəṣîrēḵə šōḏēḏ nāfāl:

33 wəne’esəfâ śiməḥâ wāḡîl mikarəmel ûmē’ereṣ mwō’āḇ wəyayin mîqāḇîm hišəbatî lō’-yiḏərōḵə hêḏāḏ hêḏāḏ lō’ hêḏāḏ:

34 mizz^a‘ăqaṯ ḥešəbwōn ‘aḏ-’elə‘ālēh ‘aḏ-yahaṣ nāṯənû qwōlām miṣṣō‘ar ‘aḏ-ḥōrōnayim ‘eḡəlaṯ šəlišîyâ kî gam-mê nimərîm liməšammwōṯ yihəyû:

35 wəhišəbatî ləmwō’āḇ nə’um-yəhwâ m^a‘ăleh ḇāmâ ûmaqəṭîr lē’lōhāyw:

36 ‘al-kēn libî ləmwō’āḇ k^aḥălilîm yehĕmeh wəlibî ’el-’anəšê qîr-ḥereś k^aḥălîlîm yehĕmeh ‘al-kēn yiṯəraṯ ‘āśâ ’āḇāḏû:

37 kî ḵāl-rō’š qārəḥâ wəḵāl-zāqān gəru‘â ‘al kāl-yāḏayim gəḏuḏōṯ wə‘al-māṯənayim śāq:

38 ‘al kāl-gagwōṯ mwō’āḇ ûḇirəḥōḇōṯeyhā kullōh misəpēḏ kî-šāḇarətî ’eṯ-mwō’āḇ kiḵəlî ’ên-ḥēfeṣ bwō nə’um-yəhwâ:

39 ’êḵə ḥatâ hêlîlû ’êḵə hifənâ-‘ōref mwō’āḇ bwōš wəhāyâ mwō’āḇ liśəḥōq wəliməḥitâ ləḵāl-səḇîḇāyw: s

40 kî-ḵōh ’āmar yəhwâ hinnēh ḵannešer yiḏə’eh ûfāraś kənāfāyw ’el-mwō’āḇ:

41 niləkəḏâ haqqərîywōṯ wəhamməṣāḏwōṯ niṯəpāśâ wəhāyâ lēḇ gibwōrê mwō’āḇ bayywōm hahû’ kəlēḇ ’iššâ məṣērâ:

42 wənišəmaḏ mwō’āḇ mē‘ām kî ‘al-yəhwâ hiḡədîl:

43 p^aḥaḏ wāf^aḥaṯ wāfāḥ ‘āleyḵā ywōšēḇ mwō’āḇ nə’um-yəhwâ:

44 hannîs hannās mipənê hap^aḥaḏ yipōl ’el-hap^aḥaṯ wəhā‘ōleh min-hap^aḥaṯ yillāḵēḏ bapāḥ kî-’āḇî’ ’ēleyhā ’el-mwō’āḇ šənaṯ pəqudāṯām nə’um-yəhwâ:

45 bəṣēl ḥešəbwōn ‘āməḏû mikōḥa nāsîm kî-’ēš yāṣā’ mēḥešəbwōn wəlehāḇâ mibên sîḥwōn watō’ḵal pə’aṯ mwō’āḇ wəqāḏəqōḏ bənê šā’wōn:

46 ’wōy-ləḵā mwō’āḇ ’āḇaḏ ‘am-kəmwōš kî-luqqəḥû ḇāneyḵā baššeḇî ûḇənōṯeyḵā baššiḇəyâ:

47 wəšaḇətî šəḇûṯ-mwō’āḇ bə’^aḥărîṯ hayyāmîm nə’um-yəhwâ ‘aḏ-hēnnâ mišəpaṭ mwō’āḇ: s