Joel (Yoel) Chapter 1

‎1 ‏דְּבַר־יְהוָה֙ אֲשֶׁ֣ר הָיָ֔ה אֶל־יוֹאֵ֖ל בֶּן־פְּתוּאֵֽל׃

‎2 ‏שִׁמְעוּ־זֹאת֙ הַזְּקֵנִ֔ים וְהַֽאֲזִ֔ינוּ כֹּ֖ל יוֹשְׁבֵ֣י הָאָ֑רֶץ הֶהָ֤יְתָה זֹּאת֙ בִּֽימֵיכֶ֔ם וְאִ֖ם בִּימֵ֥י אֲבֹֽתֵיכֶֽם׃

‎3 ‏עָלֶ֖יהָ לִבְנֵיכֶ֣ם סַפֵּ֑רוּ וּבְנֵיכֶם֙ לִבְנֵיהֶ֔ם וּבְנֵיהֶ֖ם לְד֥וֹר אַחֵֽר׃

‎4 ‏יֶ֤תֶר הַגָּזָם֙ אָכַ֣ל הָֽאַרְבֶּ֔ה וְיֶ֥תֶר הָאַרְבֶּ֖ה אָכַ֣ל הַיָּ֑לֶק וְיֶ֣תֶר הַיֶּ֔לֶק אָכַ֖ל הֶחָסִֽיל׃

‎5 ‏הָקִ֤יצוּ שִׁכּוֹרִים֙ וּבְכ֔וּ וְהֵילִ֖לוּ כָּל־שֹׁ֣תֵי יָ֑יִן עַל־עָסִ֕יס כִּ֥י נִכְרַ֖ת מִפִּיכֶֽם׃

‎6 ‏כִּֽי־גוֹי֙ עָלָ֣ה עַל־אַרְצִ֔י עָצ֖וּם וְאֵ֣ין מִסְפָּ֑ר שִׁנָּיו֙ שִׁנֵּ֣י אַרְיֵ֔ה וּֽמְתַלְּע֥וֹת לָבִ֖יא לֽוֹ׃

‎7 ‏שָׂ֤ם גַּפְנִי֙ לְשַׁמָּ֔ה וּתְאֵנָתִ֖י לִקְצָפָ֑ה חָשֹׂ֤ף חֲשָׂפָהּ֙ וְהִשְׁלִ֔יךְ הִלְבִּ֖ינוּ שָׂרִיגֶֽיהָ׃

‎8 ‏אֱלִ֕י כִּבְתוּלָ֥ה חֲגֻֽרַת־שַׂ֖ק עַל־בַּ֥עַל נְעוּרֶֽיהָ׃

‎9 ‏הָכְרַ֥ת מִנְחָ֛ה וָנֶ֖סֶךְ מִבֵּ֣ית יְהוָ֑ה אָֽבְלוּ֙ הַכֹּ֣הֲנִ֔ים מְשָׁרְתֵ֖י יְהוָֽה׃

‎10 ‏שֻׁדַּ֣ד שָׂדֶ֔ה אָבְלָ֖ה אֲדָמָ֑ה כִּ֚י שֻׁדַּ֣ד דָּגָ֔ן הוֹבִ֥ישׁ תִּיר֖וֹשׁ אֻמְלַ֥ל יִצְהָֽר׃

‎11 ‏הֹבִ֣ישׁוּ אִכָּרִ֗ים הֵילִ֙ילוּ֙ כֹּֽרְמִ֔ים עַל־חִטָּ֖ה וְעַל־שְׂעֹרָ֑ה כִּ֥י אָבַ֖ד קְצִ֥יר שָׂדֶֽה׃

‎12 ‏הַגֶּ֣פֶן הוֹבִ֔ישָׁה וְהַתְּאֵנָ֖ה אֻמְלָ֑לָה רִמּ֞וֹן גַּם־תָּמָ֣ר וְתַפּ֗וּחַ כָּל־עֲצֵ֤י הַשָּׂדֶה֙ יָבֵ֔שׁוּ כִּֽי־הֹבִ֥ישׁ שָׂשׂ֖וֹן מִן־בְּנֵ֥י אָדָֽם׃ ס

‎13 ‏חִגְר֨וּ וְסִפְד֜וּ הַכֹּהֲנִ֗ים הֵילִ֙ילוּ֙ מְשָׁרְתֵ֣י מִזְבֵּ֔חַ בֹּ֚אוּ לִ֣ינוּ בַשַּׂקִּ֔ים מְשָׁרְתֵ֖י אֱלֹהָ֑י כִּ֥י נִמְנַ֛ע מִבֵּ֥ית אֱלֹהֵיכֶ֖ם מִנְחָ֥ה וָנָֽסֶךְ׃

‎14 ‏קַדְּשׁוּ־צוֹם֙ קִרְא֣וּ עֲצָרָ֔ה אִסְפ֣וּ זְקֵנִ֗ים כֹּ֚ל יֹשְׁבֵ֣י הָאָ֔רֶץ בֵּ֖ית יְהוָ֣ה אֱלֹהֵיכֶ֑ם וְזַעֲק֖וּ אֶל־יְהוָֽה׃

‎15 ‏אֲהָ֖הּ לַיּ֑וֹם כִּ֤י קָרוֹב֙ י֣וֹם יְהוָ֔ה וּכְשֹׁ֖ד מִשַׁדַּ֥י¹ יָבֽוֹא׃

‎16 ‏הֲל֛וֹא נֶ֥גֶד עֵינֵ֖ינוּ אֹ֣כֶל נִכְרָ֑ת מִבֵּ֥ית אֱלֹהֵ֖ינוּ שִׂמְחָ֥ה וָגִֽיל׃

‎17 ‏עָבְשׁ֣וּ פְרֻד֗וֹת תַּ֚חַת מֶגְרְפֹ֣תֵיהֶ֔ם נָשַׁ֙מּוּ֙ אֹֽצָר֔וֹת נֶהֶרְס֖וּ מַמְּגֻר֑וֹת כִּ֥י הֹבִ֖ישׁ דָּגָֽן׃

‎18 ‏מַה־נֶּאֶנְחָ֣ה בְהֵמָ֗ה נָבֹ֙כוּ֙ עֶדְרֵ֣י בָקָ֔ר כִּ֛י אֵ֥ין מִרְעֶ֖ה לָהֶ֑ם גַּם־עֶדְרֵ֥י הַצֹּ֖אן נֶאְשָֽׁמוּ׃

‎19 ‏אֵלֶ֥יךָ יְהוָ֖ה אֶקְרָ֑א כִּ֣י אֵ֗שׁ אָֽכְלָה֙ נְא֣וֹת מִדְבָּ֔ר וְלֶ֣הָבָ֔ה לִהֲטָ֖ה כָּל־עֲצֵ֥י הַשָּׂדֶֽה׃

‎20 ‏גַּם־בַּהֲמ֥וֹת שָׂדֶ֖ה תַּעֲר֣וֹג אֵלֶ֑יךָ כִּ֤י יָֽבְשׁוּ֙ אֲפִ֣יקֵי מָ֔יִם וְאֵ֕שׁ אָכְלָ֖ה נְא֥וֹת הַמִּדְבָּֽר׃ פ

1 dəḇar-yəhwâ ’ăšer hāyâ ’el-ywō’ēl ben-pəṯû’ēl:

2 šimə‘û-zō’ṯ hazzəqēnîm wəha’ăzînû kōl ywōšəḇê hā’āreṣ hehāyəṯâ zzō’ṯ bîmêḵem wə’im bîmê ’ăḇōṯêḵem:

3 ‘āleyhā liḇənêḵem sapērû ûḇənêḵem liḇənêhem ûḇənêhem ləḏwōr ’^aḥēr:

4 yeṯer hagāzām ’āḵal hā’arəbeh wəyeṯer hā’arəbeh ’āḵal hayyāleq wəyeṯer hayyeleq ’āḵal heḥāsîl:

5 hāqîṣû šikwōrîm ûḇəḵû wəhêlilû kāl-šōṯê yāyin ‘al-‘āsîs kî niḵəraṯ mipîḵem:

6 kî-ḡwōy ‘ālâ ‘al-’arəṣî ‘āṣûm wə’ên misəpār šinnāyw šinnê ’arəyēh ûməṯallə‘wōṯ lāḇî’ lwō:

7 śām gafənî ləšammâ ûṯə’ēnāṯî liqəṣāfâ ḥāśōf ḥăśāfāh wəhišəlîḵə hiləbînû śārîḡeyhā:

8 ’ĕlî kiḇəṯûlâ ḥăḡuraṯ-śaq ‘al-b^a‘al nə‘ûreyhā:

9 hāḵəraṯ minəḥâ wāneseḵə mibêṯ yəhwâ ’āḇəlû hakōhănîm məšārəṯê yəhwâ:

10 šudaḏ śāḏeh ’āḇəlâ ’ăḏāmâ kî šudaḏ dāḡān hwōḇîš tîrwōš ’uməlal yiṣəhār:

11 hōḇîšû ’ikārîm hêlîlû kōrəmîm ‘al-ḥiṭṭâ wə‘al-śə‘ōrâ kî ’āḇaḏ qəṣîr śāḏeh:

12 hagefen hwōḇîšâ wəhatə’ēnâ ’uməlālâ rimmwōn gam-tāmār wəṯapûḥa kāl-‘ăṣê haśśāḏeh yāḇēšû kî-hōḇîš śāśwōn min-bənê ’āḏām: s

13 ḥiḡərû wəsifəḏû hakōhănîm hêlîlû məšārəṯê mizəbēḥa bō’û lînû ḇaśśaqqîm məšārəṯê ’ĕlōhāy kî nimən^a‘ mibêṯ ’ĕlōhêḵem minəḥâ wānāseḵə:

14 qadəšû-ṣwōm qirə’û ‘ăṣārâ ’isəfû zəqēnîm kōl yōšəḇê hā’āreṣ bêṯ yəhwâ ’ĕlōhêḵem wəz^a‘ăqû ’el-yəhwâ:

15 ’ăhāh layywōm kî qārwōḇ ywōm yəhwâ ûḵəšōḏ mišaday¹ yāḇwō’:

16 hălwō’ neḡeḏ ‘ênênû ’ōḵel niḵərāṯ mibêṯ ’ĕlōhênû śiməḥâ wāḡîl:

17 ‘āḇəšû fəruḏwōṯ t^aḥaṯ meḡərəfōṯêhem nāšammû ’ōṣārwōṯ neherəsû mamməḡurwōṯ kî hōḇîš dāḡān:

18 mah-nne’enəḥâ ḇəhēmâ nāḇōḵû ‘eḏərê ḇāqār kî ’ên mirə‘eh lâem gam-‘eḏərê haṣṣō’n ne’əšāmû:

19 ’ēleyḵā yəhwâ ’eqərā’ kî ’ēš ’āḵəlâ nə’wōṯ miḏəbār wəlehāḇâ lihăṭâ kāl-‘ăṣê haśśāḏeh:

20 gam-bahămwōṯ śāḏeh t^a‘ărwōḡ ’ēleyḵā kî yāḇəšû ’ăfîqê māyim wə’ēš ’āḵəlâ nə’wōṯ hammiḏəbār: f