Joshua (Yehoshua) Chapter 2

‎1 ‏וַיִּשְׁלַ֣ח יְהוֹשֻׁ֣עַ־בִּן־נ֠וּן מִֽן־הַשִּׁטִּ֞ים שְׁנַֽיִם־אֲנָשִׁ֤ים מְרַגְּלִים֙ חֶ֣רֶשׁ לֵאמֹ֔ר לְכ֛וּ רְא֥וּ אֶת־הָאָ֖רֶץ וְאֶת־יְרִיח֑וֹ וַיֵּ֨לְכ֜וּ וַ֠יָּבֹאוּ בֵּית־אִשָּׁ֥ה זוֹנָ֛ה וּשְׁמָ֥הּ רָחָ֖ב וַיִּשְׁכְּבוּ־שָֽׁמָּה׃

‎2 ‏וַיֵּ֣אָמַ֔ר לְמֶ֥לֶךְ יְרִיח֖וֹ לֵאמֹ֑ר הִנֵּ֣ה אֲ֠נָשִׁים בָּ֣אוּ הֵ֧נָּה הַלַּ֛יְלָה מִבְּנֵ֥י יִשְׂרָאֵ֖ל לַחְפֹּ֥ר אֶת־הָאָֽרֶץ׃

‎3 ‏וַיִּשְׁלַח֙ מֶ֣לֶךְ יְרִיח֔וֹ אֶל־רָחָ֖ב לֵאמֹ֑ר ה֠וֹצִיאִי הָאֲנָשִׁ֨ים הַבָּאִ֤ים אֵלַ֙יִךְ֙ אֲשֶׁר־בָּ֣אוּ לְבֵיתֵ֔ךְ כִּ֛י לַחְפֹּ֥ר אֶת־כָּל־הָאָ֖רֶץ בָּֽאוּ׃

‎4 ‏וַתִּקַּ֧ח הָֽאִשָּׁ֛ה אֶת־שְׁנֵ֥י הָאֲנָשִׁ֖ים וַֽתִּצְפְּנ֑וֹ וַתֹּ֣אמֶר׀ כֵּ֗ן בָּ֤אוּ אֵלַי֙ הָֽאֲנָשִׁ֔ים וְלֹ֥א יָדַ֖עְתִּי מֵאַ֥יִן הֵֽמָּה׃

‎5 ‏וַיְהִ֨י הַשַּׁ֜עַר לִסְגּ֗וֹר בַּחֹ֙שֶׁךְ֙ וְהָאֲנָשִׁ֣ים יָצָ֔אוּ לֹ֣א יָדַ֔עְתִּי אָ֥נָה הָלְכ֖וּ הָֽאֲנָשִׁ֑ים רִדְפ֥וּ מַהֵ֛ר אַחֲרֵיהֶ֖ם כִּ֥י תַשִּׂיגֽוּם׃

‎6 ‏וְהִ֖יא הֶעֱלָ֣תַם הַגָּ֑גָה וַֽתִּטְמְנֵם֙ בְּפִשְׁתֵּ֣י הָעֵ֔ץ הָעֲרֻכ֥וֹת לָ֖הּ עַל־הַגָּֽג׃

‎7 ‏וְהָאֲנָשִׁ֗ים רָדְפ֤וּ אַֽחֲרֵיהֶם֙ דֶּ֣רֶךְ הַיַּרְדֵּ֔ן עַ֖ל הַֽמַּעְבְּר֑וֹת וְהַשַּׁ֣עַר סָגָ֔רוּ אַחֲרֵ֕י כַּאֲשֶׁ֛ר יָצְא֥וּ הָרֹדְפִ֖ים אַחֲרֵיהֶֽם׃

‎8 ‏וְהֵ֖מָּה טֶ֣רֶם יִשְׁכָּב֑וּן וְהִ֛יא עָלְתָ֥ה עֲלֵיהֶ֖ם עַל־הַגָּֽג׃

‎9 ‏וַתֹּ֙אמֶר֙ אֶל־הָ֣אֲנָשִׁ֔ים יָדַ֕עְתִּי כִּֽי־נָתַ֧ן יְהוָ֛ה לָכֶ֖ם אֶת־הָאָ֑רֶץ וְכִֽי־נָפְלָ֤ה אֵֽימַתְכֶם֙ עָלֵ֔ינוּ וְכִ֥י נָמֹ֛גוּ כָּל־יֹשְׁבֵ֥י הָאָ֖רֶץ מִפְּנֵיכֶֽם׃

‎10 ‏כִּ֣י שָׁמַ֗עְנוּ אֵ֠ת אֲשֶׁר־הוֹבִ֨ישׁ יְהוָ֜ה אֶת־מֵ֤י יַם־סוּף֙ מִפְּנֵיכֶ֔ם בְּצֵאתְכֶ֖ם מִמִּצְרָ֑יִם וַאֲשֶׁ֣ר עֲשִׂיתֶ֡ם לִשְׁנֵי֩ מַלְכֵ֨י הָאֱמֹרִ֜י אֲשֶׁ֨ר בְּעֵ֤בֶר הַיַּרְדֵּן֙ לְסִיחֹ֣ן וּלְע֔וֹג אֲשֶׁ֥ר הֶחֱרַמְתֶּ֖ם אוֹתָֽם׃

‎11 ‏וַנִּשְׁמַע֙ וַיִּמַּ֣ס לְבָבֵ֔נוּ וְלֹא־קָ֨מָה ע֥וֹד ר֛וּחַ בְּאִ֖ישׁ מִפְּנֵיכֶ֑ם כִּ֚י יְהוָ֣ה אֱלֹֽהֵיכֶ֔ם ה֤וּא אֱלֹהִים֙ בַּשָּׁמַ֣יִם מִמַּ֔עַל וְעַל־הָאָ֖רֶץ מִתָּֽחַת׃

‎12 ‏וְעַתָּ֗ה הִשָּֽׁבְעוּ־נָ֥א לִי֙ בַּֽיהוָ֔ה כִּי־עָשִׂ֥יתִי עִמָּכֶ֖ם חָ֑סֶד וַעֲשִׂיתֶ֨ם גַּם־אַתֶּ֜ם עִם־בֵּ֤ית אָבִי֙ חֶ֔סֶד וּנְתַתֶּ֥ם לִ֖י א֥וֹת אֱמֶֽת׃

‎13 ‏וְהַחֲיִתֶ֞ם אֶת־אָבִ֣י וְאֶת־אִמִּ֗י וְאֶת־אַחַי֙ וְאֶת־אחותי אַחְיוֹתַ֔י וְאֵ֖ת כָּל־אֲשֶׁ֣ר לָהֶ֑ם וְהִצַּלְתֶּ֥ם אֶת־נַפְשֹׁתֵ֖ינוּ מִמָּֽוֶת׃

‎14 ‏וַיֹּ֧אמְרוּ לָ֣הּ הָאֲנָשִׁ֗ים נַפְשֵׁ֤נוּ תַחְתֵּיכֶם֙ לָמ֔וּת אִ֚ם לֹ֣א תַגִּ֔ידוּ אֶת־דְּבָרֵ֖נוּ זֶ֑ה וְהָיָ֗ה בְּתֵת־יְהוָ֥ה לָ֙נוּ֙ אֶת־הָאָ֔רֶץ וְעָשִׂ֥ינוּ עִמָּ֖ךְ חֶ֥סֶד וֶאֱמֶֽת׃

‎15 ‏וַתּוֹרִדֵ֥ם בַּחֶ֖בֶל בְּעַ֣ד הַֽחַלּ֑וֹן כִּ֤י בֵיתָהּ֙ בְּקִ֣יר הַֽחוֹמָ֔ה וּבַֽחוֹמָ֖ה הִ֥יא יוֹשָֽׁבֶת׃

‎16 ‏וַתֹּ֤אמֶר לָהֶם֙ הָהָ֣רָה לֵּ֔כוּ פֶּֽן־יִפְגְּע֥וּ בָכֶ֖ם הָרֹדְפִ֑ים וְנַחְבֵּתֶ֨ם שָׁ֜מָּה שְׁלֹ֣שֶׁת יָמִ֗ים עַ֚ד שׁ֣וֹב הָרֹֽדְפִ֔ים וְאַחַ֖ר תֵּלְכ֥וּ לְדַרְכְּכֶֽם׃

‎17 ‏וַיֹּאמְר֥וּ אֵלֶ֖יהָ הָאֲנָשִׁ֑ים נְקִיִּ֣ם אֲנַ֔חְנוּ מִשְּׁבֻעָתֵ֥ךְ הַזֶּ֖ה אֲשֶׁ֥ר הִשְׁבַּעְתָּֽנוּ׃

‎18 ‏הִנֵּ֛ה אֲנַ֥חְנוּ בָאִ֖ים בָּאָ֑רֶץ אֶת־תִּקְוַ֡ת חוּט֩ הַשָּׁנִ֨י הַזֶּ֜ה תִּקְשְׁרִ֗י בַּֽחַלּוֹן֙ אֲשֶׁ֣ר הוֹרַדְתֵּ֣נוּ ב֔וֹ וְאֶת־אָבִ֨יךְ וְאֶת־אִמֵּ֜ךְ וְאֶת־אַחַ֗יִךְ וְאֵת֙ כָּל־בֵּ֣ית אָבִ֔יךְ תַּאַסְפִ֥י אֵלַ֖יִךְ הַבָּֽיְתָה׃

‎19 ‏וְהָיָ֡ה כֹּ֣ל אֲשֶׁר־יֵצֵא֩ מִדַּלְתֵ֨י בֵיתֵ֧ךְ׀ הַח֛וּצָה דָּמ֥וֹ בְרֹאשׁ֖וֹ וַאֲנַ֣חְנוּ נְקִיִּ֑ם וְ֠כֹל אֲשֶׁ֨ר יִֽהְיֶ֤ה אִתָּךְ֙ בַּבַּ֔יִת דָּמ֣וֹ בְרֹאשֵׁ֔נוּ אִם־יָ֖ד תִּֽהְיֶה־בּֽוֹ׃

‎20 ‏וְאִם־תַּגִּ֖ידִי אֶת־דְּבָרֵ֣נוּ זֶ֑ה וְהָיִ֣ינוּ נְקִיִּ֔ם מִשְּׁבֻעָתֵ֖ךְ אֲשֶׁ֥ר הִשְׁבַּעְתָּֽנוּ׃

‎21 ‏וַתֹּ֙אמֶר֙ כְּדִבְרֵיכֶ֣ם כֶּן־ה֔וּא וַֽתְּשַׁלְּחֵ֖ם וַיֵּלֵ֑כוּ וַתִּקְשֹׁ֛ר אֶת־תִּקְוַ֥ת הַשָּׁנִ֖י בַּחַלּֽוֹן׃

‎22 ‏וַיֵּלְכוּ֙ וַיָּבֹ֣אוּ הָהָ֔רָה וַיֵּ֤שְׁבוּ שָׁם֙ שְׁלֹ֣שֶׁת יָמִ֔ים עַד־שָׁ֖בוּ הָרֹדְפִ֑ים וַיְבַקְשׁ֧וּ הָרֹדְפִ֛ים בְּכָל־הַדֶּ֖רֶךְ וְלֹ֥א מָצָֽאוּ׃

‎23 ‏וַיָּשֻׁ֜בוּ שְׁנֵ֤י הָֽאֲנָשִׁים֙ וַיֵּרְד֣וּ מֵֽהָהָ֔ר וַיַּעַבְרוּ֙ וַיָּבֹ֔אוּ אֶל־יְהוֹשֻׁ֖עַ בִּן־נ֑וּן וַיְסַ֨פְּרוּ־ל֔וֹ אֵ֥ת כָּל־הַמֹּצְא֖וֹת אוֹתָֽם׃

‎24 ‏וַיֹּאמְרוּ֙ אֶל־יְהוֹשֻׁ֔עַ כִּֽי־נָתַ֧ן יְהוָ֛ה בְּיָדֵ֖נוּ אֶת־כָּל־הָאָ֑רֶץ וְגַם־נָמֹ֛גוּ כָּל־יֹשְׁבֵ֥י הָאָ֖רֶץ מִפָּנֵֽינוּ׃ ס

1 wayyišəl^aḥ yəhwōšu‘a-bin-nûn min-haššiṭṭîm šənayim-’ănāšîm məragəlîm ḥereš lē’mōr ləḵû rə’û ’eṯ-hā’āreṣ wə’eṯ-yərîḥwō wayyēləḵû wayyāḇō’û bêṯ-’iššâ zwōnâ ûšəmāh rāḥāḇ wayyišəkəḇû-šāmmâ:

2 wayyē’āmar ləmeleḵə yərîḥwō lē’mōr hinnēh ’ănāšîm bā’û hēnnâ hallayəlâ mibənê yiśərā’ēl l^aḥəpōr ’eṯ-hā’āreṣ:

3 wayyišəl^aḥ meleḵə yərîḥwō ’el-rāḥāḇ lē’mōr hwōṣî’î hā’ănāšîm habā’îm ’ēlayiḵə ’ăšer-bā’û ləḇêṯēḵə kî l^aḥəpōr ’eṯ-kāl-hā’āreṣ bā’û:

4 watiqq^aḥ hā’iššâ ’eṯ-šənê hā’ănāšîm watiṣəpənwō watō’mer| kēn bā’û ’ēlay hā’ănāšîm wəlō’ yāḏ^a‘ətî mē’ayin hēmmâ:

5 wayəhî hašš^a‘ar lisəgwōr b^aḥōšeḵə wəhā’ănāšîm yāṣā’û lō’ yāḏ^a‘ətî ’ānâ hāləḵû hā’ănāšîm riḏəfû mahēr ’^aḥărêhem kî ṯaśśîḡûm:

6 wəhî’ he‘ĕlāṯam hagāḡâ watiṭəmənēm bəfišətê hā‘ēṣ hā‘ăruḵwōṯ lāh ‘al-hagāḡ:

7 wəhā’ănāšîm rāḏəfû ’^aḥărêhem dereḵə hayyarədēn ‘al hamm^a‘əbərwōṯ wəhašš^a‘ar sāḡārû ’^aḥărê ka’ăšer yāṣə’û hārōḏəfîm ’^aḥărêhem:

8 wəhēmmâ ṭerem yišəkāḇûn wəhî’ ‘āləṯâ ‘ălêhem ‘al-hagāḡ:

9 watō’mer ’el-hā’ănāšîm yāḏ^a‘ətî kî-nāṯan yəhwâ lāḵem ’eṯ-hā’āreṣ wəḵî-nāfəlâ ’êmaṯəḵem ‘ālênû wəḵî nāmōḡû kāl-yōšəḇê hā’āreṣ mipənêḵem:

10 kî šām^a‘ənû ’ēṯ ’ăšer-hwōḇîš yəhwâ ’eṯ-mê yam-sûf mipənêḵem bəṣē’ṯəḵem mimmiṣərāyim wa’ăšer ‘ăśîṯem lišənê maləḵê hā’ĕmōrî ’ăšer bə‘ēḇer hayyarədēn ləsîḥōn ûlə‘wōḡ ’ăšer heḥĕramətem ’wōṯām:

11 wannišəm^a‘ wayyimmas ləḇāḇēnû wəlō’-qāmâ ‘wōḏ rûḥa bə’îš mipənêḵem kî yəhwâ ’ĕlōhêḵem hû’ ’ĕlōhîm baššāmayim mimm^a‘al wə‘al-hā’āreṣ mitāḥaṯ:

12 wə‘atâ hiššāḇə‘û-nā’ lî bayhwâ kî-‘āśîṯî ‘immāḵem ḥāseḏ w^a‘ăśîṯem gam-’atem ‘im-bêṯ ’āḇî ḥeseḏ ûnəṯatem lî ’wōṯ ’ĕmeṯ:

13 wəh^aḥăyiṯem ’eṯ-’āḇî wə’eṯ-’immî wə’eṯ-’^aḥay wə’eṯ-’^aḥwōṯay ’^aḥəywōṯay wə’ēṯ kāl-’ăšer lâem wəhiṣṣalətem ’eṯ-nafəšōṯênû mimmāweṯ:

14 wayyō’mərû lāh hā’ănāšîm nafəšēnû ṯ^aḥətêḵem lāmûṯ ’im lō’ ṯagîḏû ’eṯ-dəḇārēnû zeh wəhāyâ bəṯēṯ-yəhwâ lānû ’eṯ-hā’āreṣ wə‘āśînû ‘immāḵə ḥeseḏ we’ĕmeṯ:

15 watwōriḏēm b^aḥeḇel bə‘aḏ h^aḥallwōn kî ḇêṯāh bəqîr h^aḥwōmâ ûḇ^aḥwōmâ hî’ ywōšāḇeṯ:

16 watō’mer lâem hâārâ llēḵû pen-yifəgə‘û ḇāḵem hārōḏəfîm wən^aḥəbēṯem šāmmâ šəlōšeṯ yāmîm ‘aḏ šwōḇ hārōḏəfîm wə’^aḥar tēləḵû ləḏarəkəḵem:

17 wayyō’mərû ’ēleyhā hā’ănāšîm nəqîyim ’ăn^aḥənû miššəḇu‘āṯēḵə hazzeh ’ăšer hišəb^a‘ətānû:

18 hinnēh ’ăn^aḥənû ḇā’îm bā’āreṣ ’eṯ-tiqəwaṯ ḥûṭ haššānî hazzeh tiqəšərî b^aḥallwōn ’ăšer hwōraḏətēnû ḇwō wə’eṯ-’āḇîḵə wə’eṯ-’immēḵə wə’eṯ-’^aḥayiḵə wə’ēṯ kāl-bêṯ ’āḇîḵə ta’asəfî ’ēlayiḵə habāyəṯâ:

19 wəhāyâ kōl ’ăšer-yēṣē’ midaləṯê ḇêṯēḵə| h^aḥûṣâ dāmwō ḇərō’šwō wa’ăn^aḥənû nəqîyim wəḵōl ’ăšer yihəyeh ’itāḵə babayiṯ dāmwō ḇərō’šēnû ’im-yāḏ tihəyeh-bwō:

20 wə’im-tagîḏî ’eṯ-dəḇārēnû zeh wəhāyînû nəqîyim miššəḇu‘āṯēḵə ’ăšer hišəb^a‘ətānû:

21 watō’mer kəḏiḇərêḵem ken-hû’ watəšalləḥēm wayyēlēḵû watiqəšōr ’eṯ-tiqəwaṯ haššānî b^aḥallwōn:

22 wayyēləḵû wayyāḇō’û hâārâ wayyēšəḇû šām šəlōšeṯ yāmîm ‘aḏ-šāḇû hārōḏəfîm wayəḇaqəšû hārōḏəfîm bəḵāl-hadereḵə wəlō’ māṣā’û:

23 wayyāšuḇû šənê hā’ănāšîm wayyērəḏû mēhâār wayy^a‘aḇərû wayyāḇō’û ’el-yəhwōšu‘a bin-nûn wayəsapərû-lwō ’ēṯ kāl-hammōṣə’wōṯ ’wōṯām:

24 wayyō’mərû ’el-yəhwōšu‘a kî-nāṯan yəhwâ bəyāḏēnû ’eṯ-kāl-hā’āreṣ wəḡam-nāmōḡû kāl-yōšəḇê hā’āreṣ mipānênû: s