Joshua (Yehoshua) Chapter 7

‎1 ‏וַיִּמְעֲל֧וּ בְנֵֽי־יִשְׂרָאֵ֛ל מַ֖עַל בַּחֵ֑רֶם וַיִּקַּ֡ח עָכָ֣ן בֶּן־כַּרְמִי֩ בֶן־זַבְדִּ֨י בֶן־זֶ֜רַח לְמַטֵּ֤ה יְהוּדָה֙ מִן־הַחֵ֔רֶם וַיִּֽחַר־אַ֥ף יְהוָ֖ה בִּבְנֵ֥י יִשְׂרָאֵֽל׃

‎2 ‏וַיִּשְׁלַח֩ יְהוֹשֻׁ֨עַ אֲנָשִׁ֜ים מִֽירִיח֗וֹ הָעַ֞י אֲשֶׁ֨ר עִם־בֵּ֥ית אָ֙וֶן֙ מִקֶּ֣דֶם לְבֵֽית־אֵ֔ל וַיֹּ֤אמֶר אֲלֵיהֶם֙ לֵאמֹ֔ר עֲל֖וּ וְרַגְּל֣וּ אֶת־הָאָ֑רֶץ וַֽיַּעֲלוּ֙ הָאֲנָשִׁ֔ים וַֽיְרַגְּל֖וּ אֶת־הָעָֽי׃

‎3 ‏וַיָּשֻׁ֣בוּ אֶל־יְהוֹשֻׁ֗עַ וַיֹּאמְר֣וּ אֵלָיו֮ אַל־יַ֣עַל כָּל־הָעָם֒ כְּאַלְפַּ֣יִם אִ֗ישׁ א֚וֹ כִּשְׁלֹ֣שֶׁת אֲלָפִ֣ים אִ֔ישׁ יַעֲל֖וּ וְיַכּ֣וּ אֶת־הָעָ֑י אַל־תְּיַגַּע־שָׁ֙מָּה֙ אֶת־כָּל־הָעָ֔ם כִּ֥י מְעַ֖ט הֵֽמָּה׃

‎4 ‏וַיַּעֲל֤וּ מִן־הָעָם֙ שָׁ֔מָּה כִּשְׁלֹ֥שֶׁת אֲלָפִ֖ים אִ֑ישׁ וַיָּנֻ֕סוּ לִפְנֵ֖י אַנְשֵׁ֥י הָעָֽי׃

‎5 ‏וַיַּכּ֨וּ מֵהֶ֜ם אַנְשֵׁ֣י הָעַ֗י כִּשְׁלֹשִׁ֤ים וְשִׁשָּׁה֙ אִ֔ישׁ וַֽיִּרְדְּפ֞וּם לִפְנֵ֤י הַשַּׁ֙עַר֙ עַד־הַשְּׁבָרִ֔ים וַיַּכּ֖וּם בַּמּוֹרָ֑ד וַיִּמַּ֥ס לְבַב־הָעָ֖ם וַיְהִ֥י לְמָֽיִם׃

‎6 ‏וַיִּקְרַ֨ע יְהוֹשֻׁ֜עַ שִׂמְלֹתָ֗יו וַיִּפֹּל֩ עַל־פָּנָ֨יו אַ֜רְצָה לִפְנֵ֨י אֲר֤וֹן יְהוָה֙ עַד־הָעֶ֔רֶב ה֖וּא וְזִקְנֵ֣י יִשְׂרָאֵ֑ל וַיַּעֲל֥וּ עָפָ֖ר עַל־רֹאשָֽׁם׃

‎7 ‏וַיֹּ֨אמֶר יְהוֹשֻׁ֜עַ אֲהָ֣הּ׀ אֲדֹנָ֣י יְהוִ֗ה לָ֠מָה הֵעֲבַ֨רְתָּ הַעֲבִ֜יר אֶת־הָעָ֤ם הַזֶּה֙ אֶת־הַיַּרְדֵּ֔ן לָתֵ֥ת אֹתָ֛נוּ בְּיַ֥ד הָאֱמֹרִ֖י לְהַאֲבִידֵ֑נוּ וְלוּ֙ הוֹאַ֣לְנוּ וַנֵּ֔שֶׁב בְּעֵ֖בֶר הַיַּרְדֵּֽן׃

‎8 ‏בִּ֖י אֲדֹנָ֑י מָ֣ה אֹמַ֔ר אַ֠חֲרֵי אֲשֶׁ֨ר הָפַ֧ךְ יִשְׂרָאֵ֛ל עֹ֖רֶף לִפְנֵ֥י אֹיְבָֽיו׃

‎9 ‏וְיִשְׁמְע֣וּ הַֽכְּנַעֲנִ֗י וְכֹל֙ יֹשְׁבֵ֣י הָאָ֔רֶץ וְנָסַ֣בּוּ עָלֵ֔ינוּ וְהִכְרִ֥יתוּ אֶת־שְׁמֵ֖נוּ מִן־הָאָ֑רֶץ וּמַֽה־תַּעֲשֵׂ֖ה לְשִׁמְךָ֥ הַגָּדֽוֹל׃ ס

‎10 ‏וַיֹּ֧אמֶר יְהוָ֛ה אֶל־יְהוֹשֻׁ֖עַ קֻ֣ם לָ֑ךְ לָ֣מָּה זֶּ֔ה אַתָּ֖ה נֹפֵ֥ל עַל־פָּנֶֽיךָ׃

‎11 ‏חָטָא֙ יִשְׂרָאֵ֔ל וְגַם֙ עָבְר֣וּ אֶת־בְּרִיתִ֔י אֲשֶׁ֥ר צִוִּ֖יתִי אוֹתָ֑ם וְגַ֤ם לָֽקְחוּ֙ מִן־הַחֵ֔רֶם וְגַ֤ם גָּֽנְבוּ֙ וְגַ֣ם כִּֽחֲשׁ֔וּ וְגַ֖ם שָׂ֥מוּ בִכְלֵיהֶֽם׃

‎12 ‏וְלֹ֨א יֻכְל֜וּ בְּנֵ֣י יִשְׂרָאֵ֗ל לָקוּם֙ לִפְנֵ֣י אֹיְבֵיהֶ֔ם עֹ֗רֶף יִפְנוּ֙ לִפְנֵ֣י אֹֽיְבֵיהֶ֔ם כִּ֥י הָי֖וּ לְחֵ֑רֶם לֹ֤א אוֹסִיף֙ לִֽהְי֣וֹת עִמָּכֶ֔ם אִם־לֹ֥א תַשְׁמִ֛ידוּ הַחֵ֖רֶם מִֽקִּרְבְּכֶֽם׃

‎13 ‏קֻ֚ם קַדֵּ֣שׁ אֶת־הָעָ֔ם וְאָמַרְתָּ֖ הִתְקַדְּשׁ֣וּ לְמָחָ֑ר כִּ֣י כֹה֩ אָמַ֨ר יְהוָ֜ה אֱלֹהֵ֣י יִשְׂרָאֵ֗ל חֵ֤רֶם בְּקִרְבְּךָ֙ יִשְׂרָאֵ֔ל לֹ֣א תוּכַ֗ל לָקוּם֙ לִפְנֵ֣י אֹיְבֶ֔יךָ עַד־הֲסִירְכֶ֥ם הַחֵ֖רֶם מִֽקִּרְבְּכֶֽם׃

‎14 ‏וְנִקְרַבְתֶּ֥ם בַּבֹּ֖קֶר לְשִׁבְטֵיכֶ֑ם וְהָיָ֡ה הַשֵּׁבֶט֩ אֲשֶׁר־יִלְכְּדֶ֨נּוּ יְהוָ֜ה יִקְרַ֣ב לַמִּשְׁפָּח֗וֹת וְהַמִּשְׁפָּחָ֞ה אֲשֶֽׁר־יִלְכְּדֶ֤נָּה יְהוָה֙ תִּקְרַ֣ב לַבָּתִּ֔ים וְהַבַּ֙יִת֙ אֲשֶׁ֣ר יִלְכְּדֶ֣נּוּ יְהוָ֔ה יִקְרַ֖ב לַגְּבָרִֽים׃

‎15 ‏וְהָיָה֙ הַנִּלְכָּ֣ד בַּחֵ֔רֶם יִשָּׂרֵ֣ף בָּאֵ֔שׁ אֹת֖וֹ וְאֶת־כָּל־אֲשֶׁר־ל֑וֹ כִּ֤י עָבַר֙ אֶת־בְּרִ֣ית יְהוָ֔ה וְכִֽי־עָשָׂ֥ה נְבָלָ֖ה בְּיִשְׂרָאֵֽל׃

‎16 ‏וַיַּשְׁכֵּ֤ם יְהוֹשֻׁ֙עַ֙ בַּבֹּ֔קֶר וַיַּקְרֵ֥ב אֶת־יִשְׂרָאֵ֖ל לִשְׁבָטָ֑יו וַיִּלָּכֵ֖ד שֵׁ֥בֶט יְהוּדָֽה׃

‎17 ‏וַיַּקְרֵב֙ אֶת־מִשְׁפַּ֣חַת יְהוּדָ֔ה וַיִּלְכֹּ֕ד אֵ֖ת מִשְׁפַּ֣חַת הַזַּרְחִ֑י וַיַּקְרֵ֞ב אֶת־מִשְׁפַּ֤חַת הַזַּרְחִי֙ לַגְּבָרִ֔ים וַיִּלָּכֵ֖ד זַבְדִּֽי׃

‎18 ‏וַיַּקְרֵ֥ב אֶת־בֵּית֖וֹ לַגְּבָרִ֑ים וַיִּלָּכֵ֗ד עָכָ֞ן בֶּן־כַּרְמִ֧י בֶן־זַבְדִּ֛י בֶּן־זֶ֖רַח לְמַטֵּ֥ה יְהוּדָֽה׃

‎19 ‏וַיֹּ֨אמֶר יְהוֹשֻׁ֜עַ אֶל־עָכָ֗ן בְּנִי֙ שִֽׂים־נָ֣א כָב֗וֹד לַֽיהוָ֛ה אֱלֹהֵ֥י יִשְׂרָאֵ֖ל וְתֶן־ל֣וֹ תוֹדָ֑ה וְהַגֶּד־נָ֥א לִי֙ מֶ֣ה עָשִׂ֔יתָ אַל־תְּכַחֵ֖ד מִמֶּֽנִּי׃

‎20 ‏וַיַּ֧עַן עָכָ֛ן אֶת־יְהוֹשֻׁ֖עַ וַיֹּאמַ֑ר אָמְנָ֗ה אָנֹכִ֤י חָטָ֙אתִי֙ לַֽיהוָה֙ אֱלֹהֵ֣י יִשְׂרָאֵ֔ל וְכָזֹ֥את וְכָזֹ֖את עָשִֽׂיתִי׃

‎21 ‏ואראה וָאֵ֣רֶא בַשָּׁלָ֡ל אַדֶּ֣רֶת שִׁנְעָר֩ אַחַ֨ת טוֹבָ֜ה וּמָאתַ֧יִם שְׁקָלִ֣ים כֶּ֗סֶף וּלְשׁ֨וֹן זָהָ֤ב אֶחָד֙ חֲמִשִּׁ֤ים שְׁקָלִים֙ מִשְׁקָל֔וֹ וָֽאֶחְמְדֵ֖ם וָֽאֶקָּחֵ֑ם וְהִנָּ֨ם טְמוּנִ֥ים בָּאָ֛רֶץ בְּת֥וֹךְ הָאָֽהֳלִ֖י וְהַכֶּ֥סֶף תַּחְתֶּֽיהָ׃

‎22 ‏וַיִּשְׁלַ֤ח יְהוֹשֻׁ֙עַ֙ מַלְאָכִ֔ים וַיָּרֻ֖צוּ הָאֹ֑הֱלָה וְהִנֵּ֧ה טְמוּנָ֛ה בְּאָהֳל֖וֹ וְהַכֶּ֥סֶף תַּחְתֶּֽיהָ׃

‎23 ‏וַיִּקָּחוּם֙ מִתּ֣וֹךְ הָאֹ֔הֶל וַיְבִאוּם֙ אֶל־יְהוֹשֻׁ֔עַ וְאֶ֖ל כָּל־בְּנֵ֣י יִשְׂרָאֵ֑ל וַיַּצִּקֻ֖ם לִפְנֵ֥י יְהוָֽה׃

‎24 ‏וַיִּקַּ֣ח יְהוֹשֻׁ֣עַ אֶת־עָכָ֣ן בֶּן־זֶ֡רַח וְאֶת־הַכֶּ֣סֶף וְאֶת־הָאַדֶּ֣רֶת וְֽאֶת־לְשׁ֣וֹן הַזָּהָ֡ב וְֽאֶת־בָּנָ֡יו וְֽאֶת־בְּנֹתָ֡יו וְאֶת־שׁוֹרוֹ֩ וְאֶת־חֲמֹר֨וֹ וְאֶת־צֹאנ֤וֹ וְאֶֽת־אָהֳלוֹ֙ וְאֶת־כָּל־אֲשֶׁר־ל֔וֹ וְכָל־יִשְׂרָאֵ֖ל עִמּ֑וֹ וַיַּעֲל֥וּ אֹתָ֖ם עֵ֥מֶק עָכֽוֹר׃

‎25 ‏וַיֹּ֤אמֶר יְהוֹשֻׁ֙עַ֙ מֶ֣ה עֲכַרְתָּ֔נוּ יַעְכֳּרְךָ֥ יְהוָ֖ה בַּיּ֣וֹם הַזֶּ֑ה וַיִּרְגְּמ֨וּ אֹת֤וֹ כָל־יִשְׂרָאֵל֙ אֶ֔בֶן וַיִּשְׂרְפ֤וּ אֹתָם֙ בָּאֵ֔שׁ וַיִּסְקְל֥וּ אֹתָ֖ם בָּאֲבָנִֽים׃

‎26 ‏וַיָּקִ֨ימוּ עָלָ֜יו גַּל־אֲבָנִ֣ים גָּד֗וֹל עַ֚ד הַיּ֣וֹם הַזֶּ֔ה וַיָּ֥שָׁב יְהוָ֖ה מֵחֲר֣וֹן אַפּ֑וֹ עַל־כֵּ֠ן קָרָ֞א שֵׁ֣ם הַמָּק֤וֹם הַהוּא֙ עֵ֣מֶק עָכ֔וֹר עַ֖ד הַיּ֥וֹם הַזֶּֽה׃ פ

1 wayyimə‘ălû ḇənê-yiśərā’ēl m^a‘al b^aḥērem wayyiqq^aḥ ‘āḵān ben-karəmî ḇen-zaḇədî ḇen-zer^aḥ ləmaṭṭēh yəhûḏâ min-h^aḥērem wayyiḥar-’af yəhwâ biḇənê yiśərā’ēl:

2 wayyišəl^aḥ yəhwōšu‘a ’ănāšîm mîrîḥwō hā‘ay ’ăšer ‘im-bêṯ ’āwen miqqeḏem ləḇêṯ-’ēl wayyō’mer ’ălêhem lē’mōr ‘ălû wəragəlû ’eṯ-hā’āreṣ wayy^a‘ălû hā’ănāšîm wayəragəlû ’eṯ-hā‘āy:

3 wayyāšuḇû ’el-yəhwōšu‘a wayyō’mərû ’ēlāyw ’al-y^a‘al kāl-hā‘ām kə’aləpayim ’îš ’wō kišəlōšeṯ ’ălāfîm ’îš y^a‘ălû wəyakû ’eṯ-hā‘āy ’al-təyag^a‘-šāmmâ ’eṯ-kāl-hā‘ām kî mə‘aṭ hēmmâ:

4 wayy^a‘ălû min-hā‘ām šāmmâ kišəlōšeṯ ’ălāfîm ’îš wayyānusû lifənê ’anəšê hā‘āy:

5 wayyakû mēhem ’anəšê hā‘ay kišəlōšîm wəšiššâ ’îš wayyirədəfûm lifənê hašš^a‘ar ‘aḏ-haššəḇārîm wayyakûm bammwōrāḏ wayyimmas ləḇaḇ-hā‘ām wayəhî ləmāyim:

6 wayyiqər^a‘ yəhwōšu‘a śiməlōṯāyw wayyipōl ‘al-pānāyw ’arəṣâ lifənê ’ărwōn yəhwâ ‘aḏ-hā‘ereḇ hû’ wəziqənê yiśərā’ēl wayy^a‘ălû ‘āfār ‘al-rō’šām:

7 wayyō’mer yəhwōšu‘a ’ăhāh| ’ăḏōnāy yəhwih lāmâ hē‘ăḇarətā h^a‘ăḇîr ’eṯ-hā‘ām hazzeh ’eṯ-hayyarədēn lāṯēṯ ’ōṯānû bəyaḏ hā’ĕmōrî ləha’ăḇîḏēnû wəlû hwō’alənû wannēšeḇ bə‘ēḇer hayyarədēn:

8 bî ’ăḏōnāy mâ ’ōmar ’^aḥărê ’ăšer hāfaḵə yiśərā’ēl ‘ōref lifənê ’ōyəḇāyw:

9 wəyišəmə‘û hakən^a‘ănî wəḵōl yōšəḇê hā’āreṣ wənāsabû ‘ālênû wəhiḵərîṯû ’eṯ-šəmēnû min-hā’āreṣ ûmah-t^a‘ăśēh ləšiməḵā hagāḏwōl: s

10 wayyō’mer yəhwâ ’el-yəhwōšu‘a qum lāḵə lāmmâ zzeh ’atâ nōfēl ‘al-pāneyḵā:

11 ḥāṭā’ yiśərā’ēl wəḡam ‘āḇərû ’eṯ-bərîṯî ’ăšer ṣiûîṯî ’wōṯām wəḡam lāqəḥû min-h^aḥērem wəḡam gānəḇû wəḡam kiḥăšû wəḡam śāmû ḇiḵəlêhem:

12 wəlō’ yuḵəlû bənê yiśərā’ēl lāqûm lifənê ’ōyəḇêhem ‘ōref yifənû lifənê ’ōyəḇêhem kî hāyû ləḥērem lō’ ’wōsîf lihəywōṯ ‘immāḵem ’im-lō’ ṯašəmîḏû h^aḥērem miqqirəbəḵem:

13 qum qadēš ’eṯ-hā‘ām wə’āmarətā hiṯəqadəšû ləmāḥār kî ḵōh ’āmar yəhwâ ’ĕlōhê yiśərā’ēl ḥērem bəqirəbəḵā yiśərā’ēl lō’ ṯûḵal lāqûm lifənê ’ōyəḇeyḵā ‘aḏ-hăsîrəḵem h^aḥērem miqqirəbəḵem:

14 wəniqəraḇətem babōqer ləšiḇəṭêḵem wəhāyâ haššēḇeṭ ’ăšer-yiləkəḏennû yəhwâ yiqəraḇ lammišəpāḥwōṯ wəhammišəpāḥâ ’ăšer-yiləkəḏennâ yəhwâ tiqəraḇ labātîm wəhabayiṯ ’ăšer yiləkəḏennû yəhwâ yiqəraḇ lagəḇārîm:

15 wəhāyâ hanniləkāḏ b^aḥērem yiśśārēf bā’ēš ’ōṯwō wə’eṯ-kāl-’ăšer-lwō kî ‘āḇar ’eṯ-bərîṯ yəhwâ wəḵî-‘āśâ nəḇālâ bəyiśərā’ēl:

16 wayyašəkēm yəhwōšu‘a babōqer wayyaqərēḇ ’eṯ-yiśərā’ēl lišəḇāṭāyw wayyillāḵēḏ šēḇeṭ yəhûḏâ:

17 wayyaqərēḇ ’eṯ-mišəp^aḥaṯ yəhûḏâ wayyiləkōḏ ’ēṯ mišəp^aḥaṯ hazzarəḥî wayyaqərēḇ ’eṯ-mišəp^aḥaṯ hazzarəḥî lagəḇārîm wayyillāḵēḏ zaḇədî:

18 wayyaqərēḇ ’eṯ-bêṯwō lagəḇārîm wayyillāḵēḏ ‘āḵān ben-karəmî ḇen-zaḇədî ben-zer^aḥ ləmaṭṭēh yəhûḏâ:

19 wayyō’mer yəhwōšu‘a ’el-‘āḵān bənî śîm-nā’ ḵāḇwōḏ layhwâ ’ĕlōhê yiśərā’ēl wəṯen-lwō ṯwōḏâ wəhageḏ-nā’ lî meh ‘āśîṯā ’al-təḵ^aḥēḏ mimmennî:

20 wayy^a‘an ‘āḵān ’eṯ-yəhwōšu‘a wayyō’mar ’āmənâ ’ānōḵî ḥāṭā’ṯî layhwâ ’ĕlōhê yiśərā’ēl wəḵāzō’ṯ wəḵāzō’ṯ ‘āśîṯî:

21 wā’erə’eh wā’ēre’ ḇaššālāl ’adereṯ šinə‘ār ’^aḥaṯ ṭwōḇâ ûmā’ṯayim šəqālîm kesef ûləšwōn zâāḇ ’eḥāḏ ḥămiššîm šəqālîm mišəqālwō wā’eḥəməḏēm wā’eqqāḥēm wəhinnām ṭəmûnîm bā’āreṣ bəṯwōḵə hā’âŏlî wəhakesef t^aḥəteyhā:

22 wayyišəl^aḥ yəhwōšu‘a malə’āḵîm wayyāruṣû hā’ōhĕlâ wəhinnēh ṭəmûnâ bə’âŏlwō wəhakesef t^aḥəteyhā:

23 wayyiqqāḥûm mitwōḵə hā’ōhel wayəḇi’ûm ’el-yəhwōšu‘a wə’el kāl-bənê yiśərā’ēl wayyaṣṣiqum lifənê yəhwâ:

24 wayyiqq^aḥ yəhwōšu‘a ’eṯ-‘āḵān ben-zer^aḥ wə’eṯ-hakesef wə’eṯ-hā’adereṯ wə’eṯ-ləšwōn hazzâāḇ wə’eṯ-bānāyw wə’eṯ-bənōṯāyw wə’eṯ-šwōrwō wə’eṯ-ḥămōrwō wə’eṯ-ṣō’nwō wə’eṯ-’âŏlwō wə’eṯ-kāl-’ăšer-lwō wəḵāl-yiśərā’ēl ‘immwō wayy^a‘ălû ’ōṯām ‘ēmeq ‘āḵwōr:

25 wayyō’mer yəhwōšu‘a meh ‘ăḵarətānû y^a‘əkŏrəḵā yəhwâ bayywōm hazzeh wayyirəgəmû ’ōṯwō ḵāl-yiśərā’ēl ’eḇen wayyiśərəfû ’ōṯām bā’ēš wayyisəqəlû ’ōṯām bā’ăḇānîm:

26 wayyāqîmû ‘ālāyw gal-’ăḇānîm gāḏwōl ‘aḏ hayywōm hazzeh wayyāšāḇ yəhwâ mēḥărwōn ’apwō ‘al-kēn qārā’ šēm hammāqwōm hahû’ ‘ēmeq ‘āḵwōr ‘aḏ hayywōm hazzeh: f