Joshua (Yehoshua) Chapter 9

‎1 ‏וַיְהִ֣י כִשְׁמֹ֣עַ כָּֽל־הַמְּלָכִ֡ים אֲשֶׁר֩ בְּעֵ֨בֶר הַיַּרְדֵּ֜ן בָּהָ֣ר וּבַשְּׁפֵלָ֗ה וּבְכֹל֙ ח֚וֹף הַיָּ֣ם הַגָּד֔וֹל אֶל־מ֖וּל הַלְּבָנ֑וֹן הַֽחִתִּי֙ וְהָ֣אֱמֹרִ֔י הַֽכְּנַעֲנִי֙ הַפְּרִזִּ֔י הַחִוִּ֖י וְהַיְבוּסִֽי׃

‎2 ‏וַיִּֽתְקַבְּצ֣וּ יַחְדָּ֔ו לְהִלָּחֵ֥ם עִם־יְהוֹשֻׁ֖עַ וְעִם־יִשְׂרָאֵ֑ל פֶּ֖ה אֶחָֽד׃ פ

‎3 ‏וְיֹשְׁבֵ֨י גִבְע֜וֹן שָׁמְע֗וּ אֵת֩ אֲשֶׁ֨ר עָשָׂ֧ה יְהוֹשֻׁ֛עַ לִֽירִיח֖וֹ וְלָעָֽי׃

‎4 ‏וַיַּעֲשׂ֤וּ גַם־הֵ֙מָּה֙ בְּעָרְמָ֔ה וַיֵּלְכ֖וּ וַיִּצְטַיָּ֑רוּ וַיִּקְח֞וּ שַׂקִּ֤ים בָּלִים֙ לַחֲמ֣וֹרֵיהֶ֔ם וְנֹאד֥וֹת יַ֙יִן֙ בָּלִ֔ים וּמְבֻקָּעִ֖ים וּמְצֹרָרִֽים׃

‎5 ‏וּנְעָל֨וֹת בָּל֤וֹת וּמְטֻלָּאוֹת֙ בְּרַגְלֵיהֶ֔ם וּשְׂלָמ֥וֹת בָּל֖וֹת עֲלֵיהֶ֑ם וְכֹל֙ לֶ֣חֶם צֵידָ֔ם יָבֵ֖שׁ הָיָ֥ה נִקֻּדִֽים׃

‎6 ‏וַיֵּלְכ֧וּ אֶל־יְהוֹשֻׁ֛עַ אֶל־הַֽמַּחֲנֶ֖ה הַגִּלְגָּ֑ל וַיֹּאמְר֨וּ אֵלָ֜יו וְאֶל־אִ֣ישׁ יִשְׂרָאֵ֗ל מֵאֶ֤רֶץ רְחוֹקָה֙ בָּ֔אנוּ וְעַתָּ֖ה כִּרְתוּ־לָ֥נוּ בְרִֽית׃

‎7 ‏ויאמרו וַיֹּ֥אמֶר אִֽישׁ־יִשְׂרָאֵ֖ל אֶל־הַחִוִּ֑י אוּלַ֗י בְּקִרְבִּי֙ אַתָּ֣ה יוֹשֵׁ֔ב וְאֵ֖יךְ אכרות־ אֶֽכְרָת־ לְךָ֥ בְרִֽית׃

‎8 ‏וַיֹּאמְר֥וּ אֶל־יְהוֹשֻׁ֖עַ עֲבָדֶ֣יךָ אֲנָ֑חְנוּ וַיֹּ֨אמֶר אֲלֵהֶ֧ם יְהוֹשֻׁ֛עַ מִ֥י אַתֶּ֖ם וּמֵאַ֥יִן תָּבֹֽאוּ׃

‎9 ‏וַיֹּאמְר֣וּ אֵלָ֗יו מֵאֶ֨רֶץ רְחוֹקָ֤ה מְאֹד֙ בָּ֣אוּ עֲבָדֶ֔יךָ לְשֵׁ֖ם יְהוָ֣ה אֱלֹהֶ֑יךָ כִּֽי־שָׁמַ֣עְנוּ שָׁמְע֔וֹ וְאֵ֛ת כָּל־אֲשֶׁ֥ר עָשָׂ֖ה בְּמִצְרָֽיִם׃

‎10 ‏וְאֵ֣ת׀ כָּל־אֲשֶׁ֣ר עָשָׂ֗ה לִשְׁנֵי֙ מַלְכֵ֣י הָאֱמֹרִ֔י אֲשֶׁ֖ר בְּעֵ֣בֶר הַיַּרְדֵּ֑ן לְסִיחוֹן֙ מֶ֣לֶךְ חֶשְׁבּ֔וֹן וּלְע֥וֹג מֶֽלֶךְ־הַבָּשָׁ֖ן אֲשֶׁ֥ר בְּעַשְׁתָּרֽוֹת׃

‎11 ‏וַיֹּאמְר֣וּ אֵלֵ֡ינוּ זְֽקֵינֵינוּ֩ וְכָל־יֹשְׁבֵ֨י אַרְצֵ֜נוּ לֵאמֹ֗ר קְח֨וּ בְיֶדְכֶ֤ם צֵידָה֙ לַדֶּ֔רֶךְ וּלְכ֖וּ לִקְרָאתָ֑ם וַאֲמַרְתֶּ֤ם אֲלֵיהֶם֙ עַבְדֵיכֶ֣ם אֲנַ֔חְנוּ וְעַתָּ֖ה כִּרְתוּ־לָ֥נוּ בְרִֽית׃

‎12 ‏זֶ֣ה׀ לַחְמֵ֗נוּ חָ֞ם הִצְטַיַּ֤דְנוּ אֹתוֹ֙ מִבָּ֣תֵּ֔ינוּ בְּי֥וֹם צֵאתֵ֖נוּ לָלֶ֣כֶת אֲלֵיכֶ֑ם וְעַתָּה֙ הִנֵּ֣ה יָבֵ֔שׁ וְהָיָ֖ה נִקֻּדִֽים׃

‎13 ‏וְאֵ֨לֶּה נֹאד֤וֹת הַיַּ֙יִן֙ אֲשֶׁ֣ר מִלֵּ֣אנוּ חֲדָשִׁ֔ים וְהִנֵּ֖ה הִתְבַּקָּ֑עוּ וְאֵ֤לֶּה שַׂלְמוֹתֵ֙ינוּ֙ וּנְעָלֵ֔ינוּ בָּל֕וּ מֵרֹ֥ב הַדֶּ֖רֶךְ מְאֹֽד׃

‎14 ‏וַיִּקְח֥וּ הָֽאֲנָשִׁ֖ים מִצֵּידָ֑ם וְאֶת־פִּ֥י יְהוָ֖ה לֹ֥א שָׁאָֽלוּ׃

‎15 ‏וַיַּ֨עַשׂ לָהֶ֤ם יְהוֹשֻׁ֙עַ֙ שָׁל֔וֹם וַיִּכְרֹ֥ת לָהֶ֛ם בְּרִ֖ית לְחַיּוֹתָ֑ם וַיִּשָּׁבְע֣וּ לָהֶ֔ם נְשִׂיאֵ֖י הָעֵדָֽה׃

‎16 ‏וַיְהִ֗י מִקְצֵה֙ שְׁלֹ֣שֶׁת יָמִ֔ים אַחֲרֵ֕י אֲשֶׁר־כָּרְת֥וּ לָהֶ֖ם בְּרִ֑ית וַֽיִּשְׁמְע֗וּ כִּי־קְרֹבִ֥ים הֵם֙ אֵלָ֔יו וּבְקִרְבּ֖וֹ הֵ֥ם יֹשְׁבִֽים׃

‎17 ‏וַיִּסְע֣וּ בְנֵֽי־יִשְׂרָאֵ֗ל וַיָּבֹ֛אוּ אֶל־עָרֵיהֶ֖ם בַּיּ֣וֹם הַשְּׁלִישִׁ֑י וְעָרֵיהֶם֙ גִּבְע֣וֹן וְהַכְּפִירָ֔ה וּבְאֵר֖וֹת וְקִרְיַ֥ת יְעָרִֽים׃

‎18 ‏וְלֹ֤א הִכּוּם֙ בְּנֵ֣י יִשְׂרָאֵ֔ל כִּֽי־נִשְׁבְּע֤וּ לָהֶם֙ נְשִׂיאֵ֣י הָֽעֵדָ֔ה בַּֽיהוָ֖ה אֱלֹהֵ֣י יִשְׂרָאֵ֑ל וַיִּלֹּ֥נוּ כָל־הָעֵדָ֖ה עַל־הַנְּשִׂיאִֽים׃

‎19 ‏וַיֹּאמְר֤וּ כָל־הַנְּשִׂיאִים֙ אֶל־כָּל־הָ֣עֵדָ֔ה אֲנַ֙חְנוּ֙ נִשְׁבַּ֣עְנוּ לָהֶ֔ם בַּֽיהוָ֖ה אֱלֹהֵ֣י יִשְׂרָאֵ֑ל וְעַתָּ֕ה לֹ֥א נוּכַ֖ל לִנְגֹּ֥עַ בָּהֶֽם׃

‎20 ‏זֹ֛את נַעֲשֶׂ֥ה לָהֶ֖ם וְהַחֲיֵ֣ה אוֹתָ֑ם וְלֹֽא־יִֽהְיֶ֤ה עָלֵ֙ינוּ֙ קֶ֔צֶף עַל־הַשְּׁבוּעָ֖ה אֲשֶׁר־נִשְׁבַּ֥עְנוּ לָהֶֽם׃

‎21 ‏וַיֹּאמְר֧וּ אֲלֵיהֶ֛ם הַנְּשִׂיאִ֖ים יִֽחְי֑וּ וַ֠יִּֽהְיוּ חֹטְבֵ֨י עֵצִ֤ים וְשֹֽׁאֲבֵי־מַ֙יִם֙ לְכָל־הָ֣עֵדָ֔ה כַּאֲשֶׁ֛ר דִּבְּר֥וּ לָהֶ֖ם הַנְּשִׂיאִֽים׃

‎22 ‏וַיִּקְרָ֤א לָהֶם֙ יְהוֹשֻׁ֔עַ וַיְדַבֵּ֥ר אֲלֵיהֶ֖ם לֵאמֹ֑ר לָמָּה֩ רִמִּיתֶ֨ם אֹתָ֜נוּ לֵאמֹ֗ר רְחוֹקִ֨ים אֲנַ֤חְנוּ מִכֶּם֙ מְאֹ֔ד וְאַתֶּ֖ם בְּקִרְבֵּ֥נוּ יֹשְׁבִֽים׃

‎23 ‏וְעַתָּ֖ה אֲרוּרִ֣ים אַתֶּ֑ם וְלֹֽא־יִכָּרֵ֨ת מִכֶּ֜ם עֶ֗בֶד וְחֹטְבֵ֥י עֵצִ֛ים וְשֹֽׁאֲבֵי־מַ֖יִם לְבֵ֥ית אֱלֹהָֽי׃

‎24 ‏וַיַּעֲנ֨וּ אֶת־יְהוֹשֻׁ֜עַ וַיֹּאמְר֗וּ כִּי֩ הֻגֵּ֨ד הֻגַּ֤ד לַעֲבָדֶ֙יךָ֙ אֵת֩ אֲשֶׁ֨ר צִוָּ֜ה יְהוָ֤ה אֱלֹהֶ֙יךָ֙ אֶת־מֹשֶׁ֣ה עַבְדּ֔וֹ לָתֵ֤ת לָכֶם֙ אֶת־כָּל־הָאָ֔רֶץ וּלְהַשְׁמִ֛יד אֶת־כָּל־יֹשְׁבֵ֥י הָאָ֖רֶץ מִפְּנֵיכֶ֑ם וַנִּירָ֨א מְאֹ֤ד לְנַפְשֹׁתֵ֙ינוּ֙ מִפְּנֵיכֶ֔ם וַֽנַּעֲשֵׂ֖ה אֶת־הַדָּבָ֥ר הַזֶּֽה׃

‎25 ‏וְעַתָּ֖ה הִנְנ֣וּ בְיָדֶ֑ךָ כַּטּ֨וֹב וְכַיָּשָׁ֧ר בְּעֵינֶ֛יךָ לַעֲשׂ֥וֹת לָ֖נוּ עֲשֵֽׂה׃

‎26 ‏וַיַּ֥עַשׂ לָהֶ֖ם כֵּ֑ן וַיַּצֵּ֥ל אוֹתָ֛ם מִיַּ֥ד בְּנֵֽי־יִשְׂרָאֵ֖ל וְלֹ֥א הֲרָגֽוּם׃

‎27 ‏וַיִּתְּנֵ֨ם יְהוֹשֻׁ֜עַ בַּיּ֣וֹם הַה֗וּא חֹטְבֵ֥י עֵצִ֛ים וְשֹׁ֥אֲבֵי מַ֖יִם לָֽעֵדָ֑ה וּלְמִזְבַּ֤ח יְהוָה֙ עַד־הַיּ֣וֹם הַזֶּ֔ה אֶל־הַמָּק֖וֹם אֲשֶׁ֥ר יִבְחָֽר׃ פ

1 wayəhî ḵišəmō‘a kāl-hamməlāḵîm ’ăšer bə‘ēḇer hayyarədēn bâār ûḇaššəfēlâ ûḇəḵōl ḥwōf hayyām hagāḏwōl ’el-mûl halləḇānwōn h^aḥitî wəhā’ĕmōrî hakən^a‘ănî hapərizzî h^aḥiûî wəhayəḇûsî:

2 wayyiṯəqabəṣû y^aḥədāw ləhillāḥēm ‘im-yəhwōšu‘a wə‘im-yiśərā’ēl peh ’eḥāḏ: f

3 wəyōšəḇê ḡiḇə‘wōn šāmə‘û ’ēṯ ’ăšer ‘āśâ yəhwōšu‘a lîrîḥwō wəlā‘āy:

4 wayy^a‘ăśû ḡam-hēmmâ bə‘ārəmâ wayyēləḵû wayyiṣəṭayyārû wayyiqəḥû śaqqîm bālîm l^aḥămwōrêhem wənō’ḏwōṯ yayin bālîm ûməḇuqqā‘îm ûməṣōrārîm:

5 ûnə‘ālwōṯ bālwōṯ ûməṭullā’wōṯ bəraḡəlêhem ûśəlāmwōṯ bālwōṯ ‘ălêhem wəḵōl leḥem ṣêḏām yāḇēš hāyâ niqquḏîm:

6 wayyēləḵû ’el-yəhwōšu‘a ’el-hamm^aḥăneh hagiləgāl wayyō’mərû ’ēlāyw wə’el-’îš yiśərā’ēl mē’ereṣ rəḥwōqâ bā’nû wə‘atâ kirəṯû-lānû ḇərîṯ:

7 wayyō’mərû wayyō’mer ’îš-yiśərā’ēl ’el-h^aḥiûî ’ûlay bəqirəbî ’atâ ywōšēḇ wə’êḵə ’eḵərwōṯ- ’eḵərāṯ- ləḵā ḇərîṯ:

8 wayyō’mərû ’el-yəhwōšu‘a ‘ăḇāḏeyḵā ’ănāḥənû wayyō’mer ’ălēhem yəhwōšu‘a mî ’atem ûmē’ayin tāḇō’û:

9 wayyō’mərû ’ēlāyw mē’ereṣ rəḥwōqâ mə’ōḏ bā’û ‘ăḇāḏeyḵā ləšēm yəhwâ ’ĕlōheyḵā kî-šām^a‘ənû šāmə‘wō wə’ēṯ kāl-’ăšer ‘āśâ bəmiṣərāyim:

10 wə’ēṯ| kāl-’ăšer ‘āśâ lišənê maləḵê hā’ĕmōrî ’ăšer bə‘ēḇer hayyarədēn ləsîḥwōn meleḵə ḥešəbwōn ûlə‘wōḡ meleḵə-habāšān ’ăšer bə‘ašətārwōṯ:

11 wayyō’mərû ’ēlênû zəqênênû wəḵāl-yōšəḇê ’arəṣēnû lē’mōr qəḥû ḇəyeḏəḵem ṣêḏâ ladereḵə ûləḵû liqərā’ṯām wa’ămarətem ’ălêhem ‘aḇəḏêḵem ’ăn^aḥənû wə‘atâ kirəṯû-lānû ḇərîṯ:

12 zeh| l^aḥəmēnû ḥām hiṣəṭayyaḏənû ’ōṯwō mibātênû bəywōm ṣē’ṯēnû lāleḵeṯ ’ălêḵem wə‘atâ hinnēh yāḇēš wəhāyâ niqquḏîm:

13 wə’ēlleh nō’ḏwōṯ hayyayin ’ăšer millē’nû ḥăḏāšîm wəhinnēh hiṯəbaqqā‘û wə’ēlleh śaləmwōṯênû ûnə‘ālênû bālû mērōḇ hadereḵə mə’ōḏ:

14 wayyiqəḥû hā’ănāšîm miṣṣêḏām wə’eṯ-pî yəhwâ lō’ šā’ālû:

15 wayy^a‘aś lâem yəhwōšu‘a šālwōm wayyiḵərōṯ lâem bərîṯ ləḥayywōṯām wayyiššāḇə‘û lâem nəśî’ê hā‘ēḏâ:

16 wayəhî miqəṣēh šəlōšeṯ yāmîm ’^aḥărê ’ăšer-kārəṯû lâem bərîṯ wayyišəmə‘û kî-qərōḇîm hēm ’ēlāyw ûḇəqirəbwō hēm yōšəḇîm:

17 wayyisə‘û ḇənê-yiśərā’ēl wayyāḇō’û ’el-‘ārêhem bayywōm haššəlîšî wə‘ārêhem giḇə‘wōn wəhakəfîrâ ûḇə’ērwōṯ wəqirəyaṯ yə‘ārîm:

18 wəlō’ hikûm bənê yiśərā’ēl kî-nišəbə‘û lâem nəśî’ê hā‘ēḏâ bayhwâ ’ĕlōhê yiśərā’ēl wayyillōnû ḵāl-hā‘ēḏâ ‘al-hannəśî’îm:

19 wayyō’mərû ḵāl-hannəśî’îm ’el-kāl-hā‘ēḏâ ’ăn^aḥənû nišəb^a‘ənû lâem bayhwâ ’ĕlōhê yiśərā’ēl wə‘atâ lō’ nûḵal linəgō‘a bâem:

20 zō’ṯ n^a‘ăśeh lâem wəh^aḥăyēh ’wōṯām wəlō’-yihəyeh ‘ālênû qeṣef ‘al-haššəḇû‘â ’ăšer-nišəb^a‘ənû lâem:

21 wayyō’mərû ’ălêhem hannəśî’îm yiḥəyû wayyihəyû ḥōṭəḇê ‘ēṣîm wəšō’ăḇê-mayim ləḵāl-hā‘ēḏâ ka’ăšer dibərû lâem hannəśî’îm:

22 wayyiqərā’ lâem yəhwōšu‘a wayəḏabēr ’ălêhem lē’mōr lāmmâ rimmîṯem ’ōṯānû lē’mōr rəḥwōqîm ’ăn^aḥənû mikem mə’ōḏ wə’atem bəqirəbēnû yōšəḇîm:

23 wə‘atâ ’ărûrîm ’atem wəlō’-yikārēṯ mikem ‘eḇeḏ wəḥōṭəḇê ‘ēṣîm wəšō’ăḇê-mayim ləḇêṯ ’ĕlōhāy:

24 wayy^a‘ănû ’eṯ-yəhwōšu‘a wayyō’mərû kî hugēḏ hugaḏ l^a‘ăḇāḏeyḵā ’ēṯ ’ăšer ṣiûâ yəhwâ ’ĕlōheyḵā ’eṯ-mōšeh ‘aḇədwō lāṯēṯ lāḵem ’eṯ-kāl-hā’āreṣ ûləhašəmîḏ ’eṯ-kāl-yōšəḇê hā’āreṣ mipənêḵem wannîrā’ mə’ōḏ lənafəšōṯênû mipənêḵem wann^a‘ăśēh ’eṯ-hadāḇār hazzeh:

25 wə‘atâ hinənû ḇəyāḏeḵā kaṭṭwōḇ wəḵayyāšār bə‘êneyḵā l^a‘ăśwōṯ lānû ‘ăśēh:

26 wayy^a‘aś lâem kēn wayyaṣṣēl ’wōṯām mîyaḏ bənê-yiśərā’ēl wəlō’ hărāḡûm:

27 wayyitənēm yəhwōšu‘a bayywōm hahû’ ḥōṭəḇê ‘ēṣîm wəšō’ăḇê mayim lā‘ēḏâ ûləmizəb^aḥ yəhwâ ‘aḏ-hayywōm hazzeh ’el-hammāqwōm ’ăšer yiḇəḥār: f